هەواڵەکان
دڵنیای لە بونی بڕی پێویست لە گازی شل دەدرێت و بەڕێوەبەری گشتی کۆمپانیای غازی باکوری کەرکوک، رایگەیاند رۆژانە 120 تۆن غازی شل بۆ پارێزگای سلێمانی دابین دەکەین.
ئەندازیار ئەحمەد عەبدولمەجید، بەڕێوەبەری گشتی کۆمپانیای غازی باکور بەکوردسات نیوزی راگەیاند، ئەوان رۆژانە بری دیاریکراوی غازی شل لەوەزارەتەوە بۆ پارێزگای سلێمانی دابین دەکەین.
بەڕێوەبەری گشتی کۆمپانیای غازی باکور دەشڵێت؛ ئەو بڕە غازەی لەئێستادا بۆ سلێمانی دابین دەکرێت 120 تۆنە لە رۆژێکدا.
ناوبراو ئاماژەی بەوەشکرد، ئەو بڕە هیچ ئاڵوگۆڕێکی بەسەردا نەهاتوە و بەردەوامیش دەبێت.
دڵنیایشیدا، هیچ گرفتێک نییە لەبەرهەمهێنانی غازدا لەکەرکوک و بەرهەمهێنانی غاز بەردەوامە، ئەحمەد عەبدولمەجید توشیەتی؛ کۆمپانیاکەیان نەک بۆ سلێمانی بەڵکو بۆ کەرکوک و موسڵ و سەڵاحەدینیش غاز دابین دەکات.
بەبۆنەی رۆژی جیهانی ژنانەوە، بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێکی بڵاوکردوەتەوە و دەڵێت؛ کارکردن بۆ نەهێشتنی جیاکاری و رێگریکردن لە توندوتیژی و بەدیهێنانی دادپەروەریی کۆمەڵایەتی ئەرکێکی هاوبەشی هەموومانە و دەبێت دوور لە دروشم هەنگاوبنێین بۆ دەستەبەرکردنی ژیانێکی باشتر بۆ ژنانی ئازای کوردستان.
بافڵ جەلال تاڵەبانی جەختیشیکردوەتەوە، فراوانکردنی بەشداریی ژنان لە ناوەندەکانی بڕیار و دەسەڵات و بەڕێوەبردندا بە ئەرکی خۆمان دەزانین و وەک هەمیشە بە ژنان دەڵێم پشتیوان و پاڵپشتتانم
دەقی پەیامەکەکی سەرۆکی یەکێتی
لە رۆژی جیهانیی ژناندا پیرۆزبایی گەرم لە ژنانی کوردستان و عیراق و جیهان دەکەم، هیوای سەلامەتی و سەرفرازییان بۆ دەخوازم و بە رێزەوە لە رۆڵ و پێگە و خزمەتەکانی هەموو ئەو ژنانە دەڕوانم کە لەپێناو ماف و یەکسانی قوربانییان داوە.
کارکردن بۆ نەهێشتنی جیاکاری و رێگریکردن لە توندوتیژی و بەدیهێنانی دادپەروەریی کۆمەڵایەتی ئەرکێکی هاوبەشی هەموومانە و دەبێت دوور لە دروشم هەنگاوبنێین بۆ دەستەبەرکردنی ژیانێکی باشتر بۆ ژنانی ئازای کوردستان و داکۆکیکاریان بین بۆ پاراستنی ماف و ئازادییەکانیان.
ئێمە لە یەکێتیی نیشتمانیی کوردستان فراوانکردنی بەشداریی ژنان لە ناوەندەکانی بڕیار و دەسەڵات و بەڕێوەبردندا بە ئەرکی خۆمان دەزانین و وەک هەمیشە بە ژنان دەڵێم پشتیوان و پاڵپشتتانم.
بافڵ جەلال تاڵەبانی
سەرۆکی یەکێتیی نیشتمانیی کوردستان
بەهۆی گرژی و ئاڵۆزییەکانی ناوچەکەوە، وەک رێکارێک بۆ پاراستنی فڕۆکە مەدەنییەکان، وەزارەتی گواستنەوەی عیراق دەستیکردوە بە شاردنەوەی فڕۆکەکان لە شوێنی پارێزراودا.
