تۆڕی هەواڵی فۆکس نیوزی ئەمریکی بڵاویکردەوە، هێزی دەریایی ئەمریکا سێیەمین گروپی هێرشبەری کەشتییە فڕۆکەهەڵگرەکانی بۆ ئۆپەراسیۆنەکانی دژ بە ئێران ئامادە کردووە و بڕیارە بەم زووانە رەوانەی ناوچەکەیان بکات.

 بەپێی زانیارییەکانی ئەم کەناڵە، کەشتیی فڕۆکەهەڵگری "یو ئێس ئێس جۆرج دەبڵیو بوش" رۆژی پێنجشەممە سەرجەم مەشق و راهێنانە سەربازییە پێویستەکانی پێش دەستپێکردنی ئۆپەراسیۆنەکانی بەسەرکەوتوویی کۆتایی پێهێناوە و ئێستا لەوپەڕی ئامادەباشیدایە بۆ جوڵەکردن بەرەو دەریای ناوەڕاست.

هاوکات لەگەڵ ئەم ئامادەکارییانە، کەشتیی گەورەی فڕۆکەهەڵگری "جیراڵد ئاڕ فۆرد"یش دوای تێپەڕبوونی بە کەناڵی سوێسدا، رۆژی پێنجشەممە گەیشتووەتە ناو ئاوەکانی دەریای سوور، ئەمەش لە چوارچێوەی ئەو بەڵێنەی پێشتر کاربەدەستانی ئەمریکا دابوویان بۆ رەوانەکردنی هێزی زیاتر و پتەوکردنی پێگەی سەربازیی خۆیان لە ناوچەکەدا بە مەبەستی رووبەڕووبوونەوەی هەڕەشەکانی تاران.

بافڵ جەلال تاڵەبانی دەڵێت هەرێمی كوردستان لە چەندین لاوە هێرشی دەكرێتەسەر و حزبەكانی رۆژهەڵاتی كوردستان هێرش ناكەنەسەر ئێران.

بافڵ جەلال تاڵەبانی سەرۆكی یەكێتیی نیشتمانیی كوردستان بە كەناڵی فۆكس نیوزی ئەمریكی رایگەیاند، بەشێوەیەكی كتوپڕ جەنگەكە دەستیپێكردووە و هەرێمی كوردستان بە بەردەوامی بۆردومان دەكرێت لە چەندین لاوە.

وتیشی، لایەنە كوردییەكانی ئۆپۆزسیۆنی ئێران لە دەرەوەی خاكی ئێرانن و لە نزیك سنوری ئەو وڵاتەن و ئۆپراسیۆن ئەنجام نادەن و ئەو جوڵەیەش زیان بەخشە كورد ببێتە بەشێك لەو شەڕە.

دەشڵێت، دۆناڵد ترەمپ كوردی بە شەڕكەرێكی نایاب ناوبردووە و ئاماژەی بە پاراستنی خەڵكی عیراق لەو شەڕە كردووە كە لە پێشینەی كارەكانە و سوپاسگوزاریی خۆی بۆ ئەو ساڵانە دەربڕیوە كە كورد لەگەڵ هێزە تایبەتەكانی ئەمریكا خزمەتیان كردووە.

بافڵ جەلال تاڵەبانی پێی وایە لە ئێستادا گۆڕینی دەسەڵات ئەگەرێكی بەهێز نییە و تاران بە توندی بەرگری دەكات.

لەپێناو پاراستنی سەلامەتی مامۆستایان و خوێندکاران، بڕیاری راگرتنی پرۆسەی خوێندن لە هەموو ناوەندەکانی خوێندنی حکومی و تایبەت درا.

وەزارەتەکانی پەروەردە و خوێندنی باڵای هەرێم راگەیەنراوێكی هاوبەشیان بڵاوكردەوە و رایانگەیاند: لە 8ی مانگ تا 23ی مانگ لە گشت ناوەندەكانی خوێندنی وەزارەتی پەروەردە و وەزارەتی خوێندنی باڵا پشوو دەبێت...

