هەواڵەکان
بەهۆی شەپۆلی بارانبارینی ئەم دواییە و لێڵبوونی ئاوی دەریاچەی دوکان، پرۆسەی دابەشکردنی ئاوی خواردنەوە لە شاری سلێمانی و دەوروبەری بە شێوەیەکی کاتی راگیرا.
بەختیار تاهیر، بەڕێوەبەری ئاوی سلێمانی لە لێدوانێکی تایبەتدا بە کوردسات نیوز رایگەیاند، بەهۆی بارانبارینی خوڕی چەند رۆژی رابردوو لە شاری سلێمانی و دەوروبەری، سەرچاوەکانی دابەشکردنی ئاو لە دەریاچەی دووکان لێڵ بوون، بەو هۆیەشەوە پرۆسەی دابەشکردنی ئاو راگیراوە.
ئاماژەی بەوەکردووە، ئەم بڕیارە بۆ پاراستنی پڕۆژەکانی ئاو و رێگری لە گەیشتنی زیان بە سیستمی گواستنەوە دراوە، جەختیش کراوەتەوە کە دابەشکردنی ئاو تا کاتی ئاساییبوونەوەی ئاستی لێڵییەکە بە راگیراوی دەمێنێتەوە.
بە ئامانجگرتنی هێزەکانی پێشمەرگە لەلایەن گروپە چەکدارەکانەوە هەوڵێکە بۆ تێکدانی سەقامگیری و ئاسایشی ناوچە جیاوازەکان، وەزارەتی پێشمەرگەش دەلێت، دەبێت سنورێک بۆ ئەو هێرشانە دابنرێت.
وەزارەتی پێشمەرگەی هەرێم راگەیەنراوێكی بڵاوكردەوە و ئاشکرایکرد، شەوی رابردوو بە درۆنی بۆمبڕێژکراو هێرش کراوەتە سەر بارەگایەکی هێزەکانی پێشمەرگە لە سنوری چەمچەماڵ.
ئاماژەی بەوەشکرد، هێرشەکە لەلایەن گروپە تیرۆرستییەکانەوە ئەنجامدراوە و بە توندی ئیدانەی هێرشەکان دەکەن کە ئامانج لێیان تێکدانی سەقامگیری ناوچەکەیە.
وەزارەتی پێشمەرگە ئەوەشی خستەڕوو، داوا لە فەرماندەیی هێزە چەکدارەکانی عیراق دەکەن سنور بۆ ئەو هێرشە بێ پاساوانە دابنێت.
ترەمپ مۆڵەتی 48 سەعاتدا دەداتە ئێران و هەڕەشەی تێکشکاندنی کەرتی وزەی ئەو وڵاتە دەکات.
دۆناڵد ترەمپ، سەرۆکی ئەمریکا، هەڕەشەیەکی توند ئاراستەی تاران دەکات و رایگەیاند، ئەگەر لە ماوەی 48 سەعاتدا گەرووی هورمز بە تەواوی و بەبێ هیچ هەڕەشەیەک بەڕووی هاتوچۆی نێودەوڵەتیدا نەکرێتەوە، ئەوا ئەمریکاژێرخانی وزە و وێستگەکانی کارەبای ئێران خاپوور دەکات.
ترەمپ لە هەژماری تایبەتی خۆی لە تۆڕی کۆمەڵایەتی "ترووس سۆشیاڵ" نووسیویەتی: "ئەمریکا ئامادەیە گەورەترین وێستگەکانی وزەی ئێران خاپوور بکات ئەگەر ئاستەنگ بۆ ئەو رێڕەوە ئاوییە ستراتیژییە دروست بکرێت."
سەرۆکی ئەمریکا لە وەڵامی رەخنەکانی رۆژنامەی "نیویۆرک تایمز"دا جەختی کردەوە کە سوپای وڵاتەکەی توانیویەتی "بە تەواوی هێزی ئێران تێکبشکێنێت" و ئامانجە سەربازییەکانی پێش وادەی دیاریکراو پێکاوە.
ترەمپ دەڵێت: "سەرکردایەتیی ئێران کۆتایی هاتووە، هێزی دەریایی و ئاسمانییان نەماوە و هیچ بەرگرییەکیان بۆ نەماوەتەوە؛ ئێستا ئەوان داوای رێککەوتن دەکەن، بەڵام من نامەوێت!".
