هەواڵەکان
قوباد تاڵەبانی، جێگری سەرۆک وەزیرانی هەرێم رایدەگەیەنێت، گەنجانی هەڵەبجە بە خەونی گەورەوە پێگەیشتوون و هیچ پێشکەوتنێک بەبێ ئەوان بەدی نایەت.
قوباد تاڵەبانی، جێگری سەرۆک وەزیرانی هەرێم لە هەژماری تایبەتی خۆی لە فەیسبوک بڵاویکردەوە، گەنجان نەک هیوای داهاتوو، بەڵکوو وزە و هێزی سەرەکین لە نەخشاندنی ئێستادا، لە هەڵەبجەش وەک هەموو ناوچەکانی تر نەوەیەک لە گەنجان بە خەونی گەورە و بیرۆکەی مەزنەوە پێگەیشتوون و هیچ پێشکەوتن و گەشەسەندنێک بەبێ بەشداری ئەوان بەدی نایەت.
ئاماژەی بەوەشکرد، "خۆشحاڵ بووم بە دیدارم لەگەڵ رێکخەرانی تێد ئێکس ئاشتی (TEDx Ashti) و گفتوگۆمان لەبارەی چۆنییەتی پشتگیریکردنی ئەو دەستپێشخەرییانەی کە هانی داهێنان، کارسازی و کۆمەڵگەیەکی مەدەنی بەهێز و گەشەسەندوو دەدەن".
وتیشی: خەون و بیرۆکەکانی ئەم گەنجانە هاوتەریبە لەگەڵ ستراتیژی گەشەپێدانی ناوچەیی، دڵنیاین هەڵەبجە لەسەر دەستی ئەم گەنجانە داهاتوویەکی گەشەدارتر و پێگەیەکی شیاوتری دەبێت.
خاتوو شاناز ئیبراهیم ئەحمەد، پەیامێکی هاوخەمی بۆ کۆچی دوایی رۆژنامەنووس هەڵکەوت عەزیز بڵاوکردەوە.
دەقی پەیامەکە
بەبیستنی هەواڵی ماڵئاوایی یەکجارەکی کاک (هەڵکەوت عەزیز)، زۆر غەمباربووم.
کۆچکردوو ڕۆژنامەنووسێکی دڵسۆز و ڕاستگۆ بوو کە بەوپەڕی پەرۆشییەوە خزمەتی پرسە گرنگەکانی کورد و کەیسە نیشتمانییەکانی دەکرد.
ئەم کۆچە خەمێکی قوڵی بۆ ئێمە و ئازیزانی و هەموو راگەیاندنکارانی کایەی میدیایی هەرێمی کوردستان جێهێشت، پرسەو سەرەخۆشی لەهاوپیشەکانی و خێزانی میدیایی ڕووداو و کەسوکارەکەی ئەکەم و هاوبەشی خەم و پەژارەیانم.
خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
عەبدوڵا ئۆجەلان لەبارەی كۆنفرانسی شارەدارییەكانی دەمپارتی لە ئامەد رایگەیاند: چارەسەری كێشەی كورد، دیموكراسیی هەرێمی و دەستوری نوێیە.
عەبدوڵا ئۆجەلان رێبەری پەكەكە لە پەیامێكدا بۆ كۆنفرانسی شارەدارییەكانی دەمپارتی لە ئامەد رایگەیاند، سیستمی ناوەندگەرای دەوڵەت-نەتەوە سەرچاوەی سەرەكیی قەیرانەكانە، بە وتەی ئەو چارەسەری ئەو ژەهرە كە مەبەستی قەیرانەكەیە، تەنیا بەهێزكردنی دیموكراسیی هەرێمی و پەرەپێدانی سیاسەتی دیموكراتیكە.
ئۆجەلان ئاماژەی بەوە كردووە كە "دیموكراسیی هەرێمی و دەستووری دیموكراتیك" كلیل و بنەمای سەرەكیی پڕۆسەی ئاشتی و چارەسەری ئاشتییانەی پرسی كوردە، سەپاندنی سیستەمی قەیومەكانیش ڕەنگدانەوەی نەبوونی ئەم دیموكراسییەیە لە توركیادا.
