هەواڵەکان
پارتی یەكسانی و دیموكراسیی گەلان 'دەم پارتی' پێنجەمین كۆنگرەی ئاسایی خۆی لە ئەنكەرە ئەنجام دا.
لە كۆنگرەكەدا تولای حاتەم ئۆغوڵڵاری و تونجەر باكرهان، بە هاوسەرۆكانی گشتیی پارتەكە هەڵبژێردرانەوە و ئاماژەیان بەوە كرد، پرسی كورد چووەتە قۆناغێكی نوێوە و چیتر بە ئامراز و میكانیزمەكانی رابردوو سیاسەت ناكرێت.
ئۆغوڵڵاری جەختی لەسەر ئاشتیی ناوخۆیی، هاووڵاتیبوونی یەكسان و خۆئامادەكردن بۆ گۆڕانكارییەكی گەورە كردەوە.
هاوكات باكرهان، وێڕای خستنەڕووی هەندێك كەموكوڕیی ڕابردووی پارتەكەیان، رایگەیاند كۆماری سەد ساڵەی توركیا قەیرانی بەرهەمهێناوە و سەركەوتنی كوردیش بۆ توركەكان مەترسی نییە.
لە كۆتاییدا هاوسەرۆكانی دەم پارتی راگەیاندنی بزووتنەوەی كۆماری دیموكراتیكیان راگەیاند و ئامادەیی خۆیان بۆ بەڕێوەبردنی وڵات لەسەر بنەمای ئازادی و یەكسانی دەربڕی.
رۆژنامەی ساندی تایمزی بریتانی لە راپۆرتێکدا ئاشکرای کردووە، دوو ڤێلای تایبەتی گرانبەها، لە ناوەڕاستی لەندەن و لە بەرانبەر باڵیۆزخانەی ئیسرائیل، کە خاوەنداریەتیەکەی بۆ موجتەبا خامنەیی دەگەڕێتەوە خراونەتە مەزادەوە بۆ فرۆشتن.
رۆژنامەکە ئاماژەی بەوەکردوە، ئەو دوو ڤێلایە بە بەهای نزیکەی 36 ملیۆن پاوەند دانراون بۆ فرۆشتن و خاوەنداریەتییەکەی بۆ موجتەبا خامانەی دەگەڕێتەوە و دەکەوێتە نزیک باڵیۆزخانەی ئیسرائیل لە لەندەن.
ئەم دوو موڵکە، کە دەکەونە نزیک کۆشکی کەنزینگتۆن، لە ساڵانی 2014 و 2016 لەلایەن بازرگانێکی ئێرانی بەناوی عەلی ئەنساری و بە بڕی 35.7 ملیۆن پاوەند کڕدراون.
عەلی ئەنساری، کە خاوەنی پێشوی "بانکی ئاینزە"ە و لە دوبەی نیشتەجێیە، ناوی سەرەکیی ناو ئەم دۆسیەیەیە.
بەپێی راگەیەندراوی وەزارەتی خەزێنەی ئەمریکا لە تەمموزی 2026 و حکومەتی بریتانیا لە تشرینی دووەمی 2025، ناوبراو خراوەتە لیستی سزاکانەوە بە تۆمەتی دابینکردنی دارایی بۆ موجتەبا خامنەیی و لێپرسراوانی باڵای ئێران و سوپای پاسداران، لە رێگەی تۆڕێکی کۆمپانیای دەرەکی لە وڵاتانی جیاواز.
بەپێی راپۆرتەکەی ساندی تایمز، دوای ئەوەی ئەنساری ناوی چوەتە لیستی سزاکانەوە، توشی کێشە بوو لە دانەوەی قەرزەکانی پەیوەست بەو موڵکانە و قەرزدەرە تایبەتەکان بەڕێوەبەری فرۆشتنیان بۆ دیاریکردوە و پرۆسەی فرۆشتنیان بە مۆڵەتی حکومەتی بریتانیا بەڕێوەدەچێت.
