هەواڵەکان
لە ساڵیادی کۆچی دوایی دکتۆر نەجمەدین کەریم، ئەندامی پێشووی مەکتەبی سیاسیی یەکێتیی نیشتمانیی کوردستان و پارێزگاری پێشووی کەرکوک، قوباد تاڵەبانی پەیامێکی بڵاوکردەوە و یادی خزمەتەکانی بەرز راگرت.
قوباد تاڵەبانی لە پەیامێکدا کە لە لاپەڕەی رەسمی خۆی لە تۆڕی کۆمەڵایەتیی فەیسبووک بڵاویکردووەتەوە، نووسیویەتی: "بە رێزەوە یادی هەموو ئەو خزمەتانەی دەکەینەوە کە پێشکەشی گەلەکەی کردووە."
لە بەشێکی دیکەی پەیامەکەیدا، تاڵەبانی بە تایبەتی ئاماژەی بە رۆڵ و کاریگەریی دکتۆر نەجمەدین کەریم کردووە لەسەر ئاستی نێودەوڵەتی و رایگەیاندووە: "رەوەندی کوردی لە ئەمریکا هەرگیز ماندووبوون و هەوڵە بەردەوامەکانی لە گەیاندنی دەنگی کورد بە ناوەندەکانی بڕیار لەبیر ناکات."
ئەمڕۆ، شاناز ئیبراهیم ئەحمەد، خانمی یەکەمی عیراق، سەردانی ماڵی فاشنی عیراقی کرد لە ناوچەی زەیونەی شاری بەغداد و لەلایەن دکتۆر فازڵ محەمەد بەدرانی، بریکاری وەزارەتی رۆشنبیری و گەشتوگوزار و شوێنەوار بۆ کاروباری رۆشنبیری، و نەجوان فارس، بەڕێوەبەری گشتیی ماڵی فاشن، پێشوازیی لێکرا.
لە درێژەی سەردانەکەیدا، خانمی یەکەم بەشداریی لە چالاکییەکی رۆشنبیریدا کرد کە لەلایەن ماڵی فاشنی عیراقی و سەنتەری رۆشنبیریی عەرەبی-کوردییەوە لەژێر دروشمی "هەرچەندە دەزووەکان جیاوازبن، هێشتا چنینەکە یەک پارچە دەبێت" رێکخرابوو.
لای خۆیەوە، خانمی یەکەمی عیراق خۆشحاڵی و سەرسامیی خۆی بە سەردانیکردنی ئەم ماڵە دێرینە دەربڕی و بە "ماڵێکی جوان کە رەنگەکانی مێژووی عیراقی تێدا کۆکراوەتەوە" وەسفی کرد. هاوکات، دەستخۆشیی لە سەرجەم دیزاینەر، کارمەند و بەرپرسانی ئەو "گەنجینە جوانەی بەغداد" کرد و هیوای سەرکەوتن و پێشکەوتنی زیاتری بۆ خواستن.
سەرۆک کۆماری تورکیا، رەجەب تەیب ئەردۆغان، لە کۆشکی سەرۆکایەتی لە ئەنکەرە، پێشوازی لە وەفدێکی پارتی یەکسانی و دیموکراسیی گەلان (دەم پارتی) کرد.
بەپێی میدیاکانی تورکیا، کۆبوونەوەکە لەسەر پرسی "تورکیایەکی بێ تیرۆر" بەڕێوەدەچێت و ئەمە سێیەمین دیداری رەسمییە کە لەم ساڵدا لە نێوان سەرۆکایەتیی کۆمار و دەم پارتیدا ئەنجام دەدرێت.
زانیاری دەربارەی کۆبوونەوەکانی پێشو:
یەکەمین کۆبوونەوەی نێوان ئەردۆغان و وەفدی دەم پارتی لە 10ی نیسانی ئەمساڵ بەڕێوەچوو، کە وەک یەکەم دیداری فەرمی لە دوای 13 ساڵ پچڕان تۆمارکرا. ئەو کات وەفدەکە، کە بە "وەفدی ئیمرالی" ناسرابوو، پێکهاتبوو لە پەروین بوڵدان، پەرلەمانتاری وان، و سری سورەیا ئۆندەر، پەرلەمانتاری کۆچکردووی ئیستانبوڵ.
