پسپۆڕانی تەندروستی جەختدەکەنەوە، کاتێک ئامانج کۆنترۆڵکردنی ئاستی شەکری خوێن بێت، نانی گەنمی تەواو (نانی بۆر) باشترین هەڵبژاردنە بەراورد بە نانی سپی، ئەوەش بەهۆی جیاوازیی کاریگەرییان لەسەر خێرایی هەڵمژینی شەکر لەلایەن خوێنەوە.

بۆچی نانی سپی مەترسیدارە؟
نانی سپی بەهۆی ئەوەی لە ئاردی پاککراوە دروست دەکرێت و توێکڵە دەوڵەمەندەکەی لێکراوەتەوە، رێژەی ریشاڵی کەمە، ئەمەش وادەکات پڕۆسەی هەرسکردنی خێرا بێت و ببێتە هۆی بەرزبوونەوەی خێرا و کتوپڕی شەکری خوێن، کە فشار لەسەر ئەنسۆلین دروست دەکات. بەرزبوونەوەی بەردەوامی شەکر بەهۆی نانی سپییەوە، مەترسیی دروستبوونی "بەرگریی ئەنسۆلین" و تووشبوون بە شەکرەی جۆری 2 زیاد دەکات.

سودەکانی نانی بۆر:

بەپێچەوانەوە، نانی بۆر (گەنمی تەواو) بەهۆی بوونی رێژەیەکی بەرز لە ریشاڵ و کاربۆهیدراتی ئاڵۆز، پڕۆسەی هەرس و هەڵمژینی شەکر هێواش دەکاتەوە. ئەمەش دەبێتە هۆی ئەوەی شەکری خوێن بە شێوەیەکی پلەبەپلە و لەسەرخۆ بەرزببێتەوە، نەک بە خێرایی.

بەراوردکاریی خۆراکی:

• نانی بۆر: دەوڵەمەندە بە ریشاڵ، پرۆتین و مادە خۆراکییەکان، هەستی تێربوون دەبەخشێت و یارمەتیدەرە بۆ دابەزاندنی کێش. توێژینەوەکان دەریانخستووە خواردنی نانی بۆر کاریگەری ئەرێنی لەسەر باشترکردنی پشکنینی شەکری کەڵەکەبوو (HbA1c) هەیە.

• نانی سپی: زۆرجار کالۆری، کاربۆهیدرات و سۆدیۆمی زیاترە و هەستی تێربوون کەم دەکاتەوە.

بەڕێوەبەرایەتیی هاتوچۆی سلێمانی رایدەگەیەنێت، دوای ئەوەی بەهۆی بەفر و بەستنەوە ئاستەنگی هاتوچۆ لە رێگای تاسڵوجە - بازیان دروستبوو، ئێستا رێگاکە پاککراوەتەوە و هاتوچۆ تێیدا ئاسایی بووەتەوە.

لە راگەیەندراوێکدا هاتوچۆی سلێمانی ئاماژەی بەوەکردووە، تیمەکانی رێگاوبان لەرێگەی رشتنی خوێ و پاککردنەوەی شەقامەکەوە گرفتەکەیان چارەسەر کردووە و تیمەکانیشیان لە سنورەکە چاودێریی دۆخەکە دەکەن بۆ هەر حاڵەتێکی نەخوازراو.

بەڕێوەبەرایەتییەکە داوا لە شۆفێران دەکات، پابەندی رێنماییەکان بن و بۆ پاراستنی سەلامەتییان خێرایی کەم بکەنەوە.

 

گوستاڤۆ پێتڕۆ، سەرۆکی کۆڵۆمبیا رایدەگەیەنێت، رۆژی 3ی شوبات لە ئەمریكا لەگەڵ دۆناڵد ترەمپ کۆدەبێتەوە، ئەمەش وەک ئاماژەیەک بۆ باشبوونەوەی پەیوەندییەکانی نێوان هەردوو وڵات.

