دانیشتنەکەی پەرلەمانی ئەوروپا بە ناونیشانی "فشارەکان لەسەر ئۆپۆزسیۆن لە تورکیا و بە تایبەتی لەسەر پارتی دیموکراتی گەلان" بەڕێوەدەچێت، گروپێکی سیاسیش لە پەرلەمان دەستیانکردووە بە داڕشتنی چەند بڕیارێک و ئێوارەی ئەمڕۆ رەشنوسی بڕیارەکان پێشکەش دەکرێت. 

رۆژی سێشەممەش رێککەوتن لەسەر رەشنوسەکان دەکرێت، بڕیاریشە ئەنجامی دانیشتنەکە رۆژی ٥ شەممە رابگەیەنرێت و بڕیارەکانی کۆبوونەوەکە پەسەند بکرێت. 

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان  ١٠٧١ کەسی تر تووشی ڤایرۆسی کۆرۆنا بوون و  شەش توشبووی تری کۆرۆنا گیانیان لە دەستدا و ٦٢٥ تووشبووی تری ڤایرۆسەکەش چاکبوونەتەوە.

ڕاگەیاندراوی ( ٢٤ ) کاتژمێری تایبەت بە نەخۆشی ڤایرۆسی کۆڕۆنای نوێ   COVID١٩               ژمارە ( ٤٩٥ )  
١. پشکنین: ( ١٠٤٧٥ پشکنینی نوێ)
• ( ٣٠١٨) ھەولێر
• ( ٢٤٥٠) سلێمانی
• ( ٣٨٤٧) دھۆک
• ( ٠) ھەڵەبجە
• ( ١٠٩٤) گەرمیان
• ( ٦٦) ڕاپەڕین
• 
٢. تووشبوو: ( ١٠٧١ تووشبووی نوێ)
• ( ٣١١) ھەولێر
• ( ٢٨٦) سلێمانی
• ( ٤١٥) دھۆک
• ( ٠) ھەڵەبجە
• ( ٥٤) گەرمیان
• ( ٥) ڕاپەڕین
٣. چاکبوون: ( ٦٢٥ چاکبوون)
• ( ٨٦) ھەولێر
• ( ٢١٠) سلێمانی
• ( ٣١١) دھۆک
• ( ٢) ھەڵەبجە
• ( ١٥) گەرمیان
• ( ١) ڕاپەڕین
• 
٤. مردن: ( ٦ مردن)
• ( ٣) ھەولێر
• ( ٣) سلێمانی
• ( ٠) دھۆک
• ( ٠) ھەڵەبجە
• ( ٠) گەرمیان
• ( ٠) ڕاپەڕین 
• 
ئاماری گشتی:
کەرەنتین ھاوڵاتی ٢١٨٧١ (٢١٨٧١ دەرچوو)
پشکنین ٢١٥٩٧٤٩ (٧٤٦٨٧٥ ھەولێر، ٥٢٩٨٠٨ سلێمانی، ٨٦٦٩٤٢ دھۆک، ١٦١٢٤ ھەڵەبجە)
تووشبوون ١٨٩٤٠١ (٥٦٨٧٨ ھەولێر، ٦٢٣٧٠ سلێمانی، ٦٦٣٦٦ دھۆک، ٣٧٨٧ ھەڵەبجە)
چاکبوون ١٧٦٥٦٢ ( ٥٣٨١١ ھەولێر، ٥٦٢١٨ سلێمانی، ٦٢٩١٩ دھۆک، ٣٦١٤ ھەڵەبجە)
لەژێر چارەسەر ٨٣٢٩ (١٨٥٠ ھەولێر، ٤٠٧٨ سلێمانی، ٢٣٧٩ دھۆک، ٢٢ ھەڵەبجە)
مردن ٤٥١٠ (١٢١٧ ھەولێر، ٢٠٧٤ سلێمانی، ١٠٦٨ دھۆک، ١٥١ ھەڵەبجە)
بۆ زانیاری زیاتر سەردانی داشبۆردی حکومەتی ھەرێمی کوردستان بکەن لەم لینکە (https://gov.krd/coronavirus/dashboard/).
وێڕای دەستخۆشی بۆ پزیشکان و کارمەندانی تەندروستی و ھەموو تیمەکانی پزیشکی کە لە ئەرکدان، جەخت دەکەینەوە ھاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسک و وەرگرتنی ڤاکسین، وە لەکاتی پێویستدا پەیوەندی بکەن بە ھێڵی گەرمی ژمارە ( ١٢٢ ). 
 وەزارەتی تەندروستی       
حکومەتی ھەرێمی کوردستان    
٥ی تەمووز ٢٠٢١
 

وەزارەتی پەروەردەی ھەرێم لە نوسراوێکدا بۆ بەڕێوەبەرایەتییە گشتییەکانی پەروەردە رایگەیاند، تاقیکردنەوەکانی خولی دووەمی پۆلە ناکۆتاکانی خوێندنگە حکومی و ناحکومییەکان بۆ ساڵی خوێندنی ٢٠٢٠ - ٢٠٢١ لە ٢١ی ئابی ٢٠٢١ دەست پێدەکات و لە ٣٠ی ئاب کۆتایی دێت.

