هەواڵەکان
بەڕێوەبەرایەتی هاتوچۆی راپەرین هۆشداری دەداتە شۆفێران کە بە هۆی بەفربارینەوە ئاستەنگی هاتوچۆ لە شەش رێگەی سەرەکی دروست بووە و داوایان لێ دەکات بۆ کاری پێویست نەبێت، نەچنە دەرەوە.
بەڕێوەبەرایەتی هاتوچۆی راپەڕین لە راگەیەندراوێکدا ئاشکرای کرد، بەهۆی شەپۆلی بەفربارینەکەوە رێگەکانی (زینەتیر، سەروچاوە، زینی وەرتێ، کێلێ، خەلیفان و دۆڵی شاورێ) تووشی ئاستەنگ بوون و هەندێکیان بە تەواوی داخراون.
هاتوچۆی راپەڕین داوا لە هاووڵاتیان دەکات بۆ تۆمارکردنی ساتێکی خۆشی بەفر و وێنەگرتن ژیانی خۆیان و خێزانەکانیان نەخەنە مەترسییەوە و تا کەشوهەوا ئاسایی دەبێتەوە ئەو رێگانە بەکارنەهێنن.
هێزەکانی سوریای دیموکرات (هەسەدە) رایگەیاند، هێزەکانی سەر بە حکومەتی دیمەشق دەوروبەری سەدی تشرینیان تۆپباران کردووە و سێ چەکداری هەسەدە بریندار بوون.
کەناڵی روناهی لە زاری هەسەدەوە بڵاویکردەوە، گروپە چەکدارەکانی سەر بە حکومەتی دیمەشق بە تۆپخانە و چەکی قورس دەوروبەری ناوچە نیشتەجێبووەکانی سەدی تشرینیان کردووەتە ئامانج.
بەپێی راگەیەندراوەکە، بەهۆی تۆپبارانەکەوە سێ چەکداری هەسەدە بریندار بوون.
کەتائیبی قەسام، باڵی سەربازیی بزووتنەوەی حەماس، بە رەسمی کۆتایی بە دەنگۆکان هێنا و هەواڵی کوژرانی وتەبێژە سەربازییەکەی پشتڕاست کردەوە.
بەپێی هەواڵێکی بەپەلەی کەناڵی "الحدث"، کەمێک لەمەوبەر کەتائیبی قەسام لە راگەیەندراوێکدا کوژرانی "ئەبو عوبەیدە"، وتەبێژی سەربازیی هێزەکانیانی راگەیاند.
ئەم راگەیەندراوە دوای ماوەیەک لە بێدەنگی و بڵاوبوونەوەی دەنگۆی جیاواز دێت لەسەر چارەنووسی ناوبراو، کە لەلایەن سوپای ئیسرائیلەوە بە ئامانج گیرابوو.
دوای یەکلاییبوونەوەی پۆستی سەرۆکی پەرلەمان، دەرگای خۆکاندیدکردن بۆ پۆستی جێگری یەکەم کرایەوە و زانیارییەکان ئاماژە بە رێککەوتنی چوارچێوەی هەماهەنگی دەکەن لەسەر کاندیدێک.
پەیامنێری کوردسات نیوز لە بەغداد رایگەیاند، دوای هەڵبژاردنی هەیبەت حەلبوسی بە سەرۆکی خولی شەشەمی ئەنجومەنی نوێنەرانی عیراق، عامر فایز، سەرۆکی دانیشتنەکە دەرگای خۆکاندیدکردنی بۆ پۆستی جێگری یەکەمی سەرۆکی ئەنجومەنی نوێنەران کردەوە.
بەپێی زانیارییەکان، هێزەکانی چوارچێوەی هەماهەنگی (شیعەکان) لەسەر کاندیدکردنی عەدنان فەیحان، پارێزگاری ئێستای بابل بۆ پۆستی جێگری یەکەمی سەرۆکی پەرلەمان رێککەوتوون.
سەرچاوەکان ئاشکرایان کردووە، رکابەرییەکە لە نێوان عەدنان فەیحان و یاسر مالیکی (کاندیدی دەوڵەتی یاسا) و ئەحمەد ئەسەدی بووە، بەڵام تەرازووی هێز بەلای فەیحاندا شکاوەتەوە.
هاوکات بۆ پۆستی جێگری دووەمی سەرۆکی پەرلەمان کە پشکی کوردە، شاخەوان عەبدوڵڵا کاندیدە.
