هەواڵەکان
سەرۆکی ئەمریکا دەڵێت: چاوەڕوان دەکەین جەنگی ئێران بەمزوانە کۆتایی بێت و زۆربەی ئامانجەکانیان لە ئێران پێکاوە.
دۆناڵد ترەمپ، سەرۆکی ئەمریکا لە چاوپێکەوتنێکی نوێدا لەگەڵ تۆڕی هەواڵی (CBS)، چەند زانیارییەکی گرنگی سەبارەت بە داهاتووی ململانێ سەربازییەکانی وڵاتەکەی و ئێران ئاشکراکرد.
ترەمپ رایگەیاند، جەنگی دژی ئێران بە خێراییەکی زۆر زیاتر لەوەی پێشتر پلانی بۆ داڕژابوو بەڕێوەدەچێت و وتی: "ئەم جەنگە بە رێژەیەکی زۆر کۆتاییپێهاتووە و ئامانجەکان خەریکن دەپێکرێن.
لە بەشێکی تری قسەکانیدا، ترەمپ ئاماژەی بە قۆناغی دوای "خامنەیی" کرد و رایگەیاند، لە ئێستاوە بیر لە دیاریکردنی کەسایەتییەک دەکەنەوە بۆ ئەوەی شوێنی رێبەری باڵای ئێران بگرێتەوە.
سەرۆکی ئەمریکا ئەوەشی خستەڕوو، لە ئێستادا بیر لەوەدەکاتەوە، دەستبەسەر گەرووی هورمزدا بگرێت.
ترەمپ ئاشکراشیکرد، ئێران هێزی دەریایی و هێزی ئاسمانی و سیستەمی پەیوەندیی نەماوە، هەروەها باشترە لێپرسراوانی ئێران هیچ كارێكی پێشێلكاری نەكەن ئەگەر نا ئەوە دەبێتە كۆتایی ئەو وڵاتە.
بەبۆنەی هەڵبژاردنی وەك رێبەری باڵای ئێران سودانی پیرۆزبایی لە موجتەبا خامنەیی دەكات و دەڵێت؛ متمانەمان بە توانای سەركردایەتی نوێی ئێران هەیە بۆ بەڕێوەبردنی ئەم قۆناغە هەستیارە.
محەمەد شیاع سودانی سەرۆک وەزیرانی عیراق رایگەیاند، لەگەڵ ئێران دەوەستین دژی هەر هێرشێكی سەربازییە بۆ سەر سەروەری ئەو وڵاتە.
وتیشی، عیراق خوازیاری پەرەپێدانی زیاتری هاریکارییەکانە لە پێناو چەسپاندنی سەقامگیری و ئاسایش لە ناوچەکەدا.
ئەوەشی خستەڕوو، متمانەمان بە توانای سەركردایەتی نوێی ئێران هەیە بۆ بەڕێوەبردنی ئەم قۆناغە هەستیارە.
رێبوار تەها، پارێزگاری کەرکوک، پەیامێکی پیرۆزبایی بەبۆنەی رۆژی جلوبەرگی نەتەوەیی بڵاوکردەوە و تێیدا داوای لە سەرجەم خوێندکارانی زانکۆ و پەیمانگەکانی شارەکە کرد ئەم یادە بکەنە دەرفەتێک بۆ نیشاندانی فرەڕەنگی و پێکەوەژیان.
پارێزگاری کەرکووک داوای لە خوێندکارانی (کورد، عەرەب، تورکمان، و کلدوئاشووری) کرد، سبەینێ بە پۆشینی جلی رەسەنی نەتەوەیی خۆیان، وێنەیەکی جوان لە برایەتی و ئاشتی لە کەرکوک نیشانی جیهان بدەن.
ئاماژەی بەوەشکرد، ئەم رۆژە تەنها یادێکی نەتەوەیی نییە، بەڵکو رۆژی پتەوکردنی گیانی تەباییە لە نێوان پێکهاتە جیاوازەکاندا.
لە بەشێکی تری پەیامەکەیدا، رێبوار تەها رایگەیاند، پەیوەندییەکی تەلەفۆنی لەگەڵ وەزیری خوێندنی باڵا و سەرۆکی زانکۆی کەرکوک ئەنجامداوە، تێیدا دەستخۆشی و سوپاسی ئاڕاستە کردن بۆ ئەو هەماهەنگییە بەردەوامەی لەگەڵ ئیدارەی پارێزگاکەدا هەیانە بۆ سەرخستنی چالاکییە کلتوورییەکان.
