سابرینا سینگ وتەبێژی پنتاگۆن لە کۆنفرانسێکی رۆژنامەوانیدا ئاماژەی بەوەکرد، ھێزەکانی ئەمریکا بە ھاوبەشی ھێزە ئەمنییەکانی عیراق ئۆپراسیۆنی ھاوبەش دژی شانە نوستووەکانی داعش و لەناوبردنی سەرکردەکانیان ئەنجام دەدەن. 

وتیشی، تیرۆریستانی داعش ھێشتا ھەڕەشەن بۆ سەر عیراق و سوریا، بەڵام بەشێوەیەکی جیاواز بە بەراورد بە ساڵی ٢٠١٤. 

وتەبێژی پنتاگۆن جەختیکردەوە، بە بەردەوامی چاودێری رەوشەکە دەکەن و چالاکی ھاوبەش ئەنجام دەدەن بۆ لەناوبردنی تەواوی تیرۆریستان.

رۆژی ١٧ی ئەم مانگە تاوتوێکردنی ئەو پڕۆژە یاسایە لە کارنامەی دانیشتنی ئەنجومەنی نوێنەران لابرا، بەو ھۆیەشەوە بەشێک لە پەرلەمانتارانی کورد بایکۆتی دانیشتنەکەیان کرد و تا ئێستا دیار نییە کەی پڕۆژەکە دەخرێتەوە کارنامەی دانیشتنەکان.

کاروان یاروەیس ئەندامی فراکسیۆنی یەکێتی لە ئەنجومەنی نوێنەران بە کوردسات نیوزی راگەیاند، دوای لابردنی بڕگەی تایبەت بە تاوتوێکردنی پڕۆژەکە، ھادی عامری سەرۆکی لیژنەی جێبەجێکردنی ماددەی ١٤٠ بەڵێنی بە فراکسیۆنە کوردستانییەکاندا لەماوەی ٤٨ سەعاتدا پڕۆژە یاساکە بخرێتەوە کارنامەی کۆبوونەوەکان، بەڵام پڕۆژەکە نەخرایەوە کارنامەی دانیشتنەکان.

وتیشی ھەفتەی داھاتوو دانیشتنی پەرلەمان بەڕێوەناچێت لەبەرئەوەی پەرلەمانتاران دەگەڕێنەوە پارێزگاکانیان، بەڵام ھەفتەی داھاتووتر دانیشتنەکان دەستپێدەکەنەوە و فراکسیۆنە کوردستانییەکان فشاری نوێ دەستپێدەکەنەوە بۆ ئەوەی پڕۆژەکە بخرێتەوە کارنامەی دانیشتنەکان بەمەبەستی پەسەندکردنی.

بەپێی پڕۆژە یاسای گەڕاندنەوەی خاوەندارێتی زەوی لەناوچە جێناکۆکەکان بۆ خاوەنەکانیان، ٨ بڕیاری ئەنجومەنی سەرکردایەتی رژێمی بەعسی پێشوو ھەڵدەوەشێنرێنەوە کە لە نێوان ساڵانی ١٩٧٥ بۆ ١٩٧٩ دەرکراون بۆ دەستبەسەرداگرتنی زەوی جوتیاران لە سنوری کەرکوک و ناوچە جێناکۆکەکان.

مەزڵوم عەبدی، فەرماندەی ھێزەکانی ھەسەدە لە میانی دیدارێکیدا، لەگەڵ نوێنەرانی "گروپی چەکداری شۆڕشگێڕان" و لیوای دیموکراتی باکوور رایگەیاند، ئامادەیە بۆ گفتوگۆکردن لەگەڵ لایەنە نیشتمانییەکانی ئیدلب، لە باکووری رۆژئاوای سوریا.

ئەوەشی خستەڕوو، ھەسەدە پابەندە بە پێشکەشکردنی ھاوکاری بۆ پەنابەرانی ناوچەکانی باکووری رۆژئاوای سوریا.

مەزڵوم عەبدی جەختی لەوەشکردەوە، پێویستە چارەسەری سیاسی لە سوریا، لەسەر بنەمای دیالۆگی نێوان ھێزە نەتەوەیی و دیموکراسییەکان بێت.

