هەواڵەکان
ترەمپ لە پۆستێکدا لە پلاتفۆرمی سۆشیال میدیایی خۆی بەناوی Truth Social هێرش دەکاتە سەر خۆپیشاندەرانی وڵاتەکەیی و بە "ئاژاوەگێڕە بەکرێگیراوەکان" ناویان دەهێنێت.
ئەم لێدوانەی ترەمپ لە دوای نائارامییەکانی ئەم دواییەی شارەکە دێت، پێشتریش سەرۆکی ئەمریکا داوای دەستگیرکردنی ئەو خۆپیشاندەرانەی دەکرد کە دەمامکیان بەستبوو.
خۆپیشاندانی کۆچبەران و جێبەجێکردنی گومرگی ئەمریکا (ICE) 7ـی مانگ لە ناوەندی شاری لۆس ئەنجلۆس گۆڕا بۆ پێکدادان لەگەڵ خۆپیشاندەران.
هەر لەو ڕۆژەدا، گاوین نیوزۆم، حاکمی کالیفۆرنیا هەڕەشەی ئەوەی کرد کە رەنگە ویلایەتەکە باجی فیدراڵی رابگرێت وەک تۆڵەسەندنەوەیەک بۆ کەمکردنەوەی بودجەی فیدراڵی لەلایەن ئیدارەی ترەمپەوە.
کالیفۆرنیا زیاتر سەر بە دیموکراتەکانە و چەندین جار لەلایەن ترەمپەوە رەخنەی لێ گیراوە. ئیدارەی ترەمپ پێشتر 126 ملیۆن و 400 هەزار دۆلاری لە پڕۆژەکانی رێگریکردن لە لافاو هەڵوەشاندەوە و رەخنەی لە وەڵامدانەوەی حکومەتی کالیفۆرنیا گرت بۆ ئاگرکەوتنەوە سروشتیەکان.
لە یەکەم وتارەکەیدا وەک سەرۆکی 47هەمین، لە رۆژی دەستبەکاربوونیدا، ترەمپ بەڵێنیدا دەستبەجێ رۆیشتنی کۆچبەرانی بێ بەڵگەنامە رابگرێت و دەست بە پرۆسەی دیپۆرتکردنەوەی ملیۆنانیان بکات. هەروەها بەهۆی دۆخی سنووری باشووری ئەمریکاوە باری نائاسایی نیشتمانی راگەیاند و ئەوەی ئێستا رودەدات دەرئەنجامی ئەو بڕیارانەی ترەمپە.
بەپێی ڕاپرسییەک لە فەیسبووک، کەناڵی کوردسات لەلایەن هاووڵاتییانەوە بە باشترین کەناڵی فەرهەنگی و کولتووریی دیاریکرا.
کەناڵی کوردسات لە راپرسییەک دا کە لەلایەن پەیجی "وێنە کۆنەکانی سلێمانی"ەوە، ئەنجام دراوە، بە رێژەی 96% لە دەنگەکان وەک باشترین کەناڵی کوردی لە بوارە فەرهەنگی، کلتوری و پەروەردەییەکاندا، لەلایەن هاووڵاتیانەوە هەڵبژێردراوە.
ئەم ئەنجامە، پشتگیریی هاووڵاتیان نیشان دەدات لە شێواز و سیاسەتی کەناڵی و بەرنامە جۆراوجۆرەکانی کەناڵەکە لە بوارە جیاوازەکانی کولتوور و فەرهەنگی کوردی.
لە کۆمێنتەکان دا، بینەرانی کوردسات، سوپاسی کوردسات دەکەن، بۆ هەوڵەکانی لە دەوڵەمەندکردنی کولتوری کوردی بە بەرهەمی باش و شێوازی کارکردنی جدی لە بوارە جیاوازەکاندا.
کوردسات کە لە یەکی کانوونی دووەمی ساڵی 2000 لە سلێمانییەوە دەستی بە کارکرد، بەردەوام بووە لە پێشکەشکردنی بەرنامە کلتوری، فەرهەنگی و پەروەردەییەکان بە زمانی کوردیی ناوەندی.
کوردسات، بە دروشمی "کوردسات ماڵی هەموانە" بەردەوام دەبێت و سوپاسی هەموو بینەران و لایەنگرانی دەکات بۆ سەرنج و رەخنەکانیان، هەروەها بەڵێندەدەدات کە بەردەوام بێت لە پەرەپێدانی زیاتری بەرنامەکانی و بەدوور بوون لە هەر جۆرە بەسیاسیکردنێک بۆ ئەوەی هەمیشە وەک چەپکە گوڵە سپیەکە و ماڵی هەمووان بمێنێتەوە.
بڕیارەكەی دۆناڵد ترەمپ سەرۆكی ئەمریكا بۆ رێگریكردن لە گەشتی هاووڵاتیانی 12 وڵات بۆ ئەمریكا، كەوتە بواری جێبەجێكردنەوە.
ئەو بڕیارەی ترەمپ كە لە هەفتەی رابردووەوە دەركراوە، لە بەیانی ئەمڕۆوە چووەتە بواری جێبەجێكردنەوە و ئێران، لیبیا و سۆماڵ و سودان و یەمەن و ئەفغانستان و میانمار و چاد و كۆماری كۆنگۆ و وڵاتانی گینیا و ئەریتریا و هایتی دەگرێتەوە.
هەر بەپێی ئەو بڕیارە، كۆتوبەند دەخرێتە سەر چوونە ناوەوەی هاووڵاتیانی حەوت وڵاتی تر بۆ ئەمریكا، كە ئەو وڵاتانەش بوروندی، كوبا، لاوس و سیرالیۆن و تۆگۆ و توركمانستان و ڤەنزوێلان.
بە وتەی ترەمپ ئەو وڵاتانەی روبەڕوی كۆتوبەندی توند بوونەتەوە، مەترسی تیرۆر تێیاندا زۆرە، مەبەست لە بڕیارەكەش بۆ پاراستنی ئاسایشی ئەمریكایە لە هەر هەڕەشەیەك كە لەسەر ئاسایشی نەتەوەیی دروست ببێت.
پێشتریش ئێران ئەو بڕیارەی ئەمریكای ئیدانە كرد و بە بڕیارێكی "رەگەزپەرستانە" وەسفیكرد.
فڕۆكەیەك بە 20 سەرنشینەوە لە ویلایەتی تێنسی ئەمریكا كەوتە خوارەوە، بەڵام هیچ كەسێك تیایدا گیانی لەدەستنەدا.
پۆلیسی ویلایەتەكە بڵاویكردەوە، فڕۆكەكە بۆ گەشتی كورت و تایبەت لە فڕۆكەخانەی تولاهۆما بە 20 گەشتیار و پەڕەشوتەوانەوە بەڕێکەوتووە و دوای چەند خولەكێك لە شاری كوفی كەوتەخوارەوە.
هەروەها پۆلیس دەڵێت، بەهۆی نزمی فڕینەكەیەوە دووچاری كێشەی تەكنیكی بووەو بزوێنەرەكانی لە کار كەوتووە.
چوار سەرنشینی فڕۆكەكە رەوانەی نەخۆشخانە كراون كە دووانیان برینەكانیان قورسە.
فڕۆكەكە لە دروستكراوی كەنەدایەو بۆ گەشتی كورت بەكاردەهێنرێت، 20 سەرنشین دەگرێت و نرخەكەی حەوت ملیۆن دۆلارە، یەكێكە لە باوترین فڕۆكە بچووكەكان كە زیاتر بۆ وەرزشی پەڕەشوتەوانی بەكاردەهێنرێت.
