هەواڵەکان
کۆبوونەوەی یەکێتی و پارتی لە پیرمام بە سەرپەرشتی بافڵ تاڵەبانی و مەسعود بارزانی دەستی پێ کرد.
کۆبوونەوەکەی یەكێتی و پارتی لەسەر ئاستی باڵایە و بە سەرپەرشتی بافڵ جەلال تاڵەبانی سەرۆکی یەکێتیی نیشتمانیی کوردستان و مەسعود بارزانی سەرۆکی پارتی بەڕێوەدەچێت.
تەوەری سەرەکی گفتوگۆکانیان لەبارەی پێکهێنانی کابینەی 10ی حکومەتی هەرێم و دوایین پێشهات و گرفتەکانی ناوچەکەیە.
یەکهەڵوێستی لە بەغداد، گرفتی موچەی موچەخۆران و هەناردەكردنەوەی نەوتی هەرێمی كوردستان یەکێکی دیکە دەبن لە تەوەرەکانی گفتوگۆی نێوانیان.
کۆمەڵەی پیشەسازی نەوتی کوردستان 'ئەپیکور' راگەیەنراوێکی لەبارەی نەوت و هەناردەی نەوتەوە بڵاوکردەوە و ئاماژەی بەوەکردووە، پێویستە بە شێوەیەكی خێرا و روون شایستە داراییەكانمان پێ بدرێت.
کۆمەڵەی پیشەسازی نەوتی کوردستان 'ئەپیکور' راگەیەنراوێکی لەبارەی نەوت و هەناردەی نەوتەوە بڵاوکردەوە و تێیدا هاتووە، جەخت لە دەستپێكردنەوەی هەناردەی نەوت دەكەنەوە لەڕێی بەندەری جەیهانەوە.
لە راگەیەنراوەکەدا هاتووە، "دانوستانەكانی نێوان هەردوو حكومەتی هەرێم و بەغداد بە مەبەستی هەناردەی نەوت چڕكراونەتەوە و هیچ كات بەشداریی هیچ كۆبوونەكەیەكمان نەكردووە كە پێچەوانەی ئەو گرێبەستانە پێشنیاز كرابێت".
ئاماژە بەوەشکراوە، "ئامادەی دەستپێكردنەوەی هەناردەی نەوتین بە مەرجی پابەندبوون بەو گرێبەستانەی كە هەن، پێویستە رێز لە گرێبەستی هاوبەشیی بەرهەمهێنان بگیرێت".
لە راگەیەنراوەکەدا ئەوەش خراوەتە روو، "پێویستە بە شێوەیەكی خێرا و روون شایستە داراییەكانمان پێ بدرێت، پێویستە چارەسەری ئەو پارەیە بكرێت كە هێشتا نەدراوەتەوە بە كۆمپانیاكان و شایستە داراییەكانمان بدرێتەوە لەڕێگەی كاشەوە بێت یاخود پشكی نەوتی شایستە وەك خۆی".
ئەوەش لە کاتێکدایە، لە مانگی ئازاری ساڵی 2023ـەوە هەناردەی نەوتی هەرێم لە رێگای بەندەری جەیهانەوە راگیراوە و لەو کاتەشەوە تاوەکو ئێستا ناکۆکی لەنێوان حکومەتی عیراق و هەرێمدا هەیە لەسەر دەستپێکردەنەوەی هەناردە.
شەوی رابردوو هاووڵاتیانی گوندی سەرنەوسی سەر بە ناحیەی وەرتێ خۆپیشاندانێکیان بۆ داواکردنی چاککردنی کارەبای سنورەکە ئەنجامدا و دواتر گرژی لەنێوان هێزە ئەمنییەکان و هاووڵاتییەکاندا دروستبوو و بەهۆیەوە هاووڵاتییەک گیانی لەدەستدا و چواری دیکە بریندار بوون.
پەیامنێری کوردسات نیوز باسی لەوەکرد، بەهۆی گرژییەکانەوە کەسێک بە ناوی حەسەن رەحمان گیانی لەدەستداوە کە تەمەنی 42 ساڵە.
