هەواڵەکان
وەزیری دەرەوەی ئەمریکا دەڵێت: رەنگە دوای مادۆرۆ سەرۆکی کوبا ئامانجی داهاتووی وڵاتەکەی بێت، ئەمەش لە کاتێکدایە دۆناڵد ترەمپ هۆشدارییەکی توندی داوەتە گوستافۆ پیترۆی سەرۆکی کۆڵۆمبیا.
ماركۆ رۆبیۆ وەزیری دەرەوەی ئەمریكا رایگەیاند، رەنگە لەدوای ئەو ئۆپەراسیۆنە سەربازییەی لە ڤەنزوێلا ئەنجامدرا، ئامانجی داهاتووی ئیدارەی ئەمریكا كوبا بێت.
وتیشی، ئەگەر من لە هاڤانای پایتەختی کوبا بژیامایە و لێپرسراوی حکومەت بومایە، ئێستا بۆ رەوشی ڤەنزوێلا نیگەران دەبووم.
هاوکات پێشتر دۆناڵد ترەمپ سەرۆکی ئەمریکا، هۆشدارییەکی توندی دایە گوستافۆ پیترۆ سەرۆکی کۆڵۆمبیا، دوای دەستگیرکردنی نیکۆلاس مادۆرۆی سەرۆکی ڤەنزوێلا و رایگەیاند، پیترۆ کۆکاین دروست دەکات و بۆ ئەمریکای دەنێرێت، بۆیە دەبێت ئاگاداربێت.
وەزیری دەرەوەی ئێران دەستگیركردنی سەرۆكی ڤەنزوێلا لەلایەن ئەمریكاوە بە تیرۆر ناو دەبات، وەزیری جەنگی ئەمریكاش دەڵێت ، ڤەنزوێلا و ئێرانیش دەرفەتیان پێدرا بەڵام نەیانقۆستەوە.
عەباس عراقچی، وەزیری دەرەوەی ئێران رایگەیاندووە ، هێرشی سەربازی ئەمریكا بۆ سەر ڤەنزوێلا و رفاندنی سەرۆكەكەی تیرۆرە و پێشێلكردنی سەروەری نیشتمانی ئەو وڵاتەیە ، دوپاتیشیكردوەتەوە كە تاران بە تەواوی پشتگیری گەلی ڤەنزوێلا و حكومەتە هەڵبژێردراوەكەی دەكات.
هاوكات پیت هیگسەس وەزیری جەنگی ئەمریكا رایگەیاندوە ، سەرۆكی ڤەنزوێلا دەرفەتێكی پێدرا، بەڵام هاوشێوەی ئێران ئەویش دەرفەتەكەی نەقۆستەوە، راشیگەیاندووە ، ئۆپراسیۆنی دەستگیركردنی مادۆرۆ ئۆپراسیۆنێكی مێژوویی بووە و سوپای ئەمریكا سەلماندی كە بەهێزترینە لە جیهاندا .
دادگای باڵای دەستوری ڤەنزوێلا فەرمانی بە دێلسی رۆدریگێز، جێگری سەرۆکی ئەو وڵاتە کرد پۆستی سەرۆکی ئەو وڵاتە بە وەکالەت وەربگرێت.
لە دوای دەستگیرکردنی نیکۆڵاس مادۆرۆ سەرۆکی ڤەنزوێلا، دادگای باڵای دەستوری ئەو وڵاتە بڕیاریدا دێسلی رۆدریگێز جێگری مادۆرۆ پۆستی سەرۆکایەتی ئەو ڤەنزوێلا وەربگرێت.
لە بڕیارەکەی دادگای ئەو وڵاتەدا هاتووە، رۆدریگێز وەک سەرۆکی بە وەکالەت، هەموو ئەو ئەرک و دەسەڵاتانەی کە بە سەرۆکی ڤەنزوێلا دراوە لە ئەستۆ دەگرێت، بە مەبەستی دڵنیابوون لە بەردەوامیی ئیدارە و بەرگریی نیشتمان.
