هەواڵەکان
بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم دەستگیرکردنی بازرگانێکی ماددەی هۆشبەری بە پێنج کیلۆگرام کریستاڵەوە راگەیاند، ئاماژەیان بەوەشکردوە، مەبەستی ساغکردنەوە ماددەکانی هێناوەیتە هەرێم.
ئەمڕۆ یەکشەممە، بەڕێوەبەرایەتی گشتی نەهێشتنی ماددە هۆشبەرەکان راگەیەندراوێکی بڵاوکردوەتەوە تێیدا هاتوە؛ بەهەماهەنگی بەڕێوەبەرایەتی ئاسایشی ڕاپەڕین توانیویانە لە سنوری ئیدارەی راپەڕین بازرگانێکی ماددەی هۆشبەریان دەستگیر بکەن.
دەشڵێن؛ لەئەنجامی کۆکردنەوەی زانیاری پێشوەخت و چاودێری ورد و بەدواداچوونی بەڕێوەبەرایەتی گشتی نەهێشتنی ماددە هۆشبەرەکان، کارەکەیان کردوە، بە بڕیاری دادوەر.
ئاماژەیان بەوەشکردوە لەگەڵ دەستگرکردنی بازرگانەکە توانیویانە دەستبەسەر پێنج کیلۆگرام ماددەی هۆشبەر لەجۆری کریستاڵ (ئەمفیتامین)بگرن، ویستی بووە ماددەکان لە هەرێمی کوردستاندا ساغ بکاتەوە.
لە بەەشێکی دیکەی راگەیەندراوەکەدا هاتووە؛ تۆمەتبار بەبڕیاری دادوەر بەماددەی 25 لەیاسای بەرەنگاربونەوەی ماددە هۆشبەرەکان و کارتێکارە ئەقڵییەکان ڕاگیراوە و لێکۆڵینەوە لەدۆسیەکەی بەردەوامە.
تەندروستی چەمچەماڵ دەستبەسەرداگرتنی چوار تۆن خۆراک و شمەکی بەسەرچووی لە ناحیەی ڕزگاری راگەیاند و ئاماژەیان بەوەشکردوە لەلایەن لیژنەکانیانەوە لەناو براون.
ئەمڕۆ یەکشەممە، لە پەڕەی رەسمی خۆیان، تەندروستی چەمچەماڵ رایگەیاندوە؛ لەهەڵمەتێکی گەڕان و پشکنیندا لەلایەن لێژنە هاوبەشەکانیان لە ناحیەی شۆڕش دەستیان بەسەر چوار تۆن خۆراک و شمەکی بەسەرچودا گرتووە.
ئاماژەیان بەوەشکردوە؛ هەڵمەتەکە لەلایەن لێژنە هاوبەشەکانی ناحیەی شۆڕش و چاودێری تەندروستی مەڵبەندی تەندروستی سەرەکی شەهید سەید جەوهەروە ئەنجامدراوە و 34 شوێنیان لە ناحیەکە بەسەر کردوەتەوە.
جۆری شووێنەکانیشیان دیاریکردوە کە؛ لەفەفرۆش، مارکێت، کارگە، گۆشت فرۆش، سەرتاشخانە، مەیدانی ئاژەڵان و ئارێشتگاکانی گەڕەکەکانی ناحیە شۆڕ بوون.
تەندروستی چەمچەماڵ دەشڵێت؛ ئەو خۆراک و شمەکانەی دەستیان بەسەردا گیراوە لەلایەن لیژنەکانیانەوە لەناوبراون.
هێزەکانی سوریای دیموکرات رایگەیاند بە هاوبەشی لەگەڵ هێزەکانی ئاسایشی ناوخۆ هەڵمەتێکی ئەمنی هاوبەشیان لە دژی شانەکانی داعش و باندە تاوانکارەکان لە لادێکانی عەین عیسا ئەنجام داوە و توانیویانە 71 ئەندامی شانەکانی داعش و تاوانباران دەستگیر بکەن.
ئەمڕۆ یەکشەممە، هەسەدە ڕاگەیەندراوێکیان بڵاوکردوەتەوە و تێیدا هاتووە؛ لە میانی هەڵمەتێکی ئەمنی بەرفراوان و پلان بۆ داریژراوەدا لە سنوری عەین ئەسەد، هێزەکانیان توانیویانە گورزێکی گەورە لە شانە نوستوەکانی داعش بدەن
ئەماژەیان بەوەشکردوە لە ئۆپراسیۆنەکەدا 71 کەسیان دەستگیرکردوە، کە تاوانەکانیان جۆراوجۆرە؛ ژمارەیەک لەوانە ئەندامی داعشن هەروەها کەسانی بەشدار لە تۆڕەکانی تاوانی رێکخراو کە تێوەگلاون لە دزی و بازرگانیکردن بە ماددە هۆشبەرەکان و هۆکاربوون بۆ تێدانی ئاسایشی ناوخۆیی و هەڕەشەکردن لە سەلامەتی هاووڵاتییان.
هەسەدە راشیگەیاندوە؛ لە م ئۆپەراسیۆنەکەدا دەستیان بەسەر بڕێکی زۆر چەک و تەقەمەنی و کەرەستەی بەکارهێنراو بۆ ئەنجامدانی کردەوەی توندوتیژی و تیرۆردا گیرا، کە ویستویانە بەکاری بهێنن بۆ تێکدانی توانای ئەم شانانە بۆ زیانگەیاندن بە ئاسایش و ئاشتی مەدەنی.
جەختیش دەکەنەوە لەوەی بەردەوام دەبن لە بەدواداچوون بۆ پاشماوەکانی داعش و هەڵوەشاندنەوەی تۆڕەکانی تاوانی ڕێکخراو کە هۆکران بۆ تێكدانی سەقامگیری و بردنی ماڵای هاووڵاتییانی مەدەنی.
دۆناڵد ترەمپ، سەرۆکی ویلایەتە یەکگرتووەکانی ئەمریکا سوێند دەخوات ئەگەر حەماس رەتیبکاتەوە دەستبەرداری دەسەڵات و رادەستکردنی کۆنترۆڵی کەرتی غەززە ببێت؛"بەتەواوی لەناویان دەبات"، جەختیشیکردوەتەوە وەک ئەو پلانەی دایناوە ئامانجیەتی کۆتایی بە شەڕی غەززە بهێنێت
سەرۆکی ئەمەریکا قسەی بۆ سی ئێن ئێنی ئەمەریکی کردوە و رایگەیاندوە، بەم زوانە دەزانێت حەماس جدییە لە جیبەجێکردنی پلانەکەیدا یاخود نا
هەروەها هۆشداریشی دایە حەماس کە ئەگەر پابەندی رادەستکردنی چەکەکانیان نەبن و بڕیار مانەوە بدەن لە غەززەدا وەک دەسەڵاتدار، ئەوا بە تەواوەتی لەناویان دەبەن.
لە وەڵامی پرسیارێکدا کە ئایا سەرۆکوەزیرانی ئیسرائیل بە ئاگربەستەکە ڕازییە و پشتیوانی لە دیدگای فراوانتری ئەمریکا دەکات، ترەمپ وتویەتی؛ بەڵی ئەو رازیە بە پلانەکە و ئامادەیە ئۆپراسیۆنەکانیان لە غەززە رابگرێت.
پێشتریش بنیامین ناتانیاهۆ، سەرۆکوەزیرانی ئیسرائیل ڕایگەیاند بوو، رێگە بە دەسەڵاتی فەلەستین نادەن کە کەرتی غەززە کۆنتڕۆڵ بکات، میدیا ئیسرائیلییەکانیش لە زاری نەتانیاهۆ رایانگەیاندوە؛ هیچ نوێنەرێکی حەماس و دەسەڵاتی فەلەستین نابنە بەشێک لە ئیدارەی داهاتووی غەززە.
