شەپۆلێکی سەرما و کڕێوە رۆژئاوای ئەمریکای گرتووەتەوە و کەشناسی باس لەوەدەکات، شەپۆلەکە بەرەو رۆژهەڵاتیش دەڕوات، پێشبینی دەکرێت بەهۆی ئەو شەپۆلی سەرما و بەفر بارینەوە هاتوچۆ رابگیرێت.

دەستەی کەشناسیی نیشتیمانیی ویلایەتە یەگرتووەکانی ئەمریکا بڵاویکردووەتەوە، شەپۆلی سەرما و کڕێوە 'واتە بارینی بەفر بە رەشەباوە' چەند ویلایەتێکی رۆژئاوای گرتووەتەوە و شەپۆلەکە بەرەو رۆژهەڵاتیش پەل دەکێشێت، پێشبینی دەکرێت لە چەند ناوچەیەک ٣٨ سانتیم بەفر ببارێت و لە هەندێک ناوچەش زیاتر ببارێت.

ئاماژەی بەوەشکردووە، پێشبینی دەکرێت شەپۆلەکە رێگای هاتوچۆ بگرێت و گەشتەکانیش پەک بخات، هەروەها رەشەباکە ئەوەندە بەهێز بێت دارەکان بشکێنێتەوە و ببێتە هۆکاری پچڕانی کارەباش.

ئەمە یەکەم شەپۆلی بەهێزی سەرما و بەفربارین و رەشەبایە لە ساڵی نوێدا ئەمریکا بگرێتەوە. لەکاتێکدا چەند گرتەیەکی ڤیدیۆیی بڵاوکراونەتەوە کە رێگای هاتوچۆی ئۆتۆمبێل لە چەند شار و ویلایەتێک گیراوە و رێگاکان بەستوویانە و بوونەتە سەهۆڵبەندان، بەتایبەت لە ویلایەتی کانساس و میزۆریدا.

لەلایەکی دیکەوە، بەرپرسانی کانساسیش هۆشداریان لەبارەی گەشتکردنی نێوان ٤٦ فڕۆکەخانە داوە لەنێوان کانساس و ویلایەتی نیوجێرسی ئەمریکادا.

بەڕێوەبەرایەتی ژمێریاریی لە وەزارەتی دارایی عیراق رایگەیاندووە، دەستیان کردووە بە خەرجکردنی پارە بە مەبەستی دابەشکردنی موچەی مانگی ١ی خانەنشینان.

بەڕێوەبەرایەتی ژمێریاریی لە وەزارەتی دارایی عیراق رایگەیاندووە، دەستیان بە ئامادەکارییەکان کردووە بۆ خەرجکردنی پارە و بە زووترین کات لەرێگای بانکەکای رەشید و رافیدەینەوە دەست بە دابەشکردنی دەکەن.

ئەوەش هاتووە، بەم زووانە هەریەک لە خانەنشینانی شارستانی و سەربازی، کورتەنامەیەکیان پێدەگات و ئاگادار دەکرێنەوە بەوەی موچەکانیان خراوەتە سەر هەژمارە بانکییەکانیان، ئەوانیش دەتوانن لەهەرکاتێکدا بیانەوێت موچەکانیان رابکێشن.

ئەوەش خراوەتە روو، لەگەڵ خانەنشیناندا موچەی چاودێری کۆمەڵایەتیش دابەشدەکرێت. بەڕێوەبەرایەتییەکە راشیگەیاندووە، هیچ گرفتێک لە دابینکردنی پارەدا نییە و ئەو دەنگۆیانەی باس لە کورتهێنان دەکەن دوورن لە راستییەوە.

ئەوەش لەکاتێکدایە، ئەمڕۆ ٥ی ١ی ٢٠٢٥، خانەنشینانی هەرێم موچەی مانگی ١١ی ساڵی رابردوویان وەرگرت.

لە ڤیدیۆیەکدا دەردەکەوێت، لە یەکێک لە ناوچە گەشتیارییەکانی بۆلیڤیا تیمساحێک هێرشدەکاتە سەر بەلەمێکی گەشتیاران، بەڵام هیچ کەسێک بریندار نابێت.

