هەواڵەکان
بەیانی ئەمرۆ ئیسرائیل هێرشێكی توندی بۆ سەر باشوری لوبنان ئەنجامدا و لە ئەنجامی هێرشەكانی رۆژی شەممەشدا 11 كەس كوژراون .
سەرچاوە ئەمنییەكانی لوبنان ئاشكرایانكردوە، بەیانی ئەمرۆ ئیسرائیل ناوچەی عەلی تاهیری لە باشوری لوبنان بەتوندی بۆردومان كردوە، بەڵام تا ئێستا هیچ زانیارییەك لەبارەی زیانەكانی بۆردومانەكەوە نییە .
بەپێی ئامارێكی وەزارەتی تەندروستی لوبنانیش، بەهۆی بۆردومانەكانی ئیسرائیلەوە رۆژی شەممە 7 كەس لە شارۆچكەی ئەنسار كوژراون كە لە نێویاندا 3 منداڵ و 2 ژن هەن، لە ناوچەی دێر زەهرانیش 4 كەسی تر كوژراون و 17 كەس برینداربون كە لە نێویاندا ژن و منداڵ هەن.
لەلایەكی تریشەوە، یسرائیل كاتس وەزیری بەرگری ئیسرائیل بەڵێنی داوە هێرشەكانیان دژی حزبوڵا لە باشوری لوبنان چڕتر بكەنەوە و راشیگەیاندووە هێرشەكانیان چر دەكەنەوە تا ئەو كاتەی هیچ هەرەشەیەك لەسەر ئیسرائیل و هاوڵاتییەكانیان ناهێڵنەوە .
ئەنجومەنی باڵای دادوەریی عیراق، ئەمڕۆ یەکشەممە، دەستبەسەرداگرتنی 20 ملیۆن دۆلار و گەڕاندنەوەی 60 کیلۆگرام زێڕی لە دۆسیەی بریکاری وەزارەتی نەوت بۆ کاروباری پاڵاوتن راگەیاند.
لە بەیاننامەیەکی ئەنجومەنەکەدا هاتوە: بە هەماهەنگی لەگەڵ هەرێمی کوردستان، دەست بەسەر 20 ملیۆن و 340 هەزار دۆلاری ئەمریکی و 200ملیۆن دیناری عیراقی، لەگەڵ گەڕاندنەوەی 60 کیلۆگرام زێڕ و دەستبەسەرداگرتنی 7 ئۆتۆمبێلدا گیراوە.
ئەم رێکارانە لە چوارچێوەی دۆسیەی تۆمەتباری دەستبەسەرکراو عەدنان جومەیلی، بریکاری وەزارەتی نەوت بۆ کاروباری پاڵاوتن و کەسانی تێوەگلاو لەگەڵیدا ئەنجامدراون.
دادوەرەکە ئاماژەی بەوەش کرد کە پرۆسەکانی بەدواداچوون و لێکۆڵینەوە بۆ دەستبەسەرداگرتنی ئەو سەرمایە و دەستکەوتە داراییانەی لە ئاکامی بەهەدەردان لە پڕۆژە جێبەجێکراوەکاندا دروستبوون، بووە هۆی دەستبەسەرداگرتنی ئەم بڕە پارە و زێڕ و ئۆتۆمبێلانە.
جەختیشی کردەوە کە لێکۆڵینەوەکان و بەدواداچوون بۆ تۆمەتبارانی تر بەردەوامە تاوەکو تەواوکردنی سەرجەم ڕێکارە قانونییەکان بەرامبەریان.
کازم غەریب ئابادی، جێگری وەزیری دەرەوەی ئێران جەختیکردەوە کە لێدوانەکانی سەرۆکی ئەمریکا سەبارەت بە گەروی هورمز دوورن لە واقیع، و گەروەکە بە وتار و نمایشی سەربازی کۆنترۆڵ ناکرێت.
