بەریتانیا یاسایەکی نوێی پەسەندکرد بۆ توندترکردنی رێکار و سزاکانی سەر ئێران، کە سزا ئاسمانی، دەریایی و ئابوورییەکان لە خۆدەگرێت.

حکومەتی بەریتانیا، ئەمڕۆ سێشەممە، یاسایەکی نوێی بۆ توندکردنەوەی سزاکانی سەر ئێران راگەیاند، کە فراوانکردنی بەربەستە بازرگانییەکان و بەهێزکردنی دەسەڵاتەکانی بەریتانیا لە بەئامانجگرتنی کەشتییەکان لەخۆدەگرێت.

حکومەتی بەریتانیا روونی کردەوە کە یاساکە لە چوارچێوەی هەوڵە بەرفراوانەکاندایە بۆ راگرتنی بەرنامەی ئەتۆمیی ئێران و رووبەڕووبوونەوەی چالاکییەکانی تری تاران، کە بە "دوژمنکارانە" وەسفی کردوون.

بەپێی یاسا نوێکە، بەربەستەکانی بەردەم دەستگەیشتنی ئێران بە سیستەمی دارایی بەریتانیا توندتر دەکرێن، هەروەها بڕیاری قەدەغەکردنی بازرگانی فراوانتر دەکرێت تاوەکو ژمارەیەکی زیاتری کەلوپەل، تەکنۆلۆژیا و خزمەتگوزارییەکان بگرێتەوە.

هاوکات یاساکە دەسەڵاتی زیاتر دەداتە بەریتانیا بۆ سەپاندنی سزا بەسەر کەشتییەکاندا و قەدەغەکردنی نیشتنەوەی فڕۆکە ئێرانییەکان لە وڵاتەکەدا، جگە لەو حاڵەتانەی کە بەپێی بەخشینە تایبەتەکان دیاری دەکرێن.

بەڕێوەبەری گشتی هێڵی ئاسمانیی عیراقی رایگەیاندوە، هێڵەکەیان لە مانگی ئابدا، هەزار و  684 گەشتی راستەوخۆی ئەنجامداوە، کە زیاتر لە 232 هەزار سەرنشینی گواستوەتەوە.

ئەمڕۆ سێشەممە، مستەفا تالیب، بەڕێوەبەری گشتی هێڵی ئاسمانیی عیراقی رایگەیاند، هێڵەکەیان لە مانگی رابردودا زۆترین چآلاکی تۆمارکردوە و توانیویانە بە گوێرەی پلانەکان زیاتر بەرەوپێش بچن.

ئاماژەی بەوەشکردوە، ئەم ژمارە زۆرە لەگەشتکردن بە هێڵی ئاسمانیی عراقی دەرخەری  پەرەسەندنی خواستە لەسەر گەشتکردن لە رێگەی هێڵەکەوە.

جەختیشیکردوەتوە، ئەم ئەنجامانە بەشێکن لە پلانە کارپێکردنەکان بە ئامانجی فراوانکردنی تۆڕی شوێنەکانی مەبەست و باشترکردنی کارایی خزمەتگوزارییەکان، لەسەر ئاستی هەرێمی و نێودەوڵەت وبەردەوامیش دەبن لە باشترکردنی خزمەتگوزارییەکان.

رێکخراوی عیراقی سەوز، هۆشداریی دا لەبارەی رێکار و پڕۆژەی حکومی کە بە وتەی رێکخراوەکە هەڕەشە لە رەز، باخ و زەوییە کشتوکاڵییەکان دەکەن و ئاستەنگ لەبەردم هەوڵەکانی رووبەڕووبوونەوەی بەبیابانبوون لە وڵاتدا دروست دەکەن.

رێکخراوەکە لە راگەیەندراوێکدا، کە ئەمڕۆ سێشەممە، بڵاوی کردەوە، بەشێک لە وەزارەت و دامەزراوە حکومییەکان رێکاری وەک تێکدانی زەوییە کشتوکاڵییەکان و بڕینەوەی درەختەکانیان گرتووەتە بەر.

