هەواڵەکان
وەزیری پەروەردەی حکومەتی هەرێمی کوردستان دەڵێت؛ لە سبەینێوە مامۆستایان پەیوەندی بە ناوەندەکانی خوێندنەوە دەکەن و پڕۆسەیەکی راهێنانیش دەستپێدەکات.
ئەمڕۆ دووشەممە ئالان حەمە سەعید وەزیری پەروەردەی حکومەتی هەرێمی کوردستان لە کۆنفرانسێکی رۆژنامەوانیدا ئامادەکارییەکانی وەزارەتەکەی بۆ ساڵی نوێی خوێندن خستەڕوو و رایگەیاند: لە مانگی شەشەوە کار بۆ پرۆسەکە کراوە، لەوانەش چاپکردنی نزیکەی 20 ملیۆن کتێبی نوێ کە بڕیارە تا 10ـی 9 رێژەی 99%یان بگەنە هەرێم.
وتیشی، رەحلەی پۆلەکان بە هەماهەنگی لەگەڵ رێکخراوەکان چاکراوەتەوە، هەروەها ئەنجامدانی ریفۆرم لە خوێندن و خوێندنی پیشەییدا و ئاڕاستەکردنی نووسراو بۆ وەزارەتی سامانە سروشتییەکان لە رێگەی ئەنجومەنی وەزیرانەوە بۆ دابینکردنی نەوتی سپی بۆ خوێندنگاکان، لەپاڵ دابینکردنی تەواوی پێداویستییەکان بۆ ئەو باڵاخانە و خوێندنگە نوێیانەی کە ئەمساڵ دەکرێنەوە.
وەزیری پەروەردە راشیگەیاند، لە سبەینێوە مامۆستایان پەیوەندی بە ناوەندەکانی خوێندنەوە دەکەن، هەروەها پرۆسەیەکی راهێنان دەستپێدەکات بۆ ماوەی 19 رۆژ، کە هەر مامۆستایەک 5بۆ6 رۆژ لەناو ناوەندەکانی خوێندندا راهێنان دەکات.
بەیانی ئەمڕۆ دووشەممە، جووڵەی فڕۆکە لە ئاسمانی عیراقدا بە تەواوی گەڕایەوە بۆ دۆخی ئاسایی، ئەمەش دوای راگرتنێکی کاتی کە بۆ چەند کاتژمێرێک لە شەودا خایەند بەهۆی پێشهاتە ئەمنییەکان و ئاڵۆزییە سەربازییەکانی نێوان ئێران وئەمریکا لە ناوچەکەدا.
ئاسمانی عیراق بۆ چەند کاتژمێرێک دوای نیوەشەوی رابردوو چۆڵبوونی نیمچە تەواوەتیی لە شەپۆلی فڕۆکە رێبوارەکاندا بەخۆیەوە بینی، بەبێ ئەوەی هیچ بڕیارێکی رەسمی بۆ داخستنی ئاسمانەکە دەربچێت یان هەڵوەشاندنەوە و دواخستنی گەشتە ئاسمانییە هاتوو و رۆیشتووەکان تۆمار بکارێت.
جووڵەی تێپەڕبوونی فڕۆکەکان بە شێوەیەکی پلەبەپلە و سنووردار بەرەو فرۆکەخانەی نێودەوڵەتیی هەولێر دەستی پێ کردەوە، پێش ئەوەی بەیانی ئەمڕۆ لە سەرانسەری ئاسمانی عیراقدا بگەڕێتەوە ئاستی ئاسایی خۆی، لەگەڵ جەختکردنەوەی کەشناسی و گەشەپێدەرانی فڕین لەوەی دۆخی ئاسمانی وڵات بە تەواوی جێگیر و ئارامە.
سەرۆك وەزیرانی عیراق فەرمانیكرد بە دیاریكردن هەزار دۆنم زەوی لە هەر پارێزگایەك بۆ ئەنجامدانی پڕۆژەی پیشەسازی.
عەلی زەیدی، سەرۆك وەزیرانی عیراق، لە دانیشتنی سێیەمی ئەنجومەنی هەماهەنگی پیشەسازیەكان رێنماییدا بە هەموو پارێزگاكان بۆ تەرخانكردنی زەوییەك بە رووبەری (1000) دۆنم بۆ ئەو پڕۆژە پیشەسازیانەی كە لەلایەن بەڕێوەبەرایەتی گشتی گەشەپێدانی پیشەسازییەوە مۆلەتیان پێدەدرێت دەكرێن.
