هەواڵەکان
ئەمریکا رایگەیاند توانیویانە بە سەرکەوتویی و بە بێ بونی زیان ژمارەیەک موشەک و فڕۆکەی بێفڕۆکەوانی ئێران لە کەنداودا تێکبشکێنن و لە بەرانبەردا دورگەی قیشمیان بۆردومان کردوە.
فەرماندەیی ناوەندیی ئەمریکا (سێنتکۆم) رایگەیاند، هێزەکانیان روبەڕووی چەندین موشەکی بالیستی و فڕۆکەی بێفڕۆکەوان بوونەتەوە کە لەلایەن ئێرانەوە تەقێندراون،و جەختیشی کردەوە کە سەرجەم هێرشەکان لە پێکان و بەدیهێنانی ئامانجەکانیان شکستیان هێناوە.
سێنتکۆم لە راگەیەندراوێکدا ئاماژەی بەوە کرد، کە هێزەکانی ئەمریکا، وەک وەڵامدانەوەیەک بۆ ئەو هێرشانەی تاران لە چەند سەعاتی رابردوودا ئەنجامی دابوون، هێرشیان کردووەتە سەر دورگەی قیشم لە ئێران.
سێنتکۆم ئەوەشی خستوەتەڕوو، کە ئێران چەندین موشەکی بالیستی بە ئاڕاستەی ژمارەیەک لە وڵاتانی دراوسێ تەقاندووە، بەڵام نەیانتوانیوە هیچ ئامانجێک بپێکن؛ لەوانەش دوو موشەکی ئێرانی بە ئاراستەی کوێت تەقێندراون کە بەر لەوەی بگەنە ئامانجەکەیان کەوتونەتە خوارەوە یان لە ئاسمان تێکشکێندراون، بێ ئەوەی هیچ برینداربوون یان زیانێکی لێ بکەوێتەوە.
سەبارەت بە بەحرەین، فەرماندەیی ناوەندیی ئەمریکا پشتڕاستی کردەوە، کە هێزەکانیان بە هاوکاری لەگەڵ هێزەکانی بەحرەین، سێ موشەکیان تێکشکاندوە، کە ئامانجەکەیان بەحرەین بووە.
لە بەرانبەردا، تا ئێستا دەسەڵاتدارانی ئێران هیچ لێدوانێکیان لەسەر ناوەڕۆکی راگەیەندراوەکەی فەرماندەیی ناوەندیی ئەمریکا نەداوە، لە کاتێکدا ئەم پەرەسەندنانە لە سایەی گرژییە سەربازییە بەردەوامەکانی ناوچەکە و ئاڵوگۆڕی هێرشەکانی نێوان ئەمریکا و ئێراندا دێن.
ئاژانسی ئەسۆشێتد پرێس رایگەیاندووە، رێژەی هەڵاوسانی خاڵ بۆ خاڵ لە ئێران لە مانگی ئایاردا گەیشتووەتە بەرزترین ئاست لە دوای جەنگی دووەمی جیهانەوە.
بەگوێرەی زانیاری ئاژانسەکە، هەڵئاوسانەکە بە جۆرێکە، سەنتەری ئامار بە 83% و بانکی ناوەندی ئێرانیش بە نزیکەی 77% خەمڵاندوویانە؛ پەیمانگەی "بامداد"یش ئەم رەوشەی وەک ریکۆردێکی مێژوویی و بێپێشینە وەسف کردووە.
ئاژانسەکە ئاماژەی بەوە کردووە، کە دوایین جار ئەم جۆرە هەڵاوسان و قەیرانە لە ساڵی 1942دا بەهۆی داگیرکاریی هێزەکانی بەریتانیا و سۆڤیەت و سەرهەڵدانی برسێتی و نەخۆشی رویدابوو.
لە کاتێکدا دەسەڵاتدارانی ئێران سەرقاڵی رێکخستنی وۆرکشۆپی مەشقکردن لەسەر بەکارهێنانی چەکی گەرم و سازدانی رێوڕەسمی هاوسەرگیرین لەژێر سێبەری موشەکە بالیستییەکاندا، شارەزایان هۆشداری دەدەن، ئەگەر خەڵک نەتوانن تێچووی بژێوی و خۆراکی خێزانەکانیان دابین بکەن، ئەوا ئەگەری زۆرە شەپۆلێکی نوێی ناڕەزایەتییەکان سەرهەڵبداتەوە.
لە دە ساڵی رابردوودا، زنجیرەیەک ناڕەزایەتی و خۆپیشاندان ئێرانی گرتوەتەوە و بەهۆی گوشارەکانی جیهان و ئەو رەوشە ئابوریە خراپەی ئێران تێیکەوتوە، مەودای ناڕەزایەتییەکان جار لەدوای جار کەمتر دەبێتەوە و بازنەی ناڕەزایەتییەکان فراوانتر دەبێت.
لای خۆشیەوە موحسین جەلیلوند، شیکەرەوەی سیاسی هۆشداری داوە کە ئەگەر رەوشی ناوچەکە و گوشارەکان بەم شێوازە بەردەوام بن، بەهۆی خراپیی رەوشی ئابووری و کۆمەڵایەتییەوە، دوور نییە تا کۆتایی هاوین بینەری خولێکی تری راپەڕین و ناڕەزایەتییەکان بین هاوشێوەی روداوەکانی مانگی کانوونی دووەمی رابردوو.
قوباد تاڵەبانی، جێگری سەرۆکی ئەنجومەنی وەزیرانی هەرێم، لە پەیامێکدا پیرۆزبایی لە تۆم باراک دەکات بۆ ئەرکە نوێیەکەی لە عیراق.
قوباد تاڵەبانی لە پەیامێکیدا لە تۆری کۆمەڵایەتی ئێکس نوسیویەتی؛ بەبۆنەی دەستنیشانکردنی وەک نێردەی تایبەتی سەرۆک ترەمپ بۆ کاروباری عیراق، پیرۆزباییەکی گەرم لە بەڕێز تۆم باراک دەکەین.
ئاماژەی بەوەشداوە: ئێمە لە هەرێمی کوردستان ئامادەین بۆ هاوکاری و پێکەوەکارکردن لەگەڵ بەڕێزیان لە بەرەنگاربوونەوەی هەموو ئەو ئاڵنگارییانەی هەڕەشەن بۆسەر ئاسایش و سەقامگیری عیراق و ناوچەکەمان.
تۆم باراک، نێردراوی تایبەتی سەرۆکی ئەمریکا لە عیراق و سوریا، پێشوازی و دەستخۆشی لە هەنگاوەکەی عەلی زەیدی، سەرۆک وەزیرانی عیراق کرد بۆ هەوڵەکانی بەمەبەستی سنوردارکردنی چەک لە دەستی دەوڵەتدا.
نێردراوەکەی سەرۆکی ئەمریکا لە تویتێکدا، لە تۆڕی کۆمەڵایەتی ئێکس رایگەیاندوە، گەرمترین پیرۆزبایی ئاڕاستەی سەرۆک وەزیرانی عیراق دەکات بۆ ئەم هەنگاوە گرنگە.
تۆم باراک هەنگاوەکەی بە گرنگ زانیوە و بە بڕوای ئەو دەبێتە بەردی بناغە بۆ حوکمڕانییەکی نوێی سەربەخۆ لە عیراقدا و بنەمایەکە بۆ گەڕاندنەوەی سەروەری، سەقامگیری بەردەوام و گەشەسەندنی نیشتمانی.
لە بەشێکی تری پەیامەکەیدا، ستایشی ئەو گروپ و لایەنانەدەکا، کە بڕیاریانداوە بە رادەستکردنەوەی سەرجەم چەکەکانیان بە دەوڵەتی عیراق.
ناوبراو ئاماژەی بەوە کردوە، کە ئەم بڕیارە هاوکار دەبێت لە بنیاتنانی سیستەم و چەسپاندنی یاسا و ئەم پێشهاتەش تەنها سەرەتایەک دەبێت بۆ قۆناغێکی نوێ.
رێکخراوی روانگەی سووری بۆ مافەکانی مرۆڤ ئاشکرای کرد، لە ساڵی 2026ەوە، ئامارەکانی تاوان و کوشتن بەشێوەیەکی مەترسیدار لە پارێزگاکانی سووریا رویان لە زیادبوون کردووە و لە سەرەتای ساڵەوە 222 هاووڵاتی کوژراون.
بە گوێرەی ئامارەکانی روانگەی سوری، لە سەرەتای ئەمساڵەوە، 201 تاوان و روداوی کوشتن تۆمارکراون، کە بوونەتە هۆی گیانلەدەستدانی 222 کەس، کە 178 یان پیاو بوون و 30 ژن و 14ەشیان منداڵن.
رێکخراوەکە ئاماژەی بەوەشکردوە، 46 حاڵەتی شەڕی عەشایەری و خێزانی کە 32 کوژراو و 80برینداری لێکەوتووەتەوە تۆمارکراوە و شارەزایان ئەم تەقینەوە کۆمەڵایەتییە بۆ خراپی بژێوی ژیان، بەرزبوونەوەی رێژەی هەژاری و بێکاری و بڵاوبوونەوەی بەربڵاوی چەکی بێ مۆڵەت دەگەڕێننەوە، کە وایکردووە کێشە بچووکەکان بە خێرایی ببنە هۆی خوێنڕشتن.