رۆژنامەکە ئەوەشی خستوەتەڕوو، تەواوی داهاتی دەستکەوتوو لە فرۆشتنیان تا کاتێک ئەنساری لە ژێر سزادا بێت بە بلۆککراوی دەمێنێتەوە.
نزار ناصر حوسێن، پارێزگاری بانکی ناوەندیی عیراق رایگەیاند، گۆڕینی دراوی نیشتمانی لە دەسەڵاتی راستەوخۆی بانکی ناوەندیدایە، بەڵام پرۆسەی سڕینەوەی سفرەکان لە دراودا پێویستی بە دەرکردنی یاسایەکە لە ئەنجومەنی نوێنەرانەوە.
لە دیدارێکدا لەگەڵ ژمارەیەک شارەزای بواری ئابووری، پارێزگاری بانکی ناوەندی روونی کردەوە کە چاکسازییەکانی کەرتی بانکی بە هەماهەنگی لەگەڵ کۆمپانیای "ئۆلیڤەر وایمان" بەردەوامن و وتی: لەمه‌و بەدواوە هیچ سزایەک لەلایەن لایەنە نێودەوڵەتییەکانەوە بەسەر کەرتی بانکیدا ناسەپێنرێت، چونکە بڕوای نێودەوڵەتی بە بەنکی ناوەندی زۆر بەرزە.
حوسێن ئاماژەی بەوەش کرد: ئەو حەوت بانکەی کە رێگەیان پێدراوە بە دراوی جگە لە دۆلار مامەڵە بکەن، بەم زووانە دەست بەکارەکانیان دەکەنەوە.
دەربارەی رەوشی بانکی تەیف وتی: زۆربەی پارەی سپێردراوان لە بانکی تەیف پارێزراون، لە حاڵەتی رودانی هەر کورتهێنانێکدا بانکی ناوەندی دەستوەردان دەکات.
پارێزگاری بانکی ناوەندی باسی لەوەش کرد: وەبەرهێنانەکانی عیراق لە ویلایەتە یەکگرتووەکانی ئەمریکایە، چونکە وەک پەناگەیەکی ئارام دادەنرێت و تاقە وڵاتە کە پارێزبەندیی داوەتە عیراق، لە کاتێکدا مەترسییەکانی وەبەرهێنان لە وڵاتانی تردا زۆر گەورەن.
دەربارەی بڕی دراوی نەقدی لە بازاڕدا، ئاشکرای کرد: کۆی بارستەی نەقدی دەرچوو گەیشتووەتە 107 تریلیۆن دینار، بەڵام ئەوەی ئێستا لە بازاڕەکاندا مامەڵەی پێوە دەکرێت نزیكەی 40 تریلیۆن دینارە.
لە کۆتاییدا جەختی لەوە کردەوە: کابینەی ئێستای حکومەت بە فکری کەرتی تایبەت بەڕێوە دەبرێت و دەزگاکانی راگەیاندن رۆڵێکی گرنگیان هەیە لە باشکردنی وێنەی عیراق لەسەر ئاستی نێودەوڵەتی، هەروەها ئاماژەی بە دەستپێشخۆریی نوێی قەرزدان کرد بۆ پشتیوانیکردنی پڕۆژە گرنگ و حەیاتییەکان.
سێرگی ریابکۆف، جێگری وەزیری دەرەوەی روسیا رایگەیاند، ئەگەری رێکخستنی کۆبوونەوەیەکی لووتکەی سێلایەنە کە سەرۆکەکانی روسیا، چین و ئەمریکا کۆبکاتەوە لە ئارادایە، بەڵام جەختی لەوە کردەوە کە پێویستە پێش دەستپێکردنی رێکارە کردارییەکان، رێککەوتن لەسەر کارنامەی کۆبوونەوەکە بکرێت.
