هەواڵەکان
وەفدی ئیمراڵی لەگەڵ سەرۆكی پەرلەمانی توركیا و جێگری سەرۆكی ئاكەپە كۆدەبێتەوە
بڕیارە سبەینێ وەفدی ئیمراڵی - دەم پارتی سەبارەت بە ئاشتی و كۆمەڵگەی دیموكراتی لەگەڵ نوعمان كورتولموش، سەرۆكی پەرلەمانی توركیا و ئەفكان ئاڵا، جێگری سەرۆكی گشتی ئاكەپە، كۆببێتەوە.
دەم پارتی رایگەیاند، کۆبوونەوەکە بە مەبەستی تاوتوێكردنی رەشنووسی یاسای چوارچێوە و گفتوگۆ و راگۆڕینەوە دەبێت.
لێپرسراوانی دەم پارتی دەڵێن، نابێت یاسای چوارچێوە پۆلێنبەندی نێوان ئەندامانی رێكخستندا بكات، بەڵكو دەبێت بەو شێوەیە بێت لە كۆبوونەوەی 24ی ئایاری رابردوو لەگەڵ ئۆجەلان گفتوگۆری لەسەركراوە.
هەروەها چاوەڕوان دەكرێت دوای ئەو كۆبونەوەیە، وەفدی ئیمراڵی سەردانی عەبدوڵا ئۆجەلان، رێبەری زیندانیكراوی"پەكەكە"بكات، بۆ وەرگرتنی بۆچونەكانی لەسەر رەشنووسی یاسای چوارچێوە.
وەزارەتی دارایی هەرێم، لیستی موچەی مانگی شەشی موچەخۆرانی هەرێمی بڵاوکردەوە.
بەپێی لیستەکە، لەماوەی سی رۆژدا موچەی سەرجەم موچەخۆرانی هەرێم دابەش دەکرێت.
رۆژی 15ـی مانگ دابەشکردنەکە دەستپێدەکات و رۆژی 18ـی مانگ کۆتاییدێت.
قوباد تاڵەبانی، لێپرسراویی مەکتەبی سکرتارییەتی سەرۆک مام جەلال لەگەڵ لاڤە حیکمەت، سەرپەرشتیاری یەکێتیی ژنانی کوردستان و بەڕێوەبەرانی رێکخراوەکە کۆبووەوە.
لە کۆبوونەوەکەدا کە رۆژی دووشەمە(13/7/2026) بەڕێوەچوو، گفتوگۆکرا لەبارەی کاروچالاکییەکان و چۆنییەتی بەڕێوەچوونی هەنگاوەکانی رێکخستنەوەی یەکێتیی ژنانی کوردستان.
قوباد تاڵەبانی دەستخۆشی لە هەوڵە بەردەوامەکانی لاڤە حیکمەت و بەڕێوەبەرانی رێکخراوەکە کرد کە لەماوەی چەند مانگی رابردوودا رێوشوێنی پێویست و گونجاویان گرتووەتەبەر بۆ نوێکردنەوە و رێکخستنەوەی یەکێتیی ژنان و گەشبینی خۆی دەربڕی کە لە ئەنجامی ئەم هەوڵانەدا یەکێتیی ژنان بتوانێت بە شێوەیەکی سەردەمیانە داکۆکی لە مافەکانی ژنان بکات و ببێتە ئەو رێکخراوەی کە ژنانی کوردستان پێویستییان پێیەتی.
لە بەشێکی دیکەی کۆبوونەوەکەدا، لێپرسراویی مەکتەبی سکرتارییەتی سەرۆک مام جەلال داوایکرد لەم قۆناغە نوێیەدا گرنگیی تایبەت بدەن بە پەرەپێدانی تواناکانی ژنان لە بوارە جیاوازەکاندا و هاوکار و یارمەتیدەریان بن بۆ ئەوەی بەسەر کۆسپ و گرفتەکاندا زاڵبن، تا ساڵ لە دوای ساڵ لە ئامانجی گەیشتن بە کۆمەڵگایەکی ئازاد و یەکسان و دادپەروەرتر نزیکتر ببینەوە.
