هەواڵەکان
بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێکی هاوخەمی بۆ کۆچی دوایی پیر حسێن مەرعان کەسایەتیی دیاری ئێزدییەکان بڵاوکردەوە و تێیدا دەڵێت: پیر حسێن دۆستی دێرینی سەرۆک مام جەلال و یەکێک بوو لە هەڤاڵە دڵسۆزەکانی یەکێتی.
دەقی پەیامەکە:
لە دڵەوە نیگەران و غەمباربووین بە کۆچی دوایی تێکۆشەری دێرین و کەسایەتیی دیاری کۆمەڵایەتیی ئێزدییەکان بەڕێز پیر حسێن مەرعان.
بۆ ئەم خەمە پرسە و سەرەخۆشی ئاڕاستەی بنەماڵە سەربەرزەکەیان دەکەین کە نموونەیەکی باڵان لە خەبات و تێکۆشانی بزووتنەوەی رزگاریخوازیی کوردایەتی.
بەڕێز پیر حسێن مەرعان، دۆستی دێرینی سەرۆک مام جەلال، یەکێک بوو لە هەڤاڵە دڵسۆزەکانی یەکێتی کە لە ئەرک و بەرپرسیارێتییەکانیدا هەمیشە وەفادار بوو.
یاد و ناوی هەڤاڵی کۆچکردوومان هەمیشە بە بەرزی بمێنێتەوە و خوا سەبووری بە هەموولایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
حكومەتی سوریا پلانی ئەوەی هەیە ولاتەكەی بكاتە جێگرەوە گەروی هورمز بۆهەناردەكردنی نەوتی وڵاتانی كەنداو.
رۆژنامەی واشنتۆن پۆست بڵاویكردەوە، حكومەتی سوریا بۆ بەهێزكردنی پەیوەندیە ئابورییەكانی لەگەڵ عیراق، دەیەوێت دەیەوێتە ولاتەكەی بكاتە جێگرەوەی گەروی هورمز بۆ نەوتی عیراق و ولاتانی كەنداو لە خاكی وڵاتەكەیەوە بۆ جیهان بنێرێت.
بەپێی راپۆرتێكی رۆژنامەكە، حكومەتی سوریا هەوڵ دەدات وڵاتەكەی ببێتە رێڕەوێكی وشكانی بۆ ناردنی نەوتی رۆژهەڵاتی ناوەڕاست بەرەو جیهان.
بەپێی راپۆرتەكە، تۆم باراك، نێردەی تایبەتی سەرۆكی ئەمریكا بۆ رۆژهەڵاتی ناوەڕاست بە لێپرسراوانی عیراقی و سوریای راگەیاندووە کە پڕۆژەكانی بواری وزەی نێوانیان بەتایبەت بۆری نەوتی بەسرە - بانیاس دەبێتە جێگرەوەی گەروی هورمز.
باس لەوەشكراوە، ئیدارەی ترەمپ پاڵپشتی پلانەكەی سوریا دەكات و دەیەوێت پرۆژەكە لەرێی كۆمپانیای شێڤرۆنەوە جێبەجێبكرێت و تێچووی دروستكردنی هێڵی بۆرییەكە بە پێنج ملیار و 700 ملیۆن دۆلار خەمڵێنراوە.
جێگری سەرۆکی ئەمریکا کۆنفرانسێکی رۆژنامەوانیی ئەنجامدا و تێیدا باسی لە چڕتربوونەوەی گرژییەکانیان لەگەڵ ئێران و پابەند نەبوونی تاران بە هەندێک لە رێککەوتنەکانەوە، کرد.
جەی دی ڤانس، جێگری سەرۆکی ئەمریکا لە کۆنفرانسێکی رۆژنامەوانیدا لە کۆشکی سپی رایگەیاند، سوپای پاسداران بە پێچەوانەی سوپای ئەمریکاوە، خەڵكی مەدەنی دەکاتە ئامانج.