بەپێی روانگەی سوری، ئیسرائیل بە فڕۆکەیەکی بێفڕۆکەوان ئۆتۆمبێلێکی لە رێگەی فڕۆکەخانەی نێودەوڵەتی دیمەشق کردووەتە ئامانج، کە بەھۆیەوە سەرکردەیەکی کەتائیبی حزبوڵای عیراقی کوژراوە، کە ئەو سەرکردەیە خاوەنی بارەگایەکی سەربازییە لە ناوچەکە و نازانرێت بەرەو کوێ رۆشتووە.

بەپێی روانگەکە، ئەو ئۆتۆمبێلە لە نزیک سەعات پێنجی بەیانی ئەمڕۆ بە سووتاوی بینراوە و تیمەکانی بەرگریی شارستانی گەیشتوونەتە شوێنی روداوەکە، کە چەند کیلۆمەترێک لە ناوچەی سەیدە زەینەب دوور بووە. 

روانگەی سوری ئەوەشی ئاشکرا کردووە، دەنگی تەقینەوەی بەھێز لەو بۆردومانەدا نەبیستراوە، چونکە بە وردی ئۆتۆمبێلەکە پێکراوە.

بەپێی ھەواڵی میدیاکانی رۆژھەڵاتی کوردستان، لە روداوێکی ھاتوچۆدا لە نێوان بارھەڵگرێک و ئۆتۆمبێلێکی جۆری پژۆ لەسەر رێگەی مھاباد-ورمێ لە رۆژھەڵاتی کوردستان پێنج کەس گیانیانلەدەستدا و سێ کەسیش تریش بە سەختی برینداربوون و رەوشی تەندروستییان ناجێگیرە.

بەپێی ھەواڵەکە تیمەکانی فراگوزاری گەیشتونەتە شوێنی روداوەکە و تەرمەکانیان دەرھێناوەتەوە، بریندارەکانیش رەوانەی نەخۆشخانە کراون.

موسەنا سامەڕایی سەرۆکی ھاوپەیمانی عەزمی سونەکان رایگەیاند، کەرکوک ھاوشێوەی عێراقێکی بچوکە و پێویستە ھەمووان کار بۆ بەھێزکردنی پێکەوەژیان بکەن دوو لە حزبایەتی و تایفیی و دەبێت ھەموو سیاسییەکانیش باوەڕیان بەوە ھەبێت کە ئەو شارە بۆ ھەموو پێکھاتە رەسەنەکانیەتی بەبێ جیاوازی و پەراوێزخستنی ھیچ پێکھاتەیەک.

وتیشی، سەرکەوتنی پرۆسەی سیاسی لە کەرکوک و پێشکەشکردنی باشترین خزمەتگوزاری بۆ خەڵکی ئەو شارە، ئاماژەیە بۆ سەرکەوتنی داھاتووی کاری سیاسی لە عیراق.

ئایشەگول دۆغان وتەبێژی دەمپارتی رایگەیاند، گفتوگۆیان لەگەڵ نوعمان کورتولموش سەرۆکی پەرلەمانی تورکیا نەکردووە، بۆ ھەموارکردنەوە و داڕشتنەوەی دەستووری نوێ، ھیچ پێشنیازێکیان لەو بارەیەوە پێشکەشنەکردووە.

ھاوکات تولای حاتەم ئۆغلاری ھاوسەرۆکی گشتی پارتی یەکسانی و دیموکراسیی گەلان"دەم پارتی" لە چوارچێوەی وتووێژەکانی"نان و دادپەروەری"رایگەیاند، گەل پێویستی بە نان و دادپەروەری ھەیە، ئاکەپە لە ٢٢ ساڵی دەسەڵاتی خۆیدا وڵاتی گەیاندوەتە ھەژاری و برسێتی، ناتوانێت دەسەڵات بەرێوەببات، خراپترین کارەساتی بەسەر وڵاتدا ھێناوە.

وتیشی، ھاووڵاتییان بەھۆی سیاسەتەکانی حکومەتەوە ھەموو شتێک لە دەرەوە دەکڕن، کەرتی کشتوکاڵ لەناوچووە، ئەوەش برسێتی و ھەژاری لێکەوتوەتەوە و خەڵک وڵات بەجێدەھێڵن، چارەسەریش بریتییە لە ڕێگریکردن لە ھاوردەکردن و کردنەوەی ناوچە کشتوکاڵییەکان و کەمکردنەوەی تێچوونەکان و یارمەتیدانی جووتیاران.