ئەمە لە کاتیكدایە بڕیار وایە سبەینی لە میسر، حەماس و ئیسرائیل بە نیوەندگیری ئەمەریکا و میسر کۆببنەوە بۆ گەیشتن بە رێکەوتن و کۆتایی هێنان بە شەڕی غەززە.
رۆژانی حەوت و هەشتی ئەم مانگە، دیداری میری لە هەولێر بەرێوە دەچێت و بڕیاریشە یەکێک لەو کەسانەی تێیدا قسەدەکات مەزڵوم کۆبانی بێت، یەکێک لە تەوەرەکانی دیدارەکەش باسکردنە لە ئایندەی سوریا و پێشهاتەکانی ئەم دوایەی وڵاتەکە.
بەگوێرەی ئەو پلانەی بڵاوکراوەتەوە لە ماڵپەڕی رەسمی دیداری میریدا، مەزڵوم کۆبانی، فەرماندەی هێزەکانی سوریای دیموکرات (هەسەدە) بۆ گفتوگۆکردن لەگەڵ سەرکردە سیاسییە کوردەکان سەبارەت بە نوێترین پێشهاتە ئەمنییەکانی سوریا و ناوچەکە دێتە هەولێر و لەگەڵ بەرپرسانی باڵای هەرێمدا کۆدەبێتەوە.
تا ئێستا بەڕونی دیار نییە فەرماندەکەی هەسەدە لەگەڵ کێ و کێدا کۆدەبێتەوە و پلانی کۆبوونەوەکانی ئاشکرانەکراوە، بەڵام لە دیداری میلیدا چەندین کەسایەتی بەناوبانگ و سیاسی قسەدەکەن و بە ئەگەری زۆرەوە ژمارەیەک چاوپێکەوتن و کۆبونەوە ئەنجام دەدات.
عەبدی پێشتر لە مانگی نیسانی ساڵی رابردوو سەردانی هەولێری کردبوو، لەوێ لەگەڵ سەرۆکی هەرێم و سەرکردە سیاسییە کوردەکان و هەروەها وەزیری دەرەوەی فەرەنسا کۆبووەوە، ئەمەش لە چوارچێوەی هەوڵەکان بۆ هەماهەنگی لەسەر ئایندەی کوردانی سوریا و پەیوەندییەکانی لەگەڵ دیمەشق.
ئەمساڵیش لە ناوەراستی مانگی یەکدا بە هەمانشێوە مەزڵوم کۆبانی لە سەردانێکی رانەگەیەندراودا و لە ڕێگەی فڕۆکەی تایبەتی ئەمریکییەوە لە ڕۆژئاوای کوردستانەوە گەشتبوە هەولێر و لەگەڵ مەسعود بارزانی کۆبوونەوەیەکیان ئەنجامدا.
بەشداریکردنی عەبدی لە دیدارکەدا، دەبیتە سێیەم سەردانی فەرماندەکەی رۆژئاوا بۆ هەرێمی کوردستان، دیداری مێری چالاکیی ساڵانەی سەرەکی پەیمانگاکەیە، کە داڕێژەرانی سیاسەتی ناوخۆیی، نیشتمانی و نێودەوڵەتی، ئەکادیمیستەکان، سەرکردەکانی بۆچوون، چالاکوانانی کۆمەڵگەی مەدەنی، ڕۆژنامەنووسان و دیپلۆماتکاران کۆدەکاتەوە. سەکۆیەک بۆ مشتومڕکردن لەسەر زەختترین پرسەکان کە کاریگەرییان لەسەر ناوچەکە هەیە و پێشکەشکردنی چارەسەری پراکتیکی بۆ بڕیاردەران دابین دەکات. ئامانجی کۆتایی کۆڕبەندەکە بریتییە لە پێشخستنی ئاشتی و سەقامگیری و خۆشگوزەرانی لە عێراق و ڕۆژهەڵاتی ناوەڕاستی فراوانتر لە ڕێگەی گفتوگۆی بنیاتنەر و بەشداریکردنی گشتگیر و وەبەرهێنانی هاوبەش لە داهاتوودا.
