هەواڵەکان
مەکتەبی سیاسی یەکێتیی نیشتمانیی کوردستان بۆ تاوانی 31ـی ئاب پەیامێکی بڵاوکردەوە و تێیدا هاتووە؛ خیانەتی گەورەی 31ـی ئاب بووە هۆی قوڵبونەوەی ناکۆکییەکانی کورد و شەهید بوونی ژمارەیەکی زۆری رۆڵەی گەلەکەمان.
لە پەیامەکەدا ئاماژە بەوەکراوە، لە بیرەوەری ئەم کارەساتە نەتەوەییەدا، وێڕای خەم و پەژارەی قووڵی نیشتمانی، یەکێتی جەختدەکاتەوە لەسەر چارەسەری یەکجارەکی ناکۆکییە ناوخۆییەکان، کە بوونە هۆی بژاردەی خراپی پەنابردن بۆ هێزی نەیاران.
پەیامی یەکێتیی نیشتمانیی کوردستان بۆ یادی خیانەتی 31ی ئاب
ئەمڕۆ سێ دەیە بەسەر کارەساتی ٣١ی ئاب تێپەڕ دەبێت، کاتێک شاری هەولێری پایتەختی کوردستان لە لایەن سوپای ڕژێمی بەعسەوە، بۆ پشتیوانی پارتی دیموکراتی کوردستان و دوای شەش ساڵ لە راپەڕین و ئازادی، داگیر کرایەوە.
بەداخەوە ئەو خیانەتە گەورەیە بووە مایەی قوڵبوونەوەی ناکۆکییەکانی کورد و شەهید بوونی ژمارەیەکی زۆری رۆڵەکانی گەلەکەمان لە پێشمەرگە و فەرماندە و کادرانی یەکێتیی نیشتمانیی کوردستان و هێزەکانی ئۆپۆزسیۆنی عیراقی و بێسەروشوێنکردنی ژمارەیەکی زۆری تێکۆشەرانی یەکێتی کە تاوەکو ئێستا چارەنووسیان نادیارە.
یەکێتیی نیشتمانیی کوردستان هەمیشە لە پێناو بەرپرسیارێتییە نیشتمانی و نەتەوەیەکانی و لە چوارچێوەی سیاسەتی حەکیمانەی سەرۆک مام جەلال کە رایسپاردووین لەبەر خاتری گەلەکەمان و ئایندەی کوردستان لاپەڕەیەکی نوێ هەڵبدەینەوە، ناسۆرەکانی رابردووی بە هەڵسەنگاندنی مێژوو و حوکمە عادیلانەکەی سپارد، کە ئەمەش دەورانێکی ئاوەدانی و سەقامگیری و پێکەوەیی بەدوای خۆیدا هێنا.
لە بیرەوەری ئەم کارەساتە نەتەوەییەدا، وێڕای خەم و پەژارەی قووڵی نیشتمانی، یەکێتی تەئکید دەکاتەوە لەسەر چارەسەری یەکجارەکی ناکۆکییە ناوخۆییەکانی کە بوونە هۆی بژاردەی خراپی پەنابردن بۆ هێزی نەیاران.
ئەمرۆش لەپێناو ڕاستکردنەوەی رێڕەوی حوکمڕانیدا، کوردستان پێویستی بە پێکهێنانی حکومەتێکی هاوسەنگ و بەرپرسیار هەیە کە بە یەکڕیزی و شەراکەت و خزمەتی دادپەروەرانە، قەرەبووی ناخۆشییەکانی رابردوو بکاتەوە، تاوەکو هەرێمێکی پتەو و سەقامگیر دەرەقەتی ئەرک و ئەگەرەکانی داهاتووی عیراق و ناوچەکە بێت.
درود بۆ شکۆی شەهیدانی بەرگری لە پایتەختی کوردستان و گشت شەهیدانی رێگای رزگاری.