بافڵ جەلال تاڵەبانی، سەرۆکی یەکێتیی نیشتمانیی کوردستان پیرۆزبایی هەڵبژاردنی هەیبەت حەلبوسی وەک سەرۆکی ئەنجومەنی نوێنەرانی عیراق دەکات و داوای چارەسەرکردنی کێشەکان دەکات.
لە پەیامێکدا بۆ هەیبەت حەلبوسی، سەرۆکی ئەنجومەنی نوێنەرانی عیراق، بافڵ جەلال تاڵەبانی رایگەیاند: "بەبۆنەی بەدەستهێنانی متمانەی زۆرینەی پەرلەمانتاران، پیرۆزبایی گەرمتان لێدەکەم و هیوادارم لەم ئەرکە نیشتمانییەدا سەرکەوتوو بن".
بافڵ جەلال تاڵەبانی سەرۆکی یەکێتیی نیشتیمانی ئاماژەی بەوەشکردووە، ئومێدەوارن وەک یەک تیم کاربکەن بۆ بەهێزکردنی پەیوەندیی نێوان دەسەڵاتەکان و یەکخستنی هەوڵەکان بۆ چارەسەرکردنی کێشەکانی نێوان هەرێمی کوردستان و عیراق لەسەر بنەمای دەستوور و هاوبەشی.
لە کۆتاییدا جەختی کردووەتەوە کە بە لێکتێگەیشتن دەتوانرێت سەقامگیریی وڵات بپارێزرێت و خواستەکانی هاووڵاتییان بهێنرێتە دی.
ئەمڕۆ دووشەممە، ئەنجومەنی نوێنەرانی عیراق یەکەمین دانیشتنی خولی شەشەمی خۆی گرێدا و تێیدا هەیبەت حەلبوسی وەک سەرۆکی نوێی ئەنجومەنی نوێنەران هەڵبژێردرا.
پەیامنێری کوردسات نیوز لە بەغداد رایگەیاند، دانیشتنەکە بە سەرۆکایەتیی عامر فایز، وەک بەتەمەنترین پەرلەمانتار بەڕێوەچوو، تێیدا پەرلەمانتارانی نوێ سوێندی یاساییان خوارد.
لە پرۆسەی دەنگدان بۆ دەستەی سەرۆکایەتی، هەیبەت حەلبوسی، کاندیدی "ئەنجومەنی سیاسیی نیشتمانی" (کە زۆرینەی هێزە سوننەکان لەخۆدەگرێت) توانی زۆرینەی دەنگەکان بەدەستبهێنێت و ببێتە سەرۆکی ئەنجومەنی نوێنەران، ئەوەش دوای ئەوەی موسەننا سامەڕائی، سەرۆکی هاوپەیمانیی عەزم لە بەرژەوەندیی ناوبراو لە کاندیدبوون کشایەوە.
بەپێی زانیارییەکان، هەریەک لە عامر عەبدولجەبار و سالم عیساویش کاندید بوون، بەڵام بەهۆی رێککەوتنی پێشوەختەی نێوان "چوارچێوەی هەماهەنگی" و هێزە سوننەکان، حەلبوسی توانی پۆستەکە مسۆگەر بکات.
یەکەم دانیشتنی خولی شەشەمی ئەنجومەنی نوێنەرانی عیراق بەردەوامە و بڕیارە هەر ئەمڕۆ دەستەی سەرۆکایەتی ئەنجومەنەکە هەڵبژێردرێن.
تا ئێستا ئەندامەکان سوێندی یاساییان خواردوە
دەرگای خۆکاندیدکردن بۆ سەرۆکی ئەنجومەنی نوێنەران کراوەتەوە
موسەنا سامەڕائی لە کاندیدبوون بۆ پۆستی سەرۆکی ئەنجومەنی نوێنەران کشایەوە
دەنگدان بۆ هەڵبژاردنی سەرۆکی ئەنجومەنی نوێنەران دەستیپێکردوە
ئێستا هەریەک لە هەیبەت حەلبوسی و سالم عیساوی و عامر عەبدولجەبار، کێبڕێکێی بەدەستهێنانی پۆستی سەرۆکی ئەنجومەنی نوێنەران دەکەن
هێشتا ساڵ کۆتایی نەهاتوە و حکومەتی کۆریای باشور سەرکەوتنی خۆی لە هەناردەکردن بۆ ئەمساڵ راگەیاند و بە گوێرەی داتاکان، ئەو وڵاتە توانیویەتی بۆ کەمجار لە مێژویدا بە بەهای 700 ملیار دۆلار کاڵا و شتومەک هەناردەی دەرەوە بکات.
