مەزڵوم كۆبانێ فەرماندەی گشتی هەسەدە داوا لە ئەحمەد شەرع سەرۆكی قۆناغی راگوزەری سوریا دەكات سەردانی رۆژئاوای كوردستان و ناوچەكانی باكور و رۆژهەڵاتی سوریا بكات.

مەزڵوم كۆبانێ لە چاوپێكەوتنێكدا لەگەڵ پێگەی نۆرس پرێس رایگەیاند، هیوادارن شەرع بتوانێت لەم قۆناغە هەستیارەدا فەرمانرەوایی سوریا بكات و پشتگیری هەسەدەشی بۆ هەر هەوڵێك دوپاتكردۆتەوە كە لە پێناو سەقامگیری و یەكریزی سوریا بدرێت.
هەر لەو چاوپێكەوتنەدا مەزڵوم كۆبانێ ئاشكرایكرد، دیمەشق داوای لێكردون ئەو چەكدارانەی كە بە رەگەز سوری نین لە ریزەكانی هەسەدە دوربخرێنەوە و دۆسیەی ئەمنیش رادەستی دیمەشق بكرێت، بە رادەستكردنی زیندانیكراوانی داعشیشەوە بۆ ئەوەی لە ژێر بەرپرسیارێتی حكومەتی سوریادا بن. هەروەها داوایان لێكراوە دەزگا حكومییەكانی سوریا دوبارە لە ناوچەكانی باكور و رۆژهەڵاتی سوریا دەست بەكار بكەنەوە.

مەزڵوم كۆبانێ رایگەیاندووە، بۆ تاوتوێكردنی ئەو داواكارییانە بە نیازە جارێكی تر سەردانی دیمەشق بكاتەوە .

لە ئیستەنبوڵ 52 كەس دەستگیركران، لە نێویاندا ئەندامانی دەبەپە و هەسەپە و پارتی چەپی سەوز و رۆژنامەنووسیشیان تێدایە.

بەیانی ئەمڕۆ پۆلیسی ئیستەنبوڵ لە ئۆپراسیۆنێكدا چونەتە سەر چەندین ماڵ و پشكنینیان ئەنجامداوە، لەو چوارچێوەیەشدا 52 كەس دەستگیركراون، كە ئەندامانی پارتی هەرێمە دیموكراتییەكان "دەبەپە" و پارتی چەپی سەوز و پارتی سۆسیالیست "هەسەپە" و دوو رۆژنامەنوس لە نێو دەستگیركراوەكاندان.

رێكخراوە مەدەنییەكانیش رایانگەیاندوە، ئەو هەڵمەتی دەستگیركردنە ئیدانە دەكەن، كە حكومەت بیەوێت توركیا بكات بە زیندان.

سبەینێ دادگای فیدراڵی لەسەر سكاڵاكەی سەرۆك كۆماری عیراق كۆدەبێتەوە، كە بۆ پابەندكردنی حكومەتی عیراق بە دابەشكردن و بە بانكیكردنی موچەی موچەخۆرانی هەرێم  تۆماری كردووە.

د. لەتیف رەشید سەرۆك كۆماری عیراق، لە دادگای فیدراڵی سكاڵاكەی دژی سەرۆك وەزیران و سەرۆكی ئەنجومەنی نوێنەران و وەزیری دارایی عیراق تۆماركردووە و تیایدا، داوایكردووە وەزارەتی دارایی عیراق پابەند بكرێت بە دابەشكردنی موچەی ووچەخۆرانی هەرێم و بە بانكیكردنی موچەكانیان.

هەروەها داوایكردووە ئەنجومەنی نوێنەران پابەند بكرێت بە كاركردن بە هەمواری بڕگەی (12) خاڵی (ج) لە یاسای بودجەی گشتی عیراق.

ئەوەش دوای ئەوەدێت، رۆژی 12ـی ئەم مانگە، دادگای فیدراڵی كۆبووەوە و بڕیاردانی لەسەر سكاڵاكەی سەرۆك كۆمار بۆ 18ـی ئەم مانگە دواخست.

