لە ڕاگەیەندراوێکدا نوسینگەی ھادی عامری، کە دوای کۆبوونەوەی لەگەڵ وەفدی ھاوبەشی یەکێتی و پارتی بڵاویکردووەتەوە، ئاماژە بەوە دەکات، چوارچێوەی ھەماھەنگی بڕوای بەوەیە، ناکۆکی و لێکدوورکەوتنەوەی شیعەکان لە بەرژەوەندی ھیچ کەسێک نییە.

ڕاشیگەیاندووە، ھادی عامری سوپاسی ھەردوو لایەنی کوردیشی کردووە، کە پێکەوە پشتیوانیان لە لێتێگەیشتنی ماڵی شیعە کردووە.

جەختیشیکردووەتەوە، ھەموو توانای خۆیان خستووەتە گەڕ لە پێناو لێکتێگەیشتنێکی ھاوبەش لە نێوان لایەنە شیعییەکاندا.

لە کۆتایی ڕاگەیەندراوەکەدا ئاماژە بەوەشکراوە، حکومەتی داھاتوو بەرپرسیاریەتی گەورەی لە ئەستۆدایە و پێویستی بە کاری پێکەوەیی و لێکتێگەیشتنی سیاسی و دەستەجەمعی ھەیە.

چوارچێوەی ھەماھەنگی ئاماژەی بەوەکردووە، داوا لە ھەموو پەرلەمانتاران و بە تایبەتیش کوتلەی سەدر دەکەن، گەورەترین کوتلەی پەرلەمانیی لە ئەنجومەنی نوێنەران دروست بکەن، بە مەبەستی پارێزگاریکردن لە مافی دەستوری و جێگرکردنی پڕۆسەی سیاسی لە وڵاتدا.

چوارچێوەی ھەماھەنگی ستایشی سەرجەم کوتلە و ھێزە سیاسییەکانی کردووە، کە سووربوون لەسەر پشتیوانی لە لێکتێگەیشتنە ھاوبەشەکان و قوڵنەکردنەوەی ھەڵویستە سیاسییەکان.

ئەوەش لە کاتێکدایە، تا ئێستا چوارچێوەی ھەماھەنگی کە زۆرینەی ھێزە شیعییەکان لەخۆدەگرێت، لەگەڵ کوتلەی سەدر کە زۆرترین کورسی پەرلەمانی دەستبەسەر کردووە، چەند کۆبوونەوەیەکی ھاوبەشیان کردووە، بە مەبەستی دروستکردنی گەورەترین کوتلەی پەرلەمانیی و پێکھێنانی حکومەتی داھاتوو، بەڵام تا ئێستا نەگەیشتوونەتە ڕێککەوتنێکی کۆنکرێتی لە نێوان خۆیاندا.

سارا شائابادی جێگری بەڕێوەبەری تەندروستی پارێزگای کرماشان ڕایگەیاند، بە داخەوە کۆرۆنای گۆڕاو لە جۆری ئۆمیکرون گەیشتووەتە کرماشان و تا ئێستا ١٢ حاڵەتی تووشبوون بە ڤایرۆسەکە لە ناوچە جیاجیاکانی پارێزگای کرماشان تۆمارکراوە.

ئاماژەی بەوەشکرد، بۆ ئەوەی ڕێگە لە خێرا بڵاوبوونەوەی ئۆمیکرۆن بگرن، پێویستە ھاووڵاتیانی کرماشان پەلە بکەن لە وەرگرتنی ڤاکسینی کۆرۆنا و ڕەچاوی ڕێنماییە تەندروستییەکان بکەن.

پێشتریش چەند حاڵەتێکی تووشبوون بە ئۆمیکرۆن لە پارێزگاکانی سنە و ورمێ لە خۆرھەڵاتی کوردستان تۆمارکراوە.

لە ڕاگەیەندراوێکدا پۆلسی ھەنگاریا بڵاویکردەوە، ھێزێکی پۆلیس لە خاڵێکی پشکینین ویستوویەتی بارھەڵگرێک ڕابگرێت، بەڵام بە خێرایی بە خاڵی پیشکنینەکەدا تێپەڕیووە بەرەو نەمسا و ناچار بوون بۆ ڕاگرتنی تەقەی لێبکەن.

