ئاژانسی سه‌لامه‌تیی فڕۆكه‌وانیی یه‌كێتیی ئه‌وروپا، هۆشداریەکی بەپەلەی ئاڕاسەتی  کۆمپانیاکانی هێڵی ئاسمانی کردوە و داوای لێکردون تاوەکو کۆتایی مانگی ئەیلولی  خۆیان لە بەکارهێنانی ئاسمانی عیراق و ئێران بەدور بگرن.

دوای دەستپێکردنەوەی هێرشەکانی ئەمریکا  و ئێران، ئاژانسی سه‌لامه‌تیی فڕۆكه‌وانیی یه‌كێتیی ئه‌وروپا  رایدەگەیەنێت، لە ئێستادا ئاسمانی عیراق و  ئێران بۆ گەشتی فڕۆکەوانی سەلامەت نییە.

ئاژانسەکە دەڵێت؛ ئەم راسپاردەیە لە چوارچێوەی هەڵسەنگاندنی بەردەوامی مەترسییە ئەمنییەکاندا دەرچوە، بە ئامانجی پاراستنی گیانی گەشتیاران و سەلامەتیی فڕۆکە مەدەنییەکان، داواش دەکات رێگەی جێگرەوە بگرنبەر.

ئەم هۆشدارییە لە کاتێکدایە، ئاڵۆزییه‌ سه‌ربازییه‌كانی نێوان واشنتن و تاران و چالاكیی فڕۆكه‌ بێفڕۆكه‌وان و موشه‌كه‌كان له‌ ناوچه‌كه‌دا، به‌رده‌وام مه‌ترسی بۆ سه‌ر هێڵه‌ ئاسمانییه‌ مه‌ده‌نییه‌كان دروستده‌كات و ده‌بێته‌ هۆی گۆڕینی رێڕه‌وه‌ نێوده‌وڵه‌تییه‌كان.

ڤلادیمێر پوتن، سەرۆکی روسیا دووپاتی کردەوە کە روسیا بەرەو کۆتاییهێنان بە ململانێی ئۆکراین هەنگاو دەنێت، جەختیشی کردەوە، مۆسکۆ لە ئێستادا لەسەر ئەو رێگەیە.

لە پەراوێزی لوتکەی رێکخراوی شانگهای بۆ هاوکاری لە شاری بیشکێک، ڤلادیمێر پوتنی سەرۆکی روسیا، لە کۆبونەوەیەکدا لەگەڵ نارێندرا مودي، سەرۆک وەزیرانی هیندستان کۆبوەوە.

لە کۆبونەوەکەدا، سەرۆک وەزیرانی هیندستان، جەختی لەسەر چارەسەرکردنی تەواوی کێشەکان بە رێگەی ئاشتییانە و کردەوە و پشتیوانیی تەواوی وڵاتەکەی بۆ سەرجەم هەوڵە  دیپلۆماسییەکان دەربڕی، کە ئامانجیان کۆتاییهێنان بێت بە جەنگی ئۆکراین.

لە وەڵامدا پوتن رایگەیاند، وڵاتەکەی بە کردەیی هەنگاوی بەرەو کۆتاییهێنان بە ململانێی ئۆکراین ناوە و ئێستا نزیکن لەو ئامانجەیان.

قوباد تاڵەبانی، باس لە چارەسەرکردنی کێشەکان دەکات و راشیگەیاندووە، "پێویستە هەموو لایەنە سیاسییەکان پشتگیری لە هەنگاوەکانی حکومەتی فیدراڵ بکەن".

قوباد تاڵەبانی رایگەیاندووە: لەگەڵ کلیمێنس زێمتنەر، باڵیۆزی یەکێتیی ئەوروپا لە عیراق هاوڕابووین کە پێویستە هەموو لایەنە سیاسییەکان پشتگیری لە هەنگاوەکانی حکومەتی فیدراڵ بکەن بۆ چەسپاندنی سەروەریی یاسا و کۆکردنەوەی چەک لە دەستی دەوڵەت و پاراستنی سەربەخۆیی و سەقامگیریی عیراق.

قوباد تاڵەبانی ئاماژەی بەوەشداوە: جەختیشمان کردەوە لەسەر چارەسەرکردنی کێشە هەڵپەسێردراوەکانی نێوان هەرێم و بەغدا، بە تایبەت لەم قۆناغەدا کە زەمینەی زۆرباش و گونجاو هەیە بۆ چارەسەرکردنی کێشەکان بەپێی دەستوور.

 

یەکێتیی ئەوروپا رایگەیاند، لە گوشارەکانی سەر ئێران  بەردەوام دەبن، ئاماژە بەوەشدەکات دەبێت بەرنامە ئەتۆمیی و موشەکە بالیستییکیەکانی تاران بە تەواوەتی سنوردار بکرێت.

ئەمڕۆ دووشەممە، یەکێتیی ئەوروپا، راگەیەندراوێکی بڵاوکردەوە و تێیدا هاتووە؛  لە نزیکەوە لەگەڵ ئەمریکا  و وڵاتانی گروپی حەوت بەردەوام دەبن لە گوشارەکانیان بۆسەر ئێران.

یەکێتییەکە، جەختی کردوەتەوە، دەبێت بەرنامەی ئەتۆمی و بەرنامەی پەرەپێدانی موشەکە باڵیستیکییەکانی تاران بە تەواوەتی سنوردار بكرێن، داواشی لە تاران کردوە، خۆی بەدوربگرێت لەو کردەوانە دەبنە هۆی ناسەقامگیری لە ناوچەکەدا.

لە راگەیەندراوەکەدا هۆشداریش دراوەتە تاران، بە تەواوەتی ئامادەن بۆ گرتنەبەری رێوشوێنی زیاتر بۆ پاراستنی ئاسایش و بەرژەوەندی و ئازادی گەشتکردن لە گەروی هورمزدا.

پاسپۆرتی سلێمانی ناوی ئەو وێبسایت و ئەپەی بڵاوکردەوە کە هاووڵاتیان دەتوانن نۆرەی ئەلیکترۆنی تێدابگرن بۆ دەرهێنان و نوێکردنەوەی پاسپۆرت.

پاسپۆرتی سلێمانی رایگەیاندووە: هاووڵاتییان دەتوانن لەڕێگەی ئەپ و وێبسایتی چاوی عیراق 'عین العراق' نۆرە بۆ دەرهێنان و نوێکردنەوەی پاسپۆرت بگرن و لە ماوەی 24 سەعاتدا وەڵامتان دەدرێتەوە.

پاسپۆرتی سلێمانی دەشڵێت: هەر کەسێک دەتوانێت نۆرە بۆ دایک و باوک و خۆشک و برا بگرێت کە هەمان ژمارەی کارتی نیشتمانییان هەبێت، بەڵام ناتوانێت لەسەر هەمان هەژمار بۆ خزم یاخود هاوڕێکانی نۆرە بگرێت بەهۆی جیاوازیی ژمارەی کارتی نیشتمانییەوە.

بەپێی زانیارییەکانی پاسپۆرتی سلێمانی، لەکاتی نۆرەگرتندا پیویستە هاووڵاتییەکە خۆی ئامادەبێت لە بەرئەوەی راستەوخۆ وێنەی دەگیرێت، هەروەها پێویستە کارتی نیشتمانیەکەشی پێبێت لەبەرئەوەی پێویستی بە سکانکردنە لە بەرنامەکە، لە سەعات 8ـی بەیانییەوە وێبسایت و ئەپەکە بەردەستە تا سەعات 12ـی شەو.

سەرۆکی ئەمریکا دەڵێت؛ ئێران بە رەسمی بووەتە "دەوڵەتێکی شکستخواردوو و مردوو"، و جەخت دەکاتەوە هێزە سەربازییەکان و ئابوریی وڵاتەکەش بە تەواوی داڕماون.

دۆناڵد ترەمپ، سەرۆکی ئەمریکا لە تۆڕی کۆمەڵایەتی سۆسیال تروس بە رەوشی ناوخۆیی و سەربازیی ئێران نوسیویەتی، ئێران بە رەسمی دەوڵەتێکی شکستخواردوو و مردووە، هێزی دەریایی و هێزی ئاسمانییان نەماوە و دراوەکەیان بەهاکەی لەدەستداوە.

ترەمپ ئاماژەی بەوەشکردووە، تاران توانای پێدانی موچەی سەربازەکانی نییە و رێژەی هەڵئاوسان گەیشتووەتە %300، هاوکات سەرکردایەتیی وڵاتەکە لە پاشگەردانیی تەواودایە و ناتوانن بە شێوەیەکی گونجاو نوێنەرایەتیی وڵاتەکەیان بکەن.

سەرۆکی ئەمریکا لە کۆتایی پەیامەکەیدا جەختی لەوە کردووەتەوە کە "تەنها شتێک لای ئێرانییەکان مابێت بڵاوکردنەوەی هەواڵی درۆیە لە ئەمریکاوە، لەگەڵ ئامادەیییان بۆ کوشتنی خۆپیشاندەرانی خۆیان کە تا ئێستا ژمارەیان 100 هەزار کەسی تێپەڕاندووە و دەبێت لەسەر تاوانی جەنگ دژی مرۆڤایەتی دادگایی بکرێن."

ئەنجومەنی پارێزگای دیالە بڕیاریدا بانگهێشتی قائیمقامی قەزای خانەقین بکات، بە مەبەستی تاوتوێکردنی رەوشی قەزاکە.

بەپێی نووسراوێکی رەسمیی ئەنجومەنی پارێزگای دیالە کە لەلایەن عومەر مەعن کروی، سەرۆکی ئەنجومەنی پارێزگای دیالەوە ئیمزا کراوە، بڕیارەکە لەسەر بنەمای یاداشتێک بووە کە لەلایەن ساجد عبد الامیر صعب، سەرۆکی لیژنەی دەروازە سنوورییەکان و گەشەپێدان و کاروباری یەکە کارگێڕییەکان لە 31ی ئابی 2026 پێشکەش کراوە و لەلایەن 6 ئەندامی ئەنجومەنەکەوە ئیمزای لەسەر کراوە.

لە نووسراوەکەدا هاتوو بوو کە ئەندامانی ئەنجومەنەکە بڕیاریان داوە بانگهێشتی قائیمقامی خانەقین بکان بۆ کۆبوونەوەی رەسمیی ئەنجومەن کە بڕیارە رۆژی چوارشەممە، 2ـی ئەیلوولی 2026 سەعات 11ـی سەرلەبەیانی بەڕێوە بچێت، تا تاوتوێی بارودۆخی قەزای خانەقین و ئەو بابەتانە بکەن کە لە تۆڕە کۆمەڵایەتییەکاندا باسیان لێوە کراوە.

حەیدەر عەبودی وتەبێژی حكومەتی عیراق رایگەیاند، زەیدی پێشنیازی مانەوەی بەشێك لە هێزەكانی هاوپەیمانانی رەتكردووەتەوە، لە مانگی داهاتووشدا دەنگ لەسەر پڕۆژە بودجەی 2027 دەدرێت. 

عەبودی لە كۆنفرانسێكی رۆژنامەوانیدا رایگەیاند: پڕۆژە بودجەی 2027 جیاواز دەبێت و بڕیارە ئەنجومەنی وەزیران لە مانگی ئەیلولی ئەمساڵدا دەنگی لەسەر بدات. 

وتیشی: حكومەت تاوتوێی پرسی بەهەمیشەیی كردنی گرێبەستەكان و دیاریكردنی تێچووی داراییان دەكات.

حەیدەر عەبودی باسی لەوەشكرد: گەڕانەوەی چەك بۆ دەستی دەوڵەت لەپێشینەی كارەكانی حكومەتی عیراقە و ئەو رێكارانەشی حكومەت لەوبارەیەوە ئەنجامی دەدات، بەپێی یاسا و دەستورە.

بە وتەی عەبودی: عەلی زەیدی سەرۆك وەزیرانی عیراق پێشنیازێكی بۆ هێشتنەوەی بەشێك لە هێزەكانی هاوپەیمانی نێودەوڵەتی لە دوای 30ی ئەیلول رەتكردووەتەوە. 

ئەوەشی ئاشكرا كرد: زەیدی گەشتێك بۆ وڵاتانی ئەوروپا لە ناوەڕاستی مانگی ئەیلول ئەنجام دەدات، كە پاریس و بەرلین لەخۆدەگرێت و باسی پرسی ئەمنی و چەندین بابەتی تر دەكرێت.

سەبارەت بە پرسی گەندەڵیش وتی: حكومەتی عیراق دەستكەوتی وای بەدەستهاتووە كە لە ساڵی 2003ەوە بەدەستنەهاتووە و هەروەها تاوتوێی هەمەجۆركردنی سەرچاوەكانی داهات دەكات. 

 

سەرۆکایەتیی زانکۆی سلێمانی، لە راگەیەندراوێکدا سەرجەم مامۆستایان، فەرمانبەران و خوێندکارانی ئاگادار کردەوە کە رۆژی شەممە، 19ی ئەیلولی 2026، یەکەم رۆژی ساڵی نوێی خوێندنی (2026–2027) دەبێت لە تەواوی کۆلێژ و بەشەکانی زانکۆدا.

سەرۆکایەتیی زانکۆ ئاماژەی بەوە داوە: لەم چوارچێوەیەدا گشت ئامادەکارییە ئیدارییەکان ئەنجام دراون و خزمەتگوزارییەکانی بەشە ناوخۆییەکانیش دابین کراون.

هاوكات داوای لە خوێندکاران کردووە لەو رێکەوتە دیاریکراوەدا بەپێی خشتەی وانەکان سەردانی کۆلێژەکانیان بکەنەوە.

دادگای لێکۆڵینەوەی تاوانەکانی دژە گەندەڵی ناوەندی بە سەرۆکایەتیی دادوەر ضیاء جەعفەر، ئەمڕۆ دووشەممە، دەستبەسەرداگرتنی بڕە پارەیەکی زۆر، موڵک و ئۆتۆمبێلی سەر بە تۆمەتباری دەستبەسەرکراو (عەلاء موحسین خەلەف)، بەڕێوەبەری نووسینگەی تۆمەتباری دەستبەسەرکراو (عەدنان جومەیلی) ئاشکرا کرد، ئەمەش لەسەر بنەمای لێکۆڵینەوە بەردەوامەکانی لەگەڵیدا.

دادوەری لێکۆڵینەوەی تایبەتمەند لە راگەیەندراوێکدا روونی کردەوە، رێکارەکانی لێکۆڵینەوە و بەدواداچوون بوونە هۆی دەستبەسەرداگرتنی بڕی حەوت ملیار دیناری عیراقی، جگە لە پێنج ملیۆن و نیو دۆلاری ئەمریکی.

دادوەر ئاماژەی بەوەش دا: لێکۆڵینەوەکان بوونە هۆی دەستبەسەرداگرتنی 35موڵک و 6 ئۆتۆمبێلی سەر بە تۆمەتبارەکە.

وەزارەتی کار و پێداویستییە کۆمەڵایەتییەکان، ئەمڕۆ دووشەممە، خەرجکردنی موچەی مانگی ئەیلوولی 2026ی بۆ کرێکارانی خانەنشینکراوی دەستەبەرکراو لە بەغداد و سەرجەم پارێزگاکان راگەیاند.

خولود حەیران فنجان، بەرێوەبەری گشتیی فەرمانگەی خانەنشینی و دەستەبەری کۆمەڵایەتیی کرێکاران، رایگەیاند: فەرمانگەکە تەواوی رێکارەکانی پەیوەست بە بەخشینی موچەی کرێکارانی خانەنشینکراوی دەستەبەرکراوی لە نێوەڕۆی ئەمڕۆ دووشەممە، رێکەوتی 31/8/2026 ەوە کۆتایی پێ هێناوە.

