هەواڵەکان
لە چەند سەعاتی رابردوودا، بەرزبوونەوەیەکی بەرچاو لە ژمارەی داواکارییەکانی پیتزا لە نزیکترین لقی زنجیرە رێستوورانتەکانی "دۆمینۆز پیتزا" بۆ باڵەخانەی پێنتاغۆن تۆمار کراوە.
«پێوەری پیتزا» یەکێکە لە ناسراوترین سەرچاوە کراوەکان وەک ئامرازێک بۆ پێشبینیکردنی جووڵە سەربازییەکان لەناو باڵەخانەی وەزارەتی جەنگی ئەمریکا (پێنتاگۆن).
لە حاڵەتە ناکاوەکان یان ئۆپەراسیۆنە گەورە سەربازییەکاندا، بەرپرسان و کارمەندانی سەربازی ناچار دەبن تا سەعاتێکی درەنگ لە ئۆفیس و بنکەکانیان بمێننەوە، ئەمەش وایان لێدەکات پەنا بۆ داواکردنی خواردنی خێرا وەک پیتزا بەرن.
پێوەری پیتزا راستوورستیی خۆی سەلماندووە لە کاتی جێبەجێکردنی چەندین ئۆپەراسیۆنی سەربازی لەلایەن سوپای ئەمریکاوە، کە دواینیان بەرزبوونەوەی داواکارییەکان بوو لە دەستپێکی ئۆپەراسیۆنە سەربازییەکان لە ڤەنزوێلا و ئێران.
ئەم بەرزبوونەوەیەی ئێستای پێوەرەکەش هاوکاتە لەگەڵ بڵاوکردنەوەی هۆشداری لەلایەن باڵیۆزخانەکانی ئەمریکا لە رۆژهەڵاتی ناوەڕاست بۆ هاووڵاتییان.
لە نێوەندی هۆشدارییەكان لە ئەگەری ئاڵۆزبوونی رەوشەكە، ترەمپ پشووەكەی لە كامپ دێڤید كۆتایپێهێن و گەڕایەوە كۆشكی سپی.
كۆشكی سپی بەرەبەیانی ئەمڕۆ، رایگەیاند، دۆناڵد ترەمپ سەرۆكی ئەمریكا پشووەكەی لە هاوینەهەواری سەرۆكایەتی لە كامپ دێڤید كۆتایپێهێناوەو گەڕاوەتەوە بۆ واشنتۆنی پایتەخت.
هەروەها، كۆشكی سپی پارچە ڤیدیۆیەكی سەرۆكی ئەمریكایان بڵاوكردەوە، ئاماژە بە گەڕانەوەی بەپەلەی دەكات لە هاوینەهەوارەكەیەوە بۆ كۆشكی سپی لە رێگەی فڕۆكەی سەرۆكایەتییەوە.
ئەم پێشهاتە چەند سەعاتێك دوای ئەوە هات، وەزارەتی دەرەوەی ئەمریكا و باڵیۆزخانەی ئەمریكا لە عیراق هۆشداریی رەسمیان ئاراستەی هاووڵاتییانی ئەمریكی لە رۆژهەڵاتی ناوەڕاست كرد سەبارەت بە ئەگەری روودانی ئاڵۆزبوونی چاوەرواننەكراو.
هاوكات لەگەڵ ئەم پێشهاتانەدا، بەپێی ئەوەی ماڵپەڕە ئەمریكیەكان ئاشكرای كردووە، ژمارەیەكی زۆری فەرمانبەرانی وەزارەتی بەرگری لە ئۆفیسەكانیان تا درەنگانی شەو ماونەتەوە ئەوەش تەنها لەكاتی قەیرانەكاندا روودەدەن، ئەو پێگانە راشیانگەیاندوە، ئەم چالاكییە وەكو ئاماژەیەكی ئەگەری بۆ ئامادەكاریی ئۆپراسیۆنێكی سەربازیی نزیك لێكدەدرێتەوە.
پۆلیسی ئەمریکا پیاوێکی دەستگیرکرد کە بە ئۆتۆمبێلەکەی چووبووە سەر شۆستەی بەراىبەر کۆشکی سپی و داوای دیداری لەگەڵ سەرۆکی ئەمریکا، دۆناڵد ترەمپ دەکرد. دوای روداوەکە، تۆمەتبارەکە رەوانەی نەخۆشخانە کرا بۆ هەڵسەنگاندنی باری دەروونی.