کۆبوونەوەی دووەم لە 7ی تەمموز ئەنجامدرا و وەفدەکە پێکهاتبوو لە پەروین بوڵدان و میتحەت سانجار، پەرلەمانتاری ڕحا. لەو کۆبوونەوەیەدا، هەریەک لە ئەفکان ئاڵا، جێگری سەرۆکی گشتیی ئاکپارتی، و ئیبراهیم کاڵن، سەرۆکی دەزگای هەواڵگریی تورکیا (میت) ئامادەبوون و دیدارەکە نزیکەی کاتژمێرێکی خایاند.
بەپێی زانیارییەکانی ماڵپەڕی "واینێت"ی عیبری، ئیسرائیل خۆی ئامادە دەکات بۆ وەرگرتنەوەی تەرمی دوو بارمتەی دیکە لە کەرتی غەززە، ئەمەش دوای ئەوەی بزوتنەوەی حەماس رۆژی سێشەممە لە راگەیەندراوێکدا بڵاویکردەوە کە شوێنی تەرمی هەریەک لە عومیرام کوپەر و سەحەر باروخیان دیاری کردووە.
سەرچاوە هەواڵییە عیبرییەکان ئاماژە بەوە دەکەن کە ئیسرائیل لە چەند کاتژمێری داهاتوودا پێشوازی لە تەرمی ئەو دوو بارمتەیە دەکات، کە لەلایەن بزوتنەوەی حەماسەوە دەستبەسەرکرابوون. ئەم هەنگاوە دوای زنجیرەیەک ئۆپەراسیۆنی گەڕان و پشکنین دێت کە لە رۆژانی رابردوودا ئەنجامدراون.
شەوی سێشەممەی رابردوو، ئیسرائیل توانیبووی تەرمی هەریەک لە ئاریێ (زەلمان) زەلمانۆڤیچ و تامر ئادار وەربگرێتەوە، کە ئەمەش لەڕێگەی هەماهەنگیی ئەمنی و رێککاری تایبەتەوە کرابوو. راگەیاندنەکەی حەماس لەبارەی دۆزینەوەی تەرمی کوپەر و باروخ، وایکردووە دەزگا ئیسرائیلییەکان هەوڵەکانیان چڕتر بکەنەوە بۆ ئەوەی لە زووترین کاتدا تەرمەکان وەربگرنەوە.
ئەم پێشهاتە مەیدانییە دوای زیاتر لە هەفتەیەک دێت لە دواین ئۆپەراسیۆنی حەماس، کە بووە هۆی دروستبوونی حاڵەتێکی ئامادەباشی لەناو دەزگا ئەمنی و پزیشکییەکانی ئیسرائیلدا. دامەزراوە ئیسرائیلییەکان لە ئامادەباشیدان بۆ وەرگرتنەوەی سەرجەم بارمتەکانی دیکە، چ بە زیندوویی بێت یان وەک تەرم، ئەمەش لە چوارچێوەی ڕێککەوتن و هەماهەنگیی بەردەوامە لەگەڵ نێوەندگیر و هاوبەشە مەیدانییەکاندا.
بافڵ جەلال تاڵەبانی دەڵێت: ئێمە خزمەتکاری خەلکی خۆمانین و بەشدار لە حکومەتێک ناکەین خزمەتی هەموو هەرێمی کوردستان نەکات.
بافڵ جەلال تاڵەبانی سەرۆکی یەکێتیی نیشتمانیی کوردستان لە کەرنەڤاڵی جەماوەری لیستی ٢٢٢ـی یەکێتی لە دەروازەی راپەڕین وتارێکی پێشکەشکرد و رایگەیاند، ئاگری دیكتاتۆر رووخاندن لە دەروازەی راپەڕین داگیرسێندرا و دەروازەی كوردایەتی دەڤەری راپەڕینە.
