هەواڵەکان
پەیامنێری کوردسات نیوز رایگەیاند، لە دەروازەی شاری سنە، تانکەرێکی سووتەمەنی تەقییەوە و زیانی گیانی و مادی لێکەوتەوە.
سامان سلێمانی، پەیامنێری کوردسات نیوز رایگەیاند، لەسەر رێگای سنە - هەمەدان، تانکەرێکی سوتەمەنی بەهۆی روداوێکی هاتوچۆوە تەقیەوە و بەهۆیەوە 11 کەس گیانیان لەدەستدا و شەشی دیکەش بریندار بوو.
وتیشی، تا ئێستاش لایەنی پەیوەندیدار لە هەوڵی بەردەوامدان بۆ رزگارکردنی بریندارەکان و پاککردنەوەی شوێنی رووداوەکە.
ئاماژەی بەوەشدا، بەهۆی تەقینەوەکەوە ئاگر لە نزیک شوێنی تەقینەوەکە دروستبوو و تیمەکانی ئاگرکوژێنەوەی سنە لە هەوڵی بەردەوامدان بۆ کوژاندنەوەی ئاگرەکە
ئاڕاستەی كوردساتی بزوتنەوەی گۆڕان دانا ئەحمەد مەجیدی وەك رێكخەری گشتیی بزوتنەوەكە هەڵبژارد.
چۆمان محەمەد، وتەبێژی بزووتنەوەی گۆڕان رایگەیاند، بزوتنەوەی گۆڕان ئاڕاستەی كوردسات لەسەر داوای كۆمسیۆنی باڵای سەربەخۆی هەڵبژاردنەكانی عیراق كۆنفرانسێكیان بۆ دیاریكردنی رێكخەری گشتیی ئەنجامداوە.
وتیشی، رێژەی یاسایی دەنگدەرانی كۆنفرانسەكە تەواوبووە و زیاتر لە 357 كەس ئامادەی كۆنفرانسەكە بوون و بە كۆی دەنگ، دانا ئەحمەد مەجید وەك رێكخەری گشتیی بزوتنەوەی گۆڕان دیاریكرا.
لە بەرانبەریشدا، بزوتنەوەی گۆڕان، ئاڕاستەی زەرگەتە رایگەیاند، تانە لە بڕیارەكەی كۆمیسیۆنی باڵای سەربەخۆی هەڵبژاردنەكانی عیراق دەدات لەبارەی زیادكردنی ناوی دانا ئەحمەد مەجید بۆ دەستەی گشتیی بزووتنەوەی گۆڕان.
بۆ كەمكردنەوەی قەرەباڵغی لەسەر راییكردنی مامەڵەی هاووڵاتیان، بەڕێوەبەرایەتیی هاتووچۆی سلێمانی بڕیاریدا دەوامی ئێواران بۆ بەشی مۆڵەت بخاتە بواری جێبەجێكردنەوە.
بەپێی ئاگادارییەكی هاتووچۆی سلێمانی، وەك هەنگاوێكی ئەزموونی و بۆ چارەسەركردنی قەرەباڵغیی بەشی مۆڵەت، دەوامی ئێواران كارا دەكرێت لە دەستپێكی پرۆسەكەشدا تەنها بۆ رۆژانی دووشەممە و سێشەممە، حەوت و هەشتی ئەیلول، هاووڵاتیان دەتوانن لە رێگەی كۆدی ئەلیكترۆنییەوە دەوامی ئێواران هەڵبژێرن و سەعات یەك و 30 خولەکی پاشنیوەڕۆ لە بەڕێوەبەرایەتییەكە ئامادە بن.
وەرگرتنی كۆدی نۆرەگرتن بەهەمان شێوە لە رۆژانی شەممە سەعات حەوتی ئێوارە دەبێت و داواكار خۆی دیاریدەكات بەیانیان سەردانی بەشی مۆڵەت دەكات یان ئێواران، هەروەها دەوامی بەیانیان وەك پێشتر لە یەكشەممەوە تا پێنجشەممە بەردەوام دەبێت.
