ئاژانسی رۆیتەرز بڵاویکردوەتەوە، عیراق پلانی هەیە لە رێگەی دروستکردنی بۆریەکی نەوتەوە کە بەناو خاکی سوریادا دەڕوات هەناردەی نەوتەکەی بکات بۆ جیهان، ئەمەش وەک جێگەرەوەیەک بۆ گەروی هورمز.

رۆیتەرز ئاماژەیبەوەکردوە، پلانی عیراق بۆ هەناردەکردنی نەوت لە ڕێگەی بۆرییەکەوە لە سوریا، بەدەربازبوون لە گەرووی هورمز، پێدەچێت چوار ساڵ بخایەنێت بۆ دروستکردن و لانیکەم 15 ملیار دۆلاری تێبچێت.

بە گوێرەی زانیارییەکان، ئەم پڕۆژەیە پێویستی بە دروستکردنی ژێرخانێکی سەرلەنوێ و تەواو تازە هەیە نەک تەنها نۆژەنکردنەوەی هێڵە کۆنەکە، بەو هۆیەوەش جێبەجێکردنی ئەگەری هەیە نزیکەی چوار ساڵ کارکردنی بەردەوامی پێویست بێت و تێچوەکەشی بە لانی کەمەوە بگاتە 15 ملیار دۆلار.

ئەم خەمڵاندنانەی رۆیترز لە کاتێکدایە، کە پێشتر بڕیاری جیاواز لەسەر زەمەن و تێچووی پڕۆژەکە هەبوو؛ یوسف قبلاوی، بەڕێوەبەری کۆمپانیای دەوڵەتی نەوتی سوریا دوو هەفتە بەر لە ئێستا ئاماژەی بەوە دابوو، کە نۆژەنکردنەوەی هێڵەکە لە ناوچەی حەدیسەی عیراقەوە بۆ بەندەری بانیاسی سوریا لە سەرەوەی خۆیەوە پێویستی بە لایەنی کەم سێ ساڵ هەیە.

وەزارەتی دەرەوەی ئەمریکاش  رایگەیاندووە؛ دوای ئاوەدانکردنەوە، ئەم پڕۆژە پێشەنگە توانای سەرەتایی گواستنەوەی دوو ملیۆن بەرمیل نەوتی خاوی دەبێت لە رۆژێکدا.

ئەمە لە کاتێکدایە عەلی زەیدی، سەرۆک وەزیرانی عیراق  و فالح ساری وەزیری دارایی رایانگەیاند بوو، بەهۆی داخستنی گەروی هورمزەوە زۆرترین زیان بەر ئابوری عیراق کەوتوە و دەبێت رێگەیەکی جێگرەوە بۆ تێپەراندی ئەو کێشەیە بدۆزنەوە.

وتەبێژی وەزارەتی نەوت رایگەیاند، لە عیراق هیچ قەیرانێك بۆ دابینكردنی بەنزین نییە و كێشەكە بە تەواوی كۆنتڕۆڵكراوە.

سەلیم ریكابی، وتەبێژی وەزارەتی نەوتی عیراق رایگەیاند، هاوسەنگی نێوان بەرهەمهێنان و بەكاربردن كۆنتڕۆڵكراوە، كێشەی كەمی بەنزین لە وێستگەكان چارەسەركراوە و هەمووشتێك گەڕاوەتەوە بۆ باری ئاسایی خۆی.

جەختی لەوەشكردوەتەوە، هیچ قەیرانێكی لە دابینكردنی بەنزیندا نییە و رەوشەكە بە تەواوی كۆنتڕۆڵكراوە، كۆمپانیاكان بەردەوامن لە كاركردن بۆ دڵنیابوون لە بەردەوامیی و زیادكردنی ڕێژەی بەرهەمهێنان.

 

وەزیری دادی عیراق لیژنەیەكی پێكهێناوە كە لە ماوەی 72 سەعاتدا لێكۆڵینەوە بكات لە گرانی نرخی خواردن و پێداویستییەكان لەناو گرتووخانەكانی عیراقدا. 