وەزارەتی تەندروستی لوبنان رایگەیاند، بەھۆی ھێرش و بۆردومانێکی سوپای ئیسرائیل بۆسەر ناوچەیەکی باشووری لوبنان، ١٢ کەس کوژران کە پێنجیان منداڵن و ٦٦ تریش برینداربوون.

ھاوکات سوپای ئیسرائیل رایگەیاند، ١٠ کەس لە کوژراوەکان سەرکردەی حزبوڵان کە یەکێکیان ئیبراھیم عەقیلە کە بە باسم تەحسین ناسراوە و لێپرسراوی ئۆپراسیۆنە تایبەتەکانی حزبوڵا بووە بەیەکێک لەسەرکردە دیار و کاریگەرەکانی حزبوڵاش دادەنرێت.

لە بەرامبەریشدا حزبوڵای لوبنانی لە راگەیەندراوێکدا ئاماژەی بەوە کردوە، راستەوخۆ دوای ئەو ھێرشەی ئیسرائیل، ھێرشێکی فراوانیان کردووەتە سەر ئەو وڵاتە و بە مووشەکی کاتیۆشا بنکەیەکی سەرەکی بەرگری ئاسمانی و بارەگایەکی تایبەت بە تانک و زرێپۆشی ئەو وڵاتەیان کردووەتە ئامانج و زیانی زۆریان پێگەیاندوون.

لیوا حسێن ئیسلامی فەرماندەی گشتی سوپای پاسدارانی ئێران رایگەیاند، کردەوە تیرۆریستییەکانی ئیسرائیل لەوڵاتانی ناوچەکە بە گشتی و لە کەرتی غەززە و لوبنان بە تایبەتی ھەموو سنوورەکانی بەزاندووە، ئەمریکاش بەھەموو شێوەیەک پشتیوانی دەکات کە ئەوەش ھێزێکی زیاتری داوەتە سوپای ئیسرائیل و ھەموو کردەوە تیرۆریستییەکانی بە چەک و موشەکی ئەمریکا ئەنجام دەدات بووەتە ھۆی کوژران و برینداربوونی ھەزاران خەڵکی بێتاوان.

وتیشی، بەڵێن بە ئیسرائیل دەدەن، لە داھاتوویەکی زۆر نزیکدا لەلایەن بەرەی بەرگرییەوە گورزێکی ھێندەی کوشندە و بەھێزی بەردەکەوێت کە پێشبینی نەکردبێت و تۆڵەسەندنەوە و گورزەکەش، دەبێتە بومەلەزەیی وێرانەکەر بۆ ئەو وڵاتە.

وەزارەتی خوێندنی باڵا و توێژینەوەی زانستی ھەرێم رایگەیاند، رۆژی شەممە ٢١ی ئەیلول سەعات ١٢ی نیوەڕۆ بۆ ماوەی ١٠ رۆژ بۆ دەرچووانی دوانزەی ئامادەیی زانستی و وێژەیی و پیشەیی تا ٣٠ی ئەیلول کارا دەکرێت.

راشیگەیاندووە، دەرچوان لەو ماوەیەدا دەتوانن فۆرمی وەرگرتن لە زانکۆ و پەیمانگەکان پڕبکەنەوە و پێشکەشی بکەن، ھەروەھا دەرچوان دەبێت سەردانی خوێندنگەکانی خۆیان بکەن بەمەبەستی وەرگرتنەوەی ناوی بەکارھێنەر و وشەی تێپەڕ، ھەروەھا دەتوانن سەردانی مەڵبەندەکانی ڕاوێژکاری زانکۆکان بکەن بۆ وەرگرتنی روونکردنەوەی پێویست لەسەر چۆنیەتیی پڕکردنەوەی فۆرمی وەرگرتن بە ‌سیستمە جیاوازەکان.

خوێندنی باڵا داوا لە دەرچوان دەکات، ھەوڵبدەن خۆیان فۆڕمەکان پڕبکەنەوە و روو لەو سەنتەرانە نەکەن کە رەسمی نین و وەزارەت بەرپرس نابێت لەھەر ھەڵەیەک لەکاتی پڕکردنەوەی فۆرمەکان.

باسی لەوەشکردووە، وەرگرتن لە زانکۆکان بەپێی ڕیزبەندی ئەو کۆلێژ و بەشانە دەبێت کە دەرچوان لە زانکۆلاین پێشکەشی دەکەن بە رەچاوکردنی کۆنمرەی خوێندکار، لەبەرئەوە پێویستە بە وردی ریزبەندیی ئەو کۆلێژ و بەشانە دیاریبکەن کە ئارەزووی دەکەن خوێندنی تێدا تەواو بکەن.

