هەواڵەکان
بەرگری شارستانی هەرێم راگەیەندراوێکی بڵاوکردوەتەوە و هاووڵاتییان ئاگادار دەکاتەوە کە بەهۆی ئەو شەپۆلە بارانی لە رۆژانی رابردودا هەرێمی کوردستانی گرتوەتەوە، بوەتە هۆی روتانەوەی خاک و رەنگە بەهۆیەوە مین و تەقەمەنی چێندراوی کۆن دەرکەوتبن.
ئاماژەی بەوەشکردوە، لە کاتی گەشت و سەیران، بە تایبەتی بۆ ناوچە شاخاوییەکان و دەشتەکان، پێویستە ئاگاداری خۆتان بن و نزیکی شوێنە مەترسیدارەکان مەکەونەوە.
دەقی راگەیەنداراوەکە
هاووڵاتیانی خۆشەویستی هەرێمی کوردستان.. دوای ئەو شەپۆلە بارانەی کە لە ماوەی ڕابردوودا هەرێمی کوردستانی گرتەوە و بووە هۆی ڕووتانەوەی خاک، بەتایبەتی لە ناوچە شاخاوییەکان و دەشتەکان، هەروەها بەرزبوونەوەی ئاستی ئاو لە چەم و ڕووبارەکان و تەقینی کانیاوەکان، ئەم بارودۆخە دەتوانێت ببێتە هۆی دەرکەوتنی مین و تەقەمەنییە چێنراوەکان کە لە سەردەمی جەنگەکانی ڕابردوودا لە سنووری هەرێمدا چێنراون.
هەروەها، بەهۆی لافاو و بەرزبوونەوەی ئاستی ئاو، ئەگەری گواستنەوەی زیندەوەرە مەترسیدارەکان وەک مار و دووپشک بۆ ناوچە ئاوەدانییەکان زیاتر دەبێت.
بۆ ئەم مەبەستە، داوا لە سەرجەم هاووڵاتیانی خۆشەویست دەکەین:
• لە کاتی گەشت و سەیران، بە تایبەتی بۆ ناوچە شاخاوییەکان و دەشتەکان، زۆر ئاگاداری خۆتان بن.
• لە نزیکبوونەوە بۆ شوێنە مەترسیدارەکان و ناوچە ناناسراوەکان خۆتان بپارێزن.
• منداڵان لە شوێنە مەترسیدارەکان دوور بخەنەوە و چاودێرییان بکەن.
تێبینی گرنگ:
لە کاتی بینینی هەر جۆرە بۆمب، مین یان تەقەمەنییە چێنراوەکان، تکایە بە زووترین کات پەیوەندی بکەن بە:
• هێڵی گەرمی دەزگای مین (١٨٢)
• هێڵی گەرمی بەرگری شارستانی (١١٥)
بەهیوای سەلامەتی بۆ هەمووان
ڕاگەیاندنی بەڕێوەبەرایەتیی گشتیی بەرگریی شارستانیی هەرێمی کوردستان
د.لەتیف رەشید، سەرۆک کۆماری عیراق ئەمڕۆ دووشەممە لە بەغداد، پێشوازیکرد لە محسن مەندەلاوی، سەرۆکی هاوپەیمانی ئەساسی عیراقی.
لە دیدارەکەدا، دوایین گۆڕانکاری و پێشهاتەکانی گۆڕەپانی عیراق و پەرەسەندنە نێودەوڵەتی و هەرێمییەکان تاوتوێ کران.
سەرۆک کۆمار جەختی لە گرنگیی پەیڕەوکردنی دیالۆگ و هێورکردنەوەی رەوشەکە کردەوە بۆ رێگری لە هەر گرژییەک، هەروەها ئاماژەی بە سیاسەتی هاوسەنگی عیراق کرد لە پاڵپشتیکردنی سەقامگیریی ناوچەکە و پاراستنی بەرژەوەندیی گەلان.
هاوکات جەختیشی کردەوە لەسەر بەردەوامبوون لە رێڕەوەکانی چاکسازی و باشترکردنی ئاستی خزمەتگوزاری و بژێوی هاووڵاتییان، بە جۆرێک کە هاوکار بێت لە چەسپاندنی ئاسایش و سەقامگیری و بەهێزکردنی متمانەی هاووڵاتییان بە دامەزراوەکانی دەوڵەت.