رۆژنامەی "سەن"ی بەریتانی بڵاویکردەوە، دوانیوەڕۆی رۆژی شەممە هێزەکانی جێبەجێکردنی یاسا و یەکەکانی سوپا، چوارڕیانی شەقامەکانی 16یان لە نزیک پارکی "لافایێت سکوێر" داخست، دوای ئەوەی ئۆتۆمبێلێک لە رێڕەوی خۆی لایدا و چووە سەر شۆستەی پەنا پەرژینە ئەمنییەکەی دەوروبەری کۆشکی سپی.
رۆژنامەکە ئاماژەی بەوەش کردووە، ئەندامانی دەزگای پاراستنی نهێنی (سێرڤسی نهێنی) دوای وەرگرتنی زانیاری لەسەر کەلێنێکی ئەمنی، شۆفێری ئۆتۆمبێلەکەیان دەستگیرکردووەم، وتۆمەتبارەکە تەنانەت دوای کەلەپچەکردنیشی بەردەوام داوای کردووە قسە لەگەڵ سەرۆکی ئەمریکا بکات.
هێزە ئەمنییەکان پشکنینیان بۆ ئۆتۆمبێلەکە کردووە و تەواوی ناوچەکەیان گەمارۆداوە. دیمەنە تۆمارکراوەکان دەریانخستووە کە کارمەندانی دەزگای پاراستنی نهێنی ئۆتۆمبێلە بارهەڵگرە بچووکەکەیان (SUV) لە شوێنی روداوەکە دوورخستۆتەوە.
بەڕێوەبەری گشتیی پەروەردەی سلێمانی ئاماری نوێی پرۆسەی خوێندنی لە سنووری پارێزگاکە ڕاگەیاند و ئاماژەی بەوەدا کە ئەمساڵ ٤١٠ هەزار و 383 قوتابی و خوێندکار روویان لە هۆڵەکانی خوێندن کردووە.
بەپێی لێدوانی نەژاد عبداللە، بەڕێوەبەری گشتی، ئەم ژمارەیە سەرجەم قۆناغەکانی خوێندن لە باخچەی منداڵان، بنەڕەتی، ئامادەیی (گشتی و پیشەیی)، جگه لە پەیمانگاکانی سەر بە بەڕێوەبەرایەتی گشتیی پەروەردەی سلێمانی دەگرێتەوە.
ناوبراو جەختیشی کردەوە کە سەرجەم ئامادەکارییە لۆجیستی و پەروەردەیییەکان کراون بۆ ئەوەی پرۆسەی خوێندنی ئەمساڵ بە شێوەیەکی ئاسایی و سەرکەوتووانە لە تەواوی خوێندنگاکانی سنووری پارێزگای سلێمانی بەڕێوەبچێت.
لە چوارچێوەی چاكسازییە نوێیەكانی یەكێتیی ئەوروپا لە نێوان مانگەكانی حوزەیران و تەمووزدا، حكومەتی ئەڵمانیا زیاتر لە دوو هەزار كەیسی پەنابەرییان بە رێكاری خێرا تاوتوێكردووە.
بەپێی میدیاكانی ئەڵمانیا، لەمەودوا حكومەتی وڵاتەكە لە ماوەی كەمتر لە سێ مانگ بڕیار لەسەر كەیسە پەنابەرییەكان دەدات و ئەگەری گەڕاندنەوەی پەنابەران پێش دەرچوونی بڕیاری كۆتایی دادگا زیاتر دەكات.
ئەم سیستمە مۆڵەتی سێ مانگ دەدات بە فەرمانگەی فیدراڵیی كۆچ و كۆچبەرانی ئەڵمانیا بۆ بڕیاردان لەسەر ئەو كەسانەی لە وڵاتێكی سەلامەتەوە هاتوون.
هاوكات، ئەو پەنابەرانەشی رەتدەكرێنەوە لە مافی كاركردن بێبەش دەكرێن و دەكرێت پێش دەرچوونی بڕیاری كۆتایی دادگا بگەڕێندرێنەوە وڵاتەكەی خۆیان.
وتەبێژی گروپە چەکدارەکانی حوسییەکان لەبارەی هێرشەکانی سەر ریاز و دامەزراوەکانی کۆمپانیای ئارامکۆ وتی: ئەو هێرشانەمان لە وەڵامی هێرشە ئاسمانییەکانی سعودیە ئەنجامداوە.