لە کاتێکدا ئاسمانی ناوچەکە و عیراق بووەتە مەیدانی تەراتێنی موشەک و درۆنەکان، گەشتە ئاسمانییەکان بە تەواوەەتی راگیراون، وەزارەتی گواستنەوەی عیراق بڕیاریداوە، فڕۆکە مەدەنییەکانی بباتە شوێنی پارێزراو.
مەیسەم سافی، بەڕێوەبەری نوسینگەی راگەیاندنی وەزارەتەکە ئاشکرای کردوە، کە ئامانجی ئەم هەنگاوە پاراستنی ئاسایشی گەشتیارییە لە کاتێکدا لە ناوچەکەدا شەڕ بەردەوامی هەیە.
ناوبراو جەختیشیکردەوە، کە دابەشکردنی فڕۆکەکان لە شوێنی پارێزراودا بۆ ئەوەیە، کە لە لایەک لە مەترسیی موشەکەکان دوور بن و لە لایەکی تریش ئامادەیی تەواویان هەبێت بۆ دەستپێکردنەوەی گەشتەکان، ئەگەر رەوشەکە گونجا و مەترسییەکان رەوینەوە.
لەتاران کێشەی سوتەمەنی دروست بوە و پارێزگاری شارەکەش دەڵێت؛ بە زوترین کات چارەسەری دەکەین و تا کاتی چارەسەرکردنەکەش، رێژەی پێدانی سوتەمەنی لە 30 لیترەوە دەکەن بە 20 لیتر بۆ هەر کەسێک.
لە دوای بۆردومانە چرەکە دوێنێ ئەمریکا و ئیسرائیل بۆسەر پاڕێزگاکانی تاران و ئەسفەهان، کە تیایدا زۆربەی پاڵاوگە و کۆگاکانی نەوت و سوتەمەنی کرانە ئامانج، پارێزگاری تاران دەڵێت؛ با خەڵک ترسی لە کەمی سوتەمەنی نەبێت.
محەمەد سادق موعتەمیدیان، پارێزگاری تاران بە ئاژانسی هەواڵی تەسنیمی راگەیاند، با خەڵکی خەمی سوتەمەنیان نەبێت، کەمی سوتەمەنی بە خێرای چارەسەر دەکەن و لە ئێستادا تا کاتی چارەسەرکردنی کێشەکە، رێژەی بەنزین و گاز بە کارتی کەسی لە 30 لیتر لە رۆژێکدا بۆ 20 لیتر کەمکراوەتەوە.
ناوبراو، ئاماژەی بەوەشکردوە، لە دوای دوو رۆژ، پێدانی بەنزین و گاز دەگەڕێتەوە رەوشی جاران و پێدانی سوتەمەنی ئاسایی دەبێتەوە و جەختیشیکردوەتەوە، بەهۆی کەمی بەنزین، سەرجەم وێستگەکانی پێدانی غاز(CNG) 24سەعات کراوەن بۆ پێدانی غاز بە هاووڵاتییان.
ئەمە لە کاتێکدایە شەوی رابردوو، ئەمریکا و ئیسرائیل زیاتر لە 30 پاڵاوگەی نەوت و کۆگای سوتەمەنیان کردە ئامانج و بەهۆیەوە بوەتە هۆی دروستبونی کێشەی سوتەمەنی بۆ هاووڵاتییان.
سەرۆکی پەرلەمانی ئێران هۆشداریدەدات، ئەگەر رەوشەکە بەردەوام بێت، نە نەوت دەفرۆشرێت، نە توانیان بەرهەمهێنانیش دەمێنێت، ئاماژەی بەوەشکردوە، ئەوەی ئێستا رودەدات هەمووی بەهۆی مەرامەکانی بنیامین ناتانیاهۆوەیە.
