هەواڵەکان
بڕیارە رۆژی یەك شەممە دانوستانەكانی ئەمریكا و ئێران لە ئیسلام ئاباد دەستپێبكەنەوە و ترەمپیش رەتیدەكاتەوە پارە بە ئێران بدات
ماڵپەری ئەكسیۆس لە زاری لێپرسراوێكی ئەمریكاوە بڵاویكردووەتەوە، بە ئەگەرێكی زۆرەوە وەفدی ئێران و ئەمریكا رۆژی یەك شەممە جارێكی تر لە ئیسلام ئاباد كۆدەبنەوە، ئەمریكا پێشنیازیكردووە بڕی 20 ملیار دۆلاری بلۆككراو بدرێتە ئێران لە بەرانبەر گواستنەوەی یۆرانیۆمە پیتێندراوەكەی ئێران.
دۆناڵد ترەمپ سەرۆكی ئەمریكاش لە وەڵامدا لە تۆڕی كۆمەڵایەتی تروس سۆشیاڵ رایگەیاند، هیچ پارەیەك نادەن بە ئێران و هەموو پاشماوە ئەتۆمییەكانیشی دەبەن.
وتیشی، ئێران رەزامەندی دەربڕیووە پیتاندنی یۆرانیۆم رابگرێت و گەروی هورمزیش بە هەمیشەیی بكاتەوە.
لێپرسراوێكی باڵای ئەمنیی پاكستان بە ئاژانسی رۆیتەرزی راگەیاندووە، گفتوگۆكانی نێوان ئەمریكا و ئێران گەیشتووەتە قۆناغێكی زۆر باش و گەیشتن بە رێككەوتنیش نزیكە لە قۆناغی كۆتایی، چاوەڕوان دەكرێت لە كۆبوونەوەی داهاتووی نێوان ئەمریكا و ئێراندا یاداشتێكی لێكتێگەیشتن ئیمزا بكرێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێکدا دەڵێت: پێشوازی لە راگەیاندنە نوێیەکەی سەرۆک دۆناڵد ترەمپ و بەڕێز عەباس عراقچی دەکەین سەبارەت بە کردنەوەی گەرووی هوورمز.
دەقی پەیامەکە...
پێشوازی لە راگەیاندنە نوێیەکەی سەرۆک دۆناڵد ترەمپ و بەڕێز عەباس عێراقچی دەکەین سەبارەت بە کردنەوەی گەرووی هوورمز و هەنگاوە ئەرێنییەکان بۆ گەیشتن بە ئاشتی، بەتایبەتی ئاگربەست لە لوبنان.
ئەم پێشهاتە هەنگاوێکی گرنگە بۆ کەمکردنەوەی گرژییەکانی ناوچەکە لەم ساتە هەستیارەدا. کردنەوەی ئەم رێڕەوە ئاوییە سەرەکییە نەک هەر متمانە بۆ بازاڕی وزەی جیهانی دەگەڕێنێتەوە، بەڵکو راستەوخۆش بەشدارە لە سەقامگیریی و بوژانەوەی ئابووریی ناوچەکە.
هانی هەموو لایەک دەدەین بۆ بەردەوامبوون لەسەر ئەم رێگایە، لەسەر بنچینەی ئەم هەنگاوە لێکتێگەیشتنە کاتییەکان بگۆڕن بۆ رێککەوتنی هەمیشەیی کە خزمەتی بەرژەوەندییەکانی هەموو گەلانی ناوچەکە بکات.
بافڵ جەلال تاڵەبانی
سەرۆکی یەکێتیی نیشتمانیی کوردستان
وەزارەتی تەندروستیی هەرێمی کوردستان لەبارەی کەیسی گیانلەدەستدانی 'غەزەل مەولان' راگەیەنراوێکی بڵاوکردووەتەوە و تێیدا هاتووە: دامودەزگاکانی تەندروستی هەمیشە پێویستە بە ئەرکی مرۆڤانەی پاراستنی گیانی هەرکەسێک هەڵبستن
دەقی راگەیەنراوەکە:
ڕاگەیاندراوێک لە وەزارەتی تەندروستی ...
دوابەدوای ڕەوانەکردنی بریندار (غەزال مەولان) لە نەخۆشخانەی (شۆڕش)ی دەزگای تەندروستی پێشمەرگە بۆ نەخۆشخانەی (بەخشین)ی کەرتی تایبەت و ئەنجامنەدانی ڕێککاری پزیشکی و وەرنەگرتنی لە نەخۆشخانە و دەرەنجام گیان لەدەستدانی.
