سوپای ئیسرائیل رایگەیاندوە، بە بیانوی بونی حەماس بۆردومانی  کەمپی پەنابەرانی فەلەستینی لە عەین ئەلحیلوە لە باشووری لوبنان کرد و بە گوێرەی زانیاریەی سەرەتاییەکان زیاتر لە  10 کەس گیانیان لەدەستداوە و ژمارەیەکی دیکەش برینداربوون.

درەنگانێکی ئەمشەو سێشەممە، سوپای ئیسرائیل رایگەیاند، پێگەیەکیان بۆردومان کردوە لە باشوری لوبنان کە چەکدارانی حەماس  تێیدا مەشق و راهێنانیان کردوە و وەک شوێنێک بۆ چالاکی دژی ئیسرائیل بەکاریان هێناوە.

سوپای ئیسرائیل رایگەیاندوە؛ ئەو شوێنەی کە بۆردومانیان کردوە لە لایەن چەکدارانی حەماسەوە بە مەبەستی پلاندانان و ئەنجامدانی هێرش دژی سەربازانی ئیسرائیل و دەوڵەتی ئیسرائیل بەکارهێنراوە.

بە گوێرەی زانیاریەی سەرەتاییەکان لە هێرشەکەدا 11 کەس گیانیان لەدەستداوە و  چوارکەسی دیکەش بریندار بوون، سوپای ئیسرائیل دەڵێت؛ پێش هێرشکردنەوە ئامادەکارییان کردوە بۆ ئەوەی زیان بە هاووڵاتییانی مەدەنی نەگەیەندرێت.

 ئەوەشیخستوەتەروو، چەکدارانی حەماس لە ئێستادا لە لوبنان چالاکی ئەنجامدەدەن، هەموو هەوڵێکیش دەخەنە گەڕ و لە هەرشوێنێک بن لەلایەن سوپاکەیانەوە دەکرێنە ئامانج و ئۆپراسیۆنەکانیان دژ بە حەماس بەردەوام دەبێت.

دۆناڵد ترەمپ لە کۆشکی سپی پیشوازی لە  شازادەی جێنشینی سعودیە کرد و  رایگەیاند؛  سوپاسی سعودیە دەکەم کە بە بەهای 600 ملیار دۆلار وەبەرهێنانی لە ئەمریکا کردوە و هیوادارم بگاتە یەک ترلیۆن دۆلار و جەختیشیکردەوە کە شازادە هاوڕێیەکی نزیکی ئەوە و لە کۆشکی سپیدا رێزێکی زۆری لێدەگیرێت.

ئەمڕۆ سێشەممە، محەمەد بن سەلمان، شازادەی جێنشینی سعودیە سەردانی کۆشکی سپی کرد و لەلایەن دۆناڵد ترەