سوپای پاسداران هۆشداری دەداتە سەرۆكی ئەمریكا رایگەیاند هەر هێرشێكی نوێ بۆ سەر ئێران لێكەوتەی توندی  دەبێت.
عەمید حسێن میحبی، وتەبێژی سوپای پاسدارانی ئێران، لە لێدوانێكیدا رایگەیاند، ئامادەیی سەربازیی ئەمریكا لە ناوچەی كەنداو بە شێوەیەكی بەرچاو كەمی كردووە.

راشیگەیاند: ئەمریكا خاوەنی 30 بۆ 40 كەشتیی جەنگی بوو لە ناوچەكەدا، بەڵام رەوشی سەربازیی ئەمریكا لە كەنداو گۆڕانكارییەكی بەرچاوی بەخۆیەوە بینیوە.

ئەو فەرماندەیەی سوپای پاسداران هۆشداریدا، هەر هەڕەشەیەكی نوێ بۆ سەر ئێران لێكەوتەی زۆر بەرفراوانی دەبێت و سەدان هەزار میل هێڵی گواستنەوەی وزە، هەزاران وێستگەی بەرهەمهێنانی كارەبا، هەموو سیستەمە ئەمریكییەكان، و تەنانەت ژێرخانی جیهانیی ئینتەرنێتیش رووبەڕووی هەڕەشە دەبنەوە.

ئاماژەی بەوەشكرد، كەمبوونەوەی توانای چەكداریی ئەمریكا لە زەریای هێمن و لە بەرانبەر روسیا و چیندا، مەترسییەكی گەورەیە بۆ سەر واشنتۆن دروستكردوە.

 

ئاژانسی رویترز لە زاری سەرچاوەیەکی باڵای ئێرانییەوە بڵاویکردەوە، هیچ دانوستانێک لەبارەی درێژکردنەوەی راگرتنی ئاگربەستی لە نێوان ئێران و ئەمریکادا نییە.

سەرچاوەکە ئاماژەی بەوە کردووە: لە روانگەی تارانەوە هیچ رێکەوتێک بۆ دەستپێکردنی ئاگربەست بوونی نییە، بۆیە دەستەواژەیەک نییە بە ناوی درێژکردنەوە، هەروەها روونیشیکردەوە کە ئەمریکا تەنها 48 سەعات دوای ئیمزا کردنی رێککەوتنە کاتییەکە پێشێلی کردووە و دوای چەند رۆژێکیش بە تەواوی لێی کشانوەتەوە.

سەرچاوە ئێرانییەکەنیش ئاماژەبەوەدەکەن: یەکێک لەو باباتانەی کە دانوستانی لەسەر دەکرێت، گەڕانەوەی ئەمریکایە بۆ یاداشتنامەی لێکتێگەیشتن و دیاریکردنی چوارچێوەیەکی کاتی بۆ جێبەجێکردنی پابەندبوونەکانی، جەختیشیان کردەوە کە تا ئێستا هیچ پێشکەوتنێک لەسەر ئەم دوو پرسە بەدەستنەهاتووە.

وەزارەتی پەروەردەی عیراق رایگەیاند، بۆ ساڵی خوێندنی (2026-2027) کە بڕیارە لە 20ی ئەیلوولی داهاتوو دەست پێبکات، نزیکەی ملیۆنێک و 200 هەزار خوێندکار پەیوەندی بە پۆلی یەکەمی سەرەتاییەوە دەکەن.

کەریم سەید، وتەبێژی وەزارەتی پەروەردە لە راگەیەندراوێکدا ئاماژەی بەوە کرد: ئەم ئامارە لەدایکبووانی ساڵی 2020 و مانگی کانوونی دووەمی ساڵی 2021 دەگرێتەوە، کە ژمارەکە نزیکە لە ئاماری ساڵی خوێندنی رابردوو.

وتەبێژی وەزارەت جەختیشی کردەوە، ئەم ژمارەیە یەکێکە لە بەرزترین ئامارەکانی تۆمارکردنی منداڵان لە پۆلی یەکەمی سەرەتایی لە مێژووی کۆماری عیراقدا لە ماوەی ساڵانی دواییدا.