روانگەی سوری دەڵێت؛ لە پاڵ ئەمانەشدا، بەردەوامیی نەریتی کۆنی تۆڵەسەندنەوەی خێڵەکی و پەرەسەندنی گوتاری رق و کینە، پشێوییەکی توندی ئەمنی تری دروستکردووە کە بەهۆیەوە 95 کەس بەهۆی کردەوەی تۆڵەسەندنەوە و لەدەرەوەی یاسا کوژراون.
لە بەرانبەر ئەم رەوشە شڵەژاوەدا، روانگەی سووری داوایەکی بەپەلەی ئاراستەی لایەنە پەیوەندیدارەکان کردوە بۆ چەسپاندنی سەروەری یاسا، کۆنترۆڵکردنی چەکی دەستی، چالاککردنی دادگاکان و دۆزینەوەی چارەسەری ریشەیی بۆ قەیرانە ئابووری و دەروونییەکان بە مەبەستی پاراستنی گیانی مەدەنییەکان و گەڕاندنەوەی ئارامی بۆ کۆمەڵگە.
دەستەی راگەیاندن و گەیاندنی عیراق هەڵوەشاندنەوەی گرێبەستەكەی لەگەڵ كۆمپانیای كۆڕەك تیلیكۆم و راگرتنی سەرجەم كارەكانی ئەو كۆمپانیایەی راگەیاند، دەشڵێت، رێوشوێنی یاسایی و رێكخراوەیی و تەكنیكی لەبەرانبەر دەگرنەبەر.
دەستەی راگەیاندن و گەیاندنی عیراق لە راگەیەندراوێكدا بڵاویكردەوە، بەهۆی پابەندنەبوونی كۆمپانیای كۆڕەك تیلیكۆم بەو گرێبەستەی لەگەڵیان ئەنجامیداوە بۆ دانەوەی قەرزە كەڵەكەبووەكانی، دەستەكە بڕیارداوە بە هەڵوەشاندنەوەی گرێبەستەكەی و راگرتنی سەرجەم كارەكانی ئەو كۆمپانیایە، بە هەماهەنگی لەگەڵ دەزگا نیشتمانی و نێودەوڵەتیە پەیوەندیدارەكانیش، رێوشوێنی یاسایی و رێكخراوەیی و تەكنیكی لەبەرانبەر كۆمپانیای كۆڕەك تیلیكۆم و سەروەت و سامانەكەی دەگیرێتەبەر.
ئەوەشی خستەڕو، دەستەی راگەیاندن و گەیاندن بەڕێوەبەرایەتی دەنگی بەكارهێنەرانی راسپاردووە رێوشوێنی پێویستە بگرێتەبەر بۆ وەرگرتن و تۆماركردنی سكاڵای بەشداربووانی كۆمپانیای كۆڕەك تیلیكۆم، بەرپرسیارێتی دەرئەنجامە یاسایی و داراییەكانی بڕیارەكەشی خستووەتە ئەستۆی كۆمپانیای كۆڕەك.
دەستەی راگەیاندن و گەیاندن داواش دەكات، هەموو لایەنە رەسمی و نارەسمییەكان و هاوڵاتییانی مەدەنی خۆیان لە هەر جۆرە مامەڵەیەك لەگەڵ كۆمپانیای كۆڕەك تیلیكۆم بەدووربگرن.
بافڵ جەلال تاڵەبانی سەرۆکی یەکێتیی نیشتمانیی کوردستان، پەیامێکی سەبارەت بە رادەستکردنی چەکی 'عەسائیبی ئەهلی حەق' بڵاوکردەوە و تێیداهاتووە: زۆر سوپاس و پێزانینم هەیە بۆ ئەو هەڵوێستەی برام شێخ قەیس خەزعەلی لەپێناو پاڵپشتیکردن و بەهێزکردنی قەوارەی دەوڵەتی عیراق و دامەزراوەکانی.
دەقی پەیامەکە
زۆر سوپاس و پێزانینم هەیە بۆ ئەو هەڵوێستەی برام شێخ قەیس خەزعەلی لەپێناو پاڵپشتیکردن و بەهێزکردنی قەوارەی دەوڵەتی عیراق و دامەزراوەکانی.
لەم قۆناغە هەستیارەدا، ئەم جۆرە هەڵوێستە بەرپرسیارانە، ئازایانە و نیشتمانپەروەریانە دەبنە هۆی بەهێزکردنی یەکڕیزیی نیشتمانی و قووڵکردنەوەی متمانە لەنێوان عیراقییەکاندا، هەروەها هەنگاوێکی گرنگن بەرەو بەدیهێنانی ئاواتە هاوبەشەکانمان بۆ دابینکردنی پاشەڕۆژێکی سەقامگیرتر، ئارامتر و گەشەسەندووتر بۆ وڵاتەکەمان.
