هەواڵەکان
بەڕێوەبەرایەتیی كەشناسی و بوومەلەرزەزانیی سلێمانی رایگەیاند، كە بەهۆی بارستە هەوایەكی فێنكەوە، پلەكانی گەرما روو لە دابەزین دەكەن و ئەگەری بارانبارین و هەورە تریشقەش لە ناوچە شاخاوییەكان هەیە.
بەپێی راگەیاندراوی كەشناسی و بوومەلەرزەزانیی سلێمانی: ئەمرۆ یەكشەممە ئاسمانی هەرێم نیمچە هەور دەبێت و پلەكانی گەرما یەك تاوەكو دوو پلە دادەبەزن، هاوكات خێرایی با لە سلێمانی و هەڵەبجە و گەرمیان دەگاتە سەروو 25 كیلۆمەتر لە سەعاتێكدا، رۆژی دواتریش كاریگەریی بارستە هەوا فێنكەكە زیاتر دەبێت و پلەكانی گەرما سێ تاوەكو پێنج پلەی تر دادەبەزن.
سەرچاوە رەسمییەکان و میدیاکانی ئیسرائیل بڵاویانکردەوە، "یائیر" کوڕی بنیامین نەتانیاهۆ سەرۆک وەزیرانی ئیسرائیل، بەهۆی بوونی هەڕەشە لەسەر ژیانی لە ئەمریکا، بەپەلە گەڕاوەتەوە بۆ ئیسرائیل.
لەو بارەیەوە، دەزگای ئاسایشی ناوخۆی ئیسرائیل (شاباک) لە بەیاننامەیەکدا رایگەیاند: لەبەر رۆشنایی ئەم مەترسییەدا و دوای ئەنجامدانی هەڵسەنگاندن، بە هەماهەنگی لەگەڵ تیمی ئەمنی بڕیاردرا بەپەلە رزگار بكرێت و بگەڕێندرێتەوە بۆ ئیسرائیل.
سەرەڕای ئەوەی شاباک سەرچاوەی هەڕەشەکەی دەستنیشان نەکردووە، بەڵام درکاندنی ئەم بابەتە تەنها چەند رۆژێک دوای ئەوە هات کە بنیامین نەتانیاهۆ ئاشکرای کرد ئێران پلانی بۆ بەئامانجگرتنی یەکێک لە کوڕەکانی دانابوو.
لەلایەکی ترەوە، تۆڕی تەلەفزیۆنی "نیوزماکس"ی ئەمریکی بڵاوی کردەوە کە یائیر نەتانیاهۆ لە کاتی مانەوەیدا لە شاری میامی لە ویلایەتی فلۆریدا، ئامانجی پلانێکی ئێرانی بووە بۆ تیرۆرکردنی.
تۆڕەکە لەسەر زاری بەرپرسێکی بەدواداچوونی یاسایی ئەمریکاوە گواستوویەتییەوە کە هەواڵگریی ئیسرائیل لە کانوونی یەکەمی 2025دا زانیارییان لەسەر ئەم پلانە دابوو و دەسەڵاتدارانی ئەمریکایان لێ ئاگادار کردبووەوە.
بەپێی زانیارییەکانی نیوزماکس، رێنمایی بە یائیر درابوو کە دەستبەجێ ناوچەکە جێبهێڵێت، سەرەڕای ئەوەی تیمی پاسەوانیی تایبەتی ئیسرائیلی بەبەردەوامی لەگەڵیدا بوون، بەرپرسە ئەمنییەکانیش ئەوەندە بەپەلە بوون کە کوڕەکەی نەتانیاهۆ رزگاربکەن تەنانەت دەرفەتی ئەوەی نەبووە کەلوپەلە تایبەتییەکانیشی لەگەڵ خۆیدا ببات و راستەوخۆ دوای وەرگرتنی فەرمانەکە گەڕاوەتەوە ئیسرائیل.
