هەواڵەکان
دۆناڵد ترەمپ، سەرۆکی ئەمریکا رێنمایی نوێی لەبارەی پڕۆسەی کشانەوەی هێزەکانی وڵاتەکەی لە عیراق دەرکرد و جەختی لەسەر رێگریکردن لە دووبارەبوونەوەی سناریۆکەی ئەفغانستان کردەوە.
میدیا جیهانییەکان لە زاری بەرپرسێکی باڵای ئەمریکییەوە بڵاویانکردەوە، واشنتۆن بڕیاری داوە لە دوای پڕۆسەی کشانەوەی لە عیراق، هیچ جۆرە چەک و کەرەستەیەکی سەربازی لە دوای خۆی بەجێنەهێڵێت.
بەپێی وتەی سەرچاوەکە، ترەمپ فەرمانی راستەوخۆی داوە بۆ ئەوەی رێگری لە دووبارەبوونەوەی ئەو کەموکوڕی و ئاڵۆزییانە بکرێت کە لە کاتی کشانەوەی هێزەکانی ئەمریکا لە ئەفغانستان روویان دا.
ئەمڕۆ پیشانگەی "نێکست ستێپ" لە کارگەی کولتوری سلێمانی بە مەبەستی راوێژ پێدان بە دەرچووانی پۆلی 12ـی ئامادەیی سەبارەت بە پڕکردنەوەی فۆرمی زانکۆلاین دەستپێدەکات و بۆ ماوەی سێ رۆژ بەردەوام دەبێت.
ئەمڕۆ شەممە پیشانگەی نێکست ستێپ لەناو سلێمانی لە کارگەی کولتوری سلێمانی بۆ ئەو خوێندکارانەی دەرچووی پۆلی 12ـی ئامادەیی کە دەیانەوێت فۆرمی زانکۆلاین پڕبکەنەوە دەستپێدەکات.
شنیار سەلام یاریدەدەری سەرپەرشتیاری کۆمەڵەی خوێندکارانی کوردستان رایگەیاند، ئەمڕۆ یەکەم رۆژی پیشانگەکەیە و هەتا سێ ڕۆژی دیکە لەناو سلێمانی بەردەوام دەبێت، پاشان لە ناوچەکانی دیکە شوێن دیاریدەکەین بۆ هەمان مەبەست.
ئاشکرای کرد، لە پیشانگەی نێکست ستێپدا نوێنەری زیاتر لە 30 زانکۆ و پەیمانگا ئامادەن، کە خوێندکار دەتوانێت ڕاستەوخۆ ڕاوێژیان لێ وەربگرێت، هاوکات 400 سکۆلەرشیپی تایبەت بە خوێندن لە پەیمانگە و زانکۆ تایبەتەکان هەیە، بۆ ئەو خوێندکارانەی کە دەیانەوێت بێبەرانبەر بخوێنن.
عەباس عراقچی، وەزیری دەرەوەی ئێران، وەڵامی لێدوانەکانی جان نۆئێل بارۆ، وەزیری دەرەوەی فەرەنسای لەبارەی رەوشی ناوخۆی ئێران دایەوە و مێژوی فەرەنسای لە جەزائیر بەبیری هێنایەوە و پێی راگەیاند: بەسیەتی فرمێسکی تیمساح.
عراقچی لە پەیامێکدا بۆ بارۆ ئاماژەی بەوە کرد: لە کاتی جەنگی سەربەخۆیی جەزائیردا ملیۆنێک و 500 هەزار جەزائیری بە دەستی فەرەنسا کوژراون، بەڵام پاریس تاوەکو ئێستاش رەتیدەکاتەوە داوای لێبوردن لە تاوانەکانی بکات.
وەزیری دەرەوەی ئێران لە تۆڕی کۆمەڵایەتیی "ئێکس" نووسیویەتی: جەنابی بارۆ، بەسیەتی فرمێسکی تیمساح! بێدەنگیتان لە بەرانبەر ئەو کۆمەڵکوژییەی ئەمریکا دژ بە منداڵانی قوتابیمان ئەنجامی دا، وەڵامی سەرجەم قسەکانتان دەداتەوە.
