هەواڵەکان
عەلی زەیدی و وەزیری دەرەوەی ئوردن لە ئەمریکا کۆبونەوە و جێبەجێکردنی پڕۆژەی بۆری نەوتی بەسرە-عەقەبە و تەواوکردنی پڕۆژەی بەستنەوەی کارەبای نێوان هەردوو وڵاتیان تاوتوێ کرد.
لە میانی سەردانەکەیدا بۆ ئەمریکا، عەلی فالح زەیدی، سەرۆک وەزیرانی عیراق، بە ئامادەبونی تۆم باراک، لە واشنتن پێشوازی لە ئەیەمەن سەفەدی، وەزیری دەرەوەی ئوردن کرد.
وەک لە راگەیەندراوی سەرۆکایەتی ئەنجومەنی وەزیراندا هاتووە؛ لە سەرەتای دیدارەکەدا، زەیدی بانگهێشتنامەیەکی رەسمی لەلایەن شا عەبدوڵای دووەمی شای ئوردنەوە پێگەیشت بۆ سەردانیکردنی عەممان.
لە بەشێکی تری کۆبوونەوەکەدا، هەردوولا گفتوگۆیان لەسەر میکانیزمەکانی پەرەپێدانی پەیوەندییە دووقۆڵییەکان کرد و جەختیان لە گرنگیی بەهێزکردنی هاوکارییەکان لە کەرتە جیاوازەکانی ئابووری و گەشەپێداندا کردەوە.
ئاماژە بەوەکراوە، گرنگی دراوە بە خستنەبواری جێبەجێکردنی پڕۆژەی بۆری نەوتی بەسرە-عەقەبە و تەواوکردنی پڕۆژەی بەستنەوەی کارەبای نێوان هەردوو وڵات بە ئامانجی بەدیهێنانی بەرژەوەندییە هاوبەشەکان.
هاوکات، نوێترین گۆڕانکاریی و پێشهاتە هەرێمی و نێودەوڵەتییەکان تەوەرێکی تری گفتوگۆکانیان بوو، کە تێیدا جەخت لەسەر پاراستنی ئاسایش و سەقامگیریی ناوچەکە لە رێگەی پشتگیریکردن لە بژاردە دیپلۆماسییەکان بۆ چارەسەرکردنی ململانێکان کرایەوە.
ئەمڕۆ چوارشەممە، لە میانی سەرادنەکەیدا بۆ گەرمیان، قوباد تاڵەبانی، جێگری سەرۆک وەزیرانی هەرێم لەگەڵ سەرۆکایەتی هەردوو زانکۆی گەرمیان و پۆلی تەکنیکی گەرمیان کۆبووەوە.
لە کۆبوونەوەکەدا، قوباد تاڵەبانی پیرۆزبایی لە زانکۆی پۆلیتەکنیکی گەرمیان کرد و بەبۆنەی دانپێدانانی لەلایەن وەزارەتی خوێندنی باڵای عیراقەوە و راشێگەیاند، بە تەواوەتی پشتگئیری زانکۆی گەرمیان دەکات تا کێشيکانی چارەسەر بکرێت و تا لەلایەن وەزارەتی خوێندنی باڵا و توێژینەوەی زانستی عیراقەوە دانپێدانانی رەسمیان بۆ بکرێت.
لە کۆبوونەوەکەدا، قوباد تاڵەبانی ئاماژەیدا بە گرنگی رۆڵی زانکۆکان لە گەشەپێدانی ناوچەیی و بە پێویستی زانی هەردوو زانکۆکە پلانیان هەبێت تا بەپێی پێویستییەکانی گەشەپێدانی گەرمیان هێزی کاری مرۆیی شارەزا پەروەردە بکەن و جەختیکردەوە، خۆی و حکومەتی هەرێمیش ئامادەن بۆ هەموو جۆرە پشتیوانی و هاوکارییەک.
لە سەردانەکەیدا بۆ ئیدارەی گەرمیان قوباد تاڵەبانی، جێگری سەرۆک وەزیران بە ئامادەبوونی هەر یەکە لە جەلال شێخ نوری، سەرپەرشتیاری ئیدارەی گەرمیان و بەڕێوەبەری گشتیی شارەوانییەکانی گەرمیان و بەڕێوەبەری گشتیی تۆماری خانووبەرەی گەرمیان، لەگەڵ سەرۆک شارەوانییەکانی ئیدارەی گەرمیان کۆبووەوە.
