فایەق زێدان، سەرۆكی ئەنجومەنی باڵای دادوەریی عیراق، پێشوازیی لە محەمەد باقر قاڵیباف، سەرۆكی پەرلەمانی ئێران كرد بۆ بەهێزكردنی پەیوەندییە یاساییەكان و جێبەجێكردنی رێككەوتننامە هاوبەشەكان.

نوسینگەی راگەیاندنی ئەنجومەنی باڵای دادوەری لە راگەیاندراوێكدا ئاشكرای كرد، كە ئەمرۆ، دادوەر فایەق زێدان پێشوازیی لە محەمەد باقر قاڵیباف و وەفدی یاوەری كردووە.

لە دیدارەكەدا، هەردوولا گفتوگۆی چڕیان ئەنجامدا لە سەر رێگەكانی پەرەپێدانی هەماهەنگیی نێوان بەغداد و تاران لە بوارە دادوەری و یاساییەكاندا.

هەر لەو كۆبوونەوەیەدا، جەخت لە سەر گرنگیی بەدواداچوون و جێبەجێكردنی ئەو رێككەوتننامە و رەشنووسانە كرا كە پێشتر لە نێوان هەردوو وڵاتدا ئیمزا كراون. هەردوولا هاوڕا بوون كە بەهێزكردنی پەیوەندییە یاساییەكان دەبێتە هۆی پاراستنی بەرژەوەندییەكانی هەردوو گەلی دراوسێ و چارەسەركردنی كێشە یاساییە هاوبەشەكان بە شێوەیەكی خێرا و رێكخراو.

 

وەزارەتی دارایی و ئابوری دۆسیەی فەرمانبەرانی رێکخراوەکانی یەکلایی کردەوە و تەواوی مافەکانی راژەی شارستانی و خانەنشینییان پێەبەخشرا.

وەزارەتی دارایی و ئابوریی حکومەتی هەرێمی کوردستان گشتاندنێکی رەسمیی بە ئیمزای وەزیری دارایی و ئابوری دەرکرد، کە تێیدا دۆسیەی فەرمانبەرانی رێکخراوەکانی بە یەکجاری یەکلایی کردەوە و تەواوی مافەکانی راژەی شارستانی و خانەنشینییان پێدەبەخشێت.

بەپێی بڕیارەکە، فەرمانبەرانی رێکخراوەکان لەمەودوا لە تەواوی دامودەزگاکانی حکومەتی هەرێمی کوردستاندا وەک فەرمانبەری ئاسایی و میلاکی هەمیشەیی مامەڵەیان لەگەڵدا دەکرێت.

هەروەها هاوشێوەی فەرمانبەرانی تری راژەی شارستانی بەپێی یاسای خانەنشینیی بەرکار لە هەرێمی کوردستان، تەواوی مافە یاسایی، کارگێڕی، دارایی و خانەنشینییەکانیان بۆ دەستەبەر دەکرێت.

ماڵپەڕێكی ئەمریكی ئاشكرایدەكات، بە ئامانجی بەهێزكردنەوەی توانای بەرگری ئێران، روسیا لە رێگەی دەریای قەزوێنەوە كەرەستەی بەرگری و پارچەی درۆن رەوانەی تاران دەكات.

كەناڵی ئێن بی سی نیوز لە چەند سەرچاوەیەكی هەواڵگرییەوە ئاشكرایكردووە، شیكردنەوەی وێنە مانگە دەستكردەكان دەریانخستووە كە زیاتر لە 20 كەشتی روسی باری سەربازییان گەیاندووەتە بەندەری ئەمیر ئابادی ئێران.

ئاماژەی بەوەش كردووە، ئەم بارانە كەرەستەی درۆن و ماددەی تی ئێن تی لەخۆدەگرن كە بۆ دروستكردنی كڵاوەی موشەكی بالیستی بەكاردێن. 

دەشڵێت، واشنتۆن پێشتر سزای بەسەر كۆمپانیای گواستنەوەی ئەو كەشتییانەدا سەپاندووە كە بۆ رێگریكردن لە چاودێرییەكان، سیستمی ناسینەوەی ئۆتۆماتیكی لەناو دەریا دەكوژێننەوە تاوەكو وڵاتانی تر هەستی پێ نەكەن.

 

 

وەزیری دەرەوەی ئێران وەڵامی واشنتۆن دەداتەوە و دەڵێت، رۆژی سەرکەوتنی ئابوری تەنها هەوڵێکی ئەمریکایە بۆ پەردەپۆشکردنی قەیرانە ناوخۆییەکانی وڵاتەکەی.