جەختیشی کردەوە: ئەم هەنگاوانە پێچەوانەی یاسای پاراستن و چاککردنی ژینگە و بڕیارەکانی پێشووی حکومەتن کە بەڕوونی جەخت لەسەر راگرتنی تێکدانی باخەکان و قەدەغەکردنی گۆڕینی رەگەزی زەوییە کشتوکاڵییەکان دەکەنەوە.

لە راگەیەندراوەکەدا ئاماژە بەوە کراوە: کۆمپانیای گشتی بۆ جێبەجێکردنی پڕۆژەکانی گواستنەوە و گەیاندن (سەر بە وەزارەتی گواستنەوە) گردبەستێکی وەبەرهێنانی درێژخایەنی لەگەڵ کەرتی تایبەت ئیمزا کردووە بۆ دروستکردنی کۆگای فرەمەبەست لەسەر زەویی باخێک لە بەغدا، سەرەڕای ئەوەی باخەکە تا ئێستاش کشتوکاڵی تێدا دەکرێت و بەشە ئاوی هەیە، بەڵام جێبەجێکردنی پڕۆژەکە دەبێتە هۆی لەناوبردنی بەرهەمەکان و تێکدانی زەوییەکە.

لە لایەکی ترەوە، رێکخراوەکە ئاشکرای کرد کە فەرمانگەی رێگاوبان و پردەکان (سەر بە وەزارەتی ئاوەدانکردنەوە و نیشتەجێکردن) پێشنیازی رێڕەوێکی کردووە بۆ دروستکردنی رێگایەک بەرەو شارۆچکەی "عەلی وەردی" لە ناوچەی نهروانی بەغداد. جەختیشی کردەوە ئەم نەخشەیە دەبێتە هۆی تێکدانی باخ و زەویی کشتوکاڵی و رووخاندنی ماڵی جووتیارانی ناوچەکە.

سەبارەت بە دۆسیەی بەبیابانبوون، رێکخراوی "عێراقی سەوز" ناوەندی نیشتمانی بۆ بەڕێوەبردنی سەرچاوەکانی ئاوی لە وەزارەتی سەرچاوەکانی ئاو تۆمەتبار کرد بەوەی توێژینەوەی پێویستی لەسەر هۆکارەکانی بەبیابانبوون و لێکەوتەکانی دابەزینی ئاستی رووبارەکان و کەمبوونەوەی رووبەری ئاوییەکان ناکات.

هاوکات رەخنەی توندی لە کەمتەرخەمیی رێکارەکانی وەزارەتی کشتوکاڵ و لایەنە پەیوەندیدارەکان گرت لە راگرتنی دیاردەی بەبیابانبوون.

قوباد تاڵەبانی، ستایشی رۆڵی باڵیۆزی روسیا لە عیراق دەکات و دەڵێت، "رۆڵی گرنگی بینیوە لە بەهێزکردنی پەیوەندییەکان".

قوباد تاڵەبانی، پەیامێکی بڵاوکردووەتەوە و رایگەیاندووە: ئێلبروس کۆتراشێڤ، باڵیۆزی روسیا لە ماوەی پێنج ساڵی رابردوودا رۆڵی گرنگی بینی لە بەهێزترکردنی پەیوەندییەکانی نێوان عیراق و هەرێمی کوردستان لەگەڵ وڵاتی روسیا لە بوارە جیاوازەکاندا.

قوباد تاڵەبانی ئاماژەی بەوەشداوە: ئەمرۆ بەبۆنەی کۆتاییهاتنی ئەرکەکەی ماڵئاواییمان لێ کرد، هەمیشە وەک دۆستێکی گرنگی ئێمە دەمێنێتەوە و هەرگیز دۆستایەتی و هەوڵە دڵسۆزانەکانی لەبیر ناکەین، هیوای سەرکەوتنی بۆ دەخوازین کە ئەرکی داهاتوویدا.

