"سەعید خەتیب زادە" وتەبێژی وەزارەتی دەرەوەی ئێران رایگەیاندووە، بەردەوامن لە دانوستان و پەیوەندییەکانیان لەگەڵ لایەنی سعودی و لە ئێستاشدا دانوستانەکان گەیشتۆتە قۆناغێکی جددیتر، ئاماژەی بۆ ئەوەشکردوە، دۆسیە ھاوبەش و ھەرێمییەکانیان لەگەڵ سعودیە تاوتوێ کردوە و  پێشکەوتنی گرنگ لە دانوستانەکاندا ھەن، وتەبێژەکەی وەزارەتی دەرەوەی ئێران راشیگەیاندوە، دانوستانی نێوان ئێران و سعودیە، گرەنتی ئاسایش و سەقامگیری ناوچەکە دەکات.

نەجلا بودن رەمەزان کە یەکەم ژنە لە مێژووی تونسدا پۆستی سەرۆکی حکومەت وەردەگرێت، لە دوای  رێوڕەسمی سوێند خواردنەکە رایگەیاند، حکومەتەکەی بە رووی ھەموو لایەنەکاندا کراوە دەبێت و ئەولەویەتی کارەکانیشیان گەڕاندنەوەی متمانەی ھاوڵاتیان دەبێت بە دەوڵەت و  گەڕاندنەوەی ھیوا دەبێت بۆ تونسییەکان، حکومەتی نوێی تونس لە ٢٤ وەزیر پێکدێت کە ژمارەیەکیان ژنن.
لە ٢٥ ی مانگی تەموزی رابردوودا، قەیس سەعید سەرۆکی تونس بەپێی ماددەی ٨٠ لە دەستوری تونس بڕیاریدا بە سڕکردنی پەرلەمانی وڵاتەکەی بۆ ماوەی یەک مانگ و دورخستنەوەی سەرۆک وەزیرانی پێشوو لە پۆستەکەی، ئەوەش بەھۆی ئەو قەیرانە ئابوری و کۆمەڵایەتی و تەندروستییەی لە لە تونس دروستبوو.

کۆمسیۆنی باڵای سەربەخۆی ھەڵبژاردنەکانی عێراق رایدەگەیەنێت، ١١٩ سکاڵا لە دەنگدانی تایبەت و گشتییدا تۆمارکراوە و لە ١٠ رۆژدا ئەنجامی سکاڵاکان یەکلایی دەکرێنەوە، سەرۆکی لیژنەی ئەمنی ھەڵبژاردنەکانیش دەڵێت، ٢٠٠ سەرپێچیکاریان لە رۆژی ھەڵبژاردندا دەستگیر کراون.

جەلیل عەدنان سەرۆکی ئەنجومەنی کۆمسیارانی عێراق، لە کۆنفرانسێکی رۆژنامەواندا رایگەیاند، لە دەنگدانی تایبەت ٢٥ سکاڵا و لەدەنگدانی گشتی ٩٤ سکاڵا تۆمارکراون و ماوەی سێ رۆژ لەبەردەم لایەنە سیاسیەکاندایە بۆ تانەدان لە ئەنجامەکانی ھەڵبژاردن، وتیشی، ئەنجامی ژماردنەوەی دەستی و ئەلکترۆنی دەنگەکان، ١٠٠% ھاوتا بووە.

ھاوکات عەبدولئەمیر شەمەری سەرۆکی لیژنەی ئەمنی ھەڵبژاردنەکان رایگەیاند، پلانی ئەمنی پاراستنی پڕۆسەی ھەڵبژاردن سەرکەوتوو بووە و ٢٠٠ سەرپێچیکاریان دەستگیرکردووە.

بە پێی ئەنجامە بەراییەکان ھاوپەیمانی کوردستان لە پارێزگای سلێمانی ھەشت کاندیدی سەرکەوتنیان بەدەستھێناوە، کە بریتین لە نەرمین مەعروف،بڕیار رەشید،ئاسۆ فەرەیدوون، چرۆ حەمەشەریف، غەریب ئەحمەد، بەدریە حسین، سروە محەمەد، رزگار محەمەد.

لە ھەولێریش ھاوپەیمانی کوردستان یەک کورسی بەدەستھێناوەو کاندیدی سەرکەوتوو کوردە عومەرە، لە دھۆکیش ھاوپەیمانی کوردستان  یەک کاندیدی دەرچووە  کە ئیمان عەبدولرەزاقە.

لە کەرکوکیش کورد شەش کورسی بەدەستھێناوە و سێ کورسیان ھی ھاوپەیمانی کوردستانە و ھەریەکە لە دیلان غەفور و گەیلان قادر و سەباح حەبیب دەرچوون.

لە پارێزگای سەڵاحەدین کەریم شکور کاندیدی ھاوپەیمانی کوردستان سەرکەوتنی بەدەستھێناوە.

لە پارێزگای نەینەواش، دوو کاندیدی ھاوپەیمانی کوردستان دەرچوون کە بریتین لە ئەحلام  رەمەزان و رۆنزی زیاد.