مەکتەبی سیاسی
یەکێتیی نیشتمانیی کوردستان
خیانەتی گەورەی 31ـی ئاب بووە هۆی قوڵبونەوەی ناکۆکییەکانی کورد و شەهید بوونی ژمارەیەکی زۆری رۆڵەی گەلەکەمان
دوای گرێبەستە گەورەکەی نێوان ئەمریکا و ڤەنزوێلا لە بواری نەوتدا، دۆناڵد ترەمپ رایگەیاند دەیەوێت بە نەوتی ڤەنزوێلا یەدەگی نەوتی ستراتیژیی ئەمریکا پڕبکەنەوە.
ئەمڕۆ یەکشەممە، لە پەیامێکیدا لە تروس سۆشیال، دۆناڵد ترەمپی سەرۆکی ئەمریکا رایگەیاند، بەنیازە نەوتی ڤێنزیوێلا بۆ پڕکردنەوەی یەدەگی ستراتیژیی نەوتی وڵاتەکەی بەکاربهێنێت.
سەرۆکی ئەمریکا ئاماژەی بەوەکردوە، ئەم یەدەگە نیشتمانییە لە سەردەمی سەرۆکایەتیی جۆ بایدندا بە تەواوی بەتاڵ کرابووەوە، بەڵام پرۆسەی پڕکردنەوەی لە رێگەی نەوتی ڤێنزیوێلاوە بەم زووانە دەستپێدەکات.
دۆناڵد ترەمپ جەختیکردوەتەوە، ئەم هەنگاوە وەک دیارییەکی ڤێنزیوێلا دەبێت بۆ گەلی ئەمریکا تاوەکو ئاسایشی وزەی وڵاتەکەیان پێ بەهێزتر بێتەوە.
بە فەرمانێکی وەزاری، وەزارەتی پەروەردە داوا لە مامۆستایان دەکات رۆژی سێشممە، کە یەکەم رۆژی مانگی نۆیە، بۆ ساڵی نوێی خوێندن دەستبەکار بن.
ئەمڕۆ یەکشەممە، وەزارەتی پەروەردەی هەرێم فەرمانێکی وەزاری بڵاوکردوەتەوە و تێیدا هاتووە؛ لە رۆژی 1ـی9ـی2026ـوە سەرجەم مامۆستایان لە ناوەندەکانی خوێندنی حکومی دەستبەکاردەبن بۆ خوێندنی ساڵی (2027 -2028).
پێش وەزارەتی پەروەردە، و هەر ئەمڕۆ وەزارەتی خوندنی باڵاش، هەمان داوای لە مامۆستایان کردوە و یەکەم رۆژی مانگی نۆی بۆ دەستبەکاربون و رۆژی 30ـی6ـی2027 وەک کۆتا رۆژی خوێندن بۆ دیاریکردون.
لە میانی کۆبونەوەی حکومەتەکەیدا، مەسعود پزیشکیان بە بەڕێوەبەری کەناڵی رەسمی ئێران سەدا و سیمای وتوە ئیتر سەیری ئەو کەناڵە ناکات، چونکە کاتێک سەیری دەکات زیاتر دەمارگری دەکات.
مسعود پزیشکیان، سەرۆک کۆماری ئێران، لە کۆبونەوەی کابینەی حکومەتەکەیدا، رەخنەی توندی لە ئەدای دەزگای دەنگ و رەنگی کۆماری ئیسلامی (صداوسیما) گرت و رایگەیاند ئیتر سەیریان ناکات.
میدیاکانی ئێران بڵاویانکردوەتەوە، مەسعود پزیشکیان بە پەیمان جەبلی، سەرۆکی دەزگای سەدا و سیمای وتوە؛ ئیتر بینەری بەرنامەکانیان نییە، چونکە دەبێتە هۆی تێکچونی دەرونی و دەمارگیری دەکات.
سەرۆک کۆماری ئێران جەختی لەوەش کردەوە ،کە ئەگەر کەسێکی وەک ئەو کە تەمەنی بۆ خزمەتی سیستەمەکە داناوە بڕوا و تێڕوانینی بەرانبەر راگەیاندنی رەسمی وڵات بەو جۆرە بێت، ئەوا دەبێت تێبگەن، کە خەڵکی ئاسایی چ هەست و تێڕوانینێکی نەرێنییان بەرانبەر ئەو دامەزراوەیە هەیە.