ئەوەشخراوەتەڕوو، دەبێت لە ماوەی 30 رۆژدا هەڵبژاردنی پێشوەختە بكرێت بۆ هەڵبژاردنی سەرۆكێكی نوێ بۆ وڵاتەكەیان.
لەدوای وەرگرتنی پۆستی سەرۆکی ڤەنزوێلا رایگەیاند، رۆدریگێز داوای کرد دەستبەجێ مادۆرۆ و هاوسەرەکەی سیلیا فلۆریس ئازاد بکرێن و رایگەیاند، نابنە دارودەستەی هیچ وڵاتێک و مادۆرۆ تاکە سەرۆکی وڵاتەکەیانە.
بەریتانیا و فەرەنسا هێرشێكیان هاوبەشیان بۆسەر ژێرخانی سەربازی داعش لە سوریا ئەنجامدا.
وەزارەتی بەرگری بەریتانیا لە راگەیەنراوێكدا بڵاویكردەوە، درەنگانی شەوی رابردوو هێزەكانی شاهانەی بەریتانیا و بە هاوكاری فڕۆكەكانی فەرەنسا لە ئۆپەراسیۆنێكی هاوبەشدا كۆگایەكی چەك و تەقەمەنی داعشیان لە ژێر زەوی لە باكوری ناوچەی شوێنەواریی تەدمور لە سوریا بۆردومان كردووە كە بە ژێرخانی سەرەكی تیرۆریستانی داعش لەو وڵاتەدا هەژمار دەكرا.
ئاماژە بەوەشكراوە، فڕۆكەكان بۆمبی جۆری" پاڤی وەی ئای ڤیان 4" یان بەكارهێناوە بۆ بە ئامانجگرتنی چەند تونێلێك كە بەرەو ئەو كۆگایە رۆیشتوون.
راشیگەیاندووە، وەزارەتەكەیان لەئێستادا لێكۆڵینەوە لە ئەنجامی هێرشەكە دەستپێكردوە، بەڵام هەڵسەنگاندنە سەرەتاییەكان ئەوە دەردەخەن كە ئۆپراسیۆنەكە زۆر بە وردی ئەنجامدراوە و ئامانجەكەی پێكاوە.
ئەمە لە كاتێكدا، لە كۆتایی ساڵی رابردوودا ئەحمەد شەرع سەرۆكی سوریا لە سەردانەكەیدا بۆ واشنتۆن بە رەسمی پەیوەندی بە هاوپەیمانی نێودەوڵەتی دژی داعشەوە كرد.
هاوكات خەمڵاندنەكانی ئەمریكا ئاماژەیان بەوە كردووە كە لە دوو هەزار و 500 بۆ حەوت هەزار چەكداری داعش لە سوریا و عێراق مابن.
وەزارەتی کشتوکاڵ رایگەیاند، بەهۆی بەفر و بارانبارینی رۆژانی رابردوو ئاستی ئاوی بەنداوەکان بە رێژەیەکی بەرچاو زیادیان کردوە و لە تەواوی ناوچەکانی هەرێم دوو تا سێ هێندەی ساڵی پار بارانیش باریوە، لە بارەی ئاستی بەنداوەکانیشەوە دەڵێن؛ بەنداوی دەربەندیخانش پێنج مەتر و دوکان چوار مەتر ئاستی ئاوەکەیان زیادی کردوە.
لە راگەیەندراوێكدا، وەزارەتی کشتوکاڵ و سەرچاوەکانی ئاوی هەرێم بڵاویکردوەتەوە، بەهۆی کاریگەری شەپۆلی باران و لافاو و بەفرەی، کە لە سەرەتایی کانوونی یەکەمەوە دەستی پێکرد، لە ماوەی کەمتر لە مانگێکدا بارانبارین لە زۆربەی دەڤەرەکان دوو تا سێ بەرامبەر زیاتری ساڵی پار باریووە و بارینی بەفریش لە چەن ناوچەیەکی فراوان بوەتە هۆی زیادکردنی ئاو لە بەنداوەکاندا.
