کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و رایگەیاند، پلەکانی گەرما کەمێک بەرز دەبنەوە.

بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان ساماڵ دەبێت لەگەڵ پەیدابوونی هەندێک پەڵە هەور، پلەکانی گەرماش بەراورد بە دوێنێ یەک تا دوو پلە بەرز دەبنەوە.

ئاماژەی بەوەشکرد، سبەینێ ئاسمان بە گشتی ساماڵ دەبێت و پلەکانی گەرما لە ئاستی تۆمارکراوەکانی ئەمڕۆدا سەقامگیر دەبنەوە، خێرایی با لەسەرخۆ بۆ مامناوەند دەبێت و مەودای بینین لەنێوان 8 بۆ 10 کیلومەتردا دەبێت.

بەرزترین پلەکانی گەرمای پێشبینیکراو بە پلەی سیلیزی

هەولێر: 40 پلەی سیلیزی

پیرمام: 36 پلەی سیلیزی

سلێمانی: 37 پلەی سیلیزی

چەمچەماڵ: 40 پلەی سیلیزی

دهۆک: 39 پلەی سیلیزی

زاخۆ: 41 پلەی سیلیزی

هەڵەبجە: 41 پلەی سیلیزی

حاجی ئۆمەران: 26 پلەی سیلیزی

گەرمیان: 43 پلەی سیلیزی

دەستەی دەستپاكی فیدراڵ رێگری لە هەدەردانی زیاتر لە 34 ملیار دیناری ماڵی گشتی كرد كە هەوڵدرابوو زەوییەكی حكومیی گرانبەها بە نرخێكی زۆر كەم بفرۆشرێت.

دەستەی دەستپاكی رایگەیاندووە، لە پارێزگای ئەنبار هەوڵدرابوو زەوییەكی حكومیی 136 دۆنمیی سەر رووباری فورات، كە بەهای راستەقینەكەی زیاتر لە 37 ملیار دینارە، لەلایەن فەرمانگەی خانووبەرەی دەوڵەتەوە بە تەنها سێ ملیار دینار بخەمڵێندرێت و بە بڕێكی زۆر كەمتر لە نرخەكەی بفرۆشرێت.

ئاماژەی بەوە كردووە، دوای دەركەوتنی جیاوازیی بەهای زەوییەكە، دادوەری لێكۆڵینەوە بڕیاریدا بە ڕاگرتنی پڕۆسەی زیادكردنی ئاشكرا بۆ فرۆشتنی موڵكەكە.

لە ئێستادا لێكۆڵینەوە لەگەڵ نوێنەرە یاساییەكانی فەرمانگەی خانوبەرە و تاپۆی ئەنبار بەردەوامە تاوەكو سەرجەم تێوەگلاوانی ئەم دۆسیە روبەڕووی یاسا بكرێنەوە.

دەستەی حەشدی شەعبی کوژرانی کارمەندێکی هێزەکانی بەهۆی روداوێکی تەقەکردنەوە لە کەرکوک راگەیاند.

فەرماندەیی میحوەرەکانی حەشدی شەعبی لە راگەیەنراوێکدا ئاماژەی بەوەکرد، کارمەندێکیان لە کاتی جێبەجێکردنی ئەرکی ئەمنیی خۆیدا لە دەوروبەری پارێزگای کەرکوک، رووبەڕووی هێرشێکی تەقەکردن بووەتەوە و کوژراوە.

ئەوەشی خستەڕوو، هێزە ئەمنییەکان دەستبەجێ کێوماڵکردنی ناوچەکەیان بۆ دەستگیرکردنی ئەنجامدەرانی هێرشەکە دەستپێکردووە.

لەلایەکی تریشەوە، سەبارەت بەو روداوە سەرچاوەیەکی پۆلیس لە پردێ بە کوردسات نیوزی راگەیاند،  لە ناحیەی پردێ ماتۆڕ سوارێک تەقەی لەخاڵێکی لیوای 16ـی حەشدی شەعبی کردووە، بەهۆیەوە چەکدارێک کوژراوە و چەکدارێکی تریش برینداربووە.