سەبارەت بە تاقیکردنەوە گشتییەکانی پۆلی ١٢ی ئامادەیش رایگەیاندوە، خولی یەکەمی تاقیکردنەوەکان بە ھەموو بەشەکانییەوە بەپێی خشتەی پێشوو لە ٢٥ی تەمموزی ٢٠٢١ لە سەعات ٧ و نیوی بەیانی دەست پێدەکات، خولی دووەمیش لە ٦ی ئەیلولی ٢٠٢١ بە پێی خشتەیەکی تایبەت ئەنجام دەدرێت.

بە پێی نوسراوێکی سەرۆکی پەرلەمانی کوردستان کە ئاڕاستەی سکرتارییەتی یەکێتی مامۆستایانی کوردستان کراوە، پڕۆژەی یاسای "پارێزبەندی مامۆستایان"لەلایەن دەستەی سەرۆکایەتی پەرلەمانەوە ئاراستەی حکومەتی ھەرێم کراوە بۆ راوەگرتن، لەلایەن حکومەتەوە پڕۆژەکەش رەتکراوەتەوە، بەبیانووی ئەوەی لە رەشنووسی یاسای وەزارەتی پەروەردەدا مافەکانی مامۆستایان جێگەی کراوەتەوە.

"عەبدولواحید محەمەد"سەرۆکی یەکێتی مامۆستایانی کوردستانیش بە کوردسات نیوزی راگەیاند، لەبەر ئەوەی لە رابردوودا کۆمەڵێک رووداوی نەخوازراو بەرامبەر بە مامۆستایان کراوە، دەستپێشخەریەیان کردوە و پڕۆژە یاسای پارێزبەندی مامۆستایانیان داوە بە پەرلەمان.

وتیشی، لە خولی رابردوو خوێندنەوەی بۆ کراوە و کۆمەڵێک رێکاریش گیراوەتەبەر، بەڵام ئێستا ئەنجومەنی وەزیران پڕۆژە یاساکەی رەتکردۆتەوە.
جەختی لەوەشکردەوە، جارێکی تر نوسراو بۆ سەرۆکایەتی پەرلەمان دەکەنەوە بۆ ئەوەی مافی مامۆستایان پارێزراو بێت و پڕۆژەکە بکرێت بەیاسا.

 "بایدن" رایگەیاند، تا ئێستا دڵنیا نین لەو لایەنەی ھێرشی ئەلکترۆنی ئەنجامداوە، بەڵام  ئەگەر روسیا بەرپرسیار بێت لەو ھێرشە ئەلیکترۆنیانەی بەم دواییانە کراوەتە سەر ئەمریکا، وەڵامیان دەبێت، وتیشی تا ئێستا "واشنتۆن" پێی وایە ھاککەرەکانی روسیا دەستیان نییە لەو ھێرشانەی سەدان کۆمپانیای ئەمریکییان کردۆتە ئامانج و فەرمانی بە دەزگاکانی ھە,اڵگیری کردووە لێکۆڵینەوە لەو بابەتە بکەن.  ئاژانسی "بلومبێرگ" رایگەیاندبوو، ھێرشە ئەلکترۆنییەکان چەند گروپێکی سەر بە روسیا ئەنجامیانداوە.

 لێپرسراوانی ھەرێمی "بریتش کۆلۆمبیا" لە خۆرئاوای "کەنەدا" رایانگەیاند، ٧١٩ کەس بەھۆی گەرماوە گیانیان لەدەستداوە، ئەو ئامارەش بەڕێژەی ١٩٥% بەراورد بە ھەمان ماوەی ساڵی رابردوو زیاترە، بە وتەی لێپرسراوان، زۆرینەی قوربانیان کەسانی بەتەمەنن و بە تەنھا لە ماڵێکدا ژیاون و فێنککەرەوە لە ماڵەکانیاندا نەبووە. کەشناسی وڵاتەکەش دەڵێت، رۆژی ٣شەممە پلەکانی گەرما گەیشتبووە ٤٩.٥ پلەی سەدی، کە ئەوە پلەیەکی پێوانەییە. 

میدیا عێراقییەکان بڵاویانکردەوە، لە ئەنجامی ھێرشەکانی چەند رۆژی رابردووی داعش بۆ سەر ھێلەکانی کارەبا لە پارێزگاکانی نەینەوا و کەرکوک، تا ئێستا حەوت کەس کوژراون و ١١ کەسی تر برینداربوون.