مستەفا سەند، وەزیری پەیوەندییەکانی عیراق جەختی کردەوە لە هەوڵەکانی وەزارەتەکەی بۆ راگەیاندنی خزمەتگوزاریی نەوەی پێنجەم (5G) لە پاریزگاکانی عیراق و هەرێمی کوردستان بە شێوەیەکی هاوکات، ئاماژەی بەوەش کرد کە کێشەکانی نێوان بەغدا و هەرێم ئاسانن و کارکردن بەردەوامە بۆ گەیشتن بە تێگەیشتنی هاوبەش.
مستەفا سەند لە لێدوانێکدا بۆ ئاژانسی رەسمیی دەنگوباسی عیراق رایگەیاند: نوێنەری هەرێمی کوردستان لە بەغداد، لە یەکەم هەفتەی دەستبەکاربوونم وەک وەزیر، داوەتنامەیەکی نووسراوی لەلایەن سەرۆکی حکومەتی هەرێمی کوردستانەوە پێشکەش کردم بۆ سەردانیکردنی هەرێم، وەزیری گواستنەوە و پەیوەندییەکانی هەرێمیش لە سەردانێکیدا پێش هەفتەیەک ئەم داوەتنامەیەی دووپاتکردەوە، ئێمەش سوورین لەسەر ئەنجامدانی سەردانەکە بۆ هەولێر."
وتیشی: وەزارەت کۆمەڵێک کێشەی بڕیارنەدراوی ئاسانی لەگەڵ هەرێمدا هەیە، وەک ئینتەرنێتی کێبڵ کە لە بەسرەوە بەرەو ئەوروپا دەڕوات و بە هەرێمی کوردستاندا تێپەڕ دەبێت، چونکە لە کاتی گەیشتنی بە هەرێم پێویستی بە تێگەیشتن هەیە لەگەڵ ئەو کۆمپانیایانەی لەوێ کار دەکەن.
روونیشی کردەوە: وەزارەت داوای کردووە عیراق وەک یەک قەوارە لە بەرانبەر کۆمەڵگەی نێودەوڵەتیدا دەربکەوێت، هەروەها دەکرێت تێگەیشتن لە نێوان حکومەتی فیدراڵی و هەرێمدا هەبێت بۆ ئەوەی رێککەوتنە نێودەوڵەتییەکان راستەوخۆ لەرێی وەزارەتی پەیوەندییەکانی فیدراڵییەوە ئەنجام بدرێن.
وەزیری پەیوەندییەکان ئاماژەی بە چەند بابەتێکی تریش کرد: لە هەرێمی کوردستان، وەزارەتی پەیوەندییەکان بەرپرسە لە کۆمپانیاکانی پەیوەندی لەنێویاندا 'کۆڕەک'، چونکە حکومەتی هەرێم دەستەی سەربەخۆی پەیوەندییەکانی نییە بەو شێوازەی لە حکومەتی ناوەندیدا هەیە، ئەمەش وا دەکات لە کاتی رودانی هەر حاڵەتێکی لەناکاودا ئاڕاستەی قسەکانیان بەرەو وەزارەتی فیدراڵی بێت لەبری دەستەکە.
لە کۆتاییدا ئاماژەی بەوەش دا: بابەتێکی تر پەیوەستە بە خزمەتگوزاریی (5G)، چونکە هەرێم هەنگاوی پێشتری ناوە بەراورد بە حکومەتی ناوەندی لە کاراکردنیدا، لە ئێستاشدا کار دەکەین بۆ ئەوەی بگەینە رێککەوتن تاوەکو لە یەک کاتدا ئەم خزمەتگوزارییە لە سەرانسەری وڵاتدا رابگەیەنرێت.
ژمارەی قوربانیانی لافاوەكەی سنووری نیپاڵ و هەرێمی تیبتی چین گەیشتە لانیكەم 750 كوژراو و زیاتر لە سێ هەزار بێسەروشوێن.
بەپێی دوا ئاماری دەسەڵاتدارانی نیپاڵ، 734 كەس لە خاكی ئەو وڵاتە گیانیان لەدەستداوە و 2498 كەسی دیكەش بێسەروشوێنن، لە بەرانبەردا ڕاگەیاندنە ڕەسمییەكانی چین گیانلەدەستدانی 16 كەس و بێسەروشوێنبوونی 546 كەسیان لە هەرێمی تبت پشتڕاستكردووەتەوە كە 261 یان هاووڵاتیی بیانین.