لای خۆشییەوە، محسن مەندەلاوی پاڵپشتی هاوپەیمانییەکەی بۆ ئاڕاستە و رێنماییەکانی سەرۆک کۆمار دەربڕی و ئاماژەی بە گرنگیی یەکخستنی هەڵوێستە نیشتمانییەکان کرد بۆ رووبەڕووبوونەوەی ئاڵنگارییەکانی ئێستا، لەپێناو بەدیهێنانی بەرژەوەندییە باڵاکانی وڵاتدا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان لە چەند دیدارێکی جیاوازدا چاویکەوت بە هەریەک لە د. رێواز فایەق، ئەندامی مەکتەبی سیاسی، وەستا رەسوڵ و سالار مەحمود، ئەندامانی سەرکردایەتی، ئەمەل جەلال و هەڵۆ قەرەناوی، تێکۆشەر و پێشمەرگەی دێرین.
سەرۆک بافڵ بە گرنگییەوە ئاماژەی بە رۆڵ و پێگەی نوێی ژمارەیەک لە هەڤاڵان لە ئۆرگانە جیاجیاکانی یەکێتی کرد و رایگەیاند، دۆخی ناوچەکە بەهۆی جەنگ و پێشهاتە سەربازییەکانەوە ناهەموارە و وادەخوازێت کاری لەپێشینەی هەمووان بۆ پاراستنی سەقامگیریی هەرێمی کوردستان بێت.
لە دیدارەکاندا سەرۆک بافڵ پشتیوانی بۆ هەڤاڵان دووپاتکردەوە و روونکردنەوەی لەبارەی سیاسەت و ستراتیجی یەکێتی خستەڕوو و جەختی لە پابەندبوون بە چارەسەرکردنی ئاشتییانەی کێشەکان و دوورخستنەوەی هەرێمی کوردستان لە ململانێکان کردەوە.
ئیسپانیا لە رەوشێکی سەختدایە و لە بڕیارێکی نوێدا کایەی ئاسمانی وڵاتەکەی بەڕووی ئەو فرۆکە جەنگییەکانەی ئەمریکادا داخست، کە بەشداریان کردوە لە هێرشکردنە سەر ئێران
مارگرێتا رۆبلێس، وەزیری بەرگری ئیسپانیا رایگەیاند، ئیسپانیا ئاسمانی وڵاتەکەی بەڕووی فڕۆکە ئەمریکییەکان داخستووە کە بەشدارن لە هێرشەکانی سەر ئێران، ئەمەش لە کاتیكدایە پێشتریش رەتیکردبوەوە بنکە سەربازییەکانی بۆ هێرشکردنە سەر ئێران بەکاربهێندرێت.
ئەمڕۆ دووشەممە، وەزیری دەرەوەی ئیسپانیا، بە رۆژنامەنووسانی راگەیاندوە، ئەوان رێگە بە کەڵک وەرگرتن لە بنکە سەربازییەکان یان ئاسمانیان نادەن کە پەیوەستبێت بە هێرشکردنە سەر ئێران.
لای خۆشیەوە، کارلۆس کوێربۆ، وەزیری ئابوری ئیسپانیا رایگەیاندوە، ئەم بڕیارە بەشێکە لەو بڕیارانەی، کە پێشتر حکومەتی ئیسپانیا داویەتی بۆ بەشدارینەکردن لە جەنگەکەدا.
ئەمە لە کاتێكدایە، دۆناڵد ترەمپ، سەرۆکی ئەمریکا هەڕەشەی پچڕاندنی پەیوەندییە بازرگانییەکانی لەگەڵ مەدرید کردبوو، بەهۆی ئەوەی رێگەی نەدا ئەمریکا بنکەکانی ئیسپانیا لە شەڕەکەدا بەکاربهێنێت.
مارک رۆبیۆ، وەزیری دەرەوەی ئەمریکا رایگەیاند، لە رێگەی ناوەندگیرەکانەوە پەیام و گفتوگۆی راستەوخۆ لە نێوان ئێران و ئەمریکا هەیە، ئاماژەی بەوەش کرد، کە دۆناڵد ترەمپ رێگەی دیپلۆماسی و گەیشتن بە ئەنجامی پێ باشترە.