ئەم وەڵامەی عێراقچی دوای ئەوە هات کە وەزیری دەرەوەی فەرەنسا لەبارەی رەوشی ناوخۆیی ئێرانەوە رایگەیاندبوو: دەبێت ئێرانییەکان مافی دیاریکردنی چارەنووسی خۆیانیان بە سەربەستی هەبێت و رێز لە مافە سەرەتاییەکانیان بگیرێت.
فڕۆکەخانەی نێودەوڵەتیی جەلال تاڵەبانی دەستپێکردنەوەی گەشتە ئاسمانییەکانی هێڵی ئاسمانی "تورکش ئێرلاین"ی بۆ فڕۆکەخانەکە راگەیاند.
بەشی پەیوەندییە گشتییەکان و راگەیاندنی فڕۆکەخانەی نێودەوڵەتیی جەلال تاڵەبانی ئاشکرایکرد، بەپێی ئەو خشتەیەی لەلایەن کۆمپانیای 'تورکش ئێرلاین'ـەوە بۆ فڕۆکەخانەکە نێردراوە، وادەی دەستپێکردنەوەی گەشتەکان دیاریکراوە.
ئاماژەی بەوەشکرد، وابڕیارە لە رۆژی 25ـی10ـی2026ـوە گەشتەکان دەستپێبکەنەوە و هەفتانە چوار گەشتی ئاسمانی لە نێوان 'ئیستەنبوڵ - سلێمانی – ئیستەنبوڵ' ئەنجام بدرێت.
فڕۆکەخانەی نێودەوڵەتیی جەلال تاڵەبانی راشیگەیاند، لە ئێستادا خشتەکەیان بەم شێوەیەیە بەڵام لە 14ـی12ـی2026 دەبێتە گەشتی رۆژانە واتا هەموو رۆژانی هەفتە گەشتی ئیستەنبوڵ – سلێمانی و بەپێچەوانەشەوە دەبێت.
کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، پلەکانی گەرما روو لە دابەزین دەکەن.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان ساماڵ دەبێت لەگەڵ بوونی تۆزێکی کەم لە کەشدا، پلەکانی گەرماش لە ناوەڕاست و رۆژئاوای هەرێم بە بەراورد بە تۆمارەکانی دوێنێ بە دوو بۆ سێ پلە دادەبەزن، بەڵام لە رۆژهەڵاتی هەرێم نزیک دەبنەوە لە تۆمارکراوەکانی دوێنێ.
ئاماژەی بەوەشکرد، سبەینێ ئاسمان ساماڵ دەبێت و خێرایی و ئاراستەی با وەک خۆی دەمێنێتەوە. هەروەها پلەکانی گەرما لە ناوەڕاست و رۆژئاوای هەرێم نزیک دەبنەوە لە تۆمارەکانی ئەمڕۆ، بەڵام لە ناوچەکانی رۆژهەڵاتی هەرێم بە نزیکەیی دوو بۆ سێ پلە دابەزین بەخۆیانەوە دەبینن بە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر: 35 پلەی سیلیزی
پیرمام: 33 پلەی سیلیزی
سلێمانی: 34 پلەی سیلیزی
چەمچەماڵ: 36 پلەی سیلیزی
هەڵەبجە: 36 پلەی سیلیزی
دهۆک: 34 پلەی سیلیزی
زاخۆ: 35 پلەی سیلیزی
ئاکرێ:35 پلەی سیلیزی
گەرمیان:39 پلەی سیلیزی
حاجی ئۆمەران: 25 پلەی سیلیزی
سەرۆكی پەرلەمانی ئێران هۆشداریی دەداتە ئەمریكا و سعودیە و دەڵێت، سەردەمی خستنەخوارەوەی فڕۆكە جەنگییەكانی ئێف 35 و ئێف 15 دەستیپێكردووە.
محەمەد باقر قالیباف سەرۆكی پەرلەمانی توركیا لە تۆڕی كۆمەڵایەتی ئێكس بڵاویكردەوە: سەردەمی راوەدونانی فڕۆكە سەربازییەكانی ئێف 35 و ئێف 15 و خستنەخوارەوەیان دەستیپێكردووە، وڵاتانی خاوەن فڕۆكەكانیش ناچارن تەنها بڵێن زیانیان بەركەوتووە.