سبەینێ گەڕی یەكەمی كۆبوونەوەی وەزیرانی دەرەوەی روسیا و ئەمریكا لە ریاز دەستپێدەكات، كرملنیش هۆكاری دیاریكردنی سعودیە بۆ كۆبوونەوەكە ئاشكرا دەكات.

دیمیتری پیسكۆف، وتەبێژی كرملن رایگەیاند، وڵاتی سعودیەیان دەستنیشانكردووە بۆ بەڕێوەچوونی گفتوگۆكانی ئەمریكا و روسیا لەم هەفتەیەدا، لەنێویشیاندا كۆبوونەوەی پوتن و ترەمپ بە ئامانجی كۆتاییهێنان بە كێشەكانی هەردوو وڵات و جەنگی ئۆكراین كە ماوەی سێ ساڵە بەردەوامە.

دەشڵێت، دۆناڵد ترەمپ لەمیانی پەیوەندییەكەیدا لەگەڵ ڤلادیمیر پوتن لە چوارشەممەی رابردوودا، پێشنیازی سعودیەی كردووە، بەوپێیەی شوێنێكی گونجاوە بۆ هەردوو وڵات.

دووپاتیشیكردەوە، سبەینێ سێشەممە یەكەم كۆبوونەوەی مۆسكۆ و واشنتۆن بە ئامادەبوونی وەزیرانی دەرەوە لە ریاز دەستپێدەكات لەبارەی كۆتاییهێنان بە جەنگی ئۆكراین و ئامادەكاری بۆ كۆبوونەوەی لوتكەی ترەمپ و پوتن.

قوباد تاڵەبانی جێگری سەرۆک وەزیرانی هەرێم راگەینراوێکی سەبارەت بە رێگریکردن لە جوتیارانی کورد لە ناحیەی سەرگەڕان بڵاوکردەوە رایگەیاند: پێچەوانەی دەستور و یاسا سوپا لە دژی خاوەنە رەسەنەكانی زەوی و زاری سەرگەڕان بەكاردەهێنرێت.

دەقی راگەیەنراوەکە.....

هێشتا مانگێک بەسەر پەسندکردنی یاسای هەڵوەشاندنەوەی بڕیارەکانی ئەنجومەنی سەرکردایەتیی بەعسی هەڵوەشاوە تێپەڕ نەبووە کەچی پێچەوانەی دەستور و یاسا سوپا بەکاردەهێنرێت لە دژی خاوەنە رەسەنەکانی زەویوزاری سەرگەڕان.

ئێمە هەمیشە کارمان کردوە و هاندەربووین بۆ بەهێزکردنی گیانی پێکەوەژیان لە کەرکوک، بەکارهێنانی سوپا و رەفتاری لەم شێوەیە هەنگاوێکی مەترسیدارە و بەردەوامیی پێشێلکاری لەم چەشنە داهاتووی پێکەوەژیان دەخاتە مەترسییەوە.

بە تەواوی پشتگیری جوتیاران دەکەین و بە هاوکاری هەموو لایەنەکان لە کەرکوک هەوڵی چارەسەرکردنی یەکجاری ئەم کێشەیە دەدەین و پێداگری دەکەین لەسەر سزادانی یاسایی سەرپێچیکاران و ئەوانەشی فەرمانیان داوە بە بەکارهێنانی سوپا لە دژی جوتیارانی کورد.

دەزگای ئاسایشی هەرێم دەستگیركردنی هەشت تۆمەتباری بە تۆمەتی خراپ بەكارهێنانی تۆڕە كۆمەڵایەتییەكان راگەیاند.

دەزگای ئاسایشی هەرێم لە راگەیەنراوێكدا ئاماژەی بۆ ئەوەكرد، بەڕێوەبەرایەتی ئاسایشی پارێزگای سلێمانی بە مەبەستی بەرەنگاربوونەوەی بڵاوكراوە نەشیاوەكان و بە بڕیاری داواكاری گشتی، هەشت تۆمەتباری خراپ بەكارهێنانی تۆڕەكۆمەڵایەتییەكانی دەستگیركرد.