مەفرەزەکانی نوسینگەی نەهێشتنی تاوانی راپەڕینی سەر بە بەشی پۆلیسی نەهێشتنی تاوانی سلێمانی، تۆمەتبارێکیان دەستگیرکرد کە بڕی 8 قاڵب زیوی دزیبوو (کە دەکاتە هەشت کیلۆگرام).

بەپێی راگەیەندراوێکی بەڕێوەبەرایەتی پۆلیسی پارێزگای سلێمانی، دەستگیرکردنی تۆمەتبارەکە دوای ئەوە هات کە هاوڵاتییەک سکاڵای لە نوسینگەی نەهێشتنی تاوانی راپەڕین تۆمارکرد بەوەی 8 قاڵب زیوی لێدزراوە.

دوای وەرگرتنی بڕیاری دادوەر و کۆکردنەوەی زانیاری پێویست، مەفرەزەکانی پۆلیس توانینیان تەنها لە ماوەی یەک کاتژمێردا دوای تۆمارکردنی سکاڵاکە تۆمەتبارەکە بدۆزنەوە و دەستگیری بکەن.

پۆلیسی سلێمانی ئاماژەی بەوەش کردووە، لە کاتی گەڕان و پشکنیندا توانراوە دەست بەسەر 5 قاڵب لەو زیوە دزراوەدا بگیڕێت.

تۆمەتبارەکە ناوی (ن، ح، ح)ە و لەدایکبووی ساڵی 1999یە، لە ئێستادا بەبڕیاری دادوەر و بەپێی ماددەی (444) لە یاسای سزادانی عیراقی راگیراوە و لێکۆڵینەوە لەگەڵیدا بەردەوامە.

بۆ یەكەمجار لە دوای ساڵی 2006ـەوە، دیاردەی خۆرگیرانی تەواو بەشێك لە ئەوروپا دەگرێتەوە، وڵاتانی ئیسپانیا و ئایسلەندا و دوورگەی گرینلاند دەبنە باشترین شوێن بۆ بینینی ئەم دیاردە  سروشتییە.

بەپێی پێشبینییە فەلەكییەكان، ئەمڕۆ سێبەری مانگ روو لە كیشوەری ئەوروپا دەكات، سەعات شەشی ئێوارە بەكاتی ناوەندی ئەوروپا  دیاردەی خۆرگیران لە ناوچە جەمسەرییەكانی باكووری روسیا و گرینلاندەوە دەستپێدەكات، ئایسلەندا یەكێك دەبێت لەو وڵاتانەی كە دیاردەكەی تێدا بە روونی دەردەكەوێت، بەڵام ئیسپانیا وەك ناوەندی سەرەكیی بینینی خۆرگیرانە تەواوەتییەكە دیاریكراوە و لە زۆربەی وڵاتانی تری وەك بەریتانیا، فەرەنسا و ئەڵمانیا دەبینرێت،  لە سەعات  هەشت و30 خولەكی شەویش بە كاتی ناوەندی ئەوروپا كۆتایی پێ دێت.

پسپۆڕانی گەردوونناسی ئاماژە بەوە دەكەن، كە ئەم خۆرگیرانە دەرفەتێكی گەورەیە بۆ زانایان تاوەكو لێكۆڵینەوە لە سەر بەرگەهەوای خۆر و كایەی موگناتیسییەكەی بكەن. 

 

وەزارەتی بەرگریی روسیا رایگەیاند كە سیستمەكانی بەرگریی ئاسمانیی وڵاتەكەیان توانیویانە لە شەوێكدا 502 فڕۆكەی بێفڕۆكەوانی ئۆكراینی تێكبشكێنن.

وەزارەتی بەرگریی روسیا بڵاویكردەوە، لە ماوەی شەوی رابردوودا سیستمەكانی بەرگریی ئاسمانیی وڵاتەكەی 502 درۆنی ئۆكرانیایان لەسەر خاكی رووسیا خستووەتە خوارەوە. 