مارک روبیۆ، هۆشداری توندی ئاراستەی تاران کرد و رایگەیاند کە رێگە نادەن ئێران ببێتە خاوەنی چەکی ئەتۆمی یان هەیمەنە بەسەر گەروی هورمزدا بسەپێنێت، کە ئەمە وەک هەڕەشەیەک بۆ سەر بازاڕی جیهانی و وڵاتانی ناوچەکە دەبینن.
ناوبراو، جەختی لەوەش کردەوە، کە پێویستە ئێران دەستبەرداری پشتگیریکردنی میلیشیاکان و بەرهەمهێنانی درۆن و موشەک بێت.
ئاماژەی بەوەش دا، ئەگەر تاران ئەم هەنگاوانە بنێت و بەرنامە ئەتۆمییەکەی رابگرێت، دەکرێت داهاتویەکی گەش چاوەڕێی ئەو وڵاتە بکات.
بۆ گەیشتن بە رێککەوتنی کۆتایی، سەرۆکی ئەمریکا هەڕەشەی وێرانکردنی تەواوەتی ژێرخانی وزە و ئابوری لە تاران دەکات.
دۆناڵد ترەمپ، سەرۆکی ئەمریکا، هۆشداری دەداتە دەسەڵاتدارانی نوێی ئێران و مەرجی قورس بۆ کۆتاییهێنان بە ئۆپراسیۆنە سەربازییەکانی وڵاتەکەی دەخاتە ڕوو.
ترەمپ ئاشکرا کرد، وڵاتەکەی لە گفتوگۆی "جدی و ژیرانە"دایە لەگەڵ رژێمێکی نوێ لە ئێران بۆ کۆتاییهێنان بە جەنگ، ئاماژەی بەوەش کرد کە پێشکەوتنی گەورە بەدەستهاتووە.
سەرۆکی ئەمریکا جەختی کردەوە، دەبێت گەرووی هورمز بە خێرایی بۆ بازرگانی بکرێتەوە، ئەگەر نا رووبەڕووی کاردانەوەی توند دەبنەوە.
ترەمپ هۆشداری دا ئەگەر رێککەوتن نەکرێت، ئەوا ئەمریکا بە وێرانکردن و "سڕینەوەی تەواوەتی" سەرجەم وێستگەکانی کارەبا، بیرە نەوتەکان و دوورگەی خارگ کۆتایی بە مانەوەی خۆی لە ئێران دەهێنێت.
ئەوەشی خستەڕوو، ئەم هەنگاوە وەک تۆڵەیەک دەبێت بۆ خوێنی ئەو سەربازە ئەمریکییانەی کە لە ماوەی 47 ساڵ "حوکمی تیرۆر"ی رژێمی پێشوو لەناوبراون.
ترەمپ لە کۆتایی پەیامەکەیدا ئاماژەی بەوە کردووە کە تا ئێستا بە مەبەست دەستیان بۆ ئەو شوێنە ستراتیژییانە نەبردووە، بەڵام ئەگەر رێککەوتن ئەنجام نەدرێت، ئەوا وێستگەکانی ئاویش (Desalinization plants) دەبنە ئامانج.
وەزارەتی خوێندنی باڵای حکومەتی هەرێم لە راگەیەندراوێکدا باس لە پڕۆسەی خوێندن دەکات بە شێوازی 'ئۆنلاین' و باس لە کاتی تاقیکردنەوەکان دەکات.
وەزارەتی خوێندنی باڵای حکومەتی هەرێم راگەیەندراوێکی بڵاوکردووەتەوە و تێیداهاتووە: پڕۆسەى خوێندن لە رۆژی 30ـی 3ـی 2026 بەشێوەى ئۆنلاین و دیجیتاڵى لە سەرجەم زانکۆکانى هەرێمى کوردستان دەست پێدەکاتەوە، بە زانکۆ و پەیمانگە تایبەتەکانیشەوە، هەروەها دەسەڵات دەدرێتە زانکۆ و پەیمانگەکان بەپێى شوێنى جوگرافى و تایبەتمەندى بەشە زانستییەکان بۆ گرتنەبەرى هەر شێوازێکى خوێندنى ئۆنلاین و دیجیتاڵى و بەکارهێنانى یەکێک لە پلاتفۆرمە ستانداردە جیهانییەکان".