 

توركیا بڕیاریدا بودجەی وەزارەتی بەرگریی بۆ ساڵی 2027 بە رێژەی 86% زیاد بكات، بە مەبەستی پەرەپێدانی پیشەسازیی سەربازی ناوخۆیی.

حكومەتی توركیا لە راگەیەنراوێكدا ئاماژەی بەوەكردووە، بڕیاردراوە بودجەی وەزارەتی بەرگریی بۆ ساڵی داهاتوو زیاد بكات و بڕی بودجەكەش دەگاتە یەك تریلیۆن و 533 ملیار لیرە، ئەو بودجەیەش بەراورد بە ئەمساڵ بە رێژەی 86% زیادبوونی بەخۆوە بینیوە.

جەودەت یەڵماز جێگری سەرۆك كۆماری توركیا رایگەیاند، مەبەستیان لەو زیادكردنە دابینكردنی پێداویستییە ناوخۆییەكانە و دەیانەوێت و كۆتایی بهێنن بە كڕینی چەك و كەرەستەی سەربازیی لە وڵاتانی دەرەوە.

وتیشی، بەپێی پلانەكە كۆی خەرجییە بەرگرییەكان لە ماوەی جێبەجێكردنی بەرنامەیەكی سێ ساڵیدا بە رێژەی 229% زیاد دەكات و حكومەتی ئەنكەرەش پلانی هەیە تا ساڵی 2029 بەردەوام بێت لە تەرخانكردنی بودجەی زیاتر بۆ كەرتی سەربازیی.

سەرۆکی کۆماری ئێران، رایگەیاند وڵاتەکەی هەمیشە دژە جەنگ بووە و بەردەوام دەبن لە بەرخۆدان تا دوژمنەکانیان پەشیمان دەکەنەوە.

ئەمڕۆ سێشەممە، مەسعود پزیشکیانی سەرۆک کۆماری ئێران پەیامێکی لە ئێکس بڵاوکردوەتەوە و دەڵێت؛ بەردەوام دەبن لە دژایەتی زوڵم و هێرشيکانی دوژمن.

پزیشکیان جەختیکردوەتەوە، هەروەک چۆن تاوەکو ئەمڕۆ لە بەرانبەر هەر دەستدرێژییەکدا بەرگرییان لە خۆیان کردووە، بە هەمان هێز و تواناوە لە سەر ئەم بەرخۆدانە بەردەوام دەبن تا ئەو کاتەی دەستدرێژکاران بە تەواوی پەشیمان دەکەنەوە.

سەرۆک کۆماری ئێران ئاماژەی بەوەشکردوە؛ ئێران هەمیشە دژی جەنگ بووە و پاراستنی بەرژەوەندییەکانی گەلەکەی و ئاسایشی ناوچەکەی لە دورکەوتنەوە لە خۆشکردنی ئاگری جەنگدا دەبینێتەوە.

باسم محەممەد خوزەیر، وەزیری نەوتی عیراق، رایگەیاند کە رێژەی هەناردەکردنی نەوتی وڵات لە سەرەتای دەستبەکاربوونی حکومەتەوە کە نزیکەی 200 هەزار بەرمیل بوو لە رۆژێکدا، بەرزبووەتەوە بۆ زیاتر لە سێ ملیۆن بەرمیل لە رۆژێکدا.

وەزیر روونیشی کردەوە کە وەزارەت کار لەسەر جێبەجێکردنی ستراتیژییەکی گشتگیر دەکات بۆ گەشەپێدانی کەرتی نەوت و گاز، فرەچەشنکردنی دەروازەکانی هەناردەکردن لە رێگەی کاراکردنەوەی هێڵی باکور و بەستنەوەی بەسرە بە فێشخابوور، لەگەڵ بەرزکردنەوەی توانای پاڵاوتگەکان بۆ گەیشتن بە خۆبژێویی ناوخۆیی و هەناردەکردنی بەرهەمە نەوتییەکان. 
خوزەیر روونی کردەوە کە کۆمپانیا جیهانییەکان بە هەماهەنگی و پاڵپشتیی بەردەوامی حکومەت، توانیویانە دەستکەوتی بەرچاو بنێن، کە دیارترینیان بەرزکردنەوەی ئاستی هەناردەکردنی نەوتە لە نزیکەی 200 هەزار بەرمیل لە رۆژێکدا (لە سەرەتای دەستبەکاربوونی حکومەتەوە) بۆ زیاتر لە سێ ملیۆن بەرمیل لە رۆژێکدا لە مانگی ئەیلوولی ئێستادا.