بەپێی راپۆرتی وەزارەتەكە، ئەو درۆنانە لە ئاسمانی ناوچەكانی بێلگۆرۆد و دەریایی رەش و چەند ناوچەیەكی تر بەسەركەوتوویی تێكشكێنراون.

لێپرسراوانی ناوخۆیی روسیا رایانگەیاند لە ئەنجامی ئەو هێرشانەدا منداڵێكی تەمەن 8 ساڵ و پیاوێك كوژراون و 8كەسی تریش بریندار بوون، هەروەها جەختی كردەوە كە ناوچەكەیان رووبەڕووی فشارێكی زۆری هێرشە درۆنییەكان بووەتەوە.

 

ئەنجومەنی وەزیرانی عیراق بەرنامەی كاری حكومەتی ساڵی 2026بۆ2029 پەسەند كرد و رەوانەی ئەنجومەنی نوێنەرانی كرد.

لە كۆبوونەوەیەكی ئاسایی ئەنجومەنی وەزیرانی عیراقدا، بەرنامەی كاری حكومەت بۆ ساڵانی 2026 تا 2029 پەسەند كرا و بۆ پەسەندكردنی كۆتایی رەوانەی ئەنجومەنی نوێنەران كراوە، كە 139 كاری لەپێشینە لەخۆدەگرێت وبەسەر 14 كەرتی سەرەكی دابەشكراوە.

دیارترین كارەكانی حكومەتیش لەو ماوەیەدا، پتەوكردنی سەروەری دەوڵەت و چاكسازی ئابوری و پیشەسازی و دامەزراوەیی و روبەڕوبوونەوەی گەندەڵی لەخۆدەگرێت، هەروەها خزمەتگوزاری تەندروستی و پەیوەندی و تەكنەلۆژیا و گەنجان و وەرزش و سیاسەتی دەرەوە و وزە و كشتوكاڵ و ئاو و ژینگە و پەروەردە، لەگەڵ روبەڕوبوونەوەی هەژاری و مافی ژنان و منداڵان  وەك كاری لەپێشینەی حكومەت لەوەماوەیەدا ئاماژەیان پێكراوە

 

كۆمیسیۆنی باڵای نەتەوە یەكگرتووەكان بۆ كاروباری پەنابەران رایدەگەیەنێت، زیاتر لە 434 هەزار پەنابەر و داواكاری مافی پەنابەری لە عیراق نیشتەجێن، كە زۆربەیان لە هەرێمی كوردستان. 

بەپێی ئامارەكانی كۆمیسیۆنەكە، نزیكەی 80%ی پەنابەرەكان لە هەرێمی كوردستانن، بەشێوەیەك زۆرترین پەنابەران لە هەولێرن كە 42%ی پەنابەرانی عیراق پێكدەهێنن، هەروەها 26%یان لە دهۆكن، كەمترین پەنابەریش لە شاری سلێمانین كە 11% پێكدەهێنن.

نەتەوە یەكگرتووەكان ئاشكرای كردووە، 88%ی پەنابەرەكان سوریین و ئەوانەی تر ئێرانی و فەلەستینی و توركی و خەڵكی وڵاتانی ترن.

 

پەیامنێری کوردسات نیوز رایگەیاند، بەرەبەیانی ئەمڕۆ نزیک کاتژمێر 6:00، زنجیرەیەک هێرشی فڕۆکەی بێفڕۆکەوان بۆ سەر ناوچەکانی هەریر، خەلیفان و سۆران ئەنجام دراوە، کە بەهۆیەوە سێ درۆن لەو ناوچانەدا کەوتوونەتە خوارەوە.

بەپێی زانیارییە مەیدانییەکانی پەیامنێری کوردسات نیوز، بەهۆی کەوتنەخوارەوەی یەکێک لە درۆنەکان لە قەزای سۆران، زیان بەر یەکەیەکی نیشتەجێبوون کەوتووە، لە کاتێکدا درۆنەکەی سنووری هەریر ئاگرکەوتنەوەی لێکەوتووەتەوە. وئاماژەی بەوەش کرد کە هێرشەکان هیچ زیانێکی گیانییان لێنەکەوتوەتەوە.