ئێران جارێکی تر جەختی لە ئامادەیی خۆی کردەوە بۆ بەردەوامبوون لە رووبەڕووبوونەوە لەگەڵ ئەمریکا و ئیسرائیل کردووە ئاشکرایدەکات، چەندین هەنگاوی چاوەڕواننەکراویان ئامادەکردووە.
عەباس عراقچی، وەزیری دەرەوەی ئێران لە هەژماری رەسمی خۆی لە تۆڕی کۆمەڵایەتی "ئێکس" رایگەیاند، دوای تێپەڕبوونی نۆ رۆژ بەسەر ئەو هەڵەیەی کە بە "هەڵە کوشندەکە" ناوی برد، نرخی نەوت لە بازاڕەکانی جیهاندا دوو هێندە بووە و نرخی کاڵا بنەڕەتییەکانیش بە شێوەیەکی بەرچاو بەرزبوونەوەی پێوانەیی تۆمار کردووە.
عراقچی ئاماژەی بەوەشکرد، تاران ئاگاداری ئەو پلانانەیە کە واشنتۆن دایڕشتوون بۆ بەئامانجگرتنی وێستگە ئەتۆمی و نەوتییەکانی ئێران بە مەبەستی کۆنترۆڵکردنی هەڵاوسانی دارایی.
وەزیری دەرەوەی ئێران هۆشداریی توندی دایە لایەنەکان و رایگەیاند: "وڵاتەکەم لەوپەڕی ئامادەباشیدایە و ئێمەش چەندین سوپرایزمان بۆ نەیارەکانمان هەیە".
سەرۆک کۆماری تورکیا دەڵێت: پێشوازی لە هەڵوێستی برایانمان لە هەرێمی كوردستان دەكەین کە خۆیان لە شەڕ پاراستووە.
رەجەب تەیب ئەردۆغان، سەرۆک کۆماری تورکیا لە نوێترین لێدوانیدا دەستخۆشی لە هەڵوێستی لێپرسراوانی هەرێمی کوردستان کرد و رایگەیاند، پێشوازی لەو هەنگاوانەی هەرێم دەکەن کە تێیدا خۆیان لە ململانێ و جەنگەکان بەدوورگرتووە.
ئەردۆغان ئاماژەی بەوەشکرد، "پێشوازی لە هەڵوێستی برایانمان لە هەرێمی كوردستان دەكەین كە بە داناییەوە مامەڵەیان کردووە و خۆیان لە شەڕ پاراستووە". هاوکات جەختیشی لەوەکردەوە کە دڵنیایە هاووڵاتیانی کورد لە ناوچەکەدا بە ئاگان و رێگە نادەن ببنە بەشێک لەو پیلان و یارییە سیاسییانەی کە ئامانجیان تێکدانی سەقامگیرییە، وتیشی: "لەو باوەڕەدام برایانی كوردمان فریوی ئەو یارییە ناخۆن کە لە ناوچەکەدا دەگوزەرێت".
د. لەتیف رەشید سەرۆک کۆماری عیراق، ئەمڕۆ دووشەممە 9ی ئاداری 2026، لەکۆشکی سەلام لە بەغداد، پێشوازی لە ئەنێل بۆرا ئینان باڵیۆزی تورکیا کرد.
لەمیانی دیدارەکەدا دوایین پێشهاتەکانی ناوچەکەیان تاوتوێکرد، لەژێر ڕۆشنایی ئەو گرژی و ئاڵنگارییە سیاسی و ئەمنیانەی کە بەخۆیەوە دەبینێت و کاریگەرییەکانی لەسەر ئاسایش و سەقامگیریی ناوچەکە، و تێیدا سەرۆک کۆمار جەختی لەگرنگی چڕکردنەوەی هەوڵە دیپلۆماسییەکان و بەهێزکردنی هەماهەنگی بۆ چارەسەرکردنی قەیرانەکانی ئێستا و گرتنەبەری دیالۆگ و لێکتێگەیشتنی هاوبەش بەمەبەستی دوورکەوتنەوە لەگرژی و ئاکامە نەرێنییەکانی لەسەر وڵاتان و گەلانی ناوچەکە کردەوە و هەڵوێستی پتەوی عیراقی لە پاراستنی ئاسایش و سەقامگیری دووپاتکردەوە و بەکارهێنانی خاکەکەی وەک پێگەیەک بۆ دەستدرێژی بۆ سەر هەر وڵاتێکی ناوچەکە رەتکردەوە.