پێتڕۆ لە کۆبوونەوەیەکدا لەگەڵ وەزیرەکانی کابینەکەی وتی: "کۆبوونەوەکە لە 3ی شوبات دەبێت و ئەنجامەکانی دەبینین". ئەم بڕیارەش دوای ساڵێک لە گرژی و شەڕەقسەی توند لە نێوان واشنتۆن و بۆگۆتا دێت.

هۆکاری گرژییەکانی نێوان ئەمریکا و کۆڵۆمبیا:

هەرچەندە بۆ ماوەی چەندین دەیە هاریکاریی ئەمنی لە نێوان هەردوو وڵاتدا هەبووە، بەڵام لەوەتەی دۆناڵد ترەمپ لە مانگی کانونی دووەمی رابردووەوە خولی دووەمی سەرۆکایەتیی دەستپێکردووە، پەیوەندییەکان تێکچوون، بەتایبەت دوای هەوڵەکانی ئەمریکا بۆ لابردنی نیکۆلاس مادۆرۆ، سەرۆکی ڤەنزوێلا و دەستگیرکردنی.

تۆمەت و سزا:

پێتڕۆی تەمەن 65 ساڵ، کە ئەمساڵ پۆستەکەی جێدەهێڵێت، یەکێک بوو لە رەخنەگرە سەرسەختەکانی ترەمپ و ئاشکرا دژی سیاسەتی دەرکردنی کۆچبەران وەستایەوە. لە بەرامبەردا ترەمپ بێ خستنەڕووی بەڵگە، پێتڕۆی بە تێوەگلان لە بازرگانیی مادە هۆشبەرەکان تۆمەتبار کرد و سزای دارایی بەسەر خۆی و بنەماڵەکەیدا سەپاند.

هەروەها پێتڕۆ دژی هێرشە ئاسمانییەکانی ئەمریکا بوو بۆ سەر بەلەمەکان لە دەریای کاریبی کە بە پاساوی قاچاخچێتیی مادە هۆشبەرەکان دەکرانە ئامانج و بەهۆیەوە زیاتر لە 100 کەس کوژران، کە رێکخراوەکانی مافی مرۆڤ بە "کوشتنی دەرەوەی یاسا" ناویان برد.

کۆچەر جەمال، بەڕێوەبەری بەنداوی دوکان بە کوردسات نیوزی راگەیاند، لە 24 سەعاتی رابردوودا ئاستی ئاوی بەنداوی دوکان 50 سانتیمەتر زیادی کردووە.

ئاماژەی بەوەشکرد، بە کۆی گشتی لەمساڵدا ئاستی ئاوی بەنداوەکە شەش مەتر و 70سانتیمەتر بەرزبووەتەوە، کە ئەمەش رێژەیەکی باشە و کاریگەریی لەسەر گلدانەوەی ئاو و بەرهەمهێنانی کارەبا دەبێت.

دوای نزیکەی پێنج سەعات لە داخستنی بەهۆی مەترسیی هێرشی سەربازیی ئەمریکا، ئێران ئاسمانی وڵاتەکەی بەڕووی گەشتە ئاسمانییەکاندا کردەوە، ئەوەش دوای ئەوەی بەشێک لە هێڵە ئاسمانییەکان ناچاربوون گەشتەکانیان هەڵبوەشێننەوە یان رێڕەوەکانیان بگۆڕن.

وردەکاریی داخستنەکە:

بەپێی زانیارییەکان، ئێران لە سەعات 22:15ـی شەوی چوارشەممەوە ئاسمانی وڵاتەکەی بەڕووی گەشتەکاندا داخستبوو، تەنیا رێگە بەو گەشتە نێودەوڵەتییانە دەدرا کە مۆڵەتی رەسمییان هەبوو. ماڵپەڕی "فلایت رادار 24" ئاشکرای کردووە، پێش سەعات 03:00ـی بەرەبەیان قەدەغەکە هەڵگیراوە و پێنج گەشتی ئێرانی دەستیان بە جوڵە کردووەتەوە.