لە پارێزگای دیالەش سۆزان مەنسور کاندیدی ھاوپەیمانی کوردستان سەرکەوتنی بەدەستھێناوە.

وەزارەتی کارەبای ھەرێم رایگەیاند، کۆمپانیای دانەغاز لە سەعات پێنج بەرەبەیانی رۆژی سێشەممە ١٢ی ١٠ی٢٠٢١  لەکێڵگەی کۆرمۆڵی غازی ھەڵدەستێت بەجێبەجێکردنی پڕۆژەیەکی چاکسازیی کە ماوەیەکی زۆرە لەبەر بەرژەوەندی بەرنامەی کارەبای ھاووڵاتیان راگیرابوو، بەوەش بۆ ماوەی ٢٤ سەعات بڕی ھەناردەی غازی سروشتی بۆ وێستگەکانی بەرھەمھێنانی کارەبا کەم دەبێتەوە، ئەوەش کاریگەریی دەبێت لەسەر کەمبوونەوەی کاتەکانی بوونی کارەبا.

لە بەشێکی تری راگەیەنراوەکەدا ھاتووە،  وەزارەتی کارەبا و وەزارەتی سامانە سروشتییەکان لەگەڵ کۆمپانیای دانەغاز بەرنامەیەکیان داناوە بۆ ئەوەی پڕۆژەکە بەسەرکەوتوویی لەماوەیەکی دیاریکراودا جێبەجێبکرێت و کەمترین کاریگەریی لەسەر ماوەکانی کارەبا ھەبێت.

دوای دەرکەوتنی ئەنجامی بەرایی ھەڵبژاردنی پێشوەختی عێراق و بەدەستھێنانی ٧٣ کورسی لەلایەن رەوتی سەدرەوە، موقتەدا سەدر رێبەری رەوتی سەدر، رایگەیاند، گەلی عێراق و چاکسازی بەسەر داگیرکاری و گەندەڵیدا سەرکەوتن و لە ئەمڕۆوە ھیچ شوێنێک بۆ گەندەڵی و گەندەڵکاران نامێنێت، وتیشی، چاوەڕێی شۆڕشی چاکسازی دەکات و رێگەش بە بوونی میلیشیا و چەک لە دەرەوەی دەسەڵاتی دەوڵەت نادەن. 

بڕیارە رۆژی سێشەممە دادگایکردنی ھەریەک لە ئومێد بەڕۆشکی و بەدەل بەرواری دوو چالاکوانی بادینان لە شاری ھەولێر بە ڕێوەبچێت، کە بە تۆمەتی ناڕەوای سیخوڕیکردن و ئەنجامدانی کاری تێکدەرانە دەستگیرکراون.

ئەوەش لە کاتێکدا چەند جارێک دادگایکردنی ئەو چالاکوانانە دواخراوە، ھاوکات تیمی  رێکخراویسی پی تی بۆ داکۆکی لە رۆژنامەنوسان، داوای دادگاییەکی دەستبەجێ و دادپەروەرانە دەکات بۆ ئەو چالاکانەی بادینان، بۆ ئەوەی بتوانن بەزوویی بە خانەوادەکانیان شادببنەوە کە زیاتر لە ساڵێکە لەیەکتری دابڕاون.

ھەروەھا پێشتر کەسوکاری دەستگیرکراوانی بادینان لەھەولێر رایانگەیاند:دەیانەوێت لە رۆژی دادگایکردنەکەدا رێکخراوەکانی مافی مرۆڤ و فراکسیۆنەکانی پەرلەمان ئامادەی دانیشتنەکە بن و بەچاوی خۆیان ئەو تۆمەتانە ببینن کە دادگا روبەڕووی کەسوکاریان دەکاتەوە.

"شاناز ئیبراهیم ئەحمەد" كارگێڕی مەكتەبی سیاسی یەكێتیی نیشتمانیی كوردستان لە سلێمانی دەنگیدا و رایگەیاند، زۆر زۆر دڵخۆشە بە ئەم هەڵبژاردنە و هیواشی خواست هەمووان روو بكەنە سندوقەكانی دەنگدان و دەنگ بدەن.

 لە لێدوانێكیدا بۆ رۆنامەنوسان رایگەیاند ، هەڵبژاردنی ئەمجارە چارەنوسساز دەبێت ، بۆیە پێویستە هاوڵاتیان دەنگ بدەن و هیواشی خواست ئەم هەڵبژاردنە ببێتە هەوێنێك بۆ ئەوەی هەموو لایەنە سیاسییەكان لەسەر مێزی گفتوگۆ كێشە كەڵەكە بووەكان چارەسەر بكەن ..

 لەلێدوانێكیدا بۆ رۆژنامەنوسان قوباد تاڵەبانی رایگەیاند ، ئەركی ئێمەیە نوێنەری نوێ هەڵبژێرین و بینێرینە بەغداد و هیواشی خواست ئەوەی مافی دەنگدانی هەیە بچێتە سەر سندوقەكانی دەنگدان ، وتیشی هەڵبژاردن پڕۆسەیەكی دیموكراسییە و پڕۆسەكە بە گشتی لە بانگەشەوە تا دەنگدانی تایبەت ئارام بووە.