بەهۆی پێکدادانی پاسێکی خوێندکاران و ئۆتۆمبێلێکی تایبەت لە مالیزیا، 15 کەس گیانیان لەدەستدا و ژمارەیەکی دیکەش برینداربوون.
تیمەکانی فریاگوزاری مالیزیا رایانگەیاند کە پاسی زانکۆکە لە ناوچەی جێرتیح لە ویلایەتی تێرێنگانوەوە بەرەو کەمپی سەرەکی زانکۆکە گەراوەتەوە.
بەرگری شارستانی مالیزیا لە لێدوانێکدا بۆ میدیاکانی ئەو وڵاتە رایگەیاندووە، روداوەکە لە ناوچەی بانون رویداوە و تائێستا کۆی ژمارەی بریندارەکان گەیشتووەتە 48 کەس.
لە لێدوانەکەی بەرگری شارستانیتدا هاتووە، بەهۆی پێکدادانەکەوە پاسی خوێندکارەکان کەوتووەتە سەر لا و ئۆتۆمبێلە تایبەتەکەش زیانی زۆری بەرکەوتووە.
لە ڕاگەیەندراوەکەدا هاتووە: "بەهۆی روداوەکەوە 15کەس گیانیان لەدەست داوە و ژمارەی بریندارەکانیش بۆ 48کەس بەرزبووەتەوە کە بەشێکی زۆریان خوێندکارن.
ئێران هەڕەشەی بڵاوكردنەوەی هەزاران بەڵگەی نهێنیی هەواڵگریی و ستراتیژیی و بەرنامەی ئەتۆمیی ئیسرائیل دەكات، وەزیری هەواڵگریی ئێران دەڵێت پێویستە تەلئەبیب تێبگات كە چی لەدەستداوە.
ئێران و ئیسرائیل ئەزمونی زیاتر لە 30 ساڵ هاوكاریی هەواڵگریی هاوبەشیان هەیە و زیاتر لە 40 ساڵیشە لە ململانێیەكی توندی هەواڵگریدان و دەستڕاگەیشتنی ئێران بەو بەڵگەنامە ستراتیژییانە بە گەورەترین تۆڵەی هەواڵگریی لە دوای ساڵی 2018 لە قەڵەم دەدرێت كە ئەو كات ئیسرائیل نزیكەی 100 هەزار بەڵگەی نهێنی ئێرانی لەو وڵاتە بردە دەرەوە.
دوای ئەوەی میدیای رەسمی ئێران بڵاویكردەوە كە وڵاتەكەی هەزاران بەڵگەی ستراتیژی و نهێنیی ئیسرائیلی دەستكەوتوە، ئیسماعیل خەتیب، وەزیری هەواڵگریی ئێران رایگەیاند: كۆپییەكی زۆربەی ئەو بەڵگانە بۆ رای گشتی بڵاودەكەنەوە بۆ ئەوەی تەلئەبیب تێبگات كە چی لەدەستداوە.
بە وتەی خەتیب زۆربەی ئەو بەڵگەنامانە، پەیوەندیی بە بەرنامەی ئەتۆمیی و ئاسایشی نیشتمانیی ئیسرائیلەوە هەیە كە بە كاری هەواڵگریی ورد لە ناو خاكی ئیسرائیلەوە بەرەو ئێران گواستراونەتەوە.
میدیای نزیك لە دەزگای هەواڵگریی ئێران راشیگەیاندوە، جگە لە بەلگە نهێنییەكانی ئیسرائیل، زیاتر لە 400 هەزار دۆسیەی وەزارەتی دادی ئەو وڵاتە و زانیاریی نهێنیی شەش ملیۆن بەكارهێنەری فەیسبوك و 40 هەزار سەعات تۆماری ڤیدیۆیی نهێنیی ئیسرائیل دەستی بەسەردا گیراوە كە بەهۆیەوە ناسنامەی23 سیخوڕی سەرەكیی ئیسرائل لە ئێران و لوبنان و عیراق و توركیا و زیاتر لە نۆ وڵاتی رۆژهەڵاتی ناوەڕاست ئاشكرا بووە.