بەیانی ئەمڕۆ ئەمریكا و ئیسرائیل بە توندی هێرشیان كردە سەر تاران و میدیاكانی ئێرانیش دەڵێن، هێرشەكان لەسەرەتای دەستپێكردنی جەنگەوە تا ئێستا توندترین بوون.
فەرماندەیی ناوەندیی ئەمریكا "سێنتكۆم" بڵاویكردوەتەوە ، هێزەكانی ئەمریكا بەردەوامن لە هێرشی سەربازی ورد دژی تاران بە ئامانجی لەناوبردنی توانا سەربازییەكان.
هەروەها سوپای ئیسرائیل رایگەیاندووە ، بەرەبەیانی ئەمرۆ لە رێی چەند هێرشێكەوە بە توندی ناوەڕاستی تارانیان كردوەتە ئامانج ، ئەوەش دوای ئەوەی ئێران لە رێی دوو موشەكەوە دوو شاری باشوری ئیسرائیلی كردە ئامانج . میدیاكانی ئێرانیش رایانگەیاندووە ، هێرشەكانی ئەم بەیانییانەی ئەمریكا و ئیسرائیل بۆ سەر تارانی پایتەخت ، توندترین بووە لەسەرەتای جەنگەكەوە تا ئێستا .
بنیامین ناتانیاهۆ سەرۆك وەزیرانی ئیسرائیلیش لە دوای هێرشەكانی ئێرانەوە بۆ سەر هەر دوو شاری دیمۆنا و عەراد ، هەرەشەی بەردەوامیدانی بە هێرشەكان بۆسەر ئێران كردو رایگەیاند ، شەوی رابردوو، شەوێكی زۆر سەختی جەنگ بوە و سورن لەسەر ئەوەی بەردەوامیی بدەن بە هێرشكردنە سەر دوژمنەكانیان لە هەموو بەەركانەوە .
میدیای ئیسرائیلیش ئاشكرایان كردووە ، ژمارەی بریندارانی هێرشەكەی موشەكییەكەی ئێران بۆسەر دیمۆنا و عەراد ، بەرزبووەتەوە بۆ 175 كەس .
حەڤدەیەمین فێستیڤاڵی نێودەوڵەتیی بەدرخان لە ئیتاڵیا بە بەشداریی چەندین نوسەر و کەسایەتیی ناوداری کورد و ئیتاڵی بەڕێوەچوو و لە کۆتاییشدا بەیاننامەی کۆتایی فێستیڤاڵەکە بڵاوکرایەوە
دەقی بەیاننامەکە..
بەیاننامەی کۆتایی حەڤدەیەمین فێستیڤاڵی نێودەوڵەتی بەدرخان
جەنەڕاڵ شەریف پاشای خەندان
1865 - 1951
پێشەنگی دیبلۆماسیی کورد
رۆژی پێنجشەممە 19.03.2026 لە هۆڵی Compleso Monumentale di san Giovanni Corso Mazzini لە شاری Catanzaroی هەرێمی کالابیریای ئیتاڵیا ڕێوڕەسمی فێستیڤاڵ، کە لەلایەن سەرپەرشتیاران، دکتۆر جاسم تۆفیق خۆشناو ، مامۆستای زانکۆ لە ئیتاڵیا، حەمید ئەبوبەکر بەدرخان ، بەرپرسی ئەکادیمیای بەدرخان بۆ توێژینەوەی ڕۆژنامەوانی و کەلتور و فەیسەڵ خۆشناو ، سەرۆکی ڕێکخراوی دیاکۆ ئامادەسازییان بۆ کردبوو، بەبەشداریی سەرۆکی ئەنجومەنی شاری کەتەنزاڕۆ د. جانمیکێلی بۆسکۆ، بەرپرسی کەلتوریی کەتەنزارۆ خاتوو Danatella Monteverdi، رەفیق غەفور ئەندامی کۆنسەی سەرکردایەتیی کۆنگرەی نەتەوەیی کورد KNK و د.هیمداد حوسێن، سەرۆکی یەکێتی نووسەرانی کورد، د. ناندۆ کەستانییە کەسایەتی زانستی و مێژوویی و ڕۆژنامەنووسیی دیاری ئیتاڵیای شاری کەتەنزارۆ و میوانانی فیستیڤاڵ لە کوردستان و ئەوروپاوە، سەعات ١٠ی سەرلەبەیانی رۆژی پێنجشەممە بە سرودی نەتەوەی ئەی ڕەقیب و سرودی جەژنی نەورۆز و بەدرخانی خاکپەروەرم دەستی پێکرد.
