هەواڵەکان
وەزارەتی بارزگانیی عێراق ئاماژەی بەوەکردووە، ئەو ماددە خۆراکیانەی پێشنیارکرابوو بۆ بەشەخۆراکی ھاووڵاتیان زیاد بکرێن، بە کوالیەتییەکی بەرز دابینکراون و لەگەڵ بەشەخۆراکی مانگانەدا دابەش دەکرێن.
ماددە خۆراکییەکانیش پێکھاتوون لە "دۆشاوی تەماتە و فاسۆلیا و نۆک و پاقلە و ڕۆن"
نەتەوە یەکگرتووەکان بڕیاری گەیاندنی ھاوکاری مرۆیی بۆ سوریا لە ڕێگای دەروازەی "باب ئەلھەوا" لە جیاتی "تەل کۆچەر" پەسەند کرد. لیندا توماس نوینەری ئەمریکا لە ئەنجومەنی ئاسایش ڕایگەیاند واشنتون و موسکۆ لە بارەی گەیاندنی ھاوکاریەکان بۆ سوریا ڕێککەوتوون.
بە پێی بڕیارەکەی ئەنجومەنی ئاسایشی نێوەدەولەتی، ھاوکارییە مرۆییەکان لە ڕێگای "باب ئەلھەوا" کە لە ژێر کۆنترۆلی دەستەی "تەحریر ئەلشام"ی نزیک لە تورکیایە ڕەوانەی ئەو وڵاتە دەکرێن.
لە کاردانەوەی ئەو بڕیارەش، "سیھانوک دیبو" ئەندامی دەستەی سەرۆکایەتی ئەنجومەنی سوریای دیموکرات ڕایگەیاند، بڕیاری داخستنی دەروازەی "تەل کۆچەر" و گەیاندنی ھاوکاری نێودەولەتی تەنھا لە ڕێگەی دەروازەی "باب ئەلھەوا" سزادانی ٥ ملیۆن کەسە لە باکور و خۆرھەلاتی سوریا.
کازمی لە سەردانێکدا بۆ وەزارەتی کارەبا ڕایگەیاند، تیرۆریستان لە ھەوڵەکانیان بەردەوامن بۆ پەکخستنی ژیان لە عێراق و ھەندێ ھێزی وەھمی ھەوڵدەدەن عێراق نەگاتە ئاستی خودبژێوی لە غاز و وزە.
جەختیشی کردەوە، بەردەوامی کردنە ئامانجی کەرتی کارەبا ھەوڵێکە بۆ پەکخستنی سیستمی ووزە، لەگەڵ ئەوەشدا کۆڵ نادەن و لە پەرەپێدانی کەرتی کارەبا لە ڕێگەی فرە کردنی سەرچاوەکانی وزە بەردەوام دەبن.
کازمی ئاماژەی بەوەشکرد، لە ساڵی ٢٠٠٣ەوە ٨٠ ملیار دۆلار بۆ کەرتی کارەبا خەرجکراوە و گەندەڵی بووەتە ئاستەنگییەکی گەورە لە بەردەم دابینکردنی کارەبای بەردەوام بۆ ھاوڵاتیان.
سەرۆک وەزیرانی عێراق ڕاشیگەیاند، ڕێگەنادەن کەرتی کارەبا ببێتە بابەتێک بۆ ململانێی سیاسی و ھەڵبژاردن، ئەوانەشی ھەوڵدەدەن بەرپرسیاریەتی قەیرانەکە بخەنە ئەستۆی حکومەتی ئێستا پێویستە بەخۆیاندا بچنەوە.
لە راگەیەندراوێکی حکومەتی ھەرێمی کوردستاندا ھاتووە، رۆژی ١٤ی تەموز بە بۆنەی ڕۆژی ڕاگەیاندنی دامەزراندنی کۆماری عێراق، لە دەزگا و دامەزراوەکانی ھەرێمی کوردستان پشووی رەسمی دەبێت.
باسلەوەشکراوە، ئەوەش بە پێی بڕیاری پەرلەمان و حکومەت، کە رۆژی ١٤ مانگ دەکاتە رۆژی چوارشەمە.