هەر لەو چوارچێوەیەدا قوباد تاڵەبانی بە گرنگیشی زانی یەکێتیی ژنان هۆشیاری یاسایی لەناو ژناندا زیاتر پەرە پێ بدات و کار بکەن بۆ ئەوەی ژنان لەبەردەم یاسادا یەکسان بن.
سبەینێ لە عیراق و هەرێم پشووە و فەرمانگەی میدیا و زانیاری حکومەتی هەرێمیش دەڵێت: لە فەرمانگە خزمەتگوزارییەکان، دەوام بەشێوەی ئێشکگری بەردەوام دەبێت.
فەرمانگەی میدیا و زانیاری حکومەتی هەرێم رایگەیاندووە: سبەینێ سێشەممە. 14ـی 7ـی 2026، بەپێی رۆژژمێری رەسمی حکومەتی هەرێمی کوردستان و بەبۆنەی شۆڕشی 14ی تەمووزی 1958، لە سەرجەم دامودەزگا رەسمییەکانی هەرێمی کوردستان پشووی رەسمی دەبێت.
فەرمانگەی میدیا و زانیاری ئاماژەی بەوەشداوە: لە فەرمانگە خزمەتگوزارییەکان، دەوام بەشێوەی ئێشکگری بەردەوام دەبێت.
لە راگەیەندراوێکدا، وەزارەتی دارایی هەرێم دەڵێت، "بەغداد 120 ملیار دیناری لەکۆی تەمویلی موچە بڕیوە".
وەزارەتی دارایی هەرێم رایگەیاندووە: تەمویلی موچەی مانگی حوزەیران خرایە سەر هەژماری بانكی وەزارەتەکەمان.
وەزارەتی دارایی هەرێم دەشڵێت: زیاتر لە 841 ملیار دینار خرایە سەر هەژماری بانكی وەزارەتی دارایی، بەڵام وەزارەتی دارایی فیدراڵ 120 ملیار دیناری لە كۆی تەمویلی موچە بڕیوە.
بەپێی راگەیەندراوەکەی وەزارەتی دارایی هەرێم: زیاتر لە سێ ملیار دینار لە شایستەی موچەی مانگەكانی رابردووی خانەنشینانی شارستانی و سەربازی نەنێردراوە
سەبارەت بە کاتی دابەشکردنی موچە، وەزارەتی دارایی هەرێم ئاماژەی بەوەداوە: دوای تەواوكردنی رێكارەكان و وەرگرتنی پارەكە بە كاش لیستی موچە بڵاودەكرێتەوە.
دۆناڵد ترەمپ، سەرۆكی ئەمریكا لە نوێترین لێدوانیدا دەڵێت: گەروی هورمز كۆنترۆڵ دەكەین و دەبینە پاسەوانی گەروەکە، هەروەها لەبەرانبەر پاسەوانیکردن لە گەروی هورمز باج وەردەگرین.
دۆناڵد ترەمپ سەرۆكی ئەمریكا رایدەگەیەنێت كۆنترۆڵی گەروی هورمز دەكەن و لەبەرامبەر پاراستنیشیدا باج وەردەگرن.
ترەمپ بە كەناڵی فۆكس نیوزی ئەمریكی رایگەیاند، لەگەڵ ئێران رێككەوتنیان هەبوو بەڵام ئەوان پێشێلیان كرد.
وتیشی، ئەمریكا كۆنترۆڵی گەروی هورمز دەگرێتە دەست و پاسەوانی دەكەن، بەڵام لەبەرامبەر پاسەوانیكردنی ئەو رێڕەوە ئاوییە ستراتیژییە، باج وەردەگرن.
سەرچاوەیەکی تایبەت بۆ کوردسات نیوز ئاشکرایکرد ، حکومەتی عیراق بڕی زیاتر لە 841 ملیار دیناری وەک پارەی موچەی مانگی حوزەیرانی (شەش)ی فەرمانبەرانی هەرێم، خستووەتە سەر هەژماری بانکیی وەزارەتی دارایی و ئابوریی هەرێمی کوردستان.