وەزارەتی تەندروستی حکومەتی هەرێمی کوردستان ڕاستەوخۆ لەگەڵ تەندروستی سلێمانی لەسەر هێڵ بووە لەگەڵ داواکاری گشتی پاڵپشت بە یاسای مافی نەخۆش ژمارە 4 ی ساڵی 2020 و پەیڕەوی لێکۆڵینەوە ژمارە 16ی ساڵی 2022، ڕاسپاردەکراون بۆ لێکۆڵینەوەکردن بۆ ئەم دۆسیەیە بۆ ئاشکراکردن و دڵنیابوونەوە لەتەواوی ڕاستیەکانی ئەم ڕوداووە بۆ وەرگرتنی ڕێکاری یاسایی و بەسزا گەیاندنی سەرپێچیکاران کە بەدڵنیایی جێگای قەبوڵکردن نیە و ڕێکاری پێویست دەگیرێتەبەر.
دامودەزگاکانی تەندروستی هەمیشە پێویستە بە ئەرکی مرۆڤانەی پاراستنی گیانی هەرکەسێک هەڵبستن و نابێت بکەونە ژێر هیچ گوشار و نیازێکی سیاسی.
وەزارەتی تەندروستی
حکومەتی هەرێمی کوردستان
16 نیسان 2026
سەرۆک کۆماری دەڵێت، گفتوگۆ راستەوخۆکانیان لەگەڵ ئیسرائیلدا هەستیار و چارەنووسسازن، راگرتنی شەڕیش دەروازەیەکە بۆ بەردەوامبوونی دانوستانەکانیان
جۆزێف عۆن سەرۆک کۆماری لوبنان رایگەیاند، هەڵوێستی رەسمیی دەوڵەت جێگیرکردنی ئاگربەست و زامنکردنی کشانەوەی هێزەکانی ئیسرائیلە لە باشوری وڵاتەکەیان.
وتیشی، لەم سەعاتانەی دواییدا پلانەکان بەو ئاڕاستەیەن، سوپای لوبنان تا سەر سنورە نێودەوڵەتییەکانی باشور بڵاوەی پێبکرێت، هەموو جۆرە دەرکەوتەیەکی چەکداریش لەو ناوچانە کۆتایی پێ بهێنرێت.
دڵنیاییشی دایە دانیشتووانی باشوری لوبنان، دوای گەڕانەوەیان بۆ گوند و ماڵەکانیان، سوپا دەیانپارێزێت و هیچ هێزێکی چەکدار جگە لە سوپا و هێزە ئەمنییە رەسمییەکانی وڵات لە ناوچەکەدا نابینرێن.
ئاماژەی بەوەش کرد، ئێستا لوبنان لەبەردەم رەوشێکی نوێ و هەستیاردایە، نابێت بە هیچ شێوەیەک ئەم دەرفەتە مێژووییە لەدەست بدرێت.
وەزیری بەرگریی ئیسرائیل: داماڵینی چەک لە حزبوڵا چ بە رێگەی سەربازی بێت یان سیاسی، هێشتا ئامانجی سەرەکیی جەنگەکەیە و ئێمە پابەندین پێوەی و تائێستاش 1700 چەکداری ئەو گروپەمان لەناوبردووە
یسرائیل کاتز وەزیری بەرگریی ئیسرائیل رایگەیاند، سوپای ئیسرائیل بەردەوام دەبێت لە کۆنتڕۆڵکردنی تەواوی ئەو ناوچانەی کە پاکی کردوونەتەوە و دەستی بەسەردا گرتوون و داماڵینی چەکی حزبوڵاش، چ بە رێگەی سەربازی بێت یان سیاسی، هێشتا ئامانجی سەرەکیی جەنگەکەیە و پابەندن پێوەی.
وتیشی، مانۆڕە زەمینییەکەی ناو خاکی لوبنان و هێرشکردنە سەر حزبوڵا دەستکەوتی زۆری هەبووە و تائێستا توانیویانە 1700 چەکداری ئەو گروپە لەناوبەرن، بەڵام هێشتا پرۆسەکە بە تەواوی کۆتایی نەهاتووە.