لەلای خۆیەوە باڵیۆزی تورکیا خواستی وڵاتەکەی دووپاتکردەوە بۆ پتەوکردنی پەیوەندییەکانی لەگەڵ عیراق و بەردەوامبوون لەفراوانکردنی ئاسۆی هاوکاری و هەماهەنگی بە شێوەیەک کە خزمەت بە خواستەکانی هەردوو گەلی دراوسێ لەگەشەپێدان و خۆشگوزەرانیدا بکات.
وتەبێژی وەزارەتی دەرەوەی ئێران: ئەمریکا و ئیسرائیل دەیانەوێت ئێران دابەشبکەن
وتەبێژی وەزارەتی دەرەوەی ئێران دەڵێت، ئەمریکا و ئیسرائیل هەوڵی دابەشکردنی ئێران دەدەن، سووریشن لەسەر پاراستنی پەیوەندییەکانیان لەگەڵ وڵاتانی دراوسێیاندا.
ئیسماعیل بەقائی وتەبێژی وزارەتی دەرەوەی ئێران لە کۆنگرەیەکی رۆژنامەوانیدا رایگەیاند، سوورین لەسەر پاراستنی پەیوەندییەکانیان لەگەڵ وڵاتانی دراوسێیاندا و هێرشیشیان نەکردووەتەسەر تورکیا و ئازەربایجان و قوبرس.
ئاماژەی بەوەشداوە، ئەمریكا و ئیسرائیل هەوڵی دابەشكردنی ئێران دەدەن، لە هێرشەكانیشاندا جیاوازیی لەنێوان مەدەنی و سەربازییەكان ناكەن، تەنانەت ئەمریكا دەیەوێت پاساو بۆ هێرشەكانی بهێنێتەوە.
بەقائی ئەوەشی روونکردەوە، كاتێك لە وڵاتانی ناوچەكەوە هێرشیان دەكرێتەسەر پێویستە بەرگری بكەن و بەرگریكردنیش لە خۆیان، هێرشكردن نییە بۆ سەر هیچ دەوڵەتێك.
لە سەرەتای دەستپێكی هێرشەكانی ئەمریكا و ئیسرائیل بۆسەر ئێران، تا ئێستا 10 كەشتی لە گەرووی هورمز یان كراونەتە ئامانج.
ئاژانسی ئاسایشیی دەریایی بەریتانیا بڵاویكردووەتەوە، لە دەستپێكی هێرشەكانی ئەمریكا و ئیسرائیلەوە بۆسەر ئێران، تا ئێستا 10 كەشتی لە گەرووەكەدا كراونەتە ئامانج.
رێكخراوی دەریایی نێودەوڵەتیش رایگەیاندووە، تەنها لە هەفتەی یەكەمی شەڕدا نۆ كەشتی لە گەرووەكەدا بە ئامانجگیراون، كە لە چوار هێرشیاندا حەوت كەس گیانیان لەدەستداوە.
كۆمپانیای شیكاریی كەیپلێر كە سەكۆی مارین ترافیك بەڕێوەدەبات رایگەیاندووە، ئێران ئامانجی لە داخستنی گەرووەكە كەشتییەكان نییە، بەڵكو پەكخستنی بازرگانی و ئابوریی جیهانە.
گەرووی هورمز بە رێڕەوێكی گرنگی بازرگانی لە جیهاندا دادەنرێت، بەتایبەتیش نەوت و غاز، كە گەرووەكە رێڕەوی سەرەكی تێپەڕبوونی نەوتی عیراق و وڵاتانی كەنداوە بەرەو جیهان و 20٪ی نەوتی جیهان بە گەرووی هورمزدا تێدەپەڕێت.
لە بەرزبوونەوەیەكی مێژووییدا و بەهۆی بەردەوامی ئاڵۆزییەكان لە رۆژهەڵاتی ناوەڕاست و گەمارۆی سەر گەرووی هورمز، نرخی بەرمیلێك نەوتی برێنت 115 دۆلاری تێپەڕاند، ترەمپیش دەڵێت، بەرزبوونەوەی نرخەكە كاتییە.
بەیانی ئەمڕۆ نرخی بەرمیلێك نەوتی برێنت بەڕێژەی 30% بەرزبوونەوەی تۆماركرد و گەیشتە سەروو 115 دۆلار، ئەو بەرزبوونەوەیە لە نرخی نەوت نیگەرانی سەركردەكانی جیهانی لێكەوتووەتەوە.