راشیگەیاند، تۆمەتباران لە رێگەی گرتە ڤیدیۆیی و لایڤەكانیان بابەتی نەشیاویان بڵاوكردوەتەوە و كاریگەری نەرێنییان لەسەر تاك و خێزان هەبووە.

لە بەشێكی تری راگەیەنراوەكەدا هاتووە، لەسەر داوای هاووڵاتییان بۆ زیاتر پاراستنی بەها كۆمەڵاتییەكان، ئەو تۆمەتبارانە دەستگیركران و رووبەڕوی یاسا كرانەوە.

سبەینێ لیژنەی دارایی ئەنجومەنی نوێنەران لەگەڵ وەزیری دارایی عیراق كۆدەبێتەوە، تایبەت بە موچەی مانگی 12ـی ساڵی رابردووی موچەخۆرانی هەرێم و ناكۆكییە داراییەكانی هەولێر و بەغداد.

پەیامنێری كوردسات نیوز لە بەغداد رایگەیاند، لە كۆبوونەوەكەدا تاوتوێی كێشە و گرفتە داراییەكانی نێوان هەولێر و بەغداد دەكرێت، هاوكات، پرسیار ئاڕاستەی وەزیری دارایی عیراق دەكرێت لەسەر پرسی بە بانكیكردنی موچەی هەرێم و پابەندییەكانی حكومەتی هەرێم لەوبارەیەوە، لەنێویاندا خستنەڕووی داتا و زانیاریی پێویست موچەخۆران بۆ وەزارەتی دارایی عیراق.

ئەوەشی خستەڕوو، لیژنەی دارایی و وەزیری دارایی عیراق بۆ یەكلاییكردنەوەی چارەنوسی موچەی مانگی 12ـی ساڵی رابردووی موچەخۆرانی هەرێم گفتوگۆ دەكەن. پەیامنێری كوردسات نیوز راشیگەیاند، چاوەڕوان دەكرێت لەسەر چارەنووسی موچەی مانگی 12، لیژنەی دارایی لەگەڵ وەزارەتی دارایی هەرێمیش كۆببێتەوە.

وەفدی ئیمڕ‌‌اڵی بۆ گفتوگۆكردن لەسەر پرۆسەی ئاشتی لە توركیا گەیشتە سلێمانی و سبەینێ لەگەڵ سەرۆكی یەكێتیی نیشتمانیی كوردستان كۆدەبێتەوە.

ئێوارەی ئەمڕۆ، وەفدی ئیمڕ‌‌اڵی كە پێكهاتوون لە سری سورەییا ئۆندەر، پەروین بوڵدان و كاسكین بایندر، هاوسەرۆكی گشتی دەبەپە و ئەندامانی فەرمانگەی یاسایی و وتەبێژی كۆمیسیۆنی پەیوەندییەكانی دەرەوەی دەم پارتی گەیشتنە شاری سلێمانی، بە مەبەستی گفتوگۆكردن لەسەر پرۆسەی ئاشتی لە توركیا.

وەفدەكە سبەینێ‌ لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان و لێپرسراوانی یەكێتی كۆدەبنەوە بۆ گفتوگۆكردن لەسەر پەیامی عەبدوڵا ئۆجەلان رێبەری زیندانیكراوی"پەكەكە" و دەستپێكردنەوەی پرۆسەی ئاشتی لە توركیا و باكوری كوردستان.

وەفدی ئیمراڵی لە 28ی 12ی 2024 لە زیندانی ئیمڕاڵی سەردانی ئۆجەلانیان كرد، دواتر پەیامی ئۆجەلانیان گەیاندە حزبە سیاسییەكانی توركیا، لە ئێستاشدا لە هەرێمی كوردستان ئەو پرسە تاوتوێ دەكەن.