یەحیا سەریع، وتەبێژی حوسییەکان رایانگەیاند، لە وەڵامی هێرشە ئاسمانییەکانی سعودیەدا، لە ڕێگەی دوو ئۆپەراسیۆن بە ژمارەیەکی زۆر موشەکی بالیستی و درۆن، چەند ئامانجێکی هەستیاریان لە ریاز و دامەزراوەکانی کۆمپانیای 'ئارامکۆ'یان لە یەنبەع کردووەتە ئامانج.
وتیشی، هێرشەکان بە سەرکەوتوویی ئامانجەکانیان پێکاوە و ئاگری گەورەیان لێکەوتووەتەوە.
ئەوەشی روونکردەەوە، بەردەوام دەبن لە هێرشەکانیان تا ئەو کاتەی بۆردومان و گەمارۆکانی سەر یەمەن کۆتاییان دێت.
وەزارەتی دارایی و ئابوریی هەرێمی کوردستان لە راگەیەنراوێکدا وادەی دیاریکراوی دابەشکردنی موچەی مامۆستایانی گرێبەست و بەشێک لە فەرمانبەرانی هەمیشەیی دیاریکرد.
لە راگەیەنراوەکەدا هاتووە: رۆژی دووشەممە، 21ـی 9ـی 2026 دەست بە دابەشکردنی موچەی مانگی ئابی مامۆستایانی گرێبەسیت وەزارەتی پەروەردە و خوێندنی باڵا دەکرێت.
ئەوەشی روونکردووەتەوە، پرۆسەی دابەشکردنەکە تا رۆژی پێنجشەممە 24ـی 9ـی 2026 دەخایەنێت و سەرجەمی مامۆستایانی گرێبەست و فەرمانبەرانی هەمیشەیی، موچەکانیان وەردەگرن.
ئاماژەی بەوەشداوە، لەهەمان کاتدا دەست بە دابەشکردنی مووچەی مانگی ئابی سەرجەم ئەو فەرمانبەرانە دەکرێت کە 1ـی 7ـی 2024ـەوە بە شێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون.
بانکی ناوەندیی عیراق لەبارەی دابەزینی بەهای دینار بەرانبەر بە دراوە بیانییەکان راگەیەنراوێکی بڵاوکردەوە و تێیدا دەڵێت: دابەزینی بەهای دینار پەیوەندیی بە قۆستنەوەی خراپیی رەوشی ناوچەکەوە هەیە.
بانکی ناوەندیی عیراق راگەیەنراوێکی لەبارەی دابەزینی بەهای دینار بەرانبەر بە دراوە بیانییەکان بڵاوکردەوە و ئاماژە بەوەش دەکات، بڕی پێویست لە یەدەگی دراوی بیانییان بۆ دابینکردنی پێویستیی بازاڕ و گەشتیاران، بە بەهای رەسمیی دیاریکراو، هەیە.
ئەوەشی روونکردووەتەوە، دابەزینی بەهای دینار بەرانبەر بە دراوە بیانییەکان لە بازاڕدا، پەیوەندیی بە ئاڵوگۆڕی دراو لە ناوخۆدا و خراپ بەکارهێنانی رەوشی جیۆپۆلەتیکی ناوچەکە، لەلایەن هەندێک کەس و لایەنەوە، هەیە.
ئەوەشی خستوڕوو، تەنها پشت بەو زانیاری و داتایانە ببەستن کە بەرەسمی لەلایەن بانکی ناوەندییەوە دەردەچن و پێویستە نەکەونە دوای ئەو هەواڵ و زانیارییانەی لە سەرچاوە باوەڕپێنەکراوەکانەوە بڵاودەکرێنەوە.
سەرۆکی ئۆکراین رایدەگەیەنێت، رەزامەندیی لەسەر ئەنجامدانی زنجیرەیەک هێرشی نوێی دوورمەودا داوە، وەک وەڵامێک بۆ هێرشە بەردەوامەکانی روسیا بۆ سەر وڵاتەکەی.