ئاماژەبەوەکراوە، لەو ماوەیەدا لە هەردوو بەنداوی دوکان و دەربەندیخان، زیاتر لە نیو ملیار مەتر سێجا ئاو کۆگاکراوە و بەهۆیەوە لە بەنداوی دەربەندیخان پێنج مەتر و لە بەنداوی دوکان چوار مەتر ئاستی ئاوەکەیان زیادی کردوە.
هەروەها بەنداوی دهۆک 41 سانتیمەتر و بەنداوی گۆمەسەپانیش یەک مەتر ئاستی ئاوەکەی بەرزبوەتەوە، هەرچی بەنداوە بچوک و مامناوەندەکانیشە لە سنوری گەرمیان و سلێمانی و هەولێر و دهۆک پڕبوون و شەپۆلی سەلامەتی لافاوەکەیان تێپەراندوە.
وەزارەتی کشتوکاڵ ئەوەشی خستوەتەڕوو، دوای توانەوەی بەشێکی دیکە لە بەفری چیاکان و ناوچە نزمەکان، لە رۆژانی داهاتوودا رێژەی ئاوی بەنداوەکان زیاتر دەبێت و ئاستی ئاوی بەنداوەکان بەرزتر دەبنەوە.
سەندیکای رۆژنامەنوسانی سلێمانی، رایدەگەیەنێت رێكخراوێك بەناوی (كۆمەڵەی بەرگری لەرۆژنامەنووسى) کە نوێنەریان لە هەرێمی کوردستاندا نییە، لەراپۆرتێكدا ناوی سلێمانی هێناوە گوایە زۆرترین پێشێلكاریی تێدا تۆماركراوە و سەرچاوەی ئامارەکانیشیان دیار نییە سکاڵایان لەسەر تۆمار دەکەن.
سەندیکای رۆژنامەنوسانی سلێمانی، راگەیەندراوێکی بڵاوکردوەتەوە و تێیدا هاتووە؛ رێكخراوێك درۆ بەناوی سلێمانیەوە دەكات و ناوی (كۆمەڵەی بەرگری لەرۆژنامەنووسى) كەزاراوەی پێشێلكاریی نەناساندوە، لەراپۆرتێكدا ناوی سلێمانی هێناوە گوایە زۆرترین پێشێلكاریی تێدا تۆماركراوە، لەكاتێكدا زاراوەی پێشێلكاریی لای ئەم رێكخراوە رون و ئاشكرا نییە.
ئاماژەبەوەشکراوە، ئەو رێکخراوە، کە نوێنەریان لە هەرێم نییە و دیار نییە لە کوێوە ئامارەکەیان وەرگرتوە، رەنگە کۆپی پەیستیان کردبێت، ئەوان لە لقی سەندیکای رۆژنامەنووسانی كوردستان نیگەران کردوە بە شێواندنی راستیەكان و وێناكردنی نێگەتیڤانەی ژینگەی میدیایی لە كوردستاندا بەوەرگرتنی زانیاریی لەزاری كەسان و سەرچاوەی نەناسراوەوە.
لقی سلێمانی سەندیکای رۆژنامەنوسان، دەشڵێت؛ بۆ ئەوەی نەکەونە ئەو هەڵە زەقەوە و گومانیان لەسەر دروست نەبێت، دەتوانرا ئامارەكانی لیژنەی داكۆكی لە مافی رۆژنامەنووسان وەربگیرایە یان پرسیارێكیان لەلقی سلێمانی سەندیكاكە بكردایە.
ئەوەشیانخستوەتەڕوو، ئێستا لەبەردەم بژاردەی تۆماركردنی سكاڵای رەسمین لەدادگای تایبەت بە رۆژنامەنووسان لە شاری سلێمانی و بەغداد لەسەر رێكخراوەكە و بەرێوەبەرانیان، كە وەڵامی پەیوەندیی تەلەفۆنەكانیان نادەنەوە، تا بزانن ئەم هەڵەیە چییە کردویانە.