مەکتەبی سیاسی یەکێتیی نیشتیمانیی کوردستان سەبارەت بە رێگریکردن لە جوتیارانی کورد لە ناحیەی سەرگەڕان راگەیەنراوێکی بڵاوکردەوە و رایدەگەیەنێت: چارەسەری ململانێكانی زەوی و زار و موڵكداری هەرگیز بە بەكارهێنانی ناڕەوای هێز و پەلاماردانی هاوڵاتیان سەرناگرێت

دەقی راگەینراوەکە:

یەکێتیی نیشتمانیی کوردستان داوا لە حکومەتی ئیتحادی دەکات رێگا لە دەستتێوەردانەکانی هێزەکانی سوپا بگرێت لە کەیسی زەویزاری دێهاتەکانی کەرکوک و دەوروبەری و فەرمان بە یەکەکانی سوپای وڵات بکات پابەندی بەرپرسیارێتیی نیشتمانیی و دەستوری خۆی بێت لە دەستوەرنەدان لە گرفتە ناوخۆییەکانی ناو کۆمەڵگەی عیراقی و پێکهاتەکانی.

یەکێتیی نیشتمانیی پێی وایە  ئیشی سوپا نییە بەشێک بێت لە گرفتە ناوخۆییەکان و چارەسەری ململانێکانی زەویوزار و موڵکداریش  هەرگیز بە بەکارهێنانی ناڕەوای هێز و پەلاماردانی هاوڵاتیان سەرناگرێت و رێگا دروستەکەی چارەسەری ناکۆکی لەسەر موڵکوماڵ نییە.چونکە لایەنگیری  دامەزراوەکانی دەوڵەت ، بەتایبەتیش  سوپا کە ئەرکی پاراستنی سنوورەکانی وڵاتە ،  بۆ هەر  لایەنێک لە هەر ململانێیەکی ناوخۆییدا پێشینەیەکی  مەترسیدارە و پێشێلکردنی دەستوری وڵاتیشە، هەروەک پێشێلکردنی یاسا پەسەندکراوەکانی ئەنجومەنی نوێنەرانیشە کە تازەکیی بڕیارەکانی رژێمی پێشووی بەعسی لەسەر موڵک و زەویوزاری جوتیاران هەڵوەشاندۆتەوە.

ئێمە پێمان وایە دیاردەی خۆهەڵقورتاندنی  هێزەکانی سوپای  لە کێشەی  زەویوزار لە ناوچەیەکی هەستیاری وەکو ناوچە دابڕاوەکانی کەرکوک هیچ ژینگەیەکی تەندروست بۆ بەرقەرارکردنی یاسا و دەستوور دابین ناکات، بەڵکو ئاڵۆزتریشی  دەکات. ئەرکی سەرۆک وەزیرانی حکومەتی ئیئتلافیشە روونتر  ئەم بەرپرسیارێتییە نیشتمانیی و دەستورییە بگرێتە ئەستۆ و بە هیممەتتر لەسەری بێتە جواب.

مەکتەبی سیاسیی

یەکێتیی نیشتمانیی کوردستان

لە ناحیەی سەرگەڕان گرژی لەنێوان جوتیاران و سوپای عیراق درووستبوو.

پەیامنێری کوردستان نیوز رایگەیاند، ئەمڕۆ جارێکی دیکە گرژی لەنێوان جوتیارانی کورد و سوپای عیراق لەسنوری ناحیەی سەرگەڕان دروستبوو، دەشێڵت رێگری لەجوتیاران دەکرێت زەوییەکانیان بکێڵن.

ئاماژەی بەوەشکرد، سوپای عیراق دەیانەوێت دەست بەسەر تراکتۆری جوتیارانی کورد لە ناحیەی سەرگەڕان بگرن، جوتیارانیش رێگری لە سوپای عیراق دەکەن و رووبەروویان وەستاونەتەوە.

دوای ئەو بەرزبوونەوە بەرچاوەی لەماوەی رابردوودا نرخی زێڕ بەخۆیەوە بینی، ئەمڕۆ نرخی زێڕ لە بەرزیدا ماوەتەوە و یەک ئۆنسە بەرامبەر بە دوو هەزار و 899 دۆلارە.

ئەمڕۆ دووشەممە، نرخی یەک گرام زێڕ لە بازاڕەکانی جیهاندا بە 93 دۆلار و 205 سەنتە.