بەپێی راگەیەندراوێکی وەزارەتی دارایی و ئابووری رۆژی یەک شەممە ١١ی تەموزی ٢٠٢١ مووچەی وەزارەتەکانی خوێندنی باڵا و توێژینەوەی زانستی، وەزارەتی کارەبا، وەزارەتی شارەوانی و گەشتوگوزار بە میکانیزمی لێبڕینی ٢١٪ دابەشدەکرێت.
ھەروەھا رۆژی دوو شەممە ١٢ی تەموزی ٢٠٢١ مووچەی وەزارەتەکانی رۆشنبیری و لاوان، کشتوکاڵ و سەرچاوەکانی ئاو، ئاوەدانکردنەوە و نیشتەجێکردن، لەگەڵ سەرۆکایەتیی ھەرێمی کوردستان، ئەنجوومەنی وەزیران، سەرۆکایەتیی پەرلەمان، خانەنشینی پێشمەرگە دابەشدەکرێت.
وەزارەتی دارایی ئاماژەی وەشکردووە، رۆژی سێ شەممە ١٣ی تەمموزی ٢٠٢١ مووچەی خانەنشینانی شارستانی دابەشبکرێت.
بەشی شوێنەوار لە زانکۆی سلێمانی لەبارەی بەرنامەکەوە رایگەیاندووە، بەرنامەی زاگرۆسی دێرین بەرنامەیەکی دۆکیۆمێنتاری زانستی ناوازەی شوێنەوارناسی، مێژوویی، شارستانییە، تایبەتە بە شارستانیەتی کوردستان و شوێنەوارەکانی.
راشیگەیاندووە، بەرنامەکە لەلایەن پ.ی.د.دڵشاد عەزیز مارف مامۆستای بەشەکەیان ئامادە و پێشکەشدەکرێت و بۆ ھەر بەرنامەیەکیش بەشێک لەمامۆستایانی بەشەکەیان بەشداری دەکەن بۆ باسکردن لە بابەتەکانی.
دەشڵێت، بەرنامەکە کارێکی ناوازەیە و بۆیەکەم جارە بەو ئاستە زانستییە بەرنامەی دۆکیۆمێنتاری لەسەر شوێنەوارەکانی کوردستان ئامادەبکرێت.
ھەروەھا بەشی شوێنەواری زانکۆی سلێمانی دەستخۆشی لە کەناڵی کوردسات و ئامادەکاری بەرنامەی دۆکیۆمێنتاری زاگرۆسی دێرین دەکات.
بەرنامەی دۆکیۆمێنتاری زاگرۆسی دێرین تایبەتە شوێنەوار و شارستانییەتی کوردستان و لە کەناڵی کوردسات نیوز پەخشدەکرێت.
لە رێگەی ئەم لینکەوە دەتوانن بینەری بەرنامەی دۆکیۆمێنتاری زاگرۆسی دێرین بن
ئازاد مستەفا بەڕێوەری ئاوی چۆمان بە کوردسات نیوزی ڕایگەیاند، ئێوارەی ھەینی چەند گەشتیارێک بۆ وێنەگرتن و خۆفێنک کردنەوە دەستکاری قفڵێکی سەرچاوەی ئاوی چۆمانیان لە کوێستانی پرژێ کردووە و دواتریش نەیانتوانیوە چاکیبکەنەوە، بەو ھۆیەوە زیاتر لە ٢٠ سەعات قەزای چۆمان و نۆ گوند و ئاوایی سنورەکە بێ ئاو بوون.
وتیشی، لە بەیانی ئەمڕۆوە تیمەکانمان سەرقاڵی چاککردنەوە بوون و توانیان ئاو بۆ قەزاکە بگەڕێننەوە.
بەڕێوەبەری ئاوی چۆمان داوا لە گەشتیاران دەکات لەکاتی سەردانی ناوچە گەشتیارییەکان دەستکاری پڕۆژەکانی ئاوە نەکەن.
پرژێ ناوچەیەکی کوێستانییە و چوار وەرزی ساڵ بەفری تێدا دەمێنێتەوە و ھاوڵاتیان بۆ گەشت و سەیران سەردانی ناوچەکە دەکەن و بەدووری ١٢ کیلۆمەتر دەکەوێتە باکوری خۆرھەڵاتی قەزای چۆمان.