وەزارەتی دادی عیراق لە راگەیەندراوێكدا بڵاویكردەوە، خالید شوانی وەزیری داد فەرمانی كردووە بە پێكهێنانی لیژنەیەك بۆ لێكۆڵینەوە لە نرخی خواردن و پێداویستییەكان لە فرۆشگای گرتووخانەكاندا و بەراورد بكرێن بە نرخی بازاڕ، راشیگەیاندووە، ئەو لیژنەیە دەبێت لە ماوەی 72 سەعاتدا راپۆرتێك پێشكەش بكات و دواتر ئاراستەی وەزیری داد دەكرێت و بەپێی ئەنجامی راپۆرتەكە رێكاری ئیداری و یاسایی دەگیرێتەبەر.

ئەو هەنگاوە دوای ئەوە هات كەسوكاری بەندكراوان سكاڵایان تۆماركردووە لەسەر نرخی خۆراك و پێداویستییە سەرەتاییەكان لە فرۆشگای گرتووخانەكاندا.

چەند رۆژێك لەمەوبەریش كەسوكاری بەندكراوان لە بەغداد گردبوونەوە و رایانگەیاند، نرخی یەك كیلۆگرام گۆشت لەناو فرۆشگای گرتووخانەكاندا بە 100 هەزار دینارە و بتڵێك زەیتیش بە نزیكەی 15 هەزار دینار دەفرۆشرێت.

 

وەزارەتی دارایی عیراق رایگەیاند، دائیرەی ژمێریاری لە رێگەی بەشی یەکخستنی ژمێریارییەکانەوە، بەمەبەستی بەرزکردنەوەی ئاستی وردی داتا داراییەکان، تۆمارکردنی ژمێرەی کۆتایی بۆ ساڵانی دارایی 2023 و 2024 و 2025 بەتەواوی کۆتایی پێهێناوە.

بەپێی راگەیەندراوێکی وەزارەتەکە، بەشەکە هەروەها داخڵکردنی تەرازوی پێداچونەوە بۆ مانگی حوزەیرانی رابردوو بەپێی رێکارە ژمێریارییە پەسەندکراوەکان جێبەجێ کردووە، ئەمەش هاوکار دەبێت لە بەهێزکردنی تەواوکاری و وردیی داتاکاندا.

لەلایەکی ترەوە، بەشی یەکخستنی ژمێریارییەکان جەختی کردەوە لە تەواوکردنی ئامادەکردنی ژمێرەی کۆتایی کۆماری عیراق بۆ ساڵی دارایی 2022، بەمەبەستی رەوانەکردنی بۆ دیوانی چاودێریی دارایی فیدراڵی بۆ وردبینیکردن.

دیوانی ناوبراو ئاماژەی بەوەش کردووە کە ئەم هەنگاوە لە چوارچێوەی پابەندبوونە بە رێنمایی و پێوەرە ژمێریارییەکان و بەرزکردنەوەی کارایی رێکارەکانی کاری دارایی حکومەتدا دێت.

میدیاکانی سوریا بڵاویانکردەوە کە بەرەبەیانی رۆژی سێشەممە، فڕۆکەخانەی سەربازیی "ئەبو زوھوور" لە گوندەواری رۆژهەڵاتی ئیدلب لە باکوری رۆژئاوای سوریا، بەر چەندین هێرشی ئاسمانیی نەناسراو کەوتووە.

کەناڵی "تەلەفزیۆنی سوریا" رایگەیاند کە چوار هێرشی ئاسمانیی نادیار ئامانجیان سەکۆی فڕینی فڕۆکەخانەکە بووە، کە بووەتە هۆی زیانی مادی بەبێ ئەوەی هیچ زیانێکی گیانیی لێبکەوێتەوە.

تا ئێستا روون نەبووەتەوە کام لایەن هێرشەکانی ئەنجامداوە، لە کاتێکدا لاپەڕە خۆجێییەکان ئەگەری ئەوە دەنێن کە ئیسرائیل لە پشتی بۆردومانەکەوە بێت.

شایەنی باسە ئەم ئامانجگرتنە یەکەمینە کە رووبەڕووی فڕۆکەخانەکە دەبێتەوە دوای رووخانی بەشارئەسەد

دوای کۆتایی هاتنی مۆڵەتە 60 رۆژیەکەی دۆناڵد ترەمپ رۆژنامەی نیویۆرک تایمز، بڵاویکردوەتەوە ئیدارەی ئەمریکا شکستی هێناوە لە ئامانجەکانیدا و دووبارە پەنای بردوەتەوە بەر سیاسەتی ئەوپەڕی گوشار و جەنگی ئابوری دژی ئێران

رۆژناماکە ئاماژەی بەوەکردوە، ئەم بڕیارەی واشنتن دوای ئەوە هات کە مۆڵەتە 60 رۆژییەکەی دۆناڵد ترەمپ بۆ گەیشتن بە رێککەوتن بەسەرچوو و ئەمریکا نەیتوانی ئامانجە سەرەتاییەکانی بپێکێت، لەوانەش راگرتنی بەرنامە ئەتۆمییەکەی ئێران و کردنەوەی گەروی هورمز.