سەبارەت بە کردنەوەی دەروازەی نوێ بۆ هەناردەکردنی نەوت، وەزیر رایگەیاند کە رێککەوتننامەی عیراقی-تورکی رۆڵێکی کارای دەبێت لە کاراکردنەوە و بەهێزکردنی رێڕەوی باکور، جگە لەوەش کارکردن لەسەر پڕۆژە ستراتیژییەکان بەردەوامە لەگەڵ هاوپەیمانی کۆمپانیاکانی "شێڤرۆن" و "TI"ی ئەمریکی و هاوبەشەکەیان "UCC"ی قەتەری بۆ دروستکردنی هێڵی بەستنەوەی بەسرە بە فێشخابوور و درێژکردنەوەی بەشێکی بەرەو بەندەری بانیاس، بە ئامانجی بەهێزکردنی ئاسایشی هەناردەکردن و رەخساندنی نەرمی لە بەبازاڕکردنی نەوتی عیراق لە ئاستی جیهانیدا.

کەشناسیی هەرێم رایگەیاند، ئاسمان ساماڵ دەبێت، بەراورد بە دوێنێ  ئەمڕۆ و سبەینێش پلەکانی گەرما نزمدەبەنەوە، حاجی ئۆمەران بە 27 پلە ساردترین  و گەرمیان بە 40 پلەی سیلسیز گەرمترین ناوچەی هەرێم دەبن.

ئەمڕۆ سێشەممە، بەڕێوەبەرایەتی گشتیی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، بە شێوەیەکی گشتی ئاسمان ساماڵ و پەڵە هەور دەبێت، پلەکانی گەرما دوو بۆ سێ پلە نزم دەبنەوە.

لە بارەی کەشی سبەینێشەوە، کەشناسی هەرێم دەڵێت؛  پلەکانی گەرما بەراورد بە ئەمڕۆ، جگە لە پارێزگای دهۆک زیاتر نزم دەبنەوە.

بەرزترین پلەکانی گەرمای پێشبینیکراو بە پلەی سیلیزی بەمشێوەیە دەبێت؛

هەولێر: 36 پلەی سیلیزی

پیرمام: 34 پلەی سیلیزی

سلێمانی: 36 پلەی سیلیزی

هەڵەبجە:37 پلەی سیلیزی

چەمچەماڵ: 36 پلەی سیلیزی

دهۆک: 37 پلەی سیلیزی

زاخۆ: 38 پلەی سیلیزی

ئاکرێ:37 پلەی سیلیزی

گەرمیان:40 پلەی سیلیزی

حاجی ئۆمەران:24 پلەی سیلیزی

وەزارەتی بەرگریی روسیا رایگەیاند، دوای کۆتایی هاتنی مۆڵەتە سێ رۆژەکەی ڤلادیمێر پوتن هێرشەکانیان بۆسەر ئۆکراین بە چڕی دەستپێکردوەتەوە.

بەیانیی ئەمڕۆ سێشەممە وەزارەتی بەرگریی روسیا رایگەیاند، هێزەکانیان دەستیان بە هێرشە ئاسمانییەکانیان کردووەتەوە و چەندین دامەزراوەی پیشەسازیی بەرگریی و ناوەندی لۆجستی و دابەشکردنی کەلوپەلی سەربازییان لە کیێڤی پایتەخت و دەوروبەری کردوەتە ئامانج.

بەپێی راگەیەندراوەکە، هێرشە چڕەکانی شەوی رابردوو لە رێگەی چەکی پێشکەوتووی وشکانی، ئاسمانی و دەریایی، لەگەڵ فڕۆکەی بێفڕۆکەوانی مەودا درێژەوە ئەنجام دراون.

