کیەر ستارمەر، سەرۆک وەزیرانی پێشووتری بەریتانیا، نیازی خۆی بۆ دەستلەکارکێشانەوە لە پۆستی ئەندامێتی پەرلەمان لە بازنەی (هۆڵبۆرن و سانت پانکراس) راگەیاند، ئەم هەنگاوەش دەبێتە هۆی ئەنجامدانی هەڵبژاردنی لاوەکی لەو بازنەیەی لەندەن.

ستارمەر لە لێدوانێکدا بۆ رۆژنامەی "کامدن نیو جۆرناڵ" رایگەیاند: نوێنەرایەتیکردنی باشترین بازنەی هەڵبژاردن لە وڵاتدا شەرەفێکی گەورە بووە بۆی، هەروەها ئاماژەی بەوە کرد لە قۆناغی داهاتوودا سەرنج دەخاتە سەر دۆسیە نێودەوڵەتییەکان، لەوانەش بەرگری، ئاسایش، بازرگانی و تەکەنۆلۆژیا لە جیهانێکدا کە بە خێرایی لە گۆڕاندایە، لەگەڵ بەردەوامبوونی لە کارکردن بۆ رووبەڕووبوونەوەی توندوتیژی دژی ژنان و کچان، ئەو دۆسیەیەی پێش ئەوەی ببێتە پەرلەمانتار دەستی پێکردبوو.

ستارمەر جەختی کردەوە: میراتەکەی وەکو پەرلەمانتار و سەرۆک وەزیران لە داهاتوودا سوود بە بازنەکەی دەگەیەنێت، بەتایبەت لە دۆسیەکانی نیشتەجێبوونی گونجاو، پەروەردە و کەمکردنەوەی تاوانەکانی بەکارهێنانی چەقۆ.

روونیشی کردەوە: بڕیارەکە دوای بیرکردنەوەیەکی قووڵ هاتوو بە تەواوی پشتیوانی خۆی بۆ سەرۆک وەزیرانی ئێستا و حکومەتی کارگێڕی دەردەبرێت.

ئەم دەستلەکارکێشانەوەیە دوای ئەوە هات کە پارتی کار 1،496 راوێژکار و 38 ئەنجومەنی خۆجێیی لەدەستدا؛ شکستێک کە بە ریکۆرد ئەژمار کرا و رێگەی خۆش کرد بۆ ئاڵنگاری لەسەر سەرکردایەتی کردنی ستارمەر، کە لە تەممووزی 2024 دوای سەرکەوتنێکی گەورە پۆستەکەی وەرگرتبوو بەڵام دواتر تووشی دابەزینی زۆری جەماوەری بووەوە.

 

قوباد تاڵەبانی هەوڵەکانی حکومەتی چین و کونسوڵخانەی ئەو وڵاتە لە هەولێر بەرزدەنرخێنێت و ئاماژەی بەوەشداوە: پێشوازی دەکەین لەوەی چین بەشدارییەکی کاریگەرتری هەبێت لە گەشەپێدانی کوردستان. 

قوباد تاڵەبانی رایگەیاندووە: لەگەڵ لیۆ جون، کونسوڵی گشتیی چین گفتوگۆمان کرد لەبارەی پرۆسەی گەشەپێدانی کوردستان. پێشوازی دەکەین لەوەی چین بەشدارییەکی کاریگەرتری هەبێت لە گەشەپێدانی کوردستان.

قوباد تاڵەبانی ئاماژەی بەوەشداوە: بە پێزانینەوە لە هەوڵەکانی حکومەتی چین و کونسوڵخانەی ئەو وڵاتە دەڕوانین بۆ کارئاسانیکردن بۆ وەرگرتنی خوێندکارانی هەرێم لە زانکۆکانی ئەو وڵاتەدا.

 

 

 

ڤلادیمێر پوتنی سەرۆکی روسیا رایگەیاند، گەلی روسیا بە هاوسۆزییەوە لە پشت گەلی ئێران وەستاوە و بەرگریی لە بەرژەوەندییە باڵاکانی نێوانیان دەکەن و بەڵێنیش دەدات هاوکاری ئێران بکات.

لە میانی کۆبونەوەی لەگەڵ مەسعود پزیشکیانی سەرۆک کۆماری ئێران، لە  لوتکەی رێکخراوی هاریکاریی شەنگهای ڤلادیمێر پوتنی سەرۆکی روسیا جەختی لە پەیوەندی نێوان هەردوو وڵات کردەوە.