 بەگوێرەی زانیارییەکان لە دوای راگرتنی هێرشە ئاسمانییەکان لە کۆتایی مانگی تەموزەوە، ئیدارەی ترەمپ توندکردنەوەی سزاکانی سەر کەرتی نەوت و خستنەسەرپێی گوشاری سەر بەندەرەکانی ئێرانی کردووەتە لەپێشینەی کارەکانی.

سکۆت بێسێنت، وەزیری خەزێنەی ئەمریکا جەختی لەسەر سەپاندنی توندترین گوشاری دارایی کردوەتەوە تا تاران ناچار بکەن لە گەروی هورمز پاشەکشە بکات.

رۆژنامەی نیویۆرک تایمز ئەم رێکارانەی دۆناڵد ترەمپ بە دوبارەکردنەوەی ئەزمونی خولی یەکەمی سەرۆکایەتییەکەی دەزانێت، کە لە رابردودا نەیتوانی ئێران بە گۆڕینی ئاڕاستەی بەرنامە ئەتۆمییەکەی یان قبوڵکردنی داواکارییەکانی واشنتن ناچار بکات.

هەر بەپێی راپۆرتەکە، پسپۆڕانی سیاسی و ئابوری گومانی جدییان لەسەر کاریگەریی دووبارەی ئەم سیاسەتە هەیە.

لە بەشێکی دیکەی راپۆرتەکەدا، تیشکخراوەتەی سەر لێدوانەکانی ئەم دوایەی دۆناڵد ترەمپ، بەتایبەتی دەربارەی راگەیاندنی گەروی هورمز وەک ناوچەی ژێر دەسەڵاتی ئەمریکا.

رۆژنامەکە دەڵێت؛ ئەمەی سەرۆکی ئەمریکا دەیکات هەوڵێکە بۆ داپۆشینی شکستە سەربازی و دیپلۆماسییەکان و نیشانەی سەرگەردانیی ئیدارەکەیەتی.

نیویۆرک تایمز رایدەگەیەنێت، کە ئەم گەڕانەوەیە زیاتر لەوەی ستراتیژێکی نوێ بێت، دەرخەری بێدەسەڵاتی ئەمریکایە لە بەرانبەر ئێراندا؛ سیاسەتێک کە زەحمەتە تاران بۆ سازش رابکێشێت و رەنگە واشنتن روبەڕوی جەنگێک بکاتەوە کە دیار نییە کەی کۆتایی دێت.

لە تازەترین ئاماری رەسمیی قوربانییانی ئەو دوو بوومەلەرزە یەک لەدوای یەکانەی مانگی حوزەیرانی رابردوو لە فێنزویلا، ژمارەی گیانلەدەستدان بۆ 6,438 کەس بەرزبووەوە.

خۆرحێ رۆدریگەز، سەرۆکی کۆمەڵەی نیشتمانیی فێنزویلا رایگەیاند: ژمارەی گیانلەدەستدان بەراورد بە ئاماری هەفتەی رابردوو کە 6,301 کەس بوو، رووی لە بەرزبوونەوە کردووە.

ئەمەش لە کاتێکدایە دوای تێپەڕبوونی نزیکەی دوو مانگ بەسەر کارەساتەکەدا، کەسوکاری قوربانییان و تیمەکانی رزگارکردن لەناو کەلاوەکاندا هێشتا بەردەوامن لە گەڕان بەدوای بێسەروشوێنبوواندا.

هەردوو بوومەلەرزەکە کە گوڕەکەیان 7.2 و 7.5 پلە بوو بە پێوەری رێختەر، لە 24ی حوزەیرانی رابردوودا ناوچەکانی نزیک ساوحلی فێنزویلایان هەژاند و بوونە هۆی رووخانی لانی کەم 190 باڵەخانە.