لە دوو روداوی جیای هاتوچۆدا لە سنوری ئیدارەی راپەڕین، کەسێک گیانی لە دەستدا و چوار کەسی تریش بریندارن
ئەمڕۆ شەممە هاتوچۆی راپەرین بڵاویکردوەتەوە، دوانیوەرۆی ئەمڕۆ بە هۆی وەرگەڕانی ئۆتۆمبێلێکی تایبەت، کە هۆکارەکەی لەدەستدانی کۆنتڕۆڵ بووە، شۆفێرەکەی گیانی لە دەستداوە.
ئاماژەی بەوەشکردوە، لە ئۆتۆمبێلەکەدا دوو سەرنشین تریش هەبوون و ئەوانیش بریندارن.
بەشی هاتوچۆی پشدەریش رایگەیاند، بەهۆی پابەند نەبون بە رێنماییەکان ئۆتۆمبێلێکی تایبەت لە نزیک دەربەند وەرگەڕا.
ئەوەشیخستوەتەڕوو، سەرنشینێک و شۆفێرەکەی بریندارن و رەوانەی نەخۆشخانە کراون بە مەبەستی چارەسەر کردن.
بە بڕیاری عەلی زەیدی، سەرۆک وەزیرانی عیراق، یەک ملیۆن پارچە زەوی لە پارێزگاکانی عیراق بەسەر هاووڵاتیاندا دابەش دەکرێت بە سەرجەم خزمەتگوزارییەکانیشەوە.
نووسینگەی راگەیاندنی عەلی زەیدی، سەرۆک وەزیرانی عیراق لە راگەیندراوێکدا دەڵێت: بە بڕیاری سەرۆک وەزیرانی عیراق و لەژێر ناونیشانی 'دەستپێشخەری نیشتمانی'، یەک ملیۆن پارچە زەوی بە سەرجەم خزمەتگوزارییەکانی وەک ئاو، کارەبا و خزمەتگوزارییەکانی دیکە بەسەر هاووڵاتیاندا دابەشدەکرێت.
بەپێی راگەیەندراوەکە، هاووڵاتیانی پارێزگاکانی عیراق لەو بڕیارە سودمەند دەبن و باس لە پارێزگاکانی هەرێم نەکراوە، هەروەها ئەو خێزانانە مافی وەرگرتنیان هەیە کە، هیچ ئەندامێکیان زەوی یان یەکەی نیشتەجێبوونی بەناوەوە نەبێت.
سەبارەت بە ناوتۆمارکردن، بەپێی زانیارییەکانی نوسینگەی راگەیاندنی سەرۆک وەزیرانی عیراق، لە مانگی 10ـی ئەمساڵدا، هاووڵاتیان دەتوانن لە رێگەی لینکێکەوە ناوی خۆیان تۆمار بکەن و لە قۆناغی یەکەمدا 216 هەزار پارچە زەوی دابەشدەکرێت.
وتەبێژی فەرماندەی گشتی هێزە چەكدارەكانی عیراق رایگەیاند، لەگەڵ نزیكبوونەوە لە وادەی چەكدانانی گروپە چەكدارەكان دەنگۆ و بانگەشەی بێبنەما بڵاودەكرێنەوە كە كاریگەرییان لەسەر دەرون و داهاتووی هاووڵاتیان هەیە.
سەباح نوعمان وتەبێژی فەرماندەی گشتی هێزە چەكدارەكانی عیراق لە راگەیەنراوێكدا ئاماژەی بەوەكردووە، لەگەڵ نزیكبوونەوەی 30ی ئەیلول رۆژانە لە میدیاكانەوە چەند دەستەواژەیەك لە بارەی رەوشی عیراقەوە بڵاودەكرێتەوە لەوانەش، داهاتووی عیراق مەترسیدارە، عیراق لەسەر سینییەكی گەرمە و ئەم دەستەواژانە دڵەراوكێ لای هاووڵاتیان دروست دەكات.