وتیشی: ئەو روداوانەی پێشتر كابووسێكی ترسناك بوون، ئێستا بوونەتە واقعێكی رۆژانە و پێویستە لایەنی بەرانبەر لەمەودوا وەك واقعێكی نوێ مامەڵەی لەگەڵدا بكات.
لەماوەی رابردووشدا ئەمریكا بە ئامانجگرتنی فڕۆكەیەكی جەنگیی ئێف 35ی لە ئاسمانی ئێران ئاشكراكرد و سعودیەش بە ئامانجگرتنی سێ فڕۆكەی ئێف 15ی لە شەڕی دژی حوسییەكانی یەمەن راگەیاند.
وەزیری دادی توركیا دەڵێت، پرۆسەی ئاشتی پێی ناوەتە قۆناغێكی نوێوە و بڕگەكانی یاسای چوارچێوەش دەخرێنە بواری جێبەجێكردنەوە.
ئاكن گورلیك وەزیری دادی توركیا رایگەیاند: پرۆسەی ئاشتی گەیشتووەتە قۆناغێكی زۆر باش و پێشكەوتوو، بەتایبەتیش دوای ئەوەی پەرلەمانی توركیا بە دەنگی 467 پەرلەمانتار یاسای چوارچێوەی تایبەت بە پرۆسەی پەسەندكرد.
وتیشی: لەئێستادا قۆناغی دووەمی پرۆسەی ئاشتی دەستیپێكردووە، بەڵام جێبەجێكردنی كردارییانەی بڕیارەكان بەستراوەتەوە بەوەی ئەنجومەنی ئاسایشی نیشتمانی توركیا پرۆسەی چەكدانانی پەكەكە پشتڕاستبكاتەوە بۆئەوەی تەواوی هەنگاوەكان بچنە بواری جێبەجێكردنەوە.
وەزیری دادی توركیا ئاماژەی بەوەشكرد، هاووڵاتیان پێشوازییەكی گەرمیان لەو هەنگاوانە كردووە و زۆر دڵخۆشن بە بەڕێوەچوونی پرۆسەی ئاشتی و ئاواتەخوازن لەو رێگەیەوە سەقامگیریی هەمیشەیی بۆ توركیا بگەڕێتەوە.
خەونەکەی ترەمپ بە شێوازێکی تر هاتەدی؛ ئەمریکا بێکڕینی گرینلاند، هەژموونی سەربازی و ئەمنیی خۆی لە جەمسەری باکور بەهێزتر دەکات.
ئەمریکا، دانیمارک و گرینلاند گەیشتنی خۆیان بە تێگەیشتنێکی ئەمنیی نوێ راگەیاند کە ئامادەیی سەربازیی ئەمریکا لە دورگە ستراتیژییەکەدا فراوانتر دەکات، لە هەمان کاتدا سەروەریی دانیمارک بەسەر دورگەکەوە وەک خۆی دەهێڵێتەوە، ئەم هەنگاوەش کۆتایی بە چەندین مانگ لە گرژیی دیپلۆماسی دەهێنێت کە بەهۆی داواکارییەکانی دۆناڵد ترەمپ، سەرۆکی ئەمەریکا بۆ دەستبەسەرداگرتنی گرینلاند دروست ببوو.
ئاژانسەکانی هەواڵ بڵاویانکردووەتەوە، رێککەوتنەکە بوارێکی بەرفراوانتر دەداتە واشنتۆن بۆ بەهێزکردنی ئامادەیی سەربازی، بەکارهێنانی ئاسمانی دورگەکە و چوونە ناوچەکە، هاوکات ئامانج لێی رێگریکردنە لە نەیارانی ئەمریکا لە دروستکردنی بنکەی سەربازی یان ئەنجامدانی وەبەرهێنانی هەستیار لە دورگەکەدا.
بەپێی زانیارییەکان ئاژانسەکان، بڕیارە ئەمریکا، دانیمارک و گرینلاند لە کاتی کۆبوونەوەکانی کۆمەڵەی گشتیی نەتەوە یەکگرتووەکان لە نیویۆرک رێککەوتنەکە ئیمزا بکەن، بەرپێش ئەوەی رەوانەی پەرلەمان بکرێت بۆ پەسەندکردن و چوونە بواری جێبەجێکردنەوە.