تەندروستی سلێمانی رایدەگەیەنێت، لە ساڵی 2025 دا زیاتر لە 202 هەزار منداڵ تەنها لە نەخۆشخانەی د.جەمال ئەحمەد رەشیدی تایبەت بە منداڵان چارەسەریان بۆ کراوە و نزیکەی 30 هەزار منداڵیش بە مەبەستی وەرگرتنی چارەسەر خەوێندراون.
ئەمڕۆ شەممە، بەڕێوەبەرایەتی گشتی تەندروستی سلێمانی ئاماری نەخۆشخانەی د.جەمال ئەحمەد رەشیدی بڵاوکردوەتەوە و بە گوێرەی ئامارەکان، لە ساڵی 2025دا 202هەزار و609 منداڵ لە بەشی راوێژكاری نەخۆشخانەی د.جەمال ئەحمەد رەشیدی منداڵانی فێركاری بینراون و 27 هەزار و 385 منداڵیان بە مەبەستی وەرگرتنی چارەسەر خەوێندراون لە نەخۆشخانەکە.
لە راگەیەندراوەکەدا ئەوەشهاتووە؛ لە ماوەی ساڵی رابردودا لە نەخۆشخانەی منداڵان 10 هەزار و پێنج سەد حاڵەتی سكچوون و رشانەوە و وشكبوونەوە تۆمارکراون لەگەڵ پێنج هەزار و 795 حاڵەتی هەناسە توندبوون.
تەندروستی سلێمانی دەشڵێت؛ چوار هەزار و 262 منداڵ لە بەشی مێشك و دەمار و دوو هەزار و 201 منداڵیش لە بەشی چارەسەری خۆراك وەرگیراون و چارەسەریان بۆ کراوە. و هەزار و 719 منداڵیش لە بەشی بەدخۆراکی و هەزار و 271 مندای تریش لە بەسێ هەرس و جگەر بینراون.
لە کۆتایشدا تەندروستی سلێمانی دەڵێت، دوو هەزار و 148 منداڵی تر لە بەشی نەبەكام داخڵ كراون و شەش هەزار و 137 تیشک و پێنج هەزار و 63 سۆنار و هەزار و 296 ئیکۆ و 214 هەزار و 834 پشکنینی تاقیگەیی جۆراوجۆر ئەنجام دراوە.
بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەى جەژنى سێ شەوەى قەوەڵتاس، لە پەیامێکدا پیرۆزبایی لە خوشک و برایانى کاکەیی دەکات.
دەقی پەیامەکە
بەبۆنەى جەژنى سێ شەوەى قەوەڵتاس پیرۆزبایی گەرم لە خوشک و برایانى کاکەیی دەکەم و بەهیوام ئەم جەژنەیان بەخۆشی و شادى بەڕێبکەن.
خوشک و برایانى کاکەیی بەشێکى سەرەکین لە کۆمەڵانى خەڵکى کوردستان، رۆڵى بەرچاویان لە خەبات و تێکۆشانى نەتەوەکەماندا هەیە.
یەکێتیی نیشتمانیی کوردستان بە ئەرکى خۆى دەزانێت کە بەردەوام پارێزەرى مافەکانتان بێت لە هەرێمى کوردستان و عێراق.
بافڵ جەلال تاڵەبانی
سەرۆکی یەکێتیی نیشتمانیی کوردستان
سەرۆکی ئەمریکا رایدەگەیەنێت، هێزەكانی ئەمریكا مادۆرۆیان لە ناو حەشارگەیەكدا دەستگیركرد و لەڕێگەی پەخشی راستەوخۆوە چاودێری پرۆسەی دەستگیركردنەکەی كردووە.
دۆناڵد ترەمپ، سەرۆکی ئەمریکا لە لێدوانێکدا سەبارەت بە دەستگیکردنی نیکۆلاس مادۆرۆ رایگەیاند، داهاتوویەكی خراپ چاوەڕێی لایەنگرانی مادۆرۆ دەكات ئەگەر لەسەر دڵسۆزییان بۆی بەردەوام بن.
ئاماژەی بەوەشكرد، لە ئێستادا بڕیار لەسەر هەنگاوی داهاتوویان سەبارەت بە سەركردایەتیی ڤەنزوێلا دەدەن و بە شێوەیەكی بەهێز دەستێوەردان لە كەرتی نەوتی ئەو وڵاتەدا دەكەن.