نرخی زێڕ لە بازاڕەکانی هەرێمدا بەمجۆرەیە:

یەک مسقاڵ زێڕی عەیار 18 بە 525 هەزار دینارە

یەک مسقاڵ زێڕی عەیار 21 بە 613 هەزار دینارە

یەک مسقاڵ زێڕی عەیار 24 بە 700 هەزار دینارە

چوارچێوەی هەماهەنگی رەتیدەكاتەوە دژی بانگهێشتكردنی ئەحمەد شەرع بێت بۆ لووتكەی بەغداد و دەڵێت، پەیوەندییان لەگەڵ سوریا دۆستانەیە.

داخل رازی نوێنەری ئیئتیلافی دەوڵەتی یاسا كە بەشێكە لە چوارچێوەی هەماهەنگی شیعەكان رایگەیاند، بانگهێشتانامەی رەسمییان بۆ ئەحمەد شەرع سەرۆكی سوریا بۆ قۆناغی راگوزەر ناردووە بە مەبەستی بەشداریكرن لە لوتكەی عەرەبی لە بەغداد.

وتیشی، هەموو ئەو هەواڵانەی لە میدیاكان بڵاودەكرێنەوە كە چوارچێوەی هەماهەنگی دژی ئەو بانگهێشنامەیە بێت ، دوورن لە راستیەوە.

ئاماژەی بەوەشكرد، عیراق پەیوەندییەكی دۆستانەی لەگەڵ سوریا هەیە و گۆڕانی كەسایەتییە سیاسییەكانیش كە ئەو وڵاتە بەڕێوەدەبەن، نابێتە هۆی تێكچوونی ئەو پەیوەندییە و وەك خۆی دەمێنێتەوە.

بڕیارە لە مانگی ئایاری داهاتوو لوتكەی عەرەبی لە بەغداد بەڕێوەبچێت، وەزارەتی دەرەوەی عیراقیش بانگهێشتمانەی ئاراستەی وڵاتانی بەشدار لەو لوتكەیە دەكات.

قوباد تاڵەبانی رایگەیاند، بۆ پێکهێنانی حکومەت لە هەندێک بابەتدا گەیشتوونەتە رێککەوتن.

قوباد تاڵەبانی جێگری سەرۆکی حکومەتی هەرێم رایگەیاند، کۆبوونەوەکانی پێکهێنانی حکومەت بەردەوامن و هەنگاوی باش چوونەتە پێشەوە.

وتیشی، وەفدەکان چەندین کۆبوونەوەیان لە ئاستی جیادا کردووە و زۆر بابەت باسکراون.

دەشڵێت، " لە هەندێک بابەتدا گەیشتووینەتە رێککەوتن، خەریکین رێبکەوین لەسەر هەندێک بابەتی دیکە و هەندێک بابەتی دیکەش ماوە کە رێکنەکەوتووین لەسەری، ئینشەڵا دەگەینە ئەنجام و حکومەتێکی نوێمان دەبێت".

مانگی 10ی ساڵی رابردوو دوای دوو ساڵ لە دواخستنی هەڵبژاردنی خولی شەشەمی پەرلەمانی کوردستان ئەنجامدرا، لە ئێستاشدا لایەنەکان بە ئاڕاستەی پێکهێنانی حکومەتی نوێ و کابینەی 10 سەرقاڵی گفتوگۆن.

 ەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و رایگەیاند، پلەکانی گەرما نزمتر دەبنەوە.

کەشناسیی هەرێم رایگەیاندووە، ئەمڕۆ دووشەممە، ئاسمان نیمچەهەور و لە ناوچە شاخاوییەکانی سنووری رۆژهەڵات هەوری تەواو دەبێت، لەگەڵ کەمێک نمەباران و بەفر لەو ناوچانە، پاشان لە کاتەکانی دوای نیوەڕۆدا کەش بەگشتی سەقامگیر دەبێتەوە.

ئاماژەی بەوەشکردووە، ئەمڕۆ پلەکانی گەرما 1 بۆ 3 پلەی سیلیزی نزم دەبنەوە بەتایبەتی لە ناوچەکانی رۆژهەڵاتی هەرێم.

