بەنزینخانەکانی شاری تاران رووبەڕووی قەرەباڵغییەکی زۆر و ریزبەندیی درێژی ئۆتۆمبێلەکان بوونەتەوە، ئەمەش وەک ئاماژەیەک بۆ قووڵبوونەوەی کێشەی کەمیی سووتەمەنی و ئاڵۆزتربوونی بارودۆخی ئابووریی ئێران، بەپێی راپۆڕتێکی رۆژنامەی فاینەنشاڵ تایمز.

رێکخراوی باشترکردنی بەکارهێنانی وزەی ئێرانی رایگەیاندووە کە وڵاتەکە رووبەڕووی کورتهێنانی رۆژانەی نزیکەی 15 ملیۆن لیتر بەنزین بووەتەوە، لە کاتێکدا داواکاریی رۆژانە گەیشتووەتە 135 ملیۆن لیتر.

 رۆژنامەکە ئاماژەی بەوەش کردووە: گەمارۆی دەریایی ئەمریکا توانای تاران بە شێوەیەکی بەرچاو کەمکردووەتەوە بۆ دابینکردنی سووتەمەنی، هاوکات هێرشەکانی ئەمریکا و ئیسرائیل زیانیان بە بەشێک لە تواناکانی پاڵاوتنی نەوتی وڵاتەکە گەیاندووە.

لە لایەکی ترەوە، حکومەتی ئێران رایگەیاند: سیستمی پاڵپشتیی سووتەمەنی و بەخشینی بەنزین بە نرخی هەرزان چیتر لە سایەی بەرزبوونەوەی هەڵئاوسان و پچڕانی پێداویستییەکان توانای بەردەوامبوونی نییە.

مسعود پزیشکیان، سەرۆک کۆماری ئێران وتی: فرۆشتنی بەنزین بە کەمتر لە نرخی بازاڕ گوشارێکی زۆر دەخاتە سەر سەرچاوەکانی حکومەت کە بۆ پاڵپشتیی خۆراک و کرێکاران تەرخانکراون.

 

ئێران وەڵامی فراوانكردنی سزا ئابورییەكانی سەر وڵاتەكەی دەداتەوە و دەڵێت، تەنها لە بەرگریكردندا نامێننەوە و هێرشی توند دەكەن.

دوای ئەوەی وەزارەتی گەنجینەی ئەمریكا سزا ئابورییەكانی سەر ئێرانی قورستركرد و بە سزای روخاندنی ئێران ناوی برد، عەلی مەدەنیزادە وەزیری ئابوریی ئێران رایگەیان، وڵاتەكەی ئامادەیە و تەنها لە بەرگریكردندا نامێنێتەوە، بەڵكو هێرش دەكەنە سەر بەرژەوەندییەكانی ئەمریكا و كاردەكەن بۆ كەمكردنەوەی زیاتری هەناردەی نەوت لە كەنداوەوە.

وتیشی: چین و روسیا سزاكانی ئەمریكایان قبوڵ نییە و پێشبینیش دەكات وڵاتی زیاتر پشتیوانی ئێران بكەن.

عەباسی موحیبی وتەبێژی سوپای پاسدارانیش هۆشداریدا ئەگەر ژێرخانی ئێران بكەوێتە مەترسییەوە، لێدانی توند و گورزی بەهێز لە بەرژەوەندییەكانی ئەمریكا و رێڕەوەكانی وزە دەدەن.

حكومەتی چینیش سزاكانی ئەمریكا بە نایاسایی ناودەبات و دژایەتی خۆی بۆ سزاكان راگەیاندووە و دەڵێت، گەمارۆكانی ئەمریكا تاكلایەنەن و لەلایەن ئەنجومەنی ئاسایشەوە مۆڵەتیان پێنەدراوە.

ئیدارەی دۆناڵد ترەمپ سەرۆكی ئەمریكا ئامادەكاری دەكات بۆ هەڵوەشاندنەوەی 200 هەزار ڤیزای بیانی كە دوای گەیشتنیان بە ئەمریكا داوای مافی پەنابەرییان كردووە.