لە کۆبونەوەکەدا قوباد تاڵەبانی بڕیاریدا لەسەر دابەشکردنی زیاتر لە 17 هەزار پارچە زەوی بەسەر فەرمانبەران و کەسوکاری شەهیدانی سنوری گەرمیان.
بەپێی بڕیارەکە لە کەلار 11 هەزار و 128 پارچە زەوی، لە کفری دوو هەزار و 500 پارچە زەوی و لە رزگاریش دوو هەزار و500 پارچە زەوی بەسەر فەرمانبەراندا دابەش دەکرێت.
جگە لەو پارچە زەویانە، 1077 پارچە زەویش بەسەر کەسوکاری شەهیدان بەبێ لەبەرچاوگرتنی ئینتیمای سیاسی و حزبی دابەش دەکرێت و پرۆسەکەش لە ئەمڕۆوە و بە ئامادەبوونی ژمارەیەک لە فەرمانبەران و کەسوکاری شەهیدان دەست بە دابەشکردنی پارچە زەوییەکان کرا
حکومەتی بریتانیا رایگەیاند، لە چوارچێوەی یاسا نوێیەکانی پاراستنی مێرمنداڵاندا، دەستڕاگەیشتنی مێرمنداڵانی تەمەن 16و 17ساڵ بۆ سەر تۆڕە کۆمەڵایەتییەکان بە شێوەیەکی خۆکارانە لە سەعات 12ـی شەو تا 6ـی بەیانی سنوردار دەکرێت.
قەدەغەکردنەکە پلاتفۆرمەکانی وەک سناپچات، تیک تۆک، یوتیوب، ئینستاگرام، فەیسبووک و ئێکس دەگرێتەوە، بەڵام خزمەتگوزاری نامە ناردنی وەک واتسئەپ و سیگناڵ ناگرێتەوە.
بەپێی ئەم پلانە، بەکارهێنەران لەم تەمەنەدا بۆ بەکارهێنانی ئەپەکان لەم کاتانەدا دەبێت رێکخستنە سەرەتاییەکانی مۆبایلەکانیان بگۆڕن؛ هاوکات ئەو تایبەتمەندییانەی کە بۆ هاندانی زیاتری بەکارهێنەران بۆ مانەوە و گەڕان لەناو تۆڕەکاندا دروستکراون، بە شێوەیەکی خۆکار ناچالاک دەکرێن.
لیز کەنداڵ، وەزیری تەکنەلۆژیای بریتانیا، ئاماژەی بەوە کرد، کە ئەم هەنگاوانە یارمەتی مێرمنداڵان دەدەن خەوێکی تەندروست تاقیبکەنەوە، سەرنجی زیاتر بخەنە سەر خوێندنەکەیان و کاتی زیاتر لەگەڵ خێزان و هاوڕێکانیاندا بەسەر ببەن.
حکومەتی بریتانیا جەختی لەوە کردووەتەوە، کە کۆمپانیاکانی تەکنەلۆژیا بەپێی یاسا ناچارن پابەندی ئەم رێسایانە بن و لە ئەگەری پێشێلکردنیدا روبەڕووی سزای چاودێریی "زۆر توند" دەبنەوە.
چاوەڕوان دەکرێت یەکەمین رەشنووسی ئەم یاسایە تا کۆتایی ئەمساڵ پێشکەشی پەرلەمان بکرێت و لە بەهاری 2027ەوە بچێتە بواری جێبەجێکردنەوە.
فەرماندەیی ناوەندیی ئەمریکا، دەستپێکردنی شەپۆلێکی نوێی هێرشە ئاسمانییەکانی بۆ سەر چەندین ئامانج لە ئێران راگەیاند، تەندروستیی ئێرانیش ئاشکرایکرد، لە هێرشە نوێیەکانی ئەمریکادا، زیاتر لە 260 هاووڵاتی برینداربوون.
فەرماندەیی ناوەندیی ئەمریکا 'سێنتکۆم' لە راگەیەندراوێکدا لەسەر تۆڕی کۆمەڵایەتی 'ئێکس' رایگەیاند: ئامانج لەم هێرشانە بەردەوامبوونی لاوازکردنی ئەو توانایە سەربازییانەیە کە هێزەکانی ئێران بەکاریدەهێنن بۆ هێرشکردنە سەر کەشتییە بازرگانییەکان لە گەروی هورمز.