دەشڵێت، عیراق لە مێژوویدا رۆژێك بێ قەیران و گۆڕانكاری نەبووە و هیچ هێزێك یان رەوشێكی هەرێمی لە جیهاندا توانای شكاندنی دەوڵەتێكی نییە كە گەلەكەی بە هەموو پێكهاتە و ڕەنگەكانەوە لە دەوری دەزگاكانی كۆببنەوە.
وتیشی، دامەزراوە سەربازی و ئەمنییەكان كە لە سەختترین خوێنیان بەخشیوە و بە تەواوی ئاگاداری قەبارەی ئاڵنگارییەكان و بە بەردەوامی لە ئەركدا و قۆناغی داهاتووی پێویستی بە یەكڕیزی و سەقامگیری هەیە.
ئەوقافی هەرێم، بە مەبەستی دەستنیشانکردنیان وەک رێبەری حاجیان، تاقیکردنەوەی وزاری بۆ 465 مامۆستای ئاینی ئەنجامدا، تاقیکردنەوەکە بۆ بەشداریکردنە لە دوو وەرزی حەج و هەر وەرزە و 31 رێبەر لە خۆدەگرێت.
ئەمڕۆ شەممە، وەزارەتی ئەوقاف و کاروباری ئایینیی حکومەتی هەرێمی کوردستان، پرۆسەی تاقیکردنەوەی وەزاری لە یەک کاتی دیاریکراودا بۆ 465 مامۆستای ئایینی ئەنجامدا بە مەبەستی دەستنیشانکردنیان وەک رێبەری حاجیان بۆ وەرزی فەریزەی حەجی ساڵی 2027.
کاروان ستونی، وتەبێژی بەڕێوەبەرایەتیی گشتیی حەج و عومرەی هەرێم بە میدیاکانی راگەیاند،ئامانج لەم تاقیکردنەوەیە دەستنیشانکردنی شایستەترین مامۆستایانە تاوەکو بچنە ناو تیروپشکێکەوە بۆ هەڵبژاردنیان بۆ دوو وەرزی فەریزەی حەج، کە لە هەر وەرزێکدا 31 رێبەر لەخۆدەگرێت.
ناوبارو رونیشیکردەوە پرۆسەکە لە رێگەی سێ بنکەی سەرەکییەوە بەڕێوەچووە؛ بنکەی هەولێر بۆ پارێزگای هەولێر و ئیدارەی سۆران، بنکەی سلێمانی بۆ پارێزگاکانی سلێمانی، هەڵەبجە و ئیدارەکانی راپەڕین و گەرمیان، وە بنکەی دهۆک بۆ پارێزگای دهۆک و ئیدارەی سەربەخۆی زاخۆ.
سەبارەت بە مەرجەکانی بەشداربوون، وتەبێژی حەج و عومرەی هەرێم ئاماژەیبەوەکردوە، چەند پێوەرێکی سەرەکیان بۆ داواکاران دیاری کردووە؛ لەوانە بەشداربوو پێویستە پێشنوێژ و وتارخوێن یان یەکێک لەوان بێت، کارمەندی سەر میلاکی رەسمی وەزارەتی ئەوقاف بێت، و پێویستە و تەمەنیشی لە نێوان 30 بۆ 60 ساڵدا بێت.
سبەینێ لە سنوری ئیدارەی راپەڕین دەست دەکرێت بە دابەشکردنی گوژمەی حەوتەمی پارەی گەنمی جوتیاران بۆ ساڵی 2025.
سایلۆی راپەڕین، لە راگەیەندراوێکدا، جوتیاران ئاگادار دەکاتەوە، رۆژی یەکشەممە، 5ـی9ـی2026 سەعات 10ـی بەیانی لە هۆبەی ژمێریاری دەستدەکرێت بە دابەشکردنی پارەی جوتیاران.