وتیشی، گوێ لە داواكاری خەڵكی كوردستان دەگرین و جێبەجێی دەكەین و نابینە بەشێك لە حكومەتێكی لاواز لە هەرێم، هەروەها نابینە بەشێك لە حكومەتێك قوتی خەڵك ببڕێت بۆ پێكهێنانی گروپی چەكدار.
بافڵ جەلال تاڵەبانی ئەوەشی خستەڕوو، سەرۆك مام جەلال ئاشتی لەنێوان كورد و تورك دروستكرد، دەشڵێت، خاكی كوردستان رادەست داگیركەر ناكەین.
راشیگەیاند، راپەڕینی تر دروستبكەن و بەدەنگ و هێزی ئێوەوە دەچینە بەغداد و شەڕی مافە دەستورییەكان دەكەین بە رێگەی دیپلۆماسی نەك بە دروشم، چونکە موچە و كێشە ستراتیژییەكان لە بەغداد چارەسەر دەكرێن نەك لە هەولێر.
سەرۆکی یەکێتی ئاشکرایکرد، لە بەغداد گوێ لە یەكێتی دەگیرێت، بۆیە بەغداد چۆڵناكەین و لەوێوە زۆرترین خزمەتی كوردستان دەكەین وهیچ كاتێك پشت لە خەڵك ناكەین
لەکۆتایی وتارەکەیدا سەرۆك بافڵ وتی، سندوقەكانی دەنگدان سەوز بكەن و هێزی زیاترمان پێببەخشن، هەروەها لیستی 222ی یەكێتی لیستی هەموو چین و توێژەكانی كوردستانە.
د.لەتیف ڕەشید، سەرۆک کۆماری عیراق ئەمڕۆ پێشوازیکرد لە جۆرجیوس جێراپتریتس وەزیری دەرەوەی یۆنان و وەفدی یاوەری .
لەمیانەی دیدارەکەدا تاوتوێی بارودۆخی گشتیی ناوچەکە و جیهان کرا و هەردو لا جەختیان لە گرنگی هەماهەنگی لەبارەی ئەو پرسانە کردەوە کە هاوکارن لە بەهێزکردنی بناغەکانی ئاسایش و سەقامگیری نێودەوڵەتی.
سەرۆک کۆمار، دووپاتیکردەوە کەهەردوو وڵات خاوەنی توانایەکی ئومێدبەخشن بۆ کردنەوەی ئاسۆی هاوکاری لەچەندین بواردا، کەبەهاکانی هاوڕێیەتی هاوبەش بەهێزتر دەکەن، هەروەها ئاماژەی بەوەشکرد، عێراق هەوڵدەدات مەودای هاوکاری ئابووری و وەبەرهێنان فراوان بکات و هاوبەشی کاریگەر لەگەڵ هەموو لایەنەکان دروست بکات بە شێوەیەک کە خزمەت بە بەرژەوەندی هاوبەش بکات و بەشداربێت لە پێشخستنی گەشەپێدان و پێشکەوتنی هاوبەش.
لەلای خۆیەوە وەزیری دەرەوەی یۆنان، خواستی وڵاتەکەی بۆ بەرزکردنەوەی ئاستی پەیوەندییە دووقۆڵییەکان و پەرەپێدانی کەناڵەکانی گفتوگۆ و هەماهەنگی بەشێوەیەک دەربڕی کەخزمەتی بەرژەوەندییەکانی هەردوو وڵات و گەلی دۆست بکەن.
11یەمین فێستیڤاڵی هەنار و پایزی هەڵەبجە دەستیپێکرد و پارێزگاری شارەکەش دەڵێت: هەوڵ دەدەین فێستیڤاڵەکە بە نێودەوڵەتیی بکەین.
نوخشە ناسح پارێزگاری هەڵەبجە لە میانی دەستپێکی فێستیڤاڵی هەنار و پایزی هەڵەبجە رایگەیاند، ساڵانە چەندین بەرهەمی جۆراوجۆر بە هێز و توانای جوتیاران بەرهەمدەهێندرێت و لەو چوارچێوەیەشدا جوتیاران گرنگیان بە کێڵگە کشتوکاڵییەکان داوە و چەندین هەلی کاریان بۆ گەنجانی سنورەکە رەخساندووە.