ڕێبەری پەكەكە داوای كردووە كە پێویستە شارەدارییەكان لە چەمكی "مایكرۆ-دەوڵەت" واتە دەوڵەتی بچوك دووربكەونەوە و بە هاوبەشی بە زمانی كوردی خزمەت بە گەل بكەن. لەكۆتاییدا جەختی كردووەتەوە كە دەبێت ئەنجومەنی شارەكان بۆ بەشداریپێكردنی راستەوخۆی خەڵك دروست بكرێن و گرنگیی تەواو بە خەباتی ژنان، گەنجان، زمان، پەروەردە و ژینگە بدرێت بۆ تێپەڕاندنی قەیرانەكان.
قوباد تاڵەبانی، جێگری سەرۆکی ئەنجومەنی وەزیرانی هەرێم، پەیامێکی هاوخەمی بۆ کۆچی دوایی رۆژنامەنووس هەڵکەوت عەزیز بڵاوکردەوە و تێیداهاتووە: لەم ساڵانەدا کاک هەڵکەوت وەک پەیامنێرێکی ئازا و دڵسۆز هەوڵی دەدا راستگۆیانە هەموو زانیارییەکانمان لە بەغداوە بۆ بگوازێتەوە، هەربۆیە جێی خۆی لە دڵی هەموو لایەکدا کردبووەوە و ئێستا هەمووان بۆ مەرگی ئەم ئازیزە تاسەبارن.
دەقی پەیامەکە
هەواڵی کۆچی دوایی رۆژنامەنووسی بە توانا کاک هەڵکەوت عەزیز غەمبار و دڵگرانی کردین. لە قوڵایی دڵەوە پرسە و سەرەخۆشی لە خانەوادە و کەسوکارە خۆشەویستەکەی و هاوکارەکانی لە تۆڕی میدیایی رووداو و هەموو هاوپیشەکانی دەکەم.
لەم ساڵانەدا کاک هەڵکەوت وەک پەیامنێرێکی ئازا و دڵسۆز هەوڵی دەدا راستگۆیانە هەموو زانیارییەکانمان لە بەغداوە بۆ بگوازێتەوە، هەربۆیە جێی خۆی لە دڵی هەموو لایەکدا کردبووەوە و ئێستا هەمووان بۆ مەرگی ئەم ئازیزە تاسەبارن.
لە خودای گەورە داواکارین روحی کاک هەڵکەوت بە بەهەشتی بەرین شاد بکات و ئارامی و سەبووری بە هەموو لایەک ببەخشێت.
بافڵ جەلال تاڵەبانی، سەرۆكی یەكێتیی نیشتمانیی كوردستان، بۆ کۆچی دوایی رۆژنامەنووس هەڵکەوت عەزیز، لە پەیامێکدا پرسە و سەرەخۆشی ئاڕاستەی بنەماڵە و هاوڕێ و هاوکارانی رۆژنامەنووس هەڵکەوت عەزیز دەکات.
دەقی پەیامەکە
بەڕێزان/ بنەماڵە و هاوڕێ و هاوکارانی رۆژنامەنووس کاک هەڵکەوت عەزیز
بە داخ و خەمێكی زۆرەوە، هەواڵی كۆچی دوایی رۆژنامەنووسی بەڕێز کاک هەڵکەوت عەزیزمان پێگەیشت.
بۆ ئەم خەمە پرسە و سەرەخۆشی ئاڕاستەی بنەماڵە و هاوڕێ و هاوکارانی کاک هەڵکەوت لە تۆڕی میدیایی رووداو دەکەین و هاوبەشی خەمیانین.
لە خوای گەورە داواكارین، گیانی كۆچكردوو بە بەهەشتی بەرین شادبكات، ئارامی و سەبووری بە هەموو لایەک ببەخشێت.
بافڵ جەلال تاڵەبانی
سەرۆكی یەكێتیی نیشتمانیی كوردستان
عەلی زەیدی فشار دەخاتە سەر گروپە چەكدارەكانی عیراق بۆ رێگریكردن لە تێوەگلانیان لە گرژییەكانی نێوان ئێران و ئیسرائیل.