هەر لە كۆبونەوەكەدا، سەرۆك وەزیرانی عیراق جەختی لە گرنگی بووژاندنەوەی پیشەسازی نیشتمانی كردەوە وەكو كۆڵەكەی سەرەكی ئابووری، و ئاماژەی بەوەدا، بەدیهێنانی ناسنامەی پیشەسازی وڵات پێویستی بە كۆنتڕۆڵكردنی سنوورەكان، جێبەجێكردنی سیستمی ئەسیكۆدا، و وەرگرتنی پێشوەختەی باج و گومرك هەیە.
ژمارەی گیانلەدەستدانی لافاوەكەی نیپاڵ بۆ 903 کەس و نزیكەی چوارهەزار و 250 بێسەروشوێنبوون بەرزبووەوە.
دەستەی بەڕێوەبردنی بارودۆخە لەناكاوەكان لە نیپاڵ رایگەیاند، ئاماری قوربانیانی ئەو لافاوە وێرانكەرەی رۆژی چوارشەممەی رابردوو باكووری نیپاڵی گرتەوە، بەرزبووەتەوە بۆ 903 گیانلەدەستدان و چوار هەزار و 247 بێسەروشوێن بوون.
لە لایەكی ترەوە، راگەیاندنەكانی چین بڵاویانكردەوە، لە ناو خاكی چین ژمارەی گیانلەدەستدان گەیشتووەتە 16 كەس و 546 كەسیش تا ئێستا بێسەروشوێنن. بەمەش ژمارەی گشتیی ئەو كەسانەی لە هەردوو وڵات لەم كارەساتەدا گیانیان لەدەستداوە گەیشتە 919 كەس، و ژمارەی بێسەروشوێنبووانیش گەیشتە چوار هەزار و 793 كەس، لەنێو بێسەروشوێنبووەكاندا زیاتر لە 592 گەشتیاری بیانی هەن.
دەستەی دەسپاکی فیدراڵی رایگەیاند، کۆتایی بە رێکارەکانی فرۆشتنی موڵکێک بە رووبەری 550 دۆنم لە پارێزگای ئەنبار هێناوە و رێگریی لە بەهەدەردانی نزیکەی 19.25 ملیار دینار لە سامانی گشتی کردووە.
دەستەکە ئاماژەی بەوە داوە کە موڵکەکە دەکەوێتە چوارچێوەی نەخشەی فراوانکردنی داهاتووی شارۆچکەی رەمادی. لێکۆڵینەوەکانی تیمی دەستەکە پێشێلکارییان لە رێکارەکانی راگەیاندن و فرۆشتندا دۆزیوەتەوە، جگە لە دیاریکردنی نرخێک بۆ موڵکەکە کە زۆر کەمتر بووە لە بەهای راستەقینەی خۆی و بەبێ وەرگرتنی رەزامەندییە یاساییەکان لە شارەوانیی رەمادی ئەنجام دراوە.
روونیشی کردەوە: موڵکەکە بە بڕی 13.75 ملیار دینار فرۆشرابوو، لە کاتێکدا لێکۆڵینەوەکان دەریانخستووە بەهای راستەقینەی دەگاتە 33 ملیار دینار، بە جیاوازیی 19.25 ملیار دینار.
فەرماندەیی ناوەندیی ئەمریكا تێكشكاندنی دوو سەكۆی هەڵدانی موشەكی لە دوورگەی لاركی ئێران راگەیاند، سوپای پاسدارانیش بە موشەكی بالیستی بنكە ئاسمانییەكانی ئەمریكای لە ئوردن بۆردومان كرد.
بەپێی راگەیاندراوەكانی فەرماندەیی ناوەندیی ئەمریكا (سێنتكۆم)، هێرشەكەیان بۆ سەر دوورگەی لارك بۆ رێگریكردن بووە لە چاندنی مینی دەریایی لە گەرووی هورمز لە لایەن تارانەوە.
سوپای پاسدارانیش رایگەیاند ، هیرشەكەی ئەمریكا كوژران و برینداربوونی ژمارەیەك سەرباز و هاوڵاتیی لێكەتوەتەوە راشیگەیاندوە لە بەرانبەر ئەو هێرشانەدا دا بە موشەكی بالیستی و درۆن بنكەكانی مەلیك حوسێن و ئەزرەقی لە ئوردن بۆردومان كردوە و زیانی گەورەیان بە فڕۆكە جەنگییەكانی ئەمریكا گەیاندووە.