ئاماژەی بەوەشکراوە، ئەو جوتیارانەی پارەکانیان هاتووە کارتەکانیان لە ژمارە 554 بۆ 600 دەستپیدەکات.
سایلۆکە داواش دەکات، بۆ وەرگرتنی پارەکە، پێویستە کارتی نیشتمانی رەسەن لەگەڵ ئەو بەڵگانامانەی پێیاندراوە بهێنن، ئەگەر گەنمەکەش بەناوی خۆیانەوە نەبێت، دەبێت وەکالەت و کۆپی ناسنامەی خاوەن گەنمەکەیان پێبێت.
لقی هەولێری سەندیکای پزیشکانی کوردستان راگەیەندراوێکی لەسەر روداوی گیان لە دەستدانی نەخۆشەکەی هەولێر لە ژوری نەشتەرگەریدا بڵاوکردەوە، داواش دەکات میدیاکان روداوەکان وەک خۆی و پرۆفیشناڵانە بگوازنەوە.
لە راگەیەنداوەکەدا هاتووە؛ ئەو پزیشکەی بەرپرسبوە لە نەخۆشخەکە، هەڵگری بەرزترین بڕوانامەی بواری پسپۆڕی بووەو ڕێپێدان و مامەڵەی دروستی هەبووە لە سەندیکای پزیشکان.
ئاماژەی بەوەشکردوە، پێویستە لێکۆڵینەوەی ورد بکرێت لەوەی کە هۆڵەکانی نەشتەرگەری نەخۆشخانەی رەسولی تایبەت داخراو بوون و بەشی چاودێری چڕ (ICU) لە ژێر نۆژەنکردنەوە بووە، چۆن نەشتەرگەری تێدا کراوە.
داواشدەکات، ئاشکرا بکرێت، بە چ مۆڵەت و بنەمایەکی یاسایی و پزیشکی و لەژێر چ مەرج و پێوەرێکدا، رێگە بە ئەنجامدانی نەشتەرگەری دراوە
دەقی راگەیەندراوەکەی لقی هەولێری سەندیکای پزیشکانی کوردستان
سەرەتا هاوخەمی و دڵنەوایی خۆمان ڕادەگەینین بۆ خانەوادەی کۆچکردوو، هاوکات بەگوێرەی یاساو ڕێنماییە بەرکارەکان بەرپرسین لە پاڵپشتی و پشتگیری بەرگریکردن لە گشت پزیشکانی ئەندام لە سەندیکامان دوای پابەندبوونیان بە ڕێکار و ڕێنماییەکان.
١/ بە گوێرەی یاسای ژمارە ٦ی ساڵی ٢٠٠٠ سەندیکای پزیشکان لایەنی فەرمی و پیشەییە بۆ ڕێکخستنی کاروباری کارکردنی پزیشک و پێدانی مۆڵەتی کارکردن وەکو پزیشکی پسپۆڕ لە کەرتی تایبەت. ئەو پزیشکە بەڕێزەی بەرپرسیار بووە لە نەخۆشەکە هەڵگری بەرزترین بڕوانامەی بواری پسپۆڕی بووەو ڕێپێدان و مامەڵەی دروستی هەبووە لە سەندیکای پزیشکان.
٢/ لەماوەی ڕابردوو ڕێنماییەک لە لایەن حکومەتەوە دەرچووە کە پێویستە هەر پزیشکێک تەنها لە یەک نەخۆشخانەی کەرتی تایبەت کار بکات، سەرەڕای ئەوەی ڕێکخستنی کاری پزیشکان لە کەرتی تایبەت کاری سەندیکای پزیشکانە، بە ڕوونی ڕای دەگەیەنین ئەو جۆرە ڕێنماییە خزمەت بە نەخۆش و کەرتی تەندروستی ناکات، چونکە هەندی جار نەخۆش جۆرێک لە ئامێر یان خزمەتگوزاری دەوێ لە نەخۆشخانەیەکی تر بەردەستە، بۆیە داوادەکەین دووبارە کار لەسەر ئەم خالە بکرێ چارەسەری گونجاوی بۆ بکرێ.