بەپێی راپۆرتێکی رۆژنامەی "وۆل ستریت جۆرناڵ"ـی ئەمریکی، دۆناڵد ترەمپ، سەرۆکی ئەمریکا بە نهێنی سەرقاڵی تاوتوێکردنی ئەگەری راگەیاندنی کۆتاییهێنانی جەنگە لەگەڵ ئێران.

رۆژنامەی "وۆل ستریت جۆرناڵ"ـی ئەمریکی لە راپۆرتێکدا ئاشکرای کردووە، دۆناڵد ترەمپ، سەرۆکی ئەمریکا لەگەڵ لێپرسراوە باڵاکانی ئیدارەکەیدا بە نهێنی سەرقاڵی تاوتوێکردنی ئەگەری راگەیاندنی کۆتاییهێنانی جەنگە لەگەڵ ئێران، لە هەمان کاتدا سەربازانی وڵاتەکەی ئامادەکاری بۆ مانەوە لە رۆژهەڵاتی ناوەڕاست تا ساڵی 2027 دەکەن.

رۆژنامەکە لە زاری لێپرسراوانی ئەمریکاوە بڵاویکردوەتەوە، لە ئێستادا ترەمپ بەرەو بژارەی راگەیاندنی کۆتاییهێنانی جەنگەکە دەڕوات، بەو پێیەی پێیوایە زیاتربوونی فشارە ئابورییەکان سەرئەنجام تاران ناچار دەکات بەرنامە ئەتۆمییەکەی هەڵبوەشێنێتەوە یانیش رووبەڕووی مەترسیی داڕمان بێتەوە.

لەلایەکی ترەوە لە تۆڕی کۆمەڵایەتیی "تروس سۆشیاڵ"، ترەمپ رایگەیاندووە، "رەوشی ئێستامان زۆر بە دڵە؛ کۆنترۆڵی نزیکەی تەواوەتیمان بەسەر گەروی هورمزدا هەیە و ئابوریی ئەوانیش بە تەواوی داڕماوە، ئەوان تەنها بەرەنگاری شتێک دەبنەوە کە لێی دەرباز نابێت. کەی گەلی ئێران رادەپەڕێت و دەکەوێتە جەنگەکەوە؟"

لە رووی سەربازییەوە، پێچەوانەی ئاراستەی لێدوانە سیاسییەکان، پێت هێگسێس، وەزیری جەنگی ئەمریکا بڕیاریداوە ماوەی جێگیرکردنی هێزەکانی ئەمریکا لە رۆژهەڵاتی ناوەڕاست تا ساڵی 2027 درێژ بکاتەوە، ئەمەش ئاماژەیە بۆ ئەگەری بەردەوامبوونی ململانێکان بۆ ماوەیەکی درێژخایەن.

رۆژنامەکە باسی لەوەشکردووە، لە دەستپێکی هێرشەکانی ئەمریکا دژی ئێران، وەزیری جەنگی ئەمریکا بەڵێنی لێدانێکی خێرا و یەکلاکەرەوەی دابوو بۆ رێگری لە درێژەکێشانی جەنگ، بەڵام لە ئێستادا بە بێدەنگی ماوەی مانەوەی هێزەکان درێژ دەکاتەوە وەک بەشێک لە ستراتیژییەکی سەربازیی کراوە بۆ رەخساندنی بژارەی جیاواز لە بەردەست ترەمپدا.