سەرچاوەیەکی ئاگادار تایبەت بە کوردسات نیوزی رایگەیاند؛ بەغداد بە رەسمی پرۆسەی ناردنی شایستە داراییەکانی فەرمانبەرانی هەرێمی کوردستانی دەستپێکردووە و پارەکەی خستووەتەسەر هەژماری بانکیی وەزارەتی دارایی هەرێم لە لقی هەولێری بانکی ناوەندیی عیراق.
سەرچاوەکە ئاماژەی بەوەشکرد، ئەو بڕە پارەیەی کە لەلایەن حکومەتی فیدراڵییەوە بۆ موچەی مانگی حوزەیران (مانگی شەش) خەرجکراوە، بڕەکەی زیاترە لە 841 ملیار دینار.
بەپێی زانیارییەکان بڕیارە لە ماوەکانی داهاتوودا و دوای تەواوبوونی رێکارە بانکییەکان، وەزارەتی دارایی و ئابوریی هەرێمی کوردستان خشتەی دابەشکردنی ووچەی سەرجەم وەزارەت و دامەزراوەکان رابگەیەنێت.
وەزارەتی دارایی عیراق رێکارەکانی بۆ خەرجکردنی موچەی مانگی شەشی فەرمانبەرانی هەرێمی کوردستان دەستپێکرد
سەرچاوەیەکی تایبەت لە نێو وەزارەتی دارایی عیراقەوە بە محەمەد عەبدولرەحمان، پەیامنێری کوردسات نیوزی راگەیاند، رێکارەکان لە بەشی بودجە لە نێو وەزارەتی دارایی عیراقەوە دەستپێکردوە، لە دوای تەواو بوونی لەو بەشە، نوسراوی خەرجکردنەکە رەوانەی بەشی ژمێریاری دەکرێت.
ئەو سەرچاوە تایبەتە بە پەیامنێری کوردسات نیوزی راگەیاند، هەوڵدەدەین ئەمڕۆ رێکارەکانی خەرجکردنی پارەی موچەی هەرێم کۆتایی پێبێت، وتیشی بەڕێوەبەری نوسینگەی وەزیری دارایی فەرمانەکەی دەرکردوە بۆ دەستپێکردنی رێکارەکان.
دەستەی دەسپاكی عیراق بڵاویكردەوە، لە مانگی رابردوودا، بڕیاری دەستگیركردن و بانگهێشتكردن بۆ 30 پلە تایبەتەكان دەركراوە.
دەستەی دەسپاكی عیراق رایگەیاند، لە نیوەی یەكەمی ئەمساڵدا، 155 بڕیاری دەستگیركردن و بانگهێشتكردن بۆ بەردەم دادگا بۆ پلە باڵاكان دەركراوە، بە تەنها لە مانگی حوزەیرانیشدا، بڕیاری دەستگیركردن و بانگهێشتكردن بۆ 30 خاوەنی پلەی تایبەت دەرچووە.
دەستەی دەسپاكی عیراق ئەوەشی ئاشكرا كردووە، هەر لەو ماوەیەدا 901 پرۆسەی دەستبەسەرداگرتن جێبەجێكراوە و 471 تۆمەتبار لەكانی ئەنجامی تۆمەتەكانیاندا دەستگیركراون.
لەلایەکی تریشەوە، دادگای لێکۆڵینەوەی نەینەوا ئاشکرایکرد، لە چوارچێوەی بەدواداچوون بۆ دۆسیەی گەندەڵیی "عەدنان جومەیلی" بریکاری پێشووی وەزارەتی نەوت بۆ کاروباری پاڵاوتن کە ئێستا دەستبەسەرە، بڕیاری سڕکردن و دەستبەسەرداگرتن بۆ نۆ موڵکی بازرگانی، سێ کارگەی ئارد و حەوت بارهەڵگری مۆدێل بەرز دەرکراوە، کە کۆی بەهاکەیان دەگاتە نزیکەی 69 ملیار دیناری عیراقی.
کەشناسیی هەرێم ئاشکرایکرد، پێشبینی دەکرێت سبەینێ خۆڵبارینێکی کەم ناوچەکان بگرێتەوە و پلەکانی گەرماش کەمێک نزم دەبنەوە.
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای بۆ سەعاتی داهاتوو بڵاوکردەوە.