بەپێی زانیارییەکانی کوردسات نیوز، ئەو هاووڵاتییە خاوەنی دوو هاوسەر و پێنج منداڵ بووە.
هەر لە خۆپیشاندانەکەدا و بەهۆی گرژییەکانەوە چوار هاووڵاتی فیکەش بەهۆی بەرکەوتنی فیشەکەوە بریندار بوون، کە یەکێکیان دۆخی تەندروستی ناجێگیرە و لەژێر چاودێری چڕی پزیشکیدایە، سیانەکەی دیکەش لە ئێستادا لە نەخۆشخانە چارەسەر وەردەگرن.
گوندی سەرنەوس سەر بە ناحیەی وەرتێیە لە سنوری باڵەکایەتی،بەڵام لەرووی ئیدارییەوە سەر بە رەواندوزە. ماوەی هەفتەیەکە سنوری ناحیەی وەرتێ و قەسرێ رۆژانە لەم وەرزی گەرمایەدا کەمتر لە 10 سەعات کارەبایان هەیە. بەوهۆیەشەوە هاووڵاتیانی سنورەکە نارەزایەتیی دەردەبڕن و خۆپیشاندانەکەی شەوی رابردووش دووەم خۆپیشاندان بوو لەم هەفتەیەدا.
کەسوکاری حەسەن رەحمان بە کوردسات نیوزیان راگەیاند، داواکارن ئەو کەسەی تەقەی کردووە بدرێتە دادگا.
سبەینێ دووشەممە، یەکێتیی نیشتمانیی کوردستان و پارتی دیموکراتی کوردستان لە پیرمام کۆدەبنەوە.
هەریەكە لە یەكێتیی نیشتمانیی كوردستان و پارتی دیموكراتی كوردستان بە سەرپەرشتی بافڵ جەلال تاڵەبانی و مەسعود بارزانی كۆدەبنەوە و تەوەری سەرەكی گفتوگۆكان پێكهێنانی حكومەت و پرسی موچە دەبێت.
پەیامنێری كوردسات نیوزی رایگەیاند، سبەینێ مەكتەبی سیاسی یەكێتی و پارتی لەسەر ئاستی باڵا بە سەرپەرشتی بافڵ جەلال تاڵەبانی و مەسعود بارزانی لە پیرمام كۆدەبنەوە.
وتیشی، ناوەرۆكی كۆبوونەوەكەی سبەینێ یەك هەڵوێستی لە بەغداد، پرسی پێكهێنانی كابینەی دەیەمی حكومەتی هەرێمی كوردستان و كێشەی موچە و هەناردەكردنەوەی نەوتی هەرێمی كوردستان لەخۆدەگرێت.
ئەنجومەنی نوێنەرانی عیراق سبەینێ كۆدەبێتەوە و كارنامەكەی هەشت بڕگە لەخۆی دەگرێت، یەكێكیان هەمواری یاسای ئەنجومەنی نوێنەران و پێكهێنانیەتی.
فەرمانگەی راگەیاندنی ئەنجومەنی نوێنەرانی عیراق لە راگەیەنراوێكدا كارنامەی دانیشتنی سبەینێی ئەنجومەنەكەی بڵاوكردەوە كە هەشت بڕگە لەخۆی دەگرێت.
تەوەری یەكەم دەنگدانە بە سەرۆك و ئەندامانی ئەنجومەنی راژەی فیدرالی و تەوەری دووەم دەنگدانە بە سەرۆكی ئەنجومەنی دەوڵەت.
لە تەوەری سێیەمدا دەنگ دەدرێت لەسەر هەمواری یەكەمی یاسای گۆڕینی بڕوانامەكان، یەكێكی تر لە تەوەرەكان گفتوگۆكردنە لەبارەی پرۆژەیاسای پارێزگاریكردن و باشكردنی ژینگە.