٣/ سەندیکای پزیشکانی کوردستان لە ڕێگەی لێژنەی پشکنین و بەدواداچوون لە ڕێگەی چەندین تیمی تایبەتمەندەوە ڕۆژانە بەردەوامن لە کارەکانیان بۆ بەرجەستەکردنی کاری پزیشکی بە گوێرەی یاسا بەرکارەکان.
٤/هەروەها پێویستە لێکۆڵینەوەی ورد بکرێت لەوەی کە لە کاتی ڕووداوەکەدا، هۆڵەکانی نەشتەرگەری نەخۆشخانەی ڕەسولی تایبەت داخراو بوون و بەشی چاودێری چڕ (ICU) لە ژێر نۆژەنکردنەوە بووە. لەبەر ئەمە پێویستە دیاری بکرێت بە چ مۆڵەت و بنەمایەکی یاسایی و پزیشکی، و لەژێر چ مەرج و پێوەرێکدا، ڕێگە بە ئەنجامدانی نەشتەرگەری دراوە و ئایا لەو کاتەدا هەموو پێداویستییەکانی سەلامەتی نەخۆش، هۆڵی نەشتەرگەری و چاودێری دوای نەشتەرگەری بەردەست و دابینکراو بوون یان نا؟چونکە سەلامەتی نەخۆش لە پێشینەی کارەکانی سەندیکای پزیشکانە.
٥/لە ڕووی زانستی پزیشکی نەشتەرگەری زۆر جار لەکاتی ئەنجامدانی نەشتەرگەری بەجۆری هەناوبینی، بەهۆی باری نەخۆش ناچار دەبی جۆری نەشتەرگەری بگۆڕی بۆ کراوە.
٦/پێویستە لە ڕێگەی لێژنەو تیمی پسپۆڕی گشتگیرەوە بە بەشداری دادگاو پزیشکی دادی لێکۆڵینەوەی ورد لەسەر ڕوداوەکە بکرێ، لە کۆتایی دا بڕیاری پێویست بدرێ.
۷/بەڕوونی ڕایدەگەیەنین بەشێک لە میدیاکان بەشێوەیەکی زۆر نا پڕۆفیشناڵ بوون بە جێگرەوی لێژنەی زانستی و دادگاو پزیشکی دادی، وەکو سەندیکای پزیشکان ڕایدەگەینین ئەوەی بەشێک لە میدیاکان و فەرمانبەرەکانیان کردیان تێپەڕاندنی سنور و ئاکاری میدیایی بووە، مەترسی گەورەن بۆ سەر کەرتی تەندروستی کە بەشێکە لە ئەمنی قەومی.
۸/داوا لە هاوڵاتیانی خۆشەویست دەکەین هەوڵدەن بەرچاوڕوونی تەواو وەرگرن پێش ئەنجامدانی هەر نەشتەرگەریەک، چونکە بەپێی ڕێکار و پێوەرە زانستیە نێودەوڵەتیەکان هەموو نەشتەرگەرییەک ئەگەری ماک و لێککەوتەی سادەو ئاڵۆزی هەیە دەکەوێتە سەر جۆری نەخۆشیەکە.
لە کۆتایی دا، داوا دەکەین لە پزیشکی دادی و دادگای تایبەتمەند چ ڕێکاو هەنگاوێکی زانستی و یاسایی هەیە بەگوێرەی یاسا بیگرنەبەر بۆ لێکۆڵینەوە لەم ڕوداوە.