پۆلیسی ھەنگاریا ڕوونیکردەوە، بارھەڵگرەکە تابلۆی ھەنگاریای ھەڵگرتووە و لە سنوری نەمسا لەلایەن پۆلسی ئەو وڵاتەوە دەستبەسەر بارھەڵگرەکەدا گیراوە و دەرکەوتووە ٣٠ کۆچبەری لەگەڵ خۆی ھەڵگرتووە.

بە گوێرەی ڕاگەیەندراوەکەی پۆلیسی ھەنگاریا لە کۆتا ھەفتەی ساڵی ٢٠٢١دا، نزیکەی ٢٠٠٠ بۆ ٢٥٠٠ کۆچبەر ھەفتانە لە سنوری باشوری ئەو وڵاتەوە لەگەڵ سڕبیا و ڕۆمانیا پەڕیونەتەوە بەرەو وڵاتانی دیکەی ئەوروپا.

وتەبێژی وەزارەتی پلاندانانی عێراق ڕایگەیاندووە، لە ھەوڵەکانیان بەردەوامن بۆ ئەنجامدانی سەرژمێری لە ساڵی ٢٠٢٢، بەڵام ئەنجامدانی سەرژمێرییەکە پەیوەندی بە دابینکردنی پێداویستییە سەرەتاییەکان و ڕاھێنان و ڕێکخستنەوەی ئامێرەکانی پەیوەست بە سەرژمێرییەکەوە ھەیە.

ڕاشیگەیاندووە، لە ئێستادا پێویستە ناوەندێکی نیشتمانی بۆ کۆکردنەوەی داتا دروست بکرێت، ئامێری تابلێتیش دابین بکرێت کە سەرژمێرییەکە پێویستی بە ١٥٠ ھەزار ئامێر دەبێت، بۆ ئەنجامدانی کرداری ژماردن و ئامار، ئەوەش بە بڕبڕەی سەرژمێرییەکە دادەنرێت.

فەرمانگەی میدیا و زانیاری ھەرێم ئامارێکی لە بارەی زیادبوونی ڕێژەی گەشتیاری لە ھەرێمی کوردستان بڵاوکردەوە و ئاماژەی بۆ ئەوەکردووە، بەھۆی ئەو گرنگییەی بە کەرتی گەشتیاری دەدرێت، ساڵ بە ساڵ ھاتنی گەشتیاران بۆ ھەرێم زیادیکردووە، جگە لە ساڵی ٢٠٢٠، کە بەھۆی بڵاوبوونەوەی ڤایرۆسی کۆرۆنا، زۆربەی سنوورەکان لە جیھان داخرابوون.

بە پێی ئامارەکە ساڵی ٢٠١٥دا، ٧٨٢ ھەزار گەشتیار سەردانی ھەرێمی کوردستانیان کردووە، ٢٠١٦ ملیۆنێک و ٦٠٠ ھەزار گەشتیار و ٢٠١٧  دوو ملیۆن و ٢٠٠ ھەزار و ٢٠١٨ سێ ملیۆن و ٥٠ ھەزار گەشتیار و ٢٠١٩ سێ ملیۆن و ٧٠٠ ھەزار گەشتیار ڕوویان لە ھەرێمی کوردستان کردووە.

بەڵام لە ساڵی ٢٠٢٠ بەھۆی بڵاوبوونەوەی ڤایرۆسی کۆرۆنا و گرتنبەری ڕێوشوێنەکانی تەندروستی و داخستنی سنورەکان، ڕێژەی ھاتنی گەشتیار کەمبووەتەوە بۆ ٨٤٦ ھەزار گەشتیار، دواتر لە ساڵی ٢٠٢١ جارێکی تر ڕێژەی ھاتنی گەشتیار بۆ ھەرێمی کوردستان بەرزبووەتەوە و گەیشتووەتە ٤ ملیۆن گەشتیار.

فەرمانگەی میدیا و زانیاریی ڕاشیگەیاندووە، لە ماوەی حەوت ساڵدا سەردانی گەشتیاران بۆ ھەرێمی کوردستان بە ڕێژەی ٥٢٥٪ زیادیکردووە. 