بڵاوبوونەوەی ڤیدیۆکە تۆڕەکۆمەڵایەتییەکانی داگیرکردووە، کاتێک بەلەمێک کە پێنج گەشتیاری لەسەرە، لەناکاو تیمساحێک لە جۆری 'تیمساحی رەش' دەردەکەوێت و هێرشدەکاتە سەر بەلەمەکە، بەڵام بە رێکەوت کەس لەو شوێنەدا نییە کە تیمداحەکە هێرشی دەکاتە سەر، تەنها ژنێک لە نزیکییەوەیەتی.

گەشتیارەکان بۆ میدیاکان باسیان لەوە کردووە، ساتێکی ترسناک بووە و لەدوای هێرشەکەوە راستەوخۆ ئەو ژنە شوێنی خۆی گۆڕیوە لەسەر بەلەمەکەدا.

تیمساحی رەش، ئەو جۆرەی تیمساحە کە درێژییەکەی دەگاتە شەش مەتر و کێشی ٣٠٠ کیلۆگرامە. بەشێوەیەکی گشتی لە چەند شوێنێکی ئەمریکای لاتیندا دەژی.

میدیا جیهانییەکان باس لە کەشوهەوای بەریتانیا دەکەن و ئاماژەیان بەوەکردووە، پێدەچێت بەهۆی بەفر بارینی زۆر و سەرما و بەستنی رێگاکانەوە، بەریتانیا ئیفلیج ببێت و ئیش و کاری رۆژانە پەکی بکەوێت.

ئاژانسی بی ئەی میدیای بەریتانی بڵاویکردووەتەوە، پێشبینی دەکرێت بەریتانیا رووبەڕووی شەپۆلێکی سەرمای بەهێز و بەفربارینی چڕ ببێتەوە، بەهۆیەوە شەقام و رێگا و بانەکان بیانبەستێت، تەنانەت لەوانەیە گەشتەکان لەرێگای هێڵی ئاسنی و فڕۆکەشەوە رابگیرێن.

ئەوەش خراوەتە روو، بەپێی دوایین ئەو پێشبینییانەی بۆ وڵاتەکە کراوە بۆماوەی یەک هەفتەی داهاتوو، چاوەڕواندەکرێت شەپۆلێکی چڕی بەفربارین و سەرما وڵاتەکە بگرێتەوە و لە هەندێک ناوچەی وڵاتەکەشدا ئاستی بەفربارین بگاتە ٣٠ سانتیمەتر.

ئەوەش لەکاتێکدایە، بەهۆی ئەو گۆڕانکارییە ژینگەییانەی کە روویانداوە و گۆڕانی کەشوهەوا لە جیهاندا، شارەزایانی کەشناسی باس لەوەدەکەن، پێشبینییەکانی کەشوهەوا رەنگە هەندێکجار بۆماوەی درێژخایەن راست دەرنەچن و بگۆڕێن.

تۆمیکۆ ئیتۆکا، لە تەمەنی ١١٦ ساڵیدا کۆچی دوایی کرد، ئەو ژنەی لە ریکۆردی گینسدا بە بەتەمەنترین کەسی جیهان ناوی تۆمارکراوە.

تۆمیکۆ لە ناوچەی شیا لە ناوەڕاستی یابان لە خانەی بەساڵاچوواندا دەژیا، ئەگەرچی لە ٢٩ی مانگی ١٢دا کۆچی دوایی کرد، بەڵام هەواڵەکە درەنگتر بە میدیاکان راگەیەنرا.

تۆمیکۆ تاوەکو کۆتایی تەمەنی کە کۆچی دوایشی کرد، یەکێک لە خواردنە سەرەکییەکانی مۆز بووە، هەروەها حەزی بە خواردنەوەی کالبیسی یابانی کردووە، کە ئەو خواردنەوەیە بنەڕەتەکەی کەمێک تامی شیر و ترشییە، غازی تێدا نییە، هەروەها سەرەڕای ئەو تامە بنەڕەتییەی بە چەند تامێکی دیکە ئامادە دەکرێت، لەوانەش ماست و ڤانێلا و چەند تامێکی میوە، ئەوە تۆمیکۆ زیاتر حەزی لێبووە، کالبیس بووە بە تامی ماست.