ئەوەشی روونکردەوە، سوپاکەیان لە لوبنان لە ناو جەرگەی جەنگدان لە دژی حزبوڵا، تەنها ئێستا شەڕەکە بۆ ماوەی 10 رۆژ راگیراوە و ئاگربەست کراوە.
وەزیری بەرگریی فەرەنسا رایگەیاند، وڵاتانی فەرەنسا، بەلجیکا و هۆڵەندا خاوەنی هێز و توانایەکی باڵای مینڕێژکردن و پاککردنەوەی دەریاکانن، کە دەتوانرێت بەکاربهێنرێت بۆ مسۆگەرکردنی تێپەڕبوونی کەشتییە بازرگانییەکان لە گەروی هورمز
کاترین ڤۆترین، وەزیری بەرگریی فەرەنسا لە لێدوانێکی نوێدا بە ئاژانسی رۆیتەرزی راگەیاندووە، پلانەکەی ئەوان تەنها لایەنێکی بەرگریی هەیە و بە هیچ شێوەیەک هێرشبەرانە نییە، ئامانج لێی تەنها پاراستنی سەلامەتی رێڕەوە ئاوییە نێودەوڵەتییەکانە.
بابەتەکە لە کۆبوونەوەی ئەمڕۆی ئەنجومەنی بەرگریی و ئاسایشیی فەرەنسا بە سەرۆکایەتی ئیمانوێل ماکرۆن تاوتوێ دەکرێت، ئەوەش لە کاتێکدایە کە هەوڵە نێودەوڵەتییەکان بۆ گەڕاندنەوەی سەقامگیری بۆ ناوچەکە چڕبوونەتەوە.
گەروی هورمز کە یەکێکە لە گرنگترین ڕێڕەوە ئاوییەکانی جیهان، لە کاتی گرژییە سەربازییەکاندا، ئێران چەندین جار هەڕەشەی داخستنی گەروەکەی کردووە و لە ئێستاشدا ئەو وڵاتە "مینی دەریایی لە گەروەکە چاندووە و وەک هەڕەشەیەکی کرداریی بەکاریدەهێنێت".
سەرۆكی فەرەنسا و سەرۆك وەزیرانی بەریتانیا رێكخستنی لوتكەیەك تاوتوێ دەكەن بە مەبەستی كردنەوەی گەروی هورمز
بڕیارە ئەمڕۆ ئیمانوێل ماكرۆن سەرۆكی فەرەنسا و كیەر ستارمەر سەرۆك وەزیرانی بەریتانیا كۆببنەوە بۆ رێكخستنی لوتكەیەكی تایبەت بە وڵاتانی بەشدارنەبووی شەڕی دژی ئێران، بۆئەوەی پلانێكی گونجاو دابنێن بەمەبەستی دانانی چەند رێكارێكی سەلامەت بۆ كردنەوەی گەرووی هورمز و هاتوچۆی كەشتییەكان.
ماكرۆن ئاماژەی بەوەكردووە، ئەركی دابینكردنی ئاسایش بۆ گەروی هورمز تەنها بەرگریكارانە دەبێت و لەكاتی گونجاودا لەو گەروە جێبەجێ دەكرێت.
رۆلاند لێسكیور وەزیری دارایی فەرەنساش رایگەیاندووە، وڵاتانی گروپی حەوت ئامادەن بۆ روبەڕوبوونەوەی لێكەوتە ئابورییەكانی شەڕی دژی ئێران، بەڵام هەرگیز بە پێدانی باج بە تاران رازی نابن بۆ تێپەڕین بە گەروی هەرمزدا.
لەدوای راگەیاندنی ئاگربەستی نێوان ئەمریكا و ئێرانیش، دۆناڵد ترەمپ سەرۆكی ئەمریكا داوای لە وڵاتانی ئەوروپا كرد پلانێك بۆ كردنەوەی گەروی هورمز دابنێن.
سەرۆكی ئەمریكا ئاگربەستێكی 10 رۆژی لەنێوان ئیسرائیل و لوبنان راگەیاند و دەشڵێت: رۆژانێكی مێژوویی دەبێت بۆ لوبنان.
دۆناڵد ترەمپ، سەرۆكی ئەمریكا رایگەیاند، گفتوگۆی لەگەڵ سەرۆك وەزیرانی لوبنان و ئیسرائیل كردووە و لە بەرەبەیانی ئەمڕۆ هەینییەوە بۆماوەی 10 رۆژ ئاگربەست لەنێوان ئەو دوو وڵاتە رادەگەیەنرێت.