حکومەتی کۆریای باشوور رایگەیاند، توانیویانە بەسەر کۆسپەکاندا سەربکەون و بۆ یەکەمجار هەناردەکردنی ساڵانەیان بۆ ساڵی 2025، زیاترە لە 700 ملیار دۆلارە، هۆکاری گەشەسەندنەکەش بەهێزی کەرتی نیمچە هێڵکار و چیپەوە(ئەلیکترۆنیات)ـە لە وڵاتەکەدا.
بە گوێرەی داتاکان، هەناردەکردنی کەڵەکەبوو تا مانگی 11ـی ئەمساڵ گەیشتەوەتە 640.2 ملیار دۆلار، کە بە رێژەی 2.9% زیادیکردووە، پێشبینی دەکرێت لە مانگی 12 گەشەی ئابوری بەردەوام بێت و لە چەند رۆژی یەکەمدا بە رێژەی 6.8% بەرزبووەتەوە.
حکومەتی کۆریای باشور، هۆکاری گەشەسەندی هەناردەی وڵاتەکەی بۆ خواستی جیهانیی لەسەر تەکنەلۆژیای پێشکەوتوو و زیرەکی دەستکرد گەڕاندوەتەوە.
ئەم پێشکەوتنی ئابورییەی وڵاتی کۆریای باشور، هاوکاتە لەگەڵ دابەزینی هەندێک لە کەرتە تەقلیدییەکانی وەک پۆڵا و پترۆکیمیایی لە جیهاندا و بەشێک لە وڵاتان بە پێچەوانەوە لە کەرتی ئابوریدا لە پاشەکشەدان.
کەشناسی هەرێم بڵاویکردوەتەوە، لەمڕۆوە شەپۆلێکی تری بەفربارین روو لە هەرێم دەکات و لەزۆربەی ناوچە شاخاوویەکان و هەروەها سەنتەری پارێزگاکانی دهۆک، سلێمانی و هەڵەبجە دەوروبەری سەنتەری پارێزگاکانی هەولێر و کەرکوکیش دەگرێتەوە لەگەڵ نمەباران لەناوچە نزمەکانی هەرێم.
بەڕێوەبەرایەتی گشتی کەشناسی و بوومەلەرزەزانی هەرێم پێشبینی بۆ 48 سەعاتی داهاتوو بڵاوکردوەتەوە و بە گویرەی پیسبینیەکانیش شەپۆلێکی بەفربارین زۆربەی ناوجەکانی هەرێم دەگرێتەوە و لە ناوچە شاخاوویە بەرزەکان پێشبینی (15-30 ) سانتیمەتر و ناوچە نیمچە شاخاوویەکان (5-15 ) سانتیمەتر دەکرێت.
بە گوێرەی پێشبینییەکانیش، پلەکانی گەرما پێنج بۆ هەشت پلە دادەبەزن و لە ناوچە شاخاوییەکان دێتە ژێر سفر پلەی سیلیزی.
لە بارەی کەشی سبەینیشەوە، کەشناسی دەڵێت؛ ئاسمان هەور دەبێت لەگەل بارینی بەفر لەناوچە شاخاوویەکان و بۆ کاتەکانی نیوەرۆ کەش سەقامگیر دەبێتەو. و پلەکانی گەرماش بە نزمی دەمێننەوە و نزیک دەبن لە تۆمارکراوەکان ئەمڕۆ.
بەرزترین پلەکانی گەرمای پێشبینیکراویش بە پلەی سیلیزی بەمشێوەیەیە
هەولێر : 5 پلەی سیلیزی
سلێمانی : سفر پلەی سیلیزی
دهۆک : 1- پلەی سیلیزی
زاخۆ : 2- پلەی سیلیزی
کەرکوک : 6 پلەی سیلیزی
هەڵەبجە : 10 پلەی سیلیزی
سۆران: 2پلەی سیلیزی
ئاکرێ : 1- پلەی سیلیزی
ئامێدی: 4- پلەی سیلیزی
گەرمیان : 7 پلەی سیلیزی
لە روبەروبونەوەیەکی چەکداریدا، لە نێوان پۆلیسی کەرکوک و ژمارەیەک بازرگانی مادەی هۆشبەر، پۆلیسێک و دوو بازرگانی مادەی هۆشبەریش کوژران.
کاروان محەمەد، پەیامنێری کوردسات نیوز رایگەیاند، لە گوندی بیرئەسپان نزیک ناحیەی پردێ، شەوی رابردوو هێزەکانی پۆلیس روو بەڕووی سێ بازرگانی مادەی هۆشبەر بوونەوە و دوانیان کوژراون، لە بەرانبەردا پۆلیسێکیش گیانی لەدەستداوە و پۆلیسێكی تریش بریندارە.
بە گوێرەی زانیاریەکان، دوای بەدواداچونی هێزە ئەمنییەکان، لە گوندی بیرئەسپان، هێزە ئەمنییەکان گەمارۆی بازرگانەکان دەدرت و دوای ئەوەی داوایان لێدەکرێت خۆیانبدەن بەدەستەوە، یەکیان خۆی دەدات بەدەستەوە و دوانەکەی تر تەقەیان لە هێزە ئەمنییەکان کردوە.
لە ئەنجامی روبەڕوبونەوەکەدا، کارمەندیكی هێزە ئەمنییەکان دەکوژرێت و کارمەندێکی تر بریندار دەبێت، دوو بازرگانەکەی تریش دەکوژرێن.
پەیامنێری کوردستان نیوز ئاماژەی بەوەشکرد، بەگوێرەی زانیاریەکان، ئەو بازرگانانە لە دەرەوەی کەرکوکەوە مادەی هۆشبەریان هێناوە و لە ناو کەرکوک و پارێزگاکانی تر ساغیان کردوەتەوە.
ناوەندی راگەیاندنی هەسەدە رایگەیاند، چونی مەزڵوم کۆبانێ بۆ دیمەشق دواخراوە و ئاماژەیان بەوەکردوە، هیچ گۆڕانکارییەک لە پەیوەندییەکانیان روینەداوە و هۆکاری دواخستنەکە تەکنییەکییە.
ناوەندی راگەیاندنی هەسەدە، راگەیەندراوێکی بڵاوکردوەتەوە و تێیدا هاتووە؛ بڕیاربوو ئەمڕۆ 29ی کانونی یەكەم، مەزڵوم کۆبانێ ، فەرماندەی گشتی هێزەکانی سوریای دیموکرات، لەگەڵ وەفدی یاوەری دانوستانکاری باکور و رۆژهەڵاتی سوریا سەردانی دیمەشق بکەن، بەڵام بە هۆکاری تەکنیکی سەردانەکە دواخراو.
هەسەدە ئاماژەی بەوەشکردوە، لە داهاتوودا کاتێکی تر دیاری دەکرێت بۆ سەردانیکردنی مەزڵوم کۆبانێ بۆ دیمەشق، کە هەموو لایەنە پەیوەندیدارەکان لەسەری رێکبکەون.
هەسەدە دوپاتیکردوەتەوە، دواخستنەکە پەیوەندیدارە بە رێکخستنە لۆجستی و تەکنیکییەکانی سەردانەکە و هیچ گۆڕانکارییەک لە ئاستی پەیوەندییەکانی ئیدارەی خۆسەر و حکومەتی دیمەشق و ئامانجی گفتوگۆکان روینەداوە.
میدیاکانی تورکیا بڵاویانکردوەتەوە، لە روبەڕوبونەوەی پۆلیس و ژمارەیەک گومانلێکراوی سەر بە رێکخراوی داعش لە ناوچەی یالۆڤا لە باکوری رۆژئاوای وڵاتەکە، حەوت ئەفسەری پۆلیس تورکیا بریندارن.
ئەمڕۆ دوو شەممە، کەناڵی دەوڵەتی تورکیا، تی ئاڕ تی بڵاویکردەوە، لە ناوچەی یالۆڤا لە باکووری رۆژئاوای تورکیا لە کاتی شەڕ و پێکدادانێکدا لەگەڵ کەسانێک، کە گومانی ئەوەیان لێکراوە داعشبن ، حەوت ئەفسەری پۆلیسی تورکیا بریندار بوون.
بە گوێرەی زانیارییەکان، پۆلیسی شاری یالۆڤا ئۆپەراسیۆنێکی دەستپێکردووە وخانویەکیان کردووەتە ئامانج، کە گومانیان هەبوە ئەندامانی داعشی تێدا بوو بێت، لەکاتی هەڵکوتانە سەر خانوەکە، روبەڕوبونەوەی چەکداری دروست بوە و حەوت پۆلیس بریندار بوون.