لە راگەیەندراوەکەدا، فنجان داوای لە سەرجەم خانەنشینکراوان کردوووە سەردانی بنکەکانی دابەشکردن بکان بۆ وەرگرتنەوەی موچەکانیان.

لە گەڕەکی کانی ماران لە پارێزگای هەڵەبجە، بەهۆی دەستکاریکردنی گولە تۆپێک لە ناو خانووێەکدا تەقینەوەیەک روویدا و بەپێی زانیارییە سەرەتاییەکان لە ئەنجامی روداوەکەدا دوو کەس بوونە قوربانی.

ئاکام قطب الدین ئاغاوەیس، وتەبێژی بەڕێوەبەرایەتیی پۆلیسی پارێزگای هەڵەبجە رایگەیاند: سەعات 12:15 خولەک ئاگادار کراونەتەوە لە روداوەکە، و دەستبەجێ تیمەکانی بەشی پۆلیسی بەڵگەکانی تاوان و بنکەی پۆلیسی هەڵەبجە بە هاوکاری لەگەڵ هێزەکانی بەڕێوەبەرایەتیی ئاسایشی هەڵەبجە گەیشتوونەتە شوێنی روداوەکە.

وتەبێژی پۆلیس ئاشکرای کرد کە لە ئەنجامی دەستکاریکردنی ئەو گولە تۆپەدا دوو کەس بە ناوەکانی (نەوزاد مارف ساڵح) تەمەن 40 ساڵ (لەدایکبووی 1984) و (سەرهەنگ کبیر ئەمین) تەمەن 34 ساڵ (لەدایکبووی 1990) بوونەتە قوربانی، و جەختیشی کردەوە کە لێکۆڵینەوەکان لەسەر روداوەکە بەردەوامن.

پشتگیری سەرۆکی ئەنجومەنی نوێنەرانی عیراق و ئیمزای پێویست بۆ سێ داواکاری گرنگ لە کۆکراوەتەوە و ئاڕاستەی لیژنەی دارایی ئەنجومەنەکە کراوە.

د. بڕیار رەشید، ئەندامی ئەنجومەنی نوێنەرانی عیراق رایگەیاندووە: بە ئیمزای بەشێک لە پەرلەمانتاران و پشتگیری سەرۆکی پەرلەمان؛ سێ داواکاریی گرنگ ئاڕاستەی لیژنەی دارایی کران، تا لە بودجەی داهاتوودا چارەسەر بکرێن.

د. بڕیار رەشید دەڵێت: لە ماوەی رابردوودا، بۆ هەر یەکێک لەو سێ داواکارییە گرنگە، ئیمزای پێویستی ئەندامانی ئەنجومەنی نوێنەرانی عیراقمان کۆکردووەتەوە و بە پشتگیری سەرۆکی پەرلەمانەوە، بە شێوەیەکی رەسمی ئاڕاستەی لیژنەی دارایی کراون، بۆ ئەوەی لە چوارچێوەی بودجەی گشتیی داهاتوودا چارەسەرێکی یاسایی و دارایییان بۆ بدۆزرێتەوە

د. بڕیار رەشید دەڵێت سێ داواکارییەکە بریتین لە:

یەکەم؛ دەرچووانی کۆلێژەکانی پزیشکی ددان و دەرمانسازی، داواکاری بۆ دابینکردنی دەرفەتی دامەزراندن و تەرخانکردنی پلەی تایبەت بۆ ئەو دەرچووانەی کە بەهۆی بارودۆخی دارایی و ئابووریی ساڵانی رابردووەوە، دەرفەتی دامەزراندنیان بۆ نەڕەخساوە، بە تایبەتی لەبەر پێویستیی بەردەوامی نەخۆشخانە و دامەزراوە تەندروستییەکان بە پسپۆڕییەکانیان.