ئەم قسانەی سەرۆک کۆماری ئێران لە کاتێکدایە، کە دەزگای پەخشی سەدا و سیما، کە لە تەلەڤیزیۆن و رادیۆ پێکدێت، زمانحاڵی کۆماری ئیسلامی ئێرانە و نزیکی سوپای پاسدارانە.
لە هەولێر هاووڵاتییەک خوشکی هاوسەرەکەی کوشت، خەزور و هاوسەرەکەشی بریندار کرد.
بڕیار محەمەد، پەیامنێری کوردسات نیوز لە هەولێر رایگەیاند: بەهۆی کێشەی کۆمەڵایەتییەوە، هاووڵاتییەک دەستڕێژی گوللەی لە ماڵی خەزوری کرد.
ئاماژەی بەوەشکرد، خوشکی هاوسەرەکی گیانی لەدەستداوە و خەزور و هاوسەرەکەشی بریندارن.
ئاژانسی رۆیتەرز بڵاویکردەوە، سکۆت بیسێنتی وەزیری گەنجینەی ئەمریکا لە کۆبونەوەی وەزیرانی دارایی و پارێزگارەکانی بانکی ناوەندیی جی 20 داوا دەکات تەواوی پەیوەندییە ئابوریی و بازرگانییەکان لەگەڵ تاراندا بپچڕێنن.
ئاژانسەکە ئاماژەی بەوەکردوە، لە کۆبونەوەکەدا، کە رۆژانی دووشەممە و سێشەممەی ئەم هەفەتەیە بەڕێوەدەچێت، سکۆت بیسێنت دەیەوێت بە گوشارخستنە سەر وڵاتانی جی 20 فشاری زیاتر بکاتە سەر تاران.
وەزیری گەنجینەی ئەمریکا هۆشداریداوەتە ئەو وڵاتانەی بەردەوامن لە کڕینی نەوتی ئێران یان ئاسانکاری بۆ مامەڵەی دیکە لەگەڵ تاران دەکەن، دەکەونە چوارچێوەی سزاکانی ئەمریکاوە.
بەگوێرەی ئاژانسی رۆیتەرز، کۆبونەوەکە لە کاتێکدایە، جەنگی بەردەوام و داخستنی گەروی هورمز قورسایی لەسەر گەشەی ئابوری لە سەر جیهان و وڵاتانی جی 20 دروست کردوە و ئەو وڵاتانەش لە ژێر فشاری ئابوریدان.
خاتوو شاناز ئیبراهیم ئەحمەد پەیامێکی هاوخەمی بۆ کۆچی دوایی مەهدی زانا بڵاوکردەوە.
دەقی پەیامەکە
بەبیستنی هەواڵی ماڵئاوایی یەکجارەکی (مەهدی زانا)، سیاسەتمەدار و سەرۆکی شارەوانی پێشوتری ئامەد، زۆر غەمباربووم.
پرسەو سەرەخۆشی لەخوشکی ئازیزم خاتوو لەیلا زانا وخانەوادەکەی و هاوڕێ و هەڤاڵانمان ئەکەم لەباکوری کوردستان و هاوبەشی خەم و پەژارەیانم.
خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
وەزارەتی خوێندنی باڵای حکومەتی هەرێمی کوردستان، ساڵنامەی خوێندنی ساڵی 2026 بۆ 2027ـی بڵاوکردەوە.
بەپێی راگەیەندراێکی وەزارەتی خوێندنی باڵا و توێژینەوەی زانستی حکومەتی هەرێم، ساڵی خوێندنی (2026-2027) ساڵنامەى خوێندنى زانکۆ لە 1ـی 9ـی 2026 دەستپێدەکات و لە 30ـی 6ـی 2027 کۆتاییدێت.
بەپێی راگەیەندراوەیەکی وەزارەتی خوێندنی باڵا، لەو زانکۆ و پەیمانگەیانەی کە سیستمی خوێندن ساڵانە یان وەرزی پەیڕەو دەکەن، دەبێت ماوەی خوێندن 30 هەفتە کەمتر نەبێت و بۆ سیستمی خوێندنی وەرزی پێویستە هەر وەرزێک ماوەی خوێندن لە 15 هەفتە کەمتر نەبێت، ئەم ماوەیە رۆژانی تاقیکردنەوەکان و پشووەکان ناگرێتەوە.