سەرچاوەیەك لە حكومەتی عیراق رایگەیاند، عەلی زەیدی سەرۆك وەزیرانی عیراق، لەگەڵ تیمی تایبەتی خۆیدا، جووڵەیەكی چڕوپڕی دەستپێكردووە بە ئامانجی رێگریكردن لە گروپە چەكدارەكانی عیراق لە تێوەگلان لە گرژییە سەربازییەكانی ئەم دواییەی نێوان ئێران و ئیسرائیل.
سەرچاوەكە ئاماژەی بەوەشكردووە، پەیوەندی و فشارەكانی حكومەت لە ئێوارەی دوێنێوە دەستیان پێكردووە و تا ئێستاش بەردەوامن، وتیشی ئەو فشارانە ئاراستەی سەركردەكانی گروپە چەكدارە سەرەكییەكان كراون، هەموو ئەو گروپانەش دەگرێتەوە كە لەژێر ناوی جیاوازدا كار دەكەن.
ئەو سەرچاوەیە راشیگەیاند، سەرۆك وەزیران لە پەیوەندییەكانیدا بۆ ئەو گروپانە جەختی لەوە كردووەتەوە، پێویستە هیچ جووڵەیەكی سەربازی یان ئەمنی نەكرێت كە عیراق بكاتە ناو بازنەی ململانێ هەرێمییەكان.
سەرچاوەكان ئاماژەیان بەوەشكردووە، فشارەكانی حكومەت گەیشتوونەتە ئاستی هەڕەشەكردن بە گرتنەبەری رێكاری یاسایی و ئەمنی توند بەرامبەر بە هەر لایەنێكی چەكدار كە دەست بداتە ئەنجامدانی ئۆپراسیۆن یان جوڵەیەك كە ببێتە هۆی فراوانبوونی مەودای جەنگەكە یان بەكارهێنانی خاكی عیراق لە ململانێكاندا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە یان برێم، کونسوڵی فەرەنسا لە هەرێمی کوردستان کرد.
لە کۆبوونەوەکەدا گفتوگۆ لەسەر گۆڕانکارییە ناوخۆیی و ناوچەییەکان کرا و پێویستی بەردەوامیی لێکتێگەیشتنی نێوان لایەنەکان جەختی لەسەر کرایەوە.
سەرۆک بافڵ سەرنجی خۆی لەسەر دوایین پێشهاتەکان خستەڕوو و وتی، هەموو هەوڵی یەکێتی بۆ دوورخستنەوەی وڵاتە لە گرژییەکان و دەمانەوێت سەقامگیریی عیراق پارێزراوبێت.
250 کەس لە فەرمانگەکانی سنوری هەڵەبجە دادەمەزرێن و پڕۆسەکە 32 پسپۆڕیی جیاواز دەگرێتەوە.
فەرمانگەی میدیا و زانیاری حکومەتی هەرێمی کوردستان رایگەیاندووە: ئەنجومەنی راژەی گشتی، بە مەبەستی دامەزراندنی 250 کەس بە شێوەی گرێبەست لە فەرمانگەکانی سنووری پارێزگای هەڵەبجە، لینکی فۆرمی داواکاری بڵاوکردەوە، پڕۆسەکە 32 پسپۆڕیی جیاواز دەگرێتەوە و لە 10ی حوزەیرانەوە بۆ ماوەی دوو هەفتە بەردەوام دەبێت.
فەرمانگەی میدیا و زانیاری دەشڵێت: دوابەدواى رەزامەندىی سەرۆکایەتى ئەنجومەنى وەزیران بە نوسراویان ژمارە (12340) لە رێکەوتى 6/10/2025 و دیاریکردنى بوارى پسپۆریی پێویست لەلایەن پارێزگاى هەڵەبجە بە نوسراویان ژمارە (1/804) لە 30/3/2026 بۆ دامەزراندنى (250) کەس لە (32) پسپۆریی جیاواز لەسەر میلاکى گرێبەستى فەرمانگەکانى حکومەتى هەرێم لە سنورى پارێزگاى ناوبراو، ئەنجومەنى راژەى گشتى لینکى فەرمى بۆ پڕکردنەوەى فۆرمى داواکارى دامەزراندن بڵاو دەکاتەوە.