لە کۆتایدا وەزارەتی خوێندنی باڵا سەبارەت بە ھەبوونی پەیج و ئەکاونت بەناوی زانکۆلاین و ناوەندی وەرگرتن، رایگەیاند، ستافی وەرگرتن ھیچ جۆرە پەیج و ئەکاونتێکی لە تۆڕە کۆمەڵایەتییەکان نییە بەناوەکانی زانکۆلاین و ناوەندیی وەرگرتن یان ھەر ناوێکی دیکە، بەڵکو تاکە مینبەری گەیاندنی ڕێنماییەکانی ئێمە لەڕێگەی سایت و پەیجی رەسمی وەزارەتی خوێندنی باڵا و توێژینەوەی زانستییە لە تۆڕی کۆمەڵایەتی فەیسبوک بەم ناونیشانە: 

 (www.facebook.com/KRG.MOHE.Official).

بەپێی راگەیەندراوێکی نوسینگەکەی، محەمەد شیاع سودانی سەرۆک وەزیرانی عیراق لەگەڵ حەیدەر عەبادی سەرۆکی ھاوپەیمانی نەسر کۆبووەتەوە و باسیان لە کارەکانی ھەردوو دەسەڵاتی یاسادانان و جێبەجێکردن کردووە لەپێناو بنیاتنانی ئابوورییەکی بەھێز بۆئەوەی لە رێگەیەوە خزمەتی زیاتری سەرجەم عیراقییەکان بکرێت، پرۆژەکانی گەشەپێدانیش زیاتر بخرێنە بواریجێبەجێکردنەوە و کاری جدییان لەسەر بکرێت.

نوسینگەی سودانی ئاماژەی بەوەشکردووە، سەرۆک وەزیرانی عیراق لە کۆبوونەوەیەکی تردا لەگەڵ قەیس خەزعەلی ئەمینداری گشتی بزوتنەوەی عەسائیب ئەھلی حەق رایگەیاندووە، متمانەی بە لایەنە سیاسییەکان ھەیە پشتیوانی بکەن لە جێبەجێکردنی ئەو خاڵ و بڕگانەی کارنامەی حکومەتەکەی کە تائێستا جێبەجێنەکراون، بەتایبەتیش بوارەکانی ئابووری و سیاسەتی و خزمەتگوزاری.

دادگایەکی سوید ژنێکی تەمەن ٥٢ ساڵیان بە تۆمەتی ئەوەی لە ساڵی ٢٠١٤ تا ٢٠١٦ لە ماڵەکەی خۆی لە شاری رەققە ژن و منداڵی ئێزدیی کردووە بە کۆیلە، بە جینۆساید تۆمەتبار کردوە.

داواکاری گشتیی سوید دەڵێت، لەکاتی لێکۆڵینەوەی پێشوودا شایەتحاڵەکان ئاماژەیان بۆ ئەوەکردوە، ئەو ژنە لە رەققە خەڵکی کردووە بە کۆیلە.

راشیگەیاندووە، ئەو ژنە بە چالاکییەکانی خۆی بەشداریی لە تاوانەکانی داعش دژی ئێزدییەکان کردووە، لە ماڵەکەی خۆی سێ ژن و شەش منداڵی وەک کۆیلە راگرتووە، ھەروەھا بە مەبەستی فرۆشتن وێنەی ئەو ژن و منداڵانە گیراوە.

بڕیارە لە ٧ـی تشرینی یەکەمی داھاتوو دانیشتنی دادگایی ئەو ژنە دەستپێبکات و نزیکەی دوو مانگ بەردەوام دەبێت.

ناوەندیی راگەیاندنیی ھێزەکانی سوریای دیموکرات "ھەسەدە" لە راگەیەنراوێکدا ئاماژەی بۆ ئەوەکردووە، لە ئەنجامی ئۆپەراسیۆنەکانی ئەنجومەنی سەربازی گرێ ‌سپی دژی بنکەیەکی سوپای تورکیا لە گوندی تەروازیە، سەربازێکی سوپای تورکیا کوژراوە.

