سەرۆک وەزیرانی عیراق بڕیاریدا لە هەڵبژاردنەکانی داهاتودا خۆی کاندید نەکات و لە نیوەی یەکەمی مانگی حەوتدا کابینەی حکومەتەکەی تەواو دەکرێت، هەروەها  لەبارەی موچەی فەرمانبەرانی هەرێمەوە دڵنیای دا کە کێشەی نابێت.

حەیدەر عەبودی، وتەبێژی حکومەتی عیراق لە کۆنگرەیەکی رۆژنامەوانیدا رایگەیاند، عەلی زەیدی، سەرۆک وەزیرانی عیراق بڕیاریداوە لە هەڵبژاردنەکانی داهاتوودا خۆی کاندید نەکات و چاوی لە دروستکردنی هیچ پڕۆژەیەکی سیاسی یان حزبی نییە.

وتەبێژی حکومەت ئاماژەی بەوەش کرد، دەوڵەت تەواوی گەرەنتییەکان بۆ کۆمپانیاکارەکانی بواری نەوت لە عیراق دابین دەکات، بەتایبەتی لە هەرێمی کوردستان، چونکە ئەوە پەیوەندیدارە بە موچەی فەرمانبەرانی هەرێمەوە.

لەبارەی تەواوکردنی کابینەی حکومەتەوە، حەیدەر عەبودی دەڵێت؛ پرۆسەکە پێش سەردانەکەی سەرۆک وەزیران بۆ ئەمریکا تەواو دەبێت، کە تێیدا سەرۆک وەزیران چەندین مەلەفی گرنگ تاوتوێ دەکرێت، لە سەروشیانەوە مەلەفی ئابوری و پرسی کۆنترۆڵکردنی چەک لەژێر دەستی دەوڵەتدا.

ناوبراو جەختیکردەوە سەرۆک وەزیران مەلەفی گەندەڵی بە مەترسیدارترین  کێشە بۆ سەر وڵات و سیستمی سیاسی دەزانێت، بۆیە بڕیاردراوە پێداچوونەوە و وردبینی بۆ سەرجەم گرێبەستەکانی رابردوو بکرێت  و پڕۆسەی بەرەنگاربونەوەی گەندەڵی بەردەوام دەبێت و سەرجەم تۆمەتباران دەگرێتەوە بەبێ گوێدانە ناونیشان و پێگەیان..

وتەبێژی حکومەت دڵنیای دا، کە حکومەت پەنا بۆ قەرزی دەرەکی نابات و نیشانەکانی چاکبونەوەی ئابوری دەرکەوتوون، بە شێوەیەک کە یاسای بودجەی ساڵی 2027 لە مانگی تشرینی یەکەمی داهاتوودا ئامادە دەبێت بۆ ئەوەی رەوانەی ئەنجومەنی نوێنەران بکرێت.

بە پێی داتاكانی ئەمریكا هەناردەكردنی نەوتی عیراق بۆ واشنتۆن لە ماوەی هەفتەیەكدا دابەزیوە بۆ سفر.

داتاكانی فەرمانگەی زانیاریی وزەی ئەمریكا، كە ئەمرۆ یەكشەممە بڵاوكرانەوە، نیشانیدەدەن كە هەناردەكردنی نەوتی خاوی عیراق بۆ ئەمریكا لە ماوەی هەفتەی رابردوودا دابەزیوە بۆ ئاستی سفر، ئەمەش دوای ئەوەی لە هەفتەی پێشووتردا گەیشتبووە 107 هەزار بەرمیل لە رۆژێكدا.

ئەمە دووەم جارە لەمساڵدا بەهۆی داخستنی گەروی هورمزە هاوردەكردنی نەوتی عیراق بۆ واشنتۆن بگاتە سفر، هەر بەپێی داتاكان، وڵاتی كەنەدا زۆرترین هەناردەی نەوتی بۆ ئەمریكا كردووە كە زیاتربووە لە سێ ملیۆن بەرمیل لە رۆژێكدا.