محەمەد باقر قاڵیباف، سەرۆکی پەرلەمانی ئێران، لە پەیامێکیدا لە تۆڕی کۆمەڵایەتی ئێکس نوسیویەتی، دۆناڵد ترەمپ دەیوت، نرخی نەوت زۆر بەرز نابێتەوە، ئێستا کە بەرز بوەتەوە دەڵێت بەم زوانە چاک دەبێتەوە، ئاماژەی بەوەشکردوە، جیهان لەپێناو مەرامەکانی ناتانیاهۆ دەسوتێت.
قاڵیباف ئاماژەی بەوەشکردوە، ئەگەر جەنگ بەم شێوەیە بەردەوام بێت، نە ڕێگەیەک بۆ فرۆشتنی نەوت دەمێنێت و نە توانایەک بۆ بەرهەمهێنان.
نوسیویشیەتی؛ لە ئێستادا نەک تەنها بەرژەوەندییەکانی ئەمریکا، بەڵکو بەرژەوەندیی وڵاتانی ناوچەکە و جیهانیش لە پێناو وەهمەکانی بنیامین ناتانیاهۆ دەسووتێنن.
سوپای ئەمریكا رەتیدەكاتەوە هیچ سەربازێكیان لە ئێران بە دیل گیرابێت .
تەیم هۆكینز؛ وتەبێژی فەرماندەیی ناوەندیی ئەمریكا بڵاویكردەوە،ئەوەی هەندێك لە لێپرسراوانی ئێران باسی لێوە دەكەن لەبارەی بەدیل گرتنی سەربازانی ئەمریكا لەلایەن ئێرانەوە، هیچ بنەمایەكی نییە و دورە لە راستیەوە و تەنها بۆ چەواشەكارییە.
پێشتر عەلی لاریجانی ئەمینداری ئەنجومەنی باڵای ئاسایشی نەتەوەیی ئێران رایگەیاندبوو ، چەند سەربازێكی ئەمریكی وەك دیل گیراون و دوپاتیشیكردەوە كە تاران نایەوێت جەنگ فراوان ببێت .
مەسعود پزیشکیان، سەرۆک کۆماری ئێران، لە پەیامێکدا جەختی لە ئامادەیی تەواوی هێزە چەکدارەکانی وڵاتەکەی کردەوە بۆ بەرگریکردن لە وڵاتەکەی و رایگەیاند، ئێران لە رابردوودا لە بەرانبەر زوڵم و چەوسانەوەدا چۆکی دانەداوە و لە داهاتووشدا هەرگیز کارێکی لەو شێوەیە ناکات.
پزیشکیان ئاماژەی بەوەداوە، کە دوژمن هەوڵی نانەوەی فیتنە و دروستکردنی جیاوازی لە نێوان ئێران و وڵاتانی تردا دەدات، بەڵام جەختی کردەوە، کە تاران پەیوەندییەکی برایانەی لەگەڵ دراوسێکانیدا هەیە.
سەرۆک کۆماری ئێران هۆشدارییەکی توندی ئاراستەی کۆمەڵگەی نێودەوڵەتی کرد و رایگەیاند، ئەگەر خاکی هەر وڵاتێک بۆ هێرشکردنە سەر ئێران بەکاربهێنرێت، ئەوا ناچار دەبن بە توندی وەڵامی ئەو سەرچاوەیە بدەنەوە.
پزیشکیان وتوشیەتی؛ ئێمە بە هێزەوە لە بەردەم هەر کەسێک دەوەستینەوە، کە دەستدرێژی بکاتە سەر وڵاتەکەیان و وەڵامێکی کوشندەیان دەبێت.
لە بەشێکی دیکەی قسەکانیدا، پزشکیان رەخنەی توندی لە ئەمریکا و ئیسرائیل گرت سەبارەت بە جەنگی غەززە و دەڵێت؛ ئایا ئەمریکا و ئیسرائیل شەرم ناکەن لە کوشتنی ئەو هەموو منداڵە و گیانلەدەستدانی زیاتر لە 50 هەزار منداڵ لە غەززە؟
سەرۆک کۆماری ئێران، دوپاتیشیکردەوە، یەکڕیزی گەلی وڵاتەکەی و یەکدەستی و یەکگرتوویی، کلیلی سەرەکیی تێپەڕاندنی ئەم قۆناغە و روبەڕوبوونەوەی زوڵمە.