سەرەتا، بەئامادەبوونی پەیکەرتاش زاهیر سدیق، ئاڵای کوردستان لەسەر پەیکەری شەریف پاشای خەندان لادرا، کە هونەرمەندی ناوبراو لە سلێمانیەوە بەسپۆنسەریی د. تەها رەسوڵ دروستی کردبوو و بەهاوکاریی حەمید بەدرخان لە ئەڵمانیاوە گەیاندبوویە کەتەنزارۆی ئیتالیا. دواتر سەرۆکی ئەنجومەنی شاری کەتەنزارۆ د. جان میکێلێ بۆسکۆ، دوای ئەویش بەرپرسی کەلتوریی شارەکە وتاریان پێشکەش کرد و وتاری پارێزگاری سلێمانی د. هەڤاڵ ئەبوبەکر لەلایەن پڕۆفیسۆر هێرش رەسوڵەوە خوێندرایەوە و هەریەک لەد. جاسم خۆشناو و حەمید بەدرخان و فەیسەڵ خۆشناو سەرپەرشتیارانی فیستیڤاڵ وتاریان پێشکەش کرد. هەروەها جەنەڕاڵی ئیتالیی خانەنشین (Paspuale Martinello) وتارێکی پێشکەش کرد و پاشان رێزان ساڵح ئاغا نوێنەری حکومەتی هەرێمی کوردستان لە ئیتالیا و ڤاتیکان وتارێکی پێشکەش کرد.
سەعات ٤ی پاشنیوەڕۆ سەرجەم بەشدارانی فیستیڤاڵ چوونە سەر گۆڕی جەنەڕاڵ شەریف پاشای خەندان و دەیان چەپکە گوڵیان لەسەر گۆڕەکەی دانا.
رۆژی دووەم، هەینی 20.03.2026 سەعات ١٠ی سەرلەبەیانی کارەکانی فیستیڤاڵ دەستی پێکردەوە و پارێزگاری کەتەنزارۆ پرۆفیسۆر Dr. Nicola Fiorita. وتارێکی پێشکەش کرد و گوتی ئێمە قەرزداری ئێوەین کە بیرتانخستینەوە گۆڕی ئەو پیاوە مەزنە (شەریف پاشا) لە شاری ئێمەیە. دواتر(Dr . Salvatore Bullotta) سەرۆکی دیوانی پارێزگای کەتەنزارۆ لە دەفتەری تۆماری مردووان، وەفاتنامەی شەریف پاشای خوێندەوە، کە دوای مردنی لە کەتەنزارۆ لەو دەفتەرە تۆمارکراوە. ئەوە یەکلایکرایەوە کە گۆڕی شەریف پاشا لە کەتەنزاڕۆیە.
هەر لە درێژەی چالاکییەکاندا، لە پانێڵی یەکەمدا دەربارەی کورد و دیبلۆماسیی هەریەک لە د. کارزان محەمەد، د. شێرکۆ حەمەمین و هاوکار حەمە فەرەج، لە پاشان پەیامی هەریەک لە هۆمەر شێخموس کەسایەتیی سیاسیی، جەنابی باڵیۆز، بەکر فەتاح، لە پەیوەندییەکانی یەکێتی ئەوڕوپا لە وەزارەتی دەرەوەی عیراق، د. ئیبتسام ئیسماعیل، سەرۆکی بنکەی گەڵاوێژ، د. زەردەشت حاجۆ سەرۆکی ڕوومەت Peni Kurd، باهۆز مستەفا، هاوڕێی نزیکی هونەرمەندی شێوەکار قەرەنی جەمیل...