لە راگەیەندراوەکەدا ئاماژەیان بەوەشکرد، ئەم بڕیارە هەموو ناوەندە حکومی و ناحکومی و نێودەوڵەتی وتایبەتەکان دەگرێتەوە.

 وەزارەتەکانی پەروەردە و خوێندنی باڵا، جەختیان کردەوە، ماوەی نێوان 11 تا 23ی 3ـی2026 وەک پشووی رەسمی بەهارە هەژمار دەکرێت و ئەم هەنگاوە بۆ پاراستنی رەوش و سەلامەتی گشتییە.

شاناز ئیبراهیم ئەحمەد، خانمی یەکەمی عیراق پەیامێکی هاوخەمی بۆ کۆچی دوایی مامۆستا شێخ حسێن شێخ مستەفا بڵاوکردەوە و رایگەیاند، وەک پێشەنگی بەخشین و دڵسۆزیی و خەمخۆری، بۆ هەتایە ناوی مامۆستا شێخ حسێن لەدڵ و ویژدانی خوێندکارەکانی و کەرتی پەروەردە و فێرکردن، بەگەشاوەیی دەمێنێتەوە.

خانمی یەکەمی عێراق پەیامێکی هاوخەمی بۆ کۆچی دوایی مامۆستا شێخ حسێن شێخ مستەفا بڵاوکردەوە، کەئەمە دەقەکەیەتی:

بەبیستنی هەواڵی ماڵئاوایی یەکجارەکی مامۆستا (شێخ حسێن شێخ مستەفا)، زۆر غەمباربووم.

مامۆستا شێخ حسێن جێ پەنجەیەکی جوانی بەبەڕێوەبەرایەتی گشتی پەروەردەی سلێمانییەوە جێهێشت وەک پێشەنگی بەخشین و دڵسۆزیی و خەمخۆری، بۆ هەتایە ناوی لەدڵ و ویژدانی خوێندکارەکانی و کەرتی پەروەردە و فێرکردن، بەگەشاوەیی دەمێنێتەوە.

پرسەو سەرەخۆشی لەخێزان و کەسوکارەکەی و یەکێتی مامۆستایانی کوردستان ئەکەم و هاوبەشی خەم و پەژارەیانم.

خواى گەورە لەکۆچکردوو خۆش بێت، وجێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.

بەهۆی زیادبوونی هێرشە درۆنییەکان بۆ سەر ناوچە مەدەنییەکانی بەحرەین، رەوشی ناوچەکە رووبەڕووی مەترسییەکی گەورە بووەتەوە و سێنتکۆمیش هۆشداری دەدات.

سێنتکۆم رایدەگەیەنێت: ئێران 12 وڵاتی جیاوازی بۆردومان کردووە و بەردەوامیشە لە بە ئامانجگرتنی هاووڵاتیانی مەدەنی لە رۆژهەڵاتی ناوەڕاست.

فەرماندەیی ناوەندیی ئەمریکا 'سێنتکۆم' رایگەیاند، شەوی رابردوو هێزەکانی ئێران بە حەوت درۆن ناوچە مەدەنییەکانی بەحرەینیان بە ئامانج گرتووە.

ئاماژەی بەوەشکرد، ئەم هێرشانەی ئێران قبوڵکراو نییە و بەبێ وەڵام نامێننەوە و لەگەڵ هاوپەیمانەکانمان لە ناوچەکەدا لە کارکردنی بەردەوامداین بۆ نەهێشتنی ئەم مەترسییە لەسەر هاووڵاتیانی مەدەنی تەواوی ناوچەکە.

سەرۆکی ئەمریکا مەرجی کۆتایی وڵاتەکەی بۆ راگرتنی شەڕ و ئیمزاکردنی هەر رێککەوتنێک لەگەڵ ئێران راگەیاند، کە ئەویش "خۆ رادەستکردنی تەواو و بێمەرجی" تارانە.