 

قوباد تاڵەبانی، ئامادەی رێوڕەسمی دەرچوونی خولی پێنجی پێگەیاندنی ئەفسەران  بوو لە کۆلێژی سەربازی قەڵاچوالان.

قوباد تاڵەبانی لە پەیامێکدا دەڵێت: سڵاوی گەرمی دڵی پڕ هومێدی مەت پێشکەش ئەی هەڤاڵی پێشمەرگە، ئەی پارێزەری خاک و گیان و سەروماڵی خەڵکی کوردستان، خۆشحاڵ و شەرەفمەند بووم بە یاوەری بەڕێز کاک نێچیرڤان بارزانی، سەرۆکی هەرێم و فەرماندەی گشتیی هێزی پێشمەرگەی کوردستان بەشداربووین لە ڕێوڕەسمی دەرچوونی خولی 5ی پێگەیاندنی ئەفسەران لە کۆلێژی سەربازی قەڵاچوالان.

قوباد تاڵەبانی ئاماژەی بەوەشداوە: لە ئەمڕۆوە 210 ئەفسەری ئازا و را‌هێنراوی دیکە چوونە ریزی هێزی پێشمەرگەوە بۆ پاراستی خاک و خەڵکی کوردستان. پیرۆزبایی لەو ئەفسەرە ئازیزانە و بنەماڵە سەربەرزەکانیان دەکەم. دەستخۆشیش لە بەرپرسانی کۆلێژی سەربازی قەڵاچوالان و مامۆستا و راهێنەرەکان دەکەم کە رۆڵێکی گرنگیان هەیە لە بە پیشەیی کردنی هێزی پێشمەرگەی کوردستان.

 

سوپای ئیسرائیل رایگەیاند، لە هێرشێكدا بۆسەر باشوری كەرتی غەززە، دوو چەكداری بزوتنەوەی حەماس و جیهادی ئیسلامی كوژراون.

سوپای ئیسرائیل لە راگەیەنراوێكدا ئاماژەی بەوە كردووە، هێرشیان كردوەتەسەر باشوری كەرتی غەززە و دوو ئەندامی حەماس و جیهادی ئیسلامیان كوشتوون كە كاریان كردووە بۆ كۆكردنەوە و گواستنەوەی هاوكاری دارایی بۆ حەماس.

دەسەڵاتدارانی كەرتی تەندروستی غەززەش بڵاویانكردەوە، لە دوینێوە 11 كەس بەهۆی بۆردومان و هێرشەكانی سوپای ئیسرائیل كوژراون.

دەشڵێن، فرۆكە جەنگییەكانی ئیسرائیل دەستیان كردوەتەوە بە بۆردومانكردنی ناوچە نیشتەجێكانی كەرتی غەززە.

دابەشكردنی موچەی مانگی شەش لە عیراق دەستیپێكرد و ، وردبینی كردنی لیستی موچەی فەرمانبەرانی هەرێمیش بەردەوامە.

وەزارەتی دارایی عیراق رایگەیاند، دابەشكردنی موچەی موچەخۆرانی مانگی شەشی وەزارەتەكانی عیراق دەستیپێكردوە و وەك یەكەم وەزارەتیش وەزارەتی نەوتی عیراق مووچەكانیان وەرگرتووە.

هاوكات، پەیامنێری كوردسات نیوز رایگەیاند، وردبینیكردن لە لیستی موچەی موچەخۆرانی هەرێم دەستیپێكردوە، وە ئەگەر هیچ كێشەیەك نەیەتە پێشەوە ئەوە ئەگەری هەیە كۆتایی هەفتەی داهاتوو وەزارەتی دارایی حكومەتی فیدراڵ موچەی مووچەخۆرانی هەرێم رەوانەوەی وەزارەتی دارایی هەرێم بكات.

 

لە هەنگاوێکی گرنگدا بۆ فراوانکردنی گەشتە نێودەوڵەتییەکان، فڕۆکەخانەی نێودەوڵەتی کەرکوک گەشتە ئاسمانییەکانی بۆ چەند وڵاتێکی ناوچەکە رادەگەیەنێت و بڕیارە ئەمڕۆ یەکەم گەشت بەرەو میرنشینی دوبەی ئەنجام بدرێت.

هەردی سەمەد، لێپرسراوی بەشی راگەیاندنی فڕۆکەخانەی نێودەوڵەتی کەرکوک تایبەت بە (کوردسات نیوز)ی راگەیاند:

ئەمڕۆ یەکشەممە 21ی حوزەیران، کاتژمێر 3:00ی پاش نیوەڕۆ، بۆ یەکەمین جار گەشتی ئاستی نێوان کەرکوک و دوبەی بە رەسمی دەستپێدەکات.

لێپرسراوی راگەیاندنی فڕۆکەخانەکە ئاماژەی بەوەش کۆکردەوە کە ئەمە تەنها سەرەتایەکە و لە رۆژانی داهاتوودا هێڵەکە بەرەو چەند وڵاتێکی تریش دەکرێتەوە.

ئەنجومەنی وەزیرانی عیراق بڕیاریدا بە دووبارە تێكەڵكردنەوەی فەرمانگەی بەڕێوەبردنی فڕۆكەخانەكان لەگەڵ كۆمپانیای گشتیی خزمەتگوزارییەكانی گەشتە ئاسمانییەكان بە ئامانجی یەكخستنی كەرتی فڕۆكەوانی و جێبەجێكردنی پلانە ستراتیژییەكانی وەزارەتی گواستنەوە.

ئەنجومەنی وەزیرانی عیراق بەكۆی دەنگ بڕیاریدا بە تێكەڵكردنەوە و بەستنەوەی فەرمانگەكانی بەڕێوەبردنی فرۆكەخانەكان عیراق لەگەڵ كۆمپانیای گشتی خزمەتگوزاریی گەشتە ئاسمانییەكان.

ئاماژە بەوەشكراوە، ئەمەش هەنگاوێكە لە چوارچێوەی پلانە ستراتیژییەكان لە بواری پەرەپێدان و بونیادنان و بەهێزكردنی لایەنی پسپۆڕی فرۆكەخانەكان.

ئەوەش لەكاتێكدایە، ئەنجومەنی وەزیرانی پێشوو لە تشرینی دووەمی 2023، دەنگی دابوو لەسەر جیاكردنەوەی فەرمانگەی بەڕێوەبردنی فڕۆكەخانەكان لە دەسەڵاتی فڕۆكەوانیی مەدەنی و تێكەڵكردنی لەگەڵ كۆمپانیای خزمەتگوزارییەكانی گەشتە ئاسمانییەكان لە وەزارەتی گواستنەوە.

مەسعود پزیشکیانی سەرۆک کۆماری ئێران دووپاتی کردەوە، کە وڵاتەکەی بەدوای بەدەستهێنانی چەکی ئەتۆمیدا نییە و هەموو یاداشتنامەکانی لێکتێگەیشتنەکەی نێوان تاران و واشنتۆن لە بەرژەوەندی ئێراندایە.

مەسعود پزیشکیان رایگەیاند، دۆناڵد ترەمپی سەرۆکی ئەمریکا پێشتر هەوڵی دەدا مافەکانی ئێران رەت بکاتەوە، بەڵام لە وتاری ئەم دوایەیدا گۆڕانکاری بەسەردا هاتووە و دانی بە مافەکانی ئێراندا ناوە.

لەبارەی رەوشی دانوستانەکانیشەوە، هەموو بڕگەکانی یاداشتنامەی لێکتێگەیشتن لەگەڵ ئەمریکا لە بەرژەوەندی ئێراندایە،  ئەنجام و دەستکەوتەکانی دانوستانەکان بەم زووانە رون دەبنەوە و وڵاتەکەی شەش ملیار دۆلار لەو پارانەی کە لە قەتەرن وەری دەگرێتەوە .