لە کۆتا ڕۆژدا پانێڵی کورد و لۆبی کەلتوری هەر یەک لە پڕۆفیسۆر د. هێرش ڕەسوڵ و د. ابڕاهیم سەعید پێشکەشکران.
شایانی باسە هەر لە حەڤدەیەمین فێستیڤاڵی نێودەوڵەتی بەدرخان دوو کۆرسی خوێندن دابینکرا بۆ ئەو خوێندکارانەی دەخوازن توێژینەوەی زانستی سەبارەت بە مێژووی کورد بکەن ، هەروەها پێشنیارکرا ڕۆژی ژیانئاوایی شەریف پاشا (۱۲/۲۲) بکرێتە ڕۆژی دیپلۆماسیی کوردی و ساڵانە چالاکی جۆراوجۆر سازبکرێت، لە تەوەرێکی زۆر گرنگدا، جوامێر بەختیار مستەفا تیشکی خستە سەر هەندێ لایەنی شاراوەی ژیان و کەسێتی شەریف پاشا کە چەندین وێنەی بڵاونەکراوە و بەڵگەنامەی لە خۆگرتبوو، ئەوەی جێگای دڵخۆشیبوو، پەیکەری شەریف پاشای لە نێو مۆنیمێنی قەڵای کەتەنزاڕۆ داندرا.
پێشانگای کتێب و شێوەکاری بۆ هونەرمەندان محەمەد فەتاح و ساڵح نەجار کرایەوە.
بۆ ئامادەکاری فێستیڤاڵ 13 کتێب چاپکراوە و سێ ڕۆژنامە بە ناوی جەنەڕاڵ شەریف پاشا بە زمانی کوردی، فەڕەنسی و ئیتاڵی چاپ و بڵاوکرایەوە.
لەو کارە مەزنەدا ناکرێت ڕۆڵی کاریگەری دکتۆر جاسم خۆشناو بە هەند وەنەگرین کە زۆرماندوو بووە بۆ سەرکەوتنی ئەو فێستیڤاڵە.
لە کۆتاییدا سوپاسی سەرۆک کۆماری عیراق، دکتۆر لەتیف ڕەشید و دکتۆر هاوڕێ دارۆ شێخ نوری، شوان قادر ئەندامانی مەکتەبی سیاسیی ی.ن.ک و ڕێزان حەمە ساڵح، نوێنەری حکومەتی هەرێمی کوردستان لە ئیتاڵیا و ڤاتیکان، دکتۆر هەڤاڵ ئەبوبەکر پارێزگاری سلێمانی دەکەین بۆ هاوکاری دارایی و پشتگیرییان بۆ سەرخستنی کارەکانی فێستیڤاڵ. هیوادارین پاش یەک ساڵ بێ ماندووبوون لە ئاست شکۆی جەنەڕاڵ شەریف پاشای خەندان دا بووبین.
لیژنەی ئامادەکاری حەڤدەمین فێستیڤاڵی نێودەوڵەتی بەدرخان
21.نەورۆزی 2026
فەرماندەیی ناوەندیی هێزەكانی ئەمریكا 'سێنتکۆم' رایگەیاند، توانیویانە هەڕەشەكانی ئێران بۆسەر کەشتیوانیانی نێودەوڵەتی بە تەواوی لاواز بكەن
ئەدمیراڵ براد كووپەر فەرماندەی فەرماندەیی ناوەندیی ئەمریكا 'سێنتكۆم' رایگەیاند، لە سێ هەفتەی رابردوودا زیاتر لە هەشت هەزار ئامانجی سەربازیی ئێرانیان بە ئامانج گرتووە و لەنێویشیاندا 130 كەشتی بۆردومان كراون.
وتیشی، تەنها دوو رۆژ لەمەوبەر سوپای ئەمریكا درێژترین هێرشی مەیدانی لە مێژووی خۆیدا ئەنجامدا، ئەوەش بە بەكارهێنانی موشەكێكی جیاواز كە ژێرخانی سەربازیی ئێرانی لەناو برد.
ئاماژەی بەوەشدا، بەردەوامن لە لەناوبردنی هەڕەشەی چەندین دەیەیەی ئێران بۆ سەر هاتوچۆی ئازادی بازرگانی لە گەرووی هورمز و تواناكانی شەڕكردنی ئێران بە شێوەیەكی بەرچاو كەمیكردووە.