مەترسییەکانی جەنگ:

ئەم داخستنە کاتییە هاوکات بوو لەگەڵ تاوتوێکردنی بژاردەکان لەلایەن دۆناڵد ترەمپ، سەرۆکی ئەمریکاوە بۆ مامەڵەکردن لەگەڵ دۆخی ئێران. بەرپرسێکی ئەمریکیش رایگەیاندووە، دوای ئەوەی تاران هۆشداریدا لە ئەگەری هێرشی ئەمریکا بۆسەر خاکەکەی بنکەکانی ئەمریکا لە وڵاتانی دراوسێ دەکاتە ئامانج، واشنتۆن دەستی بە کشانەوەی بەشێک لە کارمەندەکانی لە بنکەکانی رۆژهەڵاتی ناوەڕاست کردووە.

کاریگەری لەسەر گەشتەکان
بڕیارەکە کاریگەریی راستەوخۆی لەسەر هێڵە ئاسمانییەکان هەبوو:

• ئێرۆفلۆتی روسی: گەشتێکی کە بەرەو تاران دەچوو، ناچاربوو بگەڕێتەوە مۆسکۆ.

• لوفتهانزای ئەڵمانی: بڕیاریدا تا کاتێکی نادیار ئاسمانی ئێران و عیراق بەکارنەهێنێت و گەشتەکانی بۆ عەممان و تەل ئەبیب تەنیا لە رۆژدا ئەنجام بدات بۆ ئەوەی تیمەکانیان شەو لەوێ نەمێننەوە.

• ئیتا ئێروەیز (ئیتاڵیا): گەشتە شەوانییەکانی بۆ تەل ئەبیب راگرت.

• هیندستان: هەردوو کۆمپانیای ئیندیگۆ و ئێر ئیندیا رایانگەیاند گەشتەکانیان تووشی گرفت یان دواکەوتن دەبن بەهۆی گۆڕینی رێڕەوەکانەوە.

• پێشتریش هێڵە ئاسمانییەکانی تورکیا و فلای دوبەی بەشێک لە گەشتەکانیان بۆ ئێران هەڵوەشاندبووەوە.

جێی ئاماژەیە، ویلایەتە یەکگرتووەکانی ئەمریکا پێشوەختە فڕینی فڕۆکە بازرگانییەکانی وڵاتەکەی بەسەر ئاسمانی ئێراندا قەدەغە کردووە.

ئیدارەی دۆناڵد ترەمپ، سەرۆکی ئەمریکا، کە ساڵی رابردوو بە شانازییەوە باسی لە بۆردومانکردنی بنکە ئەتۆمییەکانی ئێران دەکرد بە بۆمبە زەبەلاحەکانی فڕۆکەی B-2، ئێستا خۆی بۆ سیناریۆیەکی نوێ ئامادە دەکات کە ئەمجارەیان لەژێر ناوی "پشتیوانی لە خۆپیشاندەران"دایە.

سی ئێن ئێن لە زاری پسپۆڕانی سەربازییەوە بڵاویکردووەتەوە، هەر هێرشێکی نوێی ئەمریکا جیاواز دەبێت لەو هێرشە سنوردارەی ساڵی رابردوو بۆ سەر سێ بنکەی ئەتۆمی، هاوکات دەسەڵاتدارانی ئێرانیش لەو پەڕی ئامادەباشیدان و بەردەوام ئاماژە بە پێشکەوتنی توانا سەربازییەکانیان دەدەن، چونکە ئەمجارە دەبێت ناوەندەکانی فەرماندەیی سوپای پاسداران، هێزەکانی بەسیج و پۆلیس بکرێنە ئامانج.

مەترسیی کوژرانی مەدەنییەکان:

کێشەی گەورەی ئەم پلانی هێرشکردنە ئەوەیە زۆربەی بنکەکان لەناو ناوچە ئاوەدانەکانن. شارەزایان هۆشداری دەدەن کە کوژرانی هەر هاووڵاتییەکی مەدەنی، دەبێتە "سەرکەوتنێکی راگەیاندن" بۆ رژێمی ئێران و دەیکاتە کەرەستەیەک بۆ کۆکردنەوەی خەڵک لە دەوری خۆی، تەنانەت ئەو ریفۆرمخوازانەش لەدەست دەدەن کە دژی بۆردومانی ئەمریکان.