وتەكانی خەتیب لە كاتێكدا دەزگای هەواڵگریی ئیسرائیل مۆساد لە ساڵی 2018 زیاتر لە 100 هەزار بەڵگەنامەی ئێرانی لە كۆگایەكی نهێنی لە 26 كیۆمەتریی شاری تارانی پایتەخت بۆ وڵاتەكەی گواستەوە و ساڵی رابردو وردەكارییەكانی بردنی ئەو بەڵگەنامە ئەتۆمییانەی ئێرانی بڵاوكردەوە.
مۆساد لەو سەردەمەدا ئاماژەی بەوە كردوە كە سەرجەم بەڵگەنامە و زانیارییە زانستیی و سەربازییەكانی بەرنامە ئەتۆمییەكەی ساڵی 1999 تا 2003ی ئێرانی لە 32 قاسەدا لە نزیك تاران بردوە كە لە ساڵی 2018 بۆ ئیسرائیلی گواستوەتەوە.
ململانێی ئێران و ئیسرائیل لە روی هەواڵگرییەوە مێژویەكی دورودرێژی هەیە و ئامانجی تاران لە بڵاوكردنەوەی بەڵگەكانی ئیسرائیل تۆڵەكردنەوەی ئەو گورزە هەواڵگریانەیە كە لە لایەن تەلئەبیب بە تایبەت مۆسادەوە بەری كەوتوە بە تایبەت كە دزەپێكردنی زۆربەی بەڵگە و زانیارییە نهێنییەكانی بەرنامە ئەتۆمییەكەی ئێران لە لە لایەن ئیسرائیلەوە بووە.
لە فەلوجە 130 كەس بەهۆی نانخواردنەوە لە خواردنگەیەكی خێرا ژەهراوی بوون و تەندروستی ئەنباریش دەڵێت، خواردنگەكە گۆشتێكی خراپبووی بەكارهێناوە و لەئێستاشدا داخراوە.
بەڕێوەبەرایەتی تەندروستی ئەنبار بڵاویكردەوە، بەهۆی نانخواردنەوە لە خواردنگەیەكی خێرا لە شاری فەلوجە، 130 كەس ژەهراویبوون و گەیەنراونەتە نەخۆشخانە، لەنێویشیاندا ژن و منداڵ هەن.
ئەوەشی خستەڕو، لە بەدواداچوون و لێكۆڵینەوەی لایەنە پەیوەندیدارەكاندا بۆ رووداوەكە دەركەوتووە، ئەو گۆشتەی لە خواردنگەكەدا بەكارهاتووە خراپ بووە و ئەوەش هۆكاری ژەهراوی بوونەكە بووە، لەئێستاشدا رێوشوێنی یاسایی بەرانبەر خواردنگەكە گیراوەتەبەر و داخراوە.
تەندروستی ئەنبار دەشڵێت، لەو 130 حاڵەتە ژەهراویبوونەی تۆماركراوە 100 حاڵەتیان چارەسەری پزیشكی پێویستیان بۆ كراوە و نەخۆشخانەیان بەجێهێشتووە، 30 حاڵەتەكی تریش لەژێرچاودێری پزیشكیدان، بەڵام پێشبیندەكرێت لە چەند سەعاتی داهاتوودا ژمارەی حاڵەتەكانی ژەهراویبوون بەهۆی ئەو نانخواردنەوە لەو خواردنەگەیە زیاتربێت.
گەشتیارێکی تەمەن 21 ساڵ لە رووباری سیروان لە گەرمیان خنکا.
روداوەکە پاشنیوەڕۆی ئەمڕۆ یەکشەممە، لە سنوری ناحییەی مەیدان ە گەرمیان رویداوە و گەشتیارێکی بە رەگەز عەرەب بەناوی "جابر نجم حمود" لەکاتی مەلەکردندا خنکاوە.