ئاژانسی هەواڵی "تاس"ی روسی لە سەرچاوەی ریابکۆفەوە بڵاوی کردەوە: پەیامی سەرەکی لێرەدا ئەوەیە کە چۆن ناوەرۆکی کۆبوونەوەکە دابڕێژرێت و چ ئەنجامێک دەکرێت چاوەڕوانکراو بێت لێی.
ئاماژەی بەوەش کرد: دیاریکردنی ناوەرۆک و ئەنجامەکان هەنگاوێکی بنەڕەتییە پێش بەرهەنگاوبوون بۆ ئامادەکارییە کردارییەکان.
پێشتریش لەم مانگەدا، یوری ئوشاکۆڤ، یاریدەدەری سەرۆکی روسیا، ئەگەری بەستنی کۆبوونەوەیەکی لەو شێوەیەی لە نێوان ڤلادیمێر پوتن، دۆناڵد ترەمپ و شی جینپینگ خستە روو، لە پەراوێزی لووتکەی هەماهەنگیی ئابووریی ئاسیا و زەریای هێمن (APEC) کە بڕیارە لە مانگی تشرینی دووەمدا لە شاری شێنژێنی چین بەڕێوە بچێت.
عەبدولئەمیر شەممەری، بەڕێوەبەری نووسینگەی فەرماندەی گشتیی هێزە چەکدارەکان، سەرپەرشتیی کۆبوونەوەیەکی ئاستبەرزی کرد لە نێوان فەرماندە ئەمنییەکانی حکومەتی فیدراڵ و وەفدێکی پلەبەرزی هێزەکانی پێشمەرگە و دەزگا ئاسایشییەکانی هەرێمی کوردستان، بە مەبەستی تاوتوێکردنی هەماهەنگیی مەیدانی و بەهێزکردنی هاوکارییە سەربازییەکان.
بەپێی راگەیەندراوێکی شانەی راگەیاندنی ئەمنی، لە کۆبوونەوەکەدا رەوشی دەروازە سنوورییەکان و کاری یەکە سنوورییەکان لە هەرێمی کوردستان تاوتوێ کران بە مەبەستی تۆکمەکردنی کۆنتڕۆڵ و رێگریکردن لە قاچاغچییەتی و دزەکردن.
لە بەشێکی تری کۆبوونەوەکەدا، جەخت لە بەهێزکردنی هاوکارییەکان کرایەوە لە بوارەکانی رووبەڕووبوونەوەی ماددە هۆشبەرەکان و هەڵوەشاندنەوەی تۆڕەکانیان، جێبەجێکردنی میکانیزمی نوێ لە ناوەندەکانی هەماهەنگیی هاوبەش بۆ زوو ئاڵوگۆڕکردنی زانیارییە هەواڵگرییەکان.
بەڕێوەبەری نووسینگەی فەرماندەی گشتی جەختی لە گرنگیی رێکخستنی کارە لەپێشینەکان کردەوە، بە تایبەت پاراستنی سنوورە نێودەوڵەتییەکان، ئەنجامدانی مەشق و راهێنانی هاوبەش، رادەستکردنەوەی داواکراوان به دادگا، لەگەڵ فراوانکردن و قووڵکردنەوەی کاری هەواڵگری لە نێوان بەغداد و هەرێمدا.
لە کۆتاییدا، سەرنجەکانی سەرۆکی ئەرکانی هێزەکانی پێشمەرگە دەربارەی میکانیزمی جێبەجێکردنی پلانە مەیدانییەکان خرانە روو، کۆبوونەوەکەش بە دەرکردنی چەند راسپاردەیەک کۆتایی هات کە ئامانجیان بەهێزکردنی تەواوکاریی ئاسایشی و یەکخستنی هەوڵەکانە بۆ پاراستنی سەقامگیری.