وتیشی، هەرچەندە ئێرانییەكان رێككەوتنێكیان ئیمزاكردووە بۆ هێرش نەكردنەسەر كەشتییە بازرگانییەكان، بەڵام بەردەوامن لە هێرشەكانیان.
ئاماژەی بەوەشداوە، دوێنێ نزیكەی 15 ملیۆن بەرمیل نەوت بە گەروی هورمزدا تێپەڕیووە، لەبەرئەوە ئەمریکا تاكە دەوڵەتە كە توانای هەیە دابینكردنی وزە لە بازاڕە جیهانییەكاندا مسۆگەر بکات.
وەزارەتی تەندروستیی هەرێمی كوردستان بڕیاریدا بە داخستنی نەخۆشخانی رەسولی نوێ
وەزارەتی تەندروستیی هەرێمی كوردستان بڕیاریدا بە داخستنی نەخۆشخانەی رەسولی نوێ بەهۆی گیانلەدەستدانی كەسێك لە كاتی ئەنجامدانی نەشتەرگەریدا و دۆسێی نەخۆشخانەكەشی رەوانەی دادگا كرد.
وەزارەتی تەندروستیی هەرێمی كوردستان لە فەرمانێكی وزاریدا ئاماژەی بەوەكردووە، دوای گیانلەدەستدانی 'سارا تەحسین' لە نەخۆشخانەی رەسولی نوێی تایبەت بەدواداچوون بۆ ئەو بابەتە كراوە و دەركەوتووە، پزیشكی نەشتەرگەر هیچ رێگەپێدانی كاركردنی نییە لەو نەخۆشخانەیە.
باس لەوەش دەكات، نەشتەرگەری بەبێ بوونی یەكەی فریاكەوتن و هۆڵی چاودێری چڕ ئەنجامدراوە و لە مانگی حوزەیرانی ئەمساڵ فەرمانی داخستنی هۆڵی نەشتەرگەری نەخۆشخانەكە دراوە و پابەندی بڕیاری وەزارەت نەبووە.
وەزارەتی تەندروستی بڕیاریدا بە داخستنی نەخۆشخانەكە و رەوانەكردنی ستافی نەخۆشخانە و پزیشكانی نەشتەرگەری و سڕكردن و یاریدەدەرانیان و كارمەندانی بەشداربوو لە نەشتەرگەرییەكە بۆ دادگا.
سوریا لە هەنگاوێکی گرنگدا دوای زیاتر لە دەیەیەک و بۆ یەکەمجار دوای رووخانی بەشار ئەسەد، دەستکرد بە لەناوبردنی بڕێک لە ماددە کیمیاییەکانی لە ناوخۆی وڵاتەکەدا.
ئەم راگەیاندنە لەلایەن ئیبراهیم عولەبی، نوێنەری هەمیشەیی سوریا لە رێکخراوی نەتەوە یەکگرتووەکان، لە هەنگاوێکدا لە ئۆپراسیۆنی لەناوبردنەکە بە "ساتەوەختێکی مێژویی" ناوبرد و ئاماژەی بەوە کرد کە پڕۆسەکە لە ژێر چاودێری و رێکارەکانی رێکخراوی قەدەغەکردنی چەکی کیمیایی (OPCW) بەڕێوەدەچێت.
عولەبی ئەوەشی روونکردەوە: هاوکاریی نێوان وڵاتەکەی و رێکخراوەکە ئاماژەیەکی روونە بۆ وەرچەرخانێکی سیاسیی قووڵ لە نێوان سوریا و کۆمەڵگەی نێودەوڵەتیدا.
