قائیمقامی سیدەکان رایگەیاندووە، بەهۆی بەفربارین و بەستنی رێگاوە، هاتوچۆ لەرێگای نێوان سیدەکان- سۆران ئەستەمە.

ئیحسان چەلەبی قائیمقامی سیدەکان رایگەیاندووە، بەهۆی بارینی بەفر و بەستنی رێگای سیدەکان- سۆران، سەرەڕای هەوڵە بەردەوامەکانی تیمی راماڵینی بەفر، بەڵام هێشتا هاتوچۆکردن لەو رێگایە ئەستەمە.

داواش لە هاوڵاتیان دەکەن، لەکاتی زۆر پێویست و بە ئۆتۆمبێلی بەرز نەبێت ئەو رێگایە بەکار نەهێنن.

ماوەی نزیکەی 10 رۆژە شەپۆلی بەفر و سەرما بە کاتی جیاواز ناوچە جیاوازەکانی هەرێمیان گرتووەتەوە و ماوەی دوو رۆژیشە شەپۆلی بەفربارین و دابەزینی پلەکانی گەرما چڕتر بووەتەوە، بە جۆرێک، دوای چوار ساڵ بۆ یەکەمجار شەوی رابردوو لە کەرکوک بەفر باری.  

ئەمڕۆ هەڵبژاردنی پێشوەختەی پەرلەمانی ئەڵمانیا بەڕێودەچێت و پێشبینی دەكرێت راستڕەوەكان دەنگێکی زۆر بەدەست بهێنن.

بەپێی راپرسییەك، پارتی سۆسیال دیموكراتی ئۆلاف شۆڵتز، راوێژكاری ئەڵمانیا دەنگەكانی كەمدەكات و 16٪ی دەنگەكان بەدەست دەهێنێت بەوەش دەكەوێتە ریزبەندی سێیەم پارتی وڵاتەكە.

لە راپرسییەكەدا پێشبینی كراوە و پارتی یەكێتی دیموكرات مەسیحی ئەڵمانیا بە بەدەستهێنانی نزیكەی 30٪ی دەنگەكان ببێتە پارتی یەكەم و دوای ئەویش پارتی راستڕەوی ئەڵتەرناتیڤ بە بەدەستهێنانی 20٪ لە ریزبەندی دووەمدا بێت و دوای ئەویش سەوزەكانی ئەڵمانیا بە بەدەستهێنانی 13٪ دەنگەكان ببنە چوارەم.

دوای كردنەوەی سندوقەكانی دەنگدان لە سەعات هەشتی بەیانی، پڕۆسەكە تاوەكو سەعات شەشی ئێوارە بەردەوام دەبێت و لەگەڵ داخستنی بنكەكانی دەنگدان، ئەنجامە بەراییەكان بڵاو دەكرێنەوە، سبەینێش ئەنجامی كۆتایی رادەگەیەنرێت.

چاودێران پێیان وایە ئەو هەڵبژاردنە زۆرترین كاریگەریی لەسەر پەیوەندییەكانی ئەڵمانیا و ئەمریكا و جەنگ  لە ئۆكراین دەبێت چونكە جگە لە پارتی ئەڵتەرناتیڤ كە دژی هاوكاریی ئەڵمانیایە بۆ ئۆكراین، هەر سێ پارتەكەی دیكە لەگەڵ بەردەوامبوونی هاوكارییەكانن.

بە پێی نوسراوێکی فەرمی کە وێنەیەکی دەست کوردسات نیوز کەوتووە، داواکاری گشتی بەردەڕەش داوای لە بەڕێوەبەرایەتی ئەوقافی دەڤەرەکە کردووە کە هەر جۆرە گرێبەستێکی هاوسەرگیری بۆ مندالانی خوار تەمەنی 12 ساڵ رابگیرێت.

لە نوسراوەکەدا جەخت لەوە کراوەتەوە کە ئەم جۆرە هاوسەرگیرییە بە پێی یاسا تاوانە و سزای لەسەرە، هەر زانایەکی ئایینیش پێچەوانەی ئەم بڕیارە بجوڵێتەوە رووبەڕووی لێپرسینەوەی یاسایی دەبێتەوە.