فارس عیسا، سەرۆکی نوێنەرایەتیی حکومەتی ھەرێمی کوردستان لە بەغداد بە کوردسات نیوز رایگەیاند، ناردنی ٢٠٠ ملیار دینارەکەی پشکی ھەرێمی کوردستان لەلایەن حکومەتی فیدراڵییەوە بە بڕیاری ئەنجومەنی وەزیرانە و چاوەڕواندەکەن لە داھاتوویەکی نزیکدا پارەکە رەوانەی ھەرێمی کوردستان بکرێت.
وتیشی، دەنگۆی راگرتنی ٢٠٠ ملیارەکە بەھۆی قەرزاربوونی ھەرێمەوە راست نیە و تاوەکو ئێستا لیژنەی چاودێری دارایی ھەردوو حکومەتی فیدراڵی و حکومەتی ھەرێم بەردەوامن لە وردبینیکردن و کۆبوونەوەکانیان و ئەنجامی کۆتایی کۆبوونەوەکانیان رانەگەیەنراوە.
دڵپاک تاھیر لێپرسراوی میحوەری سلێمانی بۆ ھەڵبژاردنەکان دەڵێت، لەسنووری پارێزگای سلێمانی ژمارەیەکی بەرچاو لە ھاوڵاتی کەرکوک نیشتەجێن، لەئیستادا لەناو یەکێتی و فەرمانگەکان خزمەت دەکەن بۆ ئەو مەبەستە و جێبەجێکرنی ئەرکەکانیان و دانانی پلان و بەرنامە بۆ ھەڵبژاردنی ئەنجومەنی نوێنەرانی عێراق و بەھێزکردنی دەنگی کورد لەگەڵ بەشێک لەو کەسانە کۆبونەوە.
دەقی پرسەنامەکە...
بەڕێزان لە بنەماڵەی شەھیدی فەرماندە لیوا سەڵاح دیلمانی
بەبۆنەی کۆچی دوایی ، مام حاجی ئیبراھیم دیلمانی کەسایەتی دیاری ناوچەی باڵەکایەتی و باوکی شەھیدی فەرماندە لیوا سەڵاح دیلمانی پرسەو ھاوخەمی قوڵی خۆمان رادەگەیەنین
مام حاجی ئیبراھیم کەسایەتی و تێکۆشەری دێرینی ناوچەی باڵەکایەتی بوو کەبەھۆی بەشدارییان لە خەباتی کوردایەتی قوربانی زۆریاندا .بۆیە لەدەستدانی تێکۆشەرێکی وەھا کە دوو رۆڵەی بەخشیوە بە شۆڕشی نوێ و خەباتی گەلەکەی جێی داخە،و لەخوای گەورە داواکارین گیانی کۆچکردوو بەبەھەشتی بەرینی خۆی شاد بکات .
بافڵ تاڵەبانی
زیندانیانی سیاسی یەکێتی و گۆڕان بۆ تاوتوێکردنی کێشە و گرفتی زیندانیانی سیاسی کۆبوونەوەو ھەڵوێستی خۆشیان سەبارەت بە پرسی ھەڵبژاردنی ئەنجومەنی نوێنەرانی عێراق راگەیاندو بەڵێنیاندا کاری جدی بکەن بۆ سەرخستنی ھاوپەیمانی کوردستان، دواتریش سەردانی رێکخەری گشتی بزتنەوەی گۆڕانیان کرد، لەکۆتایشدا تاجە گوڵینەی رێز و وەفایان لەسەر مەزاری سەرۆک مام جەلال و نەوشیروان مستەفا دانا.
دەقی پرسەنامەکە...
بەڕێزان خێزان و خانەوادەی کۆچکردوو کوێخا حاجی ئیبراھیم دیلمانی
بە بیستنی ھەواڵی کۆچی دوایی کوێخا حاجی ئیبراھیم دیلمانی دڵگران و نیگەران بووین. بەم بۆنە خەمناکەوە پرسە و سەرەخۆشیتان ئاڕاستە دەکەم و خۆم بە ھاوبەشی خەمتانم دەزانم.
کوێخا حاجی ئیبراھیم دیلمانی کەسایەتی شۆڕشگێڕ و ناسراوی ناوچەی باڵەکایەتی و باوکی شەھیدی فەرماندە لیوا سەڵاح دیلمانی بوو، کۆچکردنی جێگای داخێکی گەورەیە.
جێگای کۆچکردوو کوێخا حاجی ئیبراھیم دیلمانی بەھەشتی بەرین بێت، خوای گەورە سەبوری و دڵنەوایی بەخۆتان و خانەوادە تێکۆشەرەکەتان و ھەموو لایەک ببەخشێت.