ئاماژەی بەوەشکرد، دەیان ئامانجی سەربازییان لە نزیک گەروی هورمز و ناوچە کەناراوەکانی ئێران پێکاوە.
هاوکات، وتەبێژی وەزارەتی تەندروستیی ئێرانیش رایگەیاند، لە هێرشە نوێیەکانی ئەمریکادا، زیاتر لە 260 کەس بریندار بوون، کە ئەمەش بە بەرزترین ئاماری برینداربوون دادەنرێت لە سەرەتای دەستپێکردنی گرژییەکانی ئەم دواییەی نێوان هەردوو وڵات.
جێی ئاماژەیە، ئەم پەرەسەندنە سەربازییە دوای لێدوانەکانی دۆناڵد ترەمپ، سەرۆکی ئەمریکا دێت، کە لە چاوپێکەوتنێکدا لەگەڵ کەناڵی "فۆکس نیوز" رایگەیاندبوو، ئەگەر تاران نەگاتە رێککەوتن، هەفتەی داهاتوو مەودای هێرشەکانی ئەمریکا فراوانتر دەکات بۆ سەر ئێران.
سەرۆکی ئەمریکا راشیگەیاندبوو، "هەفتەی داهاتوو زۆر خراپ دەبێت بۆ ئیران، چونکە وێستگەکانی وزە و پردەکان دەکرێنە ئامانج."
میدیاکانی ئێران لە زاری سوپای پاسدارانەوە رایانگەیاند، لە 24 سەعاتی رابردوودا، دوو کەشتی بە تەقەی هێزە ئەمنییەکانی ئێران ئاڕاستەکەیان گۆڕاوە، ئاماژەیان بەوەشکردوە دوو کەشتییەکە ویستویانە بە بێ هەماهەنگی ئێران گەروەکە تێپەرێنن
ئەمڕۆ چوارشەممە، تەلەڤزیۆنی رەسمی ئێران بڵاویکردەوە، لانی کەم دوو کەشتی کە ویستویانە، بەبێ هەماهەنگی لەگەڵ ئێران و بە شێوەیەکی نایاسایی بە گەروی هورمزدا تێپەڕن، دوای پشتگوێخستنی هۆشدارییە سەرەتاییەکان، بە تەقەی هۆشداریی هێزی دەریایی سوپای پاسداران راگیراون.
بە گوێرەی زانیارییەکان، کەشتییەکان دوای وەرگرتنی هۆشدارییەکان لە بەردەوامبوون لەسەر رێڕەوەکەیان وەستاون، و هیچ زانیارییەکی تر لەسەر ناسنامە و ئاڵای وڵاتەکەیان یان شوێنی مەبەستی ئەو کەشتییانە بڵاو نەکردووەتەوە.
ئەمە لە کاتێکدایە سێنتکۆمیش پێش ئەم بڵاوکراوەی میدیاکانی ئێران رایگەیاند بوو، رێڕەوی دوو کەشتیان گۆریوە، کە ویستویانە گەروی هورمز تێپەڕێنن.
قوباد تاڵەبانی، جێگری سەرۆک وەزیران سەردانی ئیدارەی گەرمیانی کرد و لە یەکەم وێستگەی سەردانەکەیدا لەگەڵ بۆردی وەبەرهێنانی گەرمیان کۆبووەوە.
لە کۆبوونەوەکەدا کە رۆژی چوارشەممە 15ـی 7ـی 2026 بەڕێوەچوو، هەڵسەنگاندن کرا بۆ چۆنییەتی جێبەجێکردنی بڕیار و راسپاردەکانی کۆبوونەوەکەی مانگی نیسانی ئەمساڵی بۆردی وەبەرهێنانی گەرمیان لەگەڵ قوباد تاڵەبانی.
جێگری سەرۆک وەزیران دەستخۆشی لە ئەندامانی بۆردەکە کرد کە خەمخۆرانە کاروبارەکان رادەپەڕێنن و داوایکرد بۆ گەشەپێدان و زیاتر ئاوەدانکردنەوەی گەرمیان زیاتر خۆیان ماندوو بکەن و جیاوازی لەنێوان ناوچەکانی گەرمیاندا نەکەن و بێ هیچ جۆرە جیاوازییەک لە هەر ناوچەیەک بەپێی تایبەتمەندیی ناوچەکە پڕۆژەی وەبەرهێنان جێبەجێ بکەن.