ئاماژەیان بەوەشکردووە، ھەر بەھۆی ئەو ھێرشانەوە ٦١ ھێڵی کارەبا پچڕاوە، ئەوەش ھاوکاتە لەگەڵ بەرزبوونەوەی پلەکانی گەرما و مەترسی بۆ سەر ژیانی ھاوڵاتیانی عێراق دروستکردووە.

سەرچاوەیەکی ئەمنیی لە حکومەتی عێراق بڵاویکردووەتەوە کە مستەفا کازمی سەرۆک وەزیرانی عێراق بڕیاریداوە بۆ لەمەودوا فڕۆکەی بێ فڕۆکەوان بۆ پاراستنی تاوەرەکانی کارەبا بەکاربھێنرێت.

‎ھاوکات ئەوەش خراوەتەوە ڕوو، لیژنەی دیاریکردنی نرخی موەلیدە ئەھلییەکانی سلێمانی نرخی کارەبای موەلیدە ئەھلییەکانی بۆ مانگی (شەش) دیاریکرد،  بەوەش لەسەر بنەمای نرخی سوتەمەنی لە ‌بازاڕەکانی ھەرێم و سەعاتەکانی کارکردن دیاریکراوە.

‎باس لەوەشکراوە ، بە پێی کۆنووسی کۆبونەوەکە کارکردن و تەرخانکردنی کارەبا لەلایەن موەلیدە ئەھلییەکانەوە بۆ ھاوڵاتیان لە مانگی (شەش)دا لەنێوان (٢٢٠) بۆ (٢٢٥) سەعاتدا بووە،‌ بەمەش نرخی یەک ئەمپێڕکارەبای موەلیدەی ئەھلی لە ناوشاری سلێمانی بۆ ئەو مانگە لە نێوان (٩) ھەزار بۆ (٩) ھەزار و پێنج سەد دیناردا دەبێت، ھەربۆیە بەھۆی جیاوازی کارپێکردنی موەلیدەکان لەگەڕەکێک بۆ گەڕەکێکی دیکە، نرخی ئەمپێڕێک کارەبای موەلیدە لە گەڕەکێک بۆ گەڕەکێکی دیکە جیاواز دەبێت.

بەڕێوەبەرایەتی گشتی کەشناسی و بومەلەرزەزانی ھەرێمی کوردستان پێشبینییەکانی کەشوھەوای ئەمڕۆ و سبەینێی بڵاوکردەوە و رایگەیاند، ئەمڕۆ بەرزترین پلەی گەرمای تۆمارکراو لە ھەولێر ٤٢ پلە، لە سلێمانی ٤٣ پلە، لە دھۆک ٤١ پلە و لە پارێزگاکانی کەرکوک و ھەڵەبجەش ٤٣ پلە دەبێت.
ئاماژەی بەوەشکردووە کە سبەی دووشەممە پلەی گەرما لە ناوچەکانی ھەرێم چەند پلەیەک دادەبەزێت، بەشێوەیەک کە بەرزترین پلە گەرما لە ھەولێر ٤١ پلە، لە سلێمانی ٤٢، لە دھۆک ٤١، لە کەرکوک ٤٣ و لە پارێزگای ھەڵەبجەش ٤٢ پلە دەبێت.

بۆردومانی فرۆکە جەنگییەکانی ئیسرائیل دەوروبەری وێستگەی خەزنەداری لە شاری غەزە کردوەتەوە ئامانج و بەھۆیەوە کەسێک بریندار بوە، ھەر بە پێی زانیارییەکان بۆردومانەکان ناوچەیەکی کشتوکاڵی کردوەتە ئامانج.
 

سبەینێ دادگایکردنی بەشێکی تری لە چالاکوانانی بادینان بەرێوەدەچێت و کەسوکارەکانیشیان داوای پشتگری لە خەڵکی کوردستان دەکەن لە راگەیەنراوێکدا کەسوکاری بەشێک لە دەستگیرکراوانی بادینان داوا لە ھەموو فراکسیۆنەکانی پەرلەمانی کوردستان و رێکخراوەکانی مافی مرۆڤ و پارێزەر و یاساناس و چالاکوانانی مەدەنی و ھاوڵاتیان بە گشتی کراوە، کە ھەڵوێستیان بەرامبەر بە دادگاییکردنەکە ھەبێت، بە تایبەتی لە کاتێکدا کە رێگریی لە پارێزەران کراوە ئامادەی دانیشتنی دادگاییەکە بن، ھەر بۆیە داواکارن پشتیوانی لە راگیراوەکانیان بکرێت بەو پێیەی لەسەر دۆسیەیەکی گشتی رووبەرووی ئەو رەوشە بوونەتەوە.