لە ئێستادا ئەمریکا هێزێک کە پێکهاتووە لە 50 هەزار سەرباز، 19 کەشتیی جەنگی، یەکەکانی بەرگریی ئاسمانی، فڕۆکەی جەنگی لە ناوچەکەدا جێگیر کردووە، ئەرکی سەرەکیی ئەم هێزانە بریتییە لە رێگری لە موشەکەکانی ئێران، پاراستنی کەشتییە بازرگانییەکان لە گەروی هورمز، و سەپاندنی گەمارۆ بەسەر بەندەر و ناوچە کەناراوییەکانی ئێراندا، هاوکات لە ئامادەباشیدان بۆ ئەنجامدانی هێرشی بەرفراوانتر ئەگەر ترەمپ بڕیاری ئاڵۆزکردنی جەنگەکە بدات.

مانگی رابردووش، ترەمپ لەلایەن یاریدەدەرە باڵاکانییەوە زانیاری لەسەر بژارەی سەربازیی نوێ پێدرا، لەوانە چڕکردنەوەی هێرشە ئاسمانییەکان، رەوانەکردنی هێزی وشکانی بۆ دەستبەسەرداگرتنی دوورگە ئێرانییەکانی نزیک گەروی هورمز، و بۆردومانکردنی بنکەی ئەتۆمیی کێوی تەور.

وەزیری وزەی ئەمریکا رەتیدەکاتەوە وڵاتەکەی هەوڵی بردن و دزینی نەوتی ڤەنزوێلا بدات و رایدەگەیەنێت، تەواوی سود و داهاتی رێککەوتنە نەوتییەکان بۆ گەلی ڤەنزوێلان.

دوای سەردانەکەی بۆ کاراکاس، كريس رایت، وەزیری وزەی ئەمریکا لە راگەیەنراوێکدا ئاشکرایکرد، ئەو دەنگۆیانەی باس لە دزینی نەوتی ڤەنزوێلا دەکەن دوورن لە راستییەوە و نەوت و سامانە سروشتییەکانی ئەو وڵاتە موڵکی گەلی ڤەنزوێلان.

وەزیری وزەی ئەمریکا ئاماژەی بەوەشکرد، کۆمپانیا تایبەتەکان سەرمایەی پێویست بۆ بەرهەمهێنانی نەوت دابین دەکەن، بەڵام قازانج و باج و داهاتەکان بە تەواوی بۆ حکومەت و خەڵکی ڤەنزوێلا دەبن، جەختیشی کردەوە، واشنتۆن تەکنەلۆژیا و سەرمایە بۆ گەشەپێدانی سەرچاوە نەوتییەکان دابین دەکات بەجۆرێک سود بە ڤەنزوێلا و جیهان بگەیەنێت.

لەلایەکی ترەوە، لە میانی سەردانەکەی رایت بۆ کاراکاس، چەندین گرێبەست لەگەڵ کۆمپانیا فرەنەتەوەییەکان بۆ وەبەرهێنان لە کەرتی سوتەمەنی و نۆژەنکردنەوەی تۆڕی کارەبای ڤەنزوێلا ئیمزا کران.

ئەمەش لەکاتێکدایە، رێککەوتنی ئەمدواییەی نێوان هەردوو وڵات کە لەلایەن دۆناڵد ترەمپەوە راگەیەنرا، رێگە بە ئەمریکا دەدات بەشداری لە بەڕێوەبردنی بەشێک لە یەدەگی نەوتی ڤەنزوێلا بکات، لە بەرانبەردا پێشبینی دەکرێت ڤەنزوێلا لە ماوەی 25 ساڵدا زیاتر لە 200 ملیار دۆلار داهاتی دەستبکەوێت.

زانكۆی سلێمانی بەهۆی دروستكردنی گەورەترین رستەی بە درەخت چێنراو ناوی دەچێتە كتێبی گینسەوە بۆ ژمارە پێوانەییەكان.

ئەمڕۆ لە رێوڕەسمێكی شایستەدا بە ئامادەبوونی نوێنەرانی كتێبی پێوانەیی گینس، ناوی زانكۆی سلێمانی دەچێتە ئەو كتێبەوە بەهۆی دروستكردنی گەورەترین رستەی بە درەخت چێنراو كە بریتییە لە 'یونیڤێرستی ئۆف سلێمانی' و لە دروستكردنی ئەو رستەیەشدا شەش هەزار نەمامی جۆری مۆرد بەكارهاتووە، بەهۆی ئەوەشەوە ناوی زانكۆكە لە كتێبی پێوانەیی گینس تۆمار دەكرێت.