ئەو پلانە كە گەورەترین پرۆسەی هەڵوەشاندنەوەی ڤیزای بەكۆمەڵە لە مێژووی ئەمریكادا، لەلایەن لێپرسراوانی وەزارەتی دەرەوەی ئەو وڵاتەە ئاشكرا كراوە و رایگەیاندووە، ئیدارەی ترەمپ ئامادەكاری دەكات بۆ هەڵوەشاندنەوەی ڤیزای بازرگانی و گەشتیاریی نزیكەی 200 هەزار خەڵكی بیانی، كە دوای گەیشتنیان بە ئەمریكا داوای مافی پەنابەرییان كردووە و ڤیزاكانیان لە دوای ساڵانی 2016 بۆ 2026 دەركراون.

بەپێی لێدوانی ژمارەیەك لێپرسراوی ئەمریكاش كە قسەیان بۆ ئەسۆشیەتد پرێس كردووە، بڕیارەكە كۆتایی نییە و پێداچوونەوەی پێدا دەكرێت و ئەو كەسانە پۆلێن دەكرێن كە دەیانگرێتەوە، هەڵوەشاندنەوەی ڤیزای ئەو كەسانەش بە مانای دەستبەجێ دیپۆرتكردنەوەیان نایەت، بەڵكو پێگەكانیان وەك گەشتیار یاخود بازرگان نامێنێت و لە ئەمریكا دەمێننەوە تا ئەو كاتەی دۆسێكانیان یەكلادەكرێتەوە.

قوباد تاڵەبانی لە یادی لەدایکبوونی پێغەمبەری ئیسلام، محەمەد (د.خ) پەیامێکی بڵاوکردووەتەوە و تێیداهاتووە: بەرزڕاگرتنی ئەم بۆنەیە کە بەشێکە لە کولتوور و تایبەتمەندیی دیاری گەلەکەمان.

دەقی پەیامەکە

بەبۆنەی یادی پیرۆزی لەدایکبوونی پێغەمبەر (د.خ)، گەرمترین پیرۆزبایی لە موسڵمانانی کوردستان و جیهان دەکەم. بەرزڕاگرتنی ئەم بۆنەیە کە بەشێکە لە کولتوور و تایبەتمەندیی دیاری گەلەکەمان هاندەرمانە بۆ قووڵکردنەوەی گیانی تەبایی، ڕێزگرتنی یەکتر و بەهێزترکردنی پێکەوەژیان لە نێوان هەموو پێکهاتەکاندا.

تۆم باراک، باڵیۆزی ئەمریکا لە تورکیا و نێردراوی تایبەتی واشنتۆن بۆ سوریا، بە مەبەستی راوێژکردن بەپەلە بانگهێشتی واشنتۆن کرایەوە. ئەمەش دوای ئەوەی لێدوانەکانی لەسەر بەرزاییەکانی جۆلان ئاڵۆزییەکی دیپلۆماسیی گەورەی دروستکرد.

لۆرا لومەر، رۆژنامەنوس و چالاکوانی پارێزگارکاری ئەمریکی کە لە دونالد ترەمپەوە نزیکە، لە هەژماری خۆی لە تۆڕی کۆمەڵایەتیی ئیکس بڵاویکردەوە: بانگهێشتکردنەوەی باراک دوای ئەوە هات کە لە کۆتایی هەفتەی رابردوودا خەریک بوو جەنگێکی هەرێمی لە نێوان ئیسرائیل، تورکیا و سوریادا هەڵبگیرسێنێت؛ ئەوەش دوای ئەوەی ئیسرائیلی تۆمەتبار کردبوو بەوەی بە شێوازێکی نایاسایی بەرزاییەکانی جۆلانی داگیرکردووە.

لومەر لە زاری سەرچاوەیەک لە وەزارەتی دەرەوەی ئەمریکاوە گواستوویەتییەوە: ئەوەندە خوازیاری ڕۆیشتنی ئەوین، کە رەنگە کۆمپانیایەکی گواستنەوەی کەلوپەل بەکاربهێنین بۆ کۆکردنەوەی ئامێرەکانی. ناوبراو ئاماژەی بەوەش کرد: رەنگە باراک جارێکی تر نەتوانێت بگەرێتەوە بۆ ئەنکەرە.

دوای دروستبوونی شەپۆلێک لە ڕەخنە و داواکاری بۆ دەستلەکارکێشانەوەی، باراک پاشگەزبوونەوەی لە لێدوانەکانی راگەیاند و روونی کردەوە کە قسەکانی بۆ وەسفکردنی بارودۆخی مێژوویی ناوچەکە بووە، نەەک پشتگیری لە هەڵوێستی نەتەوە یەکگرتووەکان. هەروەها جەختی کردەوە: سیاسەتی ئەمریکا سەبارەت بە جۆلان لەلایەن سەرۆک ترەمپەوە لە ساڵی 2019 دیاریکراوە و هیچ گۆڕانکارییەکی بەسەردا نەهاتووە.