عەباس عراقچی، وەزیری دەرەوەی ئێران رایگەیاند، ئەوەی ئەمریکا ناوی ناوە "رۆژی سەرکەوتنی ئابوری" تەنها هەوڵێکە بۆ دوورخستنەوەی سەرنجەکان لە قەیرانە ناوخۆییەکانی ئەو وڵاتە.

وەزیری دەرەوەی ئێران جەختی کردەوە، "تیرۆری ئابوریی ئەمریکا" هەڕەشەیەکی راستەوخۆیە بۆ سەر ئابوری جیهان و سەروەریی وڵاتان لە سەرانسەری جیهاندا.

عراقچی ئاماژەی بەوەشکرد، بەردەوامبوون و داگرگرتن لەسەر پەیڕەوکردنی سیاسەتە شکستهێناوەکان لەلایەن واشنتۆنەوە، هیچی لێناکەوێتەوە جگە لە شکستی زیاتر و زیاترکردنی دوژمنایەتیی و تووڕەیی گەلی ئێران بەرانبەر ئەمریکا.

ئەم لێدوانەی عراقچی لەکاتێکدایە، بەرەبەیانی ئەمڕۆ رایگەیاند، دەرفەتێکی گەورەی بەخشیوە بە ئێران بۆ ئەوەی بگەنە رێککەوتن، بەڵام تاران سودی لەو دەرفەتە وەرنەگرت، وتشی: "ئەمڕۆ بەهێزترین ئۆپراسیۆنی ئابوری لە مێژوودا رادەگەیەنم کە تا ئێستا دژی هیچ وڵاتێک نەگیراوەتەبەر."

دەستەی حەشدی شەعبی جەخت لە سنورداركردنی چەك لەژێر دەستی دەوڵەتدا دەكاتەوە و ئاماژە بەوە دەكات، رۆژی 30 ئەیلول دەبێتە رۆژێكی مێژوویی بۆ عیراق.

موهەنەد عوقابی بەڕێوەبەری راگەیاندنی جەنگیی لە دەستەی حەشدی شەعبی رایگەیاندووە، رۆژی 30ی ئەیلول رۆژێكی مێژوویی و سەروەرییە بۆ عیراق، چونكە كاتی كۆتاییهاتنی چەكی بێ مۆڵەتە لە وڵاتدا.

ئاماژەی بەوەش كردووە، حەشدی شەعبی وەك پشتێن و پاڵپشتێك بۆ هێزە ئەمنییەكان دەمێنێتەوە و لەژێر فەرمانی فەرماندەی گشتیی هێزە چەكدارەكاندا كار دەكات.

عوقابی باسی لەوەشكردووە، بە جێبەجێكردنی یاسای سنورداركردنی چەك لە دەستی دەوڵەت، عیراق دەچێتە قۆناغێكی نوێوە كە سەرجەم لایەنەكان تێیدا بەشدارن.

روونیشكردەوە، حەشد نزیكەی 250 هەزار چەكداری هەیە و نوێنەرایەتی پێكهاتە جیاوازەكانی گەلی عیراق دەكات، دوپاتیشیكردووەتەوە، دیالۆگ باشترین رێگەیە بۆ چارەسەركردنی هەر ناكۆكییەك لە نێوان لایەنەكاندا.

 

وەزیری بەرگریی ئیسرائیل هۆشداری دەداتە ئەردۆغان و رایدەگەیەنێت، رێگە بە دروستکردنی هیچ بنکەیەکی سەربازیی تورکیا لە سوریا نادەن کە ئاسایشی وڵاتەکەی بخاتە مەترسییەوە.

یسرائیل کاتس، وەزیری بەرگریی ئیسرائیل رایگەیاند، رەجەب تەیب ئەردۆغان، سەرۆک کۆماری تورکیا "وڵاتەکەی بەرەو سەرکێشیی مەترسیدار لە سوریا دەبات"، جەختیشی کردەوە کە ئیسرائیل "رێگە بە هیچ لایەنێک نادات ئاسایشی بخاتە مەترسییەوە".