لە چاوپێکەوتنێکی تایبەتدا لەگەڵ کەناڵی سی بی ئێس، دۆناڵد ترەمپ جەختی لە بەردەوامی هێرشەکانی ئەمریکا بۆ سەر ئێران کردەوە و رایگەیاند، کە هێزەکانیان لە ئێران کارێکی "سەرسوڕهێنەر"یان ئەنجامداوە.
ترەمپ ئاماژەی بەوە کرد، کە لە ئەنجامی ئەو هێرشانەدا، تواناکانی مووشەکی و فڕۆکەی بێفڕۆکەوانی ئێرانیان تێکشکاندووە و هێزی دەریایی ئەو وڵاتەشیان نوقم کردووە، بە جۆرێک کە دەڵێت؛ ئیتر هیچیان بۆ نەماوەتەوە.
لە بەشێکی تری قسەکانیدا، ترەمپ باسی لە هەژموونی ئێران لە ناوچەکە کرد و ئاماژەی بەوە دا، کە عەلی لاریجانی، بەرپرسی باڵای ئێران، پلانی هەبووە بۆ زاڵبوون بەسەر تەواوی رۆژهەڵاتی ناوەڕاستدا، بەڵام بەهۆی گوشار و سیاسەتەکانی ئەوەوە، لاریجانی ناچار بە تەسلیمبوون بووە لە بەرانبەر ئەمریکا و وڵاتانی ناوچەکەدا.
ترەمپ دەشڵێت؛ گەشبینە بە سەرکەوتنێکی خێرا لە ئێران، کە هاوشێوەی پێشتر نەبینرابێت.
سەبارەت بە هەڵوێستی وڵاتانی هاوپەیمانیش، ئەو رایگەیاند، کە بۆ ئەوان گرنگ نییە هاوپەیمانەکان چی دەکەن و دەتوانن بە ئارەزووی خۆیان بڕیار بدەن، چونکە بە وتەی ئەو وڵاتە دڵسۆزەکان، لەم جەنگەدا لەگەڵ ئەمریکادان.
شەوی رابردوو و بەرەبەیانی ئەمڕۆ 10 جار بە درۆن هێرش كرایە سەر هەولێر و بەهۆیەوە ئەندامێكی ئاسایشی فرۆكەخانە گیانی لەدەستدا، چەند جارێكیش هێرشكرایە سەر سلێمانی بەڵام سەرجەمیان پوچەڵكرانەوە.
پەیامنێری كوردسات نیوز لە سلێمانی رایگەیاند، شەوی رابردوو و بەرەبەیانی ئەمڕۆ سێجار بە درۆن هێرشكرایەسەر بارەگای یو ئێن لە نزیك هۆتێل تایتانیك و فەرماندەیی هێزەكانی 70، بەڵام سەرجەم هێرشەكان تێكشكێنران.
دەزگای ئاسایشی هەرێم لە راگەیەنراوێكدا بڵاویكردەوە، بەچوار درۆن بارەگای هێزەكانی70 و هەروەها بە دوو درۆن نزیك بارەگای یو ئێن و نووسینگەی كونسوڵگەری توركی لەشاری سلێمانی كراوەتە ئامانج و هێرشەكان هیچ زیانێكی مرۆیی نەبووە.
هاوكات هێرشكرایە سەر بارەگاكانی پێشووی كۆمەلەی شۆرشگێڕان لە ناوچە زرگوێزەڵە و بەهۆیەوە كەسێك گیانلەدەستداوە.
پەیامنێری كوردسات نیوز لە هەولێر رایگەیاند، شەوی رابردوو و بەرەبەیانی ئەمڕۆ 10 جار هێرشی درۆنی كرایە سەر هەولێر بەڵام سەرجەمیان خرانە خوارەوە، بەشێك لە درۆنەكانیش ئاراستەی فرۆكەخانەی هەولێر كرابوون و بەهۆی هێرشەكانەوە كارمەندێكی ئاسایشی فرۆكەخانە گیانی لەدەستدا و كارمەندێكی تر برینداربوو.