لە راگەیەندراوەکەشدا هاتووە: سەرەڕاى خوێندنى ئۆنلاینى راستەوخۆ، زانکۆ و پەیمانگەکان پێویستە تەواوى وانەکان بەشێوەى ئەلیکترۆنى دەسەبەر بکەن لەسەر ئەو پلاتفۆرمەى کە بەکارى دەهێنن بۆ وانە وتنەوە، هەروەها کۆلیجە پزیشکییەکان جگە لەو بابەتانەى کە بە ئۆنلاین وەریدەگرن، بۆ وانە پراکتیکى و تیۆرییەکانى تر دەتوانن بچنەوە ناو نەخۆشخانەکان و بەردەوامى بەخوێندن بدەن".
وەزارەتی خوێندنی باڵا دەشڵێت: ئەو وانانەى کە بەشێوەى ئۆنلاین و راستەوخۆ دەگوترێنەوە، پێویستە لەکاتى دەوامى رەسمی و خشتەى وانەکانى رۆژانەدابن، واتە نابێت بخرێنە دواى دەوامى رەسمی و شەوان، سەبارەت بە وانە پراکتیکییەکان، ئەو وانانەى کە دەکرێت لە رێگەى ئۆنلاین بوترێنەوە بەپێى پسپۆڕییە جیاوازەکان، ئەوا بەشێوەى ئۆنلاین دەگوترێنەوە، ئەو وانە پراکتیکیانەشى کە پێویستى بەناو کەمپەس دەبێت، زانکۆ چاوەڕێى هەڵسەنگاندنى بارودۆخى هەفتەکانى دواتر دەکەن بۆ ئەوەى لەکاتى ئاسایى بوونەوەى بارودۆخەکە لەناو کەمپەس وانەکان بوترێنەوە".
بەپێی راگەیەندراوەکە: پێویستە لەسەر زانکۆ و پەیمانگەکان بە لەبەرچاوگرتنى بارودۆخەکە بەپێى خشتەیەکى گونجاو بۆ هەر کۆلیج و بەشێکى زانستى تاقیکردنەوەکان رێکبخرێن، بەمەرجێک رەچاوى هاتوچۆى خوێندکارانى دەرەوەى شار بکرێت، لەهەمان کاتیشدا خشتەى کۆلیجەکان لەیەک کاتدا نەبن، ئەمەش بەمەبەستى دروستنەبوونى قەرەباڵغى ناو زانکۆ و بەشە ناوخۆییەکان".
وەزاەرتی خوێندنی باڵا دەشڵێت: کۆرسى خولەکانى پێداگۆجى و سەنتەرەکانى زمان بەشێوەى ئۆنلاین بەردەوام دەبن، هەروەها گفتوگۆى نامەکانى (ماستەر، دکتۆرا) هەروەک پێشتر وەزارەتمان بڕیارى لەبارەوە دابوو، تەنها سەرۆک و ئەندامانى لیژنە و سەرپەرشتیار و توێژەر ئامادەى گفتوگۆکە دەبن.
لە کۆتایی راگەیەندراوەکەشدا هاتووە: بەڕێوەبەرایەتى ئایتى لەسەرۆکایەتى سەرجەم زانکۆ و پەیمانگەکان لەم ماوەیەدا بەردەوام بەئەرکى خۆیان هەڵسن بۆ چارەسەکردنى هەر گرفتێکى تەکنیکى بۆ کۆلێج و بەشەکان و هاوکاری کردنى خوێندکاران و قوتابیان، بۆ هەر پرسێک کە دێتەپێشەوە و لەم گشتاندنەدا ئاماژەى پێنەکراوە، ئەوا زانکۆ و پەیمانگەکان پەیوەندى بە فەرمانگە پەیوەندیدارەکانى ناو دیوانى وەزارەت دەکەن بەمەبەستى رێوشوێنى کردنیان.