وەزیری دەرەوەی ئەمریکا ڕایگەیاند؛ کۆبوونەوەکان سەبارەت بە رێککەوتنی ئیسرائیل و حەماس بەردەوامن و هیوادارن زۆر بەخێرایی کارە لۆجستیەکان تەواو بکەن، جەختیکردەوە کە ئێستا ناتوانن باس لە کۆتایی هاتنی شەڕی غەززە بکەن، بەو پێیەی هەندێک کار ماوە.
ئەمڕۆ یەکشەممە، مارکۆ رۆبیۆی وەزیری دەرەوەی ئەمەریکا رایگەیاند، حەماس ڕەزامەندی نیشانداوە بۆ پلانی قۆناغی دوای شەڕ و جەختیکردەوە کە ئەو قۆناغەیان ئاسان نییە و تا ئێستاش کەس ناڵێت کێشەی ئازادکردنی بارمتەکان چارەسەر کراوە.
ناوبرا ئاماژەی بەوەشکرد ئێستا ناتوانن باس لە کۆتایی هاتنی شەڕی غەززە بکەن، چونکە پێویستە حەماس چەک دابنێت و ئەو کارەش وا بە سادەیی جێبەجێناکرێت و پێویستی بە کاتە.
لەبارەی پێکهێنانی حکومەتیشەوە لە غەززە، رۆبیوە وتویەتی؛ پێکهێنانی حکومەتێکی بێ حەماس لە غەززەدا بە خێرای ناکرێت و کاتی پێویستە و بەم زوانە دەزانن حەماس جدییە یاخود نا لە رازیبونی بە قۆناغی دووەمی پلانەکەی سەرۆکی ئەمەریکا.
ئەمرۆ یەکشەممە ٢٠٢٥/١٠/٥ دادوەر عومەر ئەحمەد محەمەد سەرۆکی دادگای تێهەڵچونەوەی ناوچەی سلێمانی، پێشوازی لە وەفدێکی دەستەی سەربەخۆی مافی مرۆڤ کرد کە پێکهاتبوون لە د. مونی یاقو سەرۆکی دەستەکە و وەفدی هاوڕێی.
لە کۆبونەوەکەدا باس لە رەوشی مافی مرۆڤ لە کوردستان بەگشتی کرا و جەختکرایەوە لە هەماهەنگی نێوان دەستەکە لەگەڵ دامەزراوە دادوەرییەکان.
لەو بارەیەوە سەرۆکی دادگای تێهەڵچونەوەی ناوچەی سلێمانی ئامادەیی دەربڕی بۆ هەموو کارئاسانیەک بۆ لیژنە یاساییەکانی دەستەی سەربەخۆی مافی مرۆڤ لە بینینی دۆسیەکان و سەردانکردنی هەر کەسێک کە ئەوان بیانەوێت.
لە کۆتاییدا وەفدی میوان خۆشحاڵی خۆیان بۆ سەردانەکە دەربڕی و سوپاسی سەرۆکی دادگایان کرد بۆ هەماهەنگی و هاوکاریەکانی لەگەڵ تیمەکانی دەستەکە.
بەڕێوەبەرایەتی جێبەجێکردنی دووەمی سلێمانی سەربە وەزارەتی دارایی و ئابوری ئاشکرایکرد، بەشێک لە پشکەکانی کۆمپانیای چاڤی گەشتیاری لە زیادکردنی ئاشكرادا فرۆشرا.
پەیامنێری کوردسات نیوز رایگەیاند، 60 موڵکی چاڤی لاند، بەبڕی 91 ملیار فرۆشرا و وەبەرهێنێک ئەو موڵکانەی کڕیوە.
وتیشی، فرۆشتنەکە بە نرخی ئەو قەرزانە بووە کە لەسەر کۆمپانیای چاڤی لاند بووە و نەیگەڕاندووەتەوە بۆ وەزارەتی دارایی.