لە پێنجەمین ڕۆژی كارەساتەكەدا، حكومەتی نێپال داوای هاوكاریی تەكنیكی و دارایی بە بڕی پێنج ملیار دۆلار لە كۆمەڵگەی نێودەوڵەتی دەكات بۆ ئاوەدانكردنەوە.
لە هەمان كاتدا نیپاڵ هۆشداریی بە تیمەكانی فریاگوزاری لە ناوچەكانی ڕاسوا و دەوروبەری داوە بەهۆی بەرزبوونەوەی مەترسیداری ئاستی ئاوی ڕووباری بوتیكۆشی.
لە لایەكی دیكەوە ئۆپراسیۆنی گەڕان دەستیپێكردووەتەوە و ئەمریكاش هاوكارییەكی بەپەلەی بە بڕی 3.6 ملیۆن دۆلار بۆ لێقەوماوان راگەیاندووە.
ویلایەتە یەکگرتووەکانی ئەمریکا دەیان کەسی رەوانەی کۆماری ئەفریقای ناوەڕاست کردەوە، کە لەنێویاندا هاووڵاتیی ئەفغانی وئیرانی هەیە، سەرەڕای ئەوەی پێشتر دادوەرێکی ئەمریکی پارێزبەندی لە رادەستکردنەوەیان پێبەخشیبوون بۆ ئەفغانستان وئیران.
ئاژانسی ئەسۆشیەیتد پرێس لەسەر زاری ئەلما دەیڤد، پارێزەری گەنجێکی ئەفغانییە کە تەمەنی لە دەوروبەری 20 ساڵیدایە بڵاوی کردەوە، کە دادوەرێکی ئەمریکی بڕیاری پاراستنی لە ناردنەوەی بۆ ئەفغانستان دەرکردبوو، بەهۆی بوونی مەترسیی جدی لەسەر ژیانی لەلایەن تاڵیبانەوە.
پارێزەرەکە ئاماژەی بەوەش کرد، خێزانی ئەو گەنجە لە ئەفغانستان رووبەڕووی هەڕەشەی تاڵیبان بوونەتەوە بەهۆی هاوکاریی براکانی بۆ سوپای ئەمریکا.
روونیشی کردەوە کە یەکێک لە براکانی لە ئەمریکا دەژیت و لە ڕیزەکانی سوپای نیشتمانیی ئەفغانستاندا خزمەتی کردووە کە لەگەڵ هێزەکانی ئەمریکادا هاوکار بوون پێش کۆنترۆڵکردنی دەسەڵات لەلایەن تاڵیبانەوە لە ساڵی 2021دا، هەروەها برایەکی تری فڕۆکەوان بووە و لەلایەن ئەمریکاوە مەشق و راهێنانی پێکراوە و دواتر لەلایەن بزووتنەوەکەوە کوژراوە.
لە لایەکی ترەوە، سافی ئەرفی، بەڕێوەبەری سیاسەتی مافەکانی پەنابەران و کۆچبەران لە رێکخراوی "هیوومان رایتس فێرست" پشتڕاستی کردەوە کە فڕۆکەی دیپۆرتکردنەوەکە کە رۆژی شەممە لە بانگیی پایتەختی کۆماری ئەفریقای ناوەڕاست نیشتووەتەوە، 12 ئەفغانی و 8 ئێرانی تێدا بووە، لەگەڵ ژمارەیەک کۆچبەری دیکە کە خەڵکی نیپاڵ و نیکاراگوئان.
کازم غەریب ئابادی، جێگری وەزیری دەرەوەی ئێران رایگەیاند، تاران لەگەڵ سەڵتەنەتی عومان گەیشتووەتە تێگەیشتنێک سەبارەت بە رێکخستنی پەڕینەوەی کەشتییەکان لە گەروی هورمز، بەڵام ئاماژەی بەوەش کرد ئەم رێکخستنانە ناچنە بواری جێبەجێکردنەوە تاوەکو ویلایەتە یەکگرتووەکانی ئەمریکا پابەندبوونی خۆی بەجێنەهێنێت.