 

پێت هێگسێت وەزیری جەنگیی ئەمریكا دەڵێت، ئیدارەكەی دۆنتاڵد ترەمپ جارێكی تر بەكارهێنانی هێز لە دژی ئێران بەدوور نازانێت. 
هێگسێت بە رۆژنامەنووسانی راگەیاند، ئێران ناتوانێت بەرگەی ئەو فشارە ئابورییە بگرێت كە كراوەتە سەری، لەگەڵ ئەوەشدا ئیدارەكەی دۆناڵد ترەمپ بەكارهێنانی هێز لە گەروی هورمز یان هەر شوێنێكی تر لە دژی ئێران بەدوور نازانێت.
ئەو لێدوانەی هێگسێت لەكاتێكدایە نزیكەی شەش مانگە جەنگی نێوان واشنتۆن و تاران بەردەوامە و دانوستانەكانی گەیشتن بە ئاشتیش هیچ ئەنجامێكی نەبووە.

نێچیرڤان بارزانی، سەرۆکی هەرێمی کوردستان، بەبۆنەی یادی لەدایکبوونی پێغەمبەری ئیسلام محەممەد (د-خ) پەیامێکی پیرۆزبایی ئاڕاستەی موسڵمانانی کوردستان، عیراق و جیهان کرد و هیوای خواست ئەم یادە پیرۆزە خێر، خۆشی، ئاسایش و ئارامی بۆ هەمووان بەدیبێنێت.

لە پەیامەکەیدا، سەرۆکی هەرێمی کوردستان رایگەیاندووە: با ئەم یادە پیرۆزە بکەینە دەرفەتێک بۆ نوێکردنەوەی بەڵێن و پابەندبوونمان بە پەیامی پێغەمبەر (د.خ)، فێرکارییەکان و بەها بەرزەکانی لە بڵاوکردنەوەی خێر، دادپەروەری، ئاشتی و مرۆڤدۆستیدا، تا پێکەوە بەرەو داهاتوویەکی سەقامگیرتر و ئارامتر هەنگاو بنێین.

سەرۆکی هەرێمی کوردستان جەختیشی لەوە کردووەتەوە کە هیواداری خاوەنی ئەم یادە بێتە هاندەرێک بۆ بەهێزکردنی گیانی برادەرایەتی، لێبوردەیی و پێکەوەژیانی ئاشتییانە لە نێوان سەرجەم پێکهاتەکاندا.

سەرۆكی پەرلەمانی ئێران دەڵێت، دەبێت ئەمریكا پابەند بەڵێنەكانی بێت لەسەر بنەمای یاداشتنامەی لێكتێگەیشتن، فەرماندەی سوپای پاكستانیش دەڵێت، گفتوگۆ لەگەڵ ئێران پێشكەوتنی بەرچاوی بەخۆوە بینیوە.

محەمەد باقر قالیباف سەرۆكی پەرلەمانی ئێران لەگەڵ عاسم مونیر فەرماندەی سوپای پاكستان كۆبووەوە و رایگەیاند: بەدواداچوون بۆ جێبەجێكردنی مەرجەكانی یاداشتنامەی لێكتێگەیشتن دەكەن و دەبێت ئەمریكاش پابەند بێت بە بەڵێنەكانی لەسەر بنەمای یاداشتنامەی لێكتێگەیشتن.

وتیشی: پابەندبوونی لایەنەكانی ناو یاداشتنامەی لێكتێگەیشتن روونە، بەڵام ئەمریكا بەڵێنەكانی پێشێلكردووە و رێگریكردووە لە بەدیهێنانی سەقامگیریی لە ناوچەكەدا، ئەوەش هۆكارێكی تری بێمتمانەییە بە واشنتۆن.

عاسم مونیر فەرماندەوی سوپای پاكستانیش رایگەیاند: بەردەوام دەبێت لە هەوڵەكانی بە مەبەستی گەڕاندنەوەی سەقامگیریی بۆ ناوچەكە، وتیشی: پێشكەوتنی گەورە لە گفتوگۆ لەگەڵ لێپرسراوانی ئێران بەدیهاتووە و باسیان لە كاراكردنەوەی یاداشتنامەی لێكتێگەیشتنی ئیسلام ئابادیش كردووە بۆ چارەسەری ناكۆكییەكان.