فەرمانگەی میدیا و زانیاری چەند تێبینییەکی راگەیاندووە کە ئەمانەن؛
پڕکردنەوەى فۆرمى داواکارىی دامەزراندن لە لایەن پێشکەشکار تەنیا یەک جار و بۆ تەنیا یەک پسپۆرى دەبێت و هەر پێشکەشکارێک زیاتر لە یەک فۆرمى داواکارى رەوانە بکات، لە پێشبڕکێی دامەزراندن دوور دەخرێتەوە و داواکارییەکەى بۆ هیچ پسپۆرییەک وەرناگیرێت.
پێویستە پێشکەشکار راستى و دروستى زانیارییەکانى هاتوو لە ناوەرۆکى فۆرمەکەى بۆ هەر بڕگەیەک بە وێنەیەکى بەڵگەنامەى رەسەن پشتڕاست بکاتەوە، بە پێچەوانە خاڵى ئەو بڕگەیەى بە بێ بوونى بەڵگە پڕ کراوەتەوە هەژمار ناکرێت.
پێویستە کۆى بەڵگەنامەکان پێکەوە لەناو تەنیا یەک فایلى (pdf) یەک بخرێت و قەبارەى فایلەکە لە (100) مێگابایت تێپەڕ نەکات.
پێویستە پێشکەشکار پێش ئەوەى کرتە لەسەر لینکى ناردنى کۆتایى فۆرمەکەى بکات، بەوردى پێداچوونەوە بە زانیارییەکان و بوونى بەڵگەکانى پێویست بکات.
فۆرمى دواکارى دواى ناردنى لە لایەن پێشکەشکار راستەوخۆ دەچێتە نێو کێبڕکێى دامەزراندن و هیچ بەڵگەنامە یان زانیارىی زیاتر لە پێشکەشکار وەرناگیرێت.
لینکی فۆڕمەکە
بارەگای ناوەندیی خاتەمولئەنبیا رایگەیاند دوای دەستدرێژییەکانی ئیسرائیل لە باشوری لوبنان و ناوچەکانی دەحیە، کە بە پشتیوانی ئەمریکا ئەنجامدرا، هێزەکانیان وەڵامێکی بەهێز و بە ئازاریان داوەتەوە.
بارەگای خاتەمولئەنبیا ئاماژەی بەوەکردوە، هێرشەکانیان بەهێز وکاریگەر بووە و دەبێت ئیسرائیل و لایەنگرانی پەند وەرگرن.
هەروەها دەڵێت؛ راگرتنی هێرشيکانمان رادەگەیەنین، بەڵام جەخت لەوەدەکەنەوە ئەگەر ئیسرائیل هاوشێوەی رابردوو هێرشبکاتە سەر باشوری لوبنان رێوشوێنی توندتر دەگرینەبەر.
ئەمە لە کاتێکدایە، لە دوای ئۆپراسیۆنەکانی ئیسرائیل لە باشوری لوبنان، سوپای پاسداران وەک وەڵامێک بۆ شکاندنی ئاگربەستەکە هێرشی موشەکی کردە سەر ئیسرائیل و لە وەڵامدا ئیسرائیلیش بۆردومانی چەند شوێنێکی ئێرانی کرد و دۆناڵد ترەمپش رایگەیاند دەبێت؛ دەستبەجێ هەردوولا هێرشەکان راگرن.
ئەنجومەنی وەزیرانی حکومەتی هەرێمی کوردستان کۆدەبێتەوە و پرسی نەوت لەنێوان هەرێم و عیراق و چەند بابەتێکی دیکە تاوتوێ دەکات.
فەرمانگەی میدیا و زانیاری حکومەتی هەرێمی کوردستان رایگەیاندووە: رۆژی چوارشەممە، ئەنجومەنی وەزیرانی هەرێمی کوردستان کۆ دەبێتەوە، دۆسییەکانی نێوان هەرێمی کوردستان و حکومەتی فیدراڵ، بەتایبەت پرسی نەوت لەنێوان هەردوو حکومەت و دوایین پەرەسەندنەکان لەنێوان حکومەتی فیدراڵ و حکومەتی هەرێم تاووتوێ دەکرێن.