بافڵ جەلال تاڵەبانی
سەرۆکی یەکێتیی نیشتمانیی کوردستان
مارکۆ رۆبیۆ، وەزیری دەرەوەی ئەمریکا رایگەیاند، هێزی دەریای ئێران بە تەواوەتی لەناوچوە، بەڵام هێشتا خاوەنی ژمارەیەکی زۆر فڕۆکەی بێفڕۆکەوانە.
وەزیرەکەی ئەمریکا دەڵێت؛ لە کاتێکدا تاران پێشتر کاری لەسەر بنیاتنانی جبەخانەیەکی موشەکی دەکرد بۆ پاراستنی بەرنامە ئەتۆمییەکەی، بەڵام ئێستا قەڵغانی ئەو وڵاتە بە شێوەیەکی بەرچاو داڕماوە، هەروەها هیچ کەشتیگەلێکی دەریاییان نەماوە.
رۆبیۆ ئاماژەی بەوەکرد، هێزی دەریایی ئێران بە تەواوەتی لەناوچووە و کەشتییەکانیان لە بنی دەریادان، تەنها ژمارەیەک بەلەمی بچوکیان ماوە.
ئەوەشیخستوەتەڕوو، سیستەمی فەرمانڕەوایی ئێران لە ئێستادا دابەشبوو و پارچەپارچەیە، بە جۆرێک کە چەند رۆژێکی دەوێت تاوەکو وەڵامێکیان لێ وەربگیرێتەوە.
ناوبراو رونیشیکردوەتەوە، کە واشنتۆن لە ئێستادا لە ناوەڕۆکی دانوستاندایە لەگەڵ تاراندا، بەڵام ئەم گفتوگۆیانە هاوشێوەی دانوستاندن لەگەڵ وڵاتێکی وەک سویسرا نین.
لە کۆتاییدا وەزیری دەرەوەی ئەمریکا هیوای خواست کە بگەنە رێککەوتنێک بۆ دووبارە کردنەوەی گەروی هورمز و ئاماژەی بەوەدا کە لەوانەیە ئێران رازی بووبێت لەسەر بەرنامە ئەتۆمییەکەی گفتوگۆ بکات، کە پێشتر بە تەواوی ئەمەی رەتدەکردەوە.
نزار ئامێدی، سەرۆک کۆماری عیراق رایگەیاند، پێشوازی لەو هەوڵانەی چوارچێوەی هەماهەنگی دەکات بۆ چەسپاندنی دەسەڵاتی دەوڵەت و بەهێزکردنی سەروەریەکەی کە دەبێتە هۆی سەقامگیری وڵات، هەروەها پاڵپشتی ئەمینداری گشتیی بزووتنەوەی عەسائیبی ئەهلی حەق دەکات بۆ دانانی چەک.
سەرۆک کۆمار جەختیکردوەتەوە، کە هێز و شکۆی دەوڵەت لە دامەزراوە دەستووری و یاسایییەکانیدا بەرجەستە دەبێت و هەر هەنگاوێک، کە بەشدار بێت لە پاڵپشتیکردنی ئەم رێکارە، نوێنەرایەتی چەسپاندنی بنیاتنانی دەوڵەت و سەروەری یاسا دەکات.
دەقی راگەیەندراوەکەی سەرۆک کۆمار
پێشوازی لەو هەڵوێست و هەنگاوانە دەکەین کە لە کۆبوونەوەی چوارچێوەی هەماهەنگیدا هاتوون بۆ چەسپاندنی دەسەڵاتی دەوڵەت و بەهێزکردنی سەروەرییەکەی، هەروەها پێشوازی و پاڵپشتی لە دەسپێشخەرییەکەی بەڕێز شێخ قەیس خەزعەلی، ئەمینداری گشتیی بزووتنەوەی عەسائیبی ئەهلی حەق دەکەین، کە بریتییە لە پچڕاندنی پەیوەندی بزووتنەوەکە بە پێکهاتەکانی دەستەی حەشدی شەعبییەوە و جەختکردنەوە لەسەر بنەمای مانەوەی چەک تەنها لە دەستی دەوڵەتدا، بەو شێوەیەی کە لەگەڵ بڕگەکانی دەستوور و یاسادا دەگونجێت و ئاسایش و سەقامگیری لە وڵاتدا بەهێز دەکات.