بەپێی ئامارەکانی دەسەڵاتداران، زیاتر لە 60 هەزار خانوو بە پلەی جیاواز زیانیان بەرکەوتووە و 24 هەزار خانووش بە تەواوی لەکەڵک کەوتوون و شیاوی نیشتەجێبوون نین.

ئێستا هەزاران خێزانی لێقەوماو لە کەمپە کاتییەکاندا لە دۆخێکی ژیانی زۆر سەختدا دەژین. لە کاراکاسی پایتەختیش، بارانی بەخوڕی کۆتایی هەفتە دۆخەکەی ئاڵۆزتر کرد و بووە هۆی ڕاماڵینی بەشێک لە خێوەتی لێقەوماوان. تا ئێستا حکومەتی فێنزویلا تەنها 335 خانووی بۆ لێقەوماوان دابینکردووە، لە کۆی ئەو 4,000 خانووەی کە بەڵێنی دابوو تا کۆتایی ئەمساڵ ڕادەستیان بکات.

دوای ئەوەی ئاگرێكی گەورە لە یەكێك لە كۆگاكانی هەڵگرتنی سوتەمەنی لە ناوچەی تانجەرۆ لە سلێمانی كەوتەوە و بەهۆیەوە نزیكەی 50 كەس برینداربوون و زیاتر لە سێ ملیۆن لیتر بەنزینیش سوتا، بەرەبەیانی ئەمڕۆ توانرا کۆنتڕۆڵ بکرێت.

سەعات 10ی شەوی رابردوو ئاگرێكی گەورە لە كۆگایەكی سوتەمەنی لە ناوچەی تانجەرۆ لەسەر رێگای قەرەداغ لە سنوری سلێمانی كەوتەوە كە تایبەت بووە بە كۆگای بەنزین و گاز و بەهۆیەوە تەواوی تانكەرەكانی ناو كۆگاكە سوتان كە ژمارەیان 34 تانكەر بووە.

ئارام عەلی وتەبێژی بەرگری شارستانی سلێمانیش بە كوردسات نیوزی راگەیاند، بەرەبەیانی ئەمڕۆ ئاگرەكە بە تەواوی كۆنترۆڵكراوە.

بەپێی زانیارییە سەرەتاییەكان، نزیكەی 50 ئەفسەر و كارمەندی بەرگریی شارستانیی و كرێكار و پاسەوانانی كۆگاكە بەهۆی سوتاوییەوە رەوانەی نەخۆشخانەی ئیمێرجنسی سلێمانی كراون.

سەرۆكی ئەمریكا رایدەگەیەنێت، ئێران دەیەوێت رێككەوتن بكات، بەڵام لە ئاستی چاوەڕوانییەكانی ئەمریكادا نییە، هەربۆیە واشنتۆن هەوڵ نادات وادەی یاداشتی لێكتێگەیشتنەكە درێژ بكەنەوە.

دۆناڵد ترەمپ سەرۆكی ئەمریكا ڕایگەیاند، ئێران دەیەوێت بگاتە ڕێككەوتن، بەڵام ئەو ڕێككەوتنە ناكات كە ئەوان بە پێویستی دەزانێت، هەربۆیە هەوڵ نادەن بۆ درێژكردنەوەی یاداشتی لێكتێگەیشتن لەگەڵ تاران.

ترەمپ وتیشی، تاكە هۆكاری جەنگەكە ڕێگریكردنە لە ئێران كە چەكی ئەتۆمی بەدەستبهێنێت و بەهۆی ئۆپراسیۆنەكانیشیانەوە ئێران توانای پەرەپێدانی بە بەرنامە ئەتۆمییەكەی نەماوە.

سەرۆكی ئەمریكا ئاماژەی بەوەش كرد، لە ڕێگەی گەمارۆی دەریاییەوە گەرووی هورمزیان بە تەواوی كۆنترۆڵ كردووە و حەز بە بیرۆكەی ئەوە دەكات گەرووەكە وەك ناوچەیەكی سەر بە ئەمریكا رابگەیەنێت .

هەروەها وتیشی، هەفتانە ملیۆنان بەرمیل نەوت لە ڕێگەی گەرووەكەوە تێدەپەڕێت و نرخی نەوت ڕووی لە دابەزین كردووە، لە كاتێكدا ئێران بەهۆی هەڵاوسانی ئابوورییەوە بە رێژەی لە 300٪ توانای بەخێوكردنی سوپاكەی نەماوە.