پێشتریش مەسعود پزیشكیان سەرۆك كۆماری ئێران رایگەیاند: ئامادەن لەگەڵ وڵاتانی دراوسێ و ئیسلامیدا هاوكار بن لە بواری ئابوری و سیاسی و ئەمنیدا، وتیشی: پێویستە ئەمریكا لە بری فەرمان و ناچاركردن، زمان و شێوازی مامەڵەی لەگەڵ ئێران راستبكاتەوە و پابەندی بەڵێنەكانی بێت.

لە یەكەم كۆبوونەوەی هەڵسەنگاندندا بۆ پرۆسەی ئاشتی لە توركیا، بڕیاردرا چەند لیژنەیەكی لاوەكی بۆ جێبەجێكردنی یاسای ئاشتی پێكبهێنرێت.

یەكەم كۆبوونەوەی دەستەی چاودێریی بۆ جێبەجێكردنی یاسای هاوپشتی نیشتمانی و یەكگرتنی كۆمەڵایەتی، تایبەت بە چارەسەری پرسی كورد لە توركیا بە سەرۆكایەتی جەودەت یڵماز جێگری سەرۆك كۆماری توركیا بەڕێوەچوو هەڵسەنگاندن بۆ چۆنیەتی جێبەجێكردنی یاساكە كرا و چەند بڕیارێكیش دەركران.

ماڵپەری جمهوریەتی توركیا بڵاویكردووەتەوە، لەو كۆبوونەوەیەدا بڕیاردراوە چوار لیژنەی لاوەكی جیاواز پێكبهێنرێن كە بریتین لە لیژنەی هەماهەنگی كاروباری دادوەریی و یاسایی و لیژنەی بەدواداچوون و دۆزینەوە، لیژنەی یەكگرتوویی و یەكخستنی كۆمەڵایەتی و لیژنەی لەناوبردنی چەك.

ئاماژە بەوەشكراوە، حكومەت بە هەماهەنگی تەواو لەگەڵ هەموو دامەزراوەكان، بەردەوام دەبێت لە جێبەجێكردنی ئەو هەنگاوە مێژووییانە بۆ بەهێزكردنی یەكگرتنی كۆمەڵایەتی.

یەكەم كۆبوونەوەی دەستەی چاودێریی بۆ جێبەجێكردنی یاسای ئاشتی لە توركیا بەڕێوەچوو
لە كۆبوونەوەكەدا بڕیاردرا چوار لیژنەی لاوەكی بۆ جێبەجێكردنی یاسای ئاشتی پێكبهێنرێت

فایەق زێدان، سەرۆکی ئەنجومەنی باڵای دادوەریی عیراق، ئەمڕۆ سێشەممە بە سەردانێکی رەسمی گەیشتە شاری تارانی پایتەختی ئێران.

بەپێی زانیارییەکان، سەردانەکەی فایەق زێدان بۆ تاران یەک رۆژ دەخایەنێت و لەسەر بانگهێشتنامەیەکی رەسمیی غولامحوسێن موحسنی ئاژەیی، سەرۆکی دەسەڵاتی دادوەریی ئێران هاتوو.

هەروەها ئاماژە بەوەش کراوە کە ئامانج لەم سەردانە بەهێزکردنی پەیوەندییە هاوبەشەکانی نێوان بەغداد و تارانە، هاوکات تاوتوێکردنی چەندین دۆسیە و بابەتی دادوەری و یاسایی جێی بایەخی هەردوو وڵات دەبێت.

بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی یادی لەدایکبوونی پێغەمبەری ئیسلام محەممەد (د-خ) پەیامێکی پیرۆزبایی ئاڕاستەی موسڵمانانی کوردستان، عیراق و جیهان کرد.

لە پەیامەکەیدا سەرۆکی یەکێتیی نیشتمانیی کوردستان هیوای خواست کە ئەم یادە پیرۆزە ببێتە مایەی خێر و خۆشی بۆ گەلەی کورد، هاوکات بێتە هاندەرێک بۆ زیندووکردنەوەی بەها بەرزەکانی ئایینی پیرۆزی ئیسلام.

