کوردستان
ماوەی ٤٧ رۆژە موچەخۆرانی هەرێم موچەیان وەرنەگرتووە و دژی دواكەوتنی موچەی مانگی ١٠، بایكۆتی دەوام لە بەشێك لە خوێندنگە و فەرمانگەكانی سنووری پارێزگای سلێمانی بەردەوامە، ئەنجومەنی مامۆستایانی ناڕازی راپەڕینیش بایكۆتی دەوامی راگەیاند.
پەیامنێری كورسات نیوز رایگەیاند، ماوەی چەند رۆژێكە بایكۆتی دەوام لە بەشێك لە خوێندنگە و فەرمانگە و بەڕێوەبەرایەتییەكان سنووری پارێزگای سلێمانی دەستپێكردووە، فەرمانبەران و مامۆستایانیش دەڵێن، "تا موچە دابەشنەكرێت ناچنەوە دەوام".
هاوكات ئەنجومەنی مامۆستایانی ناڕازی راپەڕین لە راگەیەنراوێكدا داوا لە مامۆستایان و فەرمانبەران دەكات، "لە بەرانبەر بێ باكیی دەسەڵات بێدەنگ نەبن و هەڵوێست وەرگرن لە بەرانبەر هەر ٣٠ رۆژ جارێك موچەیەكی شایستە هەیە، چەند رۆژ مووچە دواكەوت ئەوەندە بایكۆت بكەن، چونكە ئەرك بەرانبەر مافە".
ماوەی چەند رۆژێكە بەغداد ٧٦١ ملیار دیناری بۆ موچەی مانگی ١٠ خستووەتە سەر هەژماری بانكی وەزارەتی دارایی هەرێم، بەڵام بەهۆی ئەوەی ٢٣٥ ملیار دینار كورتهێنانی هەیە، تائێستا وەزارەتی دارایی هەرێم ئەو پارەیەی وەرنەگرتووە بۆ ئەوەی موچەی مانگی ١٠ـی پێبدرێت، ناشزانرێت كەی موچەی مانگی ١٠ دابەشدەكرێت.
ئەمڕۆ ڕێوڕەسمی کۆتایی هاتنی خولی یەکی مەشق و ڕاهێنانی بنەڕەتی لە لیوای ٧١٣ بەڕێوەچوو و تیایدا ۱۰۱ پێشمەرگەی بەشداربوو لە خولەکە بۆ ماوەی مانگێک مەشق و ڕاهێنانیان پێکرا و وانە سەربازیەکانیان وەرگرت.
لەم خولەدا ١٠١ پێشمەرگە ئاشنا کران بە دسپلین و بنەما بنەڕەتیەکانی سەربازی و چۆنێتی بەکارهێنانی چەک بەشێوەیەکی دروست، جگە لە چەندین مەشق و ڕاهێنانی جەستەیی و وانەی سەربازی دیکە.
لەوبارەیەوە عەمیدی مافپەروەر "یاسین مەولود عەوڵا" فەرماندەی لیوای ٧١٣ هەوڵ و ماندوبوونی مامۆستایان و ڕاهێنەران و ئەفسەران و سەرپەرشتیارانی خولەکەی بەرز نرخاند و دەست خۆشی لێکردن لەپای بەڕێوەبردنی خولەکە بەشێوەیەکی سەرکەوتوو، هەروەها پیرۆزبایی لە پێشمەرگە بەشداربووەکانی خولەکە کرد کە توانیان سەرکەوتوانە تەواوی قۆناغەکانی خولەکە ببڕن و هیوای سەرکەوتنی زیاتری بۆخواستن.
لە بەشێکی تری ڕێوڕەسمەکەدا خەڵات بەخشرایە ڕاهێنەر و مامۆستا و سەرپەرشتیارانی خولەکە و بڕوانامەی سەرکەوتن بەخشرایە تەواوی بەشداربووانی خولەکە، دواتر بە چەند چالاکی و نمایشێکی سەربازی کۆتایی بەڕێوڕەسمەکە هات.
قوباد تاڵەبانی جێگری سەرۆکوەزیرانی هەرێم لەگەڵ عەبدوڵا مەتەر ئەلمەزروعی باڵیۆزی نوێی ئیمارات لە عێراق کۆبووەوە و باسیان لە پەیوەندییە بازرگانییەکانی نێوان هەردوولا و کارئاسانی بۆ بازرگانان کرد.