خوێندنی باڵای هەرێم ئاماژەی بەوەشداوە، لەو زانکۆ و پەیمانگەیانەی کە پێواژۆی بۆڵۆنیا پەیڕەو دەکەن، پێویستە هەر وەرزێکی خوێندن لە 20 هەفتە کەمتر نەبێت، کە لایەنی کەم 14 هەفتە لە هەر وەرزێک بۆ پڕۆسەی خوێندن تەرخان بکرێت، هەفتەکانی تر بۆ خۆتۆمارکردن و تاقیکردنەوەکان دەبێت.
لە راگەیەندراوەکەدا ئەوەش هاتووە، لەو زانکۆ و پەیمانگەیانەی کە سیستمی وەرزی پەیڕەو دەکەن، پێویستە ماوەی هەر وەرزێکی خوێندن لە 13 هەفتە کەمتر نەبێت، کە لایەنی کەم 10 هەفتە بۆ پڕۆسەی خوێندن تەرخان بکرێت، هەفتەکانی تر بۆ خۆتۆمارکردن و تاقیکردنەوەکان دەبێت.
سەبارەت بە تاقیکردنەوەکانی کۆتایی، وەزارەتی خوێندنی باڵا دەڵێت، ئەو زانکۆ و پەیمانگەیانەی کە پێواژۆی بۆڵۆنیا پەیڕەو دەکەن، خوێندکار لە ماوەی یەک ساڵی ئەکادیمی خوێندندا، بۆیان هەیە تەنها دوو هەوڵی تاقیکردنەوەی کۆتایی ئەنجام بدەن.
دەستەی دەستپاكی عیراق فەرمانی حەوت ساڵ زیندانیكردنی بۆ تەڵال زوبەعی و بریكاری وەزارەتی نەوت دەركرد، لەگەڵ پێدانی 123 ملیار دینار وەك سزای ماددیی.
دەستەی دەستپاكی لە راگەیەنراوێكدا ئاماژەی بەوەكرد، دادگا بڕیاری حەوت ساڵ زیندانیكردنی بۆ هەریەك لە تەڵال زوبەعی پەرلەمانتاری پێشوو و عەلی بەهادلی بریكاری وەزارەتی نەوت بۆ عەمباركردن و دابەشكردن دەركردووە، بە تۆمەتی تێوەگلانیان لە تاوانی زیادكردنی سامانیان بە شێوەیەكی نایاسایی و گوماناوی.
بەپێی فەرمانەكە، تەڵال زوبەعی 35 ملیار دینار لە سەروەتەكەی بە بێ ئەوەی سەرچاوەكانی دیاربێت زیادیكرئەوە، دادگاكەش لەگەڵ سزای زیندانیكردنەكەدا بری 70 ملیار دینار سزای پێبژاردن كردوە، ئەوەش دوو هێندەی ئەو پارەیە كە بە نارەوا دەستیكەوتوە.
بریكاری وەزارەتی نەوتیش بۆ كاتی دابەشكردن، نزیكەی 26 ملیار و 500 ملیۆن دیناری لە سامەنەكەی زیادیكردوە، دادگاكەش پابەندیكردوە بە پێدانی 53 ملیار دینار وەك سزای پێبژاردن.
بەڕێوەبەرایەتیی نەوت و کانیزاکانی هەولێر لە ئاگادارییەکی بەپەلەدا بۆ گشت هاووڵاتییان رایگەیاند، راگرتنی ئۆتۆمبێل لە پێش بەنزینخانەکان، شەقام و کۆڵانەکان بە مەبەستی نۆرەگرتن بۆ وەرگرتنی بەنزین رۆژێک پێش دابەشکردن (بەتایبەتی لە کاتی شەودا) بە هەموو شێوەیەک قەدەغەیە.