پوتن رایگەیاند، روسیا و ئێران سەرەڕای رەوشی سەربازی و سیاسی، هاوشێوەی ساڵی رابردوو پەیوەندییە ئابورییەکانیان دەپارێزن .

ئاماژەی بەوەشکرد، لەم کاتە سەختەدا وەک روسیا هەوڵدەدەن هاوکاری تاران بکەن و کەلوپەلی پێویستی بۆ دابین بکەن.

لە میانی دیدارەکەدا پوتین داوای لە هاوتا ئێرانییەکەی کرد، سڵاوی خۆی بە موجتەبا خامنەیی رابەری باڵای ئێران بگەیەنێت و جەختیشی لەسەر قووڵایی پەیوەندییە دووقۆڵییەکان کردەوە.

نزار ئامێدی، سەرۆک کۆماری عیراق، ئەمڕۆ سێشەممە، لە کۆشکی سەلام لە بەغداد، بە ئامادەبوونی د. خالید شوانی، وەزیری داد، پێشوازی لە وەفدێکی کەسایەتی، سەرۆک هۆزەکانی قەزای خانەقین کرد.

لە کۆبوونەوەکەدا، چەندین پرسی پەیوەندیدار بە رەوشت خزمەتگوزاری، ئابووری و گەشەپێدانی قەزای خانەقین تاوتوێ کران و تیشک خرایە سەر رێگەچارەکانی وەڵامدانەوەی داواکارییەکانی دانیشتووانی ناوچەکە.

سەرۆک کۆمار جەختی لەوە کردەوە: پێکەوەژیانی ئاشتییانە و تەبایی نێوان تەواوی پێکهاتەکانی خانەقین، بنەمای سەرەکیی بەرەوپێشبردنی ناوچەکە و بەدیهێنانی گەشەپێدانی بەردەوامە.

هەروەها ئاماژەی بە گرنگیی بەهێزکردنی گیانی لێکتێگەیشتن و هاوکاری کرد بە مەبەستی پاراستنی ئاشتیی کۆمەڵایەتی و بەرزکردنەوەی ئاستی متمانەی یەکتری.

لە بەشێکی تری ئاخاوتنەکەیدا، سەرۆک کۆمار جەختی لە پێویستیی گوێگرتن لە داواکارییەکانی خەڵکی خانەقین کردەوە و رایگەیاند: لە رێگەی دامەزراوە و لایەنە پەیوەندیدارەکانەوە بەدواداچوونی جدی بۆ چارەسەرکردنی گرفتەکان دەکرێت.

لە بەرانبەردا، ئەندامانی وەفدەکەی قەزای خانەقین خۆشحاڵی و پێزانینی خۆیان بۆ گرنگیدانی سەرۆک کۆمار بە دۆخی قەزاکە دەربڕی و جەختیان لە گرنگیی بەردەوامیی هەوڵەکان کردەوە بۆ باشترکردنی ئاستی خزمەتگوزارییەکان و هێنانەدی خواستی هاووڵاتییانی شارەکە.

دەزگای ئاسایشی نیشتمانیی عیراق، ئەمڕۆ سێشەممە، رایگەیاند لە چوارچێوەی ئۆپراسیۆنی "سێبەری دادپەروەری"دا کە لەلایەن دەزگاکەوە جێبەجێ دەکرێت، تاوەکو ئێستا زیاتر لە 500 تۆمەتبار دەستگیر کراون.

ئەرشەد حاکم، وتەبێژی رەسمیی دەزگای ئاسایشی نیشتمانی رایگەیاند: زانیارییەکانی ئۆپراسیۆنی سێبەری دادپەروەری کە بە هەماهەنگی لەگەڵ لایەنە دادوەرییەکان جێبەجێ دەکرێت، پێکهاتووە لە جێبەجێکردنی بڕیارەکانی دەستگیرکردنی پێشوو و ئێستا لە بەغداد و پارێزگاکان.

ناوبراو روونیشی کردەوە: تاوەکو ئێستا زیاتر لە 500 تۆمەتبار دەستگیر کراون و ئۆپراسیۆنەکەش بۆ بەدواداچوون و دەستگیرکردنی داواکراوانی تر بەردەوامە.

میدیاکانی سوریا رایانگەیاند، ئەمڕۆ سێشەممە کۆگایەکی تەقەمەنی لە سوریا تەقیوەتەوە.