ئاماژەبەوەشکراوە، لە هێرشەکاندا بنکەکانی بەرهەمهێنان و کۆگاکردنی درۆن و موشەک و کەشتییەکی بارکردنی سوتەمەنی تایبەت بە سوپای ئۆکراینیان کردوەتەوە ئامانج.

دەستپێکردنەوەی ئەم هێرشانەش بۆ سەر پێگەکانی سوپای ئۆکراین دوای کۆتاییهاتنی ئەو ئاگربەستە سێ رۆژەیە دێت، کە پێشتر ڤلادیمێر پوتن، سەرۆکی روسیا بۆ کیێڤی پایتەخت رایگەیاندبوو، کە هاوکات بوو لەگەڵ سەردانی نێردراوانی ئەمریکا بۆ ئەو شارە.

سەرۆکایەتیی شارەوانیی سلێمانی ئاگاداریی شۆفێران و هاوڵاتییانی سلێمانی دەکات، بە مەبەستی خێرا کارکردن لە یەکتربڕی شەوکەت حاجی موشیر، سایدی رۆیشتن لە شەقامی بازنەیی مەلیک مەحمود بە ئاڕاستەی چوارڕیانی سەرچنار دادەخرێت.

شارەوانی سلێمانی ئاماژەی بەوەکردوە، داخستنەکە کاتییە و بە هەماهەنگییە لەگەڵ بەڕێوەبەرایەتی هاتوچۆی سلێمانی و لە دوو کاتی جیاوازدا دەبێت.

بە گوێرەی راگەیەندراوەکەی شارەوانی، لە سەعات 10ـی بەیانی تا 1ـی دوانیوەرۆ و دواتریش لە سەعات 12ـی شەو تا 6ـی بەیانی ئەو شەقامە دادەخرێت.

داواش لە هاوڵاتییان و شۆفێران هاوکاری و هەماهەنگیی تەواو لەگەڵ تیمەکانی شارەوانی بکەن و لەو کاتانەدا تا دەتوانن لە بەکارهێنانی ئەو شەقامە خۆبپارێزن، شەقامی جێگرەوە بەکاربهێنن.

پەیامنێری كوردسات نیوز لە توركیا ڕایگەیاند ، سەلچوك مزراكلی، سیاسەتمەداری كورد و سەرۆكی پێشوتری گەورەشارەوانی ئامەد لە دوایی حەوت ساڵ زیندانیكردن، ئەمرۆ لە زیندانی شاری ئەدیرنە ئازادكرا. 

سەلچوك مزراكلی ماوەی 6 ساڵ  لە زیندانی ئەدیرنە  لەگەڵ سەڵاحەدین دەمیرتاش سەرۆكی پێشووی هەدەپە بووە .

سەڵچوك مزراكلی لە ساڵی 2019 وەكوو سەرۆكی گەورەشارەوانیی ئامەد هەڵبژێردرا، بەڵام لەجێگەی ئەو قەیووم سەپێنرا و دواتر لە هەمان ساڵدا بە تۆمەتی ئەندامبوون لە پەكەكە دەستگیر كرا .

 

ئاژانسی ئەسۆشێتد پرێس بڵاویکردەوە، لە شەپۆلێکی هێرشەکانی حوسییەکان بۆ سەر سعودیە زیاتر لە 70 کەس برینداربوون و دامەزراوە مەدەنی و ئابورییەکانیان کردوەتە ئامانج و وەزارەتی وزەی سعودیەش دەڵێت؛ ژمارەیەک دامەزراوە و ناوەندەکانی وزە زیانیان بەرکەوتوە.

ئەمڕۆ سێشەممە، وتەبێژی هاوپەیمانی سعودییە بە ئاژانسی ئەسۆشێتد پرێسی راگەیاندوە، حوسییەکانی یەمەن، کە ئێران پاڵپشتیان دەکات دامەزراوە مەدەنی و ئابورییەکانیان لە شارەکانی ئەبها، جازان، نەجران و خەمیس مشێت کردووەتە ئامانجی سحودییە کردوەتە ئامانج.