دەزگای ئاسایشی هەرێم راگەیەنراوێکی بەپەلەی سەبارەت بە هێرشە درۆنییەکانی سەر سلێمانی بڵاوکردەوە و تێیدا وردەکاری چەند هێرشێکی بۆ سەر شاری سلێمانی و دەوروبەری ئاشکراکرد.
دەزگای ئاسایشی هەرێم رایگەیاند، شەوی 8ـی3ـی2026، دووجار لەسەر یەک و بە چوار فڕۆکەی بێفڕۆکەوان (درۆن)، بارەگای هێزەکانی 70ـی پێشمەرگە کرایە ئامانج.
ئاماژەی بەوەشکرد، لە هێرشێکی دیکەدا، بە دوو درۆن دەوروبەری بارەگای نەتەوە یەکگرتووەکان (UN) و نوسینگەی کونسوڵخانەی گشتی تورکیا لە شاری سلێمانی کرانە ئامانج.
دەزگای ئاسایشی هەرێم ئەوەشی خستەڕوو، لە ئەنجامی ئەم هێرشانەدا هیچ زیانێکی مرۆیی نەکەوتووەتەوە.
راشیگەیاند، لێكۆڵێنەوە لەروداوەكە بەردەوامە.
سەرۆكی ئەنجومەنی باڵای ئاسایشی نیشتمانی ئێران دەڵێت، ئەمریكا لە تێگەیشتن لە ئێران شكستی هێناوە و سەرۆك وەزیرانی ئیسرائیلیش سەرۆكی ئەمریكای هەڵخەڵەتاندووە.
عەلی لاریجانی، سەرۆكی ئەنجومەنی باڵای ئاسایشی نیشتمانی ئێران رایگەیاند، واشنتۆن بە هەڵە ویستوویەتی سیناریۆی ڤەنزوێلا لە ئێران دووبارە بكاتەوە و تێنەگەیشتووە كە پێكهاتەی فكری ئەم ناوچەیە جیاوازە.
ئاماژەی بەوەش كرد، بنیامین ناتانیاهۆ، سەرۆك وەزیرانی ئیسرائیل، دۆناڵد ترەمپ سەرۆكی ئەمریكای بۆ هێرشكردنە سەر ئێران هان داوە بە مەبەستی تێكدانی پێكهاتەی حكومەتی ئێران و كوشتنی رابەری باڵای وڵاتەكە.
جەختیشیكردەوە، ئێرانییەكان سەرەڕای ناكۆكییە ناوخۆییەكان، لە كاتی مەترسیدا یەكگرتوون و رێگە بە دابەشبوونی وڵات نادەن.
لاریجانی ئاشكراشیكرد، هێرشەكانیان تەنیا بنكەكانی ئەمریكا دەكەنە ئامانج نەك وڵاتانی ناوچەكە، چونكە نایانەوێت بەرەی جەنگ فراوانتر بێت.
سەرۆک وەزیرانی ئیسرائیل رایدەگەیەنێت؛ لە هێرشەکانیان بۆسەر ئێران بەردەوام دەبن تا هەموو ئامانجەکانیان بەدەستدەهێنن.
بنیامین ناتانیاهۆ، سەرۆک وەزیرانی ئیسرائیل، رایگەیاند، وڵاتەکەی شەو و رۆژ خەریکی کارکردنە لە دژی ئێران و جەختی کردەوە کە ئەم شەڕەی ئێستا زۆر لەوە گەورەترە کە بیری لێ دەکرێتەوە.
وتیشی، "ئێمە خەریکی گۆڕینی نەخشەی رۆژهەڵاتی ناوەڕاستین" و ئەم ئۆپەراسیۆنە سەربازییانە بە خاڵی وەرچەرخان لە مێژووی ناوچەکەدا دەبینێت.
سەرۆک وەزیرانی ئیسرائیل ئاشکرایکرد، لە هێرشەکانیاندا توانیویانە دەیان سەرکردەی باڵای سوپای پاسداران بکوژن و گورزی کوشندە لە فەرماندەیی ئەو هێزە بوەشێنن.