بەپێی هەواڵێکی میدیاکانی سوریا: ئەمڕۆ کۆگایەکی تەقەمەنی لە گەڕەکی رۆژئاوا لە شارۆچکەی بنش لە گوندەواری ئیدلب لە باکوری رۆژئاوای سوریا تەقیوەتەوە، بەبێ ئەوەی تا ئێستا هۆکاری تەقینەوەکە بزانرێت.

ئاماژە بەوەش کراوە: هێزە ئەمنییەکان دەستبەجێ شوێنی روداوەکەیان گەمارۆ داوە و تیمەکانی بەرگریی شارستانیش دەستیان بە کوژاندنەوەی ئەو ئاگرە کردووە کە لە ئەنجامی تەقینەوەی کۆگاکەوە کەوتووەتەوە.

ئەمریكا گرێبەستی فرۆشتنی چەندین هێلیكۆپتەری جەنگیی و كەرەستەی سەربازی بە عیراق پەسەندكرد كە بەهاكەی دەگاتە نزیكەی 800 ملیۆن دۆلار.

وەزارەتی دەرەوەی ئەمریكا لە راگەیاندراوێكدا ئاشكرایكردووە، دوای ماوەیەكی زۆر لە گفتوگۆ و دانوستان، گرێبەستی فرۆشتنی چەندین هێلیكۆپتەری جەنگیی و كەرەستەی سەربازییان بە عیراق پەسەندكردووە كە بەهاكەی دەگاتە نزیكەی 800 ملیۆن دۆلار و هێلیكۆپتەرەكانی جۆری بێڵ 412 و بێڵ 407 و سیستمەكانی پەیوەندی و ئاراستەكردنی موشەك دەگرێتەوە.

ئاماژەی بەوەشكردووە، بڕیارە كۆمپانیای بێڵ-تێكسترۆن ئەركی جێبەجێكردنی گرێبەستەكە بگرێتە ئەستۆ، ئیدارەی ئەمریكاش بە رەسمی كۆنگرێسی لەو بڕیارە ئاگادار كردووەتەوە و یاسادانەرانیش 30 رۆژ مۆڵەتیان هەیە بۆ پێداچوونەوە بە وردەكارییەكان.

وەزارەتی دەرەوەی ئەمریكا جەختیشیكردووەتەوە، ئەو هەنگاوە دوای داواكارییەكی پێشووتری حكومەتی عیراق دێت بە مەبەستی بەهێزكردنی تواناكانی سوپا و پاراستنی ئاسایشی وڵاتەی.

فراکسیۆنی یەکێتی لە ئەنجومەنی نوێنەرانی عیراق، لەبارەی رەوشی خانەقین و دیالە راگەیەندراوێكی بڵاوکردەوە و تێیدا هاتووە؛ پێویستە بەپێی دەستوری هەمیشەیی عیراق و یاسا بەرکارەکانی عیراق مامەڵەی لەگەڵ بکرێت.

ئاماژە بەوەشکراوە، چالاکی مەدەنی و ئاشتیانە مافێکی دەستەبەرکراوی دەستورییە  و داوا دەکەن دەستگیرکراوەکان ئازاد بکرێن و هەرچی فەرمانی گرتن بۆ سیاسیەکان و چالاکوان و گەنجان دەرچووە هەڵبوەشێنرێتەوە.

 

راگەیەنراوێک لە فراکسیۆنی یەکێتی لە ئەنجومەنی نوێنەرانی عێراقەوە سەبارەت بە دۆخی خانەقین

بەوپەڕی نیگەرانیەوە چاودێری دۆخی خانەقین و ناوچە کوردستانیەکانی دیالە دەکەین، پێویستە بەپێی دەستوری هەمیشەیی عێراق و یاسا بەرکارەکانی عێراق مامەڵەی لەگەڵ بکرێ.

چالاکی مەدەنی و ئاشتیانە مافێکی دەستەبەرکراوی دەستورییە، بەتایبەتی ئەگەر مەسەلەکە جێبەجێکردنی دەستور و مادەی ١٤٠ بێت.

داوا دەکەین دوور لەزەبری هێز و دەستگیرکردن مامەڵە لەگەڵ دۆخەکە بکرێ و هەستیاری و تایبەتمەندی دۆخی خانەقین و ئەو ناوچانە رەچاوبکرێ.

داوا دەکەین دەستگیرکراوەکان ئازاد بکرێن و هەرچی فەرمانی گرتن بۆ سیاسیەکان و چالاکوان و گەنجان دەرچووە هەڵبوەشێنرێتەوە.