کۆبوونەوەکە لە هەولێر بەڕێوەچوو و قوباد تاڵەبانی پیرۆزبایی دەستبەکاربوونی لە باڵیۆزی نوێی ئیمارات کرد و هیوای خواست لە ماوەی ئەرکەکەیدا پەیوەندییەکانی نێوان هەرێمی کوردستان و وڵاتی ئیمارات لە هەموو بوارەکاندا گەشەی زیاتر بەخۆیەوە ببێنێت.
هەر لەم چوارچێوەیەدا ستایشی رۆڵی باڵیۆزخانەی ئیمارات و کونسوڵخانەی ئەو وڵاتەی کرد لە هەرێم کە لە ماوەکانی رابردوودا رۆڵی بەرچاویان بینیوە لە پێشخستنی پەیوەندییەکانی نێوان هەردوولا لە بوارە جیاوازەکاندا.
لە تەوەرێکی کۆبوونەوەکەدا گفتوگۆکرا لەبارەی چۆنییەتی پەرەپێدانی پەیوەندییە بازرگانییەکان. لەمبارەیەوە جێگری سەرۆکوەزیران ئاماژەی بەوەدا لە هەرێمی کوردستان دەرفەتی زۆر گەورە بە تایبەت لە بوارەکانی وەبەرهێنان لە کەرتەکانی کشتوکاڵ و گەشتوگوزار و گەشتوکاڵ هەیە کە لە بەرژەوەندی هەردوو لادایە حکومەتی ئیمارات هانی وەبەرهێنەران و بازرگانەکانی وڵاتەکەی بدات لە هەرێمی کوردستان وەبەرهێنان بکەن.
قوباد تاڵەبانی داواشیکرد باڵیۆزخانەی ئیمارات کارئاسانی زیاتر پێشكەشی بازرگانانی هەرێمی کوردستان بکات و لەمبارەیەشەوە باڵیۆزی ئیمارات ئامادەیی خۆی دەربڕی هەموو جۆرە کارئاسانییەک بۆ بازرگانانی هەرێم بکات تا بۆ پەرەپێدانی پەیوەندییە بازرگانییەکان سەردانی ئەو وڵاتە بکەن.
لە بەشێکی دیکەی کۆبوونەوەکەدا جێگری سەرۆکوەزیران هەوڵەکانی بۆ هەمەجۆرکردنی ئابوری و گەشەپێدانی کەرتەکانی کشتوکاڵ و گەشتوگوزار و پشتگیریکردنی گەنجانی کارساز و داهێنەر و هەنگاوەکانی بە ئەلیکترۆنی کردنی دامەزراوەکانی حکومەت بۆ باڵیۆزی ئیمارات روون کردەوە و ئاماژەی بەوەشدا لەم بوارانەدا دەکرێت سود لە ئەزمونی سەرکەوتووی وڵاتی ئیمارات وەربگیرێت و داواشیکرد حکومەتی ئیمارات لەمبارەیەوە هاوکاری هەرێمی کوردستان بکات.
هاوكاریی هێزەكانی هاوپەیمانان بۆ مانگی ١١ـی هێزی پێشمەرگە خرایە سەر هەژماری بانکی وەزارەتەکە و بڕیارە یەکشەممەی داهاتوو دەست بە دابەشکردنی بکرێت.
فەرمانگەی میدیا و زانیاری حکومەتی هەرێم بڵاویکردەوە، دوای ئەوەی هاوکاریی هێزەکانی هاوپەیمانان بۆ هێزی پێشمەرگە خرایە سەر هەژماری وەزارەتی پێشمەرگە، بەڕێوەبەرایەتیی گشتیی بودجە و بەرنامەکان (ژمێریاریی سەربازی)، رێکارە دارایی و ژمێریارییەکانی ئەنجام داون.
ئاماژەی بەوەشکرد، بۆ ئەو مەبەستە رۆژی یەکشەممە، ٨ـی کانوونی یەکەمی ٢٠٢٤، هاوکاریی مانگی ١١ دابەشدەکرێت.
بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی جەمال یوسف لێپرسراوی مەڵبەندی رێکخستنی بادینان دەکات.
دەقی پرسەنامەکە
بەڕێز هەڤاڵ جەمال یوسف، لێپرسراوی مەڵبەندی رێکخستنی بادینان
بەداخێكی زۆرەوە هەواڵی کۆچی دوایی (بایز کەمال یوسف بۆتانی) برازای بەڕێزتانم پێگەیشت.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە و بنەماڵە تێكۆشەرەكەتان دەكەم كە هەمیشە لە ریزی پێشەوەی خەبات و تێكۆشانبوون لەپێناو كوردستان.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بەهۆی تەقەی راستەوخۆی هێزەكانی سوپای توركیا، لە سنوری قەزای ئامێدی هاووڵاتییەكی مەدەنی تەمەن ٤٥ ساڵ گیانیلەدەستدا.
