ئێران هۆشدارییەکی توند ئاڕاستەی کۆریای باشور دەکات و ئاگاداری دەکاتەوە لەوەی خۆی بەدوور بگرێت لە بەشداریکردن لە ئۆپراسیۆنە سەربازییەکانی گەروی هورمز.

ئیسماعیل بەقائی، وتەبێژی وەزارەتی دەرەوەی ئێران لە پەیامێکدا رایگەیاند؛ هەر بەشداریکردنێک یان ئامادەیییەکی سەربازیی کۆریای باشور لە ئۆپراسیۆنەکانی کەنداو و گەروی هورمز، وەک پشتگیریکردن لە دەستدرێژییەکانی ئەمریکا هەژمار دەکرێت و بەشداری لەو جۆرە رێکارانەدا دەرئەنجامی زۆر مەترسیداری دەبێت.

وتەبێژی وەزارەتی دەرەوەی ئێران ئاماژەی بەوەشکرد، نابێت هیچ وڵاتێکی خاوەن سەروەری و بەرپرسیار خۆی رادەستی فشار و هەڕەشەکانی ئەمریکا بکات و ببێتە هاوبەش لە کردەوە دژایەتییەکان بەرانبەر گەلی ئێران.

ئەم هۆشدارییەی تاران لە کاتێکدایە کە سیئول لەژێر فشاری ئەمریکادا تاوتوێی بەشداریکردن دەکات لە هەوڵە نێودەوڵەتییەکان بۆ پاراستنی ئازادیی کەشتیرانی لە گەروی هورمز، بە جۆرێک لەنێو بژاردەکانیدا ناردنی فڕۆکەی دەوریەی دەریایی، کەشتیی پشتیوانی یان تیمی تایبەت بە رزگارکردن و هەڵگرتنەوەی مین دەبینرێتەوە.

موحسین رەزایی سکرتێری ئەنجومەنی باڵای ئاسایشی نیشتمانیی ئێران رایدەگەیەنێت، گەروی هورمز بە تەواوی داخراوە و بەمزووانەش ناوچەیەكی قەدەغەكراو لە دەرەوەی گەروەكە رادەگەیەنن.

موحسین رەزایی لە وەڵامی لێدوانەكانی ترەمپ سەبارەت بە كردنەوەی گەروی هورمز و هەناردەكرنی نەوت لەو رێڕەوە ئاوییەوە گرنگە وتی، ئەو دەنگۆیانە بەتەواوی دوورن لەراستییەوە.

راشیگەیاند، لەكاتێكدا پێشتر رۆژانە بە ملیاران دۆلار و ملیۆنان بەرمیل نەوت بە گەرووەكەدا تێدەپەڕی، ئێستا تەنها چەند كەشتییەكی كەمی پێدا تێدەپەڕن.

وتیشی، ئێران ناوچەیەكی قەدەغەكراو لە دەرەوەی گەروی هورمز رادەگەیەنێت و هەر كەشتییەك سەرپێچی بكات دەخریتە لیستی سزاكانەوە.

راشیگەیاند، لە 48 سەعاتی رابردوودا بۆ یەكەمجار ئێران موشەكێكی تایبەتی دژی كەشتییە جەنگییەكانی ئەمریكای تاقیكردووەتەوە.

دۆناڵد ترەمپ لە سەكۆی ئەلیكترۆنی تایبەت بەخۆی ئاماژەی بەوە كردووە، تێپەڕبونی نەوت لە گەروی هورمز گەیشتووەتە 18 ملیۆن بەرمیل لە رۆژێكدا، واتە نزیك ئاسایی بونەوەی خۆی بۆ پێش جەنگ، هاوكات جەختی كردەوە كە هەناردەی نەوتی تاران گەیشتووەتە سفر و بەهای دراوەكەشیان بەرەو داڕمان دەچێت.

کیم جۆنگ ئون، رابەری کۆریای باکور، لەگەڵ دەستپێکردنی مانۆڕێکی سەربازیی نوێی هاوپەیمانانی ئەمریکا، بەڵێنی دا هێزی دەریایی وڵاتەکەی بگۆڕێت بۆ هێزێکی چەکداری ئەتۆمی.

رابەری کۆریای باکور لە میانی رێوڕەسمی گەڕاندنەوەی کەشتیی جەنگیی "کانگ گون" بۆ ناو خزمەت لە شارۆچکەی وۆنسان —کە پێشتر لە ئایاری 2025دا لە کاتی خستنەئاویدا بەشێکی ژێرئاو کەوتبوو— رایگەیاند: دەبێت کارایی جۆراوجۆر و کاریگەری سیستمە جەنگییە ئەتۆمییەکان بۆ ئامادەکاریی جەنگی راستەقینە مسۆگەر بکەین.