لێپرسراوێكی باڵای ئەمریكا رایگەیاند، هەواڵگری ئەمریكا و ئیسرائیل زانیارییان هەیە كە موجتەبا خامنەیی لە ژیاندایە، بەڵام دەرنەكەوتنی ئاماژەیەكی مەترسیدارە بۆ ئێران.
پێگەی ئەكسیۆس لە زاری لێپرسراوێكی ئەمریكاوە بڵاویكردەوە، ئەمریكا و ئیسرائیل زانیاری هەواڵگرییان هەیە كە ئاماژە بەوە دەكات هێشتا موجتەبا خامنەیی لە ژیاندایە، بەڵام هیچ بەڵگەیەكیان نییە لەبارەی ئەوەی موجتەبا خامنەیی فەرمان دەردەكات یاخود كەسانی دیكە .
باسی لەوەشكردوە، دەرنەكەوتنی موجتەبا خامنەیی رێبەری نوێی ئێران لە جەژنی نەورۆزدا ئاماژەیەكی مەترسیدارە و ئاماژەیە بۆئەوەی ئێران تووشی قەیرانی سەركردایەتی بووە.
ئەو لێپرسراوە ئەمریكییە ئاماژەی بەوەشكردووە، كوشتنی لاریجانی بۆشایی دەسەڵاتی لە ئێران فراوانتر كردوە و سوپای پاسداران خەریكی پڕكردنەوەی ئەو بۆشاییەیە.
عەبدوڵا ئۆجەلان رێبەری زیندانیکراوی 'پەکەکە' پەیامێکی نوێی لە ئاهەنگی جەژنی نەورۆزی قەندیل خوێنرایەوە و تێیدا جەختی لە پێکەوەژیان و برایەتی گەلان کردەوە
عەبدوڵا ئۆجەلان رێبەری زیندانیکراوی 'پەکەکە'، بەبۆنەی جەژنی نەوەرۆزەوە پەیامێکی بڵاوکردەوە و لە ئاهەنگی نەورۆز لە قەندیل خوێنرایەوە.
ئۆجەلان لە پەیامەکەدا جەختی لە پێکەوەژیان و برایەتی گەلان کردەوە و رایگەیاند، نەورۆز رۆحی بەرخۆدان و ژیانەوەی لەناو گەلەکانماندا زیندوو کردووەتەوە.
ئەوەشی رونکردەوە، ئێستا لاپەڕە شاراوەکانی مێژوو هەڵدەدرێنەوە، ئەگەری ئاشتی لە نێوان گەلان و دامەزراندنی "نەتەوەی دیموکراتیک" زیاد دەکات، هەرچەندەش نەریتی دەوڵەتە مەزهەبییەکانی وەک سوننە و شیعە و نەریتە ناسیۆنالیستییەکان تێبپەڕێنرێن، دەرفەتی ژیانی ئازاد لە نێوان گەلاندا بەهێزتر دەبێت.
بافڵ جەلال تاڵەبانی سەرۆکی یەکێتیی نیشتمانیی کوردستان بەبۆنەی جەژنی نەورۆزەوە پەیامێکی پیرۆزبایی بڵاوکردەوە و تێیدا ئاماژە بەوە دەکات: نەورۆز هانمان دەدات بەرۆحیەتی پێکەوەیی کاربکەین بۆ پاراستنی سەقامگیری وڵات
بافڵ جەلال تاڵەبانی سەرۆكی یەكێتیی نیشتمانیی كوردستان، لە رێگەی پەیامێكەوە بەشداری ئاهەنگی نەورۆزی شاری ئامەدی كرد و لە پەیامەكەیدا رایگەیاند، بە زووترین كات لەگەڵ عەبدوڵا ئۆجەلان بەرنامەكە بە یەكەوە تەواو دەكەن، بە زووترین كات بە ئازادی دەتبینن.
سەرۆکی یەکێتی ئاماژەی بەوەشکرد، لەم كاتە هەستیارەدا ئەوەی كە گرنگە یەكڕیزی هەموو كوردە و یەكڕیزی هەرچوارپارچەی كوردستانە.