راشیگەیاند، بانگهێشتی سەرۆك وەزیرانی ئیسرائیل و لوبنان دەكات بۆ دەستپێكردنی یەكەم دانوستانی راستەوخۆ لە واشنتۆن.
ترەمپ ئاگربەستەكە بە رۆژانێكی مێژوویی بۆ لوبنان ناودەبات و خوازیاریشە، حزبوڵا لەماوەی ئاگربەستدا بەشێوەیەكی دروست مامەڵە بكات.
هاوكات، بنیامین ناتانیاهۆ سەرۆك وەزیرانی ئیسرائیل رایگەیاند، داواكاری حزبوڵا بۆ كشانەوەیان لە خاكی لوبنان رەتدەكەنەوە و ئەو پشتێنە ئەمنیەی بە درێژایی 10 كیلۆمەتر لەناو خاكی لوبناندا دایانناوە وەك خۆی دەمێنێتەوە.
دەشڵێت، بانگهێشتنامەكەی سەرۆكی ئەمریكا هەلێكی مێژوویی لەبەردەم لوبنان دەڕەخسێنێت و رێگە خۆشدەكات بۆ رێككەوتن لەسەر ئاشتییەكی درێژخایەن، بە رەچاوكردنی داواكارییەكانی ئیسرائیل و چەكداماڵینی حزبوڵا.
بافڵ جەلال تاڵەبانی دەنگۆی دیارنەمانی چەكی ئەمریكی لەلایەن كوردەكانەوە رەتدەكاتەوە و دەڵێت، دەتوانن بیسەلمێنن لە سلێمانییەوە هیچ چەكێك لە ئەمریكاوە وەرنەگیراوە و نەبراوە
بافڵ جەلال تاڵەبانی سەرۆكی یەكێتیی نیشتمانیی كوردستان لە چاوپێكەوتنێكدا لەگەڵ رۆژنامەنوسی بەریتانی پییرس مۆرگان لە وەڵامی بانگەشەی دۆناڵد ترەمپ بۆ ناردنی چەك و دیارنەمانیان لەلایەن كوردەكانەوە رایگەیاند، دەتوانین بیسەلمێنن هیچ كەسێك ئەو چەكانەی نەبردووە و لێپرسراوانی ئەمریكا دەتوانن لێكۆڵینەوە لەو بابەتە بكەن.
لە بەشێكی چاوپێككەوتنەكە سەرۆك بافڵ رایگەیاند، پێویستە ئەمریكا هەوڵی رێككەوتنێك بدات كە كێشەكان لە ریشەوە چارەسەر بكات و ئەمەش لە بەرژەوەندی كۆمارییەكان دەبێت، بەڵام دەبێت ئارامی لەسەر بگیرێت.
لە بارەی گۆڕینی دەسەڵاتی ئێرانەوە سەرۆكی یەكێتی نیشتمانی كوردستان وتی، هێرشە ئاسمانییەكانی سەر ئێران كاریگەری پێچەوانەی هەبووە و خەڵكی زیاتر یەكگرتووبوون و ناتوانرێت بە بۆردومانكردن سۆزی خەڵك رابكێشێت.
دەست لە كاركێشانەوەی رێبوار تەها لە پۆستی پارێزگاری كەركوك پەسەندكرا و محەمەد سەمعان بە پارێزگاری نوێ هەڵبژێردرا.
پەیامنێری كوردسات نیوز رایگەیاند، رێبوار تەها دەستی لە پۆستی پارێزگار كێشایەوە و محمد سەمعان بە دەنگی 12 ئەندامی ئەنجومەنی پارێزگا بە پارێزگاری نوێی كەركوك هەڵبژێردرا.
بڕیاریشە لە بەشی دووەمی كۆبوونەوەی ئەنجومەنی پارێزگاكە دەنگ لەسەر پۆستە ئیدارییەكانی تری پارێزگاكە بدرێت كە 13 پۆستیان بۆ یەكێتیی نیشتمانیی كوردستان یەكلاكراونەتەوە.
دوای هەڵبژاردنیشی بە پارێزگاری كەركوك، محەمەد سەمعان ستایشی هەڵوێستەكانی بافڵ جەلال تاڵەبانی سەرۆكی یەكێتی كرد و دوپاتیشیكردەوە درێژە بە كارە گرنگ و پڕ بایەخەكانی رێبوار تەها دەدات.