کارڵ شوستەر، کاپتنی پێشووی هێزی دەریاوانیی ئەمریکا دەڵێت: "دەبێت هەر جوڵەیەک زۆر ورد بێت و هیچ کەسێک لە دەرەوەی سوپای پاسداران نەکوژرێت، ئەگەر مەدەنییەکان زیانیان بەر بکەوێت، ئەمریکا وەک هێزێکی داگیرکەر دەردەکەوێت نەک رزگارکەر".

ئامانجەکان؛ لێدان لەدڵی پاسداران:

جگە لە شوێنی سەرکردەکان کە دەکرێت وەک پەیامێکی سیاسی بکرێنە ئامانج، شارەزایان پێشبینی دەکەن بەرژەوەندییە ئابوورییەکانی سوپای پاسداران بکرێنە ئامانج، چونکە بەپێی مەزەندە و پاگەندەکانی ئەمریکا، سوپای پاسداران لەڕێگەی تۆڕێک لە کۆمپانیاوە دەستی بەسەر سێیەکی داهاتی نیشتمانیی ئێراندا گرتووە. 

چەکەکان؛ موشەکی کروز و فڕۆکەی بێفڕۆکەوان:

بەپێچەوانەی ساڵی رابردوو کە فڕۆکەی B-2 بەکارهات، بۆ ئەمجارە پێشبینی دەکرێت ئەمریکا پشت بەم چەکانە ببەستێت بۆ کەمکردنەوەی مەترسییەکان:

• موشەکی کروز (تۆماهۆک): کە لە دوورەوە و لەسەر کەشتی و ژێردەریاییەکانەوە ئاڕاستە دەکرێن.

• موشەکی ئاسمانی: کە لە دەرەوەی ئاسمانی ئێرانەوە لەلایەن فڕۆکە جەنگییەکانەوە دەوەشێندرێن.

• فڕۆکەی بێفڕۆکەوان: بۆ پێکانی ئامانجە وردەکان.

شارەزایان بە دووری دەزانن بۆمبی ئاسایی بەکاربهێنرێت بەهۆی مەترسیی زۆرەوە، پێشبینی دەکەن هێرشەکە "خێرا و کاریگەر" بێت بۆ ئەوەی سەرنجی میدیاکان رابکێشێت، بەڵام هێشتا مەترسیی ئەوە هەیە ئەنجامەکەی پێچەوانەی خواستی واشنتۆن بێت، چونکە توانای سەربازی ئێران، زۆر جار دەکەوێتە سەر و ئاستی چاوەڕوانی وڵاتانی دژبەرییەوە.

دۆناڵد ترەمپ، سەرۆکی ئەمریکا رایگەیاند، بەپێی ئەو زانیارییانەی لە "سەرچاوەی باوەڕپێکراو"ـەوە پێیگەیشتووە، کوشتنی خۆپیشاندەران لە ئێران راگیراوە، لە ئێستادا هیچ بەرنامەیەک بۆ جێبەجێکردنی سزای سێدارە نییە.

ترەمپ ئاماژەی بەوەشکردووە، بڕیار بوو رۆژی چوارشەممە سزای لەسێدارەدان بۆ خۆپیشاندەرێک جێبەجێ بکرێت، بەڵام پرۆسەکە راگیراوە.

سەرۆکی ئەمریکا جەختی لەوە کردەوە کە زانیارییەکانی لە سەرچاوەی جێی متمانەوە پێگەیشتووە، بەڵام لە هەمان کاتدا وتی: بەدواداچوون بۆ بابەتەکە دەکەن تا بزانن "ئەمە بە وردی مانای چییە".

سەبارەت بە کوشتنی خۆپیشاندەرانیش لە ئێران، ترەمپ ئەوەشی خستەڕوو: "دڵنیام ئەگەر روداوی وا روبدات، هەموومان بە ئێوەشەوە، زۆر نیگەران دەبین".