کەشتییەک کە ١٦٠ سەرنشینی هەڵگرتبوو لە گۆلی کاریبا لە زیمبابوی وەرگەڕا، بەپێی زانیارییەکانی کەناڵی ناوخۆیی ZBC، لانیکەم 15 کەس گیانیان لەدەستداوە.

لە بڵاوکراوەیەکی کەناڵەکەدا هاتوو لەسەر بڕیاری کەشتییە وەرگەڕاوەکەی گۆلی کاریبا زیاتر لە 160 سەرنشینی تێدابووەو، تا ئێستا 15تەرم دۆزراونەتەوە و 74 کەس رزگارکراون، لە کاتێکدا نزیکەی 75کەسی تر هێشتا بێسەروشوێنن.

بەپێی کەناڵەکە، رەنگە ژمارەی سەرنشینەکان لە 160 کەس زیاتر بووبێت، بەبێ هەژمارکردنی منداڵانی تەمەن ژێر چوار ساڵ کە پێویستیان بە بلیتێکی جیاواز نییە.

روونیشیکردەوە کە کەشتییەکە سەر بە ئاژانسی گەشەپێدانی ژێرخانی گوندەکان بووە و5 ئەندامی دەستەی کارگێڕیی کەشتییەکەی تێدابووە، ئاماژەی بەوەشکردووە کە کارەکانی رزگارکردن لە ناوچەکەدا بەردەوامن.

فایەق زێدان سەرۆكی ئەنجومەنی باڵای دادوەری عیراق رایدەگەیەنێت، بە هیچ شێوەیەك سازش و رێككەوتن لەگەڵ گەندەڵكاراندا ناكەن.

فایەق زێدان لە كۆبوونەوەیەكیدا لەگەڵ نوێنەرانی رەوتی مەدەنی رایگەیاند، هیچ یاسایەك نییە بۆ سازش و رێككەوتن لەگەڵ ئەو كەسانەی لە دۆسیەی گەندەڵی تێوەگلاون

راشیگەیاند، دادگا بەپێی یاسا مامەڵە لەگەڵ پرسی گەندەڵی دەكات و بەردەوام دەبن لە یەكلاكردنەوەی دۆسیەكانی گەندەڵی بەپێی چوارچێوە یاساییە پەسەندكراوەكان. 

سەرۆكی ئەنجومەنی باڵای دادوەری ئاماژەی بەوەشدا كه ‌ئەركیان بریتییە لە جێبەجێكردنی یاسا نەك دەركردن و هەمواركردنی، چونكە یاسادانان تایبەتە بە ئەنجومەنی نوێنەران.

 

هێرشێكی حوسیەكان بۆ سەر كەشتییەك لە دەریای سوور، كوژرانی شەش كەشتیوانی لێكەوتەوە.

وەزارەتی گواستنەوەی یەمەن رایگەیاند، لە هێرشێكدا بۆ سەر كەشتیەكی میسری، چوار ئەندامی كەشتیەكە، كە سیانیان پاكستانی و یەكێكیان ئیندۆنیزییە لەگەڵ دوو لە ئەندامانی هێزی نیشتمانی كە بەشدارییان لە ئۆپراسیۆنی رزگاركردندا  كوژراون، ئەمە جگە لەوەی حەوت  ئەندامی  تیمی كەشتییەكە، دوو پاسەوانی سنوور، و ئەندامێكی هێزەكانی بەرگری نیشتمانی برینداربوون، ئەمەش بە یەكەم هێرشی حوسیەكان دادەنرێت لە بابولمەندەب كە كوژراوی لێبكەوێتەوە.

هاوكات، حوسییەكان رایانگەیاندووە، كەشتییەكی گواستنەوەی كەرەستەی سەربازیی سعودییەیان لە بابولمەندەب كردووەتە ئامانج، بەڵام ناوی كەشتییەكەیان ئاشكرا نەكردووە.