لە نزیک بەنداوی باوەشاسوار لە کفری، روداوێکی هاتوچۆ رویدا و هاووڵاتییەک گیانی لەدەستدا.
هاتوچۆی گەرمیان سەبارەت بە روداوەکە رایگەیاندووە: ئەمڕۆ یەکشەممە، ئۆتۆمبێلێکی جۆری 'جێب واز' بە ئاڕاستەی بەنداوی باوەشاسوار رۆیشتووە و ماتۆڕسکیلێکیش بە ئاڕاستەی گەڕانەوە بۆ ناوشار هاتووە، پێکدادان رویداوە و هاووڵاتییەک بەناوی 'هاوکار عەلی' کە شۆفێری ماتۆڕسکیلەکە بووە گیانی لەدەستداوە.
بەپێی زانیارییەکانی هاتوچۆی گەرمیان، ئەو هاووڵاتیەی گیانی لەدەستاوە، لەدایکبووی ساڵی 1997ـە.
محەمەد باقر قاليباف، سەرۆکی پەرلەمانی ئێران رایگەیاند، هێزە چەکدارەکانی وڵاتەکەی لێدانی بەهێزیان ئاڕاستەی بنکە سەربازییەکان کردووە و هۆشداریشی دا کە هەر هێرشێکی نوێ بکرێتە سەر ئاسایش یان بەرژەوەندییەکانی ئێران، رووبەڕووی وەڵامێکی خێراتر و ئازاربەخشتر دەبێتەوە.
قاليباف لە وتارێکدا کە راستەوخۆ لە رێگەی تەلەفزیۆنی رەسمیی ئێرانەوە پەخشکرا، رایگەیاند: لێدانەکانمان بۆ سەر بنکەکانی دەستدرێژیکاران لە ئۆپراسیۆنەکانی دواییدا تەنیا سەرەتا بوون.
سەرۆکی پەرلەمانی ئێران ئاماژەی بەوەش کرد: ئەمریکا درکی بەوە کردووە سەردەمی وەڵامدانەوەی هاوسەنگ کۆتایی هاتوو کە دەبێت بەرپێگرتن لە زووترین کاتدا تێبگات رێساکانی یارییەکە بە تەواوی گۆڕاون.
ئەم لێدوانانەی قاليباف دوای ئەوە دێن کە هێزەکانی ئەمریکا سێ کەشتیی نەوتهەڵگری ئێرانیان کردە ئامانج، لە بەرانبەریشدا هێرش کرایە سەر چەند کەشتییەک لە گەروی هورمزدا.
لەکۆتاییدا سەرۆکی پەرلەمانی ئێران دووپاتی کردەوە کە وڵاتەکەی شکست بە ئەمریکا دەهێنێت لە جەنگی ئابووریشدا، هەروەک چۆن لە مەیدانی سەربازی و دیپلۆماسیدا تووشی شکستی کردوون.
فەرمانگەی میدیا و زانیاریی حکومەتی هەرێمی کوردستان رایگەیاند، بەکارهێنانی پارەدانی دیجیتاڵی لە هەرێمی کوردستان رووی لە هەڵکشان کردووە و تا ئێستا زیاتر لە دوو ملیۆن و 220 هەزار مامەڵەی دارایی لە رێگەی سیستەمی "ئی-پسوولە"وە بە سەرکەوتوویی ئەنجامدراون.
بەپێی راگەیەندراوێکی فەرمانگەکە، بڕیاری داشکاندنی قەرزی کۆنی پێش پڕۆژەی رووناکی رۆڵێکی بەرچاوەی بینیوە لە راکێشانی هاووڵاتییان بۆ بەکارهێنانی سیستەمەکە؛ بە شێوەیەک تەنیا لە مانگی ئابی ئەمساڵدا زیاتر لە 400 هەزار هاوبەشی کارەبا سوودمەند بوون لە داشکاندنی تا رێژەی 50%. هاوکات مامەڵەکانی مانگی ئاب بە تەنیا نزیکەی 37%ی سەرجەم ئەو مامەڵانە پێکدەهێنن کە تا ئێستا لە ئی-پسوولە تۆمارکراون.