انا للە وانا الیە راجعون
قوباد تاڵەبانی
جێگری سەرۆکی ئەنجومەنی وەزیران
ھیوا عەلی بەڕێوەبەری راگەیاندنی وەزارەتی کشتوکاڵ بە کوردسات نیوزی راگەیاند، لە چوارچێوەی پرۆسەی بە بازاڕکردن و کڕینەوەی گەنمی جوتیاران لەنێوان ھەردوو کۆمپانیای قەیوان و خۆشناو لەگەڵ وەزارەتی کشتوکاڵ کراوە، رۆژی یەکشەممە پرۆسەی دابەشکردنی چەکی پارەی جوتیاران لەلایەن گروپی کۆمپانیاکانی قەیوان بەڕێوەدەچێت.
وتیشی، رۆژی دوو شەممەش دابەشکردنی پارەی گەنمی جوتیاران لە گەرمیان بەڕێوەدەچێت.
بەھمەن مورادنیا پارێزگاری سنە رایگەیند،٢٩ی ئەم مانگە ھێڵی شەمەندەفەری نێوان سنە - ھەمەدان لەلایەن سەرۆک کۆماری ئێرانەوە دەکرێتەوە کە پارێزگای سنە دەبەستێتەوە بە تارانەوە.
رونیشیکردەوە، لێکۆڵینەوەو ھەڵسەنگاندنەکان بۆ راکێشانی ھێڵی شەمەندەفەری سنە - باشماخ دەستی پێکردوەو ئەگەر بەرپرسانی ھەرێم ئامادەبن، لەگەڵ وەزیری رێگەوبانی ئێران سەردانی ھەرێمی کوردستان دەکەن بۆ گەیشتن بە رێککەوتن سەبارەت بە جێبەجێکردنی پرۆژەی راکێشانی ھێڵی ئاسنی سنە- باشماخ- سلێمانی.
ناوەندی راگەیاندنی ئەنجومەنی سەربازی مەنبەج راگەیاندووە، گروپە چەکدارەکانی سەر بە تورکیا لە گوندی قیرات و یاشلی لە باکوری مەنبەجەوە ھێرشیان کردووەتە سەر گوندی جات و ئوم عەدەسە و زیانێکی زۆر بەر ماڵ و حاڵی ھاوڵاتیان کەوتووە.
شەرڤان دەرویش وتەبێژی ئەنجومەنی سەربازی مەنبەج رایگەیاندوە، تورکیا ھەوڵدەدات رووبەری زیاتر لە ناوی خاک سوریا داگیر بکات و ئەوەش بەبێ رەزامەندی وڵاتانی خاوەن ھەژموون ناکرێت.
مەھدی رەشید وەزیری سەرچاوەکانی عێراق لە کۆنفرانسێکی رۆژنامەوانیدا لە دیالە راگەیاند، ئێران ھیچ ھەماھەنگییەکیان لەگەڵ ناکات و بەردەوامە لە گرتنەوەی ئاوی ئەو رووبارانەی دەرژێنە ناو خاکی عێراق ئەوەش زیانی گەورەی بە دانیشتوانی پارێزگای دیالە گەیاندوە، بەو پێیەی بەشێوەیەکی سەرەکی پشت بە ئاوی ئەو رووبارانە دەبەستن لە ئێرانەوە ھاتوون.
جەختیشی کردەوە، ئەگەر ئێران بەردەوام بێت لەگرتنەوەی ئاوی رووبارەکان و رێککەوتنەکان لەبارەی دابەشکردنی ئاو جێبەجێنەکات ناچار دەبن بۆ بەدەستھێنانی مافەکانیان پەنا بۆ کۆمەڵگەی نێودەوڵەتی ببەن.
وەزیری سەرچاوەکانی عێراق راشیگەیاند، بەرپرسانی ئێران لەمانگی رابردوودا بە پاساوی بەڕێوەچوونی ھەڵبژاردن لە وڵاتەکەیان، ئەنجامدانی کۆبوونەوەیەکیان لەسەر پرسی ئاو رەتکردەوە و بەڵێنیاندا دوای ھەڵبژاردن کۆبوونەوەکە بکەن، بەڵام تێستا بەڵێنەکەیان جێبەجێنەکردووە.