وەك ئەوەی لە كارنامەكەشدا هاتووە، تەوەری هەشتەم تایبەت دەبێت بە گفتوگۆكردن لەبارەی هەمواری یاسای ئەنجومەنی نوێنەران پێكهێنانی ئەنجومەنەكە.
بەرێوەبەرایەتی گشتیی حەج و عومرەی هەرێم رایگەیاند، لە رۆژی چوارشەممەوە گەشتەکان لە رێگای وشکانی و لە رۆژی هەینیشەوە گەشتەئاسمانییەکان بۆ عومرە دەست پێ دەکەنەوە.
بەڕێوەبەرایەتی گشتیی حەج و عومرەی هەرێم رایگەیاند، بەپێی رێنماییەکانی وەرزی عومرەی 2025-2026، ئەو کۆمپانیایانەی بە رەسمی مۆڵەتی کارکردنیان هەیە، دەتوانن رۆژی سێشەممە 15ی مانگ گرێبەستەکانیان لەگەڵ بەڕێوەبەرایەتی ئەنجامبدەن و رۆژی چوارشەممە لەرێگای وشکانییەوە دەست بە گەشتەکانی عومرە بکەنەوە.
ئاماژەی بەوەشکردووە، لە رۆژی هەینی 18ی مانگەوە، کۆمپانیاکان دەتوانن گەشتەکانیان لەرێگای ئاسمانییەوە دەست پێ بکەنەوە.
داواش لە کۆمپانیاکانی بەرنامەفرۆشی عومرە دەکات، لە رۆژی سێشەممەدا سەردانیان بکەن بە مەبەستی وەرگرتنی تەندەر و لە هەمان بەرواری گەشتەکاندا ئەوانیش دەست بە گەشتەکانیان بکەنەوە.
داواش دەکات، کۆمپانیاکان سەرجەم پێویستییەکانی گرێبەست لەگەڵ خۆیاندا ببەن بۆئەوەی مامەڵەکانیان بۆ تەواو بکرێت.
بەڕێوەبەرایەتییەکە داواش لە هاووڵاتیان دەکات، داوا لەو کۆمپانیایانە بکەن کە لە رێگەیانەوە گەشتی عومرە دەکەن، مۆڵەتی رەسمی کۆمپانیاکانیان پشان بدەن، ئەگەر مۆڵەتی رەسمیان لە بەڕێوەبەرایەتی حەج و عومرە وەرنەگرتبوو گەشتیان لەگەڵدا ئەنجام نەدەن.
ئەوەش هاتووە، بەڕێوەبەرایەتییەکە مۆڵەتی کارکردن بەشێوەی تابلۆی هەڵواسین دەدات بە کۆمپانیاکان بۆ ئەوەی هەڵی بواسن و لەبەرچاودا بێت.
وەزارەتی بازرگانی عیراق رایگەیاند، ئامادەكاری كراوە لە مانگی هەشتی ئەمساڵدا كارتی ئەلیكترۆنی كۆبونی خۆراك لە كەركوك و نۆ پارێزگای تر دابەش بكرێت.
تالب حسێن نیعمە بەڕێوەبەری گشتی فەرمانگەی پلاندانان لە وەزارەتی بازرگانی عیراق رایگەیاند، لە مانگی هەشت دەستدەكرێت بە دابەشكردنی كارتی ئەلیكترۆنی كۆبۆنی خۆراك لە 10 پارێزگا لە نێوانیاندا پارێزگای كەركوك.
دەشڵێت، تائێستا لە كۆی 42 ملیۆن كەس كە ناویان لە كۆبونی خۆراك تۆمار كراوە زیاتر لە 34 ملیۆن كەس كارتی ئەلیكترۆنیان پڕكردوەتەوە.
وتیشی، پرۆسەی خۆتۆماركردن و نوێكردنەوەی زانیاری كۆبونی خۆراك بەشێوەی ئەلیكترۆنی بەردەوامە و یەك ملیۆن و 880 هەزار كەسیش ناوەكانیان سڕاوەتەوە بەهۆی ناوی دوبارە و مردن و گەشتی دەرەوەی وڵات.