پێویستە گۆڕینی دیمۆگرافی و بەقەزاکردنی جەلەولا و قەرەتەپە و لابردنی ناحیەکانی سەعدیە و قەرەتەپە هەڵبوەشێنرێتەوەو بەپێی دەستور و مادەی ١٤٠ مامەڵەی لەگەڵدا بکرێ و هەموو ئەو رێکارانەی پێچەوانەی دەستورن رابگیرێن.

لەکۆتاییدا پەیاممان بۆ خەڵکی سەربەرزی خانەقین و ناوچە کوردستانیەکانی دیالەیە، دەزانین لەژێر فشاری زۆردان و ناوچەکەتان رووبەرووی کێشە و گرفتی زۆر بۆتەوە، داواتان لێدەکەین بەئارامی و بەپێی دەستورو یاسا داکۆکی لەمافەکانتان بکەن و دڵنیاتان دەکەینەوە ئێمە لە فراکسیۆنی یەکێتی پشتیوانتان دەبین و داکۆکیکاری دەستوری و یاساییتان دەبین.

فراکسیۆنی یەکێتی لە ئەنجومەنی نوێنەرانی عێراق

بەڕێوەبەرایەتی بازرگانی خۆراکی سلێمانی، دابەشکردنی سەبەتەی پێنجەمی بەشەخۆراکی بۆ مانگی هەشت راگەیاند، کە لە شەش جۆر خۆراک پێکهاتوە.

ئەمڕۆ سێشەممە، بەڕێوەبەرایەتی بازرگانی خۆراکی سلێمانی لە راگەیەندراوێکدا ئاگادارییەکی ئاڕاستەی بریکارەکانی دابەشکردنی خۆراک لە ناوشار و دەرەوەی شار کردەوە سەبارەت بە دابەشکردنی بەشەخۆراکی سەبەتەی پێنجەم.

بە گوێرەی راگەیەندراوەکە، بۆ ئەم مانگە بۆ هەر هاووڵاتییەک سێ کیلۆ برنج، یەک کیلۆ شەکر و دەبەیەک زەیتی یەک لیتری، نیوکیلۆ نیسک، نیوکیلۆ لەتکە نۆک و 400 گرام دۆشاوی تەماتەی پێدەدرێت.

بەرێوەبەرایەتییەکە، وەکیلەکانیشی ئاگادارکردوەتەوە، کاتی دابەشکردنی خۆراکی مانگانە رەچاوی مادەکان بکەن، دەرکەوت هەر مادەیەک خراپە و بە کەڵکی خواردن نایەت دابەشی نەکەن بە سەر هاووڵاتیاندا، کۆمپانیای خۆراک ئاگادار بکەن تا بۆیان بگۆڕن.

کاروان یاروەیس، لێپرسراوی مەڵبەندی خانەقینی یەکێتی بە کوردسات نیوزی رایگەیاند، بە مەبەستی چارەسەرکردنی گرفتەکانیان وەفدێکی ناوچە دابڕێنراوەکان بۆ خستنەڕوی کێشەکانیان لە بەغدان و لەگەڵ لێپرسراواندا کۆدەبنەوە.

کاروان یاروەیس ئاماژەی بەوەکردوە، ئەمڕۆ وەفدێکی هاوبەشی پێکهاتە جیاوازەکانی خانەقین و ناوچە دابڕێندراوەکان بۆ چارەسەری گرفتەکان لە بەغدادن و لەگەڵ نزار ئامێدیی سەرۆک کۆماری عیراق، هادی عامریی سەرۆکی لیژنەی باڵای مادەی 140 و خالید شوانی، وەزیری داد کۆدەبنەوە.

بڕیارە لە کۆبونەوەکەدا، وەفدەکە لە رێگەی یاداشتێکی 12 خاڵییەوە داواکاری و کێشە سەرەکییەکانی دەڤەری خانەقین و سنورەکە بخەنە ڕوو.

ئەمەش لە کاتێکدایە، بەهۆی کەمیی خزمەتگوزارییەکان و ناڕەزایەتی بەرانبەر پرۆسەی دەستکاریکردنی دیموگرافیای ناوچەکە، هاووڵاتییان ویستیان خۆپیشاندان بکەن، بەڵام دەسەڵاتی خۆجێیی پارێزگای دیالە رێگری لێکردن و فەرمانی دەستگیرکردنی بۆ 41 چالاکوانی سیاسی و ڕۆژنامەنووسی شارەکە دەرکرد.