ئەمریکا دەستکەوتی چی بووە؟
بەپێی ئەو وردەکارییانەی تا ئێستا راگەیەنراون، رێککەوتنەکە رێگە بە ئەمەریکا دەدات ئامادەیییەکی سەربازیی گەورەتر لە گرینلاند پەرە پێبدات، کە ناوچەیەکی ستراتیژیی گرنگە لە نێوان ئەمریکای باکور و ئەوروپادا و لە دڵی جەمسەری باکوردایە.
لەلای خۆشیەوە دۆناڵد ترەمپ، سەرۆکی ئەمریکا رایگەیاندووە، رێککەوتنەکە گەرەنتی ئەوەدەکات واشنتۆن بتوانێت هەر کارێک بە پێویستی بزانێت بۆ بەرگریکردن لە ئاسایشی گرینلاند و ئەمەریکا ئەنجامی بدات، هاوکات لێپرسراوانی ئەمریکا ئاشکرایانکردووە، رێککەوتنەکە مافی بەردەوامی جوڵەی هێزەکان و بەکارهێنانی ئاسمانی دورگەکەیان پێدەبەخشێت، لەگەڵ ئەگەری زیادکردنی دامەزراوە و بنکە سەربازییەکان.
جگە لەوەش، رێککەوتنەکە رێگری لە وڵاتانی دەرەوەی هاوپەیمانی ئاتڵانتیکی باکور 'ناتۆ' دەکات لە دروستکردنی بنکەی سەربازی، هەروەها سنوردارکردنی وەبەرهێنانی هەستیار لەلایەن نەیارانی واشنتۆنەوە، بەتایبەتی چین و روسیا، لەخۆدەگرێت.
لەلایەکی ترەوە مارکۆ رۆبیۆ، وەزیری دەرەوەی ئەمریکا رایگەیاند؛ گرینلاند وەک بەشێک لە ناوچەی بەرگریی ستراتیژیی ئەمریکای باکور دەمێنێتەوە و رێگە بە هیچ نەیارێک نادرێت پێگەی سەربازی لە دورگەکەدا دروست بکات.
"کۆنترۆڵی بەردەوام".. بەڵام بە مەرج
گرنگە ئاماژە بەوە بکرێت کە هەرچەندە ترەمپ رێککەوتنەکەی بەوە وەسفکرد کە "کۆنترۆڵی بەردەوام" بە واشنتۆن دەبەخشێت و هیچ وادەیەکی کۆتایی نییە، بەڵام هەڵوێستی دانیمارک و گرینلاند بەڕاشکاوی جیاواز بوو.
میته فرێدریكسن، سەرۆک وەزیرانی دانیمارک جەختی کردەوە، رێککەوتنەکە ئاسایشی هاوبەش لە جەمسەری باکور بەهێز دەکات، بەڵام لە هەمان کاتدا دان بە سەروەریی پاشایەتی دانیمارک و مافی گەلی گرینلاند لە بڕیاردانی چارەنووسی خۆیاندا دەنێت، لەلایەکی دیکەشەوە، یەنس فریدریك نیلسن، سەرۆک وەزیرانی گرینلاند رایگەیاند، رێککەوتنەکە رێز لە بەرژەوەندییەکان و پێگەی گرینلاند دەگرێت.
بەپێی ئەمە، رێککەوتنەکە داواکارییەکەی پێشووتری ترەمپ بۆ کڕین یان خاوەندارێتی کردنی گرینلاند جێبەجێ ناکات، بەڵام لە رووی ئەمنییەوە پێگەی واشنتۆن بۆ ماوەیەکی درێژخایەن دەستەبەر دەکات.
دورگەی گرینلاند بۆ ئەوەندە گرنگە؟
گرینلاند بایەخێکی ستراتیژیی گەورەی هەیە بەهۆی هەڵکەوتەی جوگرافییەکەی لە جەمسەری باکور، لەگەڵ نزیکیی لە رێڕەوە ئاسمانی و دەریاییەکانی نێوان روسیا و ئەمریکای باکور، جگە لە هەبوونی یەدەگێکی زۆری کانزا و سەرچاوە سروشتییەکان.