دوای هەفتەیەک لە دەستپێکردنی هێرشە هاوبەشەکانی ئەمریکا و ئیسرائیل بۆ سەر ئێران، دۆناڵد ترەمپ لە هەژماری تایبەتی خۆی لە تۆڕە کۆمەڵایەتییەکان بڵاویکردەوە، دەبێت "سەرکردەیەکی مەزن و پەسەندکراو" بۆ ئێران هەڵبژێردرێت.

ترەمپ ئاشکرایکرد، دەبێت "بە شەخسی" بەشدار بێت لە پرۆسەی هەڵبژاردنی رابەری داهاتووی ئێراندا، هاوشێوەی ئەوەی پێشتر واشنتن لە ڤەنزوێلا ئەنجامی دا.

: ترەمپ بەڵێنی دا کە دوای خۆرادەستکردنی تاران، ئەمریکا و هاوپەیمانەکانی "بێوچان" کار دەکەن بۆ گەڕاندنەوەی ئێران لە لێواری وێرانبوون و بەهێزکردنی ئابووریی ئەو وڵاتە.

لە بەرانبەردا، مەسعود پزیشکیان، سەرۆک کۆماری ئێران رایگەیاند، تاران لە چەند وڵاتێکەوە دەسپێشخەریی بۆ گەیشتووە بۆ کۆتاییهێنان بە شەڕ.

پزیشکیان جەختی کردەوە، بۆ پاراستنی ئاسایشی نەتەوەیی دوودڵ نابن.

رۆژنامەی "واشنتن پۆست" لە راپۆرتێکی نهێنیدا ئاشکرایکرد، لە سەرەتای دەستپێکردنی جەنگەکەوە تا ئێستا، روسیا زانیاریی هەواڵگریی هەستیاری لەسەر شوێنی جێگیربوونی هێزەکانی ئەمریکا لە رۆژهەڵاتی ناوەڕاست خستووەتە بەردەستی ئێران.

سێ لێپرسراوی باڵا کە ئاگاداری راپۆرتە نهێنی و هەواڵەگرییەکانن بە رۆژنامەی واشنتۆن پۆستیان راگەیاندووە، مۆسکۆ شوێنی وردی کەشتییە جەنگییەکان و فڕۆکە جەنگییەکانی ئەمریکای لە ناوچەکەدا بۆ تاران دیاری کردووە.

ئاماژەیان بەوەشکردووە، ئەم زانیارییانە بە مەبەستی یارمەتیدانی ئێران بووە بۆ دەستنیشانکردنی ئەو ئامانجانەی پەیوەندییان بە هێزەکانی ئەمریکاوە هەیە لە سەرتاسەری ناوچەکەدا.

لە راپۆرتەکەدا ئەوەشخراوەتەڕوو، ئەمە یەکەمین نیشانەیە کە دەری دەخات زلهێزێکی تری جیهانی و نەیارێکی گەورەی ئەمریکا بە شێوەیەکی ناڕاستەوخۆ تێوەگلاوە لەم ململانێیەدا.

لەلایەکی دیکەوە، شارەزایانی سەربازی لە ناوەندە لێکۆڵینەوە جیهانییەکان ئاشکرای دەکەن، ئەو وردکارییە زۆرەی لە هێرشە موشەکییەکانی ئەم دواییەی ئێراندا دەبینرێت، بەرهەمی هاوکارییە هەواڵگرییە بۆشاییەکانی روسیایە.

دارا ماسکۆت، شارەزا لە کاروباری سەربازیی روسیا لە "دەزگای کارنیگی بۆ ئاشتی"، ئاماژە بەوە دەکات کە ئێران بە شێوەیەکی زۆر ورد رادارەکانی ئاگادارکردنەوەی پێشوەخت، سیستمی فەرماندەیی و کۆنتڕۆڵ، تەنانەت جوڵەی کەشییە جەنگییەکانیشی لە رێگەی مانگە دەستکردەکانەوە دەست ئێران کەوتووە..

بەهۆی ئەوەی ئێران خاوەنی تۆڕێکی تەواوی مانگە دەستکردە سەربازییەکان نییە، پەنای بۆ مۆسکۆ بردووە، روسیا وێنەی مانگە دەستکردە سیخوڕییەکانی خۆی دەداتە تاران کە زۆر وردترن.