 بەپێی نوسراوەکە، ئەم کردەوەیە تاوانە و لە ماددەی (10/ف/5) یاسای باری کەسی و ماددەی (2-2) یاسای نەهێشتنی توندوتیژی خێزانی ئاماژەی پێکراوە و سزای بۆ دانراوە.

شایەنی باسە، ئەم هەنگاوە لە چوارچێوەی بەرەنگاربوونەوەی دیاردەی هاوسەرگیری پێش وەختە و پاراستنی مافی منداڵان لە هەرێمی کوردستان دێت.

پاپای ڤاتیکان کە ماوەی هەفتەیەکە بەهۆی تێکچوونی باری تەندروستیەوە لە نەخۆشخانەیە، لە ئێستادا رەوشی تەندروستی خراپتر بووە و لە 'دۆخێکی سەختدایە'، ڤاتیکان دەڵێت - خوێنی تێکراوە.

پاپا تەمەنی 88 ساڵە، هۆکاری خەواندنەکەی لە نەخۆشخانە دەگەڕێتەوە بۆ هەوکردنی سییەکانی و لە 2013ەوە تا ئێستا ئەمە دەبێتە هەشتەم جار کە بەو هۆکارە لە نەخۆشخانە دەخەوێنرێت.

لە ماوەی کەمتر لە چوار ساڵدا ئەمە چوارەم جارە کە پاپا فرانسیس لە نەخۆشخانە خەوێندراوە. کێشە جەستەییەکانی، لەوانە ئازارێکی زۆر لە شان و ئەژنۆیدا کە ناچاری کردووە کورسی ویلچەر بەکاربهێنێت، چەندین نەشتەرگەری و هەوکردنی کۆئەندامی هەناسەدان، نیگەرانییەکانی لەسەر توانای بەردەوامبوونی لە چالاکییەکانی دروستکردووە.

بە گوێرەی ڤاتیکان، دوایـین پشکنینی پزیشکی دەرکەوتووە کە پاپا فرانسیس تووشی هەوکردنی کۆئەندامی هەناسەدان یان نەخۆشی سیەسۆ pneumonia بووە کە جۆرە هەوکردنێـکی سیـیەکانە و بەهۆی حاڵەتەکانی وەک هەوکردنی بۆرییەکانی، تەنگەنەفەسی بۆ دروستبووە.

وەفدی دانوستانکاری حکومەتی هەرێمی کوردستان رایگەیاند کە حکومەتی هەرێم پابەندە بە جێبەجێکردنی هەمواری یاسای بودجە تایبەت بە هەناردەکردنەوەی نەوتی هەرێمی کوردستان. لە راگەیەندراوێکدا کە لەلایەن وەفدی دانوستانکاری حکومەتی هەرێمەوە بڵاوکرایەوە، ئاماژە بەوەدراوە کە حکومەتی هەرێم جەخت لەسەر هەناردەکردنەوەی نەوت دەکاتەوە.  

لە راگەیەندراوەکەدا هاتووە: "حکومەتی هەرێمی کوردستان پابەندە بە جێبەجێکردنی هەمواری یاسای بودجە و جەخت لەسەر هەناردەکردنەوەی نەوتی هەرێم دەکاتەوە."  

لە کۆبوونەوەی هاوبەشی وەفدی حکومەتی هەرێم لەگەڵ وەفدی وەزارەتی نەوتی فیدراڵ، دووپاتکرایەوە کە جێبەجێکردنی یاسای بودجە پێویستی بە رێککەوتنێک لەسەر بڕی تێچووی دەرهێنانی نەوت لە کێڵگە نەوتییەکانی هەرێمی کوردستان هەیە. هەروەها جەخت لەوە کراوەتەوە کە پێویستە میکانیزم و پێدانی شایستەی کۆمپانیاکان بە شێوەیەکی یاسایی رێکبخرێت.  

هەروەها ئاماژەی بەوەشکردووە کە پێویستە چارەسەری خێرا بۆ سەرجەم ئەو کێشانە بدۆزرێتەوە کە لە پڕۆسەی هەناردەکردنەوەی نەوتدا رووبەڕووی دەبنەوە.  