ئەمریکا لە کاتی جەنگی جیهانیی دووەمەوە ئامادەیی سەربازی لە گرینلاند هەیە، لە ساڵی 1951 رێککەوتنێکی بەرگری لە نێوان واشنتۆن و کۆپنهاگن ئیمزا کرا کە دەسەڵاتی بەرفراوانی بە هێزەکانی ئەمەریکا دەدا، لە ئێستاشدا بنکەی ئاسمانیی "پیتۆفیک" لە باکوری رۆژئاوای گرینلاند گرنگترین پێگەی سەربازیی ئەمەریکایە لە دورگەکەدا بۆ ئاگادارکردنەوەی پێشوەختە و بەرگریی موشەکی.
گرینلاند گەورەترین دورگەی جیهانە کە دەکەوێتە نێوان تەوەری باکوری زەوی و ئۆقیانوسی ئەتڵەسییەوە، لە خۆرهەڵاتی دورگەی جەمسەری کەنەدی، گرینلاند ناوچەیەکی سەربەخۆیە لە ناو شانشینی دانیمارک، هەرچەندە لەڕووی فیزیۆگرافییەوە بەشێکە لە کیشوەری باکووری ئەمریکا، بەڵام گرینلاند لە رووی سیاسی و کولتوورییەوە پەیوەندی بە ئەوروپاوە هەیە بەتایبەتی نەرویج و دانیمارک.
دانیشتوانی دورگەکە لە 57 هەزار کەس پێکدێن، پایتەختەکەی ناوی "نوک"ە و نزیکەی 17,000 دانیشتووی هەیە، دورگەکە هیچ رێگایەکی وشکانی نییە و ژمارەی بەلەمەکان لە ژمارەی ئۆتۆمبێلەکان زیاترە، هەر بۆیە بەلەم و رێگای ئاسمانی هۆکاری گواستنەوەی سەرەکین لە دورگەکە.
وەزارەتی بازرگانیی عیراق زنجیرەیەک رێکاری نوێی بۆ رێکخستنی پرۆسەی هاوردەکردن، پێدان و نوێکردنەوەی مۆڵەتی بازرگانان و بەهێزکردنی کۆنترۆڵی جۆریی لە سەرجەم مەرزییەکاندا گرتەبەر.
محەمەد حەنون، وتەبێژی وەزارەتی بازرگانی رایگەیاند: بازاڕەکانی عیراق بەڕووی کەلوپەلی بێ کوالیتی و بێسەرچاوەدا کراوە نین و ئامانجی ئەم رێکارانە پاراستنی ئابووریی نیشتمانی و تەندروستی هاووڵاتییانە.
حەنون ئاماژەی بەوەش کرد کە وەزارەت کاردەکات بۆ بەبازاڕکردنی بەرهەمی عیراقی لە ئاستی هەرێمی و نێودەوڵەتیدا، بەتایبەت لە بازاڕەکانی کەنداو، وڵاتانی دراوسێ و ئەوروپا، ئەوەش لە رێگەی ئاسانکاریکردن بۆ هەناردەکردن، چالاککردنی پاشکۆ بازرگانییەکان لە دەرەوەی وڵات و بەکارهێنانی سندوقی پاڵپشتیی هەناردەکردن.
وتەبێژی وەزارەت جەختی لەوەش کردەوە: ئامانجی سەرەکییان لە قۆناغی داهاتوودا بەرزکردنەوەی رێژەی هەناردەی ناونەوتییە بە مەبەستی هەمەجۆرکردنی سەرچاوەکانی داهات، کە بەپێی ئامارەکان لە چارەکی یەکەمی ساڵی رابردوودا نەوتی خاو %92.8ی کۆی هەناردەکردنی عیراقی پێک هێناوە.
راپۆرتێکی رۆژنامەی واشنتۆن پۆست، لە زاری بەڵگەنامەیەکی نەبینراوی فەرماندەیی ناوەندیی سوپای ئەمریکاوە (سێنتکۆم) ئاشکرای کردووە کە تێچووی جەنگ لەدژی ئێران تاوەکو سەرەتای مانگی ئەیلوول گەیشتووەتە نزیکەی 43.6 ملیار دۆلار.