ئەوەشخراوەتەڕوو، مۆسکۆ ئەو شارەزاییەی لە شەڕی ئۆکراین لە دەستنیشانکردنی ئامانجەکان بەدەستی هێناوە، ئێستا بۆ لێدانی هێزەکانی ئەمریکا پێشکەشی ئێرانی دەکات.

لەلای خۆشیەوە، نیکۆڵ گرایفسکی، توێژەر لە زانکۆی هارفارد، دەڵێت: "هێرشە تۆڵەسێنەرەوەکانی ئێران ئاستێکی بەرزی پێشکەوتنیان پێوە دیارە، تاران توانیویەتی لە هەندێک شوێندا بەرگرییە ئاسمانییەکانی ئەمریکا و هاوپەیمانەکانی ببڕێت، ئەمەش نیشانەی گۆڕانکارییەکی گەورەیە لە هاوسەنگیی هێزدا."

هاوکات، ئەم جوڵە هەواڵگرییە و نهێنییە بووەتە مایەی نیگەرانیی قووڵی کۆشکی سپی، چونکە نەک هەر مەترسی لەسەر ژیانی سەربازانی ئەمریکا دروست دەکات، بەڵکو ئاماژەیە بۆ دروستبوونی بەرەیەکی نوێی جیهانی (روسیا-ئێران) دژی بەرژەوەندییەکانی واشنتۆن، تا ئێستا لێپرسراوانی ئەمریکا بە رەسمی لێدوانیان لەسەر ئەم زانیارییە هەواڵگرییانە نەداوە، بەڵام چاودێران پێیان وایە ئەمە واشنتن ناچار دەکات بە ستراتیژیی خۆیدا بچێتەوە.

سەرۆک کۆماری عیراق پرسەنامەیەک ئاراستەی جەعفەر شێخ مستەفا دەکات و دەڵێت؛ بە داخ و پەژارەیەکی زۆرەوە هەواڵی کۆچی دوایی کەسایەتی دیار، مامۆستا حسێن شێخ مستەفای براتانمان پێگەیشت.

دەقی پرسەنامەکەی د.لەتیف رەشید سەرۆک کۆماری عیراق

برای بەڕێز شێخ جەعفەر شێخ مستەفا ، لێپرسراوی ئەنجوومەنی پاراستنی بەرژەوەندییە باڵاکانی یەکێتیی نیشتمانیی کوردستان 

بە داخ و پەژارەیەکی زۆرەوە هەواڵی کۆچی دوایی کەسایەتی دیار و بەڕێوەبەری پێشووتری پەروەردەی گشتی سلێمانی مامۆستا شێخ حسێنی براتانمان پێگەیشت.

پرسەو سەرەخۆشی خۆم ئاڕاستەی بنەماڵەکەتان و خزم و کەس و کاری کۆچکردوو دەکەم.

 لە خودای میهرەبان داواکارم ڕۆحی کۆچکردوو شاد بکات و کۆتایی ناخۆشیتان بێت.

 

د. لەتیف رەشید

سەرۆک کۆماری عیراق

لەگەڵ دەسپێکردنی هەوڵە نێودەوڵەتییەکان بۆ هێورکردنەوەی رەوشەکە، ئێران جەخت لە پاراستنی سەروەریی خاکەکەی و بەدیهێنانی ئاشتییەکی سەقامگیر لە ناوچەکەدا دەکاتەوە.

مەسعود پزیشكیان سەرۆک کۆماری ئێران لە تۆڕی کۆمەڵایەتی ئێکس نوسیویەتی، چەند وڵاتێك هەوڵەكانیان بۆ نێوەندگیری دەستپێپكردووە و پابەندین بە ئاشتییەكی بەردەوام لە ناوچەكەدا.

ئاماژەی بەوەشکرد، درێغی ناكەین لە بەرگریكردن لە كەرامەت و سەروەری ئێران.