دەستکەوتەکانی سیستەمی ئی-پسوولە بەپێی پارێزگاکان:
هەولێر: 1,189,000 مامەڵە (%53.6)
سلێمانی: 522,000 مامەڵە (%23.5)
دهۆک: 492,000 مامەڵە (%22.2)
هەڵەبجە: 17,000 مامەڵە (%0.8)
فەرمانگەی میدیا و زانیاری ئاماژەی بەوەش کردووە: ئەم بەرزبوونەوەیەی رێژەی بەکارهێنانی ئی-پسوولە، هەنگاوێکی جەوهەرییە لە جێبەجێکردنی ستراتیژیی بەدیجیتاڵکردنی خزمەتگوزارییە گشتییەکان و ئاسانکاریکردنی پرۆسەی پارەدان بۆ هاووڵاتییان لە سەرجەم ناوچەکانی هەرێمی کوردستان.
سایلۆی سلێمانی داوا لەو جوتیارانە دەکات کە لە ساڵی 2025 گەنمیان رادەستی سایلۆکەیان کردووە، سەردانیان بکەن و چەکی شایستە داراییەکەیان وەربگرن.
سایلۆی سلێمانی ئاگاداری ئەو جوتیارانە دەکاتەوە، کە بۆ وەرزی 2025 گەنمیان رادەستی سایلۆکەیان کردووە، سبەینێ دووشەممە، رێکەوتی 7ـی 9ـی 2026، تاوەکو پسوڵەی ژمارە 1531، سەردانی هۆبەی ژمێریاریی بەڕێوەبەرایەتییەکەیان لە ناحیەی پیرەمەگروون بکەن، بەمەبەستی وەرگرتنی چەکی بانکیی شایستە داراییەکانیان.
ئاماژەی بەوەشداوە، پێویستە خودی ئەو جوتیارەی گەنمەکەی بەناوەوە رادەستکراوە ئامادە بێت یان بریکاری یاسایی (وەکالەی دادنوس)ـی هەبێت و کارتی نیشتمانیشی پێبێت.
هۆشداریشدەدات، بەبێ بریکارنامەی رەسمی، چەک بە هیچ کەسێکی دیکە نادرێت.
كەشناسیی عیراق ئاشكرایكرد، لە سبەینێوە كەشی زستانە و فێنك ناوچە جیاجیاكانی عیراق دەگرێتەوە.
دەستەی كەشناسیی عیراق، پێشبینی كەشوهەوای بۆ چوار رۆژی داهاتوو بڵاوكردەوە ئاشكرایكرد، بۆ بەیانیی پێشبینیی بارینی بارانی و هەورەبروسكەی و دابەزینی پلەكانی گەرما لە پارێزگاكانی هەرێمی كوردستان و باكور كرد، بەڵام لە لە ناوچەكانی ناوەڕاست و باشور ساماڵ دەبێت لەگەڵ دابەزینی كەمێك لە پلەكانی گەرما.
دەستەی كەشناسی ئاماژەی بەوەش كردووە: بۆ رۆژانی دواتریش بە شێوەیەكی گشتی لە سەرەتاسەری عیراق ئاسمان سامڵ دەبێت، بەردەوامیش پلەكانی گەرما بەرێژەی كەم روو لە دابەزین دەكەن.
دەستەی كەشناسی جەختلەوەشكردوە، بەرزترین پلەكانی گەرمای پێشبینیكراو بۆ هەفتەیە سەرجەم پارێزگاكانی عیراق لە نێوان (37 تا 46) پلەی سیلیزیدا دەبن.