بەپێی زانیارییەکانی رۆژنامەکە، ئەم ژمارەیە زۆر لەوە زیاترە کە ئیدارەی دۆناڵد ترەمپ پێشتر بە رەسمی لێدوانی لەبارەوە دابوو، هاوکات تێچووەکانی دواڕۆژ و خەرجی نۆژەنکردنەوەی بنکە سەربازییە وێرانبووەکانی ئەمریکاش لەخۆ ناگرێت.
بەپێی وردەکاریی بڵاوکراوەکە، 28 ملیار دۆلار لەو کۆی گشتییە بۆ قەرەبووکردنەوەی ئەو تەقەمەنییانە تەرخانکراوە کە لە سەرەتای دەستپێکردنی بەیەکدادانەکانەوە بەکارهێنراون، جگە لە 4.3 ملیار دۆلاری تر وەک زیانی راستەوخۆی ئەو کەلوپەل و کەرەستە سەربازییانەی لەدەستدراون.
لەسەر ئاستی بەشە سەربازییەکانیش، هێزی ئاسمانیی ئەمریکی بە خەرجکردنی زیاتر لە 6.6 ملیار دۆلار لە پێشەنگی تێچووە ئۆپراسیۆنییەکاندا هاتووە، لەکاتێکدا هێزی دەریایی 2.2 ملیار و هێزی وشکانیش 1.6 ملیار دۆلاریان خەرجکردووە.
ئەم ئامارانەی فەرماندەیی ناوەندی لەکاتێکدایە کە نوسینگەی بودجەی کۆنگرێس لە راپۆرتێکی سەربەخۆدا خەمڵاندوویەتی تێچووی مانگانەی جەنگەکە روو لە هەڵکشانە و بەپێی توندی بەریەککەوتنەکان گەیشتووەتە 2 تا 3 ملیار دۆلاری مانگانە.
هاوکات سەرچاوە رۆژنامەوانییەکان سەرنجیان بۆ ئەوەش راکێشاوە کە ژمارەی راستەقینەی کوژراوانی هێزەکانی ئەمریکا لەم جەنگەدا زیاترە لەوەی پنتاگۆن پێشتر بە شێوەیەکی رەسمی رایگەیاندبوو.
لە چین بۆ یەکەمجار پرۆسەی رێککردنەوەی ددان بۆ پاندایەک بە سەرکەوتوویی ئەنجامدرا کە لە چارەسەری مرۆڤەوە وەرگیراوە.
ئاژانسی هەواڵی "شینخوا" ئاشکرایکرد، پسپۆڕان لە چین یەکەمین نەشتەرگەری و پرۆسەی رێککردنەوەی ددانیان بۆ ئاژەڵی پاندا ئەنجامدا، بە بەکارهێنانی تەکنیکێک کە لە پزیشکیی ددانی مرۆڤەوە وەرگیراوە.
پاندایەکی نێری زەبەلاح بە ناوی "بیکسیا" کە لە ساڵی 2022 لەدایکبووە، کەمێک دوای لەدایکبوونی تووشی پێکان لە شەویلکەیدا بووەتەوە، پسپۆڕان نیگەران بوون لەوەی ئەم پاندایە لە داهاتوودا تووشی کێشە ببێت لە جوینی داری خۆراکییەکەی 'حەیزەران'، کە ئەوەش مەترسییەکی جدی لەسەر ژیانی دروست کردبوو.
ئاژانسەکە رایگەیاندووە: "پسپۆڕانی چین سەرکەوتوو بوون لە چاککردنەوەی ناڕێکیی شەویلکەی خوارەوەی پاندایەکە، بە بەکارهێنانی رێکارەکانی رێککردنەوەی ددان کە لە چارەسەری مرۆڤەوە وەرگیراون."
ئاماژە بەوەشکراوە، ئەمە "یەکەمین پرۆسەی لەو شێوەیەیە کە بۆ ئەم جۆرە دەگمەنەی ئاژەڵان ئەنجام بدرێت."