قوباد تاڵەبانی پشتیوانی تەواوی خۆی بۆ بۆردی وەبەرهێنانی ئیدارەی گەرمیان دووپات کردەوە، وتیشی: هەموو ئەو فشارانەی لە رابردوودا کردوویەتی و ئێستاش دەیکات بەهۆی ئەو خۆشەویستییە زۆرەیەتی کە بۆ گەرمیان و گەرمیانییەکان هەیەتی و دەبێت لەپێناو خزمەتکردنی زیاتری خەڵک و گەشەپێدانی دەڤەرەکە، ئەندامانی بۆردی وەبەرهێنان وەک یەک تیم پێکەوە کار بکەن و بۆ زیاترکردنی ئاستی وەبەرهێنان ئاسانکاری تەواو پێشکەشی وەبەرهێنەران بکەن.
لە گوندی سیا مەنسوری سەر بە ناحیەی لەیلان جوتیارێك بەهۆی تەقەی راستەوخۆی چەند كەسێكەوە كوژرا، كە دزیان لە دانەوێڵەی جوتیارەكە كردووە.
روداوەكە درەنگانی شەوی رابردوو لە گوندی سیا مەنسوری سەر بە ناحیەی لەیلان رویداوە لە كەركوك، چیرۆكی روداوەكە بە جۆرێك بووە، كە ماوەیەك بووە دانەوێڵەی ئەو جوتیارە دزی لێكراوە، جوتیارەكەش بڕیاری داوە بۆسە دابنێت بۆ دزەكان.
دوای ئەوەی جوتیارەكە و چەند هاوڕێیەكی بۆسە بۆ دزەكان دادەنێن، دەبینن دوو پیاو و ژنێك دانەوێڵەكە دەدزن، ئەوانیش دوایان دەوكەون و لە شوێنێكدا ئۆتۆمبێلی دزەكان لە چاڵێكدا گیر دەبێت، ئەوانیش دەچنە سەریان و لەو كاتەشدا روبەڕووبوونەوە دروست دەبێت و ستار جەباری جوتیار راستەوخۆ گیان لەدەستدەدات و هاوڕێیەكیشی كە بە نەتەوە عەرەبە بریندار دەبێت.
دواتریش دزەكان بە ئۆتۆمبێلی هاوڕێ بریندارەكەی ستار هەڵدێن.
لە ئێستاشدا هێزە ئەمنییەكان لێكۆڵینەوەی وردیان لە روداوەكە دەستپێكردووە و گەڕان بەدوای تۆمەتبارەكانیشدا بەردەوامە.
دەستەی كەشناسیی عیراق رایگەیاند، كە بەهۆی نزمەپاڵەپەستۆیەكی گەرمیی وەرزییەوە، پلەكانی گەرما لە چەندین پارێزگای ناوەڕاست و باشووری وڵات لە 50 پلەی سیلیزی تێپەڕ دەبن و شەپۆلێكی گەرمای توند وڵاتەكە دەگرێتەوە.
بەپێی راگەیاندراوێكی رەسمیی دەستەی كەشناسی، عیراق لە ژێر كاریگەریی نزمەپاڵەپەستۆی گەرمیی وەرزیدایە، ئەمەش وایكردووە كە ئاسمانی وڵات لە هەموو ناوچەكان بە تەواوەتی ساماڵ و خۆرهەتاو بێت.
پلەكانی گەرماش لە ناوچەكانی ناوەڕاست و باشوور هاوشێوەی رۆژانی رابردوو بە بەرزی دەمێننەوە.
كەشناسی ئاماژەی بەوەش كردووە، كە گەرماكە لە سەعاتەكانی نیوەڕۆدا دەگاتە لوتكە و لە هەندێك لە شارەكان 50 پلەی سیلیزی تێدەپەڕێنێت، هەر بۆیە داوا لە هاووڵاتیان دەكرێت لەو كاتانەدا خۆیان لە تیشكی خۆر بپارێزن.