بەپێی زانیارییەكانی كوردسات نیوز، پۆستی جێگری سەرۆكی ئەنجومەنی پارێزگا و قائیمقامی قەزای ناوەندی كەركوك، قائیمقامی قەزای داقوق و سێ یاریدەدەر و پێنج راوێژكاری پارێزگار و فەرماندەی پۆلیسی كەركوك و بەڕێوەبەری ناحیەی قەرەهەنجیر بۆ كورد دەبێت.
سەرۆکی ئەمریکا: ئێران رازی بووە بە دەستبەرداربوون لە دروستكردنی چەكی ئەتۆمی و نزیكیشین لە رێككەوتن لەگەڵ ئەو وڵاتە
دۆناڵد ترەمپ سەرۆکی ئەمریکا لە کۆنگرەیەکی رۆژنامەوانیدا رایگەیاند، لەگەڵ ئێراندا نزیکن لە رێککەوتن و لە زۆر خاڵدا هاوڕاین.
وتیشی، سەرەتای هەفتەی داهاتوو دانوستان دەستپێدەكاتەوە و ئێران داوای رێككەوتن دەكات و ئێمەش میهرەبان دەبین لەگەڵی.
ئاماژەی بەوەشداوە، ئەگەر پێویست بكات ماوەی ئاگربەست درێژدەكەینەوە و ئێرانیش رازیبووە چەكی ئەتۆمی دەستبەرداری دروستکردنی چەکی ئەتۆمی بێت.
سەرۆكی ئەمریكا ئاگربەستی نێوان ئیسرائیل و لوبنانی بۆ ماوەی 10 رۆژ راگەیاند
دۆناڵد ترەمپ سەرۆكی ئەمریكا لە تۆڕی كۆمەڵایەتی تروس سۆشیاڵ بڵاویکردەوە، گفتوگۆی لەگەڵ سەرۆك وەزیرانی لوبنان و ئیسرائیل كردووە و بۆ ماوەی 10 رۆژ ئاگربەست لە نێوان ئەو دوو وڵاتە لە سەعات 12ی ئەم شەوەوە رادەگەیەندرێت.
راشیگەیاند، بانگهێشتی سەرۆك وەزیرانی هەردوولا دەكات بۆ دەستپێكردنی یەكەم دانوستانی راستەوخۆ لە واشنتۆنی پایتەختی ئەمریكا، ئەوەش بەئامانجی رێككەوتن لەسەر ئاشتییەکی درێژخایەن.
ئەوەشی روونکردەوە، جەی دی ڤانس جێگری سەرۆكی ئەمریكا، ماركۆ رۆبیۆ وەزیری دەرەوەی ئەمریكا و دان رەیزن كەین سوپاسالاری ئەمریكای راسپاردووە بۆ كاركردن لەسەر دانوستانەكانی نێوان ئیسرائیل و لوبنان و گەیشتن بە رێككەوتن.
كۆبوونەوەی ئەنجومەنی پارێزگای كەركوك بۆ ئاڵوگۆری پۆستی پارێزگار و ئەنجامدانی چەند گۆڕانكاریەك لە پۆستە ئیداریەكانی پارێزگاكە بەڕێوەدەچێت و رێككەوتن كراوە زۆرینەی پۆستەكان بۆ كورد بێت
بەپێی زانیارییەكانی كوردسات نیوز و بەپێی رێككەوتنی لایەنە سیاسیەكانی كەركوك، پۆستی قائیمقامی قەزای ناوەندی كەركوك، قائیمقامی قەزای داقوق و جێگری پارێزگاری كەركوك، سێ یاریدەدەر و پێنج راوێژكاری پارێزگار و فەرماندەی پۆلیسی كەركوك و بەڕێوەبەری ناحیەی قەرەهەنجیر، بۆ كورد دەبێت.
هەربەپێی زانیارییەكانی كوردسات نیوز، لێپرسراوانی كورد لە كەركوك هەمان دەستكراوەیی پێشوویان دەبێت لەڕوی راگەیاندنی پڕۆژە و خزمەتكردنی هاووڵاتیانی پارێزگاكە.
بەپێی رێككەوتنەكان هەر یەك لە ئاڤێستا شێخ محەمەد دەكرێت بە قائیمقامی ناوەندی كەركوك و عەدنان حوسێن، دەبێتە بە قائیمقامی قەزای داقوق.