لە ماوەی 14 رۆژی رابردوودا شەش کەس بە تۆمەتی تەقەکردن دەستگیرکراون و ئاسایشی سلێمانیش دەڵێت؛ لە هەریەک لە روداوەکاندا لەماوی کەمتر لە 24 سەعات تۆمەتبارەکانیان دەستگیرکردووە.

بەڕێوەبەرایەتی ئاسایشی پارێزگای سلێمانی بڵاویکردەوە،  لەماوەی 14 رۆژی رابردوودا ٦شەش تۆمەتباری روداوی تەقەکردنی لەناو شاری سلێمانی دەستگیرکردووە.

ئاماژەی بەوەشکرد، لەماوەی 14 رۆژی رابردووی ئەمساڵ لەناو شاری سلێمانی چەند حاڵەتی تەقەکردن رویدا، بەبڕیاری دادوەری لێکۆڵینەوەی ئاسایش لەماوەی کەمتر لە 24 سەعات، لەرودانی هەریەک لە روداوەکان توانراوە سەرجەم تۆمەتباران دەستگیربکرێن.

ئاسایشی سلێمانی ئەوەشی خستەڕوو، بەمادەکانی ( 31/405) لەیاسای سزادانی عیراقی و ( 15 )ـی چەک تۆمەتبارەکان راگیراون

بەڕێوبەرایەتی ئاسایشی سلێمانی دڵنیایی دەداتە هاووڵاتیان هەمیشە لایەنی جێبەجێکاری یاسا و پارێزەری ئارامی و ئاسایش دەبێت.

 

بۆ بینینی هەندێک لە روداوی تەقەکردنەکان کلیک لێرە بکە.....

هەسەدە رایدەگەیەنێت: هێزی سەربازی زۆر کۆکراوەتەوە و مەترسیی هەیە ناوچەکە بەرەو جەنگێکی گەورە بڕوات.

هێزەکانی سوریای دیموکرات 'هەسەدە' لە راگەیەنراوێکدا بڵاویکردەوە، لە بەرەبەیانی ئەمڕۆوە، ناوچەکانی دێر حافر، مەسکەنە و بەنداوی تشرین، لەلایەن چەکدارانی دیمەشق و بەفڕۆکەی بێفڕۆکەوانی تورکی بۆردومان دەکرێت، ئەمەش مەترسییەکی زۆری لەسەر ئاسایشی مەدەنی و دامەزراوە گرنگەکانی ناوچەکە دروستکردووە.

ئاماژەی بەوەشکرد، لە بەیانییەوە زیاتر لە 12 هێرش بە فڕۆکە فڕۆکەوان و تۆپباران، لەلایەن چەکدارانی سوریاوە ئەنجامدراوە و لەئێستاشدا تۆپبارانکردنی دەروبەری بەنداوەکە بەردەوامە.

هەسەدە ئەوەشی خستەڕوو، چەکدارانی سوریا هەموو دامەزراوە و ناوچەی نیشتەجێبوون بە ئامانج دەگرێت و هەوڵدەدات ژێرخانی ئابوری و دامەزراوە خزمەتگوزارییەکان لە دێرحافر بە ئامانج بگرێت.

راشیگەیاند، هێزەکانیان بەرپەرچی هەموو ئەو هێرشانە دەدەنەوە لەو ناوچانە، بەرگری لە هاووڵاتیان و بەردەوام دەبن لە رووبەڕووبوونەوەی ئەو چەکدارانە.

هێزەکانی سوریای دیموکرات دەشڵێت؛ فڕۆکەی بێفڕۆکەوانی بایرەکداری تورکی لە هێرشەکاندا بەکارهاتووە، هەروەها گروپەکانی دیمەشق بەرپرسیارێتی تەواو هەڵدەگرن لەم گرژییە و ئەو دەرئەنجامانەی بەدوایدا دێت لە رووی مرۆیی و ئەمنییەوە کە ناوچەکە بەرەو جەنگێکی گەورە دەبات.