دۆناڵد ترەمپ سەرۆكی ئەمریكا رایگەیاند، بەرزبوونەوەكە كاتییە و هەر كاتێك هەڕەشەی ئەتۆمی ئێران لەناوبرا نرخەكەی دادەبەزێت.
وتیشی، ئەوە باجێكە كە دەبێت لەپێناو ئاسایش و سەلامەتی ئەمریكا و جیهان بدرێت.
ئەو بەرزبوونەوەیە دوای ئەوە هات كە داخستنی گەرووی هورمز زۆرێك لە وڵاتانی ناچار كرد ئاستی بەرهەمهێنانی نەوت كەمبكەنەوە.
بەڕێوەبەری سندوقی دراوی نێودەوڵەتیش رایگەیاند، هەر زیادبوونێك بەڕێژەی 10% لە نرخی نەوتدا، 40 خاڵ بۆ سەر هەڵاوسانی جیهانی زیاد دەكات.
دۆناڵد ترەمپ سەرۆكی ئەمریكا بە دیاریكردنی موجتەبا خامنەیی وەك رابەری نوێی ئێران دڵخۆش نیە و لاریجانیش دەڵێت رابەری نوێ دەتوانێت وڵات بەرێوەبەرێت .
لە یەكەم لێدوانیدا لە دوای دیاریكردنی موجتەبا خامنەیی وەك رابەری نوێی ئێران ، ترەمپ بە كەناڵی فۆكس نیوزی راگەیاندوە ، دڵخۆش نییە بە دیاریكردنی موجتەبا خامنەیی ، بەڵام هیچ لێدوانێكی تری لەوبارەیەوە نەداوە .
هاوكات عەلی لاریجانی ئەمینداری ئەنجومەنی باڵای ئاسایشی نەتەوەیی ئێران رایگەیاندووە ، سەرباری ئەو هەرەشانەی ئاراستەی دەكرا ، ئەنجومەنی شارەزایانی رێبەریی ئێران توانی رابەری نوێ دیاریبكات و دوپاتیشیكردوەتەوە كە موجتەبا خامنەیی توانای بەرێوەبردنی وڵاتی هەیە لەم رەوشە هەستیارەی پێیدا تێدەپەریت، داواشی كردوە هەموان پێكەوە بە یەكریز لە پشت رابەری نوێ بوەستن و پاڵپشتی بكەن .
رۆژی یەكشەممە ئەنجومەنی شارەزایانی رێبەری ئێران كە لە 88 ئەندام پێكدێن، هەڵبژاردنی موجتەبا خامنەیی وەك رابەری نوێی وڵاتـەكە راگەیاند، ئەوەش لە دوای ئەوەی لە سەرەتای دەستپێكردنی هێرشەكانی ئیسرائیل و ئەمریكا بۆ سەر ئێران لە رۆژی 28 ی شوبات، عەلی خامنەیی رابەری باڵای ئێران كوژرا .
وەزیری دەرەوەی ئێڕان داواكارییەكانی بۆ ئاگربەست لە ناوچەكە رەتكردەوە و جەختی لەسەر پێویستیی گەیشتن بە رێككەوتنێكی هەمیشەیی بۆ كۆتاییهێنان بە ململانێكان كردەوە.
عەباس عێراقچی، وەزیری دەرەوەی ئێران لە چاوپێكەوتنێكدا لەگەڵ كەناڵی ئێن بی سی ئەمریكی رایگەیاند، وڵاتەكەی داواكارییەكان بۆ ئاگربەست لە رۆژهەڵاتی ناوەڕاست رەتدەكاتەوە و بەردەوام دەبن لە شەڕكردن لە پێناو پاراستنی گەل و ئاسایشی وڵاتەكەیان.
ئاماژەی بەوەشكرد، كە ئەمریكا و ئیسرائیل خەڵكی بێتاوان دەكوژن و هێرش دەكەنە سەر نەخۆشخانە و خوێندنگەكان، بۆیە هەر جۆرە ئاگربەستێكی كاتی لای ئەوان قبوڵكراو نییە.
وتیشی: پێویستە رێككەوتنێكی هەمیشەیی بكرێت كە بتوانێت ئاسایشی ناوچەكە بۆ ماوەیەكی درێژخایەن بپارێزێت.
وەزارەتی رۆشنبیری رایگەیاند، ناوچەکەمان بە دۆخێکی سەخت و ئاڵۆزدا تێدەپەڕێت و داوا لە کەناڵەکانی راگەیاندن دەکەین بە شێوەیەکی بەرپرسیارانەتر روماڵی روداوەکان بکەن.