ئاماژەی بەوەش کرد: لە کاتی دەرچوونی فەرماندا، دەبێت ئەم وێرانکەرە نوێیە زەبرێکی تۆڵەسێنەرانەی کوشندە ئاڕاستەی دوژمنان بکات.

ئەم لێدوانانە هاوکات بوون لەگەڵ دەستپێکردنی مانۆڕی سەربازیی "فریدم ئایدج" لە نێوان ئەمریکا، ژاپۆن و کۆریای باشور لە ئاوە نێودەوڵەتییەکانی باشور و رۆژهەڵاتی دوورگەی جیجۆ.

مانۆڕەکە سەرەڕای بڕیارەکەی دۆناڵد ترەمپ بۆ کەمکردنەوەی بەشێک لە راهێنانە سەربازییەکان بە مەبەستی کردنەوەی دەرگای دیپلۆماسی لەگەڵ پیۆنگیانگ، بەردەوامە.

لە رێوڕەسمەکەدا "جو ئایی"ی کچی کیم جۆنگ ئون، کە زۆرجار وەک جێگرەوەی داھاتووی دەستنیشان دەکرێت، لە پەنای باوکیدا دەرکەوت.

بە سێ درۆن هێرشکرایە سەر کەمپی پەنابەران لە سورداش و دەزگای ئاسایشی هەرێمیش دەڵێت؛ لە هێرشەکەدا هیچ زیانێکی گیانی نەبووە.

دەزگای ئاسایشی هەرێم لە راگەیەنراوێکدا بڵاویکردەوە، سەعات 04:45 بۆ05:05 خولەکی بەیانی ئەمڕۆ دووشەممە بە سێ درۆن هێرشکرایە سەر کەمپی پەنابەران لە سورداش.

دەزگای ئاسایشی هەرێم ئاماژەی بەوەشکرد، لە دەرئەنجامی هێرشەکاندا هیچ زیانێکی گیانی نەبووە.

وەزیری وزەی ئەمریکا رایدەگەیەنێت، پێناچێت لە ئایندەیەکی نزیکدا رێککەوتنی ئەتۆمی لەگەڵ ئێراندا ئیمزابکرێت و رەنگە تا هاتنی دەسەڵاتێکی نوێ لە تاران دوا بکەوێت.

کریس رایت، وەزیری وزەی ئەمریکا لە چاوپێکەوتنێکدا رایگەیاند، رەنگە بەهیچ جۆرێک رێککەوتنی ئەتۆمی ئێران رونەدات، بەڵکو تەنها پرۆسەکە کورتببێتەوە بۆ تێکشکاندنی تواناکانی ئێران لە پەرەپێدانی چەکی ئەتۆمی.

وتیشی، لەوانەیە ناچار بن چاوەڕێی ئیدارەیەکی نوێی ئێران بن بۆ ئیمزاکردنی رێککەوتن، هێزەکانیشیان لە ئامادەباشی تەواودان بۆ رووبەڕووبوونەوەی ئەو هەڕەشانە و زامنکردنی ئاسایشی کەشتییە بازرگانییەکان لە گەروی هورمز.

وەزیری وزەی ئەمریکا ئاماژەی بەوەشکرد، ئاڵۆزییەکانی ئەم دواییەیان لەگەڵ ئێران تەنها پێکدادان و رووبەڕووبوونەوە بووە، نەک جەنگ.

بڕیارە سبەینێ، دووەمین كاروانی ئاوارەكانی سەرێكانی كە لە 725 خێزان پێكدێن، لە كەمپەكانەوە بەرەو گوند و ناوچە رەسەنەكانی خۆیان لە رۆژهەڵاتی شارەكە و تەل تەمەر و زرگان بگەڕێنرێنەوە.

لیژنەی ئاوارەكانی سەرێكانی لە راگەیانراوێكدا ئاشكرایكردووە، ئەم خێزانانە لە كەمپی تەڵایەعەوە بەرەو زێدی خۆیان بەڕێدەكەون.

ئەم هەنگاوە لە چوارچێوەی هەوڵەكانە بۆ كۆتاییهێنان بە مەینەتیی چەندین ساڵەی ئاوارەكان و گەڕاندنەوەیان بۆ سەر ماڵ و حاڵی خۆیان.