کازم غەریب ئابادی، جێگری وەزیری دەرەوە بۆ کاروباری یاسایی و نێودەوڵەتی، لە پەیامێکدا لە تۆڕی "ئێکس" نووسیویەتی: ترەمپ وتوویەتی دوای شکستپێهێنانی ئێران، بەم زووانە گەروی هورمز وەک بەشێک لە خاکی ئەمریکا رادەگەیەنێت، گەروی هورمز نە بە تویت و کەشتیی فڕۆکەهەڵگر، نە بە دەرکردنی فەرمان و وتاری هەڵبژاردن کۆنترۆڵ ناکرێت. ئێران لە هەڕەشەکان ناترسێت.
غەریب ئابادی جەختی لەوە کردەوە کە گەروی هورمز تەنها لەژێر ئیرادەی تاراندا دەمێنێتەوە، کراوەبێت یان داخرێت بە بڕیاری ئێرانی دەبێت.
وتیشی: ویلایەتە یەکگرتووەکان تا ئێستا تووشی زیانی ستراتیژیی گەورە بووە، و داوای لێکردن دان بەم راستییەدا بنێن و دەست لە وەهم هەڵبگرن، دەنا ئێران بەردەوام دەبێت لە سەپاندنی گەمارۆی دەریایی.
جەزتیشی کردەوە: پێشوازی لە راستییەکە بکەن بۆ یەکجار و بۆ هەمیشە، تا ئێستا تووشی زیانی ستراتیژی و قورس بوون، گەروی هورمز ئێرانییە، بەو جۆرەیە و بە ئێرانیش دەمێنێتەوە.
بەبۆنەی یادی 80 ساڵەی دامەزراندنی پارتی دیموكراتی كوردستانەوە، مەكتەبی سیاسی یەكێتیی نیشتمانیی کوردستان پەیامێکی پیرۆزبایی ئاڕاستەی مەكتەبی سیاسی پارتی دیموكراتی كوردستان دەکات و دەڵێت، "لەم بۆنەیەدا ئومێدەوارین خەباتی هەموو لایەك ئامانجە نەتەوەیی و دیموكراسییەكان بکاتە بنەما بۆ تێپەڕاندنی ئەم بارودۆخەی رووی لە کوردستان و ناوچەكەمان كردووە".
دەقی پەیامەکە...
بەرێز مەكتەبی سیاسی پارتی دیموكراتی كوردستان
بەبۆنەی یادی هەشتا ساڵەی دامەزراندنی پارتی دیموكراتی كوردستانەوە پیرۆزبایی لە بەرێزتان و ئەندام و لایەنگرانتان دەكەین
لەم بۆنەیەدا ئومێدەوارین خەباتی هەموو لایەك ئامانجە نەتەوەیی و دیموكراسییەكان بکاتە بنەما بۆ تێپەڕاندنی ئەم بارودۆخەی رووی لە کوردستان و ناوچەكەمان كردوە. لە پێناو پایەدارکردن و راستکردنەوەی بەرپرسیارانەی رێڕەوی ئەزموونەکەمان.
جارێكی تر پیرۆزە
مەكتەبی سیاسی
یەكێتیی نیشتمانیی كوردستان
شانەی راگەیاندنی ئەمنیی عیراق رایدەگەیەنێت، بڕیاری كۆنترۆڵكردنی چەك سەرجەم لایەنەكانی دەرەوەی دەوڵەت دەگرێتەوە.
فەریق سەعد مەعن، سەرۆكی شانەی راگەیاندنی ئەمنیی عیراق بڵاویكردەوە، بڕیاری سنوورداركردنی چەك و كۆنترۆڵكردنی لەلایەن دەوڵەتەوە، سەرجەم ئەو لایەن و گروپانە دەگرێتەوە كە لە دەرەوەی دامەزراوە ئەمنییەكانی عیراقن.
دەشڵێت، بەپێی یاسا حەشدی شەعبی بەشێكە لە هێزە چەكدارەكانی عیراق و سەرجەم ئەندامەكانی پابەندی یاسا سەربازییەكانی سوپای عیراقن.