پرۆژەی نووسینی گەورەترین رستەی بە درەخت چێنراو، لە رووی ژینگە و سەوزاییەوە رۆڵێكی گەورەی هەیە و سیمای سلێمانیش جوانتر دەكات، لەهەمانكاتدا شانازییەكی گەورەیە بۆ زانكۆی سلێمانی كە لەگەڵ پێشڕەوییە زانستییەكانی، لە بواری ژینگەشدا دەستكەوتی مەزن تۆمار دەكات.

سەرۆکی ئەمریکا کۆنترۆڵکردنی دەریاوانیی لە گەروی هورمز راگەیاند و ئاشکرای کرد، ئۆپەراسیۆنە سەربازییە نوێیەکانیان بۆ سەر ئێران زۆر بەردەوام نابێت.

دۆناڵد ترەمپ، سەرۆکی ئەمریکا لە لێدوانێکدا رایگەیاند: "هێزەکانمان کۆنترۆڵی تەواوی گەروی هورمزیان کردووە و ررۆژانە بەپێی بەرنامە ئاسایشی رۆشتنی دەیان کەشتیی هەڵگری ملیۆنان بەرمیل نەوت دەپارێزن"، ئاماژەی بەوەشکرد کە ئەم پڕۆسەیە لە زۆربەی کاتەکاندا بەبێ هیچ ئاستەنگێک بەڕێوەدەچێت.

ترەمپ جەختیشیکردەوە، هەڵمەتە نوێیەکەیان بۆ سەر ئێران درێژخایەن نابێت و دەشڵێت: "تاران هەوڵی دەدا سیستمی رادار و موشەکەکانی نوێ بكاتەوە و موشەکێکی تایبەت بە داچاندنی مینی دەریایی گەشە پێبدات، بەڵام توانیمان بە تەواوی تێکیبشکێنین و لەناوی ببەین."

سەرۆکی ئەمریکا ئەوەشی خستەڕوو "هێرشەکەی شەوی رابردوو زۆر توند و بەهێز بوو، هێزەکانیشمان لە ئامادەباشیی تەواودان بۆ ئەنجامدانی هێرشێکی تر لە هەر کاتێکدا کە بمانەوێت."

وەزیری دەرەوەی ئەمریکا دەڵێت؛ وڵاتەکەی بەردەوام دەبێت لە سەپاندنی فشارەکان بۆ سەر ئێران و رێگە لە هەر ئاستەنگێک دەگرێت کە هەڕەشە لە ئاسایشی دەریاوانی بکات.

مارکۆ رۆبیۆ، وەزیری دەرەوەی ئەمریکا رایگەیاند: "ئێران بەردەوام بووە لە بۆردومانکردنی کەشتییەکان بەتایبەت کەشتییە بازرگانییەکان لە گەروی هورمز، بەڵام لە ئێستادا کۆنترۆڵی ئەو گەروەی لەدەستداوە."

وەزیری دەرەوەی ئەمریکا ئەوەشی خستەڕوو، واشنتۆن هەرگیز رێگە بە ئێران نادات ببێتە خاوەنی چەکی ئەتۆمی، هەروەها سەرجەم ئەو شوێن و پێگانە دەکەنە ئامانج کە هەڕەشە لەسەر هێزەکانیان و ئاسایشی دەریاوانیی جیهانی لە گەروی هورمز دروست دەکەن، دەشڵێت؛ گەروەکە بە کراوەیی دەمێنێتەوە و ناکەوێتە ژێر دەسەڵات و کۆنترۆڵی ئێرانەوە.