کالبیس خواردنەوەیەکی باوی یابانە، کە سودەکانی بەرێژەیەک زۆرن، رۆڵی بەرچاو دەگێرێت لە چالاککردنی مێشک و بەهێزکردنی توانای زیرەکیدا، هەروەها بەرگری جەستە بەهێز دەکات و لەگەڵ بەکتریاکانی ریخۆڵەدا دەجەنگێت بۆ پاراستی سیستمی هەرس بە چالاکی و تەندروستی، کە ریخۆڵەکان بە "مێشکی دووەم" ناودەبرێن چونکە کاریگەریی راستەوخۆ لەسەر هەست و رەفتاری مرۆڤەکان دروست دەکات.

لەدوای مردنی ماریا برانیاسی ١١٧ ساڵ لە ساڵی رابردوودا، تۆمیکۆ بە بەتەمەنترین کەسی جیهان ناوی تۆمار کرا. لە ٢٠ـەکانی تەمەنیدا هاوسەرگیری کردووە و دوو کچ و دوو کوڕی هەیە.

یابان یەکێکە لەو وڵاتانی زۆرترین کەسانی بەتەمەنی تێدایە و تاوەکو مانگی ٩ی ساڵی رابردوو ریکۆردی جیهانی شکاند بەوەی، ٩٥ هەزار و ١٠٠ کەسی وڵاتەکە تەمەنیان گەیشتووەتە ١٠٠ ساڵ و زیاتر.

هەسەدە تێكشكاندنی هێرشێكی گروپە چەكدارەكانی بۆسەر بەنداوی تشرین و دەوروبەری  راگەیاندو دەڵێت، چەكدارەكان دەیان كوژراو و برینداریان هەبووە.

ناوەندی راگەیاندنی هێزەكانی سوریای دیموكرات بڵاویكردەوە، هێرشی گروپە چەكدارەكان بە پشتیوانی هێزی ئاسمانی و فڕۆكەی بێفڕۆكەوان بووە، بەڵام شەڕڤانان بەرپەرچی هێرشەكەیان داونەتەوە و زیانی گەورەیان پێگەیاندوون.

ناوەندی راگەیاندنی هەسەدە ئاماژەی بەوەشكردووە، هەموو هێرشەكانی سەر ناوچەكانی رۆژهەڵات و باشوری مەنبج و باكوری بەنداوی تشرینیان تێكشكاندووە و چەكدارەكان دەیان كوژراو و برینداریان هەبووە.

دوای نزیكەی مانگێك لە راگرتنی گەشتەكانی، رۆژی سێشەممە فڕۆكەخانەی نێودەوڵەتی دیمەشق گەشتە ئاسمانییەكانی دەستپێدەكاتەوە، سەرۆكی دەستەی فڕۆكەوانی مەدەنی و گواستنەوەی ئاسمانی ئەو وڵاتەش دەڵێت، ئامادەكارییان بۆ پێشوازیكردن لە گەشتەكان لە سەرتاسەری جیهانەوە كردووە.

ئەشهەد سەلیبی، سەرۆكی دەستەی فڕۆكەوانی مەدەنی و گواستنەوەی ئاسمانی سوریا لە لێدوانێكی رۆژنامەوانیدا رایگەیاند، سێشەممەی داهاتوو كە دەكاتە رۆژی ٧ـی ئەم مانگە گەشتە ئاسمانییەكانی فڕۆكەخانەی نێودەوڵەتی دیمەشق دەستپێدەكاتەوە.

ئەوەشی خستەڕوو، بە هەماهەنگی لەگەڵ هاوبەشەكانیان، لە قۆناغی نۆژەنكردنەوەی فڕۆكەخانەكانی دیمەشق و حەلەبدان بۆ پێشوازیكردن لە گەشتە ئاسمانییەكان لە سەرتاسەری جیهانەوە.

هاوكات، لە یەكەم كاردانەوەی هێڵە ئاسمانییەكانی وڵاتان بۆ كردنەوەی فڕۆكەخانەی نێودەوڵەتی دیمەشق، هێڵی ئاسمانی قەتەر رایگەیاند، لەدوای رۆژی ٧ـی ئەم مانگەوە هەفتانە سێ گەشتیان بۆ فڕۆكەخانەی نێودەوڵەتی دیمەشق دەبێت.

جێی ئاماژەیە، رۆژی ٨ـی كانوونی یەكەمی رابردوو لەگەڵ رووخانی رژێمی بەشار ئەسەد لە سوریا، سەرجەم كارمەندانی فڕۆكەخانەی نێودەوڵەتی دیمەشق فڕۆكەخانەكەیان چۆڵكرد و بەوهۆیەشەوە فڕۆكەخانەكە داخرا.