ئەم هێرشەش دوای ئەوە دێت كە حوسییەكان لە 20ی تەمووزدا رایانگەیاندبوو گەمارۆی دەریایی دەخەنە سەر سعودییە لە دەریای سووردا.

 

سەرۆكی ئەمریكا رایگەیاند، بەهۆی هەڕەشەیەكەوە بە نهێنی فڕۆكەی سەرۆكایەتی لە توركیا جێهێشتوە.

دۆناڵد ترەمپ، سەرۆكی ئەمریكا، بۆ یەكەم جار ئاشكرایكرد، بە نهێنی لە فڕۆكەی سەرۆكایەتی "ئێر فۆرس وەن" لە توركیا دابەزیوە و فڕۆكەكەی گۆڕیوە، دوای ئەوەی لەلایەن دەزگای پاراستنی نهێنی و سوپای ئەمریكاوە ئاگاداركراوەتەوە كە بەهۆی بوونی هەڕەشەیەكەوە گەشتەكەی بە فڕۆكەیەكی دیكە ئەنجام بدات، وتیشی كە ئەو هیچ متمانەی بە ئێران نییەو و سوپای و هەواڵگری وڵاتەكەی داوای چی لێبكەن جبَبەجێی دەكات.

ترەمپ بە فڕۆكەیەكی سەرۆكایەتی نوێی كە لەلایەن قەتەرەوە پێشكەشی كرابوو، گەشتبووە ئەنقەرە بۆ بەشداری لە لووتكەی ناتۆ، بەڵام لە كاتی جێهێشتنی وڵاتەكەدا بە شێوەیەكی چاوەڕواننەكراو سەركەوتە سەر فڕۆكە كۆنەكەی سەرۆكایەتی، ئەمەش گومانی لەسەر ئاستی ئاسایشی فڕۆكە نوێیەكە دروستكرد.

ئەم لێدوانانەی ترەمپ پشتڕاستكردنەوەی راپۆرتێكی رۆژنامەی واشنتۆن پۆست بوو، باسی لەوە كردبوو ترەمپ لەناو كۆنتێنەرێكی دابینكردنی پێداویستییەكان لە فڕۆكەخانە خۆی شاردووەتەوە تاوەكو بە نهێنی بچێتە ناو فڕۆكەیەكی تر. 

 

هەڵسەنگاندنێكی هەواڵگریی ئەمریكا ئاشكرایكردووە، ئێران ئەولەویەتی ستراتیژیی خۆی لە بەرنامەی ئەتۆمیەكەوە گۆڕیوە بۆ گەروی هورمز.

تۆڕی "ئێن بی سی نیوز"ی ئەمریكی لە سەرچاوەكانەوە گواستوویەتییەوە، تاران گەروی هورمز وەك كارتی پەستانێكی بەهێزتر و كاریگەرتر دەبینێت بەراورد بە دۆسیە ئەتۆمییەكەی، بەتایبەت دوای ئەو لێدانانەی لە قۆناغەكانی پێشووی ململانێكاندا ئاڕاستەی دامەزراوە ئەتۆمیەكانی كرابوون.

تۆرەكەی ئاماژەی بەوەشكردووە، ئەنجامی هەڵسەنگاندنێكی هەواڵگریی سەربازیی ئەمریكا ئاشكرای دەكات كە ئەولەویەتی ستراتیژیی ئێران لە بەرنامە ئەتۆمیەكەیوە  گۆڕاوە بۆ كۆنترۆڵكردنی گەروی هورمز.

تۆرەكە راشیگەیاندووە، لێپرسراوانی سەربازی، دۆناڵد ترەمپ سەرۆكی ئەمریكایان ئاگاداركردووەتەوە، هەر ئۆپراسیۆنێكی سەربازیی ئەمریكا بۆ سەپاندنی كۆنترۆڵی تەواوەتی بەسەر كەروەكەدا، پڕۆسەیەكی درێژخایەن، تێچووبەرز و خوێناوی دەبێت و هیچ گەرەنتییەكی سەركەوتنیشی نییە، ئەمەش بووەتە هۆكارێكی سەرەكی لە دانوستانەكانی ترەمپ لەگەڵ راوێژكارەكانی بۆ بڕیاردان لەسەر هەنگاوەكانی داهاتوو سەبارەت بە ئێران.