دۆناڵد ترەمپ، لە پەیوەندییەکی تەلەفۆنیدا بە راشکاوی داوای لە بنیامین ناتانیاهۆ سوپاکەی لە چەند وڵاتێکی رۆژهەڵاتی ناوەڕاست بکشێنێتەوە، چونکە پێی وایە بوونی سوپای ئیسرائیل لەو ناوچانە بووەتە هۆی کێشەنانەوە بۆ ئەمریکا.
پێگەی هەواڵی ئەکسیۆسی ئەمریکی بڵاویکردەوە، ئەو فشارەی واشنتۆن دوای دیدارەکەی سەرۆکی ئەمریکا و سەرۆکی سوریا، لە پەراوێزی لوتکەی ناتۆ، دێت.
ئەوەشی راگەیاند، ئیداەی ئەمریکا هەوڵدەدات ئیسرائیل لەو ناوچانەی سوریا بکشێتەوە کە دوای روخانی رژێمی ئەسەد کۆنترۆڵی کردوون، بەڵام لێپرسراوانی ئەمریکی دەڵێن ناتانیاهۆ نایەوێت ئەو سازشانە بکات کە بۆ رێککەوتنی ئەمنی پێویستن.
هاوکات، ناتانیاهۆ جەخت لەسەر پێویستیی دروستکردنی "ناوچەی ئارام" دەکاتەوە بۆ رێگریکردن لە هێرشی هاوشێوەی 7ـی ئۆکتۆبەر.
ئەمەش لە کاتێکدایە، ترەمپ داوای پاشەکشێ دەکات، بەشێک لە وەزیرە توندڕەوەکانی ئیسرائیل فشار دەکەن بۆ مانەوەی هەمیشەیی و تەنانەت دروستکردنی نیشتەجێبوونی جولەکە لەو ناوچانەدا.
دۆناڵد ترەمپ، سەرۆکی ئەمریکا لە کاتی پێشوازیکردنی لە عەلی فالح زەیدی، سەرۆک وەزیرانی عیراق لە کۆشکی سپی رایگەیاند کە ویلایەتە یەکگرتووەکانی ئەمریکا کار دەکات بۆ ئەنجامدانی چەندین گرێبەستی جۆراوجۆر لەگەڵ عیراقدا و ئاماژەی بەوە کرد کە ئاراستەیەکی روون هەیە بۆ دروستکردنی هاوبەشییەکی بەهێز لە کەرتی نەوتدا لە نێوان هەردوو وڵات کە لە داهاتوویەکی نزیکدا بە رەسمی رادەگەیەنرێت.
ترەمپ جەختی کردەوە کە کۆمپانیا نەوتییە ئەمریکییەکان بە ئاستێکی بێپێشینە دەچنە ناو بازاڕی عیراقەوە، هاوکات ئاشکرای کرد کە واشنتۆن و پێویست نابینێت هێزە سەربازییەکانی ئەمریکا لە ناو خاکی عیراقدا بمێننەوە و بەردەوام بن.
سەبارەت بە دۆخی ناوچەکە، سەرۆکی ئەمریکا تیشکی خستە سەر رۆڵی تاران و رایگەیاند کە ئێران بووەتە بارگرانییەکی گەورە بەسەر شانی عیراق و تەواوی ناوچەکەوە، بەڵام هاوکات ئاماژەی بەوە دا کە دەرفەتێکی بە ئێران بەخشیوە بۆ ئەوەی بگەنە رێککەوتن.
ترەمپ باسی لە کێشەکانی دەریایی و گەروی هورمز کرد و روونیکردەوە کە ئەمریکا کار بۆ پاراستنی گەرووەکە دەکات و دوای ئەنجامدانی پەیوەندی لەگەڵ وڵاتانی ناوچەکە، بڕیاری پاشەکشەکردنی داوە لەسەر پرسی سەپاندنی باج لەسەر تێپەڕبوونی کەشتییەکان لە گەروەکەدا، ئەمەش لە بەرانبەر پابەندبوونی ئەو وڵاتانە بە ئەنجامدانی وەبەرهێنانی هاوبەش.
لە کۆتاییدا جەختی کردەوە کە ویلایەتە یەکگرتووەکانی ئەمریکا پێشوازی لە وەبەرهێنانەکان دەکات لە بەرانبەر دابینکردنی پاراستنی تەواو بۆ رێڕەوە ئاوییە ستراتیژییەکانی جیهان.