بەپێی ئاگادارییەکەی بەڕێوەبەرایەتیی نەوت و کانیزاکانی هەولێر: بەپێچەوانەی ئەم رێنماییانەوە، ژمارەی ئەو ئۆتۆمبێلانەی سەرپێچی دەکەن لەلایەن بەڕێوەبەرایەتیی هاتووچۆوە تۆمار دەکرێن و سزای بژاردنیان بۆ دەنووسرێت.
لە کۆتاییدا بەڕێوەبەرایەتیی نەوتی هەولێر داوا لە هاووڵاتییان دەکات بە هیچ شێوەیەک ئۆتۆمبێلەکانیان بۆ نۆرەگرتن لە شەقام و کۆڵانەکاندا رانەگرن و بەجێی نەهێڵن، بە مەبەستی رێگریکردن لە دروستبوونی ئاستەنگی هاتووچۆ و جەنجاڵی.
خالید شوانی، وەزیری دادی عیراق لە تازەترین لێدوانیدا وردەکاریی نوێی دەربارەی دۆسیەی گواستنەوەی زیندانییان لە زیندانەکانی سوریاوە بۆ عیراق و پرۆسەی جێبەجێکردنی سزای سێدارە ئاشکرا کرد، لە کاتێکدا ئامارەکان رەگەزنامە و پێکهاتەی هێزە خۆکوژ و زیندانییەکان لە وڵاتدا دیاری دەکەن.
وەزیری داد لە چاوپێکەوتنێکدا رایگەیاند: بە هەماهەنگی لەگەڵ هاوپەیمانی نێودەوڵەتی و بە رەزامەندیی ئەنجومەنی وەزاریی ئاسایشی نیشتمانی، لە ماوەی 24 رۆژدا 5704 زیندانیی تیرۆریست لە زیندانەکانی سوریاوە گوازراونەتەوە بۆ عیراق، بەبێ ئەوەی هیچ پێشێلکارییەکی ئەمنی یان مافی مرۆڤ تۆمار بکرێت.
شوانی ئاماژەی بەوەش کرد: فایەق زەیدان، سەرۆکی ئەنجومەنی باڵای دادوەری بە شێوەیەکی راستەوخۆ سەرپەرشتی پرۆسەی لێکۆڵینەوەکان دەکات و لیژنەیەکی تایبەتی لە 11 دادوەر پێکهێناوە کە لێکۆڵینەوەی سەرەتاییان تەواو کردووە و دۆسیەکان دەنێردرێنە دادگا پەیوەندیدارەکان.
جەختیشی کردەوە: ئەو کەسانەی تاوانیان بەرانبەر گەلی عیراق ئەنجامداوە لە عیراق دادگایی دەکرێن، لە کاتێکدا بیانییەکانی تر دوای لێکۆڵینەوە ڕەوانەی وڵاتەکانیان دەکرێنەوە.
سەبارەت بە دواکەوتنی جێبەجێکردنی سزای سێدارەی 14 هەزار سزادراو، شوانی روونی کردەوە: هیچ فشارێکی نێودەوڵەتی لە پشتەوە نییە، بەڵکو پەیوەستە بە مافی یاسایی تۆمەتباران بۆ داواکردنی دووبارە دادگاییکردنەوە لە کاتی خستنەڕووی بەڵگەی نوێ، کە ئەمەش پرۆسەی جێبەجێکردن دوادەخات.
هاوکات بەپێی زانیارییەکانی سەنتەری نەخیل بۆ مافەکان و ئازادیی رۆژنامەگەری، لە نێوان ساڵانی 2003 بۆ 2013 زیاتر لە 2 هەزار خۆکوژ خۆیان لە عیراق تەقاندووەتەوە بەم شێوەیەیی لای خوارەوە:
_فەلەستینی و ئوردنییەکان: بە 1200 خۆکوژ لە پلەی یەکەمدا دێن.
_سعودییەکان: 300 خۆکوژ بوون، و لە ئێستادا تەنها 10 سزادراوی سعودی لە زیندانەکانی عیراقدا ماون.
_یەمەنی و سورییەکان: 250 خۆکوژی یەمەنی و 200 خۆکوژی سوری تۆمارکراون.