بەپێی پێشبینییەکانی کەشناسیی هەرێم، کەشی ئەمڕۆ دووشەممە ئاسمان ساماڵ دەبێت و ئاراستەی با بەرەو باکوری ڕۆژئاوا دەبێت و پلەکانی گەرماش نزیک دەبن لە تۆمارکراوەکانی دوێنێ.
سەبارەت بە کەشی سبەینێ سێشەممە، ئاماژەی بەوەکردووە، ئاسمان بە ساماڵی دەمێنێتەوە، بەڵام ئەگەری بەرزبوونەوەی تۆز و خۆڵێکی سوک لە کاتەکانی بەیانی تا دوای نیوەڕۆ لەئارادایە، هاوکات پلەکانی گەرما بە یەک بۆ دوو پلە بەراورد بە ئەمڕۆ نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 42 پلەی سیلیزی
پیرمام: 38 پلەی سیلیزی
سلێمانی: 40 پلەی سیلیزی
هەڵەبجە:44 پلەی سیلیزی
چەمچەماڵ: 42 پلەی سیلیزی
دهۆک: 42 پلەی سیلیزی
زاخۆ: 43 پلەی سیلیزی
ئاکرێ:43 پلەی سیلیزی
گەرمیان:45 پلەی سیلیزی
سۆران: 40 پلەی سیلیزی
حاجی ئۆمەران:32 پلەی سیلیزی
وەزارەتی کارەبای هەرێمی کوردستان ئاشکرایکرد، بەهۆی دروستبوونی کێشەیەکی تەکنیکی لە هێڵەکانی گواستنەوە، گرفتی کوژانەوەی گشتیی کارەبا لە بەشێکی پارێزگای دهۆک رویداوە و تیمەکانیش سەرقاڵی چارەسەرکردنین.
وەزارەتی کارەبای حکومەتی هەرێمی کوردستان لە راگەیەنراوێکدا هاووڵاتییانی ئاگادارکردەوە، کە بەهۆی دروستبوونی کێشەیەکی تەکنیکی لە هێڵەکانی گواستنەوەی وزەدا، کارەبا لە بەشێکی پارێزگای دهۆک بڕاوە.
لەمبارەیەوە، وەزارەتی کارەبا ئاماژەی بەوەکردووە، لە ئێستادا تیمە هونەرییەکانیان سەرقاڵی لێکۆڵینەوە و دۆزینەوەی هۆکاری سەرەکیی کێشەکەن، بەمەبەستی چارەسەرکردنی خێرا، راشیانگەیاندووە کە لە چەند سەعاتی داهاتوودا پێدانی کارەبا بۆ ئەو ناوچانە ئاسایی دەبێتەوە.
لە کۆتایی راگەیەنراوەکەدا، وەزارەتی کارەبا جەختی کردووەتەوە، لەگەڵ هەر پێشهاتێکی نوێ یان گەڕانەوەی تەواوەتیی کارەبا، راستەوخۆ هاووڵاتییان لە رێگەی میدیاکانەوە ئاگادار دەکەنەوە.
ئەنجومەنی باڵای دادوەریی عیراق، گەڕاندنەوەی 375 کیلۆگرام زێڕی لە چوارچێوەی دۆسیەی لێکۆڵینەوەی بریکاری پێشووی وەزارەتی نەوتدا راگەیاند، کە بە هەماهەنگی لەگەڵ هەرێمی کوردستان دەستی بەسەردا گیراوە.
دادوەرانی لێکۆڵینەوە لە دادگای تاوانەکانی بەرەنگاربوونەوەی گەندەڵی ناوەندیی عیراق رایانگەیاند، ئەمڕۆ ، بە هەماهەنگی لەگەڵ دامەزراوەکانی هەرێمی کوردستان و لەژێر سەرپەرشتی راستەوخۆی فایەق زێدان سەرۆکی ئەنجومەنی باڵای دادوەریی عیراق، ، توانراوە 358 کیلۆگرام زێڕ بگەڕێنرێتەوە.
دادگای لێکۆڵینەوە ئاماژەی بەوەشکردووە، لە دۆسیەیەکی تری هاوشێوەدا دەست بەسەر 17 کیلۆگرام زێڕی دیکەدا گیراوە، بەوەش کۆی گشتی ئەو زێڕەی لە یەک رۆژدا دەستی بەسەردا گیراوە گەیشتووەتە 375 کیلۆگرام.