دۆناڵد ترەمپ، سەرۆکی ئەمریکا لە کۆشکی سپی پێشوازی لە عەلی فالح زەیدی، سەرۆک وەزیرانی عێراق کرد کە ئەمە یەکەمین سەردانی رەسمی دەرەکیی سەرۆک وەزیرانە لە دوای پێکهێنانی کابینەی نوێی حکومەتەکەیەوە.
لە کۆنگرەیەکی رۆژنامەوانی هاوبەشدا، هەردوولا قۆناغێکی نوێی پەیوەندییە سیاسی، ئەمنی و ئابوورییەکانی نێوان بەغداد و واشنتۆنیان راگەیاند و جەختیان لەسەر هاوبەشییەکی ستراتیژیی هەمیشەیی کردەوە.
لە سەرەتای کۆنگرە رۆژنامەوانییەکەدا، سەرۆکی ئەمریکا بە گەرمی بەخێرهاتنی وەفدی عیراقی کرد و رایگەیاند کە واشنتۆن عیراقی خۆش دەوێت و متمانەیەکی زۆری بە سەرۆک وەزیران هەیە کە بە باشترین شێوە نوێنەرایەتی وڵاتەکەی دەکات.
لای خۆیەوە عەلی زەیدی، سەرۆک وەزیرانی عیراق ئاماژەی بەوە کرد کە ئەم سەردانە مێژووییە تەنها سەردانێکی ئاسایی و تێپەڕ نابێت، بەڵکو دەروازەیەک دەبێت بۆ راگەیاندنی هاوبەشییەکی ستراتیژیی درێژخایەن لە نێوان هەردوو دەوڵەتدا.
لەسەر پرسی ئەمنی وهێزە چەکدارەکان، زەیدی پەیامێکی توندی ئاراستەی سەرجەم لایەنەکان کرد و رایگەیاند: هێزە ئەمنییەکانی عیراق بە تەواوی توانای پاراستنی خاکی نیشتمانیان هەیە و دوای 30ی ئەیلوولی داهاتوو هیچ هۆکارێک بۆ مانەوەی گروپە چەکدارەکانی دەرەوەی چوارچێوەی دەوڵەت بوونی نییە.
سەرۆک وەزیران ئاشکراشی کرد کە لە ماوەی رابردوودا دەوڵەت بە رەسمی چەکێکی زۆری لە بەشێک لەو گروپە چەکدارانە وەرگرتووەتەوە، و جەختی کردەوە کە دەرگای حکومەت بۆ هەر هێز و لایەنێک ئاوەڵایە کە بڕیار بدات چەک دابنێت و روو لە کایەی سیاسی بکات بۆ ئەوەی بە شێوازێکی یاسایی و مەدەنی هاوکاری تەواوی بکرێت.
لە کۆتایی کۆنگرە رۆژنامەوانییەکەدا، سەرۆک وەزیران باسی لە دۆخی ئابووری و بارگرانییەکانی جەنگی دژ بە تێرۆر کرد و ئاماژەی بەوە دا کە زیانەکانی عیراق لەم شەڕەدا گەیشتووەتە زیاتر لە 400 ملیار دۆلار و بووەتە هۆی وێرانبوونی ژێرخانی وڵات.
زەیدی وتی: هەرچەندە عیراق یەکێکە لە دەوڵەتە دامەزرێنەرەکانی رێکخراوی ئۆپێک، بەڵام بەهۆی ئەو بارگرانییە گەورەیەی بەسەریدا هاتووە، ئێستا داوای پشکێکی دادپەروەرانە لە هەناردەکردنی نەوتدا دەکات، هاوکات بەخێرهاتنی کۆمپانیا ئەمریکییەکانی کرد بۆ ئەوەی لە قۆناغی داهاتوودا بێنە ناو بازاڕەکانی عیراقەوە و بەشدار بن لە ئاوەدانکردنەوەی وڵاتدا.
دۆناڵد ترەمپ، سەرۆکی ئەمریکا لە کۆشکی سپی پێشوازی لە عەلی فالح زەیدی، سەرۆک وەزیرانی عیراق کرد و جەختی لە پەیوەندییە بەهێزەکانی نێوان هەردوو وڵات کردەوە.
ترەمپ لە کاتی پێشوازیکردنی لە سەرۆک وەزیرانی عیراق رایگەیاند: عیراقمان خۆش دەوێت، هاوکات متمانەی خۆی بە سەرکردایەتییەکەی نیشان دا و وتی: زەیدی بە باشترین شێوە نوێنەرایەتی وڵاتەکەی دەکات.