مەسعود پزیشیکان وتوشیەتی، تاکە مەرجی ئەمریکا ئەوەیە ئێران نەبێتە خاوەنی چەکی ئەتۆمی و ئێمەش دەمێکە وتومانە بە دوای چەکی ئەتۆمییەوە نین.

درەنگانێکی شەوی رابردوو، وەفدێكی ئێرانی بۆ بەدواداچوونی میكانیزمی جێبەجێكردنی بەڵێنەكان  و کۆبوونەوە لەگەڵ وەفدی ئەمریکا گەیشتە سویسرا و جەی دیڤانسیش، کە ئێستا لە سویسرایە دەڵێت رەنگە کۆبوونەوەکان چەند رۆژێک بخایەنێت.

بڕیارە ئەمڕۆ یەکشەممە، لە ناوچەی گەشتیاری بورگنستۆک وەفدی ئەمریکا و ئێران بە نێوەندگیر پاکستان و قەتەر کۆببنەوە.

میدیاکانی ئەمریکا بەیانی ئەمڕۆ گەیشتنی جەی دیڤانسی جێگری دۆناڵذ ترەمپیان بۆ سویسرا راگەیاند و جێگەرکەی دۆناڵد ترەمپ ئاماژەی بەوەکردوە، رەنگە ئەم کۆبوونەوەیە یەکێک بێت لە هەوڵە دیپلۆماسییە هەرە بەرچاوەکانی نێوان تاران و واشنتۆن لە ماوەی چەندمانگی رابردوودا.

لای خۆشیەوە ئیسماعیل بەقایی، وتەبێژی وەزارەتی دەرەوەی ئێران رایگەیاند بوو، دەستپێكردنی دانوستانە كۆتایییەكان لەگەڵ ئەمریكا بەستراوەتەوە بە جێبەجێكردنی پێنج بەندەكەی لێكتێگەیشتنەكەی نێوانیان و پرەنسیپی ئێران پابەندبوونە بەرانبەر پابەندبوون و لە ئەگەری بەردەوامی پێشێلكارییەكاندا، تاران بڕیاری چارەنوسساز دەدات.

 

 رێوڕەسمی دەرچوانی پێگەیاندنی ئەفسەران لە کۆلێژی سەربازی قەڵاچوالان بەڕێوەدەچێت و نێچیرڤان بارزانی سەرۆکی هەرێم و قوباد تاڵەبانی جێگری سەرۆک وەزیران و شۆڕش ئیسماعیل، وەزیری پێشمەرگەی ئامادەی رێوڕەسمەکە دەبن، کە تێیدا 210 خوێندکار دوای تەواوکردنی پڕۆسەی راهێنان و پێگەیاندنی سەربازی، پلەی ئەفسەرییان پێدەبەخشرێت.

ئەمڕۆ یەکشەممە، بە ئامادەبونی نێچێرڤان بارزانی، سەرۆکی هەرێم و  قوباد تاڵەبانی جێگری سەرۆک وەزیران شۆڕش ئیسماعیل، وەزیری پێشمەرگەی رێوڕەسمی دەرچوانی پێگەیاندنی ئەفسەران لە کۆلێژی سەربازی قەڵاچوالان لە پارێزگای سلێمانی بەڕێوەدەچێت.

لە خولەکەدا، کە سەرجەم بەشداربوانی لە رەگەزی نێرن و ژمارەیان 210 کەسە و خەڵکی شارە جیاوازەکانی هەرێمی کوردستان دوای تەواوکردنی پڕۆسەی راهێنان و پێگەیاندنی سەربازی، پلەی ئەفسەرییان پێدەبەخشرێت.