عیراق داوای رونكردنەوە لە ئێران دەكات سەبارەت بە هێرشەكەی سەر نوسینگەی مەسرور بارزانی، عەلی زەیدیش بڕیاریدا لیژنەیەكی لێكۆڵینەوە بۆ دەرخستنی راستی هێرشەكەو سەرچاوەكەی پێكبهێنرێت.
فوئاد حوسێن، وەزیری دەرەوەی عیراق، پەیوەندییەكی تەلەفۆنی لەگەڵ عەباس عراقچی هاوتا ئیرانیەكەی ئەنجامدا و تیایدا داوای رونكردنەوەی هەڵوێستی رەسمی ئێرانی كرد لەسەر ئەو هێرشە درۆنیەی، كە لە پیرمام كرایە سەر نوسینگەی سەرۆك وەزیرانی هەرێم.
لای خۆیەوە عەباس عراقچی سەرسوڕمانی خۆی لە ڕوودانی هێرشێكی لەو شێوەیە دەربڕی و ڕوونیكردەوە كە هیچ زانیارییەكی نییە دەربارەی ئەنجامدانی ئەو هێرشانە لە خاكی ئێرانەوە.
جەختیشی كردەوە كە هیچ پاساوێك بۆ كارێك لەو شێوەیە نییە لە سایەی پەیوەندییە ئیجابی و بەهێزەكانی نێوان حكومەتی ئێران و حكومەتی هەرێمی كوردستان، بەتایبەتی لەگەڵ دوو حزبە سەرەكییەكەی هەرێم.
هاوكات عەلی زەیدی سەرۆك وەزیرانی عیراق رێنمایی دا بە پێكهێنانی لیژنەیەكی لێكۆڵینەوە و بەدواداچوون بۆ هێرشەكەو داوای كرد لە زووترین كاتدا ئەنجامی لێكۆڵینەوەی لیژنەكە، لایەنی پشت هێرشەكە و لێكەوتەكانی بۆ رای گشتی ئاشكرا بكرێن.

 

هەر چوار سەرۆكایەتیەكەی عیراق لە بەغداد كۆبوونەوە بۆ تاوتوێی رەوشی گشتی وڵات و دوایین پێشهاتە ناوچەییەكان.

نووسینگەی سەرۆك وەزیرانی عیراق بڵاویكردەوە، لە كۆبوونەوەكەدا بە ئامادەبوونی نزار ئامێدی سەرۆك كۆمار، عەلی زەیدی سەرۆك وەزیران، فایەق زێدان سەرۆكی ئەنجومەنی باڵای دادوەری، هەیبەت حەلبوسی سەرۆكی ئەنجومەنی نوێنەران، جەختكرایەوە لە پشتیوانیكردنی بەرنامەی وزاریی حكومەت بۆ باشتركردنی ژیانوگوزەرانی هاوڵاتییان و پتەوكردنی ئاسایش و سەقامگیری وڵات.

هەر لە كۆبوونەوەكەدا، تاوتوێی رەوشی ئابووری وڵات و كەمبوونەوەی سەرچاوەی داهاتی نەوتی بەهۆی داخستنی گەروی هورمز كرا، جەختیشكرایەوە لە فرەچەشنكردنی سەرچاوەكانی داهات، بەردەوامبوون لە بەرەنگاربوونەوەی گەندەڵی ئیداری و دارایی، دەستگیركردنی گەندەڵكاران و گێڕانەوەی موڵك و ماڵی گشتی.

لە بەشێكی تری كۆبوونەوەكەشدا، جەختكرایەوە لە پرۆسەی چەكداماڵینی گروپە چەكدارەكان و بەرەوپێشبردنی توانای سەربازی هێزە رەسمییە عیراقییەكان، جەختیشیكرایەوە، لە یەكخستنەوەی هەوڵی سەرۆكایەتییەكان بۆ تەواوكردنی كابینە وزارییەكەی حكومەت لە زووترین كاتدا.

كۆبوونەوەكە جەختیشیكردەوە، لە گرنگی كۆتایهێنان بە گرژییەكانی ناوچەكە و گرتنەبەری رێوشوێنی دیپلۆماسی بۆ كۆتاییهێنان بە ململانێكان، رەتیشیكردەوە، خاكی عیراق ببێتە گۆڕەپانێك بۆ یەكلایكردنەوەی ململانێكی ناوچەییەكان.