لە کۆتاییدا، وەفدی حکومەتی هەرێم جەخت لەسەر پێویستی دووبارە هەناردەکردنەوەی نەوتی هەرێم بە زووترین کات دەکاتەوە و پێشنیاری کردووە کە پێویستە هەموو لایەنەکان هەوڵبدەن بۆ چارەسەرکردنی ئەو کێشانەی کە لەم بوارەدا هەن.  

ئەم راگەیەندراوە هاوکاتە لەگەڵ راگەیەندراوێکی رۆژی شەممەی وەزارەتی نەوتی عیراق کە تیایدا هاتبوو: "ئامادەکارییەکان بۆ هەناردەکردنەوەی نەوتی هەرێم لە رێگەی بەندەری جەیهانەوە تەواو بووە."

دووکەس کە هەڵیان کوتاوەتە سەر باخێک لەلایەن خاوەنی باخەکەوە بریندار کراون و بە برینداری گواستراونەتەوە بۆ نەخۆشخانە.

بەپێی زانیارییەکانی پەیامنێری کوردسات نیوز: ئەمشەو لەشەقامی حەولی شاری کەرکوک چەند کەسێک هەڵیانکوتاوەتە سەر باخی هاوڵاتیەک، لەبەرامبەردا خاوەنی باخەکە لێیان هاتۆتە دەست و دوو لە پەلاماردەرەکانی بریندارکردوە.

بەپێی سەرچاوەکە یەکێک لەبریندارەکان باری ناجێگیرە و بۆ،یەکەی چاودێری ورد گوازراوەتەوە.

ساما یابە بەڕێوەبەری ڕاگەیاندنی تەندروستی کەرکوکی بەکوردسات نیوزی ڕاگەیاند: ئەو ڕوداوە دوو برینداری لێکەوتوتەوە و وتیشی، بریندارەکان لەژێر چاودێریدان.

ئەمریكا كاروانێكی هاوكاری سەربازیی لە هەرێمی كوردستانەوە رەوانەی رۆژئاوای كوردستان دەكات و پەیامنێری كوردسات نیوزیش دەڵێت، كاروانەكە لە چوارچێوەی بەرەنگاربونەوەی داعشدایە كە چەك و كەرەستەی سەربازیی لەخۆ گرتووە.

روانگەی سوری بۆ مافەكانی مرۆڤ بڵاویكردەوە رۆژی شەممە 36 بارهەڵگری سەربازیی ئەمریكا لە هەرێمەوە رەوانەی حەسەكە كراوە.

پەیامنێری كوردسات نیوز لە رۆژئاوای كوردستان رایگەیاند: لە ماوەی هەفتەی رابردودا رەوانەكردنی كەرەستەی سەربازیی لە لایەن ئەمریكاوە بۆ رۆژئاوا زۆر زیادیكردوە و جگە لەو كاروانە سەربازیانەی لە هەرێمی كوردستانەوە رەوانە دەكرێن، ئەمریكا بە فڕۆكەش كەرەستەی سەربازیی بۆ بنكەكانی دەگوازێتەوە.

بە پێی زانیارییەكان ئەو 36 بارهەڵگرە سەربازییەی ئەمریكا كە پێكهاتبون لە زرێپۆش و چەك و كەرەستەی سەربازیی لە هەرێمی كوردستانەوە و لە رێگەی سنوری وەلیدەوە بۆ رۆژئاوا گوازراوەتەوە و زۆربەشی رەوانەی بنكەی سەربازیی ئەو وڵاتە لە ناوچەی قسرۆك لە حەسەكە كراوە.

داواکاری گشتی فەرەنسا لەگەڵ ئاژانسی فرانس پرێس قسەی کردووە و رایگەیاندووە کە لە پەراوێزی خۆپیشاندانێکدا لە رۆژهەڵاتی فەرەنسا کەسێک بە چەقۆ هێرشی کردووەتە سەر ژمارەیەک هاووڵاتیی و پۆلیس و بەهۆیەوە کەسێک گیانی لەدەستداوە و پێنج پۆلیسیش بریندارن.