هەر لە پەیامەكەدا بۆ ئۆجەلان دەڵێت، بە زووترین كات دەچێتە لای ئۆجەلان و بە یەكەوە بەرنامەكەی تەواو دەكەن و بە زووترین كات بە ئازادی دەیبینێت.
سكرتێری گشتی نەتەوە یەكگرتووەكان پلانێك بۆ هێوركردنەوەی ئاڵۆزییەكانی گەرووی هورمز دەخاتەروو هۆشداریش دەدات لە بەردەوامبوونی داخستنی ئەو رێرەوە ئاوییە.
لە چاوپێكەتنێكیدا لەگەڵ گۆڤاری پۆلیتیكۆ ئەنتۆنیۆ گۆتێرێس، سكرتێری گشتیی نەتەوە یەكگرتووەكان، ئامادەیی رێكخراوەكەی نیشانداوە بۆ بەشداریكردن لە پلانێكی نێودەوڵەتی هەمەلایەنە بە مەبەستی هێوركردنەوەی ئاڵۆزییەكانی وڵاتانی كەنداو و پاراستنی گەرووی هورمز.
گۆتێرێس رایگەیاندوە، نەتەوە یەكگرتووەكان دەتوانێت ڕۆڵێكی سەرەكی بگێڕێت لە چاودێریكردنی ئاسایشی گەرووەكە، جا چ لە ڕێگەی میكانیزمێكی چاودێری نێودەوڵەتی بێت یان دروستكردنی چوارچێوەیەكی گفتوگۆ بۆ لایەنە پەیوەندیدارەكان.
هۆشداریشی دا لە پەككەوتنی هاتوچۆ لە گەرووی هورمز رایگەیاند، هەنگاوێكی لەوشێوەیە دەبێتە هۆی سەرهەڵدانی قەیرانێكی ئابووری جیهانی، بۆیە داوای وەستاندنی دەستبەجێی هێرشەكان بۆ سەر كەشتی و دامەزراوە نەوتییەكانی كرد.
وەزیری دەرەوەی ئێران دەڵێت، ئاگربەست قبوڵ ناكەن، بەڵام دەستپێشخەری لە هەر هەوڵێك دەكەن بۆ كۆتایهێنان بەشەڕ
عەباس عراقچی، وەزیری دەرەوەی ئێران لە چاوپێكەوتنێكدا ئاماژەی بۆ ئەوەكردوە، ئاگربەست قبوڵ ناكەن، لەبەرئەوەی نایانەوێت سیناریۆی ساڵی رابردوو دووبارە بێتەوە، بەڵام پێشوازی لە هەر دەستپێشخەرییەك دەكەن بتوانێت بە تەواوی كۆتایی بەو شەڕە بهێنێت.
جەختی لەوەشكردوەتەوە، لە ئێستادا هەندێك وڵات هەوڵی دۆزینەوەی چارەسەرێك دەدەن، بەڵام پێناچێت ئەمریكا ئامادەبێت هێرشەكانی رابگرێت، بەڵام دەبێت شەڕ بەتەواوەتی و هەمیشەیی كۆتایی پێبێت، گەرەنتی هەبێت ئەو رەوشەی ئێستا دووبارە نەبێتەوە. هەروەها دەبێت ئەو زیانانەی بەر ئێران كەوتووە قەرەبوو بكرێنەوە.
سەبارەت بە گەرووی هورمزیش رایگەیاندووە، گەروەكە كراوەیە تەنها بۆ ئەوانە داخراوە كە هاوكاری دوژمنانی ئێران دەكەن و هێرش دەكەنە سەریان، بۆ وڵاتانی تر دەتوانن كەشتییەكانیان بە گەروەكەدا تێپەڕببن و ئامادەن رێڕەوی سەلامەتییان بۆ بكەنەوە، ئەگەر پەیوەندییان پێوەبكەن .
لە ئەنجامی بۆدرومانكردنی بارەگایەكی حەشدی شەعبی چەكدارێكی ئەو هێزە لە خورماتوو كوژرا و شەوی رابردووش سێ جار بە درۆن هێرشكرایە سەرناوەندی دیپلۆماسی ئەمریكا لە بەغداد.