جەختیشیکردوەتەوە، بەهۆی هێرشەکانەوە 73 کەس بریندار بوون وهەموو رێکارێکی پێویست دژیان دەگرنبەر، ئەمەش پەرەسەندنێکی گەورەیە لە نوێبونەوەی ململانێی نێوان حکومەتی یەمەن  و حوسییەکانی یەمەن.

وەزارەتی وزەی سعودیەش رایگەیاندوە، بەهۆی هێرشەکانی سەرلەبەیانی ئەمڕۆ لە باشوری وڵات، ژمارەیەک دامەزراوە و ناوەندەکانی وزە زیانیان بەرکەوتووە و ژمارەیەک کارمەندیش برینداربوون.

ئەمە لە کاتێکدایە، لە چەند هەفتەی رابردوودا پێکدادانەکانی نێوان حوسییەکان و هێزەکانی حکومەتی یەمەنی هاوپەیمانی سعودیە توندتر بوونەتەوە، ئەمەش بووەتە هۆی کۆتاییهێنان بەو ئاگربەستە چوار ساڵەیەی کە لە شەڕی ناوخۆی یەمەندا راگەیەندرابوو.

 

 

رۆژنامەی وۆڵ ستریت جۆرناڵ بڵاویکردوەتەوە، گەمارۆی ئەمریکا و کەمبونەوەی یەدەگی نەوتی ئێران، ئابوری ئێرانی تێکشکاندوە و قەیرانی نەبونی دراوی بیانی دروست کردوە.

رۆژنامەکە ئاماژەی بەوەکردوە، بەگوێرەی داتاکانی کۆمپانیای کەپلەر کە بە بەدواداچونی بۆ جوڵەی کەشتیونای دەکات، لەو کاتەوەی هێزی دەریایی ئەمریکا لە ناوەڕاستی مانگی تەمموزەوە دەستی بە گەمارۆکە کردووە، هیچ نەوتێکی خاوی ئێران نەیتوانیوە بەو گەمارۆیەدا تێپەڕێت.

هاوکات، قەبارەی نەوتی خاوی ئێران، کە لە دەرەوەی گەمارۆکەیە و لەسەر  کۆگائاوییەکانە، لە 90 ملیۆن بەرمیلەوە بۆ نزیکەی 29 ملیۆن بەرمیل دابەزیوە و پێشبینیش دەکرێت لە مانگی داهاتوودا بە تەواوەتی خاڵیببنەوە.

ئەمە لە کاتێکدایە شەش مانگ بەسەر جەنگدا تێپەڕیوە و فشاری هەناردەکردنی نەوت تارانی لە سەرچاوە سەرەکییەکەی دراوی بیانی بێبەش کردووە؛ بەهای تمەنی ئێرانی بۆ نزمترین ئاستی لە مێژودا دابەزیوە، هەڵاوسان بەرزبوەتەوە و ئابووری وڵاتەکەش لە قەیرانێکی تەواو قوڵدایە.

بە مەبەستی جێگیرکردنی پشکی هەرێم و شایستە داراییەکان لە پڕۆژەیاسای بودجەی عیراق بۆ ساڵی 2027، وەفدێکی باڵای حکومەتی هەرێمی کوردستان دەچنە بەغداد.

محەمەد عەبدولڕەحمان، پەیامنێری کوردسات نیوزی رایگەیاند، وەفدە باڵاکەی حکومەتی هەرێم پێکهاتوون لە ئاوات جەناب، وەزیری دارایی و ئابوری، د. ئامانج رەحیم سکرتێری ئەنجومەنی وەزیران، ئومێد سەباح سەرۆکی دیوانی سەرۆکایەتی حکومەتی هەرێمی کوردستان، حەکیم خەسرەو بەڕێوەبەری فەرمانگەی زانیاری و بەدواداچون.