پرۆسەی چارەسەرکردنەکە لەلایەن پسپۆڕانی سەنتەری "چێنگدو" بۆ توێژینەوە و بەخێوکردنی پاندا و نەخۆشخانەی رۆژئاوای چین بۆ پزیشکیی ددان ئەنجامدراوە.
ئاژانسی شینخوا ئەوەشی خستەڕوو، ئەم چارەسەرە بووە هۆی گەڕانەوەی توانای جوین و گەستنی ئاژەڵەکە بۆ باری سروشتیی خۆی.
ئەندامانی ئەنجومەنی ئاسایشی نێودەوڵەتی داوایان لە لایەنە یەمەنی و هەرێمییەکان کرد بە شێوازێکی بونیاتنەرانە بەشداربن لە هەوڵەکانی نەتەوە یەکگرتووەکان بۆ گەیشتن بە چارەسەرێکی سیاسیی هەمەلایەنە و بەردەوام بۆ قەیرانی یەمەن.
ئەنجومەنەکە لە بەیاننامەیەکی رۆژنامەوانیی هاوبەشدا، هانی لایەنەکانی دا بۆ راگرتنی کردەوە سەربازییە دوولایەنەکان و گەڕانەوە بۆ رێڕەوی دانوستانەکان بە سەرپەرشتی نەتەوە یەکگرتووەکان، و جەختی کردەوە کە چارەسەری سیاسی تاقە رێگەیە بۆ کۆتاییهێنان بە ململانێکان و بەدیهێنانی سەقامگیری لە وڵاتدا.
ئەندامانی ئەنجومەنەکە سەرکۆنەی هێرشە بەردەوامەکانی حوسییەکانیان بۆ سەر سعودیە کرد، لەگەڵ پەرەسەندنی سەربازی لە نزیک گەروی باب مەندەب، و نیگەرانی خۆیان دەربڕی لە لێکەوتەکانی پێشهاتەکانی مەیدانی لەسەر ئاسایشی کەشتیوانی نێودەوڵەتی و جووڵەی بازرگانی و دابینکردنی وزەی جیهانی.
ئەم هەڵوێستە دوای زنجیرەیەک کۆبوونەوەی بەپەلەی ئەنجومەنی ئاسایش لە مانگی ئەیلولدا دێت بۆ تاوتوێکردنی تێکچوونی دۆخی یەمەن و زیادبوونی مەترسییەکان لە رێڕەوە ئاوییە حەیاتییەکانی دەوروبەری، لە ژێر رۆشنایی هۆشدارییە نێودەوڵەتییەکان لە بەرفراوانبوونی رووبەڕووبوونەوەکان و لێکەوتە هەرێمییەکانی.
ئەنجومەنەکە پشتیوانی خۆی بۆ هەوڵەکانی نەتەوە یەکگرتووەکان بە مەبەستی هێورکردنەوەی ئاڵۆزییەکان دووپاتکردەوە و داوای لە هەموو لایەنەکان کرد خۆیان لەو هەنگاوانە بپارێزن کە دەبنە هۆی تێکدانی دەرفەتەکانی هێورکردنەوە و دەستپێکردنەوەی پرۆسەی سیاسی.
دۆناڵد ترەمپ، سەرۆکی ئەمریکا لە تۆڕی کۆمەڵایەتی تروس سۆشیال نووسیویەتی؛ بەهۆی بڵاوکردنەوەی هەواڵی ناراست و رووماڵی نەگونجاو، بە شێوەیەکی دەستبەجێ چوونەژوورەوەی پەیامنێر و ستافی هەریەک لە دەزگا راگەیاندنەکانی 'CNN'، 'POLITICO' و 'MSNOW' بۆ ناو کۆشکی سپی قەدەغە دەکات.
ترەمپ ئاماژەی بەوەشکردووە، دەزگاکانی راگەیاندن نابێت زانیاری دروستکراو و ناراست لەسەر ئیدارەکەی و سەرۆکی ئەمریکا بڵاوبکەنەوە.
هاوکات ئەوەشی خستەڕوو، لە ئایندەیەکی نزیکدا هەمان رێکار بەرانبەر چەندین دەزگای راگەیاندنی تریش دەگرێتەبەر.