غەریب ئابادی لە لێدوانێکدا رایگەیاند: تاران پەلەی نییە لە دووبارە کردنەوەی گەروی هورمز".
هەروەها ئاماژەی بەوەدا: رێڕەوە ئاوییەکە هێشتا داخراوە و هەر پەڕینەوەیەکی کەشتییەکان لە گەروەکەدا بە هەماهەنگی لەگەڵ ئێران ئەنجام دەدرێت، وەک ئاژانسی تەسنیم بڵاوی کردووەتەوە.
هادی عامری دڵنیای دەداتە شەقامی عیراقی و رایگەیاند، هیچ رووبەڕووبوونەوەیەك لەنێوان دەوڵەت و بەرەی مقاوەمەدا روونادات، ئەعرەجیش دەڵێت چەكی پێشمەرگە دەستوریە.
هادی عامری، ئەمینداری گشتیی رێكخراوی بەدر لە وتارێكدا رایگەیاند، بە هیچ جۆرێك هیچ رووبەڕووبوونەوەیەك لەنێوان دەوڵەت و هێزەكانی بەرگری دا روونادات، هاوكات ئاماژەی بەوەشكرد، دۆسیەی بەرەنگاربوونەوەی گەندەڵی و گەندەڵكاران بڕیارێكە چوارچێوەی هەماهەنگی لەسەری رێككەوتووە، پشتیوانی لە هەنگاوەكانی سەرۆك وەزیران دەكەن لەم بوارەدا.
روونیشی كردەوە، رێكخستنی چەك ئامانجێكی نیشتمانی، دەستووری و رەوایە، لە كۆتاییدا ئاماژەی بەوەش كرد، رێكخستنی چەك بڕیارێكی دەرەكی نییە، بەڵكو بڕیارێكی تەواو عیراقییە.
هاوكات، قاسم ئەعرەجی راوێژكاری ئاسایشی نەتەوەیی سەرۆك وەزیرانی عیراق رایگەیاند، گفتوگۆ لەگەڵ گروپە چەكدارەكان بەردەوامە بۆ گەڕاندنەوەی چەك بۆ دەستی دەوڵەت و چەكی پێشمەرگەش لە چوارچێوەی دەستووردایە، بڕیاری كۆكردنەوەی چەك ئەو چەكانە دەگرێتەوە كە لە دەرەوەی دەستوورن.
ئاماژەی بەوەشكرد لە ئێستادا گروپە چەكدارەكان پابەندن بە ئەنجامنەدانی هیچ كارێك دژ بە وڵاتانی دراوسێ یاخود لەناوخۆی عیراقدا، و ڕژدین لەسەر كۆتاییهێنان بەو دۆسیانەی دەبنە هۆی زیانگەیاندن بە عیراق و دراوسێكانی
سەرۆكی پەرلەمانی ئێران، دەنگۆی تێپەڕبوونی 130 ملیۆن بەرمیل نەوت لە گەروی هورمز رەتدەكاتەوە و دەڵێت زیانەكانی كۆمپانیای جەین ستریت لە گرەوە بازرگانییەكاندا لە كەرتی نەوتدا زیاتر لە 130 ملیۆن دۆلاری زیان بەركەوتووە:
محەمەد باقر قالیباف، سەرۆكی پەرلەمانی ئێران رایگەیاند، ئەگەر ئەمریكا بەدوای ژمارە 130دا دەگەڕێت، با سەیری ڕاپۆرتەكانی ئاژانسەكان بكات كە دەریدەخات تێچووی جەنگ بۆ ئەمریكا زیاتر لە 130 ملیار دۆلار بووە.
وتیشی، زیانەكانی كۆمپانیای جەین ستریت لە گرەوە بازرگانییەكاندا لە كەرتی نەوتدا زیاتر لە 130 ملیۆن دۆلاری زیان بەركەوتووە.