سەرۆكی شانەكە ئاماژی بەوەش كردووە، ئامانجی سەرەكی لەم هەنگاوە ئەوەیە رێگری لە دروستبوونی هێزیك یان دەسەڵاتێكی تر بكرێت كە لە دەرەوەی چوارچێوەی دەوڵەتدا چەك بەكاربهێنێت.
ئەوە لەكاتێكدایە، ئەمڕۆ سوپای عیراق ئەركی پاراستنی خاڵە ئەمنییەكانی قەزای ئامرلی سەر بە پارێزگای سەلاحەدین لە گوندی بەستاملی رادەستی فەرماندەیی ئۆپەراسیۆنەكانی باكور و رۆژهەڵاتی دیجلەی حەشدی شەعبی كرد.
ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی ئیدارەی خۆبەڕێوەبەری رایگەیاند، جموجۆڵی دیپلۆماسی لەنێوان رۆژئاوا و دیمەشقدا بەردەوامە و پرسی کورد تەوەری سەرەکیی گفتوگۆکانە.
ئیلهام ئەحمەد لە دیدارێکدا ئاماژەی بەوە کرد، کۆتاییهێنان بە شەڕی چەکداری خاڵێکی دەستپێکە بۆ گەیشتن بە چارەسەری سیاسی.
هاوکات جەختی لە گرنگیی یەکگرتنی کورد لەناو دامەزراوەکانی دەوڵەت و گەرەنەتیکردنی ماف و دەستکەوتەکانی گەلی کورد لە سوریای نوێدا کردەوە و دووپاتی کردەوە، پرۆسەی یەکگرتن بەبێ داننان بە زمانی کوردیدا چارەسەر نابێت.
ئاماژەی بۆ ئەوەش کرد: حکومتەی دیمەشق خاوەن تێڕوانینێکی بەرتەسکە سەبارەت بە رۆڵ و پێگەی ژنان.
پەیمانگەیەكی ئەمریكی دەڵێت، عیراق بۆ دەربازبوون لە قەیرانی دارایی پێویستی بە هەمەجۆركردنی رێگاكانی هەناردەكردنی نەوتە بەتایبەتیش لە رێگەی وڵاتانی كەنداوەوە.
پەیمانگەی دامەزراوەی بەرگریكردن لە دیموكراسییەكان لە راپۆرتێكدا ئاماژەی بەوەكردووە، عیراق بۆ دابینكردنی 90%ی بودجەكەی تەنها پشت بە داهاتی نەوت دەبەستێت و لەئێستاشدا ئاستی هەناردەی نەوتەكەی بەشێوەیەكی بەرچاو دابەزیووە.
دەشڵێت، داهاتی عیراق لە مانگەكانی ئایار و حوزەیراندا تەنها نزیكەی دوو ملیار دۆلار بووە، لە كاتێكدا مانگانە پێویستی بە شەش ملیار دۆلارە و كۆمپانیای سۆمۆش پەنای بۆ فرۆشتنی نەوت بە كۆمپانیای ئادنۆكی ئیماراتی بردووە بۆئەوەی لەو رێگەیەوە هەناردەی بكات.
پەیمانگەكە داوا لە ئەمریكا دەكات، هانی عیراق بدات بۆ نزیكبوونەوەی زیاتر لە وڵاتانی كەنداو بە مەبەستی هەناردەكردنی نەوت لە پێناو دابینكردنی موچەی فەرمانبەرانی حكومەتی عیراق.
لە نزیك بەندەرێكی عیراق باندێكی نێودەوڵەتی بۆ قاچاخچێتی ماددەی هۆشبەر دەستگیركرا كە 90 كیلۆگرام ماددەی هۆشبەری پێبووە.
بەڕێوەبەرایەتی گشتی كاروباری ماددە هۆشبارەكان لە عیراق لە راگەیەنراوێكدا بڵاویكردەوە، بە پشتبەستن بە زیانیاری هەواڵگریی، لە لە بەندەری ئوم قەسر توانیویانە باندێكی نێودەوڵەتی قاچاخچێتی ماددەی هۆشبەر دەستگیر بكەن.
