سامان بەرزنجی وەزیری تەندروستی ھەرێم رایگەیاندوە، پڕۆسەی پێدانی ڤاکسین بەرەوپێشچوونی بەخۆوە بینیوە، زیاتر لە ٣٩٩ ھەزار ژەمە ڤاکسینی دژە ڤایرۆسی کۆڕۆنا لەلایەن دانیشتوانی ھەرێمی کوردستان وەرگیراوە، لەوانە زیاتر لە ٢٥٥ ھەزار ھاوڵاتی کە دەکاتە ڕێژەی لەسەدا (٧.٨%)ی ئامانج ژەمی یەکەم و زیاتر لە ١٤٤ ھەزار ھاوڵاتی کە دەکاتە ڕێژەی لەسەدا (٤.٤%) ی ئامانج ژەمی دووەمی ڤاکسینی دژەڤایرۆسی کۆڕۆنای وەرگرتووە.
ڕاشیگەیاندوە، بۆیەکەمجارە لەلایەن وەزارەتی تەندروستی کیت و پێداویستی تایبەت بە دەستنیشانکردنی زنجیرەی نوێی ڤایرۆسی کۆڕۆنای ناسراو بە (زنجیرەی دەلتا) لە ھەرێمی کوردستان دابینکرا.
وەزیری تەندروستی پێشبینی شەپۆلی سێیەم و ئەگەر و گومانی بڵاوبوونەوەی جۆر و زنجیرەی نوێی ڤایرۆسی کۆڕۆنا دەکات و  نیگەرانیشی دەربڕیوە لەوەی جارێکی دیکە ژمارە و ڕێژەی تووشبووان و نووستن لە نەخۆشخانەکان بەھۆی ڤایرۆسی کۆڕۆنا زیادبووە و دووھێندی ھەفتەکانی پێشووە. 

لیۆن شارڵ بەڕێوەبەری گشتی پۆلیسی ھایتی رایگەیاند، ٢٨ کۆماندۆسن کە ٢٦ کەسیان بە رەگەز کۆڵۆمبین و دوو کەسی تریان ئەمریکی و ھایتیین  تێوەگلاون لە کوشتنی سەرۆکی وڵاتەکە، ئاماژەی بەوەشکرد، پۆلیس ١٧ لەو تۆمەتبارانەی دەستگیرکردووە، کە تەمەنیان لە نێوان ٣٥ بۆ ٥٥ ساڵدایە و لەمیانی پڕۆسەی دەستگیرکردنیشیاندا سێ کەسیان کوژراون و ھەشت کەسیان ھەڵاتوون.
ئەو رووداوانە لە کاتێکدایە، رۆژی چوار شەممە "جۆفینێل موویس" سەرۆکی ھایتی لە ماڵەکەی خۆیدا کوژرا.

(ئەردۆغان) رایگەیاند: سوورن لەسەر ئۆپراسیۆنە سەربازییەکان لە دەرەوەی سنور  بۆ پاراستنی بەرژەوەندییەکانی تورکیا، ئاماژەی بۆ ئەوەکرد" بەناو دۆستەکانی تورکیا ھەموو کارێکیان کرد بۆ ئەوەی پێگەی حکومەتی ئەنقەرە لاواز بکەن.
بەوتەی ئەردۆغان،  ئەو چەکانەی کە تورکیا داوایکرد و بە چەندین بیانوو رەتکرانەوە، بە ناوی جەنگی داعشەوە لەرێگەی ھەزاران بارھەڵگرەوە پێشکەش بە ھێزەکانی سوریای دیموکرات کرا.

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان  ١٠٠٧ کەسی تر تووشی ڤایرۆسی کۆرۆنا بوون و سێ تووشبووی تری کۆرۆنا گیانیان لە دەستدا و ٧٩٨ تووشبووی تری ڤایرۆسەکەش چاکبوونەتەوە.

"بەیار محێدین" بەڕێوەبەری بەرگری شارستانی سۆران بە کوردسات نیوزی ڕاگەیاند، گەنجێکی تەمەن ٢٠ ساڵ کە بە مەبەستی گەشتیاری سەردانی گەلی عەلی بەگی کرد بوو لە ئاوی ڕووبارەکەدا خنکا.
ڕوونیشیکردەوە، گەنجەکە دانیشتووی ناحیەی شاوێستەی سنووری ھەولێرە و خەڵکی ڕۆژئاڤای کوردستانە.

بە پێ ئاماری بەرگری شارستانی سۆران، لە ماوەی حەوت مانگی سەرەتای ئەمساڵدا ھەشت کەس لە سنوری قەزای سۆران لە ئاودا خنکاون، ئەوەش بەرزترین ئامارە لە سەر ئاستی ناوچەکانی ھەرێمی کوردستان.

سەرۆکایەتی کۆماری میسڕ جگە لە پشتڕاستکردنەوەی ھەواڵەکە ڕایگەیاند، بە ڕێوڕەسمێکی سەربازی (جیھان سادات)، بە خاک دەسپێردرێت.

(جیھان سادات) لە ساڵی ١٩٣٣، لە باوکێکی میسڕی و دایکێکی بەریتانی لە شاری قاھیرە لەدایکبووە و لە تەمەنی شانزە ساڵی و لە ساڵی ١٩٤٩ ژیانی ھاوسەری لەگەڵ ئەنوەر سادات پێکھێناوە.

(جیھان سادات) ھاندەرێکی سەرەکی ھاوسەرەکەی بووە، بۆ ئیمزاکردنی ڕێککەوتنی ئاشتی لەگەڵ ئیسڕائیل و شاھێدی ڕێککەوتنی ساڵی ١٩٧٩ بووە بۆ ڕاگرتنی جەنگی عەرەب - ئیسڕائیل.

ھەروەھا ھەموارکردنەوەی یاسای باری کەسیەتی لە میسڕ و جێگیرکردنی خەرجی (ژن و منداڵ) لە دوای جیابوونەوە بە پێی یاسا، بە دەستکەوتی (جیھان سادات) ناو دەبرێت، کە دواتریش لە عێراق و چەند ولاتێکی تری عەرەبی جێبەجێکرا.

بەرپرسانی بەرگری شارستانی لە شاری دەکا، ڕایانگەیاندووە، ئاگرەکە لە باڵەخانەیەکی شەش نھۆمی کارگەیەکی خواردن و خواردنەوەکان لە دەرەوەی "دەکا"ی پایتەخت کەوتووەتەوە و بەھۆیەوە ٥٢ کەس گیانیان لە دەستداوە.