ئاماژەی بەوەشكردووە، سبەینێ سێشەممە، ئاسمان ساماڵ دەبێت و لەکاتەکانی شەو بۆ نیمچەهەور دەگۆڕێت و پلەکانی گەرما هەر لە نزمیدا دەمێننەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: 18 پلەى سیلیزى

سلێمانی: 14 پلەى سیلیزى

دهۆک: 16 پلەى سیلیزى

کەرکوک: 19 پلەى سیلیزى

زاخۆ: 17 پلەى سیلیزى

هەڵەبجە: 15 پلەى سیلیزى

حاجی ئۆمەران: 1 پلەى سیلیزى

سۆران: 13 پلەى سیلیزى

گەرمیان: 18 پلەى سیلیزى

ژمارەی ئەو کەسانەی بەهۆی شەڕ لە غەززە گیانیان لەدەستداوە گەیشتووەتە زیاتر لە 48 هەزار کەس و زیاتر لە 111 هەزار کەسیش بریندار بوون.

تەندروستی فەڵەستین رایگەیاندووە، لەماوەی ٢٤ کاتژمێری رابردوودا، تەرمی حەوت فەڵەستینی دەرهێنراونەتەوە لەژێر داروبەردوی خانووە رووخاوەکاندا و بەوەش ژمارەی گیانلەدەستدان لە کەرتی غەززە گەیشتووەتە ٤٨ ھەزار و ٢٧١ کەس.

ئاماژەی بەوەشکردووە، هەر لەو ماوەیەدا پێنج برینداری دیکە گەیەندراونەتە نەخۆشخانەکانی کەرتی غەززە و بەوەش ژمارەی بریندارەکان بۆ ١١١ ھەزار و ٦٩٣ کەس بەرزبووەوە.

لە تشرینی یەکەمی ساڵی 2023ـەوە دوای ئەوەی حەماس بە زیاتر لە پێنج هەزار موشەک هێرشی کردە سەر ئیرائیل، شەڕی نێوان ئیسرائیل و حەماس دەستی پێکرد.

سەرەڕای هەوڵەکان و فشارە نێودەوڵەتییەکان بۆ راگرتنی جەنگ، بەڵام تەنها ئاگربەست راگەیەنراوە، لەدوای دەستبەکاربوونەوەی تڕەمپیشەوە هەوڵەکان بۆ راگرتنی جەنگچڕتر کراونەتەوە.

حكومەتی بەریتانیا رایگەیاند، ئامادەیە بۆ ناردنی هێزی سەربازی بۆ ئۆكراین ئەگەر پێویست بكات.

كەیر ستارمەر سەرۆك وەزیرانی بەریتانیا لە چاوپێكەوتنێكی لەگەڵ رۆژنامەی دەیلی تەلەگرافی بەریتانی ،ئاماژەی بەوەكرد، وڵاتەكەی ئامادەیە هێزی سەربازی رەوانەی ئۆكراین بكات، ئەوەش لە ئەگەری پێویست بۆ دەستەبەركردن و پاراستنی ئاسایشی بەریتانیا و ئەوروپا.

ستارمەر راشیگەیاند، ئامادەیە بۆ ناردنی هێزی ئاشتیپارێز بۆ ئۆكراین ئەگەر بێتو رێككەوتن لەگەڵ فلادیمیر پوتن سەرۆكی روسیا بكرێت بۆ كۆتایهێنان بە جەنگ، ئەگەر نا ئەو هێزە سەربازیەكەی ناكاتە مەترسیەوە رەوانەی ئۆكراینیان ناكات چونكە ئەگەری هەیە پوتن جارێكی دیكە هێرشبكاتەوە.

ستارمەر وتیشی،  بەریتانیا ئامادەیە ڕۆڵی پێشەنگ  بگێڕێت لە بەرگری و ئاسایشی ئۆكراین، بڕیاریشە تا ساڵی 2030 سێ ملیار و 78 ملیۆن دۆلار وەك هاوكاری بەرگری بداتە ئۆكراین.