ڤۆلۆدیمێر زیلینسکی، سەرۆکی ئۆکراین ئاماژەی بەوەشکرد، ئۆکراین لە ئامادەکاریدایە بۆ بەهێزکردن و فراوانکردنی توانا سەربازییە دوورمەوداکانی، بێ ئەوەی هیچ زانیارییەک لەسەر ئامانج و وردەکاریی ئۆپراسیۆنە نوێیەکان ئاشکرا بکات.
جەختیشی کردەوە، کە کیێڤ کار بۆ جێبەجێکردنی ئەو تەکنیکییانە دەکات کە کاریگەریی لە خستنەخوارەوەی درۆنی جۆری "شاهد" هەیە، لە هەوڵیشدان بۆ زیادکردنی ئاستی بەرهەمهێنانیان بۆ مەیدانەکانی جەنگ.
ئەوەش لە کاتێکدایە، کە ئاستی رووبەڕووبوونەوە سەربازییەکانی نێوان هەردوو وڵات گەیشتووەتە لوتکە، وەزارەتی بەرگریی روسیاش رایگەیاندووە، لە سەرەتای ئەمساڵەوە دەستیان بەسەر زیاتر لە پێنج هەزار و 300 کیلۆمەتر دووجا زەوی و 220 شارۆچکە و گونددا گرتووە.
هاوکات، ئەوەشی خستەڕوو، "لە شەوی رابردوودا 344 درۆنی ئۆکراینیان خستووەتە خوارەوە و هێرشیان کردووەتە سەر چەندین کەشتیی و دامەزراوەی لۆجیستی لە بەندەرەکانی دەریای رەش"، لە بەرانبەریشدا، ئۆکراین ئاشکرایکردووە، لە 24 سەعاتی رابردوودا نزیکەی هەزار و 500 سەربازی روسی کوژراون و برینداربوون.
جێی ئاماژەیە، لە چەند مانگی رابردوودا هەردوو وڵات هێرشە ئاسمانییە دوورمەوداکانیان چڕتر کردووەتەوە، کیێڤ بەردەوام ژێرخانی نەوتی روسیا و کۆگا بازرگانییەکان دەکاتە ئامانج، بەمەبەستی دروستکردنی فشاری ئابوری و بەرزکردنەوەی تێچووی بەردەوامیی جەنگ لەسەر موسکۆ.
فەرماندەیی ناوەندیی ئەمریکا لە راگەیەندراوێکدا ئاماری هاتوچۆی کەشتیوانی لە گەروی هورمز بڵاوکردەوە و رایگەیاند، لەگەڵ هاوبەشەکانیان لە هەوڵی بەردەوامدان بۆ دەستەبەرکردنی ئاسایشی کەشتیوانی و پاراستنی رێڕەوە ئاوییەکان.
به‌گوێره‌ی راگەیەندراوەکەی فەرماندەیی ناوەندیی ئەمریکا 'سێنتکۆم'، زیاتر لە دوو هەزار کەشتیی بازرگانی بە هەماهەنگی لە گەروی هورمزدا تێپەڕیوون، هەروەها جەخت لەوەکراوەتەوە، کە هێڵە سەرەکییەکانی گواستنەوە لە گەروەکە پاککراونەتەوە و بە تەواوی دوورن لە مەترسیی مین.
ئاماژەی بەوەشکردووە، قەبارەی گواستنەوەی نەوت و بازرگانی لە گەروی هورمز لە ماوەی دوو هەفتەی رابردوودا گەیشتووەتە بەرزترین ئاست بەراورد بە شەش مانگی رابردوو، لە بەرانبەردا جەختی کردووەتەوە، ئێران لە رێگەی گەروی هورمزەوە تەنانەت یەک بەرمیل نەوتیشی هەناردە نەکردووە.
سلێمانی لەگەڵ ئامەدی باکوری کوردستان و حەسەکەی رۆژئاوای کوردستان دەبێتە دەستە خوشک، پارێزگاری سلێمانیش رایدەگەیەنێت، لەگەڵ چەندین شاری تر پەیوەندییەکان دەبەنە قۆناغێکی نوێوە.
د. هەڤاڵ ئەبوبەکر، پارێزگاری سلێمانی لە کۆنفرانسێکی رۆژنامەوانیدا رایگەیاند، لە 24ـی ئەم مانگەدا لە شاری ئامەد لەلایەن شارەوانی مەزنی ئامەد و شارەوانی سلێمانی، دەستە خوشکی نێوان ئەو دوو شارە ئیمزا دەکرێت و رایدەگەیەندرێت.