بەپێی راگەیەنراوەکە ، تەواوی زێڕە دەستبەسەرداگیراوەکە رادەستی بەڕێوبەرایەتی گشتی گەنجینەی بانکی ناوەندیی عیراق کراوە، ئەم رێکارانەش لە چوارچێوەی هەوڵەکانن بۆ تەواوکردنی لێکۆڵینەوەکان لە دۆسیەی بریکاری وەزارەتی نەوت بۆ کاروباری پاڵاوتن، "عەدنان جومەیلی"، کە ئێستا دەستبەسەرە، بەمەبەستی گەڕاندنەوەی سەرجەم ئەو سەروەت و سامانە گواستراوە و نەگواستراوانەی لە رێگەی گەندەڵییەوە بەدەستهاتوون.
سوپای پاسدارانی ئێران رایدەگەیەنێت، لە وەڵامی هێرشەکانی ئەمریکادا، لە رێگەی موشەک و فڕۆکەی بێفڕۆکەوانەوە چەندین بنکە و پێگەی سەربازیی واشنتۆنیان لە بەحرەین، کوەیت و ئوردن کردووەتە ئامانج.
سوپای پاسدارانی ئێران، ئەمڕۆ دووشەممە، قۆناغێکی نوێی گرژبوونەوەی سەربازیی لەگەڵ واشنتۆن راگەیاند و ئاشکرایکرد، چەندین هێرشی نوێیان کردووەتەسەر بنکە و پێگە سەربازییەکانی ئەمریکا لە ولاتانی بەحرەین، کوەیت و ئوردن، ئەمەش تەنها چەند سەعاتێک دوای ئەوەی واشنتۆن کۆتاییهاتنی شەپۆلێکی هێرشەکانی بۆ سەر ئێران راگەیاند.
ئاژانسی هەواڵی رەسمی ئێران (ئیرنا) لە زاری سوپای پاسدارانەوە بڵاویکردەوە، هێرشەکان پێگەی ئاسمانیی "ئەمیر حەسەن" لە ئوردن، ناوەندێکی فەرماندەیی فڕۆکە بێفڕۆکەوانەکانی ئەمریکا لە بەحرەین و بنکەی ئاسمانیی "عەلی سالم"یان لە کوەیت کردووەتە ئامانج.
میدیاکانی ئێران ئاماژەیان بەوەشکردووە، لە قۆناغی دووەمی ئۆپەراسیۆنەکانیان، بنکەی ئاسمانیی "شێخ عیسا"یان لە بەحرەین پێکاوە، هەروەها جەختیان کردووەتەوە کە هێرشەکەی سەر بنکەی "ئەمیر حەسەن" لە ئوردن لە رێگەی موشەک و درۆنەوە بووە و بووەتە هۆی ئاگرکەوتنەوە لە کۆگاکانی سوتەمەنی و تەقەمەنی سوپای ئەمریکا.
سوپای پاسداران ئەوەشی خستەڕوو، ئەم هێرشانە وەک وەڵامێکە بۆ بۆردومانەکانی ئەمریکا کە کەناراوەکانی ئێرانیان کردبووە ئامانج، راشیانگەیاند کە پرۆسە سەربازییەکانیان هێشتا بەردەوامن.
لەلایەکی دیکەوە و لە پێشهاتێکی پەیوەندیداردا، هێزی دەریایی سوپای پاسداران ئاشکرایکرد، شەوی رابردوو دوو کەشتییان لە گەروی هورمز راگرتووە بەهۆی ئەوەی سیستمی چاودێرییان کوژاندووەتەوە و مەترسییان بۆ سەر ئاسایشی دەریاوانی دروستکردووە، بەڵام هیچ زانیارییەکیان لەسەر ناسنامە و ئاڵای کەشتییەکان ئاشکرا نەکردووە.
ئەمریکا کۆتاییهاتنی شەپۆلێکی نوێی هێرشەکانی بۆ سەر دەیان پێگەی سەربازی و بەرگریی ئاسمانی لە ناوخۆی ئێران رادەگەیەنێت و تاران-یش دەڵێت دوو کەشتییان لە گەروی هورمز راگرتووە.