وتیشی، ئەرکی حکومەتی هەرێمی کوردستان و لایەنە پەیوەندیدارەکانە هاوکاری بازاڕی ساغکردنەوەی بەرهەمەکانیان بۆ فەراهەم بکرێت و پلانی ئابوری گەشتیاریان بۆ رێکبخرێت و ئاسانکارییان بۆ بکرێت.
نوخشە ناسح ئاماژەی بەوەشکرد، لەمساڵدا فێستیڤاڵی هەنار و پایزی هەڵەبجە هەنگاوێکی گەورە بەرەوپێشەوە دەنێت، ئەویش بە ئامانجی بەنێودەوڵەتییکردنی فێستیڤاڵەکە و راکێشانی سەرنجی گەشتیاران و کڕیارانی دەرەوە بۆ فێستیڤاڵەکە.
پارێزگاری هەڵەبجە ئەوەشی خستەڕوو، هەنار و بەروبوومی فرێش و بەتامی هەڵەبجە سنوری کوردستان و عیراقی تێپەڕاندووە و گەیشتووەتە وڵاتانی دەرەوە، لەو سۆنگەیەوە دەیانەوێت بچنە ناو پڕۆژەی 'ئێس دی جی ئێس'ـی نەتەوەیەکگرتووەکان، کەئەوەش دەبێتە یەکەم فێستیڤاڵی سەوز لەسەر ئاستی کوردستان و عیراق.
راشیگەیاند، پێویستە حکومەتی هەرێم و عیراق هاوکاری جوتیاران ببن بۆ ئەوەی زیاتر پەرە کشتوكاڵ و بەرهەمەکانیان بدەن، هەروەها بتوانن زیاتر بەرەوپێش بچن.
ئەمڕۆ 11هەمین فێستیڤاڵی هەنار و پایزی هەڵەبجە دەستیپێکرد و بۆ ماوەی سێ رۆژ بەردەوام دەبێت، چاوەڕوانیش دەکرێت ژمارەیەکی زۆر لە گەشتیاران سەردانی فێستیڤاڵەکە بکەن.
ئەمڕۆ 11هەمین فێستیڤاڵی هەنار و پایزی هەڵەبجە بەڕێوەدەچێت و بۆ ماوەی سێ رۆژ بەردەوام دەبێت.
سەڵاح جەمیل پەیامنێری کوردسات نیوز رایگەیاند، چاوەڕوان دەکرێت گەشتیارێکی زۆر سەردانی فێستیڤاڵەکە بکەن و بەرهەمە ناوخۆییەکان و هەناری هەڵەبجە ئاشنا ببن.
وتیشی، چەندین بەرهەمی ناوخۆیی و جوتیاران ئامادەکراوە و لە ماوەی سێ رۆژی فێستیڤاڵەکەدا پێشکەشی گەشتیاران و هاووڵاتیان دەکرێت.
پەیامنێری کوردسات نیوز، ئاماژەی بەوەشکرد، جگە لە ساغکردنەوە و بەبازاڕکردنی بەرهەمەکان، ئەمساڵ جیاواز لە ساڵانی پێشوو چەندین چالاکی جۆراوجۆر و هونەری و فەرهەنگی بەڕێوەدەچێت.
هاوکات نوخشە ناسح پارێزگاری هەڵەبجە لە تۆڕی کۆمەڵایەتی فەیسبوک چەند وێنەیەکی لە فێستیڤاڵەکە بڵاوکردوەتەوە و نوسیویەتی؛ چاوەڕوانی گەشتیاران و هاووڵاتیانین.
سەرۆکی ئەمریکا وەزارەتی جەنگی وڵاتەکەی راسپارد تاقیکردنەوە ئەتۆمییەکان دەستپێبکەنەوە و ئاماژەی بەوەکردووە، لە داهاتوودا شوێنی تاقیکردنەوە ئەتۆمییەکان دیاری دەکرێن.