دانیشتوانی ناوچەکە جەخت دەکەنەوە ،کە خانەقین شاری پێکەوەژیانە، بەڵام بڕیارە شۆڤێنییەکان بوونەتە هۆی دروستبوونی هەستی ستەم و چەوسانەوە لەلایەن پێکهاتەی کوردی ئەو ناوچەیەوە.

 

كەشناسیی عیراق دەستپێكی وەرزی پاییزی راگەیاند و دەڵێت، لە ئەمڕۆ بەدواوە پلەكانی گەرما بەشێوەیەكی بەرچاو گۆڕانكارییان بەسەردادێت.

دەستەی كەشناسیی و بومەلەزەزانی عیراق رایگەیاند، لە ئەمڕۆوە كەشی عیراق بە گشتیی گۆڕانكاریی بەسەردا دێت و دەچێتە ناو كەشێكی پاییزە و فێنكەوە، چونكە بەپێی پێشبینییەكان، پلەكانی گەرما لە ئەمڕۆوە گۆڕانكاری بەرچاویان بەسەردا دێت و تا كۆتایی ئەم مانگەش پلەكانی گەرما زیاتر نزم دەبنەوە وەك ئامادەكارییەك بۆ چوونە ناو چالاكترین نیوەی وەرزی بارانبارین.

كەشناسیی عیراق ئاماژەی بەوەشكردووە، سەرەڕای ئەوەی لە سەرەتای مانگی ئەیلولدا هەندێك لە تایبەتمەندییەكانی كەشی هاوینە دەمێنێتەوە، بەڵام بە گشتی شەوان و بەرەبەیان فێنك دەبێت و تیشكی خۆریش وەك مانگەكانی هەشت و حەوت هەراسانكەر نابێت.

 

عەبدولناسر هیمەتی، سەرۆکی بانکی ناوەندیی ئێران رایگەیاند، وڵاتەکەی توشی دارمانی ئابوری سەخت نەبووە و ئەگەری هەڵئاوسانی گەورەش لاوازە، جەختیش لە بونی دراوی بیانی پێوسیت دەکاتەوە

ئەمڕۆ سێشەممە، سەرۆکی بانکی ناوەندیی ئێران رایگەیاند، گەمارۆ و سزاکانی ئەمریکا کاریگری گەورەی لەسەر وڵاتەکەی کردوە، بەڵام ئەگەری داڕمانی ئابوری وڵاتەکەی زۆر لاوازە.

شەوی رابردوو  دۆناڵد ترەمپ رایگەیاند، ئابوری ئێران بە تەواوەتی داڕماوە و هیمەتی لە وەڵامی ئەو پەیامەدا دەڵێت؛ ئەو قسەیە بە هیچ شێوەیەک راست نییە.

ناوبراو ئاماژەی بەوەشکردوە، وڵاتەکی بڕی پێویست دراوای بیانی لە بەردەستدایە و بانکی ناوەندیی ئامادەیە زیاتر لە دوو ملیار یۆرۆ بخاتە بازاڕەوە.

ئەم لێدوانانەی سەرۆکی بانکی ناوەندی ئێڕان  لە کاتێکدایە، بەهای تمەن بەرانبەر دۆلار بەردەوامە لە دابەزین و لە ئێستادا 100 دۆلاری ئەمریکی نزیکە لە 21 ملیۆن تمەن.

جی ‌دی ڤانسی جێگری سەرۆکی ئەمریکا رایگەیاند، سەرکردەکانی ئێران لە گەروی هورمزدا شێتانە رەفتاردەکەن و تەنانەت تەقە لە کەشتیی هاوپەیمانەکانیشیان دەکەن.

جێگری سەرۆکی ئەمریکا، لە لێدوانێکدا بۆ کەناڵی فۆکس نیوز سەبارەت بە جەنگی ئێران رایگەیاند، دەسەڵاتدارانی ئێران بەراستی شێتانە رەفتار دەکەن و فەرمانڕەوایانی ئەو وڵاتە لە بەرانبەر پێشهاتەکاندا ژیری و پلانی ستراتیژیی پێویستیان نییە.

ڤانس ئاماژەی بەوەداوە، کە لەلای ئەوە سەیرە، تەنها بە مەبەستی رێگریکردن لە رەوتی ئازادی هەناردەکردنی نەوت و گاز، ئێرانییەکان تەقە لە هاوپەیمانەکانی خۆشیان دەکەن.