پڕۆسەی گەڕانەوەكە بە هەماهەنگیی لایەنە پەیوەندیدارەكان ئەنجام دەدرێت تا گەشتێكی ئارام بۆ هاووڵاتییان مسۆگەر بكرێت.

یەكەمین كاروانی ئاوارەكان لە 10ـی مانگی رابردوودا بەڕێكەوت كە نزیكەی 400 خێزانی لەخۆگرتبوو، ئێستاش پڕۆسەكە بۆ گەڕاندنەوەی سەرجەم ئاوارەكان بۆ ناوچەكانیان بەردەوامە.

دۆناڵد ترەمپ، سەرۆکی ئەمریکا پێشنیازی کردووە، ناوی ویلایەتی نیو مەکسیکۆ بگۆڕدرێت بۆ نیو ئەمریکا، بەڵام پارێزگاری ویلایەتەکە دەستبەجێ پێشنیازەکەی رەتکردەوە.

پێشنیارەکەی ترەمپ دوای چەند رۆژێک دێت لە ئیمزاکردنی مەرسومێکی کۆشکی سپی بۆ گۆڕینی ناوی دەریاچەی ئۆنتاریۆ بۆ دەریاچەی ئەمریکا لە ئاکامی ئاڵۆزبوونی جەنگی بازرگانی نێوان وڵاتەکەی و کەنەدا.

سەرۆکی ئەمریکا لە تۆڕە کۆمەڵایەتییەکان نووسیویەتی: "زۆر کەس پێشنیازی گۆڕینی ناوی نیو مەکسیکۆیان کردووە بۆ نیو ئەمریکا"، ئاماژەی بەوەش کردووە، "ئەمە ناوێکی شایستەتر و جوانترە بۆ دانیشتووانی ئەو ویلایەتەی کە توانایەکی بێپایانی هەیە و من ئاشقی ئەو ناوەم"، هاوکات کۆشکی سپیش وێنەیەکی بڵاوکردەوە کە تێیدا وشەی مەکسیکۆ لەسەر ناوی ویلایەتەکە سڕدراوەتەوە و وشەی ئەمریکا لە جێگەیدا دانراوە.

لای خۆشییەوە، پارێزگاری ویلایەتی نیو مەکسیکۆ رایگەیاند؛ بابەتەکە بە هیچ جۆرێک قابیلی گفتوگۆ نییە و ئەو ناوە پێش دامەزراندنی ئەمریکاش ناوی ناوچەکەیان بووە، ئاماژەی بەوەشکرد، ترەمپ دەیەوێت بەم بابەتانە سەرنجی ئەمریکییەکان لەسەر کێشە سەرەکییەکان بەتایبەت بەرزبوونەوەی نرخی سوتەمەنی لابدات.

میدیاکانی ئەمریکا ئاشکرایان کردووە، بیرۆکەکە لە بنەڕەتدا وەک گاڵتەیەک لە تۆڕە کۆمەڵایەتییەکان سەریهەڵداوە، ئەمەش لە کاتێکدایە ترەمپ لە یەکەم رۆژی دەستبەکاربوونی لە ساڵی 2025 ناوی کەنداوی مەکسیکۆی گۆڕی بۆ کەنداوی ئەمریکا، رووبەڕووی رەتکردنەوەی توندی مەکسیکۆ بووەوە، هەروەک هەفتەی رابردووش پێشنیازی گۆڕینی ناوی گەروی هورمزی کرد بۆ گەرووی ترامپ بەڵام دواتر رایگەیاند کە پێشنیازەکەی جددی نەبووە.

رۆژنامەی ئۆرشەلیم پۆست لە راپۆرتێکدا بەپشتبەستن بە هەڵسەنگاندنە ئەمنییەکانی ئیسرائیل بڵاویکردەوە،  ئێران لە هەوڵی ئەوەدایە هێرشێکی بەرفراوان  هاوئاهەنگ لە چەندین بەرەی جیاوازەوە دژی ئیسرائیل ئەنجام بدات.

رۆژنامەکە ئاماژەی بەوەکردوە، ئێران دەیەوێت هێرشەکە هاوشێوەی روداوەکانی 7ی ئۆکتۆبەر بێت، بەڵام بە بەشداری راستەوخۆی سەرجەم لایەنە نزیکەکانی ئێران.