یەکێک لە مەرجە سەرەکەکانی وەرگرتنی ئەم خوێندکارانە، کە ماوەی نۆ مانگ لە مەشق و راهێنانی چڕدان، هەبوونی بڕوانامەی بەکالۆریۆس بووە لە بوارە جیاجیاکاندا.

ئەم دەرچووانە پێشتر لە هێزە ئەمنی و سەربازییەکانی کوردستاندا خزمەتیان کردووە و بەسەر وەزارەتەکانی ناوخۆ و پێشمەرگەدا دابەش بوون؛ بەشێوەیەک، کە 56 خوێندکاریان سەر بە هێزەکانی بەرگری و فریاکەوتنن لە وەزارەتی ناوخۆ و 154 خوێندکاریشیان سەر بە وەزارەتی پێشمەرگەن، کە لەو ژمارەیەش 131یان لە هێزەکانی 70ن.

بڕیاریشە دوای وەرگرتنی پلە نوێیەکانیان، سەرجەم ئەم ئەفسەرە نوێیانە بگەڕێنەوە بۆ شوێنی کارەکانی پێشوویان و وەک ئەفسەر دەستبەکاربن.

 

دەستگیرکردنی لێپرسراوانی عیراق بە تۆمەتی گەندەڵی بەردەوامە  و شەوی رابردوو بە تۆمەتی تێوەگلان لە گەندەڵی بەڕێوەبەری كۆمپانیای دابەشكردنی كارەبای واست دەستگیركرا و دەستەی دەستپاكی داوای رادەستكردنی دەستبەجێی دەكات.

دەستەی دەستپاكی عیراق لە رێگەی فەرمانگەی لێكۆڵینەوەی بەغدادەوە فەرمانی رادەستكردنی بۆ عەلا سەمیر جبوری بەڕێوەبەری كۆمپانیای دابەشكردنی كارەبای واست كرد، كە لەلایەن هێزی وەڵامدانەوەی خێراوە دەستگیركراوە.

میدیاكانی عیراقش ئاشكرایانكردووە، شەوی رابردوو هێزێكی سەربە دەستەی دەستپاكی هەڵیانكوتایە سەر یەکێک لە باخچەکانی عەلا سەمیر جبوری بەڕێوەبەری كۆمپانیای دابەشكردنی كارەبای ناوەڕاست، لە ناوچەی سەقڵاوییە لە پارێزگای ئەنبار.

ئەو هەڵمەتە دوای ئەوە هاتووە، ناوبراو كە دەستەبەسەركراوە،  كێڵگەكەی ئاشكرا كردووە، كە بەڵگەنامە و پارە و سەروەت و سامانی زۆری تیادا بووە،  بەوتەی هەندێك سەرچاوە جگە لە بەڵگەنامە، تەنها لەو باخچەیەدا دەست بەسەر (76) ملیار دینارییشدا گیراوە.

 

ئیسماعیل بەقایی، وتەبێژی وەزارەتی دەرەوەی ئێران رایگەیاند، دەستپێكردنی دانوستانە كۆتایییەكان لەگەڵ ئەمریكا بەستراوەتەوە بە جێبەجێكردنی پێنج بەندەكەی لێكتێگەیشتنەكەی نێوانیان. 

بەقائی ئاماژەی بەوەکردوە، بەهۆی پابەندنەبوونی لایەنی بەرانبەرەوە ئەو مەرجە نەهاتووەتە دی، بەڵام وەفدێكی ئێرانی بۆ بەدواداچوونی میكانیزمی جێبەجێكردنی بەڵێنەكان دەچێتە سویسرا.

بەقایی جەختی كردەوە، بەندی یەكەم كە تایبەتە بە كۆتایهێنان بە شەڕ لە هەموو بەرەكانی وەك لوبنان، كۆڵەكەی رێككەوتنەكەیە، وەك خۆی دەڵێت، ئێران بەڵێنەكانی جێبەجێ كردووە، بەڵام لایەنی بەرانبەر نەیتوانیوە ئیسرائیل بە ئاگربەستەوە پابەند بكات.