وەزارەتی دارایی هەرێم، لیستی موچەی مانگی حەوتی موچەخۆرانی هەرێمی بڵاوکردەوە  و سبەینێ دەست بەدابەشکردنی دەکرێت.

وەزارەتی دارایی هەرێم رایگەیاندوە، رۆژی سێشەممە دەست بەدابەشکردنی موچەی مانگی تەموزی فەرمانبەران و موچەخۆرانی هەرێمی کوردستان دەکرێت.

ئاماژەی بەوەشکردوە، رۆژی پێنجشەممە، 20ـی 8ـی2026 کۆتایی بە دابەشکردنی موچە دێت و تەواوی وەزارەت و دەستەکان موچەکانیان وەردەگرن.

ئەمەش لە کاتێکدایە، ئەمڕۆ بڕی 830 ملیار و 782 ملیۆن دینار وەک تەمویلی موچەی مانگی تەمموزی فەرمانبەران و مووچەخۆرانی هەرێم بە رەسمی خرایە سەر هەژماری بانکی وەزارەت لە لقی هەولێری بانکی ناوەندیی عیراق.

 

 

لـەسەر فەرمـانی عـەلی زەیدی، سەرۆک وەزیرانی عیراق  لیژنـەیەك بۆ لێكـۆڵینـەوە لە هێرشەكەی سەر نوسینگەی سەرۆك وەزیرانی هەرێم پێكدەهێنرێت و بڕیاریشە بە زوترین کات ئەنجامی لێکۆڵینەوەکان بۆ رای گشتیی ئاشکرا بکرێن.

ئەمڕۆ دوشەممە بە بڕیاری علەی زەیدی، سەرۆک وەزیرانی عیراق لیژنەیەک بۆ لێکۆڵینەوە لە هێرشەکانی سەر هەولێر پێکهێندراو  عەلی زەیدەش دەڵێت؛ دەبێت بە زوترین کات ئەنجامی لێكۆڵینەوەی لیژنەكە بۆ رای گشتی ئاشكرابكرێت.

بە گوێرەی راگەیەندراوی نوسینەگەی سەرۆک وەزیرانی عیراق، لیژنەکە بەدواداچوون بۆ دۆزینەوەی سەرچاوەی هێرشەكە و لایەنەکانی پشتەوەی هێرشەکە دەكات.

جێ باسە، ئەمڕۆ دووشەممە، دوو درۆنی بۆمبڕێژکراو لە جۆری (حەدید-110) لە دیوی سنوری ئێرانەوە ئاڕاستەی بارەگای نوسینگەی  سەرۆک وەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران.

پۆلیسی سلێمانی دەستگیرکردنی تۆمەتبارێکی راگەیاند، کە لەلایەن چەند دادگایەکەوە پێنج فەرمانی دەستگیرکردنی بۆ دەرچوو بوو. 

پۆلیسی سلێمانی بڵاویکردوەتەوە، دەستگیرکردنی تۆمەتبارەکە (ز، س، ج) دوای چاودێری و بەدواداچوونی وردی مەفرەزەکانی بنکەی پۆلیسی پیرەمەگروونی سەر بە بەشی پۆلیسی دوکان  بووە.

ئاماژەی بەوەشکردوە، لەسەر بنەمای بڕیاری دادوەری دادگای لێکۆڵینەوەی پیرەمەگروون و بەپێی مادەی 456 لە یاسای سزادان دەستگیر کراوە.

پۆلیسی سلێمانی دەڵێت؛ سەرەڕای دادگای پیرەمەگوون، تۆمەتباری ناوبراو لە چوار دادگای تر داواکراوە بووە

- بنکەی پۆلیسی تاسڵوجە بەپێی مادەی 456.

-بنکەی پۆلیسی چوارچرا بەپێی مادەی 443.

-دادگای لێکۆڵینەوەی کەلار بەپێی مادەی 456.

-سەرۆکایەتی دادگای تێهەڵچونەوەی ناوچەی کەرکوک/گەرمیان بەپێی مادەی 456.

جارید کۆشنەری نێردراوی تایبەتی ئەمریکا فشاری خستووەتە سەر بنیامین نەتانیاھۆ، سەرۆک وەزیرانی ئیسرائیل، تا پلانە 15 خاڵیەکەی غەززە کە لەلایەن دۆناڵد ترەمپەوە پاڵپشتی دەکرێت بباتە پێشەوە و رێگری لە پڕۆسەکە نەکات.