ئاماژەی بەوەشكردووە، لە پارێزگای كەربەلا سەرجەم هاووڵاتیان كارتی ئەلیكترۆنییان پڕكردووەتەوە.
ئەمڕۆ 36 ساڵ بەسەر قاسملۆی شەهیدکردنی پێشمەرگە و سکرتێری گشتیی حزبی دیموکراتی کوردستان تێپەڕ دەبێت.
36 ساڵ بەر لە ئێستا و لە ساڵی 1989دا، لە شاری ڤییەنای پایتەختی نەمسا د. عەبدولرەحمان قاسملۆ پێشمەرگە و سکرتێری گشتیی حزبی دیموکراتی کوردستان، لەگەڵ دوو هاوڕێی بەناوەکانی عەبدوڵا قادری ئازەری ئەندامی کۆمیتەی ناوەندی و بەرپرسی حزبەکە لە دەرەوەی وڵات، هەروەها دکتۆر فازڵ رەسوڵ نووسەر و سیاسەتوانی کورد؛ شەهید کران.
قاسملۆ و عەبدوڵا قادری ئازەری و دکتۆر فازڵ بە مەبەستی چارەسەری پرسی کورد و ئاشتی لە خۆرهەڵاتی کوردستان لە ڤییەنا بوون.
عەبدولرەحمان قاسملۆ لە 22ی کانوونی یەکەمی ساڵی 1930 لە شاری ورمێ لەدایکبووە و لە ساڵی 1945 دەستی بە کاری سیاسی کردووە، یەکێک بووە لەو سەرکردانەی پەیوەندییەکی بەھێزی لەگەڵ یەکێتیی نیشتمانیی کوردستان و سەرۆک مام جەلال ھەبووە و لە چەندین وێستگەی خەبات کاری پێکەوەییان کردووە بۆ چارەسەرکردنی پرسی کورد لە خۆرھەڵات و باشوری کوردستان.
بەهۆی خواردنەوە کحولییەکانەوە لە ئێران 31 کەس گەیەنراونەتە نەخۆشخانە کە دۆخی تەندروستیان ناجێگیرە و کەسێک گیانی لەدەستداوە، هەروەها پێنجی دیکە لە چاودێری چڕدان.
محەمەد عەلی شەفیعی بەڕێوەبەری نەخۆشخانەی گەنجویان لە پارێزگای خوزستانی ئێران رایگەیاندووە،ەهۆی خواردنەوەکحولییە ساختەکانەوە 31 کەس گەیەنراونەتە نەخۆشخانە،کە دۆخی تەندروستییان ناجێگیرە.
ئاماژەی بەوەشکرد، کەسێکیان گیانی لەدەستداوە، حەوت لە نەخۆشەکان دەبێت لەرێگای گۆڕینی خوێنەوە خوێنیان پاکبکرێتەوە و پێنجیشیان لە ژووری چاودێری چڕ خەوێنراون.
ئەوەش لەکاتێکدایە، ماوەی چەند ساڵێکە بڵاوبوونەوەی خواردنەوە کحولییە ساختەکان لە ئێراندا بووەتە دیاردە و ساڵانە چەندین کەس بەهۆیەوە گیانلەدەست دەدەن، یان ژەهراوی دەبن و تەندروستیان تێکدەچێت، کە بەشێکیان توشی نەخۆشی درێژخایەنیان دەکات و بەدرێژایی ژیانیان پێوەی دەناڵێنن.
قوباد تاڵەبانی بەبۆنەی لەناوبردنی چەک لەلایەن ژمارەیەک گەریلای پارتی کرێکارانی کوردستان پەیامێکی بڵاوکردەوە و رایگەیاندووە، بە ئومێدێکی قووڵەوە بۆ ئاشتی و دیموکراسی بەردەوام دەبین لە پشتیوانیکردنی ئەم پرۆسەیە.