لە تەوەرێکی تردا، نوێنەری سوریا ئاماژەی بەوە کرد: پەلامارەکانی ئیسرائیل ئاستەنگی جدییان بۆ پڕۆسەی گەڕان و لەناوبردنی سەرچاوە نووکییەکانی سوریا دروستکردووە و لە هەندێک قۆناغدا بووەتە هۆی وەستاندنی تەواوەتیی گەشتەکان و خستنەمەترسیی ژیانی تیمە نێودەوڵەتی و ناوخۆییەکان، جەختیشی کردەوە کە ناتوانرێت ئاسایشی ناوچەکە بپارێزرێت لە کاتێکدا ئیسرائیل ئاسایشی سوریا دەخاتە مەترسییەوە.
دۆناڵد ترەمپ، سەرۆکی ویلایەتە یەکگرتووەکانی ئەمریکا جەختی کردەوە کە وڵاتەکەی خاوەنی کۆگایەکی گەورە و بێ سنووری تەقەمەنیی کوالیتی بەرزە، ئاماژەی بەوەش کرد کە بڕی بەردەست زۆر زیاترە لەوەی واشنتۆن بۆ ئۆپراسیۆنە سەربازییەکەی لە ئێران یان هەر جەنگێکی تری ئەگەری پێویستی پێیەتی.
ترەمپ لە ەاگەیەندراوێکدا کە لە رێگەی سۆشیاڵ میدیاوە بڵاویکردەوە ئاماژەی بەوە کرد: ئەمریکا بە رێژەیەکی بێپێشینە تەقەمەنی بەرهەم دەهێنێت و خەریکی کۆگاکردن و ئامادەکارییە بۆ هەر باری نائاساییەک، جەختیشی کردەوە کە واشنتۆن ئەم تەقەمەنییانە بۆ بەکارهێنانی تایبەتمەندی خۆی دەپارێزێت و بەم زووانەش فرۆشتنی بە هاوپەیمانەکانی دەستپێدەکاتەوە.
ناوبراو ئاماژەی بەوەش کرد: ئیدارەی جۆ بایدن سەرۆکی پێشووی ئەمریکا، بڕێک تەقەمەنی دابووە ئۆکراین کە زۆر زیاتر بوو لەوەی ئەمریکا لە ئێران بەکاریهێناوە، بەبێ ئەوەی ئۆکرانیا تێچووەکەی لەئەستۆ بگرێت.
ترەمپ ئەوەشی خستەڕوو: سەدان ملیار دۆلار بە خۆڕایی دراوەتە ئۆکراین و هاوپەیمانی ناتۆ، لە کاتێکدا دەبوو ئەوروپا ئەو تێچووانەی لەئەستۆ بگرتایە، جەختیشی کردەوە کە ئەمریکا داوای گەڕاندنەوەی ئەو پارانە دەکاتەوە.
لە کۆتایی راگەیەندراوەکەیدا، ترەمپ نووسیویەتی: سوپاس بۆ گرنگیدانتان بەم بابەتە.
عەلی زەیدی، سەرۆک وەزیرانی عیراق، بڕیاریدا بە بەشدارپێکردنی کۆمپانیا و چاپخانە ناوخۆییەکان لە پڕۆسەی چاپی پەڕتووکەکانی خوێندن بۆ سەرجەم قۆناغەکان.
بەپێی راگەیەندراوێکی نوسینگەی راگەیاندنی سەرۆک وەزیران، ئەم بڕیارەی زەیدی بە مەبەستی فراوانکردنی ئاستی بەشداریپێکردنە لە پڕۆسەکەدا، تاوەکو ببێتە هۆی بەرزکردنەوەی کوالیتی چاپی پەڕتووکەکان، زامنکردنی خێرایی لە جێبەجێکردن و گەیاندنی پەڕتووکەکان لە کاتی گونجاودا بۆ قوتابیان و خوێندکاران.
ئەم بڕیارە دوای ئەوە دێت کە محەمەد خەفاجی، ئەندامی ئەنجومەنی نوێنەران، دوێنێ چوارشەممە، چەندین پەڕاوی گەندەڵیی رادەستی دەستەی دەستپاکی فیدراڵی کرد، کە لە نێویاندا دۆسیەی چاپی پەڕتووکەکانی خوێندن هەبوو بەهۆی بوونی تێبینی و گومان لەسەر شێوازی سپاردنی کارەکان بۆ هەندێک لایەن.