دۆناڵد ترەمپ سەرۆکی ئەمریکا لە تۆڕی کۆمەڵایەتی تروس نوسیویەتی، کاتێکی گونجاوە تاقیکردنەوە ئەتۆمییەکان ئەنجام بدەن، بەو پێیەی وڵاتانی دیکەش ئەنجامی دەدەن.
ئاماژەی بەوەشکرد، ئەمریکا زیاتر لە هەر وڵاتێکی دیکە خاوەنی چەکی ئەتۆمییە، ستایشی هەوڵەکانی خۆی کرد بۆ ئەنجامدانی "نوێکردنەوە و نۆژەنکردنەوەیەکی تەواو بۆ چەکەکانی ئێستا."
ترەمپ راشیگەیاند، روسیا لە پلەی دووەمدایە و چینیش لە پلەی سێهەمدایە بە جیاوازییەکی زۆر، بەڵام لە ماوەی پێنج ساڵی داهاتوودا یەکسان دەبن.
بەپێی ئامارەکان، لە کۆی 12 هەزار 331 کڵاوەی ئەتۆمی لە جیهاندا ، 5500 کڵاوە لە روسیادان، لە کاتێکدا ئەمریکا پینج هەزار و 44 کڵاوەی ئەتۆمی هەیە.
جێگەی ئاماژەیە، دوێنێ ڤلادیمێر پوتن تاقیکردنەوەی ژێر دەریاییەکی خۆبزوێنی بە ناوی 'پۆسایدۆن' بەسەرکەوتووی راگەیاند، کە هەڵگری کڵاوەی ئەتۆمییە و بە هێزێکی وێرانکەر ناوی برد.
بۆ زانیاری زیاتر سەبارەت بە ژێر دەریا ئەتۆمییەکی روسیا کلیک لێرە بکە.....
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە ئیلبروس کوتراشیڤ، باڵیۆزی روسیا لە عیراق کرد.
لە دیدارێکدا رەوشی گشتیی هەرێمی کوردستان و عیراق تاوتوێکرا و جەخت لە بەردەوامی گفتوگۆی بونیادنەرانەی نێوان لایەنەکان کرایەوە بۆ رووبەڕووبوونەوەی ئاڵنگارییەکان و پاراستنی سەقامگیری لە ناوچەکەدا.
پەیوەست بە هەڵبژاردن دووپات لە ئەنجامدانی هەڵبژاردنێکی پاک و بێگەرد کرایەوە کە زامنی پاراستنی مافی هەمووان بکات و ببێتە مایەی بوژاندنەوەی زیاتری وڵات.
رەوشی سوریا و رۆژئاوای کوردستان بیروبۆچوونیان لەبارەوە ئاڵوگۆڕکرا و بافڵ جەلال تاڵەبانی جەختی لە پاراستنی مافی هەموو نەتەوە و پێکهاتەکان کردەوە بە تایبەتی کورد وەک نەتەوەیەکی سەرەکی و رایگەیاند، دەبێت رێز لە تایبەتمەندی رۆژئاوای کوردستان بگیرێت و لە چوارچێوەی دەستورێکی نوێدا مافی گەلەکەمان بپارێزرێت.
سبەینێ بەئامادەبوونی بافڵ جەلال تاڵەبانی، سەرۆکی یەکێتی کەرنەڤاڵی جەماوەری لیستی ٢٢٢ یەکێتیی نیشتمانیی کوردستان لە ئیدارەی راپەڕین بەڕێوەدەچێت.
کاروان گەزنەیی وتەبێژی یەکێتیی نیشتمانیی کوردستان رایگەیاند، بەئامادەبوونی بافڵ جەلال تاڵەبانی، سەرۆکی یەکێتیی نیشتمانیی کوردستان، کەرنەڤاڵی جەماوەری لیستی ٢٢٢ یەکێتیی نیشتمانیی کوردستان لە شاری رانیە بەڕێوەدەچێت، کە تیایدا بافڵ جەلال تاڵەبانی وتارێک پێشکەش دەکات.