بەپێی ئاژانسی دەنگوباسی "ئەسۆشیەیتد پرێس"، بڕیارە ئەمڕۆ سێشەممە کەنەدا بە رەسمی باجی گومرگیی تۆڵەسەندنەوە لە دژی ئەمریکا رابگەیەنێت، ئەمەش وەک پەرەسەندنی ململانێیەکی بازرگانی کە دوای شکستی دانوستانەکان لەگەڵ ئیدارەی سەرۆک دونالد ترەمپ بە توندی تێکچووە.

ئەو بەرپرسە ئاماژەی بەوە کردووە. رۆژی دووشەممە، مارک کارنی سەرۆک وەزیرانی کەنەدا رایگەیاند کە رەنگە کەنەدا پێویستی بەوە بێت دەستبەرداری بنەمای "دۆلار بەرانبەر دۆلار" بێت لە سزادانی گومرگیدا، و لە جیاتی ئەوە پەنابباتە بەر رێکاری تۆڵەسەندنەوەی ئامانجدارتر.

روونیشی کردەوە: بەرپرسانی وڵاتەکەی دەستیان بە لێکۆڵینەوە لە چەندین بژاردە کردووە بە ئامانجی پاراستنی کرێکاران و کۆمپانیا کەنەدییەکان.

لە لایەکی ترەوە، دونالد ترەمپ، رۆژی دووشەممە، دیسانەوە ئاستی گرژییەکانی بەرزکردەوە و داوای لە سەرکردەکانی کەنەدا کرد ملکەچ بن بە پێچەوانەوە رووبەڕووی لێکەوتەی زۆر خراپتر دەبنەوە لەو باجانەی پێشتر سەپێندراون، هەروەها هەڕەشەی سەپاندنی باجی گومرگیی نوێی بە رێژەی 50٪ بۆ سەر ئۆتۆمبێل، پارچەی ئۆتۆمبێل و پۆڵای کەنەدی کرد.

پێشتر لە هەمان رۆژدا، کارنی واشنتۆنی تۆمەتبار کرد بەوەی هەوڵی بەچۆکدادانی کەنەدا دەدات و رایگەیاند کە داواکارییە بازرگانییەکانی ئەمریکا ئەو مەترسییانەی کەنەدای پشتڕاستکردووەتەوە کە واشنتۆن هەوڵی هەڵوەشاندنەوەی پیشەسازییە سەرەکییەکانی کەنەدا دەدات.

وەزارەتی گەنجینەی ئەمریکا بە رەسمی لابردنی سوریای لە لیستی دەوڵەتانی پاڵپشتی تیرۆر راگەیاند و تەواوی سزاکانی پەیوەندیدار بە تیرۆری لەسەر ئەو وڵاتە هەڵوەشاندەوە. 

ئەم هەنگاوەی واشنتۆن دوای ئەوە دێت کە رێکارە یاساییەکانی پەیوەست بە پێداچوونەوەی کۆنگرێس بێ هیچ ناڕەزایەتییەک کۆتاییان هات.

وەزارەتی گەنجینەی ئەمریکا ئاشکرای کرد، بڕیارەکە دەستبەجێ کاری پێدەکرێت و لەمەودوا سوریا چیتر ملکەچی بڕگە و رێساکانی تایبەت بە پاڵپشتییەکانی دەوڵەتی تیرۆر نییە.

هاوکات لەگەڵ ئەم بڕیارەدا، کۆتوبەندەکانی پەیوەست بە هاوکاری و یارمه‌تییەکانی وەزارەتی دەرەوەی ئەمریکا بۆ سوریا و رێکارەکانی قەدەغەکردنی کڕین و فرۆشتنی چەک لەسەر ئەو وڵاتە بەتەواوی هەڵگیران.

لە چوارچێوەی هەمان پێداچوونەوەدا، واشنتۆن هەردوو رێکخراوی "تەحریری شام" و "بەرەی نوسڕە"ی لە لیستی رێکخراوە تیرۆریستییە نێودەوڵەتییەکان دەرهێنا، ئەمەش وەک وەرچەرخانێکی جەوهەری لە سیاسەتی دەرەوەی ئەمریکا بەرامبەر دۆخی ناوچەکە ئەژمار دەکرێت.