لە چوارچێوەی هەوڵە بەردەوامەکانی بۆ سەربەخۆیی سەربازی و بەهێزکردنی پیشەسازیی بەرگریی ناوخۆیی، تورکیا پێشکەوتنی گەورەی لە پەرەپێدانی فڕۆکەی جەنگیی نیشتمانیی "کان" بەدەستهێناوە، تاوەکو وەک جێگرەوەیەک بۆ فڕۆکەی ئێف 35ی ئەمریکی بەکاریبهێنێت.
ئێمرێ یابان، گەورە ئەندازیاری فڕۆكەی جەنگیی كان لە چاوپێكەوتنێكی تەلەفزیۆنیدا رایگەیاند: توركیا هەنگاوەكانی خێرا كردووە بۆ پەرەپێدانی فڕۆكەی جەنگیی نیشتمانیی خۆی لە نەوەی پێنجەم بە ناوی كان، بە ئامانجی دەستكەوتنی جێگرەوەیەكی سەربەخۆ بۆ فڕۆكەی ئێف 35ی ئەمریكی.
ئەم هەنگاوەی ئەنقەرە دوای ئەوە هات كە لە بەرنامەی دروستكردنی ئێڤ 35 دوورخرایەوە و یاسای ململانێكردنی نەیارانی ئەمریكا بەسەردا سەپێندرا ناسراو بە كاتسا، ئەوەش دوای كڕینی سیستەمی بەرگریی ئێس 400 ی روسی لە ساڵی 2017دا.
ئەو ئەندازیارە توركیە راشیگەیاند: فڕۆكەكە بە تەواوی لە سەرەتایەوە بە سەرجەم بەشەكانی و سیستەمی كارپێكردنییەوە لە ناوخۆی توركیا دیزاین كراوە، بەوەش توركیا دەبیچتە یەكێك لەو چوار وڵاتەی جیهان كە توانتوویانە فڕۆكەی جەنگی لە نەوەی پێنجەم گەشە پێبدەن شانبەشانی ئێڤ 22 ئەمریكی، سی یو 57 رووسی، و جەی 20ی چینی.
وەزارەتی کشتوکاڵی عیراق بە هاوبەشی لەگەڵ فەرمانگەی سامانەکانی ئاژەڵ و کەرتی تایبەت، کۆمەڵێک رێکاری بەپەلە و چڕی بۆ راگرتن و دابەزاندنی نرخی گۆشت و هێلکەی خواردن لە بازاڕە ناوخۆییەکاندا دەستپێکرد.
قوسەی ئەلحەتتاب، وتەبێژی وەزارەتی کشتوکاڵ رایگەیاند: هەنگاوەکان جەخت لەسەر پشتیوانیکردنی خاوەن کێڵگەکانی پەلەوەر و پڕۆژەکانی سامانی ئاژەڵ دەکەنەوە، بە مەبەستی کەمکردنەوەی تێچووی بەرهەمهێنان.
روونیشیکردەوە: رێکارە ئیدارییەکان ئاسانکراون و مۆڵەتەکان نوێکراونەتەوە بۆ ئەوەی رێگری لە رۆتین بکرێت و بەرهەمهێنان بەردەوام بێت.
ئامارە رەسمییەکانی وەزارەت ئاستی کورتهێنانی بەرهەمهێنان دەخەنە روو بە شێوەیەک: عیراق ساڵانە پێویستی بە نۆ ملیار هێلکە هەیە، لە کاتێکدا بەرهەمهێنانی ڕاستەقینەی ناوخۆ پێنج ملیار هێلکەیە.
گۆشتی پەلەوەر: بەرهەمهێنانی راستەقینە لە ساڵی 2026دا گەیشتووەتە 400 هەزار تۆن، لە کاتێکدا پێداویستیی ساڵانەی وڵات 900 هەزار تۆنە.