تیمێک لە پزیشکانی نەشتەرگەری لە نەخۆشخانەیەکی بەریتانیا، یەکەم نەشتەرگەرییان لە جیهاندا بۆ دەرهێنانی وەرەمی مێشک بە بەکارهێنانی تەکنەلۆژیای ژیریی دەستکرد ئەنجام دا.
ئەم تەکنەلۆژیا نوێیە کە لەلایەن زانکۆکانی بەریتانیاوە پەرەی پێ دراوە، پێکهاتە وردەکانی مێشک بە رەنگی جیاواز دەستنیشان دەکات و کۆد دەبڕێت، تاوەکو یارمەتی پزیشکانی نەشتەرگەری بدات لە دوورکەوتنەوە لە ناوچە هەستیارەکان لە کاتی نەشتەرگەریدا، ئەمەش وردیی پرۆسەکە و سەلامەتیی نەخۆش زیاد دەکات.
نەشتەرگەرییەکە لە مانگی ئایاری رابردوودا لە نەخۆشخانەی نیشتمانی بۆ دەمار و نەشتەرگەریی دەمار لە لەندەن، بۆ نەخۆشێک بە ناوی "رێس هیبرت"ی تەمەن 48 ساڵ و دانیشتووی ناوچەی بێدفۆردشایر، بە مەبەستی دەرهێنانی وەرەمێک لە رژێنە گۆپکەیییەکەی ئەنجام درا.
سیستەمی ژیریی دەستکرد کار دەکات لەسەر شیکردنەوەی راستەوخۆ و سات بە ساتی دیمەنە بەپەلەکانی کامێراکان لە ژووری نەشتەرگەریدا، و پێکهاتە دەمارییە وردەکان بە بەکارهێنانی رەنگی جیاواز لە یەکتر جیا دەکاتەوە.
ئەمەش بە تایبەتی لە ناوچەی رژێنی گۆپکەییدا زۆر گرنگە، چونکە قاڵب و دەمارەکانی بەرپرس لە بینین زۆر لێک نزیکن، بە جۆرێک هەر هەڵەیەک بە بڕی یەک میلیمەتر رەنگە ببێتە هۆی لەدەستدانی بینینی نەخۆشەکە.
نەشتەرگەرییەکە بە سەرکەوتوویی توانرا وەرەمەکە بە تەواوی دەربهێنرێت و هاوکات چاوەکانی نەخۆشەکەش لە مەترسی بپارێزرێن.
لای خۆیەوە، هیبرت رایگەیاند کە نەشتەرگەرییەکە بینینی رزگار کردووە و لە ئێستاشدا گەڕاوەتەوە سەر کارەکەی وەک بەڕێوەبەری خزمەتگوزاریی بەشداربووان و خۆبەخشێکی کۆمەڵایەتی.
شایەنی باسە، ئاشکرا بوو کە نەخۆشەکە لە ساڵی 2024دا وەرەمەکەی دەستنیشان کرابوو، و پێشبینی دەکرا بەبێ دەستوەردانی نەشتەرگەری بینینی بە تەواوی لەدەست بدات.
ئەم تەکنەلۆژیایە لەلایەن تیمێکی توێژینەوە لە پەیمانگای "هوکس" لە زانکۆی کۆلێجی لەندەن پەرەی پێ دراوە، و سیستەمەکە بە بەکارهێنانی سەدان ڤیدیۆی تۆمارکراوی نەشتەرگەرییەکانی مێشک ڕاهێنراوە.
لە پێشچوونێکی هاوشێوەشدا، نەخۆشخانەی نیشتمانیی "سانت مارک" بۆ رێخۆڵە، دەستی کردووە بە بەکارهێنانی ئامرازێکی ژیریی دەستکردی هاوشێوە لە دەرەوەی چوارچێوەی توێژینەوەدا، کە بەشە جیاوازەکانی جەستەی نەخۆشەکە بە رەنگی دیاریکراو لە کاتی نەشتەرگەریدا دیاری دەکات. بۆ نموونە، شانە بەستەرەکان بە رەنگی شینی فێرۆزەیی و دەمارەکان بە رەنگی سەوز دەردەکەون، ئەمەش یارمەتی پزیشکان دەدات بە ئاسانی لە یەکتریان جیا بکەنەوە و ناوچە هەستیارەکان لە کاتی نەشتەرگەریدا بپارێزن.