ئەو پەرلەمانتارە جەختیشی کردبۆوە کە کارەکان سپێردراون بە کۆمپانیاگەلێک کە هیچ ئەزموون و کارێکی هاوشێوەیان لەم بوارەدا نەبووە، ئەمە جگە لە بەلاوەنانی چەندین چاپخانە و کۆمپانیای ناوخۆیی، چ حکومی و چ کەرتی تایبەت.
قوباد تاڵەبانی پرسەنامەیەک ئاڕاستەی لەتیف هەڵمەت دەکات و رایدەگەیەنێت، بە داخ و خەمێکی قوڵەوە هەواڵی کۆچی دوایی هاوسەری بەڕێزتان خاتوو 'سورەیا عەلی'ـم پێگەیشت.
دەقی پەیامەکەی قوباد تاڵەبانی، لێپرسراوی مەکتەبی سکرتارییەتی سەرۆک مام جەلال...
برای گەورە و بەڕێزم مامۆستا لەتیف هەڵمەت شاعیری گەورەیی نەتەوەیی گەلی کورد .
بە داخ و خەمێکی قوڵەوە هەواڵی کۆچی دوایی هاوسەری بەڕێزتان خاتوو ( سورەیا عەلی )ـم پێگەیشت.
بۆ ئەم کۆستە گەورەیە، پرسەو سەرەخۆشی خۆم ئاڕاستەی ئێوەو بنەماڵە تێکۆشەرەکەتان دەکەم کە هەر لە سەرەتاوە وەک دەنگێکی دلێر و کورد پەروەر قەڵەمەکەت باش تیژ کردبوو بۆ پشتیوانی و سەرخستنی خەباتی رەوای گەلەکەمان.
داواکارم لە خوای باڵا دەست رۆحی کۆچکردوو بۆ هەمیشە شاد بێت سەبوری و ئارامی زیاتریش ببەخشێت.
دادگای تاوانەکانی کەرخ سزای 15 ساڵ زیندانیکردنی بەسەر سێ کەسدا سەپاند، دوای ئەوەی بە تۆمەتی ئاڕاستەکردنی موشەکی کاتیۆشا بۆ سەر بنکەی سەربازیی K1 لە پارێزگای کەرکوک تاوانبار کران.
بەپێی بەڵگەنامەیەکی دادوەری، بڕیارەکە بەپێی ماددەی چوار/1 و بە ئاماژەدان بە ماددەی دووەم/1 و 7 لە یاسای بەرەنگاربوونەوەی تیرۆری ژمارە 13ی ساڵی 2005 دەرچووە.
بڕیارەکە دوای ئەوە هات کە سێ تۆمەتبارەکە بە ئەنجامدانی تاوانی ئاڕاستەکردنی موشەکی کاتیۆشا بەرەو بنکە سەربازییەکە و کەوتنەخوارەوەی بەشێکیان لە نزیک بارەگای فەوجی بەرەنگاربوونەوەی تیرۆر و تیمە فەرەنسییەکەی سەر بە هێزەکانی هاوپەیمانان تاوانبار کران.
خاتوو شاناز ئیبراهیم ئەحمەد ئامادەی رێورەسمی بەدەستهێنانی خەڵاتێکی شکۆمەندانەی جیهانی بوو لەلایەن زانکۆی سلێمانییەوە.
لەمیانی رێورەسمێکی شایستەدا لەهۆڵی کۆنگرێس و لەنێو ئاپۆڕای دڵسۆزانی سلێمانی و ئەکادیمیستانەوە بەپۆشینی جلی کوردی و بە چەپڵەڕێزان، بڕوانامەی گینس بۆ ریکۆردە جیهانییەکان بەخشرایە زانکۆی سلێمانی لەپای هەوڵێکی ژینگەیی کەخۆی بینییەوە لە نوسینی ناوی زانکۆکە بەشەش هەزار درەختی مۆرد.