وەزارەتی کشتوکاڵ جەخت دەکاتەوە کە بە ئاسانکاریی گومرگی و پشتیوانیکردنی راستەوخۆی پڕۆژەکان کار بۆ پڕکردنەوەی ئەم فەجوەیە و دابینکردنی کالاکان بە نرخێکی گونجاو بۆ هاووڵاتییان دەکات.
سوپای ئیسرائیل ئاگادارییەکی بەپەلەی ئاڕاستەی دانیشتوانی شارۆچکەی "عەرەبسالیم" لە باشوری لوبنان کرد و حزبوڵای تۆمەتبار کرد بە پێشێلکردنی رێککەوتنی ئاگڕبەست، دواتر زنجیرەیەک هێرشی ئاسمانیی کردە سەر شارۆچکەکە و ناوچەی نەبەتییە.
سوپای ئیسرائیل لە راگەیەندراوێکدا ئاماژەی بەوە کرد: دوای ئەوەی حزبوڵا بە رەوانەکردنی درۆنێکی بۆمبڕێژکراو بەرەو هێزەکانیان رێککەوتنی ئاگڕبەستی پێشێل کردووە، مەشق و چالاکییەکانی ئەو حزبە ناچاریان دەکات بە توندی وەڵام بدەنەوە.
هەروەها رایگەیاند کە مەبەستیان زیانگەیاندن بە هاووڵاتییانی سڤیل نییە و داوای لە دانیشتوانی ئەو بینایانە کرد کە لە نەخشەکەدا دەستنیشانکراون، بە زووترین کات ماڵەکانیان چۆڵ بپکەن و بەلایەنی کەمەوە 300 مەتر لێیان دووربکەونەوە، بەهۆی نزیکییان لە دامەزراوەکانی حزبوڵاوە.
لە راگەیەندراوێکی تردا، سوپای ئیسرائیل روونیکردەوە : بەیانیی ئه‌مڕۆ یەکشەممە، حزبوڵا دوو درۆنی خۆکوژی بەرەو ناوچەی ئاسایشی لە باشوری لوبنان رەوانە کردووە و هێزەکانیان توانیویانە یەکێکیان بخەنە خوارەوە بێ ئەوەی هیچ زیانێکی گیانییان بەرکەوێت، و جەختی کردەوە کە لە وەڵامی ئەم هەوڵانەدا لە هێرشەکانیان بەردەوام دەبن.
لە دوای ئاگادارییەکەوە، فڕۆکە جەنگییەکانی ئیسرائیل بینا دیاریکراوەکە و دەوروبەری شارۆچکەی عەرەبسالیمیان بۆردومان کرد.
میدیا ناوخۆییەکانیش بڵاویانکردەوە کە هێرشێکی ئاسمانیی ئیسرائیل بۆ سەر شارۆچکەی "کەفرڕەمان" لە سنووری قەزای نەبەتییە، بووەتە هۆی وێرانبوونی تەواوەتیی بینایەکی نیشتەجێبوونی سێ نهۆمی.
دەستەی سەرۆکایەتیی ئەنجومەنی نوێنەرانی عیراق خشتەی کاری دانیشتنی ژمارە (15)ی وەرزی یاسادانانی راگەیاند، کە بڕیارە ئه‌مڕۆ یەکشەممە، 6ی ئەیلوولی 2026، سەعات یەکی دوانیوەڕۆ بەڕێوەبچێت.
بەپێی کارنامەی راگەیەندراو، دانیشتنەکە لە دوای خوێندنەوەی ئایەتێک لە قورئانی پیرۆز، بە ئەنجامدانی سوێندی دەستووریی لەلایەن چەند پەرلەمانتارێکی نوێوە دەستپێدەکات.
هەر لە دانیشتنەکەدا، پەرلەمانی عیراق تاوتوێی سێ پڕۆژەیاسای گرنگ دەکات و خوێندنەوەی یەکەمیان بۆ ئەنجام دەدات:
١- پڕۆژەیاسای هەمواری یەکەمی یاسای هاتووچۆ (ژمارە 8ی ساڵی 2019)؛ کە لەلایەن لیژنەکانی ئاسایش و بەرگری، و داراییەوە ئامادەکراوە.