وتیشی، هەرچەندە هەنگاو نراوە بۆ هەڵگرتنی گەمارۆی دەریایی و كردنەوەی گەرووی هورمز، بەڵام سەرپێچیكردنی بەندی یەكەم تەواوی رێككەوتنەكە دەخاتە ژێر پرسیارەوە.

لە كۆتاییدا بەقائی هۆشداری دا كە پرەنسیپی ئێران پابەندبوونە بەرانبەر پابەندبوون و لە ئەگەری بەردەوامی پێشێلكارییەكاندا، تاران بڕیاری چارەنوسساز دەدات.

بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی بەشداریی لە فێستیڤاڵی فیلمی کوردیی مۆبایل کرد، کە لەلایەن دامەزراوەی (ڤیم)ـەوە رێکخرابوو.

سەرۆک بافڵ پاش ئەوەی بینەری فیلمەکان بوو، سوپاس و پێزانینی خۆی ئاڕاستەی خاتوو لاڤە حیکمەت، سەرۆکی فێستیڤاڵی فیلمی کوردیی مۆبایل و رێکخەران و بەشداربووان کرد کە فێستیڤاڵەکەیان بە ئاستێکی بەرز رێکخستووە.

بافڵ جەلال تاڵەبانی وتی، ئەمە دەرفەتێکی باشە بۆ هاندانی ئەو گەنجانەی ئارەزوومەندی ئەم بوارەن، تاوەکو خولیاکانیان ببێتە پڕۆژە و ببنە بەشێک لە گەشەپێدانی وڵات.

سەرۆکی یەکێتیی نیشتمانیی کوردستان پشتیوانیی تەواوی خۆی بۆ گەنجان دەربڕی و خەڵاتی بەسەر یەکەمەکانی فێستیڤاڵ و بەشداربوواندا دابەشکرد، هەروەها هیوای خواست ئەم هەنگاوانە ببنە هاندەرێکی باشتر بۆ گەشەپێدانی بواری فیلم و سینەما لە هەرێمی کوردستان.

بڕیارە سبەینێ یەکشەممە، وەفدێکی باڵای پاکستان بە سەرۆکایەتی شەهباز شەریف سەرۆک وەزیران و بە بەشداریی فەرماندەی سوپای ئەو وڵاتە دەچنە سویسرا.

میدیاکانی پاکستان رایانگەیاندوە، ئامانجی وەفدی پاکستان بۆ سویسرا بەشداریکردنە لە کۆبوونەوەی ئێران و ئەمریکا و ئامانجی سەردانەکە پاڵپشتیکردن و ئاسانکارییە بۆ بەڕێوەچونی پرۆسەی گفتوگۆکان. 

هاوکات لەگەڵ ئەم گەشتەدا، وەزارەتی دەرەوەی پاکستان لە راگەیەندراوێکی رەسمیدا ئاماژەی بەوە کردووە، ناوچەی گەشتیاری بورگنستۆک لە سویسرا دەبێتە میوانداری دانوستانە تەکنیکییەکانی نێوان ئەمریکا و ئێران، کە بە هاوبەشی لە ژێر چاودێری و نێوەندگیریی هەردوو دەوڵەتی پاکستان و قەتەردا بەڕێوەدەچێت.

رۆژنامەی تایمز ئۆف ئیسرائیل رایگەیاندوە، بنیامین ناتانیاهۆی سەرۆک وەزیران جەختی  کردووەتەوە،  هێزەکانی ئیسرائیل لە باشوری لوبنان دەمێننەوە تا ئەو کاتەی، کە پێویست بێت بۆ بەرگریکردن لە سنورەکانی باکوری ئیسرائیل.