ئاماژەی بەوەشکرد، کەرنەڤاڵەکە سەعات ٢ـی پاشنیوەڕۆ لە هۆڵی وەرزشی رانیە بەرێوەدەچێت.
بەئامادەبوونی ئاراس محەمەد ئاغا ئەندامی سەرکردایەتی و سەرۆکی هاوپەیمانیی یەکێتی خەڵکی نەینەوا و شێخ جەوهەر محی الدین ئاغا سەرۆك عەشیرەتی هەرکی و جەماوەرێکی زۆر لە هەموو چین وتوێژە جیاوازەکان کەرنەڤاڵی خزمانی هەرکی بۆ پشتیوانیکردن لە لیستی یەکێتی خەڵکی نەینەوا بەرێوەچوو.
لەکەرنەڤاڵەکەدا هەڤاڵ ، ئاراس محەمەد ئاغا سەرۆکی هاوپەیمانیی خەڵکی نەینەوا، ستایشی رۆلی شێخ جەوهەر ئاغا و خزمانی هەرکی کرد لە چارەسەرکردنی پرسەکان و خەبات و قوربانیدانیان و پالپشتیکردن و پشتیوانی شێخ جەوهەر ئاغا لە یەکێتی نیشتیمانی کوردستان لە نەینەوا بەرزنرخاند .
هاوکات شێخ جەوهەر ئاغا لە کەرنەڤاڵەکەدا پشتیوانی خۆی بۆ لیستی هاوپەیمانی یەکێتی خەڵکی نەینەوا دەربری و داوای لە ئامادەبووان کرد هەموویان دەنگ بە لیستی یەکێتی خەڵکی نەینەوا بدەن و پشتیوانی سەرۆك بافڵ سەرۆکی یەکێتی نیشتیمانی کوردستان بن .
هەڤاڵ ئاراس محەمەد ئاغا داوای لە ئامادەبووان کرد بە گروتینیکی زۆرەوە بەشداری لە هەلبژاردن بکەن و دەنگ بدەن بە لیستی هاوپەیمانیی یەکێتی خەڵکی نەینەوا و کاندیدانی بۆ ئەوەی لە ئەنجومەنی نوێنەران خزمەتی زیاتری ئیوە و نەینەوا بکەن .
ئەمڕۆ چوارشەممە 29ی تشرینی یەکەمی 2025، ژمارەیەک باڵیۆزی نوێی عیراق لە رێوڕەسمێکی رەسمیدا کە لە کۆشکی بەغداد بەڕێوەچوو، لە بەردەم د.لەتیف رەشیدی سەرۆک کۆمار و بە ئامادەبوونی د. فوئاد حسێن، وەزیری دەرەوە، بۆ دەستبەکاربوون سوێندی یاساییان خوارد.
لەمیانی رێوڕەسمەکەدا سەرۆک کۆمار هیوای سەرکەوتنی بۆ باڵیۆزە نوێیەکان خواست لەئەرکەکانی داهاتوویان بۆ خزمەتکردنی وڵات و گەلەکەیان و جەختیشی لەگرنگی ئەو رۆڵەی باڵیۆزەکان لە نوێنەرایەتیکردن و پتەوکردنی پێگەی نێودەوڵەتی عیراق کردەوە.
سەرۆک کۆمار داواشی کرد بە هەستێکی بەرزی بەرپرسیارێتی و پیشەییەوە کار بۆ خزمەتی بەرژەوەندییەکانی وڵات و پتەوکردنی پەیوەندییەکانی لەگەڵ گەلانی دراوسێ و دۆستدا بکەن.
هەروەها پابەندبوونی عیراقی بۆ بەردەوامبوون لەپەرەپێدانی پەیوەندییە دەرەکییەکانی بەشێوەیەک کە خزمەت بە بەرژەوەندییە باڵاکانی نیشتمانی بکات و بەشداربێت لەدامەزراندنی بناغەی ئاسایش و سەقامگیری لە ناوچەکە و جیهاندا کردەوە.