ئەم دەستکەوتە پزیشکییە وەرچەرخانێکی جۆری لە نەشتەرگەریی دەماردا نوێنەرایەتی دەکات، چونکە دەرگا لەسەر نەشتەرگەریی وردتر و ئارامتر بە هۆی ژیریی دەستکردەوە دەکاتەوە. بە سەرکەوتنی ئەم ئەزموونە پێشەنگەش، پزیشکان ئاواتەخوازن مەودای بەکارهێنانی ئەم تەکنەلۆژیایە فراوانتر بکن بۆ ئەوەی نەشتەرگەرییە ئاڵۆزەکانی دیکەش بگرێتەوە، کە ئەوەش ڕەنگە شۆڕشێک لە چاودێریکردنی نەخۆش لە سەرانسەری جیهاندا بەپا بكات.
سوپای پاسداران: کەشتییەکی نەوتهەڵگر لە گەروی هورمز تەقیوەتەوە و ئاگری گرتووە
دوو مین لە گەروی هورمز بە کەشتییەکی نەوتهەڵگردا تەقییەوە و سوپای پاسدارانیش هۆشداری دەداتە کەشتییەکانی تر.
سوپای پاسدارانی ئێران ئاشکرایکرد، کەشتییەکی نەوتهەڵگر لە کاتی تێپەڕبوونی بە گەروی هورمزدا رووبەڕووی تەقینەوەی دوو مینی دەریایی بووەتەوە و بەهۆیەوە ئاگرێکی گەورە لە کەشتییەکەدا کەوتووەتەوە و بە تەواوی پەکی کەوتووە.
بەپێی راگەیەندراوێکی سوپای پاسداران، کەشتییەکە هەوڵیدابوو بە شێوەیەکی "نایاسایی" لە رێڕەوییە ئاوییەکە تێپەڕێت، تا ئێستا زانیاری لەسەر ناسنامەی کەشتییەکە و چارەنووسی دەستەی کارگێڕییەکەی و ستافی کەشتییەکە رانەگەیەندراوە.
هاوكات سوپای پاسداران هۆشدارییداوە کە هەر کەشتییەکی تر سەرپێچی رێنماییە ئەمنییەکانیان بکات رووبەڕووی هەمان چارەنووس دەبێتەوە، و جەختیشی کردووەتەوە کە پابەندبوون بە رێکارەکانی ئەوان بۆ تێپەڕبوون لە گەروی هورمز ناچارییە.
وەزارەتی دەرەوەی ئێران هێرشی ئەمریکای بۆ سەر دورگەی لارک بە پێشێلکردنی سەروەریی نیشتمانیی وڵاتەکەی وەسف کرد، هاوکات بەڵێنی دا بە توندی وەڵامی هەر دەستدرێژییەکی نوێ بداتەوە.
لە راگەیەندراوێکی وەزارەتی دەرەوەی ئێراندا هاتووە: سوپای ئەمریکا بە پێشێلکردنی سەروەریی نیشتمانی و یەکپارچەیی خاکی وڵاتەکەمان، هێرشی کردە سەر بەشێک لە دورگەی لارک، ئەمەش بووە هۆی کوژران و برینداربوونی ژمارەیەک لە پارێزەرانی بەغیرەتی نیشتمان و هاووڵاتییانمان، جگە لە گەیاندنی زەرەر و زیان بە موڵکومالی گشتی و تایبەتی.
لە بەشێکی تری راگەیەندراوەکەدا هاتووە: هێزە چەکدارەکانمان لێدانێکی بەرگریکارانەی کەمەرشکێنیان ئاڕاستەی بنکە سەربازییەکانی ئەمریکا لە ئوردن کرد کە ببوونە سەرچاوە و پاڵپشتیکاری دەستدرێژییە سەربازییەکەی ئەمریکا بۆ سەر ئێران.
راگەیەندراوەکە ئاماژەی بەوەش کردبوو: بە شێوازێکی گونجاو و بە توندی وەڵامی هەر دەستدرێژییەکی نوێی سەربازی دەدەینەوە.