بەپێی راگەیەندراوەکە، لە کۆبوونەوەکەدا بابەتی داهاتی ناوخۆ و ئەسیکۆدا گفتوگۆیان لەسەر دەکرێت.
بەڕێوەبەرایەتی پۆلیسی هەولێر دەستگیرکردنی چوار تۆمەتباری سەرەکی راگەیاند، کە لە روداوێکی تەقەکردندا لە شارەدێی کۆڕێ بوونە هۆی گیانلەدەستدانی منداڵێکی تەمەن چوار ساڵان.
بەڕێوەبەرایەتی پۆلیسی هەولێر راگەیەندراوێکی بڵاوکردوەتەوە و دەڵێت؛ لە روداوێکی تەقەکردن لە شەوی 7ی حوزەیرانی 2026لە سەعات 11ی شەو لە نێوان دوو لایەندا رویداوە؛ هێزەکانی پۆلیس دەستبەجێ گەیشتوونەتە شوێنیروداوەکە و دەستیان بە لێکۆڵینەوەی ورد کردووە و پەڕاوی لێکۆڵینەوەیان بۆ روداوەکە کردەوە.
ئاماژەبەوەشکراوە، لە ئەنجامی ئەو تەقەکردنەدا، ئۆتۆمبێلێکی جۆری (تویوتا لاندگرۆزەر زیاتر لە8 فیشەکی بەرکەوتووە و هەروەها منداڵێکی تەمەن چوار ساڵ لە ناو ئۆتۆمبێلەکەدا بووە و بەهۆیەوە گیانی لەدەستدا.
پۆلیسی هەولێر دەڵێت؛ لە دوای روداوەکە هێزەکانی پۆلیس لە ماوەیەکی پێوانەییدا توانیان ناسنامەی تۆمەتبارانی سەرەکی دەستنیشان بکەن و بە بڕیاری دادوەری لێکۆڵینەوەی پیرمام، هەر چوار تۆمەتباری سەرەکی روداوەکە دەستگیر بکەن.
وەک لە راگەیەندراوەکەدا هاتووە؛ لە ئێستادا سەرجەم تۆمەتباران بەپێی ماددەی 406 لە یاسای سزادانی عیراقی راگیراون و رێکارە یاساییەکانیان بەرانبەر دەگیرێتەبەر.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە ئەندرۆ بیزلی، کونسوڵی گشتیی بەریتانیا لە هەرێمی کوردستان کرد و رایگەیاند؛ داوای یەکێتی، داوای خەڵکە بۆ باشترکردنی حکومڕانی و گەیشتن بە حکومەتێکی دادپەروەر و بەهێز.
ئەمڕۆ دووشەممە لە کۆبوونەوەیی بافڵ جەلال تاڵەبانی، سەرۆکی یەکێتیی نیشتمانیی کوردستان و ئەندرۆ بیزلی، کونسوڵی گشتیی بەریتانیا لە هەرێمی کوردستان دوایین پەرەسەندنە سیاسی و ئەمنی و ئابوورییەکانی ناوچەکە گفتوگۆیان لەبارەوە کرا و چارەسەرکردنی ئاشتییانەی کێشەکان بە گرنگ زانرا.
پەیوەست بە پێکهێنانی حکومەتی هەرێمی کوردستان، سەرۆک بافڵ رایگەیاند، داوای یەکێتی، داوای خەڵکە بۆ باشترکردنی حکومڕانی و گەیشتن بە حکومەتێکی دادپەروەر و بەهێز، کە توانای خزمەتکردنی هەبێت بەبێ جیاوازی و ئێمە دەمانەوێت هاوسەنگی و شەراکەت و پێکەوەیی بنەمای کارکردن بێت.
ئیسرائیل رایگەیاند، هێرشەكانی سەر ئێران بە هەماهەنگی ئەمریكا بووە و هۆشداریش دەداتە حزبوڵا، بەڵام واشنتۆن بەشداریی خۆی لەو هێرشە رەتدەكاتەوە.