ئەمەش لە کاتێکدایە، بەیانی ئەمڕۆ ئیسرائیل چەندین هێرشی ئاسمانی بۆسەر ئێران ئەنجامدا، لەبەرانبەریشدا سوپاسی پاسداران 21 و 22ـیەمین شەپۆلی موشەكی لە ئۆپراسیۆنی " وەعد سادق 4" بۆ سەر ئیسرائیل دەستیپێكرد، هەروەها موشەکەکانی خەیبەر و فەتاح و خوڕەمشەهر 4ـی ئاڕاستەی ئیسرائیل کرد.

بافڵ جەلال تاڵەبانی؛ سەرۆکی یەکێتیی نیشتمانیی کوردستان هاوخەمی خۆی بۆ کۆچی دوایی شێخ حسێن شێخ مستەفا، كەسایەتی دیار و برای شێخ جەعفەر لێپرسراوی ئەنجوومەنی پاراستنی بەرژەوەندییە باڵاکانی یەکێتی دەربڕی و رایگەیاند؛ پرسە و سەرەخۆشی ئاڕاستەی ئێوە و کەسوکار و بنەماڵە سەربەرز و تێکۆشەرەکەتان دەکەم کە رۆڵ و پێگەتان لە بزووتنەوەی رزگاریخوازی کوردایەتی و چاکە و خزمەتی گشتی دیار و بەرچاوە و مایەی شانازیمانن.

دەقی پەیامەکەی سەرۆک بافڵ جەلال تاڵەبانی...

برای بەڕێزمان کاک شێخ جەعفەر شێخ مستەفا، لێپرسراوی ئەنجوومەنی پاراستنی بەرژەوەندییە باڵاکانی یەکێتیی نیشتمانیی کوردستان 
بەڕێز کاک شێخ دلێر شێخ مستەفا 
بەداخ و خەمێکی زۆرەوە هەواڵی کۆچی دوایی مامۆستا شێخ حسێن شێخ مستەفا، كەسایەتی دیار و برای جەنابتانمان پێگەیشت.
بۆ ئەم خەمە گەورەیە پرسە و سەرەخۆشی ئاڕاستەی ئێوە و کەسوکار و بنەماڵە سەربەرز و تێکۆشەرەکەتان دەکەم کە رۆڵ و پێگەتان لە بزووتنەوەی رزگاریخوازی کوردایەتی و چاکە و خزمەتی گشتی دیار و بەرچاوە و مایەی شانازیمانن.
لەخوای گەورە داواکارین گیانی کۆچکردوو بە بەهەشتی بەرین شادبکات، ئارامی و سەبووری بە هەموولایەکتان ببەخشێت.
بافڵ جەلال تاڵەبانی 
سەرۆکی یەکێتیی نیشتمانیی کوردستان

بەهۆی هێرشێکی گروپە لەیاسادەرچووەکانی عێراق بۆ سەر کێڵگەی نەوتی ئێچ کەی ئێن لە سنوری دهۆک، پرۆسەی بەرهەمهێنانی نەوت لەو کێڵگەیەدا راگیرا.

وەزارەتی سامانە سروشتییەكان راگەیەندراوێكی بڵاوكردەوە و دەڵێت؛ شەوی رابردوو هێرشكراوەتەسەر كێڵگەی نەوتی ئێچ كەی ئێن  لە سنووری دهۆك و هێرشەكە لەلایەن گروپێكی لە یاسادەرچووی عیراقەوە ئەنجامدراوە.

ئاماژەی بەوەشکرد، بەهۆی هێرشەكەوە زیان بە كێڵگەكە گەیشتووە و بەرهەمهێنان تێیدا راگیراوە.

ئاماژەی بەوەکرد، ئەم هێرشانە ئامانجیان تێکدانی ژێرخانی ئابورییە و ئەرکی حکومەتی عیراقە، رێگری لەو گروپانە بکات کە زیان بە داهاتی گشتی سەرجەم وڵات دەگەیەنن.

لەیەکەم رۆژی جەنگی ئیسرائیل-ئەمریکا و ئێران تا ئێستا زیاتر لە هەزار هاووڵاتی مەدەنی لە ئێران کوژراون.