وەزارەتی رۆشنبیری وەزارەتی رۆشنبیری راگەیەندراوێکی بڵاوکردەوە و تیایدا دەڵێت، هەرێمی کوردستان بەشێک نییە لەو جەنگە و لە داهاتووشدا بەشێک نابێت لێی و بە تەواوی سەربەخۆیی و بێلایەنی خۆی دەپارێزێت.
هەر لە بڵاوکراوەکەیدا جەختی لەسەر ئەوە کردەوە، کە پێویستە کەناڵەکانی راگەیاندن بە شێوەیەکی بەرپرسیارانەتر روماڵی روداوەکان بکەن بەجۆرێک پاراستنی ئاسایشی نیشتمانی سەروماڵی هاووڵاتییان کاری لەپێشینەوی کەناڵەکان بێت و لەکاتی روماڵی راستەوخۆی روداوەکاندا نەبنە هۆی دڵەڕاوکێ بۆ هاووڵاتییان و دوربن لە بڵاوکردنەوەی گواستنەوەی راستەوخۆ یان وێنەی ئاراستەکردنی درۆن و موشەک و شوێنی زیانپێکەوتووان.
لە کۆتایی بڵاوکراوەکەیدا ئاماژەی بەوەشکرد، کە لەمکاتەدا ئەم هەڵسوکەوتە لەلایەن هەر دەزگا و رایەڵێکی میدیاییەوە بکرێت، دوورە لە یاسا و لۆجیک و پێچەوانەی مادەی سێیەم/بڕگەی سێیەمە لە (لە رێنمایی رێکخستنی فریکوێنسی سپەیس لە هەرێمی کوردستان). بۆیە وەزارەتمان ئەرکی خۆیەتی کە رێکاری یاسایی توند بەرانبەر بە سەرپێچیکارانی یاسا و رێنماییەکان بگرێتەبەر.
بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێکی لەبارەی هێرشەکانی سەر هەرێم بڵاوکردەوە و دەڵێت، لە دوای قسەکانی سەرۆک ترەمپ و سەرۆک پزیشکییان چاوەڕوانین کە ئاڵۆزییەکان لە هەرێمی کوردستان دووربخرێنەوە.
دەقی پەیامەکە...
هاوڵاتییانی خۆشەویستی هەرێمی کوردستان
هەرێمی کوردستان چەند شەوێکی ناخۆشی بەڕێکرد، سوپاستان دەکەین بۆ خۆڕاگری و تێگەیشتنتان لە ئەم بارودۆخە ئاڵۆزەی ناوچەکەمانی پێدا تێدەپەڕێت، هەر ئەوەش چاوەڕێ دەکرێت لە خەڵکە ئازا و خۆشەویستەکەمان.
ئێمە لەماوەی چەند رۆژی رابردوودا سەرجەم هەوڵە دیپلۆماسییەکانمان خستووەتەگەڕ، لە ئاستی باڵا لەگەڵ سەرکردەکانی ئێران، ئەمریکا و تورکیا قسەمان کردووە بەمەبەستی پاراستنی کوردستان لەم بارودۆخە.
لە دوای قسەکانی سەرۆک ترەمپ و سەرۆک پزیشکییان چاوەڕوانین کە ئاڵۆزییەکان لە هەرێمی کوردستان دووربخرێنەوە.
ئێمە ناوی هەندێک لەو کەس و لایەنانەمان داوەتە بەغداد، کە هێرش دەکەنە سەر هەرێمی کوردستان، چاوەڕوانی بەغدادین کە هەنگاوی جددی بۆ گرتنەبەری رێکاری پێویست بنێت، من دەزانم هاوڕێکانمان لە بەغداد هەموو هەوڵێکی خۆیان دەخەنەگەڕ بۆ بەرگرتن لە ئاڵۆزی زیاتر، بەڵام ئەگەر رێکار نەگیرایە بەر، ئەوا ئێمە خۆمان مامەڵەی لەگەڵ دەکەین.
عێراق وڵاتێکی خاوەن شارستانیی مەزن و مێژوویەکی تایبەتە، دەبێت هەموو هەوڵە شارستانییەکانیش بۆ سەقامگیری و ئاشتی هەر لەم ناوچەیەوە بن.