لێپرسراوێكی ئیسرائیلی رایگەیاند، هێرشەكەی سەر ئێران بە هەماهەنگی لەگەڵ ئەمریكا ئەنجامدراوە.
لە هەمان كاتدا، سوپای ئیسرائیل ئامادەیی خۆی لەسەرجەم بەرەكاندا راگەیاند و هۆشداریدا ئەگەر حزبوڵا هێرشیان بكاتەسەر، ئەوا شوێنی سەركردایەتی و ژێرخانیان لە بەیروت وێران دەكەن.
لەلایەكی دیكەوە، لێپرسراوێكی ئەمریكی بە ماڵپەڕی ئەكسیۆسی راگەیاند، ئەمریكا بەشداریی لەو هێرشانەدا نەكردووە كە بەرەبەیانی ئەمڕۆ كرانە سەر ئێران، ئاماژەی بەوەشكردووە، هێرشەكانی ئیسرائیل لەڕووی مەوداوە تاڕادەیەك سنووردار بوون بۆ سەر ئێران.
دوای وەستانی گەشتە ئاسمانییەکان و داخرانی ئاسمانی عیراق، بەهۆی هێرشيکانی ئیسرائیل و ئێران بۆ سەر یەکتری پرۆسەی گەڕانەوەی ئەو حاجیانەی هەرێمی کوردستان، کە لە خاکی سعودیە گیریان خواردبوو، بە رێگای وشکانی دەستی پێکرد.
بڕیار محەمەد، پەیامنێری کوردسات نیوز لە زاری وتەبێژی حەج و عەمرەی هەرێمەوە رایگەیاند بەهۆی دەستپێکردنەوەی جەنگەوە، بە ناچاری و لە رێگای پاسەوە دەگەڕێنەوە کەرکووک و شارەکانی دیکەی هەرێمی کوردستان.
کاروان ستونی، وتەبێژی حەج و عەمرەی هەرێمی کوردستان تایبەت بە کوردسات نیوزـی رایگەیاند، 1800 حاجی هەرێمی کوردستان بەهۆی راگرتنی گەشتە ئاسمانییەکانەوە لە سعودیە مابوونەوە، بەڵام لە چوارچێوەی پلانێکی بەپەلەدا، پرۆسەی گەڕانەوەیان بە وشکانی لە ئەمڕۆوە دەستی پێکردووە.
ناوبراو ئاماژەی بەوەش کرد، لە ئەمڕۆە پرۆسەکە دەستی پێکردوە و چاوەڕوان دەکرێت تاوەکو کۆتایی ئەم هەفتەیە، سەرجەم حاجیانی هەرێم بگەنەوە وڵات.
جێی وەبیرهێنانەوەیە، ئەمساڵ بە گشتی پێنج هەزار و 136 هاووڵاتی لە هەرێمی کوردستانەوە بۆ بەجێگەیاندنی فەریزەی حەج سەردانی خاکی سعودیەیان کردبوو؛ لەو ژمارەیەش سێ هەزار و490 حاجی بە فڕۆکە و هەزار و 646 حاجی بە پاس گەشتیان کردبوو، بەڵام گۆڕانکاریی لە رەوشی ئاسمانی عێراقدا پلانی گەڕانەوەی بەشێکی زۆری گەشتە ئاسمانییەکانی گۆڕی بۆ وشکانی.
مەکتەب سیاسی یەکێتیی نیشتمانیی کوردستان ئیدانە و نیگەرانی خۆی لە شەهیدبوونی حاجی ئاسۆ، پێشمەرگەی کوردستان دەربڕی و وتی: پێشمەرگە رەمزی فیداکاری و مانەوەی گەلەکەمانە و شایستەی ژیانێکی شەرەفمەندانەن، نەک بخرێنە زیندانەوە و بە ناحەق شەهید بکرێن.
دەقی راگەیەندراوەکە:
لە دڵەوە نیگەران و غەمباربووین بە مەرگی تەمومژاوی پێشمەرگەی کوردستان کاک حاجی ئاسۆ کە لە رووداوێکی تەمومژاویدا لە زیندانەکانی هەولێر بە ناحەق شەهید کرا.