رێکخراوی مانگی سوری ئێرانی ئاشکرایکرد،  لە سەرەتای دەستپێکردنی هێرشەکانی ئیسرائیل و ئەمریکاوە، هەزار و 332 هاووڵاتی مەدەنی لە ئێران گیانیان لەدەستداوە و زیانی زۆریش بە سێ هەزار و 643 شوێنی مەدەنی گەیشتووە.

ئاماژەی بەوەشکرد، زیانەکان سێ هەزار و 90 شوێنی نیشتەجێبوون و 528 سەنتەری بازرگانی و 14 بنکەی تەندروستی دەگرێتەوە، هەروەها تاران زۆرترین هێرشی کراوەتەسەر و نۆ بنکەی تری مانگی سووریش خاپوور بوون.

ماڵپەڕی شەفافییەت داهاتی ئەم هەفتەیەی سلێمانی بڵاوکردەوە، کە زیاتر لە حەوت ملیار دینارە.

ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەوە، لە رۆژی 28ـی2ـی2026 تا 6ـی3ـی2026 داهاتی نانەوتی حەوت ملیار و 643 ملیۆن دیناربووە.

ئاماژەی بەوەشکردووە، بە بەراورد بە هەفتەی رابردوو زیاتر لە 15 ملیار دینار داهات کەمی کردووە.

جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.

وتەبێژی سوپای ئێران رایدەگەیەنێت؛ گەرووی هورمز لەژێر هەڕەشەدایە و ئەمریکا بەرپرسیارە.

وتەبێژی سوپای ئێران رایگەیاند: "ئێمە گەرووی هورمزمان دانەخستووە، بەڵام بەهۆی هێرشەکانی ئەمریکاوە، ئەو گەرووە ئێستا بۆ هاتوچۆی کەشتیوانی ناجێگیر و مەترسیدارە." ئاماژەی بەوەش کرد کە تاران پەلکێشی جەنگێک کراوە کە ئارەزووی نەدەکرد، بەڵام ئامادەن بۆ وەڵامدانەوەی هەر هێرشێک.

هاوکات ئاسایشی نێودەوڵەتی دەڵێت؛ ئەم لێدوانە وەک گوشارێکی راستەوخۆ دەبینرێت بۆ سەر بازاڕی وزەی جیهانی، چونکە گەرووی هورمز رێڕەوی سەرەکیی گواستنەوەی نەوتی جیهانە.

ئەم لێدوانانەی سوپای ئێران، ئاماژەیە بۆ ئەوەی تاران دەیەوێت لە رێگەی کارتی "ئاسایشی وزە و گەرووی هورمز" گوشار بخاتە سەر کۆمەڵگەی نێودەوڵەتی بۆ راگرتنی هێرشەکانی ئیسرائیل، لە کاتێکدا جەنگەکە گەیشتووەتە ناو جەرگەی پایتەختی هەردوو وڵات.

لە حەوتەمین رۆژی جەنگی نێوان ئێران و ئیسرائیلدا، رەوشەکە بەرەو ئاڵۆزیی زیاتر هەنگاو دەنێت و دەنگی تەقینەوە گەورەکان پایتەختی ئێرانی هەژاندووە.

لە حەوتەمین رۆژی جەنگی نێوان ئێران و ئەمریکا - ئیسرائیلدا، ئاستی گرژییەکان رووی لە هەڵکشانی زیاتر کردووە، سوپای ئیسرائیل ١٤ـەیەمین شەپۆلی هێرشە ئاسمانییەکانی بۆ سەر تاران ئەنجامدا و رایگەیاند، ژێرخانە ستراتیژییەکانی ئەو وڵاتە کراونەتە ئامانج، هاوکات دەنگی تەقینەوەی گەورە لە پایتەختی ئێران بیستراوە.