"ئاری جەلال" سەرۆکی دەزگای لوتکە بۆ کاروباری ئاوارە و پەنابەران لە کۆنفرانسێکی ڕۆژنامەوانیدا ڕایگەیاند، لە ڕووداوەکەی ٢٤ی ١٢ی ٢٠٢١ی دەریایی ئیجە ٢٥ ھاووڵاتی ھەرێم بێسەروشوێن بوون، بە مەبەستی ئاشکراکردنی چارەنووسی قوربانییەکان، DNA و پڕۆفایل لە کەسوکاری قوربانییەکان وەردەگرێت و دۆسیەکانیان ڕەوانەی یۆنان دەکرێت.

"شەمۆل میرە" نوێنەری سەرۆکی پەرلەمانی کوردستانیش ئاماژەی بۆ ئەوەکرد، سەرۆکی پەرلەمان تێچووی DNA و پڕۆفایلەکانی گرتووەتە ئەستۆ.

"د. فەرھاد مەعروف" سەرۆکی سەنتەری مایکرۆجین لە سلێمانیش ڕایگەیاند، پێویستە لە ماوەی دوو ڕۆژدا DNA و پڕۆفایلی قوربانییەکان وەربگیرێت و ڕەوانەی یۆنان بکرێت.

"فازڵ حاجی" وتەبێژی بەڕێوەبەرایەتی ھاتوچۆی ھەولێر بە کوردسات نیوزی ڕاگەیاند، ڕۆژی پێنج شەممە کۆبوونەوەیان لەگەڵ ئەنجومەنی پێشانگەکانی ئۆتۆمبێل و کۆمپانیاکان کردووە، ڕاپۆرتێکیان بۆ وەزارەتی ناوخۆ بەرزکردووەتەوە، داوایان کردووە کارکردن بە گرێبەستی ئەلیکترۆنی ئۆتۆمبێل بۆ ماوەیەک ڕابگیرێت.

وتیشی، پێشنیازیان کردووە تا ١ی ٣ی ٢٠٢٢ ئەو بابەتە ڕابگرێت، بۆ ئەوەی پێداچوونەوە بە بڕیارەکەدا بکرێت، ڕۆژانی داھاتووش بە ڕەسمی بڕیارەکە لەسەر ڕاگرتن یان دواخستنی بۆ ماوەیەک بڵاودەکرێتەوە.

"فازڵ حاجی" ئاماژەی بۆ ئەوەشکرد، داوایانکردووە پێداچوونەوە بە بڕگە و بابەتەکانی گرێبەستەکە و ڕسوماتدا بکرێت و بڕیارەکە ھەموار بکرێتەوە.

پۆلیسی سلێمانی ئاشکرایکرد، دوای چاودێریکردنی تۆمەتبارێک لەلایەن ھێزەکانی پۆلیسەوە کە دراوی ساختەی ئەمریکی پێبووە و بە نیاز بووە ساخی بکاتەوە، پاش وەرگرتنی بڕیاری دادوەر، توانرا تۆمەتبارەکە دەستگیر بکرێت. لە کاتی دەستگیرکردنیشیدا دەستگیرا بەسەر بڕی ٨٥٠ دۆلاری ساختەدا لە جۆری ٥٠ دۆلاریی.

ڕاشیگەیاند کە تۆمەتبار (ئ، ب، ع) لەدایکبووی ١٩٩٢ دانی بە تاوانەکەیدا ناوە و بە بڕیاری دادوەر ڕاگیراوە و لێکۆڵینەوەکان بەردەوامە.

لەلایەکی تریشەوە بەڕێوەبەرایەتی پۆلیسی سلێمانی ئشکرایکرد، پاش کۆکردنەوەی زانیاری لەسەر تۆمەتبارێک کە بازرگان و بەکارھێنەری ماددەی ھۆشبەرە، مەفرەزەکانی پۆلیس توانیان تۆمەتبار (م، ی، م) لەدایکبووی ١٩٩٤ دەستگیر بکەن.

لە ئێستاشدا تۆمەتبار دانی بە تاوانەکەیدا ناوە و بە بڕیاری دادوەر ڕاگیراوە و دوای تەواوکردنی ڕێکارە یاساییەکان ڕادەستی ھۆبەی نەھێشتنی ماددە ھۆشبەرەکان لە ئاسایشی سلێمانی دەکرێت.