دەشڵێت، یەكێك لە تۆمەتبارەكان بیانی بووە و 90 كیلۆگرام ماددەی هۆشبەری لە جۆری حەشیش پێبووە كە لە دوو بەلەمدا هەڵگیرابوو.
لە سلێمانی دابەشکردنی بەنزینی 750 دیناری دەستیپێکرد و ژمارەی بەنزینخانەکانیش زیاد کران.
سەلام عومەر، وتەبێژی بەڕێوەبەرایەتی نەوت و کانزاکانی سلێمانی بە کوردسات نیوزی راگەیاند، پرۆسەی دابەشکردنی بەنزینی حکومی دەستیپێکرد و لە ناوەندی سلێمانی 13 بەنزینخانە بەنزینی 750 دیناری دابەشدەکەن.
وتیشی، دابەشکردنەکە بە شێوەی 24 سەعاتییە و لە داهاتووشدا ژمارەی بەنزینخانەکان زیاد دەکەن.
سەبارەت بە کوالێتی بەنزینە حکومییەکە سەلام عومەر ئەوەشی خستەڕوو، بەنزینە نۆرماڵەکە بەو تایبەتمەندییە کە لەلایەن وەزارەتی سامانە سروشتییەکان دیاری کراوە و ئۆکتانی لە سەروو 91ـەوەیە و هیچ کێشەیەکی نییە.
وتەبێژی بەڕێوەبەرایەتی نەوت و کانزاکانی سلێمانی ئاماژەی بەوەشکرد، ئومێد دەکەن لە داهاتوویەکی نزیکدا قەیرانی بەنزین کۆتایی پێبێت.
لێدوانی سەلام عومەر، وتەبێژی بەڕێوەبەرایەتی نەوت و کانزاکانی سلێمانی بۆ کوردسات نیوز
حكومەتی توركیا بەردانەوەی ئاوی روباری فوراتی دەستپێكردووە و بەهۆی بەرزبوونەوەی ئاستی ئاوەكەش هۆشداریی دەدرێتە عیراق.
وەزارەتی فریاگوزاریی سوریا هۆشدارییەكی بە پەلەی ئاراستەی پارێزگاكانی رەققە و دێرەزو و سەرجەم دانیشتوانی نزیك روباری فورات كردووە بەهۆی بەردانەوەی ئاوی روباری فورات لەلایەن حكومەتی توركیاوە.
ئاماژەی بەوەشكردووە، توركیا لە یەك چركەدا نزیكە 600 بۆ 800 مەتر سێجا ئاو بەردەداتەوە و بەهۆیەوە ئاستی ئاوی روبارەكە بەشێوەیەكی بەرچاو بەرزبووەتەوە و رەنگە لە هەندێك ناوچەدا مەترسی لەسەر دانیشتوان دروست بكات.
لایەنە پەیوەندیدارەكانی سوریا هۆشداریشیان داوەتە عیراق چەند رێكارێك لەو ناوچانە بگرێتەبەر كە نزیكن لە روباری فورات بە مەبەستی رێگریكردن لە دروستبوونی لافاو بەهۆی بەزبوونەوەی ئاستی ئاوی روبارەكە.
کەشناسیی هەرێم پێشبینییەکانی کەشوهەوای 48 سەعاتی داهاتوو بڵاوکردەوە و ئاشکرایدەکات پلەکانی گەرما جێگیر دەبن.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ
بە گشتی ئاسمان ساماڵ دەبێت و پلەکانی گەرما نزیک دەبنەوە لە تۆمارکراوەکانی دوێنێ.