ریکۆردە نوێیەکە ناوی سلێمانی و زانکۆی دایکی لەجیهاندا بەرز کردەوە و بەرەسمیی بووە خاوەنی گەورەترین رستەی بە درەخت چێندراو لەسەر ئاستی جیهان.
ئەم بڕوانامە جیهانییە دەستکەوتێکی گرنگە کەپێگەی زانکۆی سلێمانی لەبواری پاراستنی ژینگە و بەرەنگاربوونەوەی گۆڕانی کەشوهەوادا زیاتر دەناسێنێت هاوتای بەرەوپێشچونەکانی زانکۆکە وەک هەڵگری مەشخەڵی زانست و داهێنان.
هەر لەمیانی رێورەسمەکەدا د.ئارام محەمەد، وەزیری خوێندنی باڵا و توێژینەوەی زانستی بەدەستهێنانی ریکۆردەکەی گینسی بە دەستکەوتێک وەسفکرد کە رۆحی سەرۆک مام جەلال و شەهیدانی کوردستان ئاسوودەتر دەکات.
بەڵگەفیلمی "رووباری سیروان"، كە بەرهەمی بەشی ڤیم میدیایە لە دامەزراوەی ڤیم، خەڵاتی باشترین بەڵگەفیلمی لە وڵاتی ئیتالیا بەدەستهێنا.
لە نۆیەمین خولی فیستیڤاڵی نێودەوڵەتیی فیلمی ریاڵی، بەڵگەفیلمی "رووباری سیروان" لە ئەنجامی هەڵسەنگاندنی مانگانەی لیژنەی داوەراندا توانی خەڵاتی (وینەر ئۆڤ ئۆوگەست) لە بەشی بەڵگەفیلمدا بەدەستبهێنێت.
فیستیڤاڵی ریاڵی بایەخێكی تایبەت بە سینەمای سەربەخۆ دەدات، بەرهەمەكان لەسەر بنەمای راستگۆیی، چیرۆكی مرۆیی، بابەتی كۆمەڵایەتی و ڕەهەندەكانی ژیانی ڕۆژانە هەڵدەسەنگێنیرَت.
بەپێی سیستەمی فیستیڤاڵەكە، لیژنەی داوەران مانگانە فیلمە رەوانەكراوەكان هەڵدەسەنگێنن و فیلمە شایستەكان دەخەنە شۆرتلیستی فیلمە بەشداربەكان.
بڕیارە لە كۆتایی ئەمساڵدا و لە مانگی نوڤەمبەری ٢٠٢٦، فیلمەكە لە ناوەندی رۆشنبیریی سەنتەری رۆشنبیریی ئیل پەرتینی لە شاری میلانی وڵاتی ئیتالیا لەسەر سكرینی سینەما نمایش بكرێت.
وەزیری بەرگریی ئیسرائیل دەڵێت، لە حاڵەتی ئەنجامدانی هەر هێرشێکدا بۆ سەر وڵاتەکەی، ژێرخانی سەربازی و مەدەنیی تەواوی ئێران دەکەنە ئامانج.
یسرائیل کاتز، وەزیری بەرگریی ئیسرائیل رایگەیاند، لە حاڵەتی ئەنجامدانی هەر هێرشێکدا بۆ سەر وڵاتەکەی لەلایەن تارانەوە، ئێران دەگەڕێننەوە بۆ "سەردەمی بەردین و تاریکی".
وەزیری بەرگریی ئیسرائیل ئاماژەی بەوەشکرد،، لە بەرانبەر هەر هێرشێکدا ژێرخانی سەربازی و مەدەنیی ئێران دەکەنە ئامانج.