دەقی پەیامەکەی قوباد تاڵەبانی.....
ئەمڕۆ لە سلێمانی مێژوو تۆمار کرا. پـەکـەکە لە پێگەیەکی بەهێزەوە وەک بەشێک لە دەستپێشخەرییەکی گەورە بۆ ئاشتی، چەکەکانیان لەناوبرد. سلێمانی وەک شارێک کە بە دروستکردنی پرد و چارەسەرکردنی ناکۆکی لەڕێی دیالۆگەوە ناسراوە، ئەمڕۆ ئەم رۆڵەی خۆی زیاتر بەرجەستە کرد. بە ئومێدێکی قووڵەوە بۆ ئاشتی و دیموکراسی بەردەوام دەبین لە پشتیوانیکردنی ئەم پرۆسەیە.
قوباد تاڵەبانی جێگری سەرۆکی حکومەتی هەرێمی کوردستان
سەرۆكی مەهەپە رایگەیاند، ئۆجەلان بەڵێنەكەی خۆی جێبەجێكرد، دەم پارتیش سیاسەتێكی بەرپرسیارانەی جێبەجێكردوە.
دەوڵەت باخچەلی سەرۆكی پارتی نەتەوەپەرستی توركیا "مەهەپە" دوای رێوڕەسمی لەناوبردنی چەك لەلایەن ژمارەیەک لە گەریلاکانی پەکەکە راگەیەنراوێكی بڵاوكردەوە و ئاماژەی بۆ ئەوەكرد، عەبدوڵا ئۆجەلان دامەزرێنەری پارتی کرێکارانی کوردستان "پەكەكە" بەڵێنەكەی جێبەجێ كرد، دەم پارتیش سیاسەتێكی بەرپرسیارانەی بە لێدوانی هاوسەنگ لە كاتی خۆیدا نیشانداوە و لە پاڵ برایەتی هەزار ساڵەدا وەستاوە.
راشیگەیاندوە، ئەو دیمەنانەی بڵاوكرانەوە، ساتێكی مێژووی زۆر گرنكە، پەكەكە لە ئەمڕۆ بەدواوە بە چەند قۆناغێك چەكەكان لەناودەبات.
هەر لەو چوارچێوەیەشدا سەرۆكی مەهەپە، نامەیەكی بۆ پەروین بوڵدان ئەندامی وەفدی ئیمراڵی ناردووە، لە نامەكەدا ئاماژەی بۆ ئەوە كردوە: هەوڵ و بەشداریكردنەكەت لە پرۆسەی ئاشتی بێ ئەندازەیە و لەو بارەیەوە سوپاسی كردووە.
باسی لەوەشكردوە، هەفتەی داهاتوو لەگەڵ وەفدی ئیمراڵی كۆدەبێتەوە و بە وردی باس لە هەنگاوەكانی پرۆسەی ئاشتی دەكەن.
پاش بەڕێوەچوونی پڕۆسەی لەناوبردنی چەک لە پارێزگای سلێمانی وەفدی دەم پارتی گەیشتە دەباشان و لەگەڵ بافڵ جەلال تاڵەبانی سەرۆکی یەکێتی لە کۆبوونەوەدان.
نوێ دەکرێتەوە..
سەرۆکی هەرێمی کوردستان پەیامێکی لەبارەی لەناوبردنی چەک لەلایەن بەشێک لە گەریلاکانی پەکەکەوە بڵاوکردەوە و ئاماژەی بەوەکردووە، ئهم ههنگاوه پرۆسهى ئاشتى دهباته قۆناغێكى نوێ و ههنگاوى ديكهى كردهيى بهدوادا دێت.
نێچیرڤان بارزانی سەرۆکی هەرێم رایگەیاندووە، پێشوازی لەو هەنگاوەی ئەمڕۆی پارتی كرێكارانی كوردستان پەكەكە بۆ چەكدانان دەكەن. پابەندی هەرێمیش بۆ سەرخستنی پرۆسەکە دووپات دەکاتەوە.