دوای جێگیرکردنی سیستمی خوێندنی ئەلیکترۆنی، بڕیاری راگرتنی گەڕانەوەی خوێندکاران بۆ ناو پۆلەکان و ئەنجامنەدانی تاقیکردنەوەکان لە ناو خوێندنگەکان درا.
وەزارەتی پەروەردەی حکومەتی هەرێمی کوردستان رایگەیاند، سەرجەم هەڵسەنگاندن و تاقیکردنەوەکانی ناو خوێندنگە حکومی و ناحکومییەکان رادەگیرێن و لەم قۆناغەدا خوێندکاران بە هیچ شێوەیەک ناگەڕێنەوە ناو هۆڵەکانی خوێندن.
وەزارەتەکە سەبارەت بەو تاقیکردنەوانەی کە کاتەکانیان بەستراوەتەوە بە دەرەوەی وڵاتەوە نووسراوێکی رەسمیدا بۆ بەڕێوەبەرایەتییە گشتییەکان ناردووە، مەرجی داناوە کە هەر قوتابخانەیەک تاقیکردنەوەی نێودەوڵەتی هەبێت و پابەندبوونێکی لەسەر بێت، پێویستە پێشوەختە بە نووسراوی رەسمی وەزارەت ئاگادار بکاتەوە، تا کاری ئاسانکاری و رێگەپێدانی تایبەتی بۆ بکرێت.
بەپێی پێشبینییەکانی کەشناسی لە 48 سەعاتی دهاتوودا، ناوچە جیاجیاکانی هەرێم تاوە باران و هەورەبروسکە دەبێت و لە ناوچە شاخاوییە سنورییەکانیش ئەگەری کەمێک بەفربارین هەیە.
بەڕێوەبەرایەتی گشتی کەشناسی و بوومەلەرزەزانی هەرێم پێشبینییەکانی بۆ 48 سەعاتی داهاتوو بڵاوکردەوە، کە تێیدا ئاماژە بە دابارینی نمەباران و ئەگەری تەرزە دەدات لە چەند ناوچەیەک.
کەشناسی هەرێم رایگەیاند، ئەمڕۆ ئاسمان لەنێوان نیمچە هەور و هەوری تەواو دەبێت، لە زۆربەی ناوچەکان نمەباران دەبارێت و لە ناوچە شاخاوییە سنوورییەکانیش کەمێک بەفر دەبارێت.
ئەوەشی خستەڕوو، لە نێوان نیوەڕۆ بۆ ئێوارە، ئەگەری تاوە باران و بروسکە لە سنووری پارێزگاکانی (دهۆک، هەولێر و ئیدارەی گەرمیان) هەیە، لەگەڵ ئەگەری بارینی تەرزە.
کەشناسی راشیگەیاند، سبەینی ئاسمان لە نێوان هەور و نیمچە هەور دەبێت، نمەباران لە ناوچە جیاجیاکان بەردەوام دەبێت، هاوکات لە دوای نیوەڕۆوە ئەگەری تاوە باران، بروسکە و تەرزە لە سنوری (هەولێر، سلێمانی، کەرکوک و ئیدارەی گەرمیان) هەیە.
ئاشکراشیکرد، لە کاتەکانی ئێوارەدا کاریگەری شەپۆلەکە کۆتایی دێت و کەشوهەوا بەرەو ساماڵبوونی دەچێت.
بەرزترین پلەکانی گەرمای پێشبینیکراو بۆ ئەمرۆ:
هەولێر 16 پلەی سیلیزی
پیرمام 12 پلەی سیلیزی
سۆران 12 پلەی سیلیزی
حاجی ئۆمەران 4 پلەی سیلیزی
سلێمانی 13 پلەی سیلیزی
چەمچەماڵ 14پلەی سیلیزی
دهۆک 12 پلەی سیلیزی
زاخۆ 12 پلەی سیلیزی
هەڵەبجە : 12 پلەی سیلیزی
گەرمیان : 18 پلەی سیلیزی
ترەمپ تاوتوێی ئۆپراسیۆنێکی سەربازی دەکات بۆ دەستبەسەرداگرتنی یۆرانیۆمی پیتێندراوی ئێران و رۆژنامەیەکیش ئاشکرایدەکات، پلانەکە بۆ دەستبەسەرداگرتنی 454 کیلۆگرام یۆرانیۆمی ئێرانە.