_وڵاتانی کەنداو: کەمترین ژمارە هی وڵاتانی قەتەر، ئیمارات و بەحرێن بوون کە کۆی گشتییان تەنها 20 خۆکوژ بووە.
سەنتەری نەخیل ئاشکرایشی کرد: لە ئێستادا 1400 سزادراوی بیانی و عەرەب لە زیندانەکانی عیراقدا هەن، لە کاتێکدا زۆرینەی ئەو زیندانییانەی لە سوریاوە وەردەگیڕێنەوە خەڵکی عیراق، تونس و مەغریبن.
نزار ئامێدی، سەرۆک کۆماری عیراق، ئەمڕۆ یەکشەممە 30ـی ئابی 2026، لە کۆشکی سەلامی بەغداد، پێشوازی لە رێبوار تەها، جێگری یەکەمی پارێزگاری کەرکوک کرد.
بەپێی راگەیەندراوێکی سەرۆکایەتی کۆمار، لە دیدارەکەدا سەرۆک کۆمار جەختی کردووەتەوە لە پێویستی باشترکردنی خزمەتگوزارییەکان لەپارێزگای کەرکوک و دابینکردنی پێداویستییەکانی هاووڵاتیان و کارکردن بۆ تێپەڕاندنی ئەو ئاستەنگانەی رووبەڕوویان دەبنەوە، بەجۆریک کە هاوکاربن لەباشترکردنی پێشکەشکردنی خزمەتگوزارییەکان و بەرجەستەکردنی سەقامگیری و گەشەپێدان لەپارێزگاکەدا.
لە راگەیەندراوەکەی سەرۆکایەتی کۆماردا هاتووە، سەرۆک کۆمار گوێی لە روونکردنەوەیەکی وردی ریبوار تەها گرتووە سەبارەت بە رەوشی ئێستای پارێزگای کەرکوک و پێویستییە هەرە سەرەکیەکانی و پلانەکان داهاتوو بۆ باشترکردنی خزمەتگوزاری و گەشەپێدانی شارەکە.
دەستەی گشتیی گومرک، رایگەیاند کە رێگرییان لە هەوڵێکی قاچاغبردنی بڕی 83 هەزار دۆلاری ئەمریکی کردووە لە فڕۆکەخانەی نێودەوڵەتیی بەغداد.
لە بەیاننامەیەکی دەستەکەدا بڵاوی کردووەتەوە: دەستمان بەسەر 83 هەزار دۆلاری ئەمریکی گرت لە فڕۆکەخانەی نێودەوڵەتیی بەغداد، و ئاماژەی بەوە دا: گەشتیارێکی عیراقی هەوڵی داوە ئەو بڕە پارەیە بێ ئەوەی رایبگەیەنێت، بیباتە ژوورەوە، بەڵام لە کاتی پشکنینی وردی کەلوپەلەکانیدا لە هۆڵی گەیشتنی فڕۆکەخانەکەدا دۆزراوەتەوە.
دەستەی گشتیی گومرک جەختیشی کردەوە: رێکارە یاساییەکان بەرانبەر گەشتیارەکە و بڕە پارە دۆزراوەکە بەپێی یاسا و رێنماییە کارپێکراوەکان گیراونەتە بەر، ڕوونیشی کردەوە کە ئەم ئۆپراسیۆنە لە چوارچێوەی هەوڵە بەردەوامەکانیاندایە بۆ بەرەنگاربوونەوەی هەوڵەکانی قاچاغبردن و پاراستنی ئابووریی نیشتمانی.
وەزیری ناوخۆی هەرێمی كوردستان ئاشكرایكرد، ژمارەیەكی زۆر گەندەڵكاران لەلایەن هەرێمەوە رادەستی بەغداد كراونەتەوە و سزاكانی هاتوچۆی نێوان هەرێم و بەغدادیش یەكدەخرێت .
رێبەر ئەحمەد وەزیری ناوخۆی هەرێم لە كۆنفرانسێكی رۆژنامەوانیدا رایگەیاند: لە چوارچێوەی ئەو هەماهەنگییەی لەگەڵ حكومەتی عیراق هەیە، لە ماوەی رابردوودا ژمارەیەكی زۆر لەو كەسانەی لە دۆسێیەكانی گەندەڵیەوە تێوەگلابون و لە هەرێمی كوردستان بون، رادەستی بەغداد كراونەتەوە و جگە لەوەش بڕێكی زۆر زێر و پارە و سامان دراوەتەوە بەغداد .