بەڕێوەبەرایەتی هاتوچۆی هەولێر ئاگادارییەک ئاڕاستەی شۆفێران و هاووڵاتییان دەکات و رایدەگەیەنێت، بەیانی رۆژی سێشەممە، بەبۆنەی یادی لەدایکبوونی پێغەمبەر (د.خ)، تەواوی شەقامەکانی بەرەو ناو سەنتەری شاری هەولێر و دەوروبەری قەڵا دادەخرێن.

بەپێی راگەیەندراوێکی بەڕێوەبەرایەتی هاتوچۆی هەولێر، پرۆسەی داخستنی شەقامەکان لە سەعات 8:00ی بەیانییەوە دەستپێدەکات و هاتوچۆ لەو ناوچەیەدا تەنها بۆ پیادەڕۆ دەبێت.

هاتوچۆی هەولێر ئاماژەی بەوەشکردووە، ئەو رێکارانە تا کۆتاییهاتنی رێوڕەسمەکانی یادکردنەوەکە و چۆڵبوونی شەقامەکان لە هاووڵاتییان بەردەوام دەبێت، پاشان شەقامەکان بەڕووی هاتوچۆی شۆفێراندا دەکرێنەوە.

وەزارەتی گەنجینەی ئەمریکا هەڵمەتێکی فراوانی سزای ئابووری دژی ئێران و پشتیوانانی راگەیاند، کە کەرتە هەستیارەکانی وەک ئەتۆم، مووشەکی، نەوت، تەکنەلۆجیا، دراوی دیجیتاڵی، ئاڵتوون، فڕۆکەوانی و کەشتیوانی دەگرێتەوە.

سکۆت بێسێنت، وەزیری گەنجینەی ئەمریکا رایگەیاند، واشنتۆن کۆمەڵێک سزای نوێی بەسەر 60 کەسایەتی و کۆمپانیای پەیوەندیدار بە ئێرانەوە سەپاندووە. ئاماژەی بەوەش کرد کە سزا ئەمریکییەکان سەرجەم ئەو وڵات و لایەنانە دەگرێتەوە کە هاوکاری ئێران دەکەن و لەم رووەوە هیچ وڵات و لایەنێک پارێزراو نییە.

وەزیری گەنجینەی ئەمریکا جەختیشی کردەوە، وادەیەکی دیاریکراو بۆ وڵاتان دادەنرێت بۆ ئەوەی سەرجەم چالاکییەکان لەگەڵ تاران و رێکارەکانی داخستنی بانکە ئێرانییەکان جێبەجێ بکەن.

نێردەی تایبەتی ئەمریكا بۆ كاروباری سوریا و باڵیۆزی ئەمریكا لە توركیا لە لێدوانەكانی پێشووی لەسەر بەرزاییەكانی جۆلان پەشیماندەبێتەوە.

لە لێدوانێكیدا بۆ كەناڵێكی ئیسرائیلی تۆم باراك نێردەی تایبەتی ئەمریكا بۆ كاروباری سوریا و باڵیۆزی ئەمریكا لە توركیا لەبارەی لێدوانەكانی پێشووی سەبارەت بە بەرزاییەكانی جۆلان و ناساندنی وەك خاكێكی داگیركراوی دژ بە بڕیارەكانی نەتەوە یەكگرتووەكان، رونكردنەوەی دا و ئاماژەی بەوە كرد، قسەكانی تەنها گێڕانەوەی روداوە مێژووییەكان بووە لە وەڵامی پرسیارێكدا سەبارەت بە لكاندنی خاكی لوبنان بە ئیسرائیلەوە.

باراك باسی لەوەش كرد، ئاماژەدان بە هەڵوێستی نەتەوە یەكگرتووەكان بۆ سەلماندنی ئەو بۆچوونە بووە كە هەر خاكێك بە هێز دەستی بەسەردا بگیرێت، بۆ چەندین نەوە بە كێشە لەسەر دەمێنێتەوە.

باراك جەختی كردەوە كە ترەمپ لە ساڵی 2019دا سیاسەتی ئەمریكای لەسەر بەرزاییەكانی جۆلان دیاری كردووە و ئەو سیاسەتەش هیچ گۆڕانكارییەكی بەسەردا نەهاتووە.

ئەم رونكردنەوەیەی تۆم باراك دوای ئەوە دێت كە یسرائیل كاتز وەزیری بەرگریی ئیسرائیل لێدوانەكانی باراكی بە پڕ لە چەواشەكاری و دژ بە هەڵوێستی دۆناڵد ترەمپ سەرۆكی ئەمریكا ناوبرد.