كامەران عوسمان لێپرسراوی دیسكی مافی مرۆڤی رێكخراوی"سی پی تی" ئەمریكی بە كوردسات نیوزی رایگەیاند، پێشنیوەڕۆی ئەمڕۆ بەهۆی تەقەی هێزەكانی سوپای توركیاوە هاووڵاتیەكی مەدەنی لە نزیك هروورێ لە چیای بەرواری باڵا گیانیلەدەستداوە.
وتیشی، هاوڵاتییەكە ناوی"سەباح عەبدولستارە"و خەڵكی گوندی قومریە و تەمەنی ٤٥ ساڵە، لەگەڵ دوو كەسی دیكە چوونەتە هرورێ كە بارەگای سوپای توركیای لێیە و راستەوخۆ تەقەیان لێكراوە.
بەپێی ئامارێكی رێكخراوی "سی پی تی" ئەمریكیش، لە ماوەی ئەمساڵدا ١٨ كەس بەهۆی هێرش و بۆردوومانەكانی سوپای توركیاوە لە هەرێمی كوردستان گیانیانلەدەستداوە و چوار كەسیش برینداربوون.
بەهۆی دواكەوتنی موچەی مانگی 10ەوە، بایكۆتی دەوام لە بەشێك لە خوێندنگە و فەرمانگەكانی سنوری پارێزگای سلێمانی بەردەوامە.
پەیامنێری كورسات نیوز رایگەیاند، ماوەی چەند رۆژێكە بایكۆتی دەوام لە بەشێك لە خوێندنگە و فەرمانگە و بەڕێوەبەرایەتییەكان راگەیەندراوە و فەرمانبەران و مامۆستایانیش دەڵێن، تا موچە دابەشنەكرێت ناچنەوە دەوام.
وتیشی، لەو فەرمانگانەی دەوام دەكرێت كاتەكانی كاركردن و ژمارەی فەرمانبەران بە تەواوەتی كەمكراوەتەوە، هەروەها بەشێك لە مامۆستایانیش سەرەڕای بایكۆت بەشداری تاقیكردنەوەی خوێندكارانیان كردووە.
موچەخۆرانی هەرێمی كوردستان ماوەی 47 رۆژە موچەیان وەرنەگرتووە، لەكاتێكدا بەغداد ماوەی چەند رۆژێكە 761 ملیار دیناری بۆ موچەی مانگی 10 خستووەتە سەر هەژماری بانكی وەزارەتی دارایی هەرێم، بەڵام بەهۆی ئەوەی هەرێم 235 ملیار دینار كورتهێنانەوە ئەو پارەیەی وەرنەگرتووە، بۆ ئەوەی موچەی مانگی 10ی پێ بدرێت، هەربۆیە نازانرێت كەی موچەی مانگی 10 دابەشدەكرێت.
وەفدێكی وەزارەتی كار و كاروباری كۆمەڵایەتی هەرێم لەبەغدادە بەمەبەستی هاوتاكردنی موچەی خاوەن پێداویستییە تایبەتەكان.
یوسف چاوشین بەڕێوەبەری گشتیی چاودێری و گەشەپێدانی كۆمەڵایەتی هەولێر كە ئەندامی وەفدەکەیە بە كوردسات نیوزی راگەیاند، رۆژی سێشەممە وەفدێكی باڵا بەسەرپەرشتی كوێستان محەمەد وەزیری كار و كاروباری كۆمەڵایەتی گەیشتووەتە بەغداد بۆ گفتوگۆكردن لەگەڵ هاوتاكانیان لە عێراق.
باسی لەوەشكرد، وەفدەکە بۆ چوار پرس چووەتە بەغداد كە بریتین لە هاوتاكردنی موچەی خاوەن پێداویستییە تایبەتەكان، زیادكردنی ناوی ئەو خاوەن پێداویستییە تایبەتانەی تۆمار نەكراون، گەڕاندنەوەی هاوكاری بۆ خێزانە هەژارەكان لەگەڵ پێدانی سەبەتەی خۆراك بۆ خاوەن پێداویستییە تایبەتەكان.