ناتانیاهۆ هۆشداری دا کە پلانێکی رێکخراو و تۆکمەیان بۆ رووبەڕووبوونەوەی ئێران هەیە و چەندین "سوپڕایز"ی گەورەیان بۆ تاران ئامادە کردووە کە لە کاتی خۆیدا دەردەکەون.
ئەوەشی خستەڕوو، ئەم ئۆپەراسیۆنە دەبێتە دەرفەتێک بۆ گەلی ئێران تاوە بتوانن چارەنووسی خۆیان بەدەستەوە بگرن و لە ژێر دەستی دەسەڵاتی ئێستا رزگاریان بێت.
ناتانیاهۆ جەنگی ئێستای بە "جەنگێکی مێژوویی" وەسف کرد و وتی: "قەبارەی ئەم شەڕە دوو هێندەی جەنگی 12 رۆژەیە و تا بەدەستهێنانی ئامانجەکانمان بەردەوام دەبن."
وەزیری دەرەوەی ئێران دەڵێت، دەستپێشخەرییەكەی پزیشكیان بۆ كەمكردنەوەی گرژییەكانی نێوان ئێران و وڵاتانی دراوسێی، لەلایەن ترەمپەوە رەتكراوەتەوە.
عەباس عراقچی، وەزیری دەرەوەی ئێران لە تۆڕی كۆمەڵایەتی ئێكس بڵاویكردەوە، دەستپێشخەرییەكەی مەسعود پزیشكیان سەرۆك كۆماری ئێران بۆ كەمكردنەوەی گرژییەكانی نێوان ئێران و وڵاتانی دراوسێی، دەستبەجێ لەلایەن دۆناڵد ترەمپ سەرۆكی ئەمریكاوە رەتكرایەوە.
ئەوەشی خستووەتەڕوو، ئەگەر ترەمپ بەدوای گرژییەوە ئەوە هێزە چەكدارەكانی ئێران زۆر لەمێژە ئامادەن، بەرپرسیارێتی توندبوونەوەی رێككارە خۆپارێزییەكانی ئێرانیش لە ئەستۆی ئەمریكایە.
وەزیری دەرەوەی ئێران ئاماژەی بەوەشداوە، تێچووی هەفتەی سەرەتای شەڕی دژی ئێران لەسەر ئەمریكا 100 ملیار دۆلار و گیانی چەند سەربازی گەنجی ئەمریكی بووە، دەشڵێت، ئەنجومەنی نەتەوەیی هەواڵگری ئەمریكا بۆ ترەمپیان روونكردووەتەوە لە شەڕی دژی ئێران، ئەمریكا شكست دەهێنێت.
ئەوەش لەدوای ئەوەدێت، مەسعود پزیشكیان سەرۆك كۆماری ئێران دەستپێشخەرییەكی كرد بۆ راگرتنی هێرشی سەر وڵاتانی دراوسێی ئێران، بەومەرجەی لە خاكی ئەو وڵاتانەوە هێرش نەكرێتەسەر ئێران.
بڕیارە سەعات نۆی ئەمشەو ئەنجومەنی نوێنەرانی عیراق بۆ تاوتوێکردنی رەوشی ئەمنی ناوچەکە کۆببێتەوە.
فەرمانگەی راگەیاندنی ئەنجومەنی نوێنەرانی عێراق بڵاویکردەوە، بڕیارە سەعات نۆی شەوی شەممە، ئەنجومەنەکە کۆبوونەوەیەکی تایبەت سەبارەت بە نوێتریین پێشهاتە ئەمنییەکانی ناوچەکە و عیراق ئەنجام بدات.
بەپێی زانیارییەکانی کوردسات نیوز، کۆبوونەوەکە بە ئامادەبوونی ژمارەیەک لە فەرماندە باڵا ئەمنییەکانی عیراق بەڕێوەدەچێت، تێیدا تیشک دەخرێتە سەر کاریگەریی ئاڵۆزییەکانی ئەم دواییەی ناوچەکە لەسەر ئاسایشی نیشتمانی عیراق و رێکارەکانی پاراستنی سەقامگیری وڵات.