لە کۆتایی راگەیەندراوەکەدا جەخت کرایەوە: دیارە بەرپرسیارێتیی تەواوی دەرئەنجامەکانی کردەوە دەستدرێژکارانە نوێیەکانی ئەمریکا و بەردەوامیی ئابڵۆقەی دەریایی و جەنگی ئابووریی سەر ئێران، دەکەوێتە ئەستۆی ئەمریکا و سەرجەم ئەو لایەنانەی بە هەر شێوەیەک بێت هاوکاری و بەشدارییان لە ئامادەکاری و جێبەجێکردنی کردەوە نەیاسایی و دەستوەردانەکانی ئەمریکادا کردووە.
ئەمە لە کاتێکدایە کە ئێوارەی دوێنێ گرژییەکان روویان لە هەڵکشان کرد دوای ئەوەی هێزەکانی ئەمریکا رایانگەیاند پلاتفۆرمەکانی هەڵدانی مووشەکی ئێرانیان لە گەرووی هورمز کردووەتە ئامانج، کە ئەوەش یەکەم کردەی سەربازیی ئەمریکایە دژ بە ئێران لە دوای چەند هەفتەیەک.
مەسعود پزیشکیان، سەرۆک کۆماری ئێران، جەختی کردەوە کە وڵاتەکەی لە بەرانبەر دەستدرێژییەکاندا دەستەوستان ناوەستێت، و ئاماژەی بەوەش کرد کە نەسەقامگیری لە ناوچەکەدا لە بەرژەوەندیی هیچ وڵاتێکدا نییە و ئاڵۆزی بۆ هەمووان دروست دەکات.
پزیشکیان، ئەمڕۆ دووشەممە، رایگەیاند: وڵاتەکەی هەوڵی جەنگ نادات، بەڵام بە توندی وەڵامی هەر دەستدرێژییەک دەداتەوە کە بکرێتە سەر وڵاتەکەی.
تەلەفزیۆنی ئێران لە پزیشکیانەوە پێش بەڕێکەوتنی لە تارانەوە بۆ قیرغیزستان بە مەبەستی بەشداریکردن لە "لووتکەی شەنغای" بۆ هاوکاری، بڵاوی کردەوە کە پزیشکیان جەختی کردووەتەوە: هەوڵنەدان بۆ جەنگ پەیامێکی روونە کە تا ئێستا بە جیهانمان راگەیاندووە.
وتیشی: بەڵام ئێمە هەرگیز لە بەرانبەر هیچ دەستدرێژییەکدا دەستەوستان ناوەستین و بە توندی وەڵامی دەستدرێژکاران دەدەینەوە، هاوكات جەختیشی کردەوە کە "نەسەقامگیری و ئاڵۆزییەکان لە ناوچەکەدا لە بەرژەوەندیی هیچ وڵاتێکدا نییە، چونکە هەمووان رووبەڕووی ئاڵۆزی و ئاستەنگ دەکاتەوە.
سەرۆکی ئەمریکا دۆناڵد ترەمپ رایگەیاند کە دوورگەی خارگی ئێرانی کراوەتە ئامانج و لەژێر وێرانکاریدایە، هاوکات ڤیدیۆیەکی دروستکراوی بە ژیریی دەستکرد لەگەڵ پۆستەکەیدا هاوپێچ کردبوو.
ڤیدیۆکە دیمەنی کەسێکی تێدا بوو کە لە فڕۆکەوانێکی جەنگی دەچوو و لە پەنجەرەی کابینەکەیەوە سەیری دەکرد، لە خوارەوەش مووشەک بەسەر دامەزراوەکانی دوورگەکەدا دەبارین و کەشتییەکی جەنگیش دەتەقێتەوە و دەسووتێت.
هەروەها ترەمپ لە رێگەی "ترووس سۆشیاڵ"ەوە ڤیدیۆیەکی تری هاوشێوەی بڵاوکردەوە کە تێیدا بۆردوومانی ئەمریکی لە ڤیدیۆ خەیاڵییەکەدا ناوەوەی دوورگەکە دەکاتە ئامانج و دامەزراوە ئامادەکراوەکانی ناو دوورگەکە وێران دەکرێن.
ترەمپ وتیشی: ویلایەتە یەکگرتووەکان کۆنترۆڵی گەرووی هورمز دەکات، و هەموو مینەکانی لێ لادراوە بە هاوکارییەکی زۆر سنوورداری وڵاتانی تر، بەبێ گوێدانە ئەوەی کە ئێران بەردەوامە لەسەر دروستکردنی ئاڵۆزی و بێزارکردن.