وتیشی، قسەمان لەگەڵ نورەدین عیسا پارێزگاری حەسەکە قسەمان کردووە و لە مانگەکانی داهاتوودا لەگەڵ ئەو پارێزگای رۆژئاوای کوردستان دەبێتە دەستە خوشکی سلێمانی.
د. هەڤاڵ ئەبوبەکر ئەوەشی خستەڕوو، لە ئێستا لەگەڵ 700 شار و 100 وڵاتی جیهان پەیوەندیمان هەیە و زۆر بە گرنگیشی دەزانین لەگەڵ شارە کوردییەکاندا پەیوەندییەکانمان لەپێش هەموو شتێکەوە بێت.
سەرۆکی هەرێمی کوردستان باس لە کۆبوونەوەکانی یەکێتی و پارتی، پشکی هەرێم لە بودجەی ساڵی 2027ـی عیراق دەکات.
نێچیرڤان بارزانی، سەرۆکی هەرێمی کوردستان، لە کۆنگرەیەکی رۆژنامەوانیدا رایگەیاند: هەوڵی لایەنە سیاسییەکان بۆ گەیشتنە ئەنجام شتێکی باشە، یەکێتی و پارتیش کۆبوونەوەی بەردەوامیان هەیە.
سەرۆکی هەرێمی کوردستان ئاماژەی بەوەشدا: بودجەی ساڵی 2027ـی عیراق گرنگە کە بە هەماهەنگی لەگەڵ عیراق بکرێت، هەروەها پێویستە بەغداد لەو یاسایەدا بەتەواوی پشکی هەرێمی کوردستان جێگیر بکات.
میدیاکانی سعودییە، ئەمرۆ شەممە، بڵاویانکردەوە، دووکەڵ و ئاگرێکی بەرز لە نێزیک فڕۆکەخانەی مەلیک خالید لە ریازی پایتەختی سعودیە بەدیکراوە.
ئەم روداوە دوای چەند سەعاتێک دەێت لە دەرچوونی ئاگادارکردنەوەی بەپەلە و پێشوەختە لەلایەن بەڕێوەبەرایەتیی گشتیی بەرگریی شارستانیی سعودیە لە شارەکانی ریاز، خەرج، جدە، تائف، یەنبەع، خەمیس مەشیت، عولا، ئەبها و جازان.
ئەم پەیامانەی ئاگادارکردنەوەی پێشوەختە ئاساییانە کاتێک بڵاودەکرێنەوە کە ناوچەکانی شانشینی سعودیە رووبەڕووی هێرش دەبنەوە لە لایەن یەمەنەوە، لە کاتێکدا تا ئێستا دەسەڵاتدارانی سعودیە بە رەسمی تۆمارکردنی زیانی گیانی و مادییان رانەگەیاندووە.
پێشبینی دەكرێت ناردنی چەكی ئەمریكا بۆ وڵاتانی ئەوروپا بەهۆی بەردەوامیی جەنگی ئێرانەوە بۆ ماوەی پێنج ساڵ دوابكەوێت.
ئاژانسی بلومبێرگ بڵاویكردەوە، ئەمریكا هۆشداریی بە هاوپەیمانە ئەوروپییەكانی داوە كە پێشبینی دواكەوتنی ناردنی چەك بكەن بۆ ماوەی پێنج ساڵی داهاتوو.
ئاماژەی بەوەشكردووە، ئەمریكا هەوڵی پڕكردنەوەی كۆگا بەتاڵبووەكانی تەقەمەنی دەدات كە لە جەنگی ئێراندا بەكارهاتوون و كەمبوونەتەوە.
ئاژانسەكە باسی لەوەشكردووە، ئەو كورتهێنانە كاریگەریی كردووەتەسەر ئۆكراین كە داوای موشەكی پاتریۆتی زیاتری لە ئەمریكا كردووە بۆ بەرگریی ئاسمانیی.
بڵاویشیكردووەتەوە، سەرۆكی ئەمریكا وتویەتی گفتوگۆ دەكەن لەسەر پێشكەشكردنی نەوەیەكی نزمی سیستمی پاتریۆت بە ئۆكراین یان مۆڵەتی دروستكردنی ئەو چەكە بە ئەوروپا دەدات.