ئەو گەشتیارە لەدایکبووی ساڵی 2004ـە و دانیشتووی شارەبان بووە، بەمەبەستی گەشت و سەیران لەگەڵ چەند هاوڕێیەکیدا چوونەتە ناحیەی مەیدان و لەوێ بۆ مەلەکردن چووەتە ناو رووباری سیروانەوە.
پۆلیس گەرمیان رایگەیاندووە، ئەو سێ هاوڕێیەی کە لەگەڵیدا بوون لەکاتی روداوەکەدا دەستگیر کراون و تەرمی گەنجەکەش بەمەبەستی توێکاری بۆ پزیشکی داد نێردراوە.
ماوەی دوو رۆژە خۆپیشاندان لە ویلایەتی كالیفۆڕنیای ئەمریكا بەردەوامە دژی بەزۆر ناردنەوەی كۆچبەران.
دژی دەستگیركردنی 44 كۆچبەری نایاسایی لە شاری پارا ماونت لە ویلایەتی كالیفۆرنیا، خۆپیشاندان و ئاڵۆزییەكان بەردەوامی هەیە و دۆناڵد ترەمپ سەرۆكی ئەمریكاش بریاریداوە بە ناردنی 2000 هەزار پاسەوانی نیشتیمانی بۆ ئەو شارە.
تۆم هومان لێپرسراوەی ئاسایشی سنورەكانی ئەمریكا بە كەناڵی فۆكس نیوزی راگەیاندوە، لە هەوڵەكانیان بەردەوام دەبن لە ناردنەوەی كۆچبەران بۆ وڵاتەكانیان.
شاری پاراماونت لە ویلایەتی كالیفۆرنیا لە 80٪ی دانیشتوانەكەی بە رەچەڵەك لاتینین و لە ماوەی هەفتەیەكیشدا 118 كۆچبەر لەو ویلایەتە دەستگیر كراون.
ماوەی دوو رۆژە خۆپیشاندانەكان لە كالیفۆڕنیا دژی ناردنەوەی كۆچبەران بەردەوامە و بەهۆیەوە گرژی کەوتووەتە نێوان خۆپیشاندەران و پۆلیسەوە
— Kurdsat News (@KurdsatNews) June 8, 2025
زیاتر..https://t.co/n6nTqT4iI1 pic.twitter.com/9ZoCgfOPHe
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوە کردووە، ئاسمان نیمچەهەور دەبێت و لە ناوچە شاخاوییەکان تاوەباران دەبێت.
کەشناسیی هەرێم رایگەیاند، ئەمڕۆ یەکشەممە، ئاسمان ساماڵ و پەڵەهەور دەبێت و خێرایی با مامناوەند دەبێت، پلەکانی گەرماش 1 بۆ 2 پلەی سیلیزی بەرز دەبنەوە.
ئاماژەی بەوەشکردووە، سبەینێ دووشەممە، بە گشتی ئاسمان ساماڵ و پەڵەهەور دەبێت و لە هەندێک کات و شوێندا دەگۆڕێت بۆ نیمچەهەور، ئەگەرى تاوە بارانێکی کەم هەیە لە ناوچە شاخاوییە سنورییەکان.
دەشڵێت، سبەینێ خێرایی با زیاد دەکات و هەندێک جار دەگاتە سەروو 30 کیلۆمەتر لە سەعاتێکدا، پلەکانی گەرماش نزیک دەبنەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ:
هەولێر : 38 پلەی سیلیزی
سلێمانی : 36 پلەی سیلیزی
دهۆک : 37 پلەی سیلیزی
کەرکوک : 41 پلەی سیلیزی
زاخۆ : 38 پلەی سیلیزی
هەڵەبجە : 37 پلەی سیلیزی
سۆران : 36 پلەی سیلیزی
حاجی ئۆمەران : 21 پلەی سیلیزی
گەرمیان : 42 پلەی سیلیزی
كاندیدێكی هەڵبژاردنەكانی كۆڵۆمبیا دەستڕێژی گوللـەی لێكرا، پۆلیسیش دەڵێت، مێرمنداڵێكی 15 ساڵان تەقەی لێكردووە.