هێزەکانی سوریای دیموکرات (هەسەدە) رایدەگەیەنێت، بەرپەرچی سەرجەم هێرشی گرووپە چەکدارەکانیان لە باشوور و رۆژهەڵاتی مەنبج دایەوە.

ناوەندی راگەیاندنی هێزەکانی سوریای دیموکرات (هەسەدە) رایگەیاند، بەرپەرچی سەرجەم هێرشی گرووپە چەکدارەکانیان دایەوە کە لەلایەن فڕۆکەی جەنگی و درۆنی تورکیاوە پاڵپشتی دەکران لە باشوور و رۆژهەڵاتی مەنبج، دەیان کـ*ـوژراو و برینداریش لە ریزەکانیاندا هەیە.

ئاماژەی بەوەشکرد، لە چەند سەعاتی داهاتوودا لە راگەیەندراوێکدا تەواوی وردەکارییەکان دەخرێنەڕوو.

دادوەرێكی ئەمریكی بڕیاریدا رۆژی 10ی ئەم مانگە دۆناڵد ترەمپ دادگایی بكات و سزای بەسەردا بسەپێنێت.

دادوەر خوان مێرشان دادوەری دادگای باڵای نیویۆرك داواكارییەكەی دۆناڵد ترەمپ سەرۆكی هەڵبژێردراوی ئەمریكای رەتكردەوە بۆ هەڵوەشاندنەوەی دادگایی كردنەكەی بە تۆمەتی پارەدان بە ئەكتەرێكی پۆرنۆگرافی كە تەنها 10 رۆژ پێش دەستبەكاربوونی دادگاییەكە بەڕێوەدەچێت.

دەشڵێت، سزای ئازادكردنی بێمەرج دەستبەسەركردن و غەرامەكردن یان هەر سزایەكی تر یەكێكە لە بژاردەكان.

ترەمپ لە 30ی 5ی 2024دا سزا درا بە تۆمەتی ساختەكردنی تۆمارە بازرگانییەكان بۆ پەردەپۆشكردنی پارەی پارێزەرەكەی ئەو كاتەی كە 130 هەزار دۆلاری بە ئەكتەرێك داوە، لە بەرامبەر بێدەنگكردنی پێش هەڵبژاردنەكانی 2016.

وتەبێژی ترەمپیش رایگەیاند، پێویستە رێگە بە ترەمپ بدرێت بەردەوام بێت لە ئاڵوگۆڕێ دەسەڵات و بە دڵنیاییشەوە ترەمپ لە دژی ئەو تۆمەتانە دەجەنگێت.

وەزیری دەرەوەی سوریا،پاش ئەنجامدانی یەکەمین سەردانی بۆ سعودیە، سەردانی قەتەر، ئیمارات و ئەردەن دەکات 

وەزیری دەرەوەی سوریا ئەسعەد شیبانی لە تۆری کۆمەڵایەتی ئیکس رایگەیاند، لەم هەفتەیەدا سەردانی هەریەکە لە وڵاتانی سعودیە و ئەردەن و قەتەر دەکەم

وەزیری دەرەوەی سوریا ئاماژەبەوەشدەکات، مەبەستی سەردانەکەم بۆ جێگیربوونی ئاسایشی ناوچەکەیە 

ئەمە لەکاتێکدایە وەزیری دەرەوەی سوریا پێشتر سەردانی سعودیەی کردوە، وەزیری دەرەوەی سوریا دەیەوێت بەسەردانکردنی ئەو وڵاتانە هەژموونی تازەی حکومەتی سورییا بچەسپێنێت

ئیلهام ئەحمەد هاوسەرۆکی پەیوەندییەکانی دەرەوەی ئیدارەی دیموکراتیکی باکوور و رۆژهەڵاتی سوریا و گیدئۆن ساعر وەزیری دەرەوەی ئیسرائیل پەیوەندییەکی تەلەفۆنییان ئەنجامدا.

رۆژنامەی "ئیسرائیل هوم"ی ئیسرائیلی رایگەیاند، "پەیوەندییەکی تەلەفۆنی لە نێوان گیدئۆن ساعر، وەزیری دەرەوەی ئیسرائیل و ئیلهام ئەحمەد، هاوسەرۆکی بەشی پەیوەندییەکانی دەرەوەی ئیدارەی دیموکراتیکی رۆژئاوا و باکووری رۆژهەڵاتی سوریا ئەنجامدراوە". 