ئاشکراشیکرد، "نیکۆلاس مادۆرۆ دانوستانی دەویست، بەڵام من رازی نەبووم و چوار رۆژ پێش ئێستا پلانی دەستگیركردنیمان دانابوو، بەڵام كەشوهەوا رێگری لێكردین، هەروەها لەڕێگەی پەخشی راستەوخۆوە چاودێری پرۆسەی دەستگیركردنەکەم كردووە و هیچ كەسێكیش نەكوژراوە".
دۆناڵد ترەمپ راشیگەیاند، مادۆرۆ بەرپرسە لە گیانلەدەستدانی ساڵانە 300 هەزار ئەمریكی بەهۆی مادە هۆشبەرەكانەوە، لە ئێستاشدا لەناو كەشتی "ئایۆ جیما" دەستبەسەر كراوە و لەگەڵ هاوسەرەكەیدا دەگوازرێنەوە بۆ نیویۆرك.
وتیشی، دەستگیركردنی مادۆرۆ پەیامێكە كە ئەوان بۆ هیچ تۆقاندن و هەڕەشەیەك سەر دانانەوێنن.
لە گەڕەکی هوانەی سلێمانی، ئاگر لە ماڵێک کەوتەوە و بەهۆیەوە ژنێک گیانی لەدەستدا.
سەرچاوەیەک لە سەنتەری رێکخستنی پەیوەندییەکانی سلێمانی بە کوردسات نیوزی راگەیاند، کەمێک پێش ئێستا لە گەڕەکی هوانەی شاری سلێمانی، ئاگر لە ماڵێک کەوتەوە و بەهۆیەوە ژنێک گیانی لەدەستدا.
ئەو سەرچاوەیە وتیشی، تائێستا هۆکاری ئاگرەکە نەزانراوە، تیمەکانی ئاگرکوژێنەوەش گەیشتووەنەتە شوێنی روداوەکە و لە هەوڵی کۆنتڕۆڵکردنی ئاگرەکەدان.
هەسەدە رایگەیاندوە، لە ئۆپراسیۆنێکی هاوبەشدا،بە هەماهەنگی لەگەڵ هاوپەیمانی نێودەوڵەتی، ئۆپەراسیۆنێکی وردی ئەمنییان لە شاری رەقە ئەنجامدا و لە ئەنجامدا چوار تیرۆریستی داعشیان دەستگیرکردوە و شانەیەکی نوستیو داعسیان هەڵوەشاندوەتەوە.
ئەمڕۆ شەممە، هەسەدە راگەیەندراوێکی بڵاوکردوەتەوە و تێیدا هاتوە؛ لەسەر بنەمای هەواڵگری متمانەپێکراو هێزەکانیان هەڵیانکوتاوەتە سەر یەکک لە شانە نوستوەکانی داعش لە رەقە و لە میانەی ئۆپەراسیۆنەکەدا دەست بەسەر چەک و کەرەستەی پەیوەندیکردندا گیراوە، کە بۆ پاڵپشتیکردنی چالاکییە تیرۆریستییەکان بەکارهێنراون.
ئاماژەیان بەوەشکردوە، لە ئۆپراسیۆنەکەدا چوار تیرۆرستی داعسیان دەستگیر کردوە، دەستگیرکراوەکان دانیان بەوەدا ناوە کە زانیاری هەواڵگرییان لەسەر پێگە و شوێنی هێزە سەربازییەکانی هەسەدە کۆکردوەتەوە و پلانی هێرشەکانیان داڕشتووە و پەیوەندییان لەگەڵ سەرکردەکانی داعشدا هەبووە.
هەسەدە لە کۆتایی راگەیەندراوەکەدا هاتووە؛ ئەم ئۆپراسیۆنە بەشێکە لە هەڵمەتە بەردەوامەکانیان بە هەماهەنگی لەگەڵ هاوپەیمانی نێودەوڵەتی بۆ لەناوبردنی تواناکانی داعش و رێگریکردن لە پێکهێنانەوەی شانەکانیان و پاراستنی سەقامگیر ناوچەکە.