بەپێی زانیارییە سەرەتاییەکانی پۆلیسی ئەو وڵاتە، گومان دەکرێت ئەو هێرشە لەلایەن پیاوێکی تەمەن 37 ساڵەوە ئەنجامدرابێت، کە لە لیستی "تیرۆردا"بێت.

داواکاری گشتی، نیکۆلاس هایتز، ڕوونیکردەوە سێ ئەفسەری دیکەی پۆلیسی شارەوانی برینداربوون، بەڵام برینەکانیان سەخت نییە. 

پەیوەست بە روداوەکەوە ئیمانوێل ماکرۆن رایگەیاند: روداوەکە هێرشێکی تیرۆرستیە.

بەهۆی ئەو شەپۆلە بەفر و بارانەی رووی لە هەورامان کردووە، سبەینێ لە سەرجەم دامودەزگا حکومییەکانی تەوێڵە و بیارە کرایە پشووی رەسمی.

حەمید بارام بەرێوەبەری ناحیەی بیارە رایگەیاند، بەهۆی ئەو شەپۆلە بەفر و بارانەی رووی لە هەورامان کردووە، لەپێناو سەلامەتی گیانی خوێندکاران و فەرمانبەران سبەینێ یەکشەممە  لە سەرجەم دامەزراوەکانی حکومەت و ناوەندەکانی خوێندنی سنووری بەرێوەبەرایەتی ناحیەکە کرایە پشووی رەسمی.

ئاماژەی بەوەشکرد، پشووەکە ئەو خوێندکارانەی ناگرێتەوە کە تاقیکردنەوەی بەرایی (تمهیدی) پۆلە ناکۆتاکانیان هەیە لە دەرەوەی ناحیەی بیارە.

ئۆفیسی هەڵبژاردنەکانی سلێمانی ئاگاداری سەرجەم کارمەندانی هێزە ئەمنی و سەربازییەکان و کارمەندانی رۆژی دەنگدانی کرد کە کارتی بایۆمەترییەکانیان ئامادەیە و دەتوانن وەریبگرنەوە.

ئەم کارتانە لە یەکەکانی تۆماری بایۆمتری کۆمسیۆنی هەڵبژاردن وەردەگیرێنەوە، بەتایبەتی ئەو یەکانەی کە پێشتر لێی کارتی بایۆمترییان وەرگرتووە.

کارمەندان دەتوانن، جگە لە ڕۆژانی هەینی و شەممە و پشووە فەرمیەکان، رۆژانە لە کاتژمێر (8.00)ی بەیانی تا کاتژمێر (3.00)ی عەسر سەردان بکەن و کارتەکانیان وەربگرنەوە.

ئۆفیسی هەڵبژاردنەکانی سلێمانی لەگەڵ راگەیەندراوەکەیدا، شوێنی یەکەکانی تۆماری بەوێنە بڵاوکردووەتەوە.

وێنەکان:

هەردوو وەفدی دانوستانکاری، یەکێتیی نیشتمانیی کوردستان و پارتی دیموکراتی کوردستان، ئەمڕۆ شەممە 22ـی شوباتی 2025، لە شاری سلێمانی کۆبوونەوەیەکی ئەرێنییان ئەنجامدا. 

ئەم کۆبوونەوە تایبەت بوو بە خستنەروو و گفتوگۆکردنی راپۆرتی لیژنەی هاوبەشی هەردوولا، کە بریتی بوو لە تێڕوانینی سیاسی و کارگێڕی و هەنگاوەکانی پەیوەست بە پێکهێنانی کابینەی دەیەمی حکومەتی هەرێمی کوردستان و دامەزراوەکانی تر.

لە کۆبوونەوەکەدا، سەرنج و تێبینی وەفدی دانوستانکاری هەردوولا خرایەڕوو و میکانیزمی گونجاو بۆ چۆنییەتی رێکخستنەوە و رێککەوتن لەسەر کۆی بابەتەکان قسەی لەسەر کرا. هەروەها هەردوو وەفد بڕیاریاندا کە درێژە بە کۆبوونەوەکانی نێوانیان بدەن بۆ دەستکەوتنی ئەنجامێکی کاریگەر و پەسەندکراو، بەتایبەتی لە پەیوەندیدا بە پێکهێنانی کابینەی نوێی حکومەتی هەرێم و چارەسەرکردنی چەندین بابەتی گرنگی تر کە پەیوەندییان بە دۆخی هاووڵاتیانی هەرێمی کوردستانەوە هەیە.