"زارا محەمەدی" لە شاری سنەی ڕۆژھەڵاتی کوردستان مامۆستای زمانی کوردی و ئەندامی ئەنجومەنی فەرھەنگی نۆژینە، لە لایەن دادگای سنەوە بە تۆمەتی ئەندامیەتی لە حیزبە کوردییەکاندا پێنج ساڵ زیندانی بەسەردا سەپێنرا، لە دادگای پێداچوونەوەش سزاکەی پەسەندکراوە.

پارێزەری "زارا محەمەدی" ڕایگەیاندووە، زارا تەنھا لەبەر چالاکی مەدەنی و فێرکردنی زمانی کوردی ئەو سزایەی بەسەردا سەپێنراوە و پەیوەندی بە حیزبە کوردییەکانەوە نییە.

ئەو سزایەی زار محەمەدی لە کاتێکدایە، لە دەستوری ئێراندا زمانی کوردی دانی پێدانراوە، لە زانکۆی کوردستانی شاری سنەش بەشی زمانی کوردی کراوەتەوە و ساڵانە ٤٠ خوێندکار لە قۆناغی بەکالۆریۆس وەردەگرێت.

دوای بڕیارەکەی بایدنیش، ئەگەر ئەنجومەنی پیران پەسەندی بکات، مایکڵ کورێلا سەرپەرشتی فەرماندەی فەرماندەیی ناوەندیی سوپای ئەمریکا دەکات لە خۆرھەڵاتی ناوەڕاست لە جێگەی ژەنەڕاڵ (کێنێس ماکێنزی).

فەرماندەی فەرماندەیی سوپای ئەمریکا بە درێژایی چەند ساڵی ڕابردوو، سەرپەرشتی ئۆپراسیۆنە سەربازییەکانی وڵاتەکەی کردووە لە عێراق و سوریا و ئەفغانستان و یەمەن.

ژەنەڕاڵ کورێلا دەرچووی ئەکادیمیای سەربازیی (ویست پۆینت)ە و، پێشتر بەشداری جەنگەکانی کۆسۆڤۆ و عێراقی کردووە، لە ساڵی ٢٠٠٥شدا لە ھێرشێکدا لە شاری موسڵ بە سەختی بریندار بووە.

پێشتریش فەرماندەی فیرقەی بە ناوبانگی ٨٢ی ھێزی پەڕەشووتی ئەمریکا بووە، ئەو فیرقەیە لە جەنگی دووەمی جیھانیدا بەشدار بووە لە کۆنترۆڵکردنی کەنارەکانی نۆرماندی.

حەمەی حمە سەعید وەزیری ڕۆشنبیری ھەرێم لە لێدوانێکدا بۆ ڕۆژنامەنووسان ڕایگەیاند، بە پێی ڕێنمایی ژمارە ٢ کار و چالاکی فێستیڤاڵەکانیان لە ھەرێم ڕێکخستووەتەوە، بە مەبەستی ئەوەی لە ساڵێکدا بە پێی داھات ١٢ فێستیڤاڵ لە شارەکانی ھەرێمی کوردستان ڕێکبخەن.

وتیشی، لە ماوەی دوو ساڵی ڕابردوودا بەھۆی نەبوونی بودجەی پێویست تەنھا ٤ فێستیڤاڵ لە ھەرێمی کوردستان بەڕێوەچووە.

لیژنەکانی پشکنین و بەدواداچوونی لقی ھەولێری سەندیکای پزیشکانی کوردستان سەنتەرێکی جوانکاریان داخست بە ھۆکاری ئەوەی کەسێک خۆی بە پزیشک ناساندووە و کاری جوانکاری لە سەنتەرەکەدا کردووە.

بە پێی زانیارییەکانی لیژنەی سەندیکای پزیشکان، بەشێک لە سەنتەری جوانکاری لە ڕۆژانی پشووی ڕەسمی کەسانێکی بە ناو پزیشک لە دەرەوەی ھەرێم دەھێنن بێ ئەوەی ڕێگەپێدانی سەندیکایان ھەبێت، ئەوان ڕێگەی کارکردنیان پێدەدەن.