ئەوەش لەكاتێكدایە، ئەڵمانیا داوای لە ئەمریكا كردووە پەلە بكات لە ناردنی موشەكی تۆماهۆك و تایفۆن، چونكە وڵاتانی ئەوروپا پەلەیانە بۆ وەرگرتنی چەكی نوێی ئەمریكا.
وەفدێكی كۆمیسیۆنی باڵای سەربەخۆی هەڵبژاردنەكانی عیراق، وەك چاودێریی نێودەوڵەتی بەشداری لە هەڵبژاردنی پەرلەمانیی روسیادا دەكات.
ئاژانسی رەسمی هەواڵەكانی عیراق بڵاویكردەوە، وەفدێكی كۆمیسیۆنی باڵای سەربەخۆی هەڵبژاردنەكانی عیراق بە سەرۆكایەتیی عومەر ئەحمەد سەرۆكی ئەنجومەنی كۆمیسیاران و چەند ئەندامێكی ئەنجومەنەكە وەك چاودێر بەشداری لە هەڵبژاردنی پەرلەمانی روسیا دەكەن كە بە دۆما ناسراوە و لە 18 بۆ 20ی ئەم مانگە بەڕێوەدەچێت.
ئاماژەی بەوەشكردووە، وەفدەكە لەسەر بانگهێشتی كۆمیسیۆنی ناوەندیی هەڵبژاردنەكانی روسیا سەردانی ئەو وڵاتەیان كردووە لە چوارچێوەی بەهێزكردنی پەیوەندی دوو قۆڵی و ئاگاداربوون لە ئەزموونە نێودەوڵەتییەكان لە بەڕێوەبردن و رێكخستنی هەڵبژاردندا.
بڵاویشیكردووەتەوە، وەفدەكەی كۆمیسیۆنی باڵای سەربەخۆی هەڵبژاردنەكانی عیراق بەشداری دەكات لە كارەكانی دیداری نێودەوڵەتی هەڵبژاردنەكان لە كاتی قەیرانەكاندا و تیایدا چەند بابەتێكی پەیوەندیدار و ئاستەنگەكانی بەڕێوەبردنی هەڵبژاردن تاوتوێ دەكرێن.
واشنتۆن لە چوارچێوەی هەنگاوەکانیدا بۆ کەمکردنەوەی سزاکان دوای گۆڕانکارییە سیاسییەکانی دەسەڵات لە دیمەشق، هەڵگرتنی کۆتا کۆتوبەندەکانی بەردەم فرۆشتنی چەک و دابینکردنی دارایی سەربازیی بۆ سوریا راگەیاند.
وەزارەتی دەرەوەی ئەمریکا ئاشکرای کرد کە سوریای لە کۆتا دوو رێگری لەژێر یاسای بنبڕکردنی چەکی کیمیایی و بایۆلۆجیی ساڵی 1991 بەخشیوە.
ئەم هەنگاوە ئاستەنگە یاساییەکانی بەردەم فرۆشتنی چەک و خزمەتگوزارییە بەرگرییەکان و هاوکاریی دارایی سەربازیی دەرەکی بۆ سوریا لادەبات، بەبێ ئەوەی بەو مانایە بێت کە رێكکەوتنی نوێی چەک یان هاوکاریی دارایی دەستبەجێ بۆ دیمەشق دابین بڕوات.
بڕیارەکە لە 16 ئەیلوولی 2026ەوە چووەتە بواری جێبەجێکردنەوە و لە تۆماری فیدراڵیی ئەمریکادا بڵاوکراوەتەوە.
ئەم بڕیارە بەشێکە لە زنجیرە کارئاسانییەکانی ئەمریکا کە پیشتر هەڵگرتنی سزاکانی "قەیسەر" و دەرهێنانی سوریا لە لیستی وڵاتانی پشتگیریکاری تێرۆریشی دەگرتەوە.
لە لایەکی ترەوە، جو ویڵسن، ئەندامی ئه‌نجومه‌نی نوێنه‌رانی ئەمریکا لە 19ی ئەیلوولدا نیگەرانیی خۆی بەرانبەر بەردەوامیی هەندێک کۆتوبەندی دیکەی بازرگانی نیشاندا و داوای کرد ئاسانکاریی زیاتر بۆ کۆمپانیا ئەمریکییەکان بکرێت تاوەکو بتوانن وەبەرهێنان لە بازاڕی سوریادا بکەن.