لە مانگی ئەیلولدا وەفدێكی وەزارەتی كار و كاروباری عیراق، سەردانی هەولێریان كرد و لەگەڵ بەرپرسانی وەزارەتی كار و كاروباری كۆمەڵایەتی هەرێم كۆبوونەوە.
پێشتر وەزارەتی كار و كاروباری كۆمەڵایەتی هەرێم، لیستێك كە لە ناوی زیاتر لە ١٣ هەزار و ٢٠٠ خاوەن پێداویستیی تایبەت پێكهاتوون، بەمەبەستی هاوتاكردنی موچەكانیان رەوانەی بەغداد كران.
وەزارەتی خوێندنی باڵای هەرێم رایدەگەیەنێت، وەرگرتنی قیستی پارالێڵ و ئێواران دوادەخرێت و بڕیارەكەش خوێندكارانی سەرجەم قۆناغەكانی خوێندنی بەرایی و خوێندنی باڵا دەگرێتەوە.
وەزارەتی خوێندنی باڵاو توێژینەوەی زانستی هەرێم لە راگەیەنراوێکدا بڵاویکردەوە، لە گشتاندنێکدا کە بە ئیمزای د. ئارام محەمەد قادر وەزیری خوێندنی باڵا دەرچووە و ئاڕاستەی گشت زانکۆ حکومییەکانی هەرێمی کوردستان کراوە تیایدا هاتووە، بڕیاریاندا بە دواخستنی وەرگرتنی پارەی خویندنی پاراڵێڵ و ئێواران لە خوێندکارانی سەرجەم قۆناغەکانی خوێندنی بەرایی و خوێندنی باڵا کە بە پارالێل یاخود ئێواران لە زانکۆکان و دامودەزگاکانی سەر بە وەزارەت دەخوێنن.
ئاماژەی بەوەشکراوە، بڕیارەکە بە لەبەرچاوگرتنی بەرژەوەندی گشتی و دۆخی دارایی خوێندکاران و داهاتی کەسوکار و خێزانەکانیان و دواکەوتنی موچەی موچەخۆران و شایستە داراییەکانیانە.
وەزارەتی خوێندنی باڵا دەشڵێت، پێویستە وەرگرتنی قیستەکان بخرێتە مانگەکانی داهاتوی ساڵی ئایندە، بەپێی خشتەیەکی رێکخراو کە رەچاوی بارودۆخی داهات و دارایی هاووڵاتیانی هەرێمی کوردستان بکات.
بەڕێوەبەرایەتی گشتی ئۆپراسیۆنەکانی ئاسایش رایگەیاند، دوو تیرۆرستی داعشیان لە سنووری بانی مەقان دەستگیر کردووە.
بەڕێوەبەرایەتی گشتی ئۆپراسیۆنەکانی ئاسایش راگەیانراوێکی بڵاوکردەوە و تیایدا هاتووە، لەسەر بنەمای زانیاری و زانیاری هەواڵگری، شەوی ٢ـی ئەم مانگە، دوو تیرۆریستی داواکراویان دەستگیر کردووە، کە لەلایەن دەزگای ئاسایشی نیشتمانی عێراقەوە داواکرابوو.
ئەوەش هاتووە، هەردوو تیرۆرستەکە بە ناوەکانی (م.ا.ح) و (ع.ا.ح) بە ماددەی ٤ ـی تیرۆر داواکراون لە دادگاکانی عێراق، کە لە رابردوودا چەکداری داعش بوون و بەشداری چەند کردەیەکی تیرۆریستان کردووە.
ئاسایشی سلێمانی ئاماژەی بەوەشکردووە، ئەو دوو تیرۆرستە بە مەبەستی خۆحەشاردان روویان لە سنووری (بانی مەقان) کردبوو و دوای دەستگیرکردنیان، لە ئێستادا بە ماددەی چواری تیرۆر راگیراون.
لە ساڵی ٢٠١٧دا کۆتاییهاتنی داعش لە عێراق راگەیەنرا، لە ئێستادا دوای حەوت ساڵ و زیاتر، هێشتا ئەو گروپە بنبڕ نەبوون و لەو ناوچانەی نێوان عێراق و هەرێم کە بۆشایی ئەمنی هەیە، شانەی نووستوویان هەیە.
لیژنەی ئەمنی سلێمانی روونکردنەوەیەکی بڵاوکردووەتەوە و تێیدا هاتووە، "گۆڕانكاری لە بڕیاری دەستبەسەرداگرتن و قەدەغەكردنی ئۆتۆمبێلی بێسەرەتا نەكراوە و كۆتایی بە پاشاگەردانی و یاساشكێنی دەهێنین".