بەپێی زانیارییەکان، تاران کار بۆ ئەوە دەکات هێزەکانی خۆی لەگەڵ حزبوڵای لبنانی، حەماس، حوسییەکانی یەمەن و گروپە چەکدارەکانی عیراق لە چوارچێوەی یەک هەڵمەتی سەربازیی هاوبەشدا کۆبکاتەوە.

لە کاتێکدا لە هێرشەکەی 7ی ئۆکتۆبەری حەماسدا میحوەرەکانی تر بە تەواوی لە یەک کاتدا بەشدار نەبوون، بەڵام بەڵگەنامە دۆزراوەکانی دەستی ئیسرائیل لە غەززە ئاشکرایان کردووە،  یەحیا سنوار لە مێژبووە هەوڵی یەکخستنی ئەندامانی میحوەرەکەی داوە.

راپۆرتەکەی ئۆرشەلیم پۆست جەخت لەوە دەکاتەوە، کە ئێستاش ئێران بەجددی خەریکی رێکخستنی  پەیوەندییەکان و ئامادەکارییە بۆ روبەڕوبونەوەیەکی سەربازیی گشتگیر دژی ئیسرائیل.

عەبدولحسێن موسەوی، وەزیری تەندروستیی عیراق رایگەیاند، لە  شەش مانگی داهاتودا 10 نەخۆشخانەی نوێ لە بەغدای پایتەخت و پارێزگاکانی تر دروست دەکرێن و خزمەتگوزاری پێشکەش دەکەن.

ئەمڕۆ یەکشەممە، وەزیری تەندروستی عیراق رایگەیاند، بە پاڵپشتی و بەدواداچونی راستەوخۆی عەلی زەیدی، سەرۆکی ئەنجومەنی وەزیران، هەوڵی تەواو دەدەن کەرتی تەندروستی بەرەوباشتر ببەن

ئاماژەی بەوەشکردوە بۆ ئەو مەبەستە،  هەوڵی تەواویان داوە لە شەش مانگی داهاتوودا 10 نەخۆشخانەی نوێ دروستبکەن و تەواویش بکرێت، تا خزمەتگوزاری زیاتر پێشکەشی هاووڵاتیان بکەن.

لەباری نەخۆشخانە نوێیەکانیشەوە، وەزیری تەندروستی دەڵێت؛ توانای وەرگرتنی نەخۆشیان جیاوازە، لە 100 بۆ 490 قەرەوێڵە دەبن.

جەختیشیکردوەتەوە، بە تەواوبونی نەخۆشخانەکان، کەرتی تەندروستی هەنگاوێکی بەهێز دەنێت  بۆ باشترکردنی ئاستی خزمەتگوزارییە پزیشکییەکان.

لیژنەی سوتەمەنی قائیمقامیەتی قەزای مەڵبەندی هەڵەبجە بڕیارێکی نوێی سەبارەت بە دابەشکردنی بەنزینی پاڵپشتیکراوی 750 دیناری دەرکرد و هۆشداریش دەداتە شۆفێران  نابێت ئۆتۆمبێلەکانیان جێبهێڵن ئەگەرنا دەستبەسەر ئۆتۆمبێلەکانیاندا دەگیرێت.

لیژنەی سوتەمەنی قائیمقامیەتی قەزای مەڵبەندی هەڵەبجە رایگەیاندوە، رۆژانە لە سەعات حەوتی بەیانییەوە بەنزینی پاڵپشتیکراوی 750 دیناری لە هەردوو بەنزینخانەی (سان) و (سەرکۆ) دابەش دەکرت و تا تەواوبونی بڕی دیاریکراو بەردەوام دەبێت.

بەپێی خشتەی راگەیەندراو، بڕی دیاریکراو بۆ ئۆتۆمبێلەکانی جۆری (پیک ئەپ، تەکسی و پاس) 50 لیتر دەبێت و ئۆتۆمبێلی تایبەتیش 40 لیتر.

شۆفێرانیش ئاگاداردەکاتەوە،  بۆ وەرگرتنی بەنزین مەرجەکارتی زانیارییان پێبێت و دانیشتوی پارێزگای هەڵەبجە بن، چونکە لە ئێستادا بەنزین بۆ سەرجەم شارەکانی دیکەش دابین کراوە.

هاوکات جەخت لەوە کراوەتەوە کە خانمانی شۆفێر دەبێت خاوەنی مۆڵەتی شۆفێری بن و بە هیچ شێوەیەک رێگە نادەرێت لە یەک جار زیاتر بەنزین وەربگرن.