راگەیاندنی حەشدی شەعبی بڵاویكردەوە، درەگانی شەوی رابردو بارەگای فەوجی چواری سەر بەلیوای 52 هێزەكانیان لە فڕۆكەخانەی سەربازی حلیۆە لەسنوری قەزای خورماتوو بۆردومان كراوە و بەهۆیەوە چەكدارێكیان كوژراوە و چوارچەكداریش برینداربوون.
پەیامنێری كوردسات نیوز لە خورماتوو رایگەیاند، بەیانی ئەمرۆش ئەو بارەگایەی حەشدی شەعبی لە سنوری قەزای خورماتوو دووجار بۆردومانكراوەتەوە، بەڵام تائێستا قەبارەی زیانەكان نەزانراوە.
لەلایەكی ترەوە پەیامنێری كوردسات نیوز لە بەغداد رایگەیاند، درەنگانی شەوی رابردوو سێجار بە درۆن هێرشكراوەتەسەر ناوەندی دیپلۆماسی ئەمریكا لەناو فرۆكەخانەی بەغداد، یەكێك لە درۆنەكان خراوەتە خوارەوە دوو درۆنەكەی دیكەش لە نێو باڵەخانەی ناوەندەكە كەوتوونەتە خوارەوە بەڵام یەكێكیان تەقیوەتەوە.
دۆناڵد ترەمپ، سەرۆکی ئەمریکا رایگەیاند، بە بەهێزی هێرش دەکەنە سەر ئێران و سەرکەوتنیان بەدەست هێناوە و هەر کاتێک بیەوێت کۆتایی بە جەنگەکە دەهێنێت، بەڵام ئێستا نایەوێت ئەو کارە بکات.
سەرۆکی ئەمریکا دڵنیای دا، کە شکستیان بە ئێران هێناوە و لە کاتێکی گونجاودا گەروی هورمز دەکرێتەوە.
دەشڵێت؛ کلاتێک خۆی بیەوێت کۆتایی بە جەنگ دەهێنێت و پێشیوایە ئیسرائیل کاتێک ئامادەی کۆتاییهێنان بە جەنگ دەبێت کە ئەمریکا بییەوێت.
وتیشی رەنگە پلانم هەبێت سەبارەت بە دوورگەی خارگ، بەڵام باسی ناکەم و وردەکاری ئاشکرا ناکەم.
لەبارەی گەروی هورمزیشەوە ،ترەمپ داوای لە وڵاتانی تری وەک چین، کۆریای باشور و ئەندامانی ناتۆ کرد، کە بەشداری بکەن لە پرۆسەی کردنەوەی گەروەکەدا، چونکە ئەمریکا گەروەکە بەکارناهێنێت و پێوستە ئەو وڵاتانەی گەروەکە بەکاردەهێنن بەرپرسیارێتی هەڵبگرن.
ترەمپ ئاماژەی بەوەشکردوە، شتێکی باش دەبێت ئەگەر چین و ژاپۆن بەشداربن لە کردنەوەی گەروەکەدا.
بە بۆنەی جەژنی نەورۆزەوە، بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێکی بڵاوکردوەتەوە و تێیدا هاتووە؛جەژنی نەورۆزی کوردان و سەری ساڵی نوێی کوردی کە هاوکاتە لەگەڵ راپەڕینی کەرکوک قودسی کوردستان لە کوردستانیان پیرۆزبێت.
ئاماژەی بەوەشکردوە، نەورۆز بۆ ئێمەی کورد هێمای ئاشتی، برایەتی و یەکگرتوویی گەلەکەمانە، هانمان دەدات بە هەمان رۆحیەتی پێکەوەیی کاربکەین بۆ پاراستنی سەقامگیریی وڵات و خەڵکە خۆشەیستەکەمان.
دەقی پەیامەکە
جەژنی نەورۆزی کوردان و سەری ساڵی نوێی کوردی کە هاوکاتە لەگەڵ راپەڕینی کەرکوک قودسی کوردستان لە کوردستانیان پیرۆزبێت.