ئەم ئاڵۆزییە نوێیە دوای ئەوە هات کە ئیسرائیل هێرشی ئاسمانی کردە سەر بنکەی ئاسمانیی "ئەبو زھوور" لە پارێزگای ئیدلب، بەهۆکاری ئەوەی دیمەشق لە ئامادەکاریدان بۆ رێگەدان بە بڵاوبوونەوەی هێزەکانی تورکیا لەو بنکەیەدا.

لە بەرانبەردا، ئەنکەرە بە توندی بانگەشەکانی ئیسرائیلی رەتکردەوە و بە تۆمەتی "بێ بنەما" و هەوڵێک بۆ رەواکردنی بەزاندنی سەروەریی خاکی سوریا وەسفی کرد.

هاوکات، ئەسعەد شەیبانی، وەزیری دەرەوەی سوریا رایگەیاندبوو، هیچ پلانێک بۆ دامەزراندنی بنکەیەکی سەربازیی هەمیشەیی تورکیا لە ئەبو زوھوور نییە، بەڵکو سەردانی وەفدە سەربازییەکەی تورکیا تەنها لە چوارچێوەی هاوکاری و مەشقکردندا بووە و بنکەکە خۆی لە قۆناغی نۆژەنکردنەوەدا بووە بۆ بەکارهێنانی لەلایەن هێزە ئاسمانییەکانی سوریاوە.

وەزارەتی جەنگی ئەمریکا (پێنتاگۆن)، ئەمڕۆ پێنجشەممە، رایگەیاند، لە شەڕی دژی ئێراندا 18سەربازی ئەمریکی کوژراون و 757ی تریش بریندار بوون.

بەپێی راگەیەندراوێکی وەزارەتەکە: بنکەدراوەی شەڕ لە پێنتاگۆن تۆمارکردنی زیاتر لە 50 برینداری تریش نیشان داوە، بەمەش کۆی گشتیی برینداران لە دەستپێکی ئۆپراسیۆنەکانەوە لە 28ی شوباتدا گەیشتووەتە 757کەس"

وەزارەتەکە مانگی رابردوو بڕگەیەکی نوێی بە ناوی "ئۆپراسیۆنەکانی دەرەوە" هێنابووە ئاراوە بۆ تۆمارکردنی قوربانی و بریندارانی ئەو ئۆپراسیۆنانەی لە 7ی تەمووزەوە دەستیان پێکردووە، بێ ئەوەی وردەکاریی زیاتر لەسەر سروشتی ئەم ئۆپراسیۆنانە یان شوێنی برینداربوونەکان بدات.

ئەم بەروارە هاوکاتە لەگەڵ ئاگادارکردنەوەی کۆنگرێس لەلایەن ئیدارەی سەرۆک دۆناڵد ترەمپەوە سەبارەت بە دەستپێکردنی ململانێیەکی نوێ لەگەڵ ئێراندا بەپێی یاسای دەسەڵاتەکانی شەڕ.

ئەم ئامارانە دوای ئاراستەکردنی رەخنە دێن لە پێنتاگۆن بەهۆی سڕینەوەی کاتیی چوار حاڵەتی گیانلەدەستدان و دەیان بریندار لە بنکەدراوەکەدا پێش گەڕاندنەوەیان، کە وەزارەتەکە هۆکاری گۆڕانکارییەکانی بۆ "پەککەوتنی کاتیی بنکەدراوەکان" گەڕاندەوە.

کۆریای باشور هەڵسەنگاندنێکی نوێی بۆ ژمارەی چەکە ئەتۆمییەکانی کۆریای باکور راگەیاند، کە پێچەوانەی ئەو ئامارەیە پێشتر دۆناڵد ترەمپ، سەرۆکی ئەمریکا ئاشکرای کردبوو.

ئاهن گیۆ بێک، وەزیری بەرگریی کۆریای باشور رایگەیاند، بەپێی خەمڵاندنەکانی وڵاتەکەی، کۆریای باکور خاوەنی 80 بۆ 120 کڵاوەی ئەتۆمییە، ئەمەش لە کاتێکدایە ترەمپ لە لێدوانێکدا رایگەیاندبوو پیۆنگیانگ خاوەنی "57 چەکی ئەتۆمییە."

لێدوانەکەی ترەمپ لە کاتێکدایە کە رایگەیاندبوو، بەنیازە لەمساڵدا چاوی بە کیم جۆنگ ئۆن، سەرۆکی کۆریای باکور بکەوێت، بەپێی چاودێران، پێدەچێت کۆبوونەوەکە لە مانگی تشرینی دووەمی داهاتوودا لە پەراوێزی لووتکەی ئاپیک لە چین بەڕێوەبچێت.