میدیاکانی تورکیا، تا ئێستا لەبارەی رەوشی تەندروستی پۆلیسە بریندارەکانەوە هیچ زانیارییەکیان بڵاونەکردوەتەوە، هەروەها ئاماژەیان بە ژمارەی چەکدارەکان و چارەنوسی ئەوانیش نەکردوە.
جارێکیتر عەلەوییەکانی سوریا دەستیان بە خۆپیشاندان کردەوە و داوای مافی چارەی خۆنوسین و جیابونەوە لە سوریا دەکەن، لە خۆپیشاندانەکاندا، گرژی دروست بوو لەگەڵ هێزە ئەمنییەکانی سوریا و تەقەیان لەیەکتری کرد، بەهۆیەوە کوژراو و بریندار هەیە.
ئەمڕۆ یەکشەممە، دوابەدوای "دەسەڵاتی باڵای مەعنەوی کۆمەڵگەی عەلەوییەکان" و سەرۆکی ئەنجومەنی باڵای ئیسلامی عەلەوییەکان، بۆ خۆپیشاندان لە ناوچەی کەناراوەکانی سوریا، سەدان خۆپیشاندەر لە شارەکانی لازقییە و تەرتوس لەژێر دروشمی "چارەی خۆنوسین" رژانە سەر شەقامەکان و گرژی و ئاڵۆزی دروستبوو لە نێوان هێزەکانی حکومەتی سوریا و چەکدارەعەلەویەکان.
میدیا عەرەبییەکان بڵاویانکردوەتەوە، لە خۆپیشاندانی عەلەوییەکاندا، لە تەرتوس و لازقییە، هێزەکانی حومەتی سوریا و چەکدارە عەلەوییەکان روبەڕووی یەکتری بونەتەوە.
بە گوێرەی زانیارییەکان و ئەو گرتە ڤیدیۆیانەی لە تۆڕەکۆمەڵایەتییەکان بڵاوکراونەتەوە تا ئێستا، جەگە لە برینداربون، ژمارەیەک هاووڵاتی مەدەنی کوژراون ولە بەرانبەریشدا یەکێک لە سەربازەکانی حکومەتی سوریاش کوژراوە و تا ئێستا کوژرانی سێ کەس و برینداربونی زیاتر لە 50 کەس پشتراستکراوەتەوە.
لای خۆیەوە وەزارەتی ناوخۆ رایگەیاندوە، ژمارەیەک سەربازیان برینداربوون "دوای ئەوەی لە لازقیە و جەبلە لەلایەن پاشماوەکانی رژێمی ئەسەدەوە هێرشیان کراوەتە سەر".
گەرچی وەزارەتی ناوخۆی سوریا دەڵێت کۆنتڕۆڵی رەوشەکیان کردوە، بەڵام بە گوێرەی گرتە ڤیدیۆییەکان، خۆپیشاندان و روبەڕوبوەنەوە بەردەوامی هەیە.
بەڕێوەبەرایەتی گشتیی حەج و عومرەی هەرێمی کوردستان رایگەیاند، ئەو حاجییانەی ساڵی 2025 کە بە فڕۆکە چوون و بە پاس گەڕانەوە، قەرەبوو دەکرێنەوە.
کاروان ستونی، وتەبێژی رەسمیی حەج و عومرەی کوردستان رایگەیاند، دەستەی باڵای حەج و عومرەی عیراق ئاگاداری کردوونەتەوە کە 3 هەزار و 443 حاجیی هەرێم قەرەبوو دەکرێنەوە، چونکە ساڵی پار بەهۆی راگیرانی گەشتە ئاسمانییەکانەوە ناچار بوون بە پاس بگەڕێنەوە.
وتیشی: "بڕیارە دوای پشووی سەری ساڵ نوسراوی رەسمی بگات، بەڵام داوای لیستی ناوی حاجییەکانیان لێ کردووین".
سەبارەت بە بڕی پارەکە، وتەبێژەکە ئاشکرای کرد، ئەو بڕە پارەیەی دیاریکراوە تەنیا 80 هەزار دینارە، چونکە بەغداد خۆی گرێبەستەکان دەکات و هیچ نوێنەرێکی هەرێم لە لیژنەی خەمڵاندندا نەبووە.
ئاماژەی بەوەشکرد، دوای وەرگرتنی پارەکە، بە میکانیزمێکی گونجاو و ئاسان دەیدەنەوە بەو حاجییانەی کە مافی قەرەبوویان هەیە.