پەیامنێری کوردسات نیوز ئاماژەی بەوەشکرد، پێشتر لەلایەن وەزارەتی داراییەوە چەند جارێک ئەو کۆمپانیایە ئاگادارکراوەتە، کە ئەو قەرزانەی لەسەری کەڵەکەبووە بیگەڕێنێتەوە، بەڵام کۆمپانیاکە ئامادە نەبووە قەرزەکانی بداتەوە.
بەپێی پێشبینییەکانی کەشناسی لە 48 سەعاتی داهاتوودا پلەکانی گەرما کەمێک زیاتر بەرز دەبنەوە.
بەڕێوەبەرایەتی گشتی کەشناسی هەرێم کەشی پێشبینیکراوی 48 سەعاتی داهاتووی بڵاوکردەوە و بەپێی پێشبینییەکان، ئەمڕۆ ئاسمان ساماڵ دەبێت و پلەکانی گەرما کەمێک بەرزتر دەبنەوە بە بەراورد بە تۆمارکراوەکانی دوێنێ.
ئاماژەی بەوەشکرد، سبەینێ دووشەممە، پلەکانی گەرما کەمێک نزم دەبێتەوە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر : 34 پلەی سیلیزی
سلێمانی : 34 پلەی سیلیزی
دهۆک : 33 پلەی سیلیزی
زاخۆ :34 پلەی سیلیزی
ئامێدی : 31 پلەی سیلیزی
ئاکرێ : 34 پلەی سیلیزی
کەرکوک : 36 پلەی سیلیزی
هەڵەبجە : 33 پلەی سیلیزی
سۆران : 34 پلەی سیلیزی
حاجی ئۆمەران : 24 پلەی سیلیزی
گەرمیان : 38 پلەی سیلیزی
لەسەر رێگای چەمچەماڵ – سلێمانی بەهۆی روداوێکی هاتوچۆ نۆ ئۆتۆمبێل پێکیاندادا.
ئاسان جەلال پەیامنێری کوردسات نیوز لەچەمچەماڵ رایگەیاند، روداوەکە لەسەر رێگای ناحیەی تەکیە رویداوە و بەهۆی روداوەکەوە دوو کەس برینداربوونە.
عەمید عومەر عەلی بەڕێوەبەری هاتوچۆی قەزای چەمچەماڵ بە کوردسات نیوزی راگەیاند، بەهۆی ئۆتۆمبێلێک کە سەرپێچی هاتوچۆی ئەنجامداوە رویداوە، بەهۆشیەوە پێکدادان لە نێوان سێ ئۆتۆمبێلی دیکە دروستبووە و دواتریش شەش ئۆتۆمبێلی دیکە بەهۆی ئەو روداوەوە پێکیان داوە.
وتیشی، بەهۆی روداوەکەوە ئۆتۆمبێلێک لەسەر پردێک کەوتووەتە خوارەوە و دوو کەسیش برینداربوونە.
عەمید عومەر عەلی ئەوەشی خستەڕوو، کۆی گشتی ئەو روداوی هاتوچۆیە لە نێوان نۆ ئۆتۆمبێل بووە، کە لەسەرەتادا لە نێوان سێ ئۆتۆمبێلیان رویداوە.
سبەینێ هاوکاری دارایی مانگی نۆی هاوپەیمانان بۆ پێشمەرگە دابەش دەکرێت، بۆ ئەم مانگەش زۆبەری ئەفسەر و پلەدار و پێشمەرگە بە سیستمی پڕۆژەی هەژماری من هاوکاری هاوپەیمانانن وەردەگرن
وەزارەتی پێشمەرگەی حکومەتی هەرێم لە راگەیەنراوێکدا بڵاویکردەوە، ئەمڕۆ هاوکاریی دارایی هاوپەیمانان بۆ مانگى نۆ تەمویلی وەزارەتی پێشمەرگە کرا، لەلایەن بەڕێوەبەرایەتى گشتى بودجە و بەرنامەکان 'ژمێریارى سەربازى' دەستدەکرێت بە ئەنجامدا رێکارە دارایی و ژمێریارییەکان بۆ تەواوکردنی ئامادەکارییەکان.