سكۆت بێسێنت، وەزیری گەنجینەی ئەمریكا لە چەند رۆژی رابردوودا رایگەیاندبوو كە هێزەكانی ئەمریكا لە ماوەی 14 ڕۆژی ڕابردوودا ئاسانكارییان بۆ دەرچوونی 130 ملیۆن بەرمیل نەوت لە گەرووی هورمز كردووە، لە كاتێكدا ئاستی هەناردەی نەوتی ئێران گەیشتووەتە سفر.
وتەبێژی حكومەتی عیراق رایگەیاند، لە چوارچێوەی هەڵمەتی بەرەبەیاندا زیاتر لە یەك ترلیۆن و 359 ملیار دینار گەڕێنراوەتەوە بۆ خەزێنەی دەوڵەت.
حەیدەر عەبودی، وتەبێژی حكومەتی عیراق ئاماژەی بەوە كرد، بە بەهای زیاتر لە یەك ترلیۆن و 359 ملیار دینار پارە و موڵك و ماڵی گشتی لەلای گەندەڵكاران گەڕێنراوەتەوە بۆ خەزێنەی دەوڵەت.
ئەوەشی خستەڕوو، هەر لە چوارچێوەی هەڵمەتەكەدا زیاتر لە 26 هەزار هەواڵ گەیشتووەتە دەستەی دەستپاكی لەسەر دۆسییەی گەندەڵی و گەندەڵكاران.
عەبودی ئاماژەی بەوەشدا، بەپێی یاسای پاداشتكردنی هەواڵدەر، هەر هەواڵدەرێك نزیكەی 5%ی ئەو بڕە پارەیە پاداشت دەكرێت كە لە دۆسییەكی گەندەڵیدا دەستی بەسەردا دەگیرێت، وتیشی، حكومەتی عیراق هەنگاوی گەورەی ناوە لە رێڕەوی چاكسازی و بنبڕكردنی سەرچاوەكانی گەندەڵی.
بۆ یەكەمجار لەدوای هەڵگیرسانی جەنگی ئەمریكا و ئێرانەوە، كۆمپانیای سۆمۆ ئامادەیی نیشاندا بۆ فڕۆشتنی نەوتی عیراق لە دەرەوەی گەروی هورمز و لەڕێگەی بەندەرەكانی عوممانەوە.
ماڵپەڕی بلومبێرگ بە پشتبەشتن بە چەند نووسراوێكی كۆمپانیای سۆمۆ بۆ بە بازاڕكردنی نەوتی عیراق ئاشكرایكردووە، كۆمپانیاكە ئامادەیی نیشانداوە بۆ فڕۆشتنی نەوتی عیراق لەڕێگەی بەندەرەكانی عوممانەوە.
ئەوەشی خستووەتەڕوو، بۆ یەكەمجارە لەدوای هەڵگیرسانی جەنگی ئەمریكا و ئێرانەوە، عیراق ئامادەیی نیشاندەدات بۆ فڕۆشتنی نەوتەكەی لە دەرەوەی گەروی هورمز و لەڕێگەی بەندەرەكانی عوممانەوە.
ئەوەش لەكاتێكدایە، ئێران لەبەرانبەر تێپەڕبوونی كەشتییە بارهەڵگرەكانی عیراق بە گەروی هورمزدا، داوادەكات عیراق قەرزەكانی لەو وڵاتە پاكتاو بكات كە نزیكەی 12 ملیار دۆلارە و خۆی لە قەرزی غاز و كارەبادا دەبینێتەوە.
بەهۆی سزاكانی ئەمریكاوە تادێت قەیرانی وزە لە ئێراندا قوڵتردەبێتەوە و سەرۆك كۆماری ئەو وڵاتەش دەڵێت، لایەنە پەیوەندیدارەكانی راسپاردووە ئەگەر پێویست بكات كارەبا لە دامودەزگا حكومییەكان بكوژێننەوە.