ئێمە لە یەکێتیی نیشتمانیی کوردستان پرسە و سەرەخۆشی ئاڕاستەی خێزان و بنەماڵە سەربەرزەکەیان دەکەین و هاوبەشی ماتەمیانین.
داوا لە کۆمەڵگەی نێودەوڵەتی دەکەین بە جدی لەسەر ئەم رووداوە بێنە سەر هێڵ و لێکۆڵینەوەی ورد بکەن، چونکە ژیان و پێگەی پێشمەرگە زۆر لەوە گەورەترە کە بەناوی جیاجیاوە تۆمەتی بۆ دروست بکرێت و شەهید بکرێت.
پێشمەرگە رەمزی فیداکاری و مانەوەی گەلەکەمانە و شایستەی ژیانێکی شەرەفمەندانەن، نەک بخرێنە زیندانەوە و بە ناحەق شەهید بکرێن.
خوای گەورە گیانی شەهیدی غەدرلێکراو بە بەهەشتی بەرینی شادبکات، ئارامی و دڵنەوایی بە هەموو لایەک ببەخشێت.
مەکتەبی سیاسیی
یەکێتیی نیشتمانیی کوردستان
٨-٦-٢٠٢٦
بۆ بەڕێوهچوونی باشتر و رێکوپێکتری پڕۆسەی تاقیکردنەوە گشتییەکانی پۆلی 9ی بنەڕەتی و پۆلی 12ی ئامادەیی، وەزارەتی پەروەردەی حکومەتی هەرێمی کوردستان فەرمانێکی وەزاری نوێی بڵاوکردەوە، کە چەند رێنمایەک لە خۆ دەگرێت.
وەزارەتی پەروەردە چەندین رێکاری توند بۆ رێگریکردن لە غەشکردن و پاراستنی پرۆسەکە گرتوەتەبەر؛ لەوانە دابینکردنی کەشێکی گونجاو لە هۆڵەکاندا و قەدەغەکردنی هێنانی هەر جۆرە مۆبایلێک لەلایەن سەرپەرشتیاران، بەڕێوەبەران و یاریدەدەرانەوە بۆ ناو هۆڵەکان، جگە لەو مۆبایلە تایبەتەی بۆ بەڕێوەبەری هۆڵەکە دابینکراوە. هاوکارییکردن لە غەش وەک خیانەت لێکدەدرێتەوە و ڕووبەڕووی لیژنەی لێکۆڵینەوە دەبێتەوە.
هەر بەپێی فەرمانە وەزارییەکە، پرسیارەکان لەلایەن مامۆستایانی چاودێرەوە لە ناو هۆڵ دەکرێنەوە و دەبێت دڵنیابنەوە لەوەی کە سۆما و پرسیاری هەر خوێندکارێک ناوی خۆی لەسەر بێت، بە پێچەوانەوە نمرەی بۆ هەژمار ناکرێت.
هەروەها پێش چوونە ژوورەوەش، پشکنینی ورد بۆ هەموو خوێندکاران بکرێت و هێنانەژوورەوەی سەعاتی زیرەک، مۆبایل و هەر ئامێرێکی ئەلیکترۆنی قەدەغەیە؛ ئەگەر لای هەر خوێندکارێکەوە ببینرێت، روبەڕووی سزای توند دەبێتەوە.
وەزارەتی پەروەردە ئاماژەی بەوەشکردوە، لە کاتی تاقیکردنەوەکاندا تەنها لیژنەی لقی تاقیکردنەوەکان و سەرپەرشتیاران مافی وێنەگرتنی پرسیارەکانیان هەیە و بڵاوکردنەوەی لە تۆڕە کۆمەڵایەتییەکان قەدەغەیە.
جگە لەوەش، مامۆستایان و سەرپەرشتیاران مافی بڵاوکردنەوەی پرسیارەکانی پۆلی 12ی ئامادەییان نییە و وەڵامەکان تەنها لەلایەن لیژنەی باڵاوە لە کاتی دیاریکراودا بڵاودەکرێنەوە.