هەروەها رایگەیاند: ئێستادا لەگەل عیراق لە هەوڵدان بۆ ئەوەی سزاكانی هاتوچۆ لە نێوان عیراق و هەرێمی كوردستان یەكبخرێت .
بەپێی راپۆرتێكی رۆژنامەی جیرۆسالیم پۆست، بریارە سبەینێ یۆنان بە رەسمی رێككەوتننامەیەكی سەربازیی مێژوویی لەگەڵ ئیسرائیل بە بەهای سێ ملیار و 600 ملیۆن دۆلار ئیمزا بكات، بە مەبەستی دروستكردنی سیستەمێكی بەرگریی ئاسمانیی پێشكەوتوو و فرەچین كە بە درعی ئەخیل ناوزەند كراوە.
رۆژنامەكە ئاماژەیبەوەشكردووە، ئەم رێككەوتنە بەرهەمی سێ ساڵ دانوستاندنی چڕی راستەوخۆی وەفدێكی رەسمی یۆنانی و وەزارەتی بەرگریی ئیسرائیلە، بەمەش تۆماری فرۆشتنی سیستەمی موشەكی ئارۆ_3 بە ئەڵمانیا لە ساڵی 2023 (كە بەهای 3.5 ملیار دۆلار بوو) دەشكێنێت و دەبێتە گەورەترین رێككەوتنی هەناردەكردنی سەربازی لە مێژووی ئیسرائیلدا.
یۆنان پێشتریش كڕیارێكی سەرەكیی كەلوپەلی سەربازیی ئیسرائیل بووە و چەندین جۆری موشەك، بۆمب و فڕۆكەی بێفڕۆكەوانی لە كۆمپانیا ئەمنییەكانی ئیسرائیل كڕیوە، بەڵام پڕۆژەی "درعی ئەخیل" دەبێتە وەچەرخانێكی ستراتیژی لە توانای بەرگریی ئاسمانیی ئافێن دا.
دەستەی پڕۆژەی "هەژماری من" نوێترین زانیارییەکانی دەربارەی پرۆسەی چاپکردن و دابەشکردنی کارتە بانکییەکانی تایبەت بە موچەخۆرانی هەرێمی کوردستان بڵاوکردەوە و داوا لە فەرمانبەران دەکات ئاگاداری پەیامە کورتەکانی مۆبایلەکانیان بن.
بەپێی زانیارییە بڵاوکراوەکانی پڕۆژەکە، پرۆسەی دابەشکردنی کارتەکان گەیشتووەتە قۆناغی کۆتایی و رێکارەکان بە شێوەیەک بەڕێوەدەچن کە:لە ئێستادا زیاتر لە 60 هەزار کارتی بانکی لە بانکە گشتییەکاندا ئامادەن و خاوەنەکانیان دەتوانن سەردانیان بکەن بۆ وەرگرتنەوەیان.
ئاماژەی بەوەش کرد: لە ماوەی ئەم دوو رۆژەدا نزیکەی 30 هەزار کارتی تر رەوانەی بانکە گشتییەکان دەکرێن و ئامادەی وەرگرتنەوە دەبن.
پڕۆژەی هەژماری من جەختیشی کردەوە: هانی تەواوی مووچەخۆران دەدەین کە بەردەوام ئاگاداری مۆبایلەکانیان بن، چونکە وەرگرتنەوەی کارتەکان راستەوخۆ لە رێگەی کورتەنامەوە بە فەرمانبەران رادەگەیەنرێت بۆ ئەوەی سەردانی بانکەکان بکەن.
وتیشی: لە ئێستادا تەنها 50 هەزار کارت لە ژێر چاپکردندا ماونەتەوە، بڕیاریشە تا هەفتەی داهاتوو چاپکردنیان تەواو بێت و بۆ وەرگرتنەوە ئامادە ببن.