رۆژنامەی "وۆڵ ستریت جۆرناڵ" لە راپۆرتێکی نوێدا ئاشکرای کرد، دۆناڵد ترەمپ، سەرۆکی ئەمریکا تاوتوێی ئەنجامدانی ئۆپراسیۆنێکی سەربازیی ئاڵۆز دەکات بۆ دەستبەسەرداگرتن و گواستنەوەی بڕێکی زۆر لە یۆرانیۆمی پیتێنراوی ناو خاکی ئێران.
رۆژنامەکە ئاشکرایکردووە، پلانەکە بریتییە لە دەرهێنانی نزیکەی 1000 پاوەند (454 کیلۆگرام) یۆرانیۆم لەناو دامەزراوەکانی ئێران، وەک هەنگاوێکی سەرەکی بۆ ڕێگریکردن لە گەیشتنی تاران بە چەکی ئەتۆمی.
لێپرسراوانی ئەمریکا ئاماژە بەوە دەکەن، ئەمە ئەرکێکی "پڕ لە مەترسی و ئاڵۆزە"، چونکە پێویست دەکات هێزەکانی ئەمریکا بۆ ماوەی چەند رۆژێک یان زیاتر لە ناو خاکی ئێراندا بمێننەوە.
"وۆڵ ستریت جۆرناڵ ئەوەشی خستوەتەڕوو، سەرۆکی ئەمریکا هێشتا بڕیاری کۆتایی لەسەر پێدانی فەرمانی دەستپێکردنی ئۆپراسیۆنەکە نەداوە و نیگەرانە لەو مەترسییانەی کە رووبەڕووی سەربازانی ئەمریکا دەبنەوە، بەڵام بە گشتی پێشوازی لە بیرۆکەکە دەکات بۆ پەکخستنی پڕۆژە ئەتۆمییەکەی ئێران.
ئەم پێشهاتە لە کاتێکدایە کە گرژییەکانی نێوان واشنتۆن و تاران گەیشتوونەتە ئاستێکی نوێ و کۆشکی سپی جەخت لەسەر بژاردەی سەربازی دەکاتەوە بۆ ڕێگریکردن لە هەر هەوڵێکی ئێران بۆ بەرهەمهێنانی چەکی کۆکوژ.
دوای هێرشە چڕەكانی فڕۆكە جەنگییەكانی ئەمریكا و ئیسرائیل بۆسەر چەند ئامانجێكی هەستیار لە تاران و تەورێز،ئێران و حوسییەكانی یەمەن وەلامی توندی ئیسرائیلیان دایەوە .
بە پێی هەواڵی میدیاكانی ئێران بەرەبەیانی ئەمڕۆ، فڕۆكە جەنگییەكانی ئەمریكا و ئیسرائیل فڕۆكەخانەی مێهراباد و دامەزراوەی پیشەسازییەكانی تاران و یەكەیەكی پێترۆكیمیاویان لە تەورێز بۆردومان كرد.
لای خۆشییەوە، عەباس عەلی ئابادی وەزیری وزەی ئێران ئاماژەی بەوە كرد كە دامەزراوەكانی كارەبا لە تاران و پارێزگای ئەلبورز كراونەتە ئامانج و بوەتەهۆی پچرانی كارەبا ، بەڵام دواتر توانراوە كارەبا بۆهەردوو شارەكە بگەرێنرێتەوە
هاوكات لە ئەنجامی بۆردومانێك بۆ سەر باڵەخانەیەكی نیشتەجێبوون بۆ سەر شاری زەنجانی ئێران 3 كەس كوژران
لەبەرامبەریشدا ئێران بە هێرشێكی موشەكی بەرفراوان و حوسییەكانی یەمەنیش بە درۆن بەندەری ئیلاتیان لە ئیسرائیل كردووەتە ئامانج، چەند ناوچەیەكی دیكەی ئیسرائیلیش لەلایەن ئێرانەوە بە ئامانج گیران.