لە راگەیەندراوە هاوبەشەکەدا هاتووە: "هەر بۆ ئەو مەبەستەش هەردوو وەفدی دانوستانکار بڕیاریاندا درێژە بەکۆبوونەوەکانی نێوانیان بدەن بۆ زیاتر لێکتێگەیشتن و داڕشتنی بەرنامەیەکی هاوبەشی پەسەندکراو لەپێناو بەرژەوەندی هاوڵاتیانی هەرێم".

وەزارەتی نەوتی عیراق لە راگەیەندراوێکدا ئاشکرای کرد کە رێکارەکانی دەستپێکردنەوەی هەناردەی نەوتی هەرێمی کوردستان لە رێگەی بەندەری جیهانەوە تەواو بووە.

بەپێی راگەیەندراوێک کە ئەمڕۆ 22ـی شوباتی 2025 بڵاویکردەوە، پرۆسەی هەناردەکردنەکە بەپێی ئەو میکانیزمانە دەبێت کە لە هەمواری یاسای بودجەدا هاتووە. و لە چوارچێوەی سەقفی بەرهەمهێنانی عێراق لە رێکخراوی ئۆپێک.

هەروەها وەزارەتی نەوتی عێراق داوای لە دەسەڵاتدارانی هەرێمی کوردستان کردووە کە بڕی بەرهەمهێنان بدات بە کۆمپانیای سۆمۆ بۆ دەستپێکردنی هەناردەکردن لە رێگەی بۆری عێراق-تورکیا و بەندەری جەیهان، بەپێی ئەو گرێبەستانەی کە لەگەڵ کۆمپانیاکان ئیمزا کراوە.

شایەنی باسە، هەناردەی نەوتی هەرێمی کوردستان لە رێگەی بەندەری جەیهانەوە لە ماوەی رابردوودا راگیرابوو.

جێگەی ئاماژە پێدانە لە ماوەکانی پێشودا د. لەتیف ڕەشید، سەرۆک کۆماری عیراق هەمواری یاسای بودجەی عێراقی پەسەند کردو و لەپاش بڵاوبوونەوەی لە رۆژنامەی فەرمیی (وەقائیع)ـدا بڵاوکرایەوە و بەمەش هیچ بەربەستێک لە بەردەم هەناردەکردنەوەی نەوتدا کە نەما.

 هێزەکانی فەرماندەیی ناوەندی ئەمریکا (سێنتکۆم) رایگەیاند: لە21ـی شوبات توانیان واسیم تەحسین بەیرەقدار، سەرکردەیەکی باڵای ڕێکخراوی تیرۆریستی "حراس الدين"ـی سەر بە قاعیدە، لە باکووری رۆژئاوای سوریا بکوژین.

ژەنەڕاڵ مایکل ئێریک کوریلا، فەرماندەی سێنتکۆم لە لێدوانێکدا رایگەیاند "ئێمە بێ وەستان بەدوای هەڕەشە تیرۆریستییەکاندا دەگەڕێین و لەناویان دەبەین، بەبێ گوێدانە شوێن و جوگرافیا یان".

بەپێی راگەیەندراوی سێنتکۆم، ئەم هێرشە ئاسمانییە بەشێکە لە هەوڵە بەردەوامەکانی ئەمریکا و هاوپەیمانانی لە ناوچەکە بۆ بەرەنگاربوونەوەی چالاکییە تیرۆریستییەکان و پاراستنی ئاسایشی هاوڵاتیانی مەدەنی و سەربازی.

شایەنی باسە، "حراس ئەلدین" گروپێکی تیرۆریستییە کە پەیوەندی راستەوخۆی بە رێکخراوی قاعیدەوە هەیە و لە ناوچەکانی سوریادا چالاکی سەربازی ئەنجام دەدات.