ئاماژەی بەوەشکرد، سبەینێ ئاسمان ساماڵ دەبێت لەگەڵ دروستبوونی هەندێک پەڵەهەوری جیاجیا، هاوکات پلەکانی گەرما نزیک دەبنەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر: 43 پلەی سیلیزی
پیرمام: 40 پلەی سیلیزی
سلێمانی: 41 پلەی سیلیزی
هەڵەبجە: 43پلەی سیلیزی
چەمچەماڵ: 43 پلەی سیلیزی
دهۆک: 41 پلەی سیلیزی
زاخۆ: 42 پلەی سیلیزی
ئاکرێ: 42پلەی سیلیزی
گەرمیان: 46پلەی سیلیزی
حاجی ئۆمەران: 30پلەی سیلیزی
وەزیری دەرەوەی ئێران دەڵێت، تا ئێستا هیچ بڕیارێك بۆ دەستپێكردنەوەی دانوستان لەگەڵ ئەمریكا نەدراوە.
عەباس عراقچی، وەزیری دەرەوەی ئێران رایگەیاند، ئەمریكا یاداشتنامەی لێكتێگەیشتنی پێشێلكردووە، جارێكی تر شاهیدی دەستپێكردنەوەی ململانێكان بوون، بەڵام شتێك نەبوو بە ناوی ئاگربەست تائێستا پێویستی بە درێژكردنەوە هەبێت، بەڵكوو كۆتایی شەڕەكە شێوازێكی نوێی وەرگرتووە.
وتیشی، نێوەندگیرەکان، قەتەر و پاكستان، پەیام ئاڵوگۆڕ دەكەن و لە پەیوەندیدان، بەڵام ئەوە بە هیچ شێوەیەك بە واتای دانوستان نییە. تا ئێستا هیچ بڕیارێك نەدراوە بۆ دەستپێكردنەوەی دانوستانەكان لەگەڵ ئەمریكا.
سەبارەت بە دانوستانی نێوان ئێران و عومان ئاماژەی بۆ ئەوەشكردووە، دانوستان لەگەڵ عومان بەردەوامە، ئەوە گفتوگۆیەكی تەواو جیاوازە، باسێكی تەكنیكی پەیوەست بە دیاریكردنی رێگە دەریاییەكانی گەروی هورمزە بۆ هاتوچۆی كەشتی، دەبێت رێگایەكی نوێ دیاری بكرێت. لە ئێستادا سەرقاڵی كردنەوەی رێگایەكی كاتیین و لە قۆناغەكانی داهاتوودا دەبێتە رێگای كۆتایی.
لە ئەمڕۆوە سیستمی دابەشكردنی بەنزینی حكومی لە سنوری هەردوو پارێزگای سلێمانی و هەڵەبجە گۆڕانكاری بەسەردا دێت و بەنزینخانەكانیش بە بەردەوامی كراوە دەبن.
محەمەد حەسیب بەڕێوەبەری نەوت و كانزاكانی سلێمانی بەكوردسات نیوزی رایگەیاند، لە ئەمڕۆوە لە سەنتەری شاری سلێمانی لە 10 بەنزینخانە بە بەردەوامی و 24 سەعات بەنزینی 750 دیناری دابەش دەكرێت.
وتیشی، بەهەمان شێوە بەنزینی 750 دیناری بەشێوەیەكی بەردەوام لە پارێزگای هەڵەبجە و ئیدارەكانی گەرمیان و راپەڕینیش دابەش دەكرێت.
بەپێی بەدواداچوونی پەیامنێری كوردسات نیوز، لە چەند رۆژی داهاتوودا پشكی ئیدارەی گەرمیان لە بەنزینی 750 دیناری لە 36 هەزار لیترەوە دەكرێتە 72 هەزار لیتر.
لەم 10 بەنزینخانەیە بەنزینی حکومی دابەش دەکرێت:
پێشەوا، سلێمانی نوێ، کازیوە، کانی گۆران، شاوان، تاسلوجە، رەهێڵ، هەڵەبجە تانجەرۆ، دایک ، برایەتی هەمیشەیی.
لە رۆژی شەممە یاخود یەکشەممەوە لە سنووری قەزای چەمچەماڵ دابەشکردنی بەنزینی پاڵپشتیکراو بە نرخی 750 دینار بۆ هەر لیترێک دەستپێدەکات.