 لە کۆتاییشدا لیژنەکە هۆشداری دەدات، کە لە دوای تەواوبوونی بڕی بەنزینەکە، نابێت هیچ ئۆتۆمبێلێک لە بەرانبەر بەنزینخانەکاندا نۆرە بگرێت، بە پێچەوانەوە سەرپێچیکاران روبەڕوی دەستبەسەرداگرتنی ئۆتۆمبێلەکانیان و سزای پێبژاردن دەبنەوە.

بەپێی ئامارێکی بەڕێوەبەرایەتی گشتی تەندروستیی سلێمانی، لە  رۆژی (1 بۆ 31ـی ئابی 2026)، زیاتر لە 13 هەزار منداڵ لە بەشی راوێژکاری و دەوامی بەیانیانی نەخۆشخانەی د. جەمال ئەحمەد رەشیدی منداڵانی فێرکاری بینراون و چارەسەری پێویستیان بۆ کراوە.

تەندروستیی سلێمانی بڵاویکردوەتەوە، مانگی رابردوو 133 هەزار و 55 منداڵ چارەسەریان لە د. جەمال ئەحمەدی تایبەت بە منداڵان وەرگرتوە و دوو هەزار  و118 منداڵیش خەوێندراون.

هاوکات لە هەمان ماوەدا، 11 هەزار و 593 پشکنینی تاقیگەیی جۆراوجۆر، 863 تیشک، 572 سۆنەر و 174 ئیکۆ بۆ نەخۆشەکان ئەنجام دراون.

 

ئاماژەی بەوەشکردوە، هەر لەو مانگەدا ئەم ژمارانەش تۆمارکراون

 821 حاڵەتی سکچون و رشانەوە و وشکبوونەوە تۆمارکراوە

 235 حاڵەتی هەناسەتوندی

 357 منداڵ لە بەشی تیشک و دەمار

 405 منداڵ لە بەشی گەشەکردن

 169 منداڵ لە بەشی بەدخۆراکی

 185 منداڵ لە بەشی راهێنانەوەی چارەسەری خۆراک

بنیامین ناتانیاهۆ، سەرۆک وەزیرانی ئیسرائیل رایگەیاند، وڵاتەکەی لە هەموو کاتێک بەهێزترە و دوژمنەکانیش لە هەموو کاتێک لاوازترن، جەختیش دەکاتەوە کەوتنی دەسەڵاتی ئێران نزیکە.

سەرۆک وەزیرانی ئیسرائیل رایگەیاند، ئیسرائیل لەگەڵ ئەمریکا دەستکەوتی بەرچاویان لە نەهێشتنی هەڕەشە جدییەکان بەدەستهێناوە و توانیویانە بە تەواوەتی دەسەڵاتی ئێران لاواز بکەن.

ناتانیاهۆ ئاماژەی بەوەکردوە، مەترسی بۆمبی ئەتۆمی و موشەکی بالیستیکیان لەناوبردووە و بە هێزێکی زۆرەوە  ئێرانیان کردوەتە ئامانج.

لە بارەی ئەگەری هێرشی ئێرانیشەوە، دەڵێت؛ ئەو دەسەڵاتە نزیکە لە کۆتایی و هێرش ناکەنە سەر وڵاتەکەیان، چونکە دەزانێت ئەگەر هێرش بکەن خراپیان بەسەر دێت و بە  هێزتر لێیان دەدەنەوە.

نزار ئامێدی سەرۆک کۆماری عیراق، ئەمڕۆ یەکشەممە 6ـی 9ـی 2026، لە کۆشکی سەلام لە بەغداد، پێشوازی لە فەریق روکن عومەر ساڵح فەرماندەی هێزەکانی 70ـی پێشمەرگە کرد.

بەپێی راگەیەندراوێکی نووسینگەی راگەیاندنی سەرۆکایەتی کۆمار، لە دیدارەکەدا باس لە چەند پرس و پێشهاتی ئەمنیی کراوە، سەرۆک کۆمار جەختی لە گرنگیی بەردەوامبوونی هەماهەنگی نێوان پێکهاتە و هێزە جیاوازەکان کردەوە، بە شێوەیەک کە ببێتە هۆی بەهێزکردنی پاراستنی هاووڵاتیان و پاراستنی سەقامگیری.

سەرۆک کۆمار ئاماژەی بە پێویستیی پەرەپێدانی تواناکانی هێزی پێشمەرگە و بەرزکردنەوەی ئاستی ئامادەییان کرد و ستایشی رۆڵی ئەو هێزەی کرد لە ئەنجامدانی ئەرکە نیشتمانییەکانیاندا.