ئەوەشی خستەڕوو، تاران بە باشی هۆکاری هێرشنەکردنە سەر ئیسرائیل دەزانێت، ئەمەش دوای ئەو زیانە گەورانەی کە لە ئۆپراسیۆنەکانی پێشوودا بەر بەتوانای سەربازی و ئەمنیی ئەو وڵاتە کەوتوون.
خاتوو شاناز ئیبراهیم ئەحمەد پەیامێکی هاوخەمی بۆ کۆچی دوایی سورەیا شێخ عەلی بڵاوکردەوە و رایگەیاند، پرسەو سەرەخۆشی لە شاعیری گەورەی کورد لەتیف هەڵمەت وخانەوادە و ئازیزانی ئەکەم و هاوبەشی خەم و پەژارەیانم.
دەقی پەیامەکەی خاتوو شاناز ئیبراهیم ئەحمەد...
بەبیستنی هەواڵی ماڵئاوایی یەکجارەکی خاتوو (سورەیا شێخ عەلی)، زۆر غەمباربووم.
پرسەو سەرەخۆشی لە شاعیری گەورەی کورد برای بەڕێزم کاک لەتیف هەڵمەت وخانەوادە و ئازیزانی ئەکەم و هاوبەشی خەم و پەژارەیانم.
خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
سوپای ئێران لە چوارچێوەی قۆناغی 31ی ئۆپراسیۆنی هەورەبرووسکە "صاعقة"، هێرشێکی بەرفراوانی مووشەکی و درۆنی بۆ سەر بنکە سەربازییەکانی ئەمریکا لە کوەیت و ئیمارات راگەیاند، لە بەرانبەریشدا بەرگریی ئاسمانیی کوەیت بەرپەرچدانەوەی ئۆپراسیۆنەکەی ئاشکرا کرد.
پەیوەندییە گشتییەکانی سوپای ئێران، ئەمڕۆ پێنجشەممە، لە راگەیەندراوێکدا ئاماژەی بەوە کردووە: بەرەبەیانی ئەمڕۆ هێزەکانیان سیستەمەکانی پەیوەندیی مانگی دەستکرد، کۆگاکانی کەلوپەل و ئامێر و ئاشیانی فڕۆکە جەنگییەکانی سوپای ئەمریکایان لە بنکەی "ئەحمەد جابڕ" لە کوەیت کردووەتە ئامانج.
بەپێی لایەنە ئێرانییەکان، هێرشەکان بوونەتە هۆی کەوتنەوەی زیان و پێکان لە سیستەمەکانی پەیوەندی و ئاشیانی فڕۆکەکاندا.
لە راگەیەندراوەکەدا هاتوە: لە چوارچێوەی هەمان ئۆپراسیۆندا، بنکە و شوێنی جێگیربوونی هێزەکان و سیستەمەکانی راداری سوپای ئەمریکا لە بنکەی "منهاد" لە ئیمارات ئامانجی هێرشی مووشەکی و درۆنی بوون.
سوپای ئێران جەختیشی کردەوە: بنکەی ئەحمەد جابڕ رۆڵێکی جەوهەری لە ئامادەیی و پشتیوانیکردنی سوپای ئەمریکا لە ناوچەکەدا دەگێڕێت، هەروەها دووپاتی کردووەتەوە: وەڵامدانەوەی هەر هێرشێکی ئەمریکا "توند و یەکلاکەرەوە دەبێت و تا تێکشکاندنی دەستدرێژیکار بەردەوام دەبێت.
لە بەرانبەردا، دەستەی ئەرکانی سوپای کوەیت لە راگەیەندراوێکدا بڵاوی کردەوە: سیستەمی بەرگریی ئاسمانیی وڵاتەکەیان بەرپەرچی هێرشی مووشەکی و فڕۆکەی بێفڕۆکەوانی ئەمریکای داوەتەوە کە بەهۆی "دەستدرێژیی ئێران"ەوە ئەنجام دراون، ئەمەش هاوكات بووە لەگەڵ لێدانی زەنگی ئاگادارکردنەوە لە سەرانسەری وڵاتدا.