رۆژنامە ئیسرائیلییەکە، لە زاری لێپرسراوێکی نوسینگەی بنیامین ناتانیاهۆ رایگەیاندوە، سەرۆک وەزیران جەخت لە مانەوەی هێزەکانی ئیسرائیل لە باشوری لوبنان دەکاتەوە.

ئاماژەی بەوەشکردوە، نەتانیاهۆ فەرمانی بە سوپا کردووە بە توندی وەڵامی هەر هێرشێکی حزبوڵا بدەنەوە و بە هەنگاوی خێرا بگیرێتەبەر بۆ نەهێشتنی هەر هەڕەشەیەک بۆ سەر هێزەکانیان. 

جەختکردنەوەی سەرۆک وەزیرانی ئیسرائیل لەسەر مانەوەی هێزەکانی ئەو وڵاتە لە خاکی لوبنان لە کاتێکدایە کە، بڕیارە سبەیةی  یەکشەممە لە سویسرا نوێنەری  ئێران و ئەمریکا دانوستانەکان دەستپێبکەن و تاران درێژەی ئۆپراسیۆنەکانی ئیسرائیل لە لوبنان و بونی ئەو هێزانە بە پێشێلکردنی مەرجەکانی یاداشتنامەی لێکتێگەیشتنەکە دەزانن.

جۆرجیا میلۆنی، سەرۆک وەزیرانی ئیتاڵیا رایگەیاند، قسەکانی ئەم دوایەی دۆناڵد ترەمپ بێ بنەمان و پێگەی جەماوەری ئەو  پەیوەندی بە پێگەی جەماوەری دۆناڵد ترەمپەوە نییە، بە دۆناڵد ترەمپیش دەڵێت؛ پێویستە  تۆ سەرنجت لەسەر پێگەی جەماوەری خۆت بێت.

سەرۆک وەزیرانی ئیتاڵیا، لە پەیجی تایبەتی خۆی لە تۆڕی کۆمەڵایەتی ئینستاگرام وەڵامی هێرشەکانی ئەم دواییەی دۆناڵد ترەمپی داوەتەوە و هێرشە زارەکییەکانی سەرۆکی ئەمریکای بە "بێ بنەما و بێ مانا" ناوبردوە.

سەرۆک وەزیرانی ئیتاڵیا لە پەیامەکەیدا بەرگریی لە بڕیارەکەی کردوە، کە لە جەنگی ئێران نەیهێشتوە سوپای ئەمریکا سود لە بنکە سەربازییەکانیان وەرگرن.

ئاماژەی بەوەشکردوە، تا ئەو سەرۆک وەزیران بێت ناهێڵێت؛ بنکە سەربازییەکانیان دژی ئەو وڵاتانە بەکاربهێندرێن، کە رێککەوتنیان هەیە لەگەڵیاندا، چونکە ئیتاڵیا وڵاتێکی سەربەخۆیە و بە خاوەن سەروەری دەمێنێتەوە.

لە وەڵامی ئەو قسەیەی سەرۆکی ئەمریکادا کە وتویەتی؛ میلۆنی ویستویەتی بە وێنەگرتن لەگەڵیدا پێگەی جەماوەری بەرز بێتەوە، سەرۆک وەزیرانی ئیتاڵیا دەڵێت، ئەو خاوەنی پێگەی جەماوەری خۆیەتی و با سەرۆکی ئەمریکا تەرکیزی لای پێگەی جەماری خۆی بێت.

ئەمە لە کاتێکدایە، ناکۆکی کەوتوەتە نێوان  دۆناڵد ترەمپ و جۆرجی و سەرۆکی ئەمریکا  لە چاوپێکەوتنێکدا لەگەڵ کەناڵێکی تەلەفزیۆنی ئیتاڵیا رایگەیاند کە مێلۆنی"سواڵی کردووە" کە وێنەیەکی لەگەڵدا بگرێت، ئەو بانگەشەیە کە مێلۆنی رەتیکردەوە و وتی؛"من و ئیتاڵیا هەرگیز سواڵ ناکەین" .