هاوکات ئاماژەی بەوەشکرد، سیاسەتی دەرەوەی عیراق لەسەر بنەماکانی رێزگرتنی یەکتر و هاوکاریی بنیاتنەر و کراوەیی بەڕووی ناوچەکە و جیهاندا، بەگوێرەی بەرژەوەندییە هاوبەشەکان دامەزراوە.
لەلای خۆیانەوە باڵیۆزەکان سوپاس و پێزانینی خۆیان بۆ رێنماییەکانی سەرۆک کۆمار دەربڕی و جەختیان لەهەوڵەکانیان کردەوە بۆ بەرزکردنەوەی ئاستی کاری دیپلۆماسی عیراق لەگۆڕەپانی نێودەوڵەتی و تەرخانکردنی رۆڵی چالاکانەی لە پرسە نێودەوڵەتییە جیاوازەکاندا.
لە عیراق زیاتر لە دوو هەزار و 500 قوتابخانە هێڵی ئینتەرنێتی بێ بەرامبەریان بۆ دابینکراوە و وەزارەتی گەیاندنی عیراق دەیەوێت ئەو هەڵمەتەی دەستی پێکردوە بۆ ئینتەرنێتی بێبەرامبەر تەواوی خوێندنگەکان بگرێتەوە.
ئەمڕۆ چوارشەممە، هەیام یاسری وەزیری پەیوەندییەکان، پشتڕاستی کردەوە کە وەزارەتەکەی خزمەتگوزاری ئینتەرنێتی بێبەرامبەری بۆ زیاتر لە دوو هەزار و 500 قوتابخانە لە بەغداد و پارێزگاکانی تر دابینکردووە. ئاماژەی بەوەشکردووە، هەوڵەکان بەردەوامن بۆ فراوانکردنی خزمەتگوزارییەکە بۆ ئەوەی هەموو قوتابخانەکان بگرێتەوە.
هەیام یاسری رایگەیاندوە؛ ئەمڕۆ سەردانی ژمارەیەک قوتابخانەیان لە کەرخ و روسەفە کرد کە ئینتەرنێتی بێبەرامبەریان بۆدابینکراوە و ئەوەشیخستوەتەڕوو، ئەو 2500 قوتابخانە کە خزمەتگوزاری ئینتەرنێتی بێبەرامبەرمان بۆ دابینکراوە لەڕێگەی کێبڵی خێرای فایبەر ئۆپتیکەوەیە.
وەزارەت بەردەوامە لە جێبەجێکردنی پڕۆژە نیشتمانییەکەی بۆ دامەزراندنی هەزار قوتابخانەی نمونەیی، کە لەلایەن نووسینگەی سەرۆکی حکومەتەوە سەرپەرشتی دەکرێت بە هەماهەنگی لەگەڵ وەزارەتەکەیان و وەزارەتی پەروەردە، هەیام یاسری ئەمەشی وتووە.
ناوبراو ئاماژەی بەوەشکردوە؛ وەزارەتەکەیان بەرپرسیارە لە دامەزراندنی ژێرخانی ئەو قوتابخانانە، کە بەتەواوی مۆدێل دەبێت، بە تەختەی زیرەک، فێربوونی ئەلیکترۆنی و تەکنەلۆجیای سەردەمیانە بنیادبنرێن و ئەوان بەشێکی سەرەکی دەبن لەو پڕۆژەیە.
وەزارەتی خوێندنی باڵای هەرێم، بڵاویکردوەتەوە، لە سەعات 12ـی نوەرۆی ئەمرۆوە زانکۆلاین بۆ دەرچوانی ناوچە کوردستانییەکانى دەرەوەى هەرێم (کەرکوک، خانەقین، شەنگال) کارا دەکرێت و دەتوانن خۆیان تۆمار بکەن.