ڕاشیگەیاندووە، چەند ڕۆژی ڕابردوو لەلایەن لیژنەی پشکنین و بەدواداچوونی لقی ھەولێری سەندیکای پزیشکان چاودێری یەکێک لەو سەنتەرانەکرا و دەرکەوت کەسێک خۆی بە پزیشک ناساندووە و کاری جوانکاری دەکات، ڕاستەوخۆ لایەنی پەیوەنیداری لێ ئاگاردارکراوەتەوە، دواتر لەلایەن پۆلیسی شارەوانی لە قائمقامیەتی قەزای ناوەندی ھەولێر ئەو سەنتەرەی داخست بۆ جێبەجێکردنی سزای یاسایی بەسەریاندا.

لە کۆڕبەندەکەدا چەندین بابەت و تەوەرەی جیاواز گفتوگۆیان لە بارەوە دەکرێت، بە دیاریکراویش تەوەرەکانی تایبەت بە ئاشتی و داھێنان و گەشەپێدان.

سەرچاوەیەکیش لە باڵێۆزخانەی عێراق لە قاھیرە ڕایگەیاند، کۆڕبەندەکە ماوەی دوو ڕۆژ دەخایەنێت و تیایدا گفتوگۆ دەکرێت، دەربارەی کاریگەرییەکانی ڤایرۆسی کۆرۆنا لەبەر ڕۆشنایی پێداچوونەوە بە ئامانجەکانی نێودەوڵەتی گەشەپێدانی بەردەوام بۆ ساڵی ٢٠٣٠.

ئاماژەی بەوەشکردووە، تەوەرێکی دیکەی کۆڕبەندەکە تەرخان دەکرێت بۆ داھاتووی کیشوەری ئەفریقا و پەرەسەندنەکانی بواری تەکنەلۆژیای دارایی و فێرکردن و تێڕوانی گەنجان بۆ جیھان لە دوای ھاتنی ڤایرۆسی کۆرۆنا.

لە گفتوگۆ کراوەکانی کۆڕبەندەکەشدا، چەندین تەوەری دیکە تاوتوێ دەکرێن لەوانە، داھاتووی وزە و بەردەوامی ئاسایشی ئاو و ئاشتی و ئارامی لە جیھان و ئاوەدانکردنەوەی ئەو ناوچانەی کە جەنگ و ململانێکانی تێدا ڕوویداوە.

ئاژانسەکانی ھەواڵ بڵاویانکردەوە، بەھۆی بڵاوبوونەوەی غازی سروشتی لە کافتریایەکی شاری چونگینگ لە باشوری خۆرئاوای چین، تەقینەوەیەک ڕوویداوە و بەھۆیەوە ١٦ کەس گیانیان لە دەستداوە و ١٠ی تریش برینداربوون، ئەوە جگە لەوەی کافتریاکە بە تەواوی داڕماوە و ڕووداوەکە زیانی ماددی زۆری لێکەوتووەتەوە.

عەبدولئەمیر تعێبان ئەندامی ھاوپەیمانی فەتح ڕایگەیاند، ناتوانرێت پێشبینی بکرێت بۆ ھەڵویستی گشتی ڕەوتی سەدر. وتیشی، تا ئێستا ھیچ قسەیەک نەکراوە لە بارەی دیاریکردنی کاندیدی پۆستی سەرۆک وەزیرانی داھاتووی عێراق.

تعیبان ھیوای خواست چوارچێوەی ھەماھەنگی شیعە لەگەڵ ڕەوتی سەدر ڕێکبکەون لە بارەی پێکھێنانی حکومەتی داھاتووی عێراق.

ئەوەش لە کاتێکدایە تا ئێستا ھێزە شیعییەکانی ناو چوارچێوەی ھەماھەنگی لەگەڵ موقتەدا سەدر سەرۆکی ڕەوتی سەدر نەگەیشتوونەتە ڕێککەوتنی کۆتایی، لە بارەی پێکھێنانی گەورەترین کوتلەی پەرلەمانیی، بۆ ئەوەی بتوانن حکومەتی زۆرینە پێکبھێنن.