لە پانێڵێکی تایبەت بە پێکەوەژیانی ئاشتییانەی پێکهاتەکان کە لە شاری سلێمانی لەلایەن ڤیژن فاوندەیشنەوە رێکخرا، قوباد تاڵەبانی، جەختی لەسەر گرنگی دروستکردنی سیستمێکی حوکمڕانی کردەوە کە لەگەڵ سروشتی فرەپێکهاتەیی هەرێمی کوردستان بگونجێت.

قوباد تاڵەبانی جێگری سەرۆک وەزیران، لە وتەیەکیدا رایگەیاند "هەرێمی کوردستان کۆمەڵگەیەکی فرەڕەنگ و فرەپێکهاتەیە و پڕە لە بۆچوون و ئایدۆلۆژیای جیاواز، گرنگە لە هەردوو ئاستی سیاسی و کۆمەڵایەتیدا ئیدارەی ئەم فرەڕەنگییە بدرێت".

هەروەها جەختی کردەوە لەسەر پێویستی قووڵکردنەوەی گیانی پێکەوەژیان و رێگەنەدان بە پەراوێزخستنی هیچ پێکهاتەیەک لە هەرێمی کوردستان.

شایەنی باسە ئەم پانێڵە بەشێکە لە چالاکییەکانی ڤیژن فاوندەیشن بۆ بەهێزکردنی پێکەوەژیانی ئاشتییانە لە نێوان پێکهاتە جیاوازەکانی هەرێمی کوردستان.

وتەبێژی یەکێتیی نیشتیمانیی کوردستان بە کوردسات نیوزی راگەیاند: ئەمڕۆ وەفدی دانوستانکاری یەکێتی و پارتی لە سلێمانی کۆدەبنەوە و گفتوگۆ لەسەر ئەو ستراتیژە دەکەن کە دەبێتە بناغەی پێکهێنانی حکومەتی نوێ.

 سەعدی ئەحمەد پیرە وتەبێژی یەکێتیی نیشتیمانیی کوردستان بە کوردسات نیوزی راگەیاند : ئەمڕۆ لە سلێمانی هەردوو وەفدی دانوستانکاری یەکێتی و پارتی کۆدەبنەوە و گفتووگۆ لەسەر دواین پەرەسەندنەکانی پێکهێنانی کابینەی نوێی حکومەتی هەرێم دەکەن.
وتەبێژی یەکێتی بۆ کوردسات نیوز باسی لەوەشکرد: تیمی تەکنیکی یەکێتی و پارتی لە ماوەی رابردوودا رەشنوسێکیان وەک ستراتیژی بەڕێوەبردنی حکومەتی داهاتوو ئامادەکردووە و وابڕیارە ئەمڕۆ لە کۆبوونەوەکەدا گفتووگۆ لەسەر ئەو ستراتیژە بکەن کە دەبێتە بناغەیەک بۆ پێکهێنانی حکومەتی نوێی هەرێم.
وتەبێژی یەکێتی راشیگەیاند: بەرەوپێشچوون لە گفتووگۆکانی پەیوەست بە پێکهێنانی کابینەی داهاتووی حکومەتی هەرێم هاتووەتە ئاراوەو خوازیارین زۆر نەبات هەردوولا لەسەر کۆی خاڵەکان بگەینە رێککەوتن و حکومەتێکی خزمەتگوزار و کارا کە وەڵامدەرەوەی ئەم قۆناغەبێت پێکبهێندرێت .

پۆلیسی ئەڵمانیا رایگەیاند، لە شاری بەرلینی پایتەختی ئەڵمانیا کەسێک بە چەقۆ هێرشی کرایە سەر و تۆمەتباریش هەڵهات.

پۆلیسی بەرلین ئەمشەوهەینی لە پۆستێکدا لە ئێکس بڵاویکردەوە، بەچەقۆ هێرش کراوەتە سەر پیاوێک و بە برینداری گواستراوەتەوە بۆ نەخۆشخانە و لە ئێستادا باری تەندروستی جێگیرە.

سەبارەت بە چارەنووسی تۆمەتبارەکە دەڵێ: تۆمەتبارەکە هەڵهاتووە و لە ئێستادا بە دوایدا دەگەڕێین.