ئەم جموجۆڵە دیپلۆماسییانە دوای ئەوە دێن ترەمپ لە بڕیارێکی چاوەڕوان نەکراودا رایگەیاند، مانۆڕە سەربازییە هاوبەشەکانی لەگەڵ کۆریای باشور کەمدەکاتەوە.

سەرۆکی ئەمریکا دەڵێت، واشنتۆن دەستپێکردنی جەنگێکی ئابوری و سەپاندنی گۆشەگیرییەکی بێپێشینەی بەسەر ئێراندا دەستپێکردووە، ئاماژەی بەوەشکرد، تاران دەرفەتی گەیشتن بە رێککەوتنی لەگەڵ وڵاتەکەی لەدەستداوە.

دۆناڵد ترەمپ، سەرۆکی ئەمریکا تۆڕی کۆمەڵایەتی سۆشیاڵ تروس نووسیویەتی، دەرفەتێکی گەورەی بەخشیوە بە ئێران بۆ ئەوەی بگەنە رێککەوتن، بەڵام تاران سودی لەو دەرفەتە وەرنەگرت، وتشی: "ئەمڕۆ توندترین رێکاری ئابوری لە مێژوودا ڕادەگەیەنم کە تا ئێستا دژی هیچ وڵاتێک نەگیراوەتەبەر."

سەرۆکی ئەمریکا جەختیشی کردەوە، ئەو رێکارە نوێیانە بریتیین لە جەنگێکی ئابوری و سەپاندنی گۆشەگیری لەسەر ئاستێک کە پێشتر وێنەی نەبووە، ئاماژەی بەوەشکرد توانا سەربازییەکانی ئێران بەر زەبری گەورە کەوتوون و ئابوری وڵاتەکەش لە بارودۆخێکی سەختدایە.

هاوکات ترەمپ هۆشداری توندی دایە ئەو وڵاتانەی هاوکاری تاران دەکەن و رایگەیاند، هەر وڵاتێک رێگە ببات دامەزراوە داراییەکانی، کۆمپانیاکانی، فڕۆکەخانەکانی یان لایەنە حکومییەکانی هاوکاریی خزمەتگوزاری بۆ ئێران دابین بکەن، رووبەڕووی لێکەوتەی ئابوری زۆر قورس دەبنەوە.

سەرۆكی ئەمریكا دەڵێت، گفتوگۆكردن لەگەڵ ئێران تەنها بەفیڕۆدانی كاتە و لێپرسراوێكی ئەمریكاش دەڵێت، رێڕەوێكیان لە گەروی هورمز كۆنترۆڵكردووە.

ماڵپەڕی ئەكسیۆس لەزاری لێپرسراوێكی ئەمریكاوە ئاشكرایكردووە، هێزەكانی ئەمریكا رێڕەوێكی تایبەتیان بۆ چوونەژوورەوە و دەرچوون لە گەروی هورمز كۆنترۆڵكردووە و لە رێگەیەوە رۆژانە نزیكەی 10 ملیۆن بەرمیل نەوت دەگوازرێتەوە بۆ بازاڕەكانی جیهان.

لێپرسراوەكەی ئەمریكا، ئاماژەی بەوەشكردووە، ماوەی دوو مانگە رێڕەوی باشووری گەروی هورمزیان كۆنترۆڵی كردووە و توانای سەربازیی ئێرانیش لەو سنوورەدا بە تەواوی پاشەكشەی كردووە.

دۆناڵد ترەمپ، سەرۆكی ئەمریكاش بە ئەكسیۆسی راگەیاندووە، لە ئێستادا گفتوگۆ لەگەڵ ئێراندا ناكەن، چونكە گفتوگۆكردن لەگەڵ ئەو وڵاتە تەنها بەفیڕۆدانی كاتە و بەهۆی گەمارۆی دەریایی سەر ئێرانیشەوە چیتر گەروی هورمز وەك پێشتر نابێت.

بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ رەیان کلدانی، ئەمینداری گشتیی بزووتنەوەی بابلیون کۆبووەوە.

لە دیدارێکدا کە د. خالید شوانی، سەرپەرشتیاری مەکتەبی سیاسی لە بەغداد ئامادەبوو، دوایین پێشهات و گۆڕانکارییەکان گفتوگۆیان لەبارەوە کرا و دووپات لە بەردەوامیی پەیوەندییەکان و لێکتێگەیشتنی نێوان لایەنەکان کرایەوە.