کەشناسی هەرێم: ئهمڕۆ شهممه ئاسمان ساماڵ و پەڵە هەور دەبێت، هەندێك جار لە ناوچە شاخاویەکان بۆ نیمجە هەور دەگۆڕێت و سبیهنێش لە هەندێک ناوچە ئەگەری دروستبوونی تەم هەیە بە شێوەیەکی کاتی.
بهڕێوهبهرایهتی كهشناسی و بومهلهرزهزانی ههرێم بڵاویكردهوه، ئهمڕۆ شهممه ئاسمان ساماڵ و پەڵە هەور دەبێت، هەندێك جار لە ناوچە شاخاویەکان بۆ نیمجە هەور دەگۆڕێت، خێرایی با لەسەرخۆ دەبێت و له نێوان پێنج بۆ 15 كیلۆمهتردا دهبێت و ئاڕاستەی با باکوری خۆرئاوا دەبێت.
ئاماژهی بهوهشكردوه، پلەکانی گەرما بەرزترین پلە کەمێک بەرز دەبێتەوە، بەڵام نزمترین پلە نزم دەبێت بە (2 – 4 ) پلە بەراورد بە تۆمارکراوەکانی دوێنێ.
بهگوێرهی كهشناسی، سبهی یهكشهممه ئاسمان ساماڵ و پەڵە هەور دەبێت، هەندێك جار لە ناوچە شاخاویەکان بۆ نیمچە هەور دەگۆڕێت، لە کاتەکانی بەیانی زوودا لە هەندێک ناوچە ئەگەری دروستبوونی تەم هەیە بە شیوەیەکی کاتی.
ئهوهشی خستووەتهڕوو، خێرایی با لەسەرخۆ دەبێت و له نێوان 5 بۆ 15 كیلۆمهتردا دهبێت، ئاڕاستەی با باکوری خۆرئاوا دەبێت.
پهیوهست به پلهكانی گهرما، كهشناسی دهڵێت، پلەکانی گەرما بەرزترین پلە نزیک دەبێتەوە، بەڵام نزمترین پلە بەرز دەبێت بە (1 – 3) پلە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بەم شێوەیە دەبن:
هەولێر: 10 پلەی سیلیزی
سلێمانی: 7 پلەی سیلیزی
دهۆک: 8 پلەی سیلیزی
زاخۆ: 8 پلەی سیلیزی
کەرکوک: 11 پلەی سیلیزی
هەڵەبجە: 11 پلەی سیلیزی
گەرمیان: 17 پلەی سیلیزی
جێگری سەرۆکی ڤەنزوێلا رایگەیاند، حکومەت ئاگاداری شوێنی نیکۆلاس مادۆرۆ و هاوسەرەکەی نییە و داوای بەڵگە دەکەن لەسەر ئەوەی کە لە ژیاندا ماون، لە بەرامبەردا ئەندامانی کۆنگرێسی ئەمریکا گومان لە شەرعییەتی هێرشەکە دەکەن.
دێڵسی رۆدریگێز، جێگری سەرۆکی ڤەنزوێلا لە لێدوانێکدا بۆ تەلەڤزیۆنی رەسمیی وڵاتەکەی رایگەیاند: "هیچ زانیارییەکمان لەسەر شوێنی مانەوەی مادۆرۆ نییە و داوا لە ئەمریکا دەکەین بیسەلمێنێت کە مادۆرۆ و هاوسەرەکەی لە ژیاندا ماون". راشیگەیاند، ئەوەی رویداوە پەرەسەندنێکی مەترسیدار و پێشێلکارییە بۆ سەر سەروەریی نیشتمانی.
ئەم لێدوانە دوای ئەوە دێت، دۆناڵد ترەمپ، سەرۆکی ئەمریکا رایگەیاند، لە ئۆپەراسیۆنێکی "بەرفراواندا" لە ڤەنزوێلا، توانیویانە مادۆرۆ و هاوسەرەکەی دەستگیربکەن و بە فڕۆکە بۆ دەرەوەی وڵات بیانگوازنەوە، بڕیاریشە وردەکاریی زیاتر لەوبارەیەوە ئاشکرا بکات.