ئاماژەی بەوەشکردووە، "ئەمە هەنگاوێكی دیكەی گرنگ و دڵخۆشكەری سەرخستنی پرۆسەی ئاشتی بوو و دڵنیاین ئەم هەنگاوە پرۆسەی ئاشتی دەباتە قۆناغێكی نوێوە و هەنگاوی دیكەی كردەیی بەدوادا دێت كە پرۆسەكە بە ئاراستەیەكی دروستدا دەباتە پێشەوە".
لە راگەیەنراوەکەدا ئەوەش هاتووە، ناوچەكە بە قۆناغ و دۆخێكی هەستیاردا تێدەپەڕێت و داوا لە لایەنەكان دەكات كە هەموو هەوڵێك لەپێناو سەرخستنی ئاشتیدا بدەن، چونكە لە ئاشتیدا هەمووان براوەن و سەركەوتنی ئاشتی، خزمەت بە توركیا و تەواوی ناوچەكە و هەموو لایەك دەكات.
لە کۆتاییشدا سەرۆکی هەرێم نووسیویەتی: سوپاس و پێزانين و دهستخۆشيمان بۆ جهنابى سهرۆك ئهردۆغان و دهستپێشخهرى و پشتگيرى و ههوڵهكانى بۆ سهرخستنى پرۆسهى ئاشتى، دووپات دهكهينهوه. ههروهها به ڕێزهوه له ڕۆڵى بهڕێزان باخچهلى و ئۆجالان و ههموو ئهوانه دهڕوانين كه كار لهپێناو سهرخستنى ئاشتيدا دهكهن.
ئەو گەریلانەی پەكەكە كە چەكەكانیان لەناوبرد بە ناوی گروپی ئاشتی و كۆمەڵگەی دیموكراتی راگەیەنراوێكیان بڵاوكردەوە و تێیدا هاتووە: وەكو وەڵامێك بۆ بانگەوازەكەی ئۆجەلان چەكەكانمان لەناوبرد.
ئەمڕۆ لە رێورەسمێکی رەسمیدا لە ئەشکەوتی جاسەنە لە سلێمانی بەشێک لە گەریلاکانی پەکەکە چەکەکانیان لەناوبرد و ئاماژە بەوەدەکەن، هاوڕان لەگەڵ بانگەوازی عەبدوڵا ئۆجەلان رابەری باڵای پەکەکە، لەبارەی بڕوابوون بە ئاشتی کۆمەڵایەتی و هێزی سیاسی نەوەک چەک.
ئەوەش هاتووە، وەک وەڵامێک بۆ بانگەوازی ئۆجەلان چەکەکانیان لەناوبردووە و هیواش دەخوازن، "ئەم هەنگاوە ببێتە مایەی خێر و خۆشی بۆ گەل، بۆ گەلانی توركیا و رۆژهەڵاتی ناوەڕاست و سەرجەم مرۆڤایەتی".
دەقی راگەیەنراوەکە:
ئەمڕۆ پرۆسەی لەناوبردنی چەکی بەشێک لە گەریلاکانی پەکەکە لە ئەشکەوتی جاسەنە بەڕێوەدەچێت و لە قەزای دوکان و قەندیلیشەوە نوێنەری لایەنەکان ئامادەن و چاودێری پرۆسەکە دەکەن.
ئەشکەوتی جاسەنە بەشێکی دانەبڕاوە لە مێژووی شۆڕشی کورد، کە بە دووری 50 کیلۆمەتر دەکەوێتە رۆژئاوای شاری سلێمانی لە ناحیەی سورداش، بە دیاریکراوی دەکەوێتە پشت گوندی کانی خان لە دامێنی بەرزایی نەبی ئاغا لە شاخی سارا.
ئەشکەوتەکە دەروازەیەکی سێگۆشەیی هەیە، درێژییەکەی 40 مەتر و پانییەکەی نۆ مەترە، هەروەها حەوت مەتر بەرزە و لە بەشی ناوەوەی لە دوو ژوور پێکدێت.