دەقی روونکردنەوەکە
روونکردنەوەیەک لە لێژنەی ئەمنی سلێمانی
بۆ ڕای گشتی
لە چەند پەیج و ماڵپەر و کەناڵێکی راگەیاندن ھەواڵێکی ناڕاست و بەمەبەست وچەواشەکارانە بڵاو کراوەتەوە کە گۆڕانکاری بەسەر بڕیاری دەستبەسەرا گرتن و قەدەغە کردنی ئۆتۆمبێلە بێ سەرەتاکان کراوە ، یاخود بڕیارەکە گۆرانگاری بەسەر ھاتووە و ھەموو جۆرە ئۆتۆمبێلێکی بێ سەرەتا ناگرێتەوە .
ئێمە وەک لیژنەی ئەمنی سلێمانی و بۆ ھەموو لاێکی رادەگەێنین کە ئەم ھەواڵە دوورە لە راستییەوە و بەھیچ جۆرێک ھیچ پاشگەز بونەوە و گۆرانگاری بەسەر بڕیارەکەمان نەھاتووە چونکە بڕیارێکی سەرپێیی نەبووە و زۆر بەووردی دیراسە کراوە و کۆدەنگی و ھەماھەنگی سەرجەم لاێنەپەیوەندیدارەکانی لەسەرە وبەتەواوی نییەتمانە کۆتایی بە پاشاگەردانی ویاساشکێنی وشێواندنی سیمای شارستانی و ئارامی شاری سلێمانی پایتەختی رۆشنبیرین ، و زۆر جدی و سوورین لەسەر جێ بەجێ کردنی ھەر بڕیارێک دەبین کە بڕیاری لەبارەوە بدەین .
وەزیری کارەبای حکومەتی هەرێمی کوردستان باس لە بارودۆخی کارەبا دەکات و دەڵێت، "لە مانگی ١١ دا،زیاتر لە ١٦ سەعات کارەبای نیشتمانیمان دابینکردووە".
د. کەمال محەمەد وەزیری کارەبای حکومەتی هەرێمی کوردستان لە کۆنگرەیەکی رۆژنامەوانیدا رایگەیاند، "لە مانگی ١١دا، ١٦ سەعات و ٢٠ خولەک کارەبای نیشتمانیمان دابینکردووە".
ئاماژە بەوەدا، "لەم چەند رۆژەدا بەکارهێنەرانی کارەبا زیادیکردووە، بۆیە هەشت تا دە سەعات کارەبامان دابینکردووە و هەندێک جاریش لەنێوان شارەکاندا کاتەکەی گۆڕانکاری تێدایە".
لە ئەمڕۆوە تۆماری بایۆمەتری و دابەشكردنی كارتی دەنگدەران لە هەرێمی كوردستان دەستیپێكردەوە.
جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عیراق بە كوردسات نیوزی راگەیاند، لە ئەمڕۆوە تۆماری بایۆمەتری و دابەشكردنی كارتی دەنگدان لە سەرتاسەری هەرێمی كوردستان دەستیپێكردووە.
وتیشی، ئەو دەنگدەرانەی كێشەی پەنجەمۆریان هەیە، پەنجەمۆریان لێوەردەگیرێت و بۆ كارتی بایۆمەترییەكەیان زیاددەكرێت.
ئەوەش لەدوای ئەوەدێت، رۆژی ١٥ـی تشرینی یەكەمی ئەمساڵ، پڕۆسەی تۆماری بایۆمەتری و دابەشكردنی كارتی دەنگدان بەهۆی بەڕێوەچوونی هەڵبژاردنی خولی شەشەمی پەرلەمانی كوردستان، لە سەرتاسەری هەرێمی كوردستان راگیرا.
ئەنجومەنی سەربازی دێرەزوور لەژێر ناوی گەڕاندنەوەی حەوت گوند، ئامادەكاری دەكات بۆ ئۆپراسیۆنێكی بەرفراوان لە رۆژهەڵاتی شارەكە.
لە بەیاننامەیەكدا ئەنجومەنی سەربازی دێرەزور بەرپرسیارێتی خۆی لە پاراستنی گوندەكانی ڕۆژهەڵاتی دێرەزۆر ڕادەگەیەنێت ئەوەش بە لەبەرچاوگرتنی دۆخی ئەمنی كە لە ئەنجامی ڕووداوەكانی ئەم دواییەی ڕۆژئاوای سوریا هاتووەتە ئاراوە.