لای خۆیەوە، فەریق روکن عومەر ساڵح، گرنگترین ئەرک و بارودۆخی هێزەکانی 70ـی خستەڕوو، جەختی لە بەردەوامیی کارکردن و هەماهەنگی کردەوە بە جۆرێک کە خزمەت بە ئاسایش و سەقامگیری بکات.

بەبۆنەی کۆچی دوایی، عەبدولواحید ئیبراهیم شێخ عەبدولسەلام بارزانی، قوباد تاڵەبانی پەیامێکی هاوخەمی ئاڕاستەی مەسعود بارزانی، سەرۆکی پارتی دیموکراتی کوردستان کرد ، ئاماژەی بەوەکردوە دڵگرانە و  خۆی بە هاوبەشی خەمیان دەزانێت.

لە پەیامێکیدا بەبۆنەی کۆچی دوایی عەبدولواحید ئیبراهیم شێخ عەبدولسەلام بارزانی، قوباد تاڵەبانی جێگری سەرۆکی حکومەتی هەرێم نوسیویەتی؛" زۆر دڵگران و غەمبار بووین بە بیستنی هەواڵی کۆچی دوایی کەسایەتیی دیاری بنەماڵەکەتان".

لە پەیامەکەی قوباد تاڵەبانیدا هاتووە؛ " لە دڵەوە پرسە و سەرەخۆشی خۆمان ئاراستەی بەڕێزتان  و بنەماڵەکەتان دەکەین و خۆمان بە هاوبەشی خەمتان دەزانین".

لە کۆتایی پەیامەکەشدا، نویسیویەتی؛ "دواکارین خوای گەورە روحی کۆچکردوو بە بەهەشتی بەرین شاد بکات و ئارامی و سەبووری و سەلامەتی بە ئێوە و هەموو لایەک ببەخشێت".

وەزارەتی کارەبای هەرێم داتای پسولەی مانگی حەوتی پڕۆژەی روناکی بڵاوکردەوە و رایگەیاند،  نیوەی ماڵان لە سەرانسەری هەرێمدا کەمتر لە 29,000 دیناریان بۆ هاتوەتەوە.

وەزارەتی کارەبا راشیگەیاندوە، بەپێی پارێزگاکانیش، نزمترین بڕ لە هەڵەبجە (26,000 دینار) و بەرزترین لە هەولێر (31,000 دینار) تۆمارکراوە.

 ئاماژەی بەوەکرد، لەم خولەی پسوولەکردندا، کە ماوەکەی نزیکەی 33 رۆژ بووە کێشەی پسوولەی سفری هەندێک لە هاوبەشان چارەسەرکراوە.

وەزارەتەکە ئاماژەی بەوەش کردووە کە تاوەکو ئێستا زیاتر لە 90٪ی هاوڵاتیانی کوردستان کارەبای 24 کاتژمێرییان بۆ دابینکراوە و بەپێی نرخە نوێیەکان، 80٪ی هاوڵاتیان پارەیەکی کەمتر دەدەن بە بەراورد لەگەڵ تێچووی پێشووی مۆلیدە و کارەبای نیشتمانی.

لە ئاگادارینامەیەکدا، کە ئاڕاستەی سەرتاشەکانی سنورەکەی کردوە، قائیمقامیەتی دەربەندیخان دەڵێت؛ لەسەر داوای زۆرینەی سەرتاشەکان کاتی کارکردنیان بۆ دیاریکرا و هەرکەسێکیش پابەند نەبێت سزا دەدرێت.

ئەمڕۆ یەکشەممە، هاوشێوەی سلێمانی قائیمقامیەتی دەربەندیخان رایگەیاند، دوای بەدواداچوون بۆ داواکاریەکەیان، بەبڕیاری قائیمقامی قەزای دەربەندیخان، لە ئەمڕۆوە کاتی کارکردن لە هەشتی بەیانی تا دوای نوێژی عیشا (شەوان) دەبێت و رۆژانی هەینیش دەکرێتە پشوو.

ئاماژەی بەوەشکردوە، لە ئەمڕۆ و سەرتاشەکان ئاگادار کراونەتەوە، هەر سەرتاشخانەیەک بڕیارەکە جێ بەجێ نەکات روبەڕوی داخستن و سزای پێبژاردن دەبێتەوە و ئەم بڕیارەش لەسەر خواستی زۆرینەی سەرتاشەکان خۆیان بووە.