لەگەڵ ڕێزدا
سەندیکای پزیشکانی کوردستان
کەشناسی هەرێم رایگەیاند، ئاسمان ساماڵ دەبێت، بەراورد بە دوێنێ ئەمڕۆ و سبەینێش پلەکانی گەرما جێگیر دەبن و گەرمیان بە 43 پلە گەرمترین و حاجی ئۆمەرانیش بە 28 پلەی سیلیزی ساردترین ناوچەی هەرێم دەبێت.
ئەمڕۆ شەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، بە شێوەیەکی گشتی ئاسمان ساماڵ و پەڵە هەور دەبێت.
لە بارەی کەشی سبەینێشەوە، ئاماژەی بەوەکردوە، پلەکانی گەرما نزیک دەبن لە تۆمارکراوەکانی ئەمڕۆ و ئەگەری بارینی نمەباران لە ناوچەشاخاوییەکانی سنوری دهۆک هەیە.
بەرزترین پلەکانی گەرمای پێشبینیکراو بە پلەی سیلیزی
هەولێر: 41 پلەی سیلیزی
پیرمام: 37 پلەی سیلیزی
سلێمانی: 39 پلەی سیلیزی
چەمچەماڵ: 41 پلەی سیلیزی
دهۆک: 39 پلەی سیلیزی
زاخۆ: 40 پلەی سیلیزی
هەڵەبجە: 41 پلەی سیلیزی
حاجی ئۆمەران: 27 پلەی سیلیزی
گەرمیان: 44 پلەی سیلیزی
گەمارۆ دەریاییەکانی ئەمریکا فشاری زیاتری خستوەتە سەر ئێران و لێپرسراوانی ئەو وڵاتەش دەڵێن؛ تا پێنج مانگ توانای بەرگەگرتنی گەمارۆکانیان هەیە.
رۆژنامەی ۆوڵ ستریت جۆرناڵ راپۆرتێکی بڵاوکردوەتەوە و تێیدا هاتووە؛ داخستنی گەروی هورمز لەلایەن ئێرانەوە ئامانجی نەپێکاوە و زیانی گەورەی بە خۆی گەیاندوە، چونکە گەمارۆی توندی دەریایی ئەمریکا لە مانگی حەوتی رابردووەوە رێگری لە تاران کردووە نەوتەکەی هەناردە بکات.
بەپێی راپۆرتەکە، روبەڕوبونەوەی نێوان واشنتۆن و تاران بووەتە ململانێیەکی درێژخایەن و داخستنی گەروی هورمز نەبووەتە هۆی ئەوەی ترەمپ بە مەرجەکانی ئێران رازی بێت و ئەمەش کێشەی قوڵی ئابوری بۆ تاران دروست کردوە.
رۆژنامەکە ئاماژەی بەوەکردوە، هەرچەندە بەردەوامیی جەنگەکە لە قازانجی هیچ لایەکیاندا نییە و ئاڵوگۆڕی لێدانە سەربازییەکانیش تا ئێستا بە سنورداری ماونەتەوە، لە روی ناوخۆیی و ئابورییەوە، سەرکردەکانی ئێران پێشبینی دەکەن نزیکەی پێنج مانگی تر بەرگە بگرن.
بەو پێیەی ئازاری ئابوریی خەڵک کاریگەرییان لەسەر دانانێت و دەسەڵاتی راستەقینەش کەوتووەتە دەست سوپای پاسداران، بەتایبەت لە سایەی نادیاری و نەبونی رابەری باڵادا.
فەرماندەکانی پاسداران بەرەو دروستکردنی کۆمەڵگەیەکی سەربازی هەنگاو دەنێن، لە کاتێکدا ئابوریی وڵاتەکە بەرەو لاوازیی زیاتر دەچێت، بەڵام لێپرسراوان توانیویانە ناڕەزایەتیەکانی ناوخۆ کۆنتڕۆڵ بکەن.