بڕیارە وەفدەکە لەگەڵ فالح ساری، وەزیری دارایی عیراق کۆببنەوە بۆ تاوتوێکردنی چەند پرسێکی گرنگ، لەوانە؛ دیاریکردنی پشکی هەرێم لە بودجەی داهاتوو، چارەسەرکردنی کێشەی موچەی فەرمانبەرانی هەرێم، دۆسیەی 120 ملیار دیناری داهاتی نانەوتی.

هەروەها  میکانیزمی جێبەجێکردنی سیستەمی ئەلیکترۆنی "ئەسیکۆدا" (ASYCUDA) لە دەروازە سنورییەکان، ئەمەش وەک هەنگاوێکی پێشوەختە بۆ یەکلاکردنەوەی کێشەکان بەر لە تەواوبونی رەشنووسی بودجەکە لەلایەن بەغداوە.

بەڕێوبەرایەتیی گشتیی دژەتیرۆر رایگەیاند، پاڵپشت بە زانیاری هەواڵگری ورد و پاش لێکۆڵینەوەی چڕ و وەرگرتنی ڕرزامەندی دادوەر، لە ئۆپەراسیۆنێکدا لە سنوری ناحیەی بازیان تیرۆریستێکی داواکراویان بەناوی (عەبدولموئمین ئەحمەد ساڵح الرفیعی) دەستگیرکردووە.

 بەپێی راگەیەندراوەکە، ئەو تیرۆریستە لە ساڵی 2015 لە ناحیەی گەیارە بەیعەتی بە رێکخراوی تیرۆریستی داعش داوە و پاش تەواوکردنی خولی شەرعی، لە بەشی پشتیوانی (ئسناد) لە سنووری ویلایەتی سەڵاحەدین بەشداری چەندین شەڕی دژ بە هێزە ئەمنییەکانی عێراق کردووە.

دژەتیرۆر ئاماژەی بەوەش کردووە، کە تۆمەتبارەکە پاش تێکشکانی رێکخراوەکە هەڵهاتووە بۆ سوریا و لە کەمپی هۆل نیشتەجێ بووە، دواتر گەڕاوەتەوە بۆ کەمپی حاج عەلی لە موسڵ و لە کۆتاییدا خۆی گەیاندووەتە هەرێمی کوردستان و لە بازیان حشار درابوو.

کۆمپانیای ئادیداسی ئەڵمانی بۆ پێداویستییە وەرزشییەکان داوای لێبوردنی کرد، دوای ئەوەی روبەڕوی شەپۆلێکی رەخنە و داوای بە بایکۆتکردن بووەوە بەهۆی بەشداریکردنی سەربازێکی پێشوی ئیسرائیل کە قاچێکی لەدەستداوە لە کمپینێکی ریکلامکردندا.

شالێڤ بیتۆن، سەربازێکی پێشوی ئیسرائیل بەشداریی لە هەڵمەتێکی ناوخۆیی کرد بۆ پەرەپێدانی خزمەتگوزاری "یەک پێڵاو"، کە رێگە بەو کەسانەدەدات کە یەکقاجیان هەیە سود لەو جۆرە پێڵاوە وەربگرن کە ئەدیداس دروتسی کردوە.

بڵاوبوونەوەی وێنەی ئەو سەربازە توڕەیی چالاکوانانی لایەنگری فەلەستینی لێکەوتەوە، بەتایبەت، دوای ئەوەی بەهۆی هێڕسيکانی ئیسرائیلەوە ژمارەیکی زۆر هاووڵاتی لە غەززە قاچێکیان لە دەستداوە بەهۆی جەنگەوە.

 کۆمپانیاکە رایگەیاندوە، ئامانجیان بە هیچ شێوەیەک دڵئێشاندن نەبووە و داوای لێبوردنیان لە هەموو ئەو کەسانە کرد کە کاریگەر بوون بەم بابەتە.

هاوکات رونیان کردەوە، کە ریکلامەکە لەلایەن تیمە خۆجێییەکەیانەوە تەنها لەناو ئیسرائیل ئەنجامدراوە و بەشێک نەبووە لە هەڵمەتێکی جیهانی.