دوپاتی دەکەینەوە کە هێز و شکۆی دەوڵەت لە دامەزراوە دەستووری و یاسایییەکانیدا بەرجەستە دەبێت، و هەر هەنگاوێک کە بەشدار بێت لە پاڵپشتیکردنی ئەم رێکارە، نوێنەرایەتی چەسپاندنی بنیاتنانی دەوڵەت و سەروەری یاسا دەکات، و دەبێتە هۆی بەهێزکردنی متمانەی هاووڵاتیان بە دامەزراوەکانیان، ئەمەش هاوتایە لەگەڵ بڕگەکانی دەستوور و یاسا کارپێکراوەکان و ڕێنمایییەکانی مەرجەعیەتی باڵای ئایینی.
نزار ئامێدی
سەرۆک کۆمار
سێشەممە ٢ی حوزەیرانی ٢٠٢٦
دوای نزیکەی 100 رۆژ لە کوژرانی، رابەڕی پێشوی ئێران لە هێرشەکانی ئیسرائیل و ئەمریکادا، محەمەد عەلی، جێگری شارەوانی تاران بۆ کاروباری کۆمەڵایەتی و فەرهەنگی بەبێ دیاریکردنی شوێنەکەی رایگەیاند، بڕیارە لە کۆتایی مانگی شەشدا پرسەکەی بەرێوە بچێت.
جێگری شارەوانی تاران کاتی دانانی پرسەی عەلی خامنەیی بۆ میدیای وڵاتەکەی ئاشکرا کردوە و ئاماژەی بەوەکردوە، پرسەکە لەژێر چاودیری سوپای پاسداراندا ئەنجام دەدرێت و بڕیارە سەرەتا لە تارانی پایتەخت ئەنجامبدرێت و دواتر لە شارەکانی تر.
ناوبراو ئاماژەی بەوەکردوە، بە گوێرەی پلانەکان سێ رۆژ رێوڕەسمی ماتەمینی لە تاران رادەگەیەندرێت لە پایتەخت ئامادەکاری دەکەن بۆ پێشوازیکردن لە ئامادەبوونی 15 بۆ 20 ملیۆن کەس لە رێوڕەسمەکەدا.
وتوشیەتی؛ دواتر لەسەر خواستی پارێزگاکانی تریش بڕیارە، پرسەکە لە شارەکانی قوم و مەشهەدیش بەڕێوە دەچێت.
لەبارەی کاتی پرسەکەشەوە، محەمەد عەلی وتویەتی، بەگوێرەی پلانەکە دەکەوێتە کۆتایی ئەم مانگەوە و لە ئێستادا تەواوی پارێزگاکان و هاووڵاتییانی ئێران خۆیان ئامادەدەکەن بۆ بەشداریکردن لە پرسەکەدا.
ئەمە لە کاتێكدایە بەیانی رۆژی 28-2-2026، لە هێرشێکی ئەمریکا و ئیسائیلدا بارەگای رابەری پێشوی ئێران لە تارانی پایتەخت کرایە ئامانج و دوای تەنها چەند سەعاتێک ئیسرائیل کوژرانی عەلی خامنەیی راگەیاند، ئەوکات بەهۆی جەنگەکەوە بەخاکسپاردن و رێوڕەسمی ماتەمینیان بۆ دانەنا.
دەسەڵاتدارانی بەحرێن، ئەمڕۆ سێشەممە، رایانگەیاند کە بەهۆی بەردەوامیی گرژییەکانی دۆخی ئەمنیی ئێستا، گەشتی هاووڵاتیانی خۆیان بۆ ئێران و عیراق قەدەغە کردووە.
وەزارەتی ناوخۆی بەحرێن لە بەیاننامەیەکدا رایگەیاند: بەهۆی بەردەوامیی گرژییەکانی دۆخی ئەمنیی ئێستا کە لێکەوتەی دەستدرێژییە بەدکارانەکەی ئێرانە، و لە سۆنگەی پەرۆشیمان بۆ پاراستنی ئاسایشی نیشتمان و سەلامەتی سەرجەم هاووڵاتیان، وەزارەتی ناوخۆ رایدەگەیەنێت کە بڕیاردراوە بە قەدەغەکردنی گەشتی هاووڵاتیان بۆ هەریەکە لە ئێران و عیراق، ئەمەش تا کاتێکی نادیار.
وەزارەتی ناوخۆی ئەو وڵاتە جەختیشی کردووەتەوە کە: سەرجەم رێکارە یاساییە پێویستەکان بەرانبەر سەرپێچیکاران دەگیرێنەبەر.
وەزارەتی کشتوکاڵی عیراق، ئەمڕۆ سێشەممە، رێکارگەلێکی بۆ سنووردارکردنی بەرزبوونەوەی نرخی هێلکەی خواردن راگەیاند.
مەهدی سەهر ئەلجبووری، بریکاری وەزارەتی کشتوکاڵ بە ئاژانسی هەواڵی عێراقی راگەیاند: داواکاری لەسەر هێلکەی خواردن لە بازاڕە ناوخۆییەکاندا هێشتا لە قەبارەی بەرهەمهێنانی ناوخۆیی زیاترە، هۆکاری ئەمەش بۆ دابەزینی ئاستی بەرهەمهێنانی زۆربەی پڕۆژە تایبەتمەندەکان بەهۆی بەرزیی تێچووی بەرهەمهێنان، بەتایبەتی نرخی ئالیک و پێداویستییەکانی بەرهەمهێنانی کشتوکاڵی دەگەڕێنێتەوە.
ئاماژەی بەوەش کرد کە: وەزارەت رێگەی بە هاوردەکردنی هێلکەی خواردن لە دەرەوە داوە بۆ پڕکردنەوەی ئەو کورتهێنانەی لە بازاڕەکاندا هەیە، بەڵام بەرزبوونەوەی تێچووی بەرهەمهێنان لە وڵاتانی دراوسێ و دابەزینی ئاستی بەرهەمهێنان تیایاندا، بووەتە هۆی سنووردارکردنی هاتنی بڕی پێویستی هێلکەی هاوردەکراو بۆ عیراق،
ئاماژەی بەوەش کرد کە: وەزارەتی کشتوکاڵ لە ئێستادا رودەکاتە هاندانی خاوەن پڕۆژەکانی هێلکەی خواردن بۆ زیادکردنی توانای بەرهەمهێنانیان، هاوتەریب لەگەڵ جەختکردنەوە لەسەر جێبەجێکردنی ئەو نرخە رەسمییەی کە لەلایەن ئەنجومەنی وەزاریی ئابوورییەوە پەسەند کراوە، و بەدواداچوونی لایەنە پەیوەندیدارەکان بۆ بازاڕە ناوخۆییەکان بە مەبەستی دەستەبەرکردنی پابەندبوون بە نرخە دیاریکراوەکان و تێنەپەڕاندنیان.
ناوبراو ئاماژەی بەوەش دا کە: وەزارەت کار دەکات بۆ کەمکردنەوەی تێچووی بەرهەمهێنان لە رێگەی هاندانی وەبەرهێنان لە زەوییە کشتوکاڵییەکاندا دوای باشتربوونی دۆخی ئاو و پەسەندکردنی پلانی کشتوکاڵی هاوینە، بەتایبەتی لەو لایەنەی پەیوەندی بە چاندنی بەرهەمە ئالیکییەکانەوە هەیە وەک گەنمەشامی زەرد و فاسۆلیای سۆیا ، رونیشی کردەوە کە: ئەم رێکارانە هاوکار دەبن لە بەهێزکردنی بەرهەمهێنانی ئالیک لە ناوخۆدا و کەمکردنەوەی هاوردەکردنی لە دەرەوە.
رێکخراوی ئینتەرناسیۆنالی سۆسیالیست، بروسکەیەکی پیرۆزبایی ئاراستەی یەکێتیی نیشتمانیی کوردستان کرد بەبۆنەی 51ەمین ساڵیادی دامەزراندنییەوە، و تێیدا ستایشی رۆڵی مێژوویی سەرۆک مام جەلال کرد.
لە بەیاننامەکدا کە لە لایەن شانتال کامبیوا، رێکخەری گشتیی ئینتەرناسیۆنالی سۆسیالیستەوە واژۆ کراوە، هاتووە: بەناوی ئینتەرناسیۆنالی سۆسیالیستەوە، گەرمترین پیرۆزبایی ئاراستەی یەکێتیی نیشتمانیی کوردستان دەکەین بەبۆنەی 51ەمین ساڵیادی دامەزراندنییەوە.
بەیاننامەکە ئاماژەی بەوەش کردوە، لە کاتی دامەزراندنییەوە لە یەکی حوزەیرانی 1975، یەکێتی وەک مەشخەڵێکی دیموکراسی، مافەکانی مرۆڤ و مافی چارەی خۆنووسینی گەلی کورد ماوەتەوە، ئەو بەهایانەی کە لە سەروو هەمووانەوە لە لایەن دامەزرێنەری کۆچکردوو و سەرۆک کۆماری پێشووی عیراق، مام جەلال تاڵەبانییەوە بەرجەستە کرابوون.
بەیاننامەکە تیشکی خستووەتە سەر کار و خزمەتە گرنگەکانی مام جەلال لە پۆستی جێگری سەرۆکی ئینتەرناسیۆنالی سۆسیالیستدا، کە بووە هۆی توندوتۆڵکردنی پێوەندییەکانی نێوان هەردوو ڕێکخراوەکە، و جەختیشی کردووەتەوە کە میراتی مێژوویی ئەو هەمیشە بە زیندوویی دەمێنێتەوە.
لە کۆتایی بروسکەکەدا هاتووە: هیوای بەردەوامیی هێز و سەرکەوتن بۆ یەکێتیی نیشتمانیی کوردستان و گەلی کورد لە ساڵانی داهاتوودا دەخوازین.
کازم غەریب ئابادی، جێگری وەزیری دەرەوەی ئێران بۆ کاروباری یاسایی پرسیاری کرد: ئەگەر بڕیاری هێرشکردنە سەر بەیروت بە پەیوەندییەکی تەلەفۆنی گۆڕابێت، ئەی بۆچی پێشێلکردنی ئاگربەست لە لوبنان و ئاوارەکردنی لوبنانییەکان بۆ ماوەی چەندین مانگ بەردەوام بوو؟.
غەریب ئابادی لە پۆستێکدا لە "ئێکس" رایگەیاند، پەرەسەندنەکانی ئێستا لە لوبنان، سووریا و قودس یەک راستییان زیاتر روون کردووەتەوە: قەیرانی ناوچەکە دەرەنجامی 'گرژیی پچڕپچڕ' نییە، بەڵکو بەرهەمی تاوانەکانی ئیسرائیلە و رزگاربوونیەتی لە سزا، کە تێیدا سەروەریی وڵاتان پێشێل دەکات، ئاگربەست بێ مانا دەکات و هێرش دەکاتە سەر پیرۆزییەکانی فەڵەستینییەکان.
ئابادی زانیاریشی زیاد کردووە کە "پێویستە ئەنجومەنی ئاسایشی نێودەوڵەتی لە قۆناغی دەربڕینی نیگەرانی و داواکارییە گشتییەکان تێپەڕێت، و بڕیاری پابەندکەر و سزایی دژی ئیسرائیل بگرێتەبەر. چونکە یاسای نێودەوڵەتی بە سەرکۆنەکردنی بێبایەک و بێکاریگەر ناپارێزرێت.
ئەو بەرپرسە ئێرانییە لە درێژەی قسەکانیدا وتی: لەم چوارچێوەیەدا، ئیدیعای دۆناڵد ترەمپ، سەرۆکی ئەمریکا کە گوایە بنیامین نەتانیاهۆ، سەرۆک وەزیرانی ئیسرائیلی پەشیمان کردووەتەوە لە وەشاندنی هێرشێکی گەورە بۆ سەر بەیروت، لە جیاتی ئەوەی بەڵگەیەک بێت لەسەر ئاشتیخوازیی واشنتۆن، بەپێچەوانەوە رۆڵی راستەوخۆی ویلایەتە یەکگرتووەکانی ئەمریکا لە بەڕێوەبردنی دەستدرێژییەکانی ئیسرائیلەدا دەسەلمێنێت.
لە کۆتاییدا نووسیویەتی: "ئەگەر بڕیاری هێرشکردنە سەر پایتەختی وڵاتێکی سەربەخۆ بە پەیوەندییەکی تەلەفۆنی بگۆڕدرێت، ئەوا پرسیارە بنەڕەتییەکە ئەوەیە: بۆچی پێشێلکردنی ئاگربەست بۆ ماوەی چەندین مانگ، و دەستدرێژی بۆ سەر لوبنان، ئاوارەکردنی خەڵک و هەڕەشەکردن لە سەروەریی ئەم وڵاتە بە پاڵپشتیی سیاسی و سەربازیی رۆژئاوا بەردەوام بوو؟!.
شایەنی باسە ڕۆژی دووشەممە، لوبنان شایەتی وەرچەرخانێکی دراماتیکی و خێرا بوو، کاتێک رۆژەکە بە پەرەسەندنی سەربازیی توندی ئیسرائیل دەستیپێکرد کە ترس و دڵەڕاوکێیەکی بەربڵاوی لێکەوتەوە، و کۆتایی هات بە راگەیاندنی لەناکاوی رێککەوتنی ئاگربەست و راگرتنی شەڕ لە لایەن دۆناڵد ترەمپ، سەرۆکی ئەمریکا و بەیروتەوە.
بەڕێوەبەرایەتی هاتووچۆی پارێزگای سلێمانی ئاگادارییەکی گرنگ و بەپەلە ئاراستەی سەرجەم شۆفێران دەکات سەبارەت بە جێبەجێکردنی سیستەمێکی نوێی کامێراکانی چاودێری خێرایی و کاراکردنی چەند کامێرایەکی نوێ لە سەرەتای هەفتەی داهاتووەوە.
بەپێی راگەیەندراوی رەسمی هاتووچۆی سلێمانی، گۆڕانکاری و کاراکردنی کامێراکان بەم شێوەیەی خوارەوە دەبێت:
لە رێکەوتی 2026/6/7 (ڕۆژی یەکشەممە) کاتژمێر 10:00ی سەرلەبەیانی، کامێراکانی تۆمارکردنی تیژڕەوی بە سیستەمی (خاڵ بۆ خاڵ – Point to Point) لەسەر رێگای (کەلار – کفری) و بەپێچەوانەوە، بەشێوەیەکی رەمی دەکەونە کار و سەرپێچییەکان تۆمار دەکەن، لە هەمان رۆژ و کاتژمێردا، ئەو کامێرایانەی پێشتر لە رێگاکانی دەرەوەی شار بە سیستەمی (خاڵ بۆ خاڵ) کاریان دەکرد، بەشێکیان دەگۆڕدرێن بۆ سیستەمی (یەک خاڵ – One Point) بەم شێوەیە:
کامێرای یەکەم و کۆتایی ئەم ڕێگایانە (و بە پێچەوانەشەوە):
تاسڵوجە – دوکان
تاسڵوجە – چەمچەماڵ
هوانە – وارماوە
عەربەت – پارێزگای هەڵەبجە و پێنجوێن
کەلار – کفری
کامێراکانی تر کە دەبنە یەک خاڵ:
کامێرای رێگای تاسڵوجە – چەمچەماڵ (ناو تەکیە).
کامێرای ناو قەزای چەمچەماڵ (بەهەردوو ئاڕاستەکە).
کامێرای عەربەت – هەڵەبجەی شەهید (بەردەم گوندی گرێزە).
کامێرای ناو عەربەت (بە هەردوو ئاڕاستەکە).
هاتووچۆی سلێمانی رونیشی کردەوە: لە ئێستادا لەسەر رێگاکانی (تاسڵوجە ـ دووکان) و (تاسڵوجە ـ چەمچەماڵ)، سەرجەم هێماکانی دیاریکردنی خێرایی بۆ ئۆتۆمبێلی گەورە و بچووک جێگیرکراون و کاریان پێدەکرێت.
بەڕێوەبەرایەتییەکە داوا لە سەرجەم شۆفێران دەکات کە پابەندی خێراییە دیاریکراوەکان بن و لە سەرکێشی دووربکەونەوە، تاوەکو هەم لە لێپرسینەوەی یاسایی بەدوور بن و هەمیش خۆیان و سەرنشینەکانیان لە روداو و کارەساتەکانی هاتووچۆ بپارێزن.
ئەمریكا: گروپە چەكدارەكان چەكیش دابنێن نابێت بەشداری لە حكومەتی عیراقدا بكەن
ئەمریكا جارێكی تر هۆشداری دەدات لە بەشداریكردنی گروپە چەكدارەكان لە حكومەتی عیراق و دەڵێت، ئەگەر چەكیش دابنێن نابێت بەشداری حكومەت بكەن.
چەند سەرچاوەیەكی ئاگادار بڵاویانكردووەتەوە، جوشوا هاریس كاربەڕێكەری ئەمریكی لە عیراق، حكومەتی عیراقی لە هەڵوێستی واشنتۆن ئاگادار كردووەتەوە و وتویەتی، گروپە چەكدارەكان ئەگەر چەكیش دابنێن نابێت بەشداری لە حكومەتدا بكەن.
راشیانگەیاندووە، ئیدارەی ئەمریكا چەند مەرجێكی سەرەكی داناوە پێش ئەوەی بیر لە ئەگەری بەشداریكردنی ئەو گروپانە لە كاری حكومی و ئابوریدا بكاتەوە و دەیەوێت بخرێنە ژێر چاودێری وردەوە بۆئەوەی دڵنیا بێت دەیانەوێت بە تەواوی چەك دابنێن و تێكەڵ بە دامەزراوەكانی دەوڵەت ببن یاخود نا.
عەلی زەیدی سەرۆك وەزیرانی عیراقیش لەو كاتەوەی دەسەڵاتی گرتووەتە دەست جەختدەكاتەوە، دەبێت چەك تەنها لە دەستی دەوڵەتدا بێت، بەڵام رۆژی شەممەی رابردوو، حزبوڵای عیراقی كە یەكێكە لە دیارترین گروپە چەكدارەكانی عیراق رایاگەیاند، بەردەوام دەبن لە كارەكانیان و پشتیوانی حكومەتیش دەكەنن بەڵام رەتیدەكەنەوە چەك دابنێن.