ئاماژەی بەوەشکردووە، بۆ ئەم مەبەستەش رۆژی دووشەمە رۆژی 6ـی ئۆکتۆبەر دەست بە دابەشکردنی دەکرێت.
وەزارەتی پێشمەرگە راشیگەیاندووە، لەم مانگەدا، نزیکەی ٪97ـی ئەفسەر و پلەدار و پێشمەرگە بە سیستمی پڕۆژەی هەژماری من هاوکاری هاوپەیمانان وەردەگرن، ئەوانەی تریش لە رێگەی سیستمی بانکیەوە هاوکارییەکان وەردەگرن.
بەرپرسێکی دەزگای هەواڵگری دەرەکی ئۆکراین رایگەیاند؛ چین زانیاری هەواڵگری بۆ روسیا دابین دەکات بۆ ئەوەی هێزەکانی روسیا باشتر بتوانن هێرشی مووشەکی لە ناوخۆی ئۆکراین ئەنجام بدەن.
ئەمڕۆ شەممە، ئۆلیە ئەلێکساندرۆڤ، بەرپرسی دەزگای هەواڵگری ئۆکراین لە چاوپێکەوتنی لەگەڵ ئاژانسی ئۆکراینفۆرمی وڵاتەکەی ڕایگەیاندوە ؛بەڵگەی زۆر هەیە کە روسیا و چین هەماهەنگ و هاوکاری یەکترن لەسەر خاکی ئۆکراین بۆ بەکارهێنانی مانگی دەستکرد بۆ سیخوڕیکردن و بە ئامانجگرتنی وەبەرهێنانی بینای لەلایەن مۆسکۆوە.
ناوبراو وتویەتی؛ ئامانج لەم هاوکارییە هەواڵگرییە دیاریکردن و باشتر تێگەیشتنە لە ئامانجە ستراتیژییەکان بۆئەوەی مۆسکۆ بیانکاتە ئامانج و ڕاگەیاندووە، بەڵگەی پێویستیان لەبەردەستدایە کە هاوکاری ئاست بەرزی نێوان روسیا و چین لە ئەنجامدانی سیخوڕی مانگی دەستکرد لە خاکی ئۆکراین پشت راست دەکاتەوە.
ئەو بەرپرسەی ئۆکراین، وردەکاری زیاتری سەبارەت بەو ئامانجانە نەخستوەتە روو کە لەلایەن مۆسکۆوە و بە هاوکاری مانگی دەستکردی وڵاتی چین کراونەتە ئامانج.
لای خۆیەوە وڵاتی چین بە رەسمی رایگەیاندوە بێلایەنە لە جەنگی نیوان روسیا و ئۆکرایندا، بەڵام بە شێوەیەکی ناڕاستەوخۆ پشتیوانی شەڕی مۆسکۆی کردوە لە ڕێگەی بەردەوامی بازرگانی و بە دابینکردنی کەلوپەلی دوو بەکارهێنان بۆ روسیا.
ئاژانسی هەواڵی دەوڵەتی ڕوسیا تاسیش بڵاویکردەوە، لە دوایین سەردانی ڤلادیمێر پوتین سەرۆکی ڕوسیا بۆ چین کە لەگەڵ شی جینپینگ سەرۆکی چین کۆبووەتەوە، هەردوو وڵات زیاتر لە 20 رێککەوتنی هاریکارییان لە بواری وزە و تەکنەلۆجیا و کەرتەکانی دیکەدا واژۆکردووە.