راگەیاندنی قائیمقامیەتی قەزای چەمچەماڵ بڵاویکردەوە، لەسەر داواکاری قائیمقامی چەمچەماڵ و بە بڕیار و راسپاردەی عەتا محەمەد، لێپرسراوی نوسینگەی جێگری سەرۆکی حکومەتی هەرێمی کوردستان، بڕیاردراوە لە رۆژی شەممە یاخود یەکشەممەوە بەنزینی پاڵپشتیکراو بە نرخی 750 دینار لە بەنزینخانەکانی سنوری قەزاکە دابەش بکرێت.
ئاماژە بەوەشکراوە، رۆژانە لە رێگەی پەیجی فەرمی قائیمقامیەتەوە ناوی ئەو بەنزینخانانە بڵاودەکەینەوە کە بەنزینەکەیان تێدا دابەش دەکرێت، هەروەها لەلایەن لیژنەکانی سوتەمەنی قائیمقامیەتەوە چاودێرییەکی وردی پڕۆسەی دابەشکردنەکە دەکرێت بۆ رێگریکردن لە هەر پێشێلکارییەک.
وتەبێژی بەنزینخانەکانی سلێمانی: ئەمشەو بەنزینی نوێ دەگاتە پارێزگای سلێمانی و لە سبەینێوە پرۆسەی دابەشکردنی دەستپێدەکات.
بەهەمەن شێخ قادر، وتەبێژی بەنزینخانەکانی سلێمانی لە لێدوانێکی تایبەتدا بۆ کوردسات نیوز رایگەیاند: "ئەمشەو بەنزینی نوێ دەگاتە شاری سلێمانی و سبەینێ پرۆسەی دابەشکردنی بەنزین دەستپێدەکات و بەڕێوەبەرایەتی نەوت و کانزاکانی سلێمانی راستەوخۆ سەرپەرشتی پرۆسەکە دەکات."
پرۆسەی دابەشکردنەکە بەم شێوەیەی خوارەوە دەبن:
ناو سەنتەری شاری سلێمانی: لە نێوان 10 تا 15 وێستگە بەنزینی تێدا دابەش دەکرێت.
قەزا و ناحییەکان: لە نێوان 15 تا 20 وێستگە بەنزینیان بەسەردا دابەش دەکرێت.
وتەبێژی بەنزینخانەکانی سلێمانی ئاماژەی بەوەش کرد، لە دوای سبەینێوە چاودێری و هەڵسەنگاندن بۆ rەوشەکە دەکرێت و پرۆسەکە بەرەو زۆرتربوون و فراوانبوون دەچێت، بە جۆرێک کە سەرجەم قەزا، ناحییە و ناوچەکانی تری پارێزگای سلێمانی بگرێتەوە.
راپۆرتێکی ئەنجومەنی کرێکارانی تورکیا بڵاوکراوەتەوە و تێیدا هاتووە، تەنها لە مانگی حەوتی ئەمساڵدا لانیکەم 214 کرێکار لە باکوری کوردستان و تورکیا گیانیان لەدەستداوە.
ئەنجوومەنی ئاسایشی کار و تەندروستیی کرێکاران رایگەیاند، لە مانگی تەممووزی ئەمساڵدا لە تورکیا لانی کەم 214 کرێکار لە کاتی کارکردندا گیانیان لەدەستداوە و لەو ژمارەیەش 23 کەسـیان ژن و منداڵن.
لە راپۆرتەکەدا ئەوەش روونکراوەتەوە، لەناو ئەو ژمارەیەی گیانلەدەستدانی کرێکاراندا، 11کەسیان ژن و 12یان منداڵ و 14ـی دیکەشیان پەنابەر بوون.
ئەوەشی خستووەتەڕوو، کرێکارەکان زیاتر بەهۆی روداوی هاتوچۆ، کەوتنە ژێر دارپەردووی باڵەخانەکان و کەوتنەخوارەوە لە بەرزاییەوە، گیانیان لەدەستداوە.