ناوی کاندیدان بۆ پۆستی سەرۆک کۆماری عیراق بڵاوکرایەوە کە ژمارەیان 15 کاندیدە.

فەرمانگەی راگەیاندنی ئەنجومەنی نوێنەرانی عیراق بڵاویکردەوە، لە كۆی ئەو ناوانەی وەك كاندید بۆ پۆستی سەرۆك كۆمار تۆماركرابوون، 15 ناو مەرجە یاساییەكانیان تێدا بووە و بە كاندید بۆئەو پۆستە پەسەندكراون.

هاوکات ئەنجومەنی نوێنەرانی عیراق ئاماژەی بەوەکردووە، ئەو کەسانەی خۆیان بۆ ئەو پۆستە کاندیدکردووە و ناویان لە لیستەکەدا نییە، ماوەی سێ رۆژیان لەبەردەستدایە بۆ تانەگرتن و داواکەیان بەرزدەکرێتەوە بۆ دادگای باڵای فیدراڵی.

پارێزگاری کەرکوک بڕیاریدا سبەینێ لە سەرجەم ناوەندەکانی خوێندن و فەرمانگەکان پشووی رەسمی بێت.

نوسینگەی راگەیاندنی پارێزگاری کەرکوک بڵاویکردەوە، رێبوار تەها پارێزگاری کەرکوک بڕیاریدا بە راگرتنی دەوامی رەسمی لە سەرجەم فەرمانگەکان، باخچەکانی منداڵان، قوتابخانە سەرەتایی، ناوەندی و ئامادەییەکان و زانکۆکان.

ئاماژەی بەوەشکردووە، ئەم بڕیارە دەبێت کار نەکاتە سەر بەڕێوەچوونی تاقیکردنەوەکانی خوێندکارانی زانکۆ و ئەوەش بەپێی هەڵسەنگاندنی زانکۆکان خۆیان دەبێت.

پارێزگاری کەرکوک جەختی لەوەکردەوە، ئەم بڕیارە بەبۆنەی یادی شەهیدبوونی ئیمام موسای کازم (سڵاوی خوای لەسەر بێت) دراوە، لەگەڵ بەردەوامبوونی دەوام لەو فەرمانگانەی کە ئەرکی خزمەتگوزاری پێشکەش دەکەن.

ئەنجومەنی وەزیرانی هەرێمی کوردستان داوا دەکات بۆ ساڵی داهاتوو، بەشەبودجەی هەرێمی کوردستان، لە یاسای بودجەی فیدراڵ، بەپێی رێژەی 14% دەستنیشان بکرێت.

ئەمڕۆ چوارشەممە 14ـی 1ـی 2025 ئەنجومەنی وەزیرانی هەرێمی کوردستان یەکەمین کۆبوونەوەی ساڵی نوێی ئەنجامدا و بەپێی راگەیەندراوی رەسمئ حکومەتی هەرێم، لە کۆبوونەوەدا، گفتوگۆ لەبارەی پوختەی رەوشی دارایيی ساڵی 2025 کراوە و بارودۆخی دارایيی هەرێمی کوردستان بۆ ساڵی دارایيی 2026 و کارکردن بۆ خەرجکردنی موچە دواکەوتووەکانی هەرێم و شایستە داراییەکانی هەرێمی کوردستان لەلایەن وەزارەتی دارایيی حکومەتی فیدراڵەوە، تاووتوێ کرا.