ئەنجومەنەكە دەڵێت، مەترسیی جددی پەیوەست بە جوڵەی شانەكانی سەر بە داعش بۆ كۆنترۆڵكردنی ناوچە نەپارێزراوەكان دروستبووە بەت ایبەتی لە باكور و ڕۆژهەڵاتی دێرەزۆر.
دووپاتیشكردووەتەوە، هێزەكانیان بەرپرسیارن لە پاراستنی خەڵكی گوندەكانی حسێنییە و ساڵحییە و حتە و مەڕات و مەزڵوم و خشام و تابیە و گەڕاندنەوەیان بۆ ژێر دەسەڵاتی هەسەدە كە ئێستا لەژێر كۆنترۆڵی رژێمدان.
دووپاتیكردووەتەوە كە هاتنەناوەوەی هێزەكانیان بۆ ناو ئەو حەوت گوندە لە وەڵامی بانگەوازی خۆیان دێت، ئەمەش دوای زیادبوونی مەترسییەكانی داعش بۆ سەریان.
ئەنجومەنی سوریای دیموكرات "مەسەدە" رایگەیاند، بۆ چارەسەركردنی شەڕ و ئاڵۆزییەكان ئامادەن لەگەڵ توركیا و هەموو لایەنەكان گفتوگۆ بكات.
لە بەیاننامەیەكدا مەسەدە داوای لە كۆمەڵگەی نێودەوڵەتی كردووە فشار لە هەموو لایەنە پەیوەندیدارەكانی سوریا بكات، شەڕ بوەستێنن و پرۆسەی سیاسی بە بەشداری هەموو لایەنەكان دەستپێبكرێت.
دەربارەی ڕەوشی كۆچبەرانی هەرێمی شەهبا داوای لە نەتەوە یەكگرتووەكان و ئەنجوومەنی ئاسایش كردووە دەستوەردانی پەلەبكەن، خەڵكی مەدەنی و پێكهاتەكان لە شەڕ و قڕكردن و كۆچ بپارێزن.
داواشی لە هاوپەیمانی نێودەوڵەتی كردووە پشتگیری هەسەدە بكات و هەماهەنگی لەنێوان هێزەكانی عیراق و هەسەدە دروستبكات.
هەروەها ئامادەیی نیشانداوە لەگەڵ توركیا و هەموو لایەنەكان دیالۆگ بكات و بڕیاری ژمارە ٢٢٥٤ی نەتەوە یەكگرتووەكان جێبەجێبكرێت.
حكومەتی عیراق موچەی چاودێری كۆمەڵایەتی هەزاران كوردی دانیشتووی كەركوك و ناوچە جێناكۆكەكانی راگرتووە بە پاساوی ئەوەی ئەو موچەخۆرانە شەش مانگ لەسەریەك موچەكانیان لە هەرێمی كوردستان وەرگرتووە.
پەیامنێری كوردسات نیوز رایگەیاند، حكومەتی عیراق موچەی چاودێری كۆمەڵایەتی هەزاران كوردی دانیشتووی كەركوك و ناوچە جێناكۆكەكانی راگرتووە.
ئەوەشی خستەڕوو، پاساوی حكومەتی عیراق بۆ راگرتنی موچەی چاودێری كۆمەڵایەتی ئەو كوردانە ئەوەیە، شەش مانگ لەسەریەك موچەكانیان لەڕێی هەژماری بانكییەوە لە نوسینگەكانی دراو لە هەرێمی كوردستان وەرگرتووە، حكومەتی عیراقیش بە پشتبەستن بە شوێنی وەرگرتنی موچەكانیان، ئەو موچەخۆرانی بە دانیشتووی هەرێم هەژماركردووە و موچەكانیانی بڕیووە، لەبەرئەوەی موچەی چاودێری كۆمەڵایەتی هاووڵاتیانی هەرێمی كوردستان ناگرێتەوە.
بەگوێرەی بەدواداچوونێكی كوردسات نیوز، ئەو كەسانەی موچەی چاودێرییان لەلایەن حكومەتی عیراق راگیراوە دەیانەوێت موچەكانیان بەردەوامی هەبێت، دەبێت سەردانی یەكەیەكی چاودێری كۆمەڵایەتی بكەن و ئەستۆپاكی بدەن كە خاوەنی خانوو و ئۆتۆمبێل و موچەی دیكە نین و داواش بكەن پێداچوونەوە بەو بڕیارە بكرێت، تاكو بەغداد دابەشكردنی موچەكانیان دەستپێبكاتەوە.