وتیشی: واشنتۆن ناتوانێت بەردەوام بێت لە پاڵپشتیکردنی ئەو وڵاتانەی کە لە تەنیشتی ناوەستن، ئێمە ملیارەها دۆلارمان خەرج کردووە بۆ هاوکاریکردنی هاوپەیمانەکانمان، لەوانەش وڵاتانی "ناتۆ" و کۆریای باشور، سەرەڕای رەتکردنەوەی هاوکاری لەلایەن ئەوانەوە کاتێک ویلایەتە یەکگرتووەکان داوای کردبوو.
لە پەرچەکرداری ئێراندا بەرامبەر بەم هێرشە، تەلەفزیۆنی ئێران بەرەبەیانی ئەمڕۆ دووشەممە ڕایگەیاند، مووشەک لە ناوچە جیاوازەکانی وڵاتەوە بەرەو ئامانجەکانی ناوچەکە تەقێنراون، لە دوای هێرشەکەی ئەمریکا کە دوورگەی "لارک"ی کردبووە ئامانج.
پۆلیسی هەولێر دەستگیرکردنی تۆمەتباری روداوی تەقەکردنەکەی ئەمڕۆی گەڕەکی 99ی زانکۆی راگەیاند، کە بەهۆیەوە ژنێک کوژرا و دوو کەسی دیکەش برینداربوون.
بەڕێوەبەرایەتیی پۆلیسی پارێزگای هەولێر لە راگەیەندراوێکدا بڵاویکردەوە، دوای گەیشتنی هێزەکانیان بۆ شوێنی روداوەکە، توانیویانە لە ماوەیەکی کورتدا تۆمەتباری سەرەکیی روداوەکەی پاشنیوەڕۆی ئەمڕۆ دەستگیربکەن.
روداوەکە پاشنیوەڕۆی ئەمڕۆ رویدا، کاتێک تۆمەتبارەکە بە چەکی جۆری دەمانچە هێرشی کردە سەر ماڵی خەزووری و دەستڕێژی گوللەی لێکردن، لە ئاکامدا خوشکی هاوسەرەکەی دەستبەجێ گیانی لەدەستدا و خەزووری و هاوسەرەکەشی برینداربوون.
پۆلیسی هەولێر جەختی لەوەش کردووەتەوە، لەگەڵ دەستگیرکردنی تۆمەتبارەکەدا دەستبەجێ لێکۆڵینەوەکان دەستیان پێکردووە و رێکاری یاسایی توند بەرامبەری دەگیرێتەبەر بۆ ئەوەی یاسا سەروەر بێت.
بنیامین ناتانیاهۆ هێرشی توند دەکاتە سەر یەکێتی ئەوروپا و دەڵێت؛ بۆ تورکیا بێدەنگن نیوەی قوبرسی داگیرکردوە، کە وڵاتێکی ئەوروپایە، بەڵام ئیسرائیل دەیەوێت لە خاکی خۆیدا بیناسازی بکات و بژی، ئەوروپا تووڕە دەبێت و ناڕەزایەتی دەردەبڕێت.
ناتانیاهۆ ئاماژەی بەوەکردوە، یەکێتی ئەوروپا تەنها لەسەر مافەکانی ئیسرائیل دێنە دەنگ، لە کاتێکدا تورکیا بە ئاشکرا نیوەی قوبرسی داگیر کردوە و هیچ دەنگی لێوەنایەت.
ناوبراو جەختیکردوەتەوە، گەلی جولەکە مافی مێژویی خۆیەتی لە نیشتمانی رەسەنی خۆیدا بژی و خانوو و شاری هەبێت، بەڵام رەخنەکانی ئەوروپا ئەو مافە بە رەوا نابینێت.
نەتانیاهۆ دەڵێت؛ سلۆڤینیا دەوڵەتێکی خاوەن سەروەرییە و مافی خۆیەتی بڕیار بدات و بەکارهێنانی ئەو مافانە "پێشێلکاری یان وروژاندن" نییە، بەڵکو مافێکی رەوایە کە هەندێک کەس هەوڵی زەوتکردنی دەدەن.
دەزگای ئاسایشی هەرێم دەستگیركردنی باندێكی ساختەكردنی شوێنەواری لە سلێمانی راگەیاند، كە سەرقاڵی دروستكردنی سكەیی مێژوویی و كەلوپەلی شوێنەواری بوون.