میگێل ئوریبێ كاندیدێكی دیاری راستڕەوەكانی كۆڵۆمبیا بۆ هەڵبژاردنی سەرۆكایەتی ئەو وڵاتە لە كاتی هەڵمەتی بانگەشەی هەڵبژادنەكان تەقەی لێكرا و دوو گوللـە بەر سەری كەوت.
پۆلیسی وڵاتەكە دەڵێت، ئەو كەسەی تەقەی كردووە مێرمنداڵێكی 15 ساڵان بووە و بە دەمانچە سێ گوللـەی بە كاندیدەكەی سەرۆكایەتیی كۆڵۆمبیاوە ناوە.
گوتاڤۆ پێدرۆ سەرۆكی كۆڵۆمبیا رایگەیاند، تاوانەكە تەنها دژی كەسێك نییە، بەڵكو دژی دیموكراسی و ئازادی رادەربڕین و یاسای وڵاتەكەیە و وتی، 700 هەزار دۆلار وەكو خەڵات دیاریكردووە بۆ ئەو كەسەی پاڵنەری پشت تاوانەكە ئاشكرا بكات.
لای خۆیەوە ماركۆ روبیۆ، وەزیری دەرەوەی ئەمریكا ئیدانەی هێرشەكەی كرد و بە تیرۆریستی و هەڕەشە بۆسەر دیموكراسی ناوبرد.
لە شاری میونشنی ئەڵمانیا ژنێکی 30 ساڵ بە چەقۆ هێرشیکردە سەر چەند هاووڵاتییەک و بەهۆیەوە دە کەس بریندار بوون.
بەپێی زانیاری ئاژانسەکان، هێزەکانی پۆلیسی شارەکە ناچاربوون بۆ کۆنتڕۆڵکردنی ژنەکە تەقەبکەن و لە ئەنجامدا ژنەکە بریندار بوو.
تائێستاش ئامانجی هێرشەکە دیارنیە و لێکۆڵینەوەکان بەردەوامن لە هۆکاری پشت روداوەکە.
د.لەتیف رەشید سەرۆک کۆمار و شاناز ئیبراهیم ئەحمەد، خانمی یەکەمی عیراق سبەینێ یەکشەممە هەشتـی حوزەیرانی 2025 بە سەردانێکی رەسمی بەرەو فەڕەنسا بەڕێدەکەون.
مەبەستی سەفەرەکە بەشداریکردنە لە سێهەمین کۆنفرانسی نەتەوە یەکگرتووەکان بۆ ئۆقیانووسەکان کە لە شاری نیسی فەڕەنسا لە رێکەوتی 9 تا 13ی شەش بەڕێوەدەچێت.
وابڕیارە لەم سەفەرەدا، فوئاد حوسێن وەزیری دەرەوە لەگەڵ ژمارەیەک بەرپرسی دیکە یاوەری سەرۆک کۆمار دەکەن.
مەسعود پزیشکیان سەرۆک کۆماری ئێران، بە جەختکردنەوە لەسەر ئەوەی کە چالاکییە ئەتۆمییەکانی ئێران بە تەواوی رونە و ئاژانسی نێودەوڵەتی وزەی ئەتۆمیش چەندین جار ئەمەی پشتڕاستکردووەتەوە، وتی: ئێمە ئامادەیی بۆ پشکنینەکان ، بەڵام هەرچەشنە بێبەشکردنی گەلەکەمان لە تەکنەلۆجیا بە قبوڵنەکراو دەزانین.