سەعدی ئەحمەد پیرە رایگەیاند، لەسەر بیر و رێبازی سەرۆك مام جەلال بەردەوام دەبن و لە بارەی هەڵبژاردنیشەوە دەڵێت؛ ئەوان لەگەڵ پارتیدا دوژمن نین، بەڵام لە ململانێدان و کێبڕکێی یەکتری دەکەن، هیواشی خواست لەم هەڵبژاردنەدا هەڵمەتێكی هێمنانە بەرێوەبچێت.
ئەمڕۆ شەممە، سەعدی ئەحمەد پیرە، ئەندامی مەکتەبی سیاسی یەکێتی لە میانی بەشداریکردنی لە بەرنامەی پانۆڕامای کوردسات نیوزدا راگەیاند، دەیانەوێت كێشەكان لەگەڵ بەغداد بە گفتوگۆ چارەسەر بكرێن، جەختیشیکردەوە؛ یەكێتی رۆڵی سەرەكی هەبووە لە بونیادنانەوەی عیراقی نوێ.
لەبارەی پەیوەندی نێوان یەکێتی و پارتی، ناوبراو ئاماژەی بەوەدا، ئەوان دوو حزبن، کێبڕکێی یەکتری دەکەن و دوژمنی یەکتری نین، دەشڵێت؛ تا ئێستا کار بە ئەنجامی هەڵبژاردنەکانی پێشووی پەرلەمانی هەرێم نەکراوە و لە هەوڵدان حکومەت پێکبهێنرێت.
ناوبراو ئاماژەی بەوەشکرد، هیچ حزبێک هێندەی دەنگ نەهێناوە تا بتوانێت بەتەنها حکومەت پێکبهێنێت و هیچ وەزارەتێکیش مۆڵکی هیچ حزبێک نییە.
لەبارەی پەیوەندییەکانی هەرێم و عیراقیشەوە دەڵێت؛ یەكێتی رۆڵی سەرەكی لە بونیادنانەوەی عیراقی نوێدا هەبووە و ئەوان بەهێزی عیراق بە مەترسی نازانن بۆ سەر قەوارەی هەرێم.
لەبەشێکی دیکەی قسەکانیدا ئاماژەی بەوەدا؛ پتەوكردنی پەیوەندی لەگەڵ عیراق لە بەرژەوەندی پێگەی هەرێمە و دەیانەوێت كێشەكان لەگەڵ بەغداد بە گفتوگۆ چارەسەر بكرێن .
دۆناڵد ترەمپ بەردەوامە لە لێدوانەکانی و رایگەیاند؛ ڕێککەوتنی غەززە لە جێبەجێکردندایە و سەرکەوتنێکی گەورەی بەدەست دەهێنێت، جەختیشیکردوەتەوە ئەمە تاکە ڕێککەوتن نییە کە لە ماوەی خولەکەیدا بەدەستی هێنابێت، بەڵکو پێش ئەو چەند ڕێککەوتنێکی دیکەی بەدەست هێناوە.
ئەمڕۆ شەممە، جارێکی دیکە لەسەر شەڕی غەززە ترەمپ قسەی بۆ کەناڵ 13ـی ئیسرائیل کردوە و ڕایگەیاندوە؛ نزیکن لە رێککەوتن و هەموو لایەنەکان پشتگیری پلانەکەی دەکەن و بەشێوەیەکی باش لەگەڵ جێبەجێکردنی رێککەوتنەکە بەرەو پێشەوە دەڕۆن.
ترەمپ جەختی کردوەتەوە کە ئەمە تاکە ڕێککەوتن نییە کە لە ماوەی خولەکەمدا بەدەستی هێنابێت، بەڵکو پێش ئەوەش چەند ڕێککەوتنێکی دیکەی بەدەست هێناوە و باسی لەوەشکردوە کە، لەکاتی ئاشکراکردنی پلانەکەیدا بە ناتانیاهۆی وتوە ئەمە چانسی بەدەستهێنانی سەرکەوتنتە و قبوڵی بکە.