"لە پەیوەندییەکەدا ئیلهام ئەحمەد سەبارەت بە پێشێلکردنی مافەکان و کوشتنی هەڕەمەکی و دەستبەسەرکردنی کوردان لەلایەن گروپە چەکدارەکانی سوریاوە زانیاری وردی راگەیاندووە، هەروەها باس له پێشهاتەکانی ناوچەکه کراوە"، رۆژنامە ئیسرائیلییەکە وادەڵێت.

گیدئۆن ساعر وەزیری دەرەوەی ئیسرائیل لە پەیوەندییەکەدا ئاماژەی بەوەداوە، "لە هەموو دیدارە دیپلۆماسییەکانی لەگەڵ هاوتاکانی لە گۆڕەپانی نێودەوڵەتیدا نیگەرانیەکانی خۆی سەبارەت بە دۆخی گەلی کورد لە رۆژئاوا خستووەتەڕوو".

لە سیئۆلی پایتەختی كۆریای باشور خۆپیشاندانی لایەنگرانی سەرۆكی لەسەر كارلادراو بەڕێوەدەچێت و دادگای دەستوری كۆریای باشوریش رایگەیاند، رۆژی ١٤ی ئەم مانگە سەرۆكی لەسەر كارلادراو دادگایی دەكرێت.

هەزاران هاووڵاتی لە پایتەختی كۆریای باشور رژانە سەر شەقامەكان و پشتگیری خۆیان بۆ یون سیوك یول سەرۆكی لەسەر كارلادراوی وڵاتەكەیان دەربڕی دوای ئەوەی دادگای دەستوریی كۆریای باشوور رۆژی هەینی فەرمانی دەستگیركردنی بۆ سیوك یول دەركرد، بەڵام ئەو رەتی كردەوە خۆی بەدەستەوە بدات و یەكەیەكی سوپا پشتگیری سیوك یولیان كرد و پشێوی لە نێوان پۆلیس و ئەو یەكەیە دروستبوو.

ئەمڕۆش دادگای دەستوریی كۆریای باشور رۆژی ١٤ی ئەم مانگەی دیارێكرد بۆ دادگاییكردنی سیوك یول.

ئەوەش لەكاتێكدایە، لە سەرەتای مانگی ١٢ی ساڵی رابردوو سیوك یول باری نائاسایی سەربازیی راگەیاند و بڕیاریدا بە داخستنی پەرلەمان و دوای دوو هەفتە پەرلەمان بڕیاریدا بە دورخستنەوەی سەرۆكی كۆریای باشوور.

ئاژانسی رۆیتەرز رایگەیاند، سەرۆكی ئەمریكا كۆتا هاوكاری سەربازی بۆ ئیسرائیل ئامادە كردووە كە بەهاکەی هەشت ملیار دۆلارە. 

ئاژانسی رۆیتەرز رایگەیاند، ئیدارەی جۆ بایدن سەرۆكی ئەمریكا كۆنگرێسی ئاگاداركردوەتەوە بە ناردنی كۆتا هاوكاری سەربازی بە بەهای هەشت ملیار دۆلار.

دەشڵێت، هاوكاریەكان فرۆكەی جەنگی و هێلیكۆپتەر و چەند جۆرێكی بۆمب و پێداویستی بەرگری لە خۆی گرتووە، بەڵام پێویستی بە رەزامەندی ئەنجومەنی نوێنەران و پیران هەیە. 

ئاماژەی بەوەشكردووە، بەشێك لە دیموكراتەكان داوایان لە بایدن كردووە لە فرۆشتنی چەك بە ئیسرائیل رەچاوی رەوشی مرۆیی غەززە بكات، بەڵام بایدن رەتیكردوەتەوە گوێ بەو بابەتە بدات. 

هاوكات، سایتی ئەكسیۆس رایگەیاند، كۆتا كاروانی ئەمریكا بۆ ئیسرائیل كە رێككەوتنی لەسەر كراوە كاتێكی زۆری پێویستە، بەشێكی لە ئێستادا رادەستی ئیسرائیل دەكرێت و بەشەكەی تریشی لە ماوەی ساڵێك یان زیاتر دەنێردرێت. 