یەکەم رۆژنامەی شاخ و ئەشکەوتی جاسەنە
جاسەنە پێشتر بەکارهێنانێکی ئاسایی هەبووە، بەڵام بەگوێرەی کات و سەردەمەکان بەکارهێنانەکەی گۆڕاوە، بە جۆرێک لە ساڵی 1923 یەکەم رۆژنامەی شاخ لە مێژووی رۆژنامەگەری کوردیدا لەو ئەشکەوتەوە دەرکراوە بە ناوی "بانگی حەق".
لە سەردەمی شۆڕشی شێخ مەحموددا ئەشکەوتەکەی وەک پەناگە بەکارهێنا و سێ ژمارەی لە بانگی حەق بڵاوکردەوە.
لە شۆڕشی نوێشدا پێشمەرگە ئەشکەوتەکەی وەک پەناگەیەکی گرنگ دژ بە حزبی بەعسی دیکتاتۆر بەکارهێناوە.
ئێستاش ئەشکەوتەکە وەک شوێنەوارێکی مێژوویی لێی دەڕوانرێت و بەردەوام رێکخراوەکان سەردانی دەکەن و ساڵانەش خوێندنگەکان گەشتی زانستیی بۆ خوێندکاران رێکدەخەن بەمەبەستی پێناساندنی ئەشکەوتەکە بە نەوەکانی داهاتووی کوردستان.
زیاتر لە 30 پارت و لایەنی رۆژئاوای كوردستان جەخت لە خۆبەڕێوبەریی باكور و رۆژهەڵاتی سوریا دەكەنەوە و دژی تێكەڵكردنەوەی هێزەكانی هەسەدە لە ناو سوپای سوریا راگەیەنراوێكیان بڵاوكردەوە.
دەسەڵاتی سوریا لە راگەیەنراوێكدا بڵاویكردەوە كە هەوڵی تێكەڵكردنەوەی هێزەكانی سوریای دیموكرات - هەسەدە بە سوپای وڵاتەكە دەدات و كورد بە بەشێكی دانەبڕاوی سوریا ناودەهێنێت، ئەوەش ناڕەزایەتی هەسەدە و 35 پارت و لایەنی رۆژئاوای كوردستانی لێكەوتوەتەوە.
ئە پارتانەی رۆژئاوای كوردستان لە راگەیەنراوێكی هاوبەشدا ئاماژەیان بەوە كردوە كە وتەكانی تۆماس باراك نێردەی ئەمریكا بۆ سوریا سەبارەت بە تێكەڵكردنەوەی هەسەدە لە سوپای سوریا و راگەیەنراوی دەسەڵاتی دیمەشق بۆ رەتكردنەوەی سیستمی خۆسەریی باكوری و رۆژهەڵاتی سوریا رەتدەكەنەوە.
لە راگەیەنراوەكەدا هاتوە لە دوای ساڵی 2011 و دوای سەرهەڵدانی ناڕەزایەتییەكانی سوریا رۆژئاوای كوردستان بە بەردەوامی هەوڵی پاراستنی سەرجەم پێكهاتەكانی پێكەوە داوە و دوای دروستبونی هەسەدەش ئەو هێزە بە هاوبەشی و بە هاوكاریی ئەمریكا رۆڵی لە بەرەنگاربونەوەی داعش هەبوە، بۆیە پێویستە باكور و رۆژهەڵاتی سوریا و هێزەكانی سوریا لە چوارچێوەی سیستمی خۆسەریدا یەكپارچەیی خاكی سوریا بپارێزن.
ئەو پارتانە جەختیان لەوە كردوەتەوە كە پێویستە ئەمریكا بە دژایەتیی هەسەدە لە رۆڵی ئەرێنیی لە باكور و رۆژهەڵاتی سوریا كەم نەكاتەوە و پشتوانیی خۆسەریی بكات بەرانبەر دەسەڵاتی دیمەشق.