ئەمڕۆ چوارشەممە، وەزارەتی خوێندنی باڵاو توێژینەوەی زانستی رایگەیاند؛ دەرچوانی دوانزەی ئامادەیی لە ناوچە کوردستانییەکانی دەرەوەی ئیدارەی هەرێمی کوردستان (کەرکوک - شەنگال - خانەقین) لە سەعات 12ی نیوەڕۆوە، دەتوانن لە هەمان سایتی زانکۆلاین (regayzanko.com) داواکارییەکانیان بۆ وەرگرتن لە زانکۆ حکومییەکانی هەرێمی کوردستان پێشکەش بکەن.
عەباس ئەکرەم وتەبێژی وەزارەتی خوێندنی باڵاو توێژینەوەی زانستی ئاماژەی بەوەکردوە؛ سەرجەم دەرچوانی خوێندنگە کوردییەکانی ناوچە کوردستانییەکانی دەرەوەی هەرێمی کوردستان ئەوانەی ناویان لە نوسینگەی کەرکوکی وەزارەتەکەیان تۆمارکردوە، لە سەعات 12ی ئەمرۆوە هاوشێوەی دەرچوانی هەرێمی کوردستان دەتوانن داواکاری لەڕێگەی زانکۆلاین بۆ وەرگرتنیان لە زانکۆ حکومییەکانی هەرێمی کوردستان پێشکەش بکەن.
بۆ هەر کێشەو گرفتێک سەبارەت بە پرۆسەکە دەرچوان دەتوانن سەردانی نوسینگەی کەرکوکی وەزارەتەکەیان بکەن و ئاسانکاری و رێنوێنیان پێشکەش دەکرێ، ئەمە قسەی وتەبێژەکەی وەزارەتی خوێندنی باڵای هەرێمە.
ناوبراو ئەوەشی خستوەتەڕوو؛ ساڵانە لەگەڵ دەرچوانی دوانزەی ئامادەیی هەرێمی کوردستان، دەرچوانی خوێندنگە کوردییەکانی ناوچە کوردستانییەکان دەرەوەی ئیدارەی هەرێمیش بەهەمان مەرج و پێوەرەکانی وەرگرتنی خوێندکارانی کوردستان لە زانکۆ و پەیمانگە حکومییەکانی هەرێمی کوردستان وەردەگیرێن.
ئیسرائیل کاتز، وەزیری بەرگری ئیسرائیل رایگەیاند، لە وەڵامی کوژرانی سەربازێکیان دەیان دامەزراوەی سەربازییان لە غەززە کردە ئامانج و هەرکەسێک هێرش بکاتە سەر سەربازانی وڵاتەکەی و رێککەوتنەکان پێشێل بکات، بە خراپی باجەکەی دەدات.
ئەمڕۆ چوارشەممە، وەزیری بەرگری ئیسرائیل راگەیەندراوێکی لەسەر هێرشەکانی شەوی رابردوی وڵاتەکەی بۆسەر غەززە بڵاوکردەوە و تێیدا هەڕەشە لە حەماس دەکات.
کاتز دەڵێت؛ بەهۆی پێشێلکردنی ئاگربەست و کوژرانی سەربازێکیان لەلایەن حەماسەوە، دەیان پێگەی سەربازی و دەیان سەرکردەی حەماسیان کردوەتە ئامانج.
وەزیرەکەی ئیسرائل جەختیکردوەتەوە لەوەی دەست ناپارێزن لە سەرکردە و چەکدارەکانی حەماس و هەرکەسێک دەستێک لە دژی سەربازانی ئیسرائیل بەرز بکاتەوە، ئەوا ئەو دەستە دەبڕن.
ئەوەشیخستوەتەروو، سوپای وڵاتەکەی فەرمانی پێکراوە لە دژی هەموو ئامانجێکی حەماس مامەڵە بکات و لە داهاتووشدا هەر بەو شێوەیە دەبێت.
ئەو لێدوانانەی کارتز لە کاتێکدایە، بە گوێرەی زانیارییەکان، لە هێرشەکانی دوێنێشەوی سوپای ئیسرائیلدا، دەیان هاووڵاتیی مەدەنیی لە غەززە کوژراون.