كوەیتیش خستنەخوارەوەی 5 فڕۆكەی بێفڕۆكەوانی ئێران لە شوێنە گرنگەكانی وڵاتەكەی راگەیاند
سەرۆکایەتی ئەنجومەنی نوێنەرانی عێراق کۆبوونەوەیەکی لەگەڵ سەرۆک فراکسیۆنەکان ئەنجامدا و تێیدا بڕیاردرا، رۆژی شەممە 11ـی نیسان دیاریبکرێت بۆ ئەنجامدانی دانیشتنی تایبەت بە هەڵبژاردنی سەرۆک کۆمار.
سەرۆکایەتی ئەنجومەنی نوێنەران ئاشکرایکرد، رۆژی شەممە 11ـی نیسان وەک وادەی هەڵبژاردنی سەرۆک کۆمار دیاریکراوە. لە کۆبوونەوەکەدا گفتوگۆ لەسەر چەند یاسایەکی گرنگ و تەواوکردنی دەنگدان لەسەر لیژنە هەمیشەییەکان کرا.
هەروەها ئاماژەی بەوەکرد، پێویستە لایەنەکان بەرپرسیارێتی تەواو هەڵگرن بۆ کۆتاییهێنان بەو رەوشە نالەبارە. سەرۆک فراکسیۆنەکان فراکسیۆنەکان جەختیان لە پێکهێنانی حکومەتێک کردەوە کە بتوانێت رووبەڕووی ئاڵنگارییەکان ببێتەوە.
ئەم بڕیارانەی پەرلەمان وەک هەوڵێک بۆ تێپەڕاندنی قەیرانەکان و جێبەجێکردنی ئەرکە یاساییەکان لە بەرژەوەندی گشتی وڵات دەبینرێت.
ترەمپ رایگەیاند كە ئێران بە زۆربەی خاڵەكانی رێكەوتنەكە رازییە و لە سبەیشەوە رێگە بە 20 كەشتی نەوتهەڵگر دەدات بە گەرووی هورمزدا تێبپەڕن.
دۆناڵد ترامپ سەرۆكی ئەمریكا رایگەیاند، ئێران رەزامەندی داوە لە سبەیەوە 20 كەشتی نەوتهەڵگر بۆ ماوەی چەند رۆژێك لە گەرووی هورمزەوە تێپەڕن.
ئاماژەی بەوە شكرد تاران وەڵامی زۆربەی خاڵەكانی پلانی ئاشتی داوەتەوە و ئارەزوویەكی زۆریان بۆ ئیمزاكردنی رێككەوتن و كۆتاییهێنان بە جەنگ هەیە و رەنگە بگەینە ئاگربەست.
جەختیشیكردەوە كە بەنیازە دەست بەسەر نەوتی ئێراندا بگرێت و كۆنترۆڵی ناوەندی هەناردەكردنی دوورگەی خارگ بكات.
ئەمەش لە كاتێكدایە ئەمریكا هەزاران سەربازی رەوانەی رۆژهەڵاتی ناوەڕاست كردووە.
وەزارەتی پەروەردەی هەرێم، راگەیەندراویکی لەسەر خوێندن بە سێوازی ئۆنلاین بڵاوکردەوە و تێیدا هاتووە؛ تا ئەوکاتەی بەفەرمی ئاگادار دەکرێنەوە پرۆسەی دەوامکردنی ناو پۆل لە هەموو ناوەندەکانی خوێندن ئەنجامنادرێت.
ئاماژەی بەوەشکردوە، خوێندنگە حکومییەکان ودەتوانن سود لە لە خزمەتگوزارییەکانی پلاتفۆرمی ( ئی-وانە) و پلاتفۆرمی ( قوتابخانەکەم ) وەربگرن
دەقی راگەیەندراوەکەی وەزارەتی پەروەردە
ڕاگەیەندراوێک لە وەزارەتی پەروەردەوە:
پاش ئەنجامدانی کۆبوونەوەیەکی تایبەت بە پرۆسەی خوێندن ، بڕیاردرا بە ڕاگرتنی دەوام لە دووشەممە ٣٠ ی ٣ ی ٢٠٢٦ وە ، بە شێوەی ئامادەبوون، لە ناو هەموو ناوەندەکانی خوێندنی حکومی و ناحکومی ونێودەوڵەتی لە هەرێمی کوردستان ، تا ئەوکاتەی بەفەرمی ئاگادار دەکرێنەوە پرۆسەی دەوامکردنی ناو پۆل لە هەموو ناوەندەکانی خوێندن ئەنجامنادرێت.