سەرۆکی ئەمەریکا وتوشیەتی؛ لە ئێستادا ناتانیاهۆ زۆر دوور کەوتۆتەوە لە غەززە، ئیسرائیلیش پاڵپشتییەکی زۆری نێودەوڵەتی لەدەست داوە، ئەویش هەوڵدەدات ئەو پشتیوانیەی نیودەوڵەتییە بۆ ئیسرائیل بگەڕێنێتەوە.
تەندروستی غەززە رایگەیاند؛ بەهۆی هێرشەکانی ئیسرائیلەوە، لە 24 سەعاتی رابردودا، زیاتر لە 60 کوژراو و 265 بریندار تۆمارکراون، ئاماژەیان بەوەشکردوە ژمارەی کوژراوەکان 67 هەزار کەسی تێپەڕاند.
ئەمڕۆ شەممە، تەندروستی غەززە راپۆرتی ڕۆژانەی بڵاوکردوەتەوە و تێیدا هاتوە؛ تەنها لە 24 سەعاتی رابردودا، بەهۆی هێرشەکانی ئیسرائیلەوە 66 کەس کوژراو و 265 بریندار لە نەخۆشخانەکان تۆمارکراون.
لە راپۆرتەکەدا ئاماژە بەوەشکراوە؛ بەهۆی بۆمبارانکردن و هێرشەکانی ئیسرئیلەوە ژمارەی کوژراوەکان 67 هەزاری تێپەڕاندوە.
بە گوێرەی نوێترین ئاماری تەندروستی کەرتەکە، لە سەرەتای شەڕی غەززەوە کە لە 7ی تشرینی 2023 وە دەستی پێکردوە، ژمارەی کوژراوەکان گەشتوەتە 67 هەزار و 74 کوژراو، ژمارەی بریندارەکانیش 169 هەزار و 430 کەسن.
ئەمە لە کاتێكدایە دۆناڵد ترەمپ ئەمڕۆ رایگەیاند ئیسرائیل پابەندە و سوپاسیان دەکات و بۆئەوەی کە بە کاتی بۆمبارانکردنی غەززەیان راگرتووە، بە مەبەستی پێدانی دەرفەتێک بە ئازادکردنی بارمتەکان و رێککەوتنی ئاشتی.
دۆناڵد ترەمپ، رایگەیاند، ئیسرائیل پابەندە و سوپاسیان دەکات، کە بە کاتی بۆمبارانکردنی غەززەیان راگرتووە، جەختیشی کردەوە حەماس دەبێت خێرا بکەن و کات بەفیڕۆنەدەن، ئەگەر نا "هەموو شتێک هەڵدەوەشێتوە".
ئەمڕۆ شەممە، دۆناڵد ترەمپ، سەرۆکی ئەمریکا، لە پۆستێکدا لە تۆڕی کۆمەڵایەتیی (تروس) کە خۆی خاوەندارێتی دەکات نوسیوویەتی؛ سوپاسی ئیسرائیل دەکەم کە بە شێوەیەکی کاتی بە مەبەستی پێدانی دەرفەتێک بە ئازادکردنی بارمتەکان و رێککەوتنی ئاشتی بۆمبارانکردنی راگرتووە.
ترەمپ پەیامێکی ئاڕاستەی حەماس کردوە و هۆشداریشیداوەتە حەماس کە دەبێت بە خێرایی بجوڵێتەوە، ئەو دواکەوتن قبووڵ ناکات و بەرگەی ناگرێت.
سەرۆکی ئەمەریکا نوسیویەتی؛ با بە خێرایی ئەم کارە تەواو بکەین و دڵنیایی داوە کە هەمووان بە دادپەروەرانە مامەڵەیان لەگەڵ دەکرێت.
ئەم پەیامەی ترەمپ لە کاتێکدایە، پێگەی هەواڵی ئاکسیۆسیش رایگەیاندوە؛ نێردەی ترەمپ بۆ رۆژهەڵاتی ناوەڕاست گەشتوتە میسر بۆ کۆتایی هێنان بە وردەکارییە تەکنیکییەکانی ئازادکردنی بارمتەکان و رێککەوتنی ئاشتی لە غەززە.