وەزیری نەوتی عیراق رایگەیاند، كێشەی قەیرانی بەنزین لە چارەسەركردندایە و كاروانی تری بەنزین لە ماوەیەكی كەمدا دەگات بۆ دابینكردن و پڕكردنەوەی پێداویستی هاووڵاتیان.
دوای ئەوەی قەیرانی بەنزین بەغداد و پارێزگاکانی عیراقی هاوشێوەی هەرێم گرتەوە، باسم محەممەد خزێر وەزیری نەوتی عیراق رایگەیاند، بەرهەمە نەوتییەكانیان هەیە و وەزارەت بەردەوامە لە كاركردن بۆ دابینكردنی پێداویستی هاووڵاتییان.
وتیشی، كورتهێنانی كاتی بەنزین لە چارەسەكردندایە و كاروانی تری بەنزین بە زوویی دەگات بە بۆ سەقامگیریی دابینكردن و پڕكردنەوەی پێداویستییەكان.
دەشڵێت، تێكڕای بەكارهێنانی بەنزین رۆژانە دەگاتە نزیكەی 33 ملیۆن لیتر، بەڵام لە كاتی دروستبوونی قەیران و دڵەراوكێ بەرزدەبێتەوە بۆ نزیكەی 38 ملیۆن لیتر.
راشیگەیاند، لە ماوەی 100 رۆژی یەكەمی حكومەتدا، هەناردەی نەوتی خاو رۆژانە لە 250 هەزار بەرمیلەوە بۆ نزیكەی سێ ملیۆن لیتر بەرزبووەتەوە.
بە گومانی دزەپێکردنی زانیاری نهێنی لەسەر کەمبونەوەی چەکی ئەمریکا بۆ رۆژنامەنوسان، وەزارەتی بەرگریی ئەمریکا، 50 لێپرسراو و سەربازی خستوەتە ژێر تاقیکردنەوەی راستگۆییەوە.
رۆژنامەی نیویۆرک تایمز بە پشتبەستن بە سەرچاوە ئاگادارەکان بڵاویکردەوە، لێکۆڵەرانی حکومەتی ئەمریکا نزیکەی 50 ئەندامی ئەرکانی هاوبەشی هێزەکانی سوپای وڵاتەکەیان خستوەتە ژێر تاقیکردنەوەی ئامێری راستگۆییەوە.
رۆژنامەکە ئاماژەی بەوەکردوە، ئەم رێکارە بەهۆی لێکۆڵینەوە بووە لە دزەپێکردنی زانیاریی نهێنی بۆ رۆژنامەنوسان، کە بەشێکیان پەیوەندیدار بوون بە کەمبوونەوەی کۆگاکانی تەقەمەنیی ستراتیژی ئەمریکا لە میانی جەنگی ئێراندا.
بە گوێرەی زانیارییەکان، لە تاقیکردنەوەی راستگۆییەکەدا، پەرسیار لە ئەفسەرانی سەربازی و کارمەندانی مەدەنی کراوە کە ئایا زانیاریی نهێنییان، بەتایبەتی لەبارەی دابەزینی ئاستی موشەکی دورمەودا و موشەکەکانی سیستمی پاتریۆت، دراوە بە دەزگاکانی راگەیاندن یان نا.
ئەم پشکنینە بەرفراوانانە لە مانگی ئابدا و دوای بڵاوبوونەوەی زنجیرەیەک راپۆرت لەسەر کەمبونەوەی چەکی ستراتیژیی ئەمریکا ئەنجامدراون.
بەپێی راپۆرتەکەی نیویۆرک تایمز، ئەنجامدانی پرۆسەیەکی تاقیکردنەوەی ئامێری راستگۆیی لەم ئاستەدا و لەنێوان لێپرسراوانی باڵای سەربازییدا روداوێکی بێپێشینە بووە لە مێژووی پێنتاگۆندا.