سوپای ئەمریکا ئاشکرایکرد، شەپۆلێکی نوێی هێرشە ئاسمانی و دەریاییەکانی بۆ سەر دەیان ئامانجی سەربازی لە ناوخۆی ئێران کۆتایی پێهێناوە.
فەرماندەیی ناوەندیی هێزەکانی ئەمریکا 'سێنتکۆم' لە راگەیەنراوێکدا ئاماژەی بەوە کردووە، لەو هێرشانەدا کە لە رێگەی فڕۆکەی جەنگی، کەشتیی گەلی سەربازی و بۆ یەکەمجاریش لە رێگەی بەلەمی کۆنتڕۆڵکراوی خۆکوژەوە ئەنجامدراون، چەندین سیستمی بەرگریی ئاسمانی، وێستگەی راداری کەناراوی، بنکەی موشەکی و فڕۆکەی بێفڕۆکەوانی ئێرانیان کردووەتە ئامانج.
لەلایەکی دیکەوە، سوپای پاسدارانی ئێران رایگەیاندووە، هێزە دەریاییەکانیان لە گەروی هورمز پرۆسەیەکیان بۆ راگرتنی دوو کەشتیی سەرپێچیکار جێبەجێ کردووە کە هاتوچۆی کەشتییە بازرگانییەکانیان خستبووە مەترسییەوە.
وەزارەتی تەندروستی عیراق نوێترین ئاماری رەسمی لەسەر بڵاوبوونەوەی نەخۆشیی "تای خوێنبەربوون" راگەیاند و ئاشکرایکرد، لە سەرەتای ساڵی 2026ەوە تا ئێستا 270 حاڵەتی تووشبوونی پشتڕاستکراوە و 17 حاڵەتی گیانلەدەستدان لە سەرانسەری وڵاتدا تۆمارکراون.
سەیف بەدر، وتەبێژی وەزارەتی تەندروستی رایگەیاند،، تیمەکانیان رۆژانە بە هەماهەنگی لەگەڵ لایەنە ڤێتێرنەری و چاودێرییەکان رەوشی پەتاکە دەپشکنن. بەپێی ئاماری هەفتەی 28ـی ئەمساڵ، 26 تووشبووی نوێ بەبێ تۆمارکردنی چوارچێوەی گیانلەدەستدان دەستنیشانکراون، کە زۆربەیان لە پارێزگای بەسرە بە 10 حاڵەت و نەینەوا بە پێنج حاڵەت بوون.
ئەوەشی خستەڕوو، ئامارەکە بەم شێوەیە بەسەر پارێزگاکاندا دابەشبوون: زیقار 109 تووشبوون و هەشت حاڵەتی گیانلەدەستدان، بەسرە 24 تووشبوون و یەک حاڵەتی گیانلەدەستدان، میسان 21 تووشبوون بەبێ گیانلەدەستدان، موسەنا 19 تووشبوون و یەک گیانلەدەستدان، نەینەوا 16 تووشبوون بەبێ گیانلەدەستدان، دیالە 15 تووشبوون و یەک گیانلەدەستدان، بەغداد/رەسافە 14 تووشبوون و یەک گیانلەدەستدان، واست 13 تووشبوون و دوو گیانلەدەستدان، بابل 13 تووشبوون و دوو گیانلەدەستدان، سەڵاحەدین پێنج تووشبوون بەبێ گیانلەدەستدان، بەغداد/کەرخ پێنج تووشبوون و یەک گیانلەدەستدان، کەرکوک چوار تووشبوون بەبێ گیانلەدەستدان، دیوانیە سێ تووشبوون بەبێ گیانلەدەستدان، کەربەلا دوو حاڵەت بەبێ گیانلەدەستدان، هەولێر دوو تووشبوون بەبێ گیانلەدەستدان، سلێمانی دوو بەبێ گیانلەدەستدان، نەجەف دوو حاڵەت بەبێ گیانلەدەستدان و ئەنبار یەک تووشبوون بەبێ گیانلەدەستدان".