مەسعود پزیشکیان لە دیداریدا لەگەڵ موراد نورلیۆ جێگری سەرۆک وەزیرانی کازاخستان رایگەیاند، "ئێمە لەبەردەم خودادا کڕنوشمان بردووە، بۆ ئەوەی لەبەردەم هیچ کەسێکی تردا جگە لە خودا کڕنۆش نەبەین، هەروەها قبوڵ ناکەین کە ئەوانی دیکە بڕیار لەبارەی داهاتوو و چارەنووسی میللەتەکەمانەوە بدەن".
ئەم لێدوانانەی سەرۆک کۆماری ئێران هاوکاتە لەگەڵ لێدوانی وەزیری دەرەوەی ئەو وڵاتە سەبارەت بە خولی شەشەمی دانوستانەکانی نێوان ئێران ئەمریکا کە دەڵێت؛ بەمزوانە عومان شوێن و کاتی خولی شەشەمی دانوستانەکان دیاریدەکات.
رادیۆی سوپای ئیسرائیل ئەمڕۆ رایگەیاند کە هێزەکانیان تەرمێکیان دۆزیوەتەوە کە گومان دەکەن هی محەممەد سینوار، فەرماندەی باڵای بزووتنەوەی حەماس بێت.
بە پێی راپۆرتی رادیۆی سوپای ئیسرائیل، تەرمەکە لە ژێرزەمینی نەخۆشخانەی ئەوروپی لە خان یونس دۆزراوەتەوە، دوای ئەوەی ئەو دامەزراوە تەندروستییە خاپوور کرا.
وردەکاری ئۆپەراسیۆنەکە:
سەرچاوەی سەربازی ئیسرائیلی دەڵێت کە تەرمی گوماناوی سینوار لەنێوان ١٠ تەرمی دیکە دۆزراوەتەوە کە هەموویان چەکداربوون و لەژێر زەمینی نەخۆشخانەکە شاردرابوونەوە.
بە گوێرەی رادیۆی سوپای ئیسرائیل، ئەم چەکدارانە لە ئۆپەراسیۆنێکی سەربازی نوێ دا کوژراون کە لە نەخۆشخانەی ئەوروپی ئەنجام دراوە.
رۆژی چوارشەممەی رابردوو، بنیامین نەتانیاهۆ سەرۆک وەزیرانی ئیسرائیل راگەیاندبوو کە سوپای ئیسرائیل سەرکردەی بزووتنەوەی حەماس، محەممەد سینواری کوشتووە.
ڤلادیمیر پوتن سەرۆکی روسیا یاسایەک دادەرێژێت کە سزای دارایی تا 500 هەزار روبڵ (نزیکەی 6365 دۆلار) لەسەر فرۆشتنی خواردنەوەی وزەبەخش بۆ منداڵان دادەنێت.
ئەم یاسایە بڕگەیەکی نوێ زیاد دەکات بۆ یاسای کارگێڕی کە سزای دارایی دیاری دەکات بۆ پێشێلکردنی ڕێسا و ڕێکارەکانی فرۆشتنی خواردنەوە وزەبەخشیەکان لە روسیا.
سزاکان بریتین لە:
بۆ تاکەکان: سزای دارایی لە 30 هەزار (382 دۆلار) تا 50 هەزار روبڵ (636 دۆلار)
بۆ بەرپرسان: لە 100 هەزار (1273 دۆلار) تا 200هەزار ڕووبڵ (2546 دۆلار)
بۆ دامەزراوە یاساییەکان: لە 300 هەزار (3819 دۆلار) تا 500 هەزار روبڵ (6365 دۆلار)
پێشتر، سەرۆکی ئەنجومەنی دووما ڤیاچێسلاڤ ڤۆلۆدین ئاماژەی بەوە کردبوو کە ئەم بڕیارە درێژەدانێکە بۆ کاری یاسادانانی سیستەمی بۆ پاراستنی تەندروستی نەوە گەنجەکان.