لە بەشێکی تری قسەکانیدا رۆبیۆ ئاماژەی بەوەکرد، یاداشتی لێکتێگەیشتن لەگەڵ تاران کۆتایی هاتوو و دەسەڵاتی ئێران لەژێر فشاری بەردەوامدا دەمێنێتەوە، بۆ ئەوەی رێگریی لێبكرێت لە دەستگەیشتن بەو داراییانەی بۆ پاڵپشتیکردنی تیرۆر بەکاریان دەهێنێت.

سەرۆکی ئەمریکا دەڵێت، واشنتۆن ناچار بووە رێکاری سەربازی دژی تاران بگرێتەبەر بۆ رێگریکردن لە دەستگەیشتن بە چەکی ئەتۆمی، هاوكات جەختیشی کردەوە کە لە ئێستادا گەروی هورمز لەژێر کۆنترۆڵی ئەمریکادایە.

دۆناڵد ترەمپ، سەرۆکی ئەمریکا لە چاوپێکەوتنێکدا رایگەیاند: "ئەگەر کارێکی وەهامان نەکردبا، ئێستا ئێران خاوەنی چەکی ئەتۆمی بوو،" ئاماژەی بەوەش کرد، ئەگەر پێش ساڵێک ئەمریکا بۆمهاوێژەکانی  B-2ی نەناردایە بۆ تێکشکاندنی توانا ئەتۆمییەکانی ئێران، تاران تەنهـا "دوو هەفتەی مابوو بۆ دەستکەوتنی چەکی ئەتۆمی".

ترەمپ جەختیشی کردەوە، ئەگەر ئێران دەستی بە چەکی ئەتۆمی بگەیشتایە، ئەوا ئیسرائیل و رۆژهەڵاتی ناوەڕاست دەسڕانە، هەروەها جەختی کردەوە، ئێران ئامانجی بووە شارەکانی ناوخۆی ئەمریکاش بکاتە ئامانج.

لە بەشێکی تری قسەکانیدا سەرۆکی ئەمریکا ئاماژەی بەوەکرد، ئەم لێدانە سەربازییانە لە کاتێکدا ئاڕاستەی ئێران کراون کە ئابوریی ئەمریکا لە رەوشێکی باشدا بووە و نرخی نەوت رووی لە دابەزین کردووە.

بەهۆی گیانلەدەستدانی کچێکی تەمەن 21 ساڵ لە کاتی ئەنجامدانی نەشتەرگەریدا لە هەولێر، وەزارەتی تەندروستیی هەرێم بڕیاریدا بە داخستنی یەکجارەکیی نەخۆشخانەکە و رەوانەکردنی ئیدارەی نەخۆشخانەکە و پزیشکە سەرپێچیکارەکان بۆ دادگا.

دوابەدوای گیانلەدەستدانی کچێکی تەمەن 21 ساڵ لە نەخۆشخانەیەکی تایبەت لە شاری هەولێر، وەزارەتی تەندروستیی حکومەتی هەرێمی کوردستان راگەیەنراوێکی بڵاوکردەوە و تێیدا ئاشکرایکرد، لەدوای ئەنجامدانی بەدواداچوونی مەیدانی لەلایەن تیمەکانی پشکنینەوە، چەند پێشێلكارییەک دیاریکراون،یەکەمیان پزیشکی نەشتەرگەریەکە هیچ رێگەپێدانێکی کارکردنی لەو نەخۆشخانەیەدا نەبووە و ناوی لە لیستی میلاکی رێگەپێدراوی وەزارەتدا تۆمار نەکراوە.

وەزارەتی تەندروستی ئەوەشی خستەڕوو، نەشتەرگەریی فریاکەوتن لە شوێنێکدا ئەنجام دراوە کە بەشی فریاکەوتن و هۆڵی چاودێریی چڕی (ICU) لێنەبووە.