حکومەتی نوێی سوریا بڕیاریداوە چیدیکە رێگە نەدات هاووڵاتیانی لوبنانی بێ ڤیزە بێنە وڵاتەکەیەوە.

ئاژانسی فرانس پرێس رایگەیاندووە، دوای گرژییەکانی نێوان چەکدارانی حکومەتی نوێی سوریا و لوبنان، رێکاری نوێ بۆ هاووڵاتیانی لوبنانی دانراوە، کە ئەمە یەکەم جارە دوای روخانی رژێمەکەی ئەسەد ئەم بابەتە باس بکرێت.

پێشتر رێگە بە هاووڵاتیانی لوبنانی دەدرا بێ ڤیزە، تەنها بە پاسپۆرت یاخود ناسنامەیەک بچنە ناو خاکی سوریا، بەڵام لە ئێستادا سنوورەکان بەڕووی هاووڵاتیە لوبنانییەکاندا کراوەنین وەک پێشتر.

لە ئێستادا دەسەڵاتدارانی نوێی سوریا رێوشوێنی دیکەیان گرتووەتەبەر و هاووڵاتیە لوبنانییەکان تەنها بە مۆڵەتی رەسمی دەتوانن بچنە خاکی سوریا.

مۆسكۆ رایگەیاند، دەسەڵاتدارانی نوێی دیمەشق ئاماژەیان ناردووە و گرنگی بە بەردەوامبوونی پەیوەندییەكان و مانەوەی هێزەكانیان لەو وڵاتە دەدەن. 

ڤاسیلی نەبێنزیا، نوێنەری ڕووسیا لە نەتەوە یەكگرتووەكان لە چاوپێكەوتنێكی تەلەفزیۆنیدا ئاشكرایكردووە كە دەسەڵاتدارانی نوێی سووریا ئاماژەیان ناردووە و ئارەزووی بەردەوامبی بوونی روسیایان هەیە لە وڵاتەكەیاندا.
نوێنەری روسیا هەروەها جەختی لەوەشكردەوە كە مۆسكۆ و دیمەشق پەیوەندیی دۆستایەتی درێژخایەنەیان هەیە، ئەو پەیوەندیەش بە هیچ رژێمێكەوە نەبەستراوەتەوە.
ئەحمەد شەرع سەرۆكی ئیدارەنی نوێی دیمەشق ڕایگەیاندبوو كە روسیا دووەم بەهێزترین وڵاتی جیهانە و دیمەشقیش بەرژەوەندی ستراتیژی لەگەڵ مۆسكۆ هەیە.

مۆسكۆ: دەسەڵاتدارانی نوێی دیمەشق ئاماژەیان بۆ مانەوەمان لە وڵاتەكەیان ناردووە
 

رێژەی لەدایكبوونی منداڵ لە كۆریای باشوور ئاستێكی پێوانەیی لە ماوەی نۆ ساڵی رابردوودا  تۆمار كرد، بەراورد بە ساڵی پێشووتر رێژەكە 3.1% زیادیكردووە.

وەزارەتی ناوخۆی كۆریای باشور بڵاویكردەوە، ژمارەی لەدایكبوون لە ساڵی ڕابردوو لەو وڵاتە گەیشتووەتە 242 هەزار و 334 منداڵ، كە بەراورد بە ساڵی پێشووتر 3.1% زیادیكردووە، ئەوەش لەدوای پلانێكی گشتگیر لە لایەن ئەو وڵاتە بۆ زیادكردنی رێژەی منداڵبوون و دەرچوون لە قەیرانی كەمی 

ژمارەی لەدایكبوون كە مەترسی لەسەر داهاتووی وڵاتەكە دروستكردووە. 
هاوكات، ئاژانسی هەواڵی یۆنهاپی رەسمی ئەو وڵاتە بڵاویكردەوە، ژمارەی دانیشتووانی كۆریای باشوور لە ساڵی ڕابردوو زیاتر بووە لە 51 ملیۆن كەس.
كۆریای باشوور كەمترین ڕێژەی لەدایكبوونی لە جیهاندا هەیە، كە لە ساڵی 2023دا تەنها 0,72 بووە، لە كاتێكدا بەپێی ستانداردە نێودەوڵەتییەكان هەموو وڵاتێك پێویستی بە ڕێژەی لەدایكبوونی 2,1% هەیە بۆ ئەوەی ئاستێكی جێگیری دانیشتوانی هەبێت.