نەورۆز بۆ ئێمەی کورد هێمای ئاشتی، برایەتی و یەکگرتوویی گەلەکەمانە، هانمان دەدات بە هەمان رۆحیەتی پێکەوەیی کاربکەین بۆ پاراستنی سەقامگیریی وڵات و خەڵکە خۆشەیستەکەمان.
لەم جەژنە نەتەوەییەدا، دووپات لە پابەندبوونمان بە یەکێتیی نەتەوەیی و یەکڕیزیی گەلەکەمان و تەبایی نێوان لایەنە سیاسییەکان دەکەمەوە، تاوەکو هەموومان پێکەوە کاربکەین بۆ پاراستنی میلـلەتەکەمان لە هەر مەترسییەک کە لەم کاتەدا ناوچەکەمانی گرتووەتەوە.
بافڵ جەلال تاڵەبانی
سەرۆکی یەکێتیی نیشتمانیی کوردستان
ئیسماعیل قائانی، فەرماندەی فەیلەقی قودسی ئێران، لە پەیامێکی نوێدا بەبۆنەی جەژنی رەمەزانەوە، ستایشی هێزەکانی "بەرەی مقاوەمە" کرد و رایگەیاند، کە هێزە چەکدارەکانی ناوچەکە بە شێوەیەکی سەربەخۆ و بە بڕیاری خۆیان هاتوونەتە ناو جەنگی دژ بە ئەمریکا و ئیسرائیل بۆ بەرگریکردن لە کۆماری ئیسلامی ئێران.
دوای ماوەیەکی زۆر بێدەنگی، ئیسماعیل قائانی بێ دەنگی شکاندوە و پەیامێکی بڵاوکردوەتەوە، کە یەکگرتویی بەرخۆدان هێزی نەتەوەی ئیسلامە و کابوسە بۆ خۆبەزلزانانی جیهان و بووەتە مۆتەکەی ترس بۆ ئیسرائیل.
لە پەیامەکەیدا، قائانی بەڵێنی داوە، کە لە داهاتودا ئەم "بەرەی مقاوەمە" سوپرایز و کردەوەی شۆکهێنەری تریان دەبێت بۆ ئەمریکا و ئیسرائیل.
لە بەشێکی تری پەیامەکەیدا، فەرماندەی فەیلەقی قودس جەختی لە بەردەوامی رێبازی رابەرانی پێشوی ئێران ( خومەینی وعەلی خامنەیی) کردوەتەوە.
وتوشیەتی، کە رێبازەکە بە پشتیوانی رابەری نوێ، موجتەبا خامنەیی بە بەهێزی بەردەوام دەبێت و مردنی سەرکردەکانیش تەنها دەبێتە هۆی بەهێزتربوونی زیاتری "بەرەی مقاوەمە" لە داهاتودا.
دۆناڵد ترەمپ، سەرۆکی ئەمریکا، لە پەیامێکی تونددا هێرشی کردە سەر هاوپەیمانی ناتۆ و بە ترسنۆک و "پڵنگێکی کارتۆنی" ناوی بردن، ئاماژەی بەوەش کرد کە بەبێ ئەمریکا ئەو هاوپەیمانییە هیچ هێزێکی نییە.
لە پەیامێکیدا لە تروس سۆشیال، کە خۆی خاوەنداریتی دەکات، سەرۆکی ئەمریکا رەخنەی لە وڵاتانی ئەندامی ناتۆ گرتوە و دەڵێت؛ نەیانویستووە بەشداری شەڕی راگرتنی پڕۆژە ئەتۆمییەکەی ئێران بکەن، بەڵام ئێستا کە شەڕەکە لە رووی سەربازییەوە براوەتەوە، تەنها خەریکی گلەییکردنن لە بەرزیی نرخی نەوت.
ناوبرا جەختیشیکردوەتەوە، ئەو وڵاتانە ئامادە نین یارمەتیدەر بن لە کردنەوەی گەروی هورمز، کە هۆکاری سەرەکیی گرانیی نرخەکانە، لە کاتێکدا ئەو کارە تەنها مانۆڕێکی سادەی سەربازییە و سەرکێشییەکی کەمی تێدایە.
دۆناڵد ترمپ وڵاتانی ناتۆی بە ترسنۆک وەسفکردوە و دەڵێت؛ ئەو هەڵوێستەیان لەبیر ناکەین.