راشیگەیاند، هۆڵەکانی نەشتەرگەریی ئەو نەخۆشخانەیە لە سەرەتای مانگی حوزەیرانی ئەمساڵەوە بەهۆی پابەندنەبوون بە رێنماییەکان بە رەسمی لەلایەن وەزارەتەوە داخراون، بەڵام پزیشکی نەشتەرگەری، پزیشکی سڕکردن (بەنج) و ئیدارەی نەخۆشخانەکە بە شێوازی نارەسمی و نایاسایی چوونەتە ژوورەوە و نەشتەرگەرییان ئەنجام داوە.

وەزارەتی تەندروستی جەختی کردووەتەوە، بەپشتیوانیی یاسای ژمارە چواری ساڵی 2020 (تایبەت بە مافی نەخۆش) و پەیڕەوی ژمارە 16ـی ساڵی 2022، بڕیاری داخستنی یەکجارەکیی نەخۆشخانەکەی داوە و ئیدارەی نەخۆشخانەکە و ئەنجامدەرانی سەرپێچییەکەی رەوانەی دادگا کردووە بۆ وەرگرتنی رێکاری یاسایی.

وەهاب هەڵەبجەیی، بەڕێوبەری گشتیی دژەتیرۆر CTG، بە یاوەری ژمارەیەک لە ئەفسەرانی باڵای بەڕێوبەرایەتییەکە، سەردانی بارەگای دەزگای دژەتیرۆری عیراق ICTS لە شاری بەغداد کرد و لەلایەن  فەریق روکن زەید حوشی الموسوی، لێپرسراوی دەزگای دژەتیرۆری عێراق، پێشوازییان لێکرا.

مەبەستی سەردانەکە پیرۆزباییکردن بوو لە فەریق روکن زەید حوشی الموسوی، بەبۆنەی وەرگرتنی پۆستی بەرپرسی دەزگای دژەتیرۆری عیراق، لە دیدارەکەدا هیوای سەرکەوتنی بۆ خواست لە بەڕێوەبردنی ئەرک و بەرپرسیارێتییە نیشتیمانییەکانی.

لە دیدارەکەدا، هەردوو لا لەسەر پەرەپێدانی پەیوەندی و بەهێزکردنی هەماهەنگیی نێوان دژەتیرۆری هەرێمی کوردستان- CTG و دەزگای دژەتیرۆری عیراق - ICTS گفتوگۆیان کرد و جەختیان لەسەر فراوانترکردنی هاوکاریی ئەمنی، هەواڵگری و مەیدانی کردەوە.

لە کۆتایی دیدارەکە، سەرۆکی هەردوو دەزگای دژەتیرۆر، جەختیان لەسەر بەردەوامی و بەهێزکردنی پاڵپشتییەکان بۆ یەکدی کردەوە، بە مەبەستی نەهێشتنی مەترسییەکانی تیرۆر، پاراستنی ئاسایش و سەقامگیری و دابینکردنی ژینگەیەکی ئارام و پارێزراو لە هەرێمی کوردستان و سەرتاسەری عیراق.

جێی ئاماژەیە، هەردوو دامەزراوەی رووبەڕوبوونەوەی تیرۆر و هەواڵگری لە ماوەی تابردوودا پشتیوانێکی بەهێزی یەکتری بوون بە ئاڵوگۆڕی زانیاریی هەواڵگریی ورد و هەماهەنگیی ئەمنییان لەنێوان خۆیاندا هەبووە؛ هاوکارییەک کە رۆڵێکی گرنگی لە بەرەنگاربوونەوە و بنبڕکردنی گروپ و هەڕەشە تیرۆریستییەکان و دەستگیرکردنی داواکراوانی یاسا هەبووە.

دوای ئەو گرژییانەی دوێنێ لە غەززە رویاندا، سەرۆک وەزیرانی ئیسرائیل دەڵێت، هێزەکانیان لە کەرتی غەززە ناکشێنەوە.