 

بە بانگهێشتنامەیەکی رەسمی 'سێنتکۆم'، وەفدێکی باڵای وەزارەتی پێشمەرگە لە ئوردن بەشدارییان لە رێوڕەسمی ئاڵوگۆڕی فەرماندەیی هێزەکانی هاوپەیمانان لە عیراق و سوریا کرد، هاوکات کۆبوونەوەیەکی هاوبەشی سەربازییش لەگەڵ لێپرسراوانی عیراق، ئوردن و سوریا بەڕێوەچوو.

وەزارەتی پێشمەرگەی حکومەتی هەرێم بڵاویکردەوە، بە بانگهێشتنامەیەکی رەسمی  فەرماندەیی ناوەندیی هێزەکانی ئەمریکا 'سێنتکۆم'، ئەمڕۆ شۆڕش ئیسماعیل، وەزیری پێشمەرگەی حکومەتی هەرێمی کوردستان، بە یاوەریی فەریق روکن عیسا عوزێر، سەرۆکی ئەرکانی وەزارەتی پێشمەرگە، بەشداریی لە مەراسیمی ئاڵوگۆڕی فەرماندەیی هێزەکانی هاوپەیمانان لە عیراق و سوریا کرد کە لە بنکەی سەرەکیی هاوپەیمانان لە وڵاتی ئوردن بەڕێوەچوو.

لە رێورەسمێکدا، کە بە سەرپەرشتیی ئەدمیراڵ براد کۆپەر، فەرماندەی سێنتکۆم بەڕێوەچوو، فەرماندەیی هێزەکانی هاوپەیمانان لە عیراق و سوریا لە مەیجەر جەنەڕاڵ کیڤن لامبێرتەوە رادەستی ئەدمیراڵ لیام ئێم هولین کرا.

لە پەراوێزی رێورەسمەکەدا، وەزیری پێشمەرگە ستایشی هەوڵەکانی ساڵانی رابردووی هێزەکانی هاوپەیمانانی کرد، بە تایبەتی رۆڵی بەرچاوی مەیجەر جەنەڕاڵ کیڤن لامبێرت، کە رۆڵی باڵای هەبووە لە بەرەوپێشچوونی بەردەوامی پرۆسەی ریفۆرمی سەربازی هێزەکانی پێشمەرگە، بەردەوامی هاوئاهەنگی نێوان وەزارەتی پێشمەرگە و هاوپەیمانان، هەروەها وەزیری پێشمەرگە هیوای سەرکەوتنی بۆ جەنەڕاڵ لامبێرت خواست لە ئەرکی نوێیدا، پیرۆزباییشی لە فەرماندەی نوێ (ئەدمیراڵ هولین) کرد و ئامادەییی وەزارەتی پێشمەرگەی بۆ بەردەوامیدان بە هەماهەنگییە هاوبەشەکان دووپاتکردەوە.

هەر لە پەراوێزی ئەو سەردانەی وەفدی باڵای وەزارەتی پێشمەرگه  لە عەمانی پایتەختی ئوردن، لە کۆبوونەوەیەکی هاوبەش کە لەنێوان وەزارەتی بەرگریی ئوردن، وەزارەتی بەرگریی عیراق و وەزارەتی پێشمەرگە بەڕێوەچوو. لەو کۆبوونەوەیەدا شۆڕش ئیسماعیل، وەزیری پێشمەرگەی حکومەتی هەرێمی کوردستان، فەریق روکن عیسا عوزێر، سەرۆکی ئەرکانی وەزارەتی پێشمەرگە، عەبدولئەمیر رەشید یارەڵڵا، سەرۆکی ئەرکانی سوپای عیراق و لیوا روکن یوسف ئەحمەد ئەلحنێتی سەرۆکی دەستەی ئەرکانی هاوبەشی ئوردن، هەروەها فەرماندەی هێزە هاوبەشەکانی ئوردن و سەرۆکی دەستەی ئەرکانی گشتی سوپا و هێزە چەکدارەکانی سوریا بەشدارییان تێدا کرد.