سەرۆکی ئەمریکا جەنگی ئێرانی بە ململانێی سەربازی ناوبرد و رایگەیاند بۆ ئەوان هێندە گەورە نییە تا پێی بڵێن جەنگ، ئاماژەی بەوەشکرد رەنگە هێرش بکەنە سەر چیای قوڵنگیان.
دۆناڵد ترەمپ، سەرۆکی ئەمریکا رایگەیاند، لە ئێستادا شەڕ ناکەن و گەروی هورمز کۆنترۆڵ کراوە، چونکە هیچ مینێکی تێدا نییە.
سەرۆکی ئەمریکاوتی زۆر کەس ئەو رەوشەی ئێستا بە جەنگ ناو دەبەن، بەڵام لە راستیدا تەنها ململانێی سەربازییە و بۆ ئەمریکا هێندە گەورە نیە تا ناوی بنێن جەنگ.
دۆناڵد ترەمپ دەشڵێت؛ ئەمریکا لە ئۆپەراسیۆنەکەیدا لە ڤەنزوێلا هیچ سەربازێکی لەدەست نەدا، بەڵام لە ململانێ لەگەڵ ئێران 18 سەربازیان کوژراون.
لە بارەی رەوشی هورزیشەوە، ترەمپ جەختدەکاتەوە گەروەکە کۆنتڕۆڵکراوە و لە ئێستادا بڕێکی زۆر نەوت لە بە گەروەکەدا تێدەپەرێت.
مەزڵوم عەبدی فەرماندەی پێشووی هەسەدە پارێزگای حەسەكە و بنكەی هاوپەیمانان بەجێدەهێڵێت و دەچێتە دیمەشق و وەك راوێژكاری سەرۆكایەتی سوریا دەستبەكار دەبێت.
بەپێی سەرچاوەكان، لە چەند هەفتەی داهاتوودا و بە رەسمی دەچێتە دیمەشق و لە پۆستە نوێكەیدا وەك راوێژكاری سەرۆكایەتی سوریا بۆ كاروباری كورد دەستبەكاربێت.
سەرەڕای ئەوەی لە نوسراوەكەی سەرۆكایەتی سوریادا دەسەڵاتەكانی مەزڵوم عەبدی وەك راوێژكار بە وردی دەستنیشان نەكراون، بەڵام ئەركی سەرەكیی عەبدی بریتی دەبێت لە بەڕێوەبردنی دۆسێی كورد لە ناوخۆ و دەرەوەی سوریادا، لەوانەش چاودێریكردنی كارەكانی ئەو لێژنە دەستووری و یاساییانەی لە داهاتوودا بۆ دەستەبەركردنی مافەكانی كورد لەو وڵاتە پێكدەهێنرێن.
لە چوار ساڵی رابردوودا لەسەر ئەركی كۆمپانیای ئانزۆ 300 خوێندنگە لە سنووری سلێمانی و هەڵەبجە نۆژەنكراونەتەوە و بەڕێوەبەری كۆمپانیاكەش دەڵێت، هەڵمەتی نۆژەنكردنەوەی خوێندنگەكان بەردەوام دەبێت.
هاوڕێ دارۆ شێخ نوری بەڕێوەبەری كۆمپانیای ئانزۆ رایگەیاندووە، بە ئەركی سەر شانی خۆیانیان زانیووە ئەو خوێندگایانەی پێویستیان بە نۆژەنكردنەوە هەبووە لە سنووری سلێمانی و هەڵەبجە نۆژەنیان بكەنەوە.
دەشڵێت، تەنها بە نۆژەنكردنەوەی ئەو 300 خوێندنگەیەوە ناوەستن و خوێندنگەی زیاتر نۆژەن دەكەنەوە.
بەرێوەبەری ئانزۆ هەروەها سوپاسی ئەو لایەنانە دەكات كە لە هەڵمەتی نۆژەنكردنەوەی خوێندنگەكانی سنووری سلێمانی و هەڵەبجە هاوكاریان بوون.