لە بەرانبەردا، سوپای پاسدارانی ئێران رایگەیاند، بە دەیان موشەک و درۆن هێرشیان کردووەتە سەر تەلئەبیب و بنکەی ئاسمانی "رامات دەیڤد"،وتەبێژی سوپای پاسداران جەختی کردەوە، وڵاتەکەی ئامادەیە بۆ "شەڕێکی درێژخایەن" و هێشتا چەکە نوێ و داهێنراوەکانیان بەکارنەهێناوە.

لە پێشهاتێکی تردا، سوپای پاسداران رایگەیاند، لە رێگەی درۆنەوە بنکەیەکی سەربازیی هێزەکانی ئەمریکایان لە هەولێر کردووەتە ئامانج.

لەلای خۆشیەوە، پێت هێگسێس وەزیری جەنگی ئەمریکا ئاشکرایکرد، واشنتۆن ئامانجە سەربازییەکانی لەناو خاکی ئێراندا فراوانتر ناکات، بەڵام جەختی کردەوە کە خشتەی کاتیی جەنگەکە تەنها لەژێر کۆنترۆڵی ویلایەتە یەکگرتووەکانی ئەمریکادایە.

ئاماژەی بەوە کرد، ئۆپراسیۆنە سەربازییەکەیان کە بە ناوی ' داستانی توڕەیی' ناسراوە، ئامانج لێی تێکشکاندنی توانای موشەکیی ئێران و کارگەکانی بەرهەمهێنانی چەک و هێزی دەریایی ئەو وڵاتەیە، هاوکات رێگریکردنە لەوەی تاران ببێتە خاوەنی چەکی ئەتۆمی.

ئاژانسەکانی هەواڵ بڵاویانکردەوەتەوە، لە ناوخۆی ئێرانیش، رەوشەکە بەرەو قۆناغێکی هەستیار هەنگاو دەنێت؛ میدیاکانی ئەو وڵاتە بڵاویانکردەوە کە ئەنجومەنی سەرکردایەتی کاتی بە سەرۆکایەتی مەسعود پزیشکیان کۆبووەتەوە. ئامانجی سەرەکی کۆبوونەوەکە ئامادەکارییە بۆ کۆبوونەوەی "ئەنجومەنی شارەزایانی رێبەری" بە مەبەستی دیاریکردنی رێبەرێکی نوێ بۆ ئێران ئەوەش دوای ئەوەی دەسەڵاتی فراوان بە ئەنجومەنی سەرکردایەتی دراوە بۆ بەڕێوەبردنی جەنگ و دەستبەکاربوونی فەرماندە سەربازییەکان.

لەگەڵ بەردەوامیی ئەم پێکدادانە سەربازییە توندانە و ئەگەری بەکارهێنانی چەکی نوێتر، رۆژهەڵاتی ناوەڕاست لەبەردەم تاقیکردنەوەیەکی سەختدایە، رەوشی ناوخۆیی ئێران و گۆڕانکاری لە لوتکەی دەسەڵاتدا، لەگەڵ دەستێوەردانە دەرەکییەکان، ئاماژەن بۆ ئەوەی کە سەعاتەکانی داهاتوو رەنگە نەخشەی سیاسی و سەربازیی ناوچەکە بە تەواوی بگۆڕن و ئاراستەیەکی تر بدەنە ململانێکان.

سوپای ئیسرائیل دەستپێكردنی قۆناغی دووەمی هێرشەكانی بۆسەر ئێران راگەیاند و ئاماژەی بەوەكردووە، ژێرخانی رژێمی ئێرانیان كردووەتە ئامانج.

سوپای ئیسرائیل راگەیەنراوێكی لەبارەی هێرشەكانی ئەم بەیانییەی سەر تاران بڵاوكردەوە و ئاماژەی بەوەكردووە، چوونەتە قۆناغی دووەمی هێرشەكان بۆسەر ئێران.

لە راگەیەنراوەكەدا سوپای ئیسرائیل دەڵێت، لە هێرشەكانی بەیانی ئەمڕۆ هەینیدا بۆسەر تاران، ژێرخانی ئێرانمان كردووەتە ئامانج.

ئاماژەی بەوەشكردووە، شەپۆلی بەرفراوانی هێرشمان دەستپێكردووە و بەردەوام دەبین.