بافڵ جەلال تاڵەبانی
سەرۆکی یەکێتیی نیشتمانیی کوردستان
ئیمانوێل ماکرۆن، سەرۆکی فەڕەنسا لە تۆڕی کۆمەڵایەتی ئێکس پەیامێکی بە زمانی کوردی بڵاوکردەوە و تێیدا دووپاتیکردەوە، وڵاتەکەی بەردەوام دەبێت لە پشتگیریکردنی سەروەری، ئاسایش و یەکپارچەیی خاکی عیراق، بە هەرێمی کوردستانیشەوە.
سەرۆکی فەرەنسا ئاماژەی بەوەشکرد، پەیوەندییەکی تەلەفۆنی لەگەڵ نێچیرڤان بارزانی، سەرۆکی هەرێمی کوردستان ئەنجامداوە و پابەندیی فەرەنسای بۆ سەقامگیری و ئاسایشی عیراق و هەرێمی کوردستان دووپاتکردەوە، هەروەها هاوسۆزی خۆی بەرانبەر هێرشەکانی چەند رۆژی رابردووی دەربڕی.
وتیشی، لە گفتوگۆکاندا هاوڕابوون لە بەردەوامیدان بە هەوڵەکانیان بۆ رێگریکردن لە پەرەسەندنی ملمڵانێی ناوچەکە.
سەرۆکی فەڕەنسا دووپاتیکردەوە، وڵاتەکەی بەردەوام دەبێت لە پشتگیریکردنی سەروەری، ئاسایش و یەکپارچەیی خاکی عیراق، بە هەرێمی کوردستانیشەوە.
قوباد تاڵەبانی سەرپەرشتیاری مەکتەبی سکرتارییەتی سەرۆک مام جەلال سەردانی مەڵبەندی یەکی سلێمانی یەکێتی کرد و لەگەڵ سەرکەوت زەکی سەرپەرشتیاری مەڵبەند و ژمارەیەک لە جێگران و کارگێڕان و کادیرانی مەڵبەندی سلێمانی کۆبووەوە.
لەو کۆبونەوەیەدا، قوباد تاڵەبانی دەستخۆشی لە سەرپەرشتیار و تەواوی ستافی مەڵبەند کرد کە توانیویانە ئەرکەکانیان بە باشی راپەڕێنن و پەیوەندییەکی بەهێز لەگەڵ چین و توێژەکانی شارەکە دروست بکەن، وتیشی نابێت لە هیچ رەوشێکدا لە کارکردن سارد ببنەوە، بەڵکو دەبێت رۆژ لە دوای رۆژ گڕوتینی زیاترتان هەبێت بۆ کارکردن و پێشخستنی زیاتری یەکێتی.
سەبارەت بە رەوشی ئێستای ناوچەکەش، قوباد تاڵەبانی رایگەیاند ئیمە نابین بە بەشێک لەم جەنگە و لایەنگری ناکەین، بەڵام ئامادەین ببین بە بەشێک لە چارەسەر و لایەنگری ئاشتین. ئاماژەی بە وتەکانی سەرۆکی یەکێتی کرد لە کەناڵی فۆکس نیوز کە زۆر راشکاوانە لەسەر ئەم رەوشە قسەی کرد و سیاسەت و هەڵوێستی یەکێتی روونکردەوە.
سەرپەرشتیاری سکرتارییەتی سەرۆک مام جەلال لەبارەی گۆڕانکارییەکانی ناو یەکێتییشەوە رایگەیاند، دەمانەوێت هەیکەلی حزبەکەمان لەگەڵ چاوەروانییەکانی جەماوەر بگونجێنین، هەر بۆیە ئەم رەوشە کاریگەری نابێت لەسەر چاکسازی و گۆرانکارییەکانی ناو یەکێتی، گۆڕانکارییەکانیش تەنیا گۆڕینی بەرپرس نین، بەڵکو گۆڕینی ئەرک و شێوازی کارکردنە، بۆ ئەوەی هەر هەڤاڵێک لەهەر پلە و پۆستێکدابێت دەبێت زۆرترین خزمەت بکات و بە باشترین شێوە سیاسەتی یەکێتی بباتە ناو خەڵکەوە.
لە بەشێکی دیکەی کۆبوونەوەکەدا قوباد تاڵەبانی رایگەیاند، مەڵبەندی سلێمانی مەڵبەندی دایکە و گرنگی خۆی هەیە، بەرنامەمان هەیە بۆ پیشخستنی سلێمانی لە هەموو بوارەکاندا، سلێمانی شارێکی دەوڵەمەندە بە کلتوور و دەمانەوێت لەمەودا گرنگی زیاتر بە بواری کلتوور و رۆشنبیری و کار و چالاکیی گەنجان بدەین.