​لە کۆبوونەوەکەدا باس لە پەیوەندی و هەماهەنگیی نێوان لایەنە بەشداربووەکان کرا لەپێناو پاراستنی ئاسایشی ناوچەکە و سنوری هاوبەش، هەروەها پەرەپێدان بە پەیوەندییە هاوبەشەکان لە چوارچێوەی ئەو ناوچەیەی کە گرفتی زۆری بواری ئاسایشی تێدایە، هەروەها جەختکرایەوە لەوەی بەردەوام کاری هاوبەش بکەن بۆ پاراستنی ئاسایشی یەکتر و پەرەدان بە هەماهەنگی و هاوکاریی هاوبەش.

​لە کۆتاییدا، جەخت لەسەر ئەوە کرایەوە کە لە بواری سەربازیدا کاری زیاتر بەیەکەوە بکەن و پەرە بە پەیوەندییە مەیدانییەکان بدەن. ئامادەبووان جەختیان کردەوە کە ئەو پێشهاتانەی ناوچەکە بەخۆیەوەیان دەبینێت، پێویستیان بە هەماهەنگی زیاتر و تەواوکاریی هەوڵەکان هەیە؛ پاراستنی سنورەکان و رووبەڕووبوونەوەی هەڕەشە ئەمنیەکان کارێکی هاوبەشە و پێویستە بەردەوامی پێبدرێت، بە جۆرێک کە توانای وڵاتانی ناوچەکە بەهێز بکات بۆ پاراستنی ئاسایش، سەروەری و سەقامگیرییان.

لە پەیوەندییەکەدا، هەردوولا بیروڕایان دەربارەی دوا پێشهاتە ئەمنی، سیاسی و ئابوورییەکانی ناوچەکە ئاڵوگۆڕ کرد و تاوتوێی رێگەچارەکانی کۆتاییهێنان بە ئاڵۆزییەکانی ئێستایان کرد. جەختیان لە گرنگیی پاراستنی ئاشتی و سەقامگیری و بەهێزکردنی هەماهەنگی لە رووبەڕووبوونەوەی ئاڵەنگارییە هاوبەشەکاندا کردەوە.

سەرۆک بافڵ جەختی لە گرنگیی بەردەوامیی دیالۆگ و پەیوەندییە دیپلۆماسییەکان کردەوە وەک کاریگەرترین رێگا بەرەو هێورکردنەوەی ئاڵۆزییەکان، گەڕاندنەوەی ئاشتی و سەقامگیری، و پاراستنی بەرژەوەندییەکانی هەموو گەلانی ناوچەکە. دەستخۆشی لە وەزیری دەرەوەی ئێران بەڕێز عەباس عێراقچی کرد بۆ هەوڵە بەردەوامە دیپلۆماسیی و بنیاتنەرەکانی لە گەڕان بەدوای چارەسەری ئاشتییانە بۆ ململانێکان و سەقامگیرییەکی فراوانتردا.

هەروەها هەردوولا تاوتوێی پەیوەندییە مێژووییە ستراتیژییەکەی نێوان یەکێتیی نیشتمانیی کوردستان و کۆماری ئیسلامیی ئێرانیان کرد، و پابەندبوونی خۆیان بۆ بەهێزکردنی زیاتری پەیوەندییە دووقۆڵییەکان و هەماهەنگی لەسەر بنەمای بەرژەوەندیی هاوبەش، دراوسێیەتی باش و سەقامگیریی ناوچەکە دووپاتکردەوە.

لە درێژەی گفتوگۆکاندا، وەزیری دەرەوەی ئێران بانگهێشتی سەرۆک بافڵی کرد بۆ تاران بەمەبەستی گفتوگۆی زیاتر لەسەر لێکەوتە ئەمنی و ئابوورییەکانی ململانێکان لەسەر ئاستی ناوچەکە و نێودەوڵەتی.