ئەنجومەنی وەزیران دەڵێت، "پێویستە حکومەتی فیدراڵ هەردوو موچەی مانگی 11 و 12ـی ساڵی 2025 و موچە خەرجنەکراوەکانی ساڵانی 2023 و 2024 خەرج بکات کە بێ هیچ بیانوو و هۆکارێکی یاسایی و دەستووریی نەیناردوون، چونکە موچە مافی یاسایی وشایستەی موچەخۆرانی هەرێمە و حکومەتی هەرێم و خەڵکی کوردستان دەستبەرداریان نابێت، هەروەک دادگای باڵای فیدڕاڵیش جەختی لێ کردەوە کە پێویستە بابەتی موچە تێکەڵی ناکۆکییەکان نەکرێت، بە تایبەتیش کە هەرێمی کوردستان سەرکەوتووانە، رێكکەوتنامەی سێ لایەنی هەناردەی نەوتی جێبەجێکردووە و رۆژانە بە تێکڕایی 220 هەزار بەرمیل نەوت رادەستی سۆمۆ کراوە و لە بازاڕی جیهانیی فرۆشراوە و داهاتەکەی بە کاش لە گەنجینەی وەزارەتی دارایی فیدراڵ، وەک داهاتی کۆتایی تۆمارکراوە، ئەمە سەرەڕای ناردنی بەشی گەنجینەی فیدڕاڵی لە داهاتە نانەوتیەکانی هەرێمی کوردستان و ڕەوانەکردنی تەرازووی پێداچوونەوەی مانگانە بۆ وەزارەتی دارایی فیدڕاڵ، بەڵام سەڕەڕای هەموو ئەمانەش ، وەزارەتی دارایی فیدڕاڵ، هیچ پارەیەکی لە تەرخانکراوەکانی هەرێم بۆ خەرجی بەکاربردن و وەبەرهێنان لە یاسای بودجەی عێراق خەرج نەکردووە، هەرچەندە تەرخانی داراییش هەبووە".

ئەنجومەنی وەزیران داواشدەکات، بۆ ساڵی دارایيی داهاتوودەبێت لە یاسای بودجەی فیدڕاڵیی حكومەتی فیدراڵ، بەشەبودجەی هەرێمی کوردستان دەستنیشان بکرێت و وەزارەتی دارایيی فيدراڵ پابەند بکرێت کە بەشەبودجەی هەرێم بنێرێت وەک هەرێمێکی دەستووری و فیدراڵی کە بە پێی دوایین سەرژمێريی عیراق کە لەلایەن حکومەتی فیدراڵەوە ئەنجامدرا، رێژەی دانیشتووانی هەرێم زیاتر لە 14 ٪ ـیە و دەبێ بەشە بودجەی هەرێمی کوردستان بە پێی ئەو ڕێژەیە دەستنیشان بکرێت.

بەپێی راگەیەندراوی ئەنجومەنی وەزیران، گفتوگۆ لەبارەی بەرەوپێشچوون و بەردەوامبوونی جێبەجێکردنی رێککەوتننامەی سێ لایەنی هەناردەکردنەوەی نەوتی هەرێمی کوردستان کراوە کە لە سێ مانگی کۆتایی ساڵی 2025 کراوە.

 

حكومەتی ئێران كوژرانی زیاتر لە 100 ئەندامی هێزە ئەمنییەكانی لە ناڕەزایەتییەكاندا راگەیاند،  رێكخراوێكیش ئاشكرای دەكات زیاتر لە دوو هەزار و 500 خۆپیشاندەر كوژراون  كە ژمارەیەكیان كورد بون، سەرۆكی ئەمریكاش هۆشداریی دەداتە لێپرسراونی تاران.

رێكخراوی مافی مرۆڤی هەرانا بڵاویكردوەتەوە لە ماوەی 17 رۆژی ناڕەزایەتییەكانی ئێران دوو هەزار و 571 خۆپیشاندەر كوژراون كە 12 كەسیان تەمەنیان لە 18 ساڵ كەمتر بوە.

رێكخراوەكانی مافی مرۆڤی رۆژهەڵاتی كوردستان ئاشكرایان كردوە زیاتر لە 20 هاوڵاتیی كورد لە شارەكانی تاران و كرماشان و ئیلام كوژراون.

میدیای ئێرانیش بڵاویكردوەتەوە زیاتر لە 100 ئەندامی هێزە ئەمنییەكان لە ناڕەزایەتییەكاندا كوژراون و سەرجەمیان ئەمڕۆ لە مەراسیمێكدا لە تارانی پایتەخت بەرەوگۆڕستان بەڕێدەكرێن.