مەسعود پزیشكیان، سەرۆك كۆماری ئێران رایگەیاند، حكومەتی ئێران كار بۆ بەڕێوەبردنی باشتر و كۆنترۆڵكردنی بەكارهێنانی ئاو و كارەبا دەكات، بە تایبەتی لەئێستادا كە وەرزی سەرما نزیكە.
ئەوەشی خستەڕوو، بە هیچ جۆرێك رێگەنادەن كەرتی پیشەسازی و بەرهەمهێنانی ئێران پەكیبكەوێت، بۆ ئەو مەبەستەش لایەنە پەیوەندیدارەكانی راسپاردووە ئەگەر پێویست بكات كارەبا لە دامودەزگا حكومییەكان بكوژێننەوە، بەڵام لە دامەزراوە پیشەسازیی و بەرهەمهێنەرەكان نەیكوژێننەوە.
پزیشكیان ئاماژەی بەوەشدا، حكومەتی ئێران بەنیازە چەند رێوشوێنێك بگرێتەبەر بۆ رێگریكردن لە بەهەدەردانی وزە لە وەرزی سەرمادا، لەوانە یەكخستنەوەی چالاكییە حكومییەكان و فراوانی كارەكانی حكومەت، جەختیشی لەوە كردەوە، لەپاڵ گەلی ئێراندا دەوەستنەوە و یەكگرتوویی و یەكڕیزی دوو بنەمای سەرەكین بۆ روبەڕوبونەوەی ئەو قەیرانانەی بەرۆكی ئێرانیان گرتووە.
ئاسایشی هەولێر دەستگیرکردنی ئەو تۆمەتبارەی راگەیاند، کە لە گەڕەکێکی شاری هەولێردا گێچەڵی سێکسی کردبووە سەر ژنێک.
بەپێی راگەیەندراوێکی بەڕێوەبەرایەتیی ئاسایشی هەولێر، دوای بڵاوبوونەوەی گرتە ڤیدیۆیی ژنێک لە تۆڕە کۆمەڵایەتییەکان، تیمەکانی تاوان بەدواداچوونیان دەستپێکرد و توانییان ناسنامەی تۆمەتبارەکە ئاشکرابکەن.
ئاماژەی بەوەشکردووە، دوای وەرگرتنی رەزامەندیی دادوەری لێکۆڵینەوە، تۆمەتبارەکە دەستگیرکراوە و لێکۆڵینەوەکان لەگەڵیدا بەردەوامن.
سبەینێ موچەی مامۆستایانی گرێبەستی وەزارەتی پەروەردە و خوێندنی باڵاو توێژینەوەی زانستی دەکرێت.
وەزارەتی دارایی حکومەتی هەرێم رایگەیاندووە: رۆژی یەکشەممە 30ـی 8ـی 2026، دەست بە دابەشکردنی موچەی مانگی حەوتی مامۆستایانی گرێبەستی وەزارەتی پەروەردە و خوێندنی باڵاو توێژینەوەی زانستی دەکرێت.
دارایی هەرێم دەشڵێت: هاوکات لەهەمان کاتدا دەست بە دابەشکردنی موچەی مانگی حەوتی سەرجەم ئەو فەرمانبەرانە دەکرێت کە لەدوای ( 1ـی 7ـی 2024) بە شێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون و شایستەکانیان لەسەر داهاتی ناوخۆی هەرێمی کوردستان خەرج دەکرێت.
مەزهەر محەمەد ساڵح، راوێژکاری دارایی سەرۆک وەزیرانی عیراق رایگەیاند، یەدەگی دراوی بیانیی وڵات هیچ مەترسیەکی لەسەر نییە، ئاماژەی بەوەشکردوە بەپێی خەمڵاندنەکانی سندوقی نێودەوڵەتیی دراویش بۆ ساڵی 2026، کۆی یەدەگی عیراق گەیشتوەتە نزیکەی 79.2 ملیار دۆلار.
مەزهەر محەمەد ساڵح، راوێژکاری دارایی سەرۆک وەزیرانی عیراق ئاماژەی بەوەکردوە، ئەو بڕە دراوە بیانییە بەشی دابینکردنی هاوردەکردنی کەلوپەل و خزمەتگوزارییەکانی زیاتر لە نۆ مانگ دەکات.