هەردوولا جەختیان لە کاری پێکەوەیی هەموو لایەنە نیشتمانییەکان کردەوە، لەپێناو پاراستنی سەقامگیری و بەرژەوەندییە باڵاکانی وڵات.

دەستەی راگەیاندن و پەیوەندییەکانی عیراق داوا لە بەکارهێنەرانی کۆڕەک تیلیکۆم دەکات، ژمارەی جێگرەوەی کۆمپانیاکانی تر بۆ هەژمارە دیجیتاڵییەکانیان زیاد بکەن، تا لە راگیرانی کورتەنامەکانی پشتڕاستکردنەوە ڕووبەڕووی لەدەستدانی هەژمارەکانیان نەبنەوە.

دەستەی راگەیاندن و پەیوەندییەکانی عیراق لە راگەیەنراوێکی بەپەلەدا داوا لە تەواوی بەکارهێنەرانی هێڵەکانی کۆڕەک تێلیکۆم دەکات رێکاری پێویست و خۆپارێزی بگرنەبەر بۆ دەستەبەرکردنی بەردەوامیی گەیشتنیان بە هەژمارە جۆراوجۆرەکانیان لە تۆڕە کۆمەڵایەتییەکان و خزمەتگوزارییە دیجیتاڵییەکاندا.

ئاماژەی بەوەشکرد، داوا لە هاووڵاتییان دەکات پێش ئەوەی کورتەنامەکانی پشتڕاستکردنەوە (SMS Validation) لەسەر هێڵەکانی کۆڕەک رابگیرێن، ژمارەیەکی تری جێگرەوە لە کۆمپانیا مۆڵەتدراوەکانی تر (ئاسیاسێڵ یان زەین عیراق) بۆ هەژمارەکانیان زیاد بکەن، یان بەکارهێنانی ئیمەیڵ و بەرنامەکانی توێژینەوەی ئەمنی (Authentication Apps) چالاک بکەن تاوەکو رێگری بگرن لە لەدەستدانی هەژمارەکانیان.

دەستەی راگەیاندن و پەیوەندییەکان جەختیشی کردووەتەوە، ئەم رێکارانە وەک ئامادەکارییەکە بۆ پاراستنی زانیاریی بەکارهێنەران و لە دەستنەدانی هەژمارە دیجیتاڵییەکانیان، هاوشانی بەردەوامیی رێکارە رێکخستنکاری و یاساییەکانی دەستەکە بەرانبەر بە کۆمپانیای کۆڕەک تیلیکۆم.

خاتوو شاناز ئیبراهیم ئەحمەد ئەندامی مەکتەبی سیاسی یەکێتیی نیشتمانیی کوردستان فڕۆکەخانەی نێودەوڵەتی جەلال تاڵەبانی لەشاری سلێمانی بەسەرکردەوە و لەلایەن رێباز محەمەد خەلیل بەڕێوەبەری گشتی و ستافی فڕۆکەخانەوە پێشوازیکران.

لەو دیدارەدا کە باڵیۆز د. محەمەد سابیر، سەرۆک و یوسف زۆزانی، جێگری سەرۆکی دامەزراوەی سەرۆک جەلال تاڵەبانی ئامادەیبوون، خاتوو شاناز چەپکەگوڵی پیرۆزبایی پێشکەش کردن بەبۆنەی ناونانی فڕۆکەخانەی نێودەوڵەتیی جەلال تاڵەبانی و پشتگیری و پشتیوانی بۆ کارەکانیان دەربڕی و هیوای پێشکەوتنی زیاتری بۆ فڕۆکەخانە خواست بۆ خزمەتکردنی هاوڵاتیان و گەشتیاران.

لای خۆیەوە بەڕێوەبەری گشتی فڕۆکەخانە رایگەیاند، ناوی سەرۆک جەلال تاڵەبانی شانازییەکی گەورەیە بۆ سلێمانی و هەموو رۆژهەڵاتی ناوەڕاست و ووزەیەکی زیاتر دەداتە بواری خزمەتگوزاری فڕۆکەوانی و گەشبینین بەپشتیوانیتان، وتیشی بەوپەڕی پەرۆشییەوە کاردەکەین بۆ پێشخستنی فڕۆکەخانە تا لەئاست گەورەیی ناوەکەیدا ببێتە نمونەیەکی پێشکەوتووی فڕۆکەخانەکان.

بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە محەمەد سەمعان ئاغا، پارێزگاری کەرکوک کرد.

لە دیدارێکدا جەخت لە هەماهەنگی و بەهێزکردنی پەیوەندیی نێوان نەتەوە و پێکهاتەکانی کەرکوک کرایەوە، لەپێناو زیاتر خزمەتکردنی خەڵکی شارەکە.

هەر لە دیدارەکەدا بافڵ جەلال تاڵەبانی وتی، کەرکوک نمونەی پێکەوەژیان و تەباییە، پێویستە هەموومان پێکەوە کار بکەین بۆ چەسپاندنی سەقامگیری و دابینکردنی مافی ڕەوای کەرکوکییەکان بەبێ جیاوازی.

لە گەرمیان بڕیارێکی نوێ لەبارەی پرۆسەی دابەشکردنی بەنزین بەسەر ئۆتۆمبێلە بێسەرەتاکاندا دەرکراو شوێن و کاتی وەرگرتنی بەنزینیان بۆ دیاریکرا.

بەپێی راگەیەنراوێکی بەڕێوەبەرایەتیی نەوت و کانزاکانی گەرمیان ، لە پێناو بەرژەوەندیی گشتیی شۆفێران و بۆ رێگریکردن لە دووبارە وەرگرتنەوەی بەنزین لە یەک رۆژدا لەلایەن بەشێک لە ئۆتۆمبێلە بێسەرەتاکانەوە، لە رۆژی پێنجشەممەوە ئۆتۆمبێلە ‌بێتابلۆ و تابلۆ کاتییەکان تەنها لە وێستگە و کاتە دیاریکراوەکاندا دەتوانن بەنزین وەربگرن؛ بە شێوازێک لە کەلار لە (وێستگەی مرواری - گردەگۆزینە) تەنها رۆژانی یەکشەممە و پێنجشەممە، لە رزگاری لە (وێستگەی دەروو) تەنها رۆژانی سێشەممە، و لە کفریش لە (وێستگەی میر) تەنها رۆژانی چوارشەممە بەنزینیان پێ دەدرێت.

نەوت و کانزاکانی گەرمیان جەختیشی کردووەتەوە، لە کات و وێستگە دیاریکراوەکاندا هیچ ئۆتۆمبێلێکی تابلۆدار بەنزینی پێ نادرێت و لە مەودوا پرۆسەی پێدانی بەنزین بە ئۆتۆمبێلە بێسەرەتاکان لە رێگەی تۆمارکردنی (ژمارەی شاسی) دەبێت لە سیستمدا، بە جۆرێک هەر شۆفێرێک لە ماوەی حەوت رۆژدا تەنها یەک جار دەتوانێت بەنزین وەربگرێت.

وتەبێژی یەپەژە دەڵێت، پێویستە بە بەشداری ژنان دوبارە سوپای سوریا بنیادبنرێتەوە و ئامادەشن گفتوگۆ لەسەر هەمو پێشنیازەكان بكەن.

روكسان محەمەد وتەبێژی یەكینەكانی پاراستنی ژن "یەپەژە" لەبارەی تێكەڵكردنی هێزەكانیان لەگەڵ سوپای سوریا رایگەیاند، بابەتی تێكەڵكردنی هێزەكانیان لەگەڵ سوپا و هێزە ئەمنییەكانی سوریا بەكراوەیی ماوەتەوە و رێگری سەرەكی بەردەم گفتوگۆكانیش بۆ گەیشتن بە رێككەوتنی یەكگرتن، ئەوەیە كە دیمەشق دژایەتی ژن دەكات لە پێكهاتەی سوپادا.

وتیشی، پێشنیازی كۆتایی بۆ پەیوەندیكردن بە وەزارەتی ناوخۆوە پێویستی بە گفتوگۆ هەیە و پێویستە دوبارە بنیادنانەوەی سوپای سوریاش بە بەشداری ژنان بێت، یەپەژەش خاوەنی ئەزمونە لە رێكخستن و ئۆپەراسیۆنە سەربازییەكاندا.

وتەبێژی یەپەژە جەختیشیكردەوە، بە چەند مەرجێك ئامادەن گفتوگۆ لەسەر هەموو پێشنیازەكان بكەن، یەكێك لە مەرجەكانیش ئەوەیە كە بە یەك لیوا تێكەڵ ببن و تایبەتمەندییان لەناو سوپادا بپارێزرێت.