سی ئێن ئێن لە راپۆرتێکدا بڵاویکردوەتەوە لە کۆبونەوەکەیاندا، کە زیاتر لە چوار سەعاتی خایاندوە، جارید کۆشنەری نێردراوی تایبەتی ئەمریکا فشاری خستووەتە سەر بنیامین نەتانیاھۆ، تا بە پلانی ئاشتی غەززە رازیبێت و کۆسپ بۆ جێبەجێکردنی دروست نەکات.

سی ئێن ئێن ئاماژەی بەوەکردوە، نەتانیاھو پێشتر ئەم پلانەی رەتکردبۆوە و پێشکەوتن لەم پلانەدا بە کێشە بۆ داهاتوی خۆی دەزانێت، بەهۆی نزیکبونەوەی هەڵبژاردنە گشتییەکانی ئیسرائیل لە کۆتایی مانگی تشرینی یەکەمی ئەمساڵدا.

بە گوێرەی زانیارییەکانی سی ئێن ئێن، نەتانیاھو کە لە راپرسییەکاندا لە دواوەیە و پێویستی بە راکێشانی سەرنجی دەنگدەرانی راستڕەوە، نایەوێت پێش بەڕێوەچوونی هەڵبژاردنەکان هیچ سازشێک لە دۆسیەی غەززەدا بکات.

لە لایەکی ترەوە، لە کۆبوونەوەکەدا کە بە ئامادەبوونی نیکۆلای ملادینۆف بەڕێوەبەری "ئەنجومەنی ئاشتی" و تۆنی بلێر سەرۆک وەزیرانی پێشووی بەریتانیا بەڕێوەچوو، سەرۆک وەزیرانی ئیسرائیل جەختی لەوە کردوەتەوە،  کە دەبێت حەماس هەنگاوی یەکەم بنێت.

بەرپرسێکی باڵای ئیسرائیلیش بە سی ئێن ئێنی راگەیاندووە کە نەتانیاھو ڕوونی کردووەتەوە ئیسرائیل تا چەکدانانی تەواوەتی حەماس، هیچ هێزێکی خۆی لە غەززە ناکشێنێتەوە و رێگە بە دەستپێکردنی ئاوەدانکردنەوە نادات.

سی ئێن ئێن دەشڵێت؛ لە کۆتایی کۆبونەوەکەدا رێککەوتن کراوە لەسەر ئەوەی ژەنراڵێکی ئەمریکی سەرپەرشتی پڕۆسەی رادەستکردن و لەناوبردنی چەکەکانی حەماس بکات کە ئەمەش وەک یەکەم هەنگاو بەرەو بێچەککردنی غەززە هەژمار دەکرێت.

وەزیری رێگاوبان و گەشەپێدانی شارەکانی ئێران رایگەیاند، بەهۆی جەنگی ئەمریکا و ئیسرائیل بەرانبەر بە وڵاتەکەیان، نزیکەی 100 فرۆکە و 140 کەشتییان زیانیان بەرکەوتوە، ئاماژەی بەوەشکردوە هەشت فڕۆکەیان بە تەواوەتی لەناوچوون.

ئەمڕۆ دووشەممە، لە کۆنگەرەیەکی رۆژنامەوانیدا، فەرزانە سادق، وەزیری وەزیری رێگاوبان و گەشەپێدانی شارەکانی ئێران ئاماری ئەو فڕۆکانی خستەڕوو، کە بەهۆی جەنگەوە زیانیان بەرکەوتوە.

فەرزانە سادق ئاماژەی بەوەکرد، لە جەنگەکەدا زیانی بچوکەوە تا  بەتەواوەتی لەناوچون، بەر 100 فڕۆکەیان کەوتوە، کە هەشتیان بە تەواوەتی لە ناوچون.

ناوبراو لەباری کەشتییەکانیشەوە وتویەتی؛ لە جەنگەکەدا نزیکەی 140 کەشتیی مەدەنی تایبەت زیانیان بەرکەوتووە،  کە لەنێویاندا کەشتییە بارهەڵگر و نەفەرهەڵگرەکانی ناوخۆیی دانیشتوانی بەندەرەکانی تێدابووە.