وەزارەتی تەندروستی ئاماژەی بەوەکردووە کە نیشانەکان لە قۆناغی یەکەمدا بەمانە دەستپێدەکەن:
بەرزبوونەوەی پلەی گەرمی لەش (تا)، سەرئێشە، ئازار لە ناوچە جیاجیاکانی لەشدا، و ماندویەتی گشتی، لە قۆناغی دواتریشدا رەنگە گەشە بکات بۆ خوێنبەربوون لەژێر پێست یان لە کونەکانی لەشەوە.
رێنماییە خۆپارێزییە گرنگەکان بۆ هاووڵاتیان:
وەزارەت جەختیکردووەتەوە، دەستنیشانکردنی پێشوەختە چانسی چاکبوونەوە زۆر دەکات، و داوای لە هاووڵاتیان کردووە پابەندی ئەم ڕێکارانە بن:
یەکەم، کڕینی گۆشت لە شوێنی تەنها لە گۆشتفرۆشە رێگەپێدراوەکان، پێویستە گۆشت تەنها لەو گۆشتفۆرشانە بکڕدرێت کە مۆڵەتی تەندروستی و ڤێتێرنەرییان هەیە.
دووەم، قەدەغەکردنی سەربڕینی هەرەمەکی و دوورکەوتنەوە لە گەڕەکەکان، رێگری تەواو بکرێت لە لەوەراندن و سەربڕینی ئاژەڵ بە شێوەی هەڕەمەکی لەناو کۆڵان و گەڕەکەکاندا.
سێهەم، بەکارهێنانی کەرەستەی پارێزەر، لەبەرکردنی دەستکێش و جلی پارێزەر لە کاتی مامەڵەکردن لەگەڵ ئاژەڵ، گۆشت، یان پاشماوەکانیاندا (بەتایبەت بۆ قەساب و ئاژەڵداران).
هێرشەکانی ئەمریکا بۆ سەر ئێران دەستیان پێکردەوە؛ دەنگی تەقینەوەی بەهێز لە بەندەر عەباس و دورگەی قەشم بیسترا.
میدیا جیهانی و ناوخۆییەکان رایانگەیاند، چەندین تەقینەوەی بەهێز باشوری ئێرانیان هەژاندووە، ئەمەش دوای ئەوەی سوپای ئەمریکا هێرشی نوێی ئاسمانیی بۆ سەر سیستمەکانی موشەکی و بەرگریی ئاسمانیی ئێران دەستپێکردەوە.
ماڵپەڕی "ئەکسیۆس" لە زاری لێپرسراوێکی ئەمریکییەوە بڵاویکردەوە، هێزەکانیان سیستمی بەرگری و پێگەی موشەکیی ئێرانیان کردووەتە ئامانج. هاوکات ئاژانسی "فارس"ی ئێرانی پشتڕاستی کردەوە کە دەنگی چەندین تەقینەوەی بەهێز لە رۆژهەڵاتی شاری "بەندەر عەباس" و ناوچە کەنارییەکانی دوورگەی "قەشم" بیستراوە. ئاژانسی رەسمی "ئێرنا"ش ئاماژەی بەوە کردووە کە "ئەمریکا" چەند موشەکێکی ئاراستەی دوورگەی قەشم کردووە.
لەلایەکی ترەوە، لێپرسراوێکیئەمریکی ئاشکرای کرد، هێزەکانیان لە دوو شوێنی جیاوازی دەوروبەری گەروی هورمز، بەلەمە خێرا و بچووکەکانی سەر بە سوپای پاسدارانیان کردووەتە ئامانج و پێکاویانە.
هاوکات میدیاکانی ئێران بڵاویانکردەوە، کەمێک پێش ئێستا دەنگی چەند تەقینەوەیەکی تر لە بەندەر عەباس بیستراوە.
ئەم پەرەسەندنە سەربازییە مەترسیدارە دوای ئەوە دێت کە هێزەکانی ئەمریکا و ئێران هێرشی چڕی موشەکی و درۆنییان کردەسەر یەکتر، بە جۆرێک پێشتر ئێران چەندین بنکە و دامەزراوەی ئەمریکی لە چەند وڵاتێکی ناوچەی کەنداو کردبووە ئامانج و تاران جارێکی دیکە داخرانی گەووی هورمزی راگەیاندبووەوە.