دووەم؛ پلەبەرزکردنەوە و شایستە داراییەکانی فەرمانبەرانی هەرێمی کوردستان، داوامان کردووە ماف و شایستە دارایی و کارگێڕییەکانی پلەبەرزکردنەوەی فەرمانبەران، کە لە ساڵانی رابردوودا بەهۆی کێشە داراییەکان دواخراون، بە شێوەیەکی دادپەروەرانە جێبەجێ بکرێن و جیاوازی لەنێوان فەرمانبەرانی هەرێم و ناوچەکانی دیکەی عیراق نەکرێت.

سێهەم؛ مامۆستایانی وانەبێژی لادراو، پشتیوانیمان لە داواکاریی نزیکەی 700 مامۆستای وانەبێژ کردووە، کە هەندێکیان بۆ ماوەی 10 تا 12 ساڵ خزمەتیان کردووە، بەڵام لە پرۆسەی گۆڕینی وانەبێژان بۆ گرێبەست بەشدار نەکراون داوامان کردووە مافیان بگەڕێندرێتەوە، خزمەتەکانیان لەبەرچاو بگیرێت و پێداویستیی دارایی بۆ گەڕاندنەوەیان بۆ دامەزراوە پەروەردەییەکان دابین بکرێت.

د. بڕیار رەشید ئاماژەی بەوەشداوە: ئەم هەنگاوانە لە چوارچێوەی هەوڵ و کاری پەرلەمانیدان و بە مانای دڵنیایی سەد لە سەدی جێبەجێبوونیان نییە، بەڵام بەدواداچوونمان بەردەوام دەبێت، هیوامان وایە سەرجەم پەرلەمانتاران، لە هەموو فراکسیۆنەکان و بەتایبەتی فراکسیۆنە کوردستانییەکان، هاوکار و پشتیوانی ئەم داواکارییانە بن تا بە هەوڵی هاوبەش بگەنە ئەنجام.

بەهۆی لافاوەوە لە ئەمریكا زیاتر لە 15 كەس بێسەرو شوێنبون و دەیان كەسیش لە ناوچەكانیان گواستراونەتەوە . 

میدیاكانی ئەمریكا ئاشكرایان كردوە، بەهۆی ئەو لافاوەی رووی لە ویلایەتی ئەریزۆنا كردوە، تا ئێستا 15 كەس بێسەرو شوێنن و تیمەكانی رزگاركردن سەرقاڵی گەڕانن بە دوایاندا، هاوكات 62 كەس لەلایەن تیمەكانی فریاكەوتنەوە گواستراونەتەوە و هەوڵەكانیش بۆ گواستنەوەی ژمارەیەكی تر بەردەوامە . 

لە رۆژی شەممەوە ، شەپۆلێكی بەهێزی باران بارین و لافاو ناوچەكانی برایت ئەنجڵ كانیۆن و فانتۆم رانشی لە ویلایەتی ئەریزۆنا گرتوەتەوە و جگە لە بێسەرو شوێنەكان تا ئێستا هیچ حاڵەتێكی گیان لەدەستدان و برینداربون تۆمارنەكراوە . 

 

 

چەند رۆژێكە بەنزینی جۆری موحەسەن پاڵپشتیكراو لە وێستگەكانی دابەشكردنی سووتەمەنی لە پارێزگای كەركوك نەماوە، ئەمەش نیگەرانی و ناڕەزایەتییەكی زۆری لای شۆفێران دروستكردووە.

سەرچاوەیەك لە بەشی دابەشكردنی بەرهەمە سووتەمەنییەكانی كەركوك بەپەیامنێری كوردسات نیوز ی راگەیاند، ئەم كێشەیە تەنیا كەركووكی نەگرتووەتەوە بەڵكو سەرجەم پارێزگاكانی عیراقی گرتووەتەوە، هۆكارەكەشی بوونی كێشەیەكی تەكنیكیلە پاڵاوگەكاندا.

لێپرسراوانی بەشەكە ئاماژەیان بەوە كردووە كە بڕیارە لە دوای نیوەڕۆی ئەمڕۆوە كەمێك لەو بەنزینە بگاتەوە وێستگەكان و بەسەر شۆفێراندا دابەش بكرێت.