ناوبراو رونیشی کردوەتەوە، بەپێی پێوەرەژمێرییەکان، دابینکردنی زیاتر لە شەش مانگی هاوردەکردن بە ئاستێکی ئارام دادەنرێت، بەڵام دابەزینی تۆمارکراوی ئەمساڵ پێویستی بە وشیاری و بەدواداچوونی زیاتر هەیە تاوەکو ئاستی دڵنیایی لە دەست نەدرێت.
مەزهەر محەمەد ساڵح ئاماژەی بەوەش کرد، یەدەگی دراوی بیانی رۆڵێکی سەرەکی لە پاراستنی سەقامگیریی نرخی ئاڵوگۆڕی دیناری عیراقیدا دەگێڕێت و وەک هێڵی یەکەمی بەرگریی دەستنیشان دەکرێت، چونکە بانکی ناوەندیی لە رێگەی دابینکردنی دۆلار و پڕکردنەوەی داواکارییە یاساییەکانەوە ڕێگە لە فشارەکان دەگرێت.
دەستەی دەستپاکی عیراق دۆسیەیەکی گەورەی گەندەڵی لە پارێزگای سەڵاحەدین ئاشکرادەکات.
بەپێی راگەیەندراوێکی دەستەی دەستپاکی عیراق، لە ماڵی جێگری بەڕێوەبەری تۆماری خانوبەرەی پارێزگای سەڵاحەدین، دەستیان بەسەر تاپۆی 95 موڵک و خانودا گرتووە.
لە راگەیەندراوەکەشدا هاتووە، ژنە تۆمەتبارەکە موڵکەکانی بەناوی خزم و کەسە نزیکەکانیەوە کردووە، هەروەها موڵکەکان لە هەر سێ پارێزگای (بەغداد، دیالە و سەڵاحەدین)ـن.
لە ماڵی ئەو ژنە بەرپرسەدا، دەست بەسەر پارە و زێڕیشدا گیراوە، لە هەمان کاتدا هاوسەری تۆمەتباریش دەستگیرکراوە کە 27 موڵکی بەناوەوە کراوە.
پەیەدە دەڵێت بەشداری كورد لە دامەزراوەكانی سوریا سەقامگیری ئەو وڵاتە بەهێز دەكات و پێشهاتەكانیش ئەرێنین، بەڵام بەپێی پێویست نین.
پارتی یەكێتی دیموكراتی "پەیەدە" راگەیەنراوێكی لەبارەی تێكەڵكردنی هێزەكانی سوریای دیموكرات لەگەڵ سوپای سوریا بڵاوكردەوە و ئاماژەی بەوەكردووە، پێشوازی لە تێكەڵكردنی هەسەدە دەكەن لەگەڵ سوپای سوریا و بە هەنگاوێكی بە گرنگی دەبینن لە دروستكردنی سوریایەكی نوێدا، بەڵام بەپێی پێویست نییە، چونكە پرسی كورد لەو وڵاتە بنەڕەتییە و پێویستە مافەكانی گەلی كورد ببێتە بەشێكی دانەبڕاو لە پێكهاتەی دەستوری و سیاسی سوریای نوێ.
لە بەشێكی تری راگەیەنراوەكەدا هاتووە، ئەو تێكەڵكردنە سەقامگیری سوریا بەهێز دەكات، بەڵام دەبێت تێكەڵكردنی یەكینەكانی پاراستنی ژنان "یەپەژە"ش لەناو دامەزراوەكانی سوریا بە جۆرێك بێت، رۆڵ پێگەی ژن لە سوریای نوێدا نیشان بدات، جەختیشیكردووەتەوە، دەبێت دەستوری نوێ بە روونی گەلی كورد وەك نەتەوەیەكی یەكگرتوو و هاوبەش لە سوریادا بناسێت و زمانی كوردی و مافە سیاسی و كلتوری و نەتەوەییەكانیشی بناسێنێت.