ئەم دیدارە لوتکەیە ئەمڕۆ سێشەممە لە کۆشکی سپی بەڕێوەچوو، دوای ئەوەی عەلی فالح زەیدی، سەرۆک وەزیرانی عیراق دوێنێ دووشەممە لەسەرۆکایەتی شاندێکی باڵای حکومیدا گەیشتە ویلایەتە یەکگرتووەکانی ئەمریکا.
ئەمە یەکەمین سەردانی دەرەکیی رەسمی زەیدییە بۆ دەرەوەی وڵات لە دوای پێکهێنانی کابینەی نوێی حکومەتی عیراق.
مەفرەزەکانی پۆلیسی سلێمانی سێ تۆمەتباریان دەستگیرکرد کە دوای راگرتنیان، دانیان بە دزینی 12 ماتۆڕسکیلدا ناوە لە گەڕەکە جیاوازەکانی شارەکەدا.
بەڕێوەبەرایەتی پۆلیسی پارێزگای سلێمانی رایگەیاند، دوای ئەوەی هاووڵاتییەک لە نووسینگەی نەهێشتنی تاوانی بەکرەجۆ سکاڵای تۆمارکرد کە لەبەردەم ماڵەکەیدا دوو ماتۆڕسکیلی لێدزراوە، دەستبەجێ بە بڕیاری دادوەر پەڕاوی لێکۆڵینەوە بۆ روداوەکە کرایەوە.
ئاماژەی بەوەشکردووە، دوای بەدواداچوون و کۆکردنەوەی زانیاری و سوودوەرگرتن لە کامێراکانی چاودێری، مەفرەزەکانی نەهێشتنی تاوانی بەکرەجۆ توانییان هەر سێ تۆمەتبارەکە بدۆزنەوە و دەستگیریان بکەن، لە کاتی لێکۆڵینەوەکاندا جگە لەو دوو ماتۆڕسکیلە، دانیان بە دزینی 10 ماتۆڕسکیلی دیکەشدا ناوە لە گەڕەکەکانی شاری سلێمانی.
پۆلیسی سلێمانی ئاشکراشیکرد، لە ئێستادا هەر سێ تۆمەتبارەکە بە بڕیاری دادوەر و بەپێی 'مادەی 446' لە یاسای سزادانی عیراقی راگیراون و لێکۆڵینەوە لەگەڵیاندا بەردەوامە.
بە فەرمانێكی ئەنجومەنی وەزیرانی هەرێم، 195 فەرمانبەری گرێبەست لە شارەوانی سلێمانی دوورخرانەوە و وتەبێژی شارەوانیی سلێمانیش دەڵێت، ئەو كارمەندانە بەهۆی ئەوەی تەمەنیان لە 60 ساڵ زیاترە دوورخراونەتەوە و موچەی خانەنشینیش نایانگرێتەوە.
ئەنجومەن حەسەن، وتەبێژی شارەوانی سلێمانی لە لێدوانێكی تایبەتدا بۆ كوردسات نیوز ئاماژەی بەوەدا، بە فەرمانێكی سەرۆكایەتی دیوانی ئەنجومەنی وەزیرانی هەرێم، ئەو فەرمانبەرە گرێبەستانەی تەمەنیان گەیشتووەتە 60 ساڵ، دەبێت كۆتایی بە راژەكانیان بهێنرێت و لەكار دووربخرێنەوە.
ئەوەشی خستەڕو، پاڵپشت بەو بڕیارە 195 فەرمانبەری گرێبەستی شارەوانی دوورخراونەتەوە، كە تەمەنیان لە 60 ساڵ زیاتر بووە و لە بەشەكانی چاكسازی شەقام، خاوێنكردنەوە و باخچەكان كاریانكردووە.
وتەبێژی شارەوانی سلێمانی ئاماژەی بەوەشدا، ئەو فەرمانبەرە گرێبەستانە بەهۆی ئەوەی خزمەتیان لە 15 ساڵ كەمترە مووچەی خانەنشینی نایانگرێتەوە ودوورخستنەوەشیان كێشەی گەورە بۆ شارەوانی سلێمانی دروست دەكات و هیچ بڕیارێكیش بۆ دامەزراندنی كەسانی نوێ لە جێگەیان نییە.