حكومەتی سوریا تەواوی بنكە سەربازییەكانی وەرگرتەوە كە پێشتر هێزەكانی ئەمریكای تێدا جێگیربوون و وەزارەتی دەرەوەی سوریاش رایگەیاند، رادەستكردنەوەی بنكەكان بە هەماهەنگییەكی پیشەیی لەگەڵ واشنتۆن ئەنجامدرا
وەزارەتی دەرەوەی سوریا لە راگەیەنراوێكدا ئاماژەی بەوە كرد، تەواوی ئەو بنكە سەربازییانەی وەرگرتووەتەوە كە پێشتر هێزەكانی ئەمریكا لە چوارچێوەی هاوپەیمانی نێودەوڵەتی دژی داعش تێیاندا جێگیر بوون.
جەختیشیكردەوە، پڕۆسەی رادەستكردنەكە بە هەماهەنگییەكی تەواو و ئاستێكی پیشەیی بەرز لە نێوان دیمەشق و واشنتۆن ئەنجامدراوە.
راگەیەنراوەكە دوای ئەوە دێت، وەزارەتی بەرگری سوریا پشتڕاستی كردەوە، هێزەكانیان بنكەی "قەسرەك"یان لە باكوری رۆژهەڵاتی وڵات وەرگرتووەتەوە.
ئەو پەرەسەندنە سەربازییە دوای كشانەوەی یەكجارەكی هێزەكانی هاوپەیمانان دێت لەو ناوچانەی كە ساڵانێكی زۆر بوو لەژێر كۆنتڕۆڵی ئەواندا بوون .
فەرماندەیی ناوەندیی هێزەكانی ئەمریكا رایگەیاند، لە رۆژهەڵاتی ناوەڕاست ئیسرائیل باشترین هاوبەشیانە و بەیەكەوە كاردەكەن بۆ بەدیهێنانی ئامانجەكانیان
بڕاد كوپەر فەرماندەی فەرماندەیی ناوەندیی هێزەكانی ئەمریكا رایگەیاند، لە رۆژهەڵاتی ناوەڕاست هیچ هاوبەشێكیان نییە ئەوەندەی ئیسرائیل لێیانەوە نزیك بێت و لە دوو هەفتەی رابردووشدا، سوپاسالاری ئیسرائیلی بینیوە و لەگەڵیدا كۆبووەتەوە.
وتیشی، بەیەكەوە لەگەڵ ئیسرائیل كاردەكەن بۆ بەدیهێنانی ئامانجەكانیان و بەیەكەوە پلانیان بۆ داهاتوو داناوە.
دەشڵێت، كەشتیی جەنگی یو ئێس ئێس تریپۆلی بە یاوەری زیاتر لە سێ هەزار و 500 سەربازی مارینز و دەریاوان، ئەركی سەپاندنی گەمارۆی دەریاییان بەسەر سەرجەم بەندەرەكانی ئێراندا دەستپێكردووە.
وەزارەتی گەنجینەی ئەمریكا سەپاندنی سزای نوێی بەسەر 24 لایەن و كەسایەتی باڵا و كەشتی ئێرانیدا راگەیاند.
وەزارەتی گەنجینەی ئەمریكا رایگەیاند، سزای نوێیان بەسەر 24 لایەن و كەشتی ئێرانی و كەسایەتی باڵای ئەو وڵاتەدا سەپاندووە، كە لە ناویاندا عەلی شەمخانی راوێژكاریی رابەری باڵای پێشووی ئێران و كوڕەكەی و ژمارەیەك ئەندامی خێزانەكەی تێدایە.
وەزارەتی گەنجینەی ئەمریكا ئەوەی خستووەتەڕوو، سزاكان توندن و ئامانج لێیان وشككردنی سەرجەم سەرچاوە داراییەكانی ئێرانە، كە كوڕەكەی شەمخانی خاوەنی تۆڕیكی كۆمپانیایی گەورەیە و لە رێگەیانەوە ئاسانكاری بۆ هەناردەی نەوتی ئێران دەكات و پشتیوانی دارایی سوپای پاسداران دەكات.
وەزارەتەكە جەختی لەوەشكردووەتەوە، هەر قەوارەیەك مامەڵە لەگەڵ نەوتی ئێران بكات و پاڵپشتی تۆڕەكانی قاچاغچێتی ئەو وڵاتە بكات، لەلایەن ئەمریكاوە رووبەڕووی سزا دەبێتەوە.