راشیگەیاندوە، ھەروەھا لە دوو ئۆپەراسیۆنی جیاوازی ئەنجومەنی سەربازیی مەنبەج لە باکووری مەنبەج، ٦ چەکدار کوژراون و ١٠ چەکداری تریش برینداربوون، ھەروەھا چوار ئۆتۆمبێلی سەربازی و کامێرایەکی چاودێرییان تێکشکاندووە، دەستیشگیراوە بەسەر بڕێک چەک و تەقەمەنی و مۆبایلێکی زیرەکدا.

وەزارەتی بەگری ئەمریکا (پنتاگۆن) رایگەیاند، رۆژی دوو شەممەی داھاتوو کەشتی فڕۆکە ھەڵگری (یو ئێس ئێس ترومان) بەرەو رۆژھەڵاتی ناوەڕاست بەڕێدەکەوێت کە یەکێکە لە گەورەترین کەشتییە فڕۆکەھەڵگرەکانی ئەمریکا، دوای ئەویش چەند کەشتییەکی تری فڕۆکەھەڵگر رەوانەی ناوچەکە دەکرێن کە یەکێکیان کەشتی فڕۆکە ھەڵگری (یو ئێس ئێس رۆزڤڵت)ە.

ئاماژەی بەوەشکردووە، ئەمریکا بڕیاریداوە بەھۆی ئاڵۆزییەکانی خۆرھەڵاتی ناوەڕاستەوە بوونی سەربازیی خۆی لە ناوچەکە بەھێزتر بکات ئەوەش لە رێگەی رەوانەکردنی ژمارەیەک کەشتی جەنگی و فڕۆکەھەڵگر و فڕۆکەی جەنگی و ھەندێکیشیان بۆ نەھێشتنی ھەڕەشە و مەترسییەکانی حوسییەکانی یەمەن، رەوانەی دەریای سور دەکرێن.

کۆمپانیا ژاپۆنییەکە لە راگەیەندراوێکدا بڵاویکردەوە، ئامێری پەیوەندی بێتەل لە جۆری "ئەی سی ڤی ٨٢" لە ساڵانی ٢٠٠٤ بۆ ٢٠١٤ دروستدەکرا و ھەناردەی رۆژھەڵاتی ناوەڕاست دەکرا، بەڵام نزیکەی ١٠ ساڵە بەرھەمھێنانی ئەو ئامێرانە راگیراون و لەلایەن کۆمپانیاکەیانەوە بۆ ھیچ وڵاتێک نەنێردراون. 

ئاماژە بەوەشکراوە، تەنانەت بەرھەمھێنانی پاتری ئەو جۆرە ئامێرانە راگیراوە و ھەر بەرھەمێکیان کە لە بازاڕەکاندا دەفرۆشرێن لەژێر رێکاری ئەمنی و بازرگانیدایە. 

روونکردنەوەی کۆمپانیای ئایکۆمی ژاپۆنی دوای ئەوەھات کە لە دووەم تەقینەوەی ئامێرەکانی پەیوەندی بێتەل لە لوبنان، راپۆرتە ھەواڵییەکان باسیان لەوەدەکرد کە ئامێرەکان ھێمای بازرگانی ئەو کۆمپانیا ژاپۆنییەیان ھەڵگرتووە، کە بەھۆیەوە ٢٠ کەس کوژران و زیاتر لە ٤٥٠ کەسی دیکەش برینداربوون.

سەرچاوە ئەمنییەکان بڵاویانکردەوە، فڕۆکە جەنگییەکانی سوپای عیراق لە جۆری ئێف ١٦ بۆردوومانی دەوروبەری چەند گوندێکیان لە گوندی عەتشانە لەسنوری پردێ کردووە، کە ٦٥ کیلۆمەتر لە باکوری رۆژئاوای کەرکوکەوە دوورە، بۆردوومانەکەش مۆڵگە و شوێنی ئەو تیرۆریستانەی کردووەتە ئامانج و ژمارەیەکیان لەناوبراون. 

ھاوکات بەپێی زانیاری سەرچاوە ئەمنییەکان، ھێزێکی ئەمنی ھاوبەش لە روبەڕوبوونەوەی تیرۆری عیراق و سوپای عیراق، ھەڵمەتێکی ئەمنی فراوانیان دەستپێکردووە، بۆ لەناوبردنی تیرۆریستانی داعش لە ناوچەکە، ھەڵمەتەکە تا ئێستا بەردەوامە و ھێشتا ئەنجامەکانی نەخراونەتەڕوو.