بنیامین ناتانیاهۆ سەرۆک وەزیرانی ئیسرائیل لە وتارێکی ڤیدیۆییدا لەناو خاکی غەززەوە رایگەیاند، سوپای ئیسرائیل لە کەرتی غەززە ناکشێتەوە و لە ئێستادا کۆنترۆڵی %60ـی رووبەری کەرتەکەی کردووە و ناوچەکانی ژێر دەسەڵاتی فراوانتر دەکات.

جەختیشی کردەوە، حکومەتەکەی هەوڵ دەدات کەرتەکە بکاتە ناوچەیەکی داماڵدراو لە چەک تا هیچ مەترسییەک بۆ سەر ئیسرائیل دروست نەکات.

سەرۆک وەزیرانی ئیسرائیل ئاماژەی بە دەستگیرکردنی سەرکردەیەکی بزووتنەوەی حەماس کرد و وتی: "دوێنێ لێپرسراوی هەواڵگریی حەماسمان دەستگیرکردووە و بێگومان زانیاریی گرنگی لێوەردەگرین".

لەلایەکی ترەوە، یسرائیل کاتز، وەزیری بەرگریی ئیسرائیل رایگەیاند، %70ـی رووبەری کەرتی غەززە وێران بووە و هیچ تونێل و ژێرخانێکی تێدا نەماوە، بە تەواویش لەژێر کۆنترۆڵی هێزەکانی ئیسرائیلدایە.

لە بەرانبەردا، بزووتنەوەی حەماس لە راگەیەنراوێکدا داوای لە نێوەندگیرەکان کردووە زۆرترین فشار بخەنە سەر حکومەتی ئیسرائیل بۆ راگرتنی پێشێلکارییەکانی لە غەززە و پابەندکردنی بە جێبەجێکردنی رێککەوتنی ئاگربەست.

راوێژکاری موجتەبا خامنەیی رایدەگەیەنێت، ئێران ستراتیژییەکی نوێ لە جەنگ و رووبەڕووبوونەوەی گەمارۆ ئابورییەکان پەیڕەو دەکات.

موحسین رەزایی، راوێژکاری موجتەبا خامنەیی لە پەیامێکدا کە ئاراستەی ئەمریکای کردووە رایگەیاند، ئەو هەوڵانەی واشنتن دەیدات رزگاری ناکات لەو رەوشەی تێیکەوتووە و لە ئاینده‌یه‌كی نزیكدا دەردەکەوێت، کە ستراتیژییە نوێیەکەی تاران توانای رووبەڕووبوونەوەی فشارەکانی هەیە.

ئاماژەی بەوەشکردووە، وڵاتەکەی ستراتیژییەکی نوێ لە جەنگ و دیپلۆماسی و رووبەڕووبوونەوەی گەمارۆ ئابوورییەکان پەیڕەو دەکات.

ئەم لێدواش لە کاتێکدایە، شەوی رابردوو سوپای ئەمریکا رایگەیاند، چەندین ئامانجی سوپای پاسدارانیان بۆردومان کرد، لەوانە سیستمی بەرگریی ئاسمانی و بنکەی دەریایی و ناوەندیی پەیوەندییەکان، لە بەرانبەریشدا، سوپای پاسداران رایگەیاند، بە موشەک و فڕۆکەی بێفڕۆکەوان هێرشیانکردووەتە سەر پێگەکانی ئەمریکا لە ناوچەکە.

حکومەتی هەرێمی کوردستان راگەیەنراوێکی بڵاوکردەوە و تێیدا هاتووە، 33 گەنجی دیکەی کورد کە هەندێکیان رووبەرووی مەترسسی مردن بوونەتەوە، لە لیبیاوە دەگەڕێنرێنەوە هەرێم.

حکومەتی هەرێم رایگەیاند، ئەم گەنجانە بەهۆی کۆچی نایاساییەوە تووشی رەوشێکی سەخت ببوون و هەندێکیان بۆ ماوەی هەشت مانگ لە زیندانەکانی لیبیادا مابوونەوە و رووبەرووی مەترسییەکانی مردن بوونەتەوە.