لە واشنتۆن، راگەیاندنی هێرشەکە مشتومڕی لەناو کۆنگرێس دروستکردووە؛ رۆبن گالیگۆ، سیناتۆری دیموکراتەکان رایگەیاند، هێرشەکانی ئەمریکا بۆ سەر ڤەنزوێلا "نایاسایین" و وەسفی دۆخەکەی بەوە کرد کە "ئەمە دووەم جەنگی بێ پاساوە لە ژیانمدا دەیبینم دوای داگیرکردنی عیراق".
لای خۆیەوە مایک لی، سیناتۆری کۆمارییەکان گومانی دەستوریی لەسەر ئۆپەراسیۆنەکە دروستکردووە و پرسیاری ئەوەی کردووە "ئایا هیچ پاساوێک هەیە بۆ بەکارهێنانی هێز بەبێ راگەیاندنی جەنگ یان هەبوونی مۆڵەتی بەکارهێنانی هێزی سەربازی؟".
سەرۆکی ڤەنزوێلا و هاوسەرەکەی دەستگیرکران و ترەمپیش دەڵێت، "هێرشێکی بەرفراوانمان کردە سەر ڤەنزوێلا".
دۆناڵد ترەمپی سەرۆکی ئەمریکا رایگەیاند: ویلایەتە یەکگرتووەکانی ئەمریکا بە سەرکەوتوویی هێرشێکی بەرفراوانی کردە سەر ڤەنزوێلا و سەرۆکەکەی، نیکۆلاس مادورۆ و هاوسەرەکەی دەستگیرکرد.
ترەمپ ئاماژەی بەوەداوە، بەمزوانە لە کۆنگرەیەکی رۆژنامەوانیدا وردەکارییەکەی رادەگەیەنین و ئەم ئۆپەراسیۆنە بە هەماهەنگی لەگەڵ هێزەکانی جێبەجێکردنی یاسای ئەمریکا ئەنجامدراوە.
وەزارەتی دەرەوەی ئێران لە راگەیەندراوێکدا بە توندی ئیدانەی هێرشە سەربازییەکەی ئەمریکا بۆ سەر ڤەنزوێلا دەکات و بە "پێشێلکارییەکی زەق"ی سەروەریی نیشتمانی و خاکی ئەو وڵاتەی لەقەڵەم دەدات.
لە راگەیەندراوەکەدا هاتووە، هێرشی سەربازیی ئەمریکا بۆ سەر ڤەنزوێلا پێشێلکردنی ئاشکرای بنەما سەرەکییەکانی پەیماننامەی نەتەوە یەکگرتووەکان و یاسا نێودەوڵەتییەکانە، بەتایبەت بڕگەی چوار لە مادەی دوی پەیماننامەکە کە بەکارهێنانی هێز قەدەغە دەکات و ئەم کارە بە "دەستدرێژییەکی تەواو" دادەنرێت.
وەزارەتی دەرەوەی ئێران ئاماژەی بەوە کردووە، دەستدرێژیی سەربازی بۆ سەر دەوڵەتێکی سەربەخۆی ئەندام لە نەتەوە یەکگرتووەکان، هەڕەشەیە بۆ سەر ئاشتی و ئاسایشی ناوچەکە و جیهان، دەرەنجامەکانیشی کاریگەریی نەرێنی لەسەر سیستمی نێودەوڵەتی دەبێت.
لە کۆتایی راگەیەندراوەکەدا، ئێران وێڕای جەختکردنەوە لە مافی رەوای ڤەنزوێلا بۆ بەرگری لە سەروەریی و خاکەکەی، داوا لە کۆمەڵگەی نێودەوڵەتی و ئەنجومەنی ئاسایش دەکات بەرپرسیارێتی خۆیان جێبەجێ بکەن بۆ راگرتنی دەستبەجێی ئەو هێرشە "نایاساییە" و لێپرسینەوە لە بکەرانی.