وەزارەتی پێشمەرگە ئاشکرایکرد زیاتر لە 99٪ـی ئەندامانی هێزەکانیان لە پڕۆژەی 'هەژماری من' تۆمارکراون.
وەزارەتی پێشمەرگەی حکومەتی هەرێمی کوردستان رایگەیاند؛ پڕۆسەی دابەشکردنی موچەی هێزەکانی پێشمەرگە بە شێوازی کلاسیك و نەریتی لە رێگەی بانکەکانەوە کۆتایی پێهات و لەمەودوا بە شێوەیەکی ئاسان و راستەوخۆ لە رێگەی ئامێرەکانی راکێشانی پارە (ATM)ی پڕۆژەی 'هەژماری من' موچەکانیان وەردەگرن.
لەوبارەیەوە، لیوا توانا سدیق، بەڕێوەبەری گشتی بودجە و بەرنامەکان (ژمێریاریی سەربازی) ئاشکرایکرد، زیاتر لە 99٪ی ئەندامانی هێزی پێشمەرگە لە پڕۆژەی 'هەژماری من' تۆمارکراون.
قائیمقامییەتی قەزای دوکان ئاشکرایکرد، لە سبەینێوە پردی سەرەکی قەزاکە بۆ ماوەی یەک هەفتە بە مەبەستی نۆژەنکردنەوە دادەخرێت.
قائیمقامییەتی قەزای دوکان ئاگادارییەک ئاڕاستەی شۆفێران و هاووڵاتیان دەکات و رایدەگەیەنێت؛ لە سبەینێوە سەعات 6:30 خولەکی بەیانی، پردی سەرەکی ناوەندی قەزاکە بۆ ماوەی یەک هەفتە بە تەواوی بەڕووی هاتووچۆدا دادەخرێت.
بڕیاری داخستنی پردەکە بەهۆی دەستپێکردنی کارەکانی نۆژەنکردنەوە و چاکسازییە لە بەشەکانی بەیەکەوەبەستنی پردەکەدا، کە لەلایەن تیمەکانی بەڕێوەبەرایەتی رێگاوبانەوە جێبەجێ دەکرێت، دوای ئەوەی تەواوی پێداویستییەکانی نۆژەنکردنەوەکەی بۆ دابینکرا.
پردی سەرەکی دوکان خاڵێکی ستراتیژییە و هەردوو بەری قەزاکە بەیەکەوە دەبەستێتەوە، هاوکات رێگای سەرەکی هاتوچۆی نێوان پارێزگای سلێمانی بەرەو پارێزگاکانی هەولێر، دهۆک، ئیدارەی راپەڕین و دەشتی کۆیەیە.
قائیمقامییەتی دوکان ئاماژەی بەوەشکردووە، شۆفێران دەتوانن بۆ هاتوچۆکردن پردی دووەمی قەزاکە و رێگای بەری سارتکە وەک رێگای جێگرەوە بەکاربهێنن تا کۆتاییهاتنی کارەکانی نۆژەنکردنەوە.
لەسبەینێوە دابەشكردنی بەنزینی 750 دیناری لە سلێمانی دەكرێتە سیستمی تاك و جووت و سبەینێش نۆرەی ئەو ئۆتۆمبێلانە كە ژمارەی كۆتایی تابلۆكانیان ژمارەی تاكە.
محەمەد حەسیب، بەڕێوەبەری نەوت و كانزاكانی سلێمانی بە كوردسات نیوزی راگەیاند، لەسبەینێوە دابەشكردنی بەنزینی 750 دیناری لە سلێمانی دەكرێتە سیستمی تاك و جووت.
ئەوەشی خستەڕوو، سبەینێ بەنزینی 750 دیناری دەدرێتە ئەو ئۆتۆمبێلانە كە ژمارەی كۆتایی تابلۆكانیان ژمارەی تاكە.
ئەوەش لەكاتێكدایە، زیاتر لە 10 بەنزینخانە لە سلێمانی بەنزینی 750 دیناری دابەش دەكەن و بەنزینخانەیەكیش تایبەتكراوە بە شۆفێرانی ژن.