قوتابخانە حکومییەکان بەشێوەی خوێندنی ئەلیکترۆنی و دیجیتاڵی دەتوانن سوود لە خزمەتگوزارییەکانی پلاتفۆرمی ( ئی-وانە) و پلاتفۆرمی ( قوتابخانەکەم ) وەربگرن ، یان سوود لە گروپە ئەلیکترۆنییەکانی قوتابخانەکان وەردەگرن بۆ پێدانی ئەرکی ماڵەوە لەلایەن مامۆستایان بەشێوەی ڕۆژانە وێڕای پەخشکردنی وانەکانی هەموو قۆناغەکانی خوێندن لە هەرسێ (تەلەفزیۆنی پەروەردەیی ) هەولێر و سلێمانی و دهۆک کە لەهەموو شارو شارۆچکەکانی کوردستان پەخشیان هەیە
قوتابخانە ناحکومیەکانی
سیستمی وەزارەتی پەروەردە و قوتابخانە ناحکومییە نێودەوڵەتیەکان و بیانییەکان خوێندنی ئۆنلاین بەگوێرەی سیستمی خۆیان بەرکار دەکەن .
دڵنیایش دەدەینە ناوەندەکانی خوێندن و قوتابیان، لەکاتی گونجاو هەموارکردنەوە و گۆڕانکاریی لە ساڵنامەی خوێندن دەکرێت وکاتی تاقیکردنەوەکان دیاری دەکرێت و مافی قوتابیان پارێزراو دەبێت .
وەزارەتی پەروەردە
٢٩ ی ٣ ی ٢٠٢٦
حکومەتی هەرێم، راگەیەندراوێکی لەسەر پرۆسەی خوێةدنی ئەمساڵ بڵاوکردەوە و دەڵێت؛ بڕیارماندا بە کۆتایی هێنان بە خوێندنی ناو پۆل لە سەرجەم ناوەندەکانی خوێندنی پەروەردە و خوێندنی باڵا لە هەرێمی کوردستان.
لە راگەیەندراوەکەدا هاتووە؛ لەبەر رۆشنایی کۆبوونەوەی هاوبەشی وەزارەتە پەیوەندیدارەکان حکومەتی هەرێم بڕیاری دا لەم قۆناغەدا، پرۆسەى خوێندن بەشێوازی ئامادەبوونی ناو پۆل رادەگیرێت.
حکومەتی هەرێم ئاماژەی بەوەشکردوە، خوێند بەردەوام دەبێت لە سەرجەم ناوەندەکانی خوێندنی پەروەردە و خوێندنی باڵا بۆ هەموو قۆناغەکان بە شێوازی ئۆنلاین و دیجیتاڵیی .
حکومەتی هەرێم راشێگەیاندوە، هەردوو وەزارەتی پەروەردە و وەزارەتی خوێندنی باڵا و توێژینەوەى زانستی راسپێردران بە وەرگرتنی رێکاری پێویست بۆ جێبەجێکردنی ئەم بڕیارە، تایبەت بە شێوازی ئۆنلاین و دیجیتاڵی.
لە كاتێكدا یانەكان دەگەنە ئاست بەرزیان و لەوپەڕی هێزی خۆیاندا دەبن بۆ یەكلایكردنەوەی نازناوەكان بەڵام لەناكاودا یارییە نێودەوڵەتیەكان نزیكن لەوەی خەرمانی ساڵێكی یانەكان گڕ تێبەردەن
یانەی ئارسناڵ یەكێكە لەو یانانەی كە لە یارییە نێودەوڵەتیەكاندا گەورەترین لێدانی بەهۆی پێكانی یاریزانەكانی بەركەوتووە كە هەریەك لە دیكلاین رایس و ساكا و مادویكا دووچاری پێكان بوون
لە نوێترین هەواڵدا هاتووە كە پییرۆ هینكابی بەرگریكاری گەنەرزو هەڵبژاردەی ئیكوادۆر دووچاری پێكان بووەو كەمپی راهێنانی هەڵبژاردەكەی جێهێشت .