دەزگای ئاسایشی هەرێم لە راگەیەندراوێكدا بڵاویكردەوە، بەڕێوەبەرایەتی لێكۆڵینەوەی دەزگای ئاسایش بەهەماهەنگی لەگەڵ ئاسایشی پارێزگای سلێمانی، لە رۆژی سێی ئەم مانگە لە سنووری سلێمانی باندێكی پێنج كەسی ساختەكردنی سكەی مێژوویی و شوێنەواریان دەستگیركرد.
ئاماژەی بەوەشكردووە، باندە دەستگیركراوە سەرقاڵی دروستكردنی سكەی مێژوویی و كەلوپەلی شوێنەواربوون بۆ ساختەكردن و ساغكردنەوەی لەناوەوە و دەرەوەی هەرێمی كوردستان.
دەزگای ئاسایشی هەرێم دەشڵێت، لەئێستادا تۆمەتباران بەماددەی 24 لەیاسای شوێنەوار راگیراون و لێكۆڵینەوە لە دۆسێكانیان بەردەوامە.
وتەبێژی کۆشکی کرملن رایگەیاند، پێشنیازی بەستنی لوتکەیەک لە نێوان ڤلادیمێر پۆتین، دۆناڵد ترەمپ و ڤلۆدۆمێر زیلینسکی لە مێژە کراوە، بەڵام هەڵوێستی مۆسکۆ رونە؛ کۆبونەوەی لەو شێوەیە تەنها بۆ ئیمزاکردنی رێککەوتنەکان دەبێت.
دیمیتری پیسکۆف، وتەبێژی کۆشکی کرملن لە بارەی جەنگی وڵاتەکەی و ئۆکراین رایگەیاند، لایەنی ئۆکرانی ئامادەییی جدی بۆ چونە ناو پرۆسەی ئاشتی نیشان نادات.
ناوبراو جەختیکردوەتەوە، بەو پێیەی تا ئێستا جیاوازییەکان بەتایبەت لە سەر بابەتی ناوچەیی و ئاسایش زۆر قووڵن، رێککەوتن ئاسان نییە، بەڵکو پرۆسەیەکی ئاڵۆزی ئاشتیین و وردەکاریی زۆریان تێدایە.
وتەبێژی کرملین ئاماژەی بەوەش کرد کە هیچ مەرجێکی پێشوەختە بۆ سازدانی ئەو لوتکەیە ئامادە نییە، بەڵام مۆسکۆ هێشتا بە کراوەیی بۆ دانوستان ئامادەیە و پێیانوایە هەر کۆبونەوەیەک لەسەر ئاستی سەرکردەکان دەبێت کۆتایی و لوتکەی پرۆسەیەکی درێژخایەنی دانوستاندن بێت، نەک ببێتە جێگرەوەی.
بەڕێوەبەرایەتیی گشتیی شارەوانییەکانی سلێمانی بڵاویکردەوە، بەهۆی نەبونی زەوی لە سنوری قەزای قەرەداغ، فەرمانبەرانی ئەو سنورە، لە شارەوانییەکانی عەربەت، شارەزور و دەربەندیخان زەویان پێدەدرێت.
ئەمڕۆ یەکشەممە، بەڕێوەبەرایەتیی گشتیی شارەوانییەکانی سلێمانی بڵاویکردوەتەوە، لەسەر داوای سەرۆکی شارەوانیی قەرەداغ، لیژنەی گواستنەوەی زەوی سەردانی شارەوانیی قەرەداغیان کردووە و دوای گفتوگۆ و تاوتوێکردنی پێشنیازەکان، بڕیاردراوە فەرمانی وەرگرتنی زەویی فەرمانبەران و خانەنشینان لە سنوری ئەو قەزایە گواستنەوەیان بۆ بکرێت.
ئاماژەبەوەشکراوە، پڕۆسەی گواستنەوەکە بەهۆی نەبونی زەویی پێویست لە بەردەستی شارەوانیی قەرەداغدا دێت.
بەپێی ناوەڕۆکی کۆبونەوەکەشیان، زەوییەکان دەگواسترێنەوە بۆ یەکێک لە شارەوانییەکانی عەربەت، شارەزور، یان دەربەندیخان، ئەویش لەسەر بنەمای بەردەستبونی زەوی لە سنوری کارگێڕیی ئەو شارەوانییانەدا.