لە راگەیەنراوەکەدا جەخت لەوەش کراوەتەوە، پێویستە گەنجان و خانەوادەکانیان خۆیان بپارێزن لە گرتنەبەری رێگای کۆچی نایاسایی بۆ وڵاتانی رۆژئاوا، چونکە ئەم جۆرە کۆچە دەبێتە هۆی پێشلێکردنی یاسای وڵاتانی دیکە و لێپرسینەوەی توندی یاسایی بەدوادا دێت.

هاوکات ئاماژەی بەوەشداوە، تاکو ئێستا حکومەتی هەرێم توانیویەتی 302 کۆچبەری نایاسایی لە رەوشە جیاوازە سەختەکانەوە رزگار بکات و بیانگەڕێننەوە بۆ هەرێمی کوردستان.

کۆمپانیای ئاسیاپەی مژدەیەک دەداتە بەکارهێنەرانی و لە ئێستادا لەرێگەی ئەپڵیکەیشنی ئاسیاپەیەوە بەکارهێنەرانیان دەتوانن سێ جۆری جیاوازی ماستەرکارد داوا بکەن و یەکێک لە کارتەکانیش بۆ ماوەیەکی کاتی، بێ بەرانبەرە.

ئاسیاپەی ئاماژەی بەوەشكردووە: کارتەکانی ئاسیاپەی ماستەرکارد گونجاون بۆ پارەدان لە فرۆشگاکان، کڕینی ئۆنلاین و سودبینین لە ئامێرەکانی راکێشانی پارە لە هەر شوێنێک کە پاڵپشتی ماستەرکارد بکات.

ئەوەشی روونکردووەتەوە، کارتەکان پاڵپشتی ئەنجامدانی مامەڵە داراییەکان دەکەن بە چەندین دراوی جیاوازی نێودەوڵەتی، ئاسودەیی وگونجاویی زیاتر دەبەخشێتە بەکارهێنەران لە کاتی کڕینی ئۆنلاین، گەشتکردن، یان پارەدان لە دەرەوەی عیراق.

کۆمپانیاکە مژدەیەکیش دەداتە بەکارهێنەرانی ئاسیاپەی، کە ماستەرکاردی فیزیکیی پلاتینیۆم بەبێ بەرانبەر و بۆ ماوەیەکی کاتی بۆ هەر خوازیارێک کە داوای بکات، دروستدەکات.

 

هەریەك لە كوەیت و ئوردن و بەحرەین رایانگەیاند، بەرپەرچی هێرشی چەند موشەك و فڕۆكەیەكی بێفڕۆكەوانی ئێرانیان داوەتەوە.

لە وەڵامی هێرشەكانی ئەمریكا بۆسەرباشوری وڵاتەكەی دورگەی لارك و گەروی هورمز ئێران هێرشیكردە سەر  بنكە سەربازیەكانی ئەمریكا  لە بەحرەین و كوەیت و ئوردن.

سوپای پاسداران بڵاویكردەوە، بە موشەكی بالیستی بنكەیەكی ئەمریكایان لە ئوردن كردوتە ئامانج و لە بەرامبەردا هێزە چەكدارەكانی ئوردن رایگەیاند، بەرپەرچی10 موشەكی بالیستی ئێرانیان داوەتەوە، سێ موشەكیش لە ناوچەی چۆڵدا كەوتوونەتە خوارەوە و هیچ زیانێكی گیانیان لێنەكەوتووەتەوە.

هاوكات، هێزی بەرگری ئاسمانی بەحرەین رایگەیاند، چەند هێرشێكی ئاسمانی و درۆنی ئێرانیان پوچەڵكردووەتەوە كە خاكی وڵاتەكەیانی كردبووە ئامانج.

لە لایەكی ترەوە، سوپای كوەیت رایگەیاند، بەرپەرچی هێرشی چەند فڕۆكەیەكی بێفڕۆكەوانی ئێرانیان داوەتەوە كە لە ئاسمانی وڵاتەكەیاندا سوڕاونەتەوە.