لای خۆشییەوە سەعید ئیرەوانی، نوێنەری هەمیشەیی ئێران لە نەتەوەیەكگرتوەكان رایگەیاندوە، ئەمریكا لە رێگەی دروستكردنی گرژی و ئاژاوە لە ناوخۆی ئێران دەیەوێت بیانو بێنێتەوە بۆ هێرشكردنە سەر وڵاتەكە.

د. لەتیف رەشید سەرۆک کۆماری عیراق، ئەمڕۆ چوارشەممە 14ـی 1ـی 2026 لە کۆشکی سەلامی بەغداد، پێشوازی لە عومەر مەشعان دەبوس پارێزگاری نوێی ئەنبار کرد.

لەسەرەتای دیدارەکەدا سەرۆک کۆمار مەرسومی کۆماری تایبەت بە دەستبەکاربوونی پێشکەش بە پارێزگاری نوێی ئەنبار کرد و هیوای سەرکەوتنی بۆ خواست لەجێبەجێکردنی بەرپرسیارێتییەکانی و جەختی لە گرنگی خستنەگەڕی هەموو هەوڵەکان کردەوە بۆ باشترکردنی خزمەتگوزاری و گەشەپێدان لە پارێزگاکە بەشێوەیەک کە لەگەڵ خواستەکانی هاووڵاتیاندا بگونجێت.

سەرۆک کۆمار داواشیکرد، ئاوەدانکردنەوە و ئاسایش و خزمەتگوزارییەکان بکرێتە پێشینەی کارەکان و پشتگیری سەرۆکایەتی کۆماری بۆ هەموو هەوڵەکان دووپاتکردەوە کەئامانجیان بەدەستهێنانی گەشەپێدانی بەردەوام و باشترکردنی ئاستی بژێوییە لەپارێزگاکە.

لەلای خۆیەوە پارێزگاری ئەنبار سوپاس و پێزانینی خۆی بۆ متمانەی سەرۆک کۆمار دەربڕی و پابەندبوونی خۆی دووپاتکردەوە بۆ خستنەگەڕی هەوڵەکان بۆ خزمەتکردنی دانیشتوانی پارێزگاکە و کارکردن بۆ جێبەجێکردنی پلانەکانی گەشەپێدان و هەماهەنگی لەگەڵ لایەنە پەیوەندیدارەکان بۆ بەشداریکردن لەسەقامگیری پارێزگاکە و باشترکردنی خزمەتگوزارییەکانی.

کارەبای سلێمانی بڵاویکردوەتەوە، بەهۆی ئەو شەپۆلە بەفر و بارانەی  هەفتەی رابردوو هەرێمی كوردستانی گرتەوە، لە هەندێك ناوچەی سنوری پارێزگای سلێمانی زیانی زۆری بە تۆڕی كارەبا گەیاندوە و تیمەکانیان لە هەوڵی چارەسەرکردنی کێشەکاندان.

کارەبای سلێمانی ئاماژەی بەوەشکردوە، لە هەندێک ناوچە ستوونی كارەبا شكاون و ژمارەیەکیشیان  بەهۆی لافاوی باران زیانیان پێ گەیشتووە و خواربوون و پێویستی بە چاكسازیی كردن هەیە.

بە گوێرەی بەدواداچونەکانیان تەنها  لە سنوری بەڕێوەبەرایەتی دابەشكردنی كارەبای سلێمانی/رۆژهەڵات و لە ناوچەی شارباژێر ( 60 )ستوونی كارەبا زیانیان بەركەوتووه‌ و هەندێكیان شكاون و هەندێكیان خواربوون یان بنكۆڵ بوون و پێویستییان بەچاكسازیكردن هەیە.

کارەبای سلێمانی دەشڵێت؛ سەرەڕای سەختی ناوچەكە و بەفری زۆر، بەڵام تیمەكانیان لە هەوڵی بەردەوامدان بۆ  چارەسەركردنی كێشەكان و گێڕانەوەی كارەبا بۆ ئەو شوێنانەی بێکارەبا بوون.