٢- پڕۆژەیاسای هەمواری یەکەمی یاسای رێکخستنی بریکارنامەی بازرگانی (ژمارە 79ی ساڵی 2017)؛ کە لەلایەن لیژنەکانی ئابووری و پێشەسازی و بازرگانی، و یاساییەوە پێشکەشکراوە.
٣- پڕۆژەیاسای پەڕەی دارایی و کالاكان؛ کە لەلایەن لیژنەکانی ئابووری، وەبەرهێنان و داراییەوە تاوتوێ دەکرێت.
تەقینەوەی گڕکانی ئاناک کراکاتاو لە ئیندۆنیزیا بووە هۆی راگرتنی گەشتە ئاسمانییەکان لە فڕۆکەخانەی نێودەوڵەتیی سوکارنۆ-هاتا و هەڵوەشاندنەوە یان پەکیستنی 209 گەشتی ناوخۆییو نێودەوڵەتی.
فڕۆکەخانەکە لە هەژماری ئینستاگرامەکەی رایگەیاند: لەپێناو سەلامەتیی گەشتەکان، راگرتنی گەشتەکانی تا کاتژمێر 9:30ی بەیانی درێژکردووەتەوە.
بەپێی کەشناسی، ستوونی تۆزی گڕکانەکە لە هەندێک ناوچە تا بەرزیی 15 هەزار مەتر بەرزبووەتەوە.
دەسەڵاتداران داوایان لە هاووڵاتییان کردووە دەمامک و چاویلکەی پارێزەر بەکاربهێنن، چونەدەرەوە کەمبکەنەوە و بە هوشیارییەوە شۆفێری بکەن.
بڵاوبوونەوەی تۆزی گڕکانەکە بووەتە هۆی راگرتنی خوێندن لە چەندین قوتابخانە و راگرتنی کاری راوچییان، بەڵام ئاژانسی کارەساتەکان رەتییکردەوە هیچ مەترسییەکی تسۆنامی لە ئارادا بێت.
ئەنجومەنی باڵای دادوەریی عیراق، رێنماییدا بە گرتنەبەری رێکاری یاسایی دژی ئەو کەسانەی وتاری تایفەگەری لە عیراق بڵاودەکەنەوە
ئەنجومەنەکە لە راگەیەندراوێکدا ئاماژەی بەوە کردووە: دادگاکانی لێکۆڵینەوەی تایبەتمەند و ئەندامانی داواکاری گشتی راسپێردراون بۆ چاودێریکردنی بەکارهێنانی دەستەواژە و دەربڕینی مەزهەبی لەلایەن هەندێک کەسەوە لە دەزگاکانی راگەیاندن و تۆڕە کۆمەڵایەتییەکاندا، کە بە مەبەستی نانەوەی ئاژاوە و دابەشبوونی کۆمەڵایەتی بۆ بەرژەوەندیی سیاسی یان کەسی بەکاریان دەهێنن، و جەختیکردەوە: رێکاری یاساییان لەبەرانبەردا دەگیرێتەبەر.
لەنێو راگەیەندراوەکەدا هاتووە: کۆبوونەوەی هاوپەیمانیی بەڕێوەبردنی دەوڵەت کە دوێنێ شەممە 5ی أیلولی 2026 بە ئامادەبوونی چوار سەرۆکایەتییەکە و سەرکردە سیاسییەکانی وڵات بەڕێوەچوو، جەختی لە رەتکردنەوەی وتاری مەزهەبی کردووەتەوە کە هەندێک کەس بانگەشەی بۆ دەکەن، و داوای سزادانی ئەوانەی کردووە کە بەهۆی پێشێلکردنی دەستوور و یاساوە بڕوایان پێیەتی.