ئەم کۆبوونەوەیە لە کاتێکدایە کە ناوچەکە بە رەوشێكی هەستیاردا تێپەڕ دەبێت و مەترسییەکانی پەرەسەندنی ململانێکان رویان لە زیادبوون کردووە.
شەوی رابردوو چەند شارێكی هەرێمی كوردستان و عیراق كرانە ئامانج و دەنگی تەقینەوەی بەهێز لە زۆربەی ناوچەكان بیسترا.
لە درێژەی گرژی و ئاڵۆزییەكانی ناوچەكە و لە چوارچێوەی هێرشە موشەكی و دۆرنییەكانی نێوان ئێران و ئەمریكا و ئیسرائیل، شەوی رابردوو لە هەولێر بە درۆن هێرشكرایە سەر هۆتێلی ئەرجان رۆتانا هیچ زیانێكی ماددی لێنەكەوتەوە، لە سلێمانیش بنكەی هێزەكانی ئەمریكا لە ناو فەرماندەیی هێزەكانی 70ی پێشمەرگە كرایە ئامانج و تەنها زیان بەر كۆگایەك كەوتووە لەناو فەرماندەیی.
هەر لە درێژەی هێرشەكاندا، لە بەغداد هێرشكرایە سەر بنكەی ئاسمانی ڤیكتۆریا لەناو فڕۆكەخانەی نێودەوڵەتی بەغداد و لەلایەن سیستمی بەرگریی ئاسمانییەوە بەرپەرچی هێرشەكان درایەوە، بەپێی سەرچاوەكانیش بە درۆن هێرشكراوەتە سەر فڕۆكەخانەی نێودەوڵەتی بەسرە، لە باشوری شاری موسڵیش دەنگی تەقینەوەی گەورە بیستراوە.
هەر شەوی رابردوو باڵیۆزخانەی ئەمریكا لە بەغداد لە پەیامێكدا رایگەیاند، ئەگەری ئەوە هەیە میلیشیاكانی نزیك لە ئێَران هێرش بكەنە سەر ئەو هۆتێلانەی ئەمریكی و بیانییان تێدایە، بۆئەو مەبەستەش داوا هاووڵاتیانی ئەمریكی كرد عیراق بە جێبهێڵن یان خۆیان بپارێزن، داواشی لە هاووڵاتیانی كرد بە رێگەی وشكانی خۆیان بگەیەننە وڵاتانی ئوردن و كوەیت و سعودیە و توركیا و عیراق بەجێبهێڵن.
مەسعود پزیشکیان، سەرۆک کۆماری ئێران، لە پەیامێکی ڤیدیۆییدا جەختی لەسەر گۆڕینی ستراتیژی وڵاتەکەی بەرامبەر وڵاتانی دراوسێ کردەوە و رایگەیاند کە پێویستە لەگەڵ وڵاتانی ناوچەکەدا کار بۆ چەسپاندنی ئاشتی و ئارامی بکرێت.
پزیشکیان رایگەیاند، ئەوان سوپاسگوزاری گەلەکەیانن و پێویستە ناکۆکیەکانیان وەلانێین و بە توندی بەرگری لە وڵاتەکەیان بکەن.
سەرۆک کۆماری ئێران جەختیشیکردەوە، دوژمن دەبێ بزانێ کە خەونەکانی بۆ تەسلیم بوونی ئێمە نایەتە دی.
ناوبارو ئاماژەی بەوەکرد، کە دوابەدوای کۆبوونەوەی "ئەنجومەنی کاتیی رێبەری"، بڕیارێکی نوێ دراوە و بە هێزە چەکدارەکانی ئێران راگەیەندراوە، کە لەمەودوا نابێت هیچ هێرشێک یان موشەکبارانێک دژی وڵاتانی دراوسێ ئەنجام بدەن، مەگەر لە حاڵەتی بەرگری لە خود و لە کاتی هێرشکردنە سەر ئێراندا بێت.
سەرۆک کۆماری ئێران دووپاتی کردەوە، کە ئارەزوو دەکەن کێشەکان لە ڕرێگەی دیپلۆماسییەوە چارەسەر بکەن و کۆتایی بە گرژی و ململانێکان لەگەڵ وڵاتانی دەوروبەریان بهێنن.