ڤانس دەشڵێت؛ ئەوان پێشبینی ئەوکارەی تارانیان کردوە و تەواوی سەرنج و تەرکیزی ئەمریکا لەسەر دەستەبەرکردنی ئازادیی گەشەی بازرگانی و مسۆگەرکردنی هاتوچۆی کەشتییەکانە لە گەروی هورمزدا.

ئیسماعیل بەقائی، وتەبێژی وەزارەتی دەرەوەی ئێران، رەخنەی توندی لە هەڵوێستی یەکێتیی ئەوروپا گرت بەرانبەر جەنگی ئابوریی ئەمریکا دژ بە وڵاتەکەی.

بەقائی رایگەیاند، پشتیوانیکردنی یەکێتیی ئەوروپا لە فشارە ئابورییەکانی واشنتن، پێشێلکردنی رونی یاسا نێودەوڵەتییەکان و یاساکانی خودی ئەوروپایە.

ناوبراو ئاماژەی بەوەشکرد، ئەوکارە  پێچەوانەی ئەو بەهایانەیە، کە یەکێتییەکە بانگەشەی بۆ دەکات.

وتەبێژی وەزارەتی دەرەوەی ئێران دەڵێت؛  ناکرێت ئەوروپا لەلایەکەوە هاوکار و پشتڕاستکەرەوەی تیرۆری ئابوریی ئەمریکا بێت بۆ سەر گەلی ئێران،لەلایەکی دیکەشەوە بانگەشەی هەوڵدان بۆ هێورکردنەوەی گرژییەکان و چەسپاندنی سەقامگیری لە ناوچەکەدا بکات.

ئەمە لە کاتێکدایە رۆژی دووشەممە، یەکێتیی ئەوروپا رایگەیاند، لەگەڵ ئەمریکا و وڵاتانی گروپی حەوت لە فشارکردن بۆسەر ئێران  بەردەوام دەبن.

سبەینی کرێکارانی خانەنسینکراو موچەی مانگی هەشت وەردەگرن و داوایان لیدەکرێت سەردانی بانکی فیدڕاڵی بکەن.

بەڕێوەبەرایەتیی گشتیی کار و دەستەبەری کۆمەڵایەتی بڵاویکردوەتەوە،  سبەینێ موچەی کرێکارانی خانەنشین کراو دەتوانن موچەکانیان بۆ مانگی هەشت وەرگرن.

بەرێوەبەرایەتییەکە راگەیەندراوێکی بڵاوکردوەتەوە و تێیدا هاتووە؛ ئاگاداری کرێکارانی خانەنشینکراو دەکات، سبەینێ  دەست بە دابەشکردنی موچەکانیان بۆ مانگی ئاب دەکرێت.

ئاماژە بەوەشکراوە، بۆ وەرگرتنی موچەکانیان، کرێکارانی خانەنشینکراو دەتوانن سەردانی بانکی فیدراڵی بکەن.

پێگەی ئەکسیۆس بڵاویکردوەتەوە، بە ئامانجی رێگری لە ئێران لە دوبارە بنیاتنانەوەی توانا راداری و موشەکییەکانی دۆناڵد ترەمپ و یاریدەدەرە باڵاکانی تاوتوێی ئەنجامدانی هێرشی سەربازیی سنوردار دەکەن بۆسەر ئێران لە گەروی هورمز.

ئەکسیۆس لە زاری لێپرسراوانی باڵای ئەمریکاوە بڵاویکردوەتەوە، دۆناڵد ترەمپی سەرۆکی ئەمریکا دەیەوێت بە هێرشی سنوردار تواناکانی ئێران لە گەروی هورمز لاواز بکات.

ئەکشیۆس دەڵێت؛  پلانەکە لەلایەن فەرماندەیی ناوەندیی هێزەکانی ئەمریکا (سێنتکۆم) ئامادەکراوە و لەلایەن وەزیری جەنگییشەوە پاڵپشتی دەکرێت، ئامانج لەم پلانە کەمکردنەوەی مەترسیی هێرشەکانی ئێرانە بۆ سەر کەشتییە نەوتهەڵگرەکان و کەشتییە جەنگییەکانی ئەمریکا.

ئەکسیۆس ئاشکرای کردوە، سێنتکۆم پێیوایە سوپا پێویستی بە ئەنجامدانی هێرشی خولیی و بەردەوام هەبێت بۆ رێگریکردن لە بەهێزبوونه‌وه‌ی سیستمی بەرگریی ئاسمانی و موشەکیی ئێران، تا بتوانرێت هاتوچۆی رۆژانەی کەشتییەکان لە کەنداو بە ئارامی مسۆگەر بكرێت.