پێشتریش هێزە وشکانییەکانی سوپای ئێران ئامادەیی و بڵاوبوونەوەی یەکە سەربازییەکانیانی لەسەر سنوورەکان بۆ بەرپەرچدانەوەی هەر هەرەشەیەک پشتڕاست کردبووەوە.
بافڵ جەلال تاڵەبانی بۆ کۆچی دوایی خاتوو سورەییا عەلی، هاوسەری لەتیف هەڵمەت، شاعیر و ئەدیبی دیاری کوردستان، پەیامێکی هاوخەمی بڵاوکردەوە و رایگەیاند، بۆ ئەم خەمە سەرەخۆشی و هاوخەمیی خۆمان ئاراستەی ئێوە و بنەماڵە سەربەرزەکەتان دەکەین.
دەقی پەیامەکەی بافڵ جەلال تاڵەبانی، سەرۆکی یەکێتیی نیشتمانیی کوردستان...
مامۆستا لەتیف هەڵمەت، شاعیر و ئەدیبی دیاری کوردستان
بە دڵگرانی و خەمێکی قووڵەوە، هەواڵی کۆچی دوایی خاتوو سورەییا عەلی، هاوسەری بەڕێزتانمان پێگەیشت.
بۆ ئەم خەمە سەرەخۆشی و هاوخەمیی خۆمان ئاراستەی ئێوە و بنەماڵە سەربەرزەکەتان دەکەین. بەڕێزتان وەک مامۆستایەکی گەورە کە پێنووسەکەتان هەمیشە هاوسۆزی ئازار و هیواکانی نەتەوەکەمان بووە، پێگەیەکی تایبەتتان لای ئێمە و گەلەکەمان هەیە.
لە خوای گەورە داواکارین کۆچکردوو بە بەهەشتی بەرین شاد بکات و سەبووری بە هەموولایەک ببەخشێت.
سەرۆکی روسیا دەڵێت، دەرفەتێک بۆ چارەسەرکردنی ململانێکان لەگەڵ ئۆکراین لە ئارادایە، هاوکات ئامادەیی مۆسکۆی بۆ مامەڵەکردن لەگەڵ هەر لایەنێک نیشاندا کە بەشداربێت لە بەدیهێنانی ئاشتیدا.
ڤلادیمێر پوتن سەرۆکی روسیا، لە میانی بەشداریکردنی لە کۆڕبەندی ئابوری لە رۆژهەڵاتی ئەقسای روسیا رایگەیاند، ژمارەیەک وڵات لە نێویاندا ئەمریکا و چین ئامادەن پشتیوانی لە چارەسەری ئاشتییانەی جەنگی ئۆکراین بکەن، بەڵام لە کۆتاییدا دەبێت هەردوو دەوڵەتی بەشدار لە ململانێکە بگەنە رێککەوتن بۆ کۆتایی هێنان بە کێشەکانی نێوانیان.
سەرۆکی روسیا، ئاماژەی بەوەشکرد، پەیوەندییەکان لەگەڵ ئۆکراین بەردەوامییان هەیە و پرۆسەکە لە رێگەی دەزگا تایبەت و هەواڵگرییەکانی هەردوو وڵاتەوە بەڕێوەدەچێت.
ئەم لێدوانانەی پوتن لە کاتێکدایە کە دۆناڵد ترەمپ، سەرۆکی ئەمریکا ئامادەیی بۆ ئەنجامدانی لوتکەیەکی نوێ لەگەڵ هاوتا روسییەکەی دەربڕیووە، بەڵام کۆبوونەوەکەی بەستووەتەوە بە بوونی ئامادەیی راستەقینە بۆ ئیمزاکردنی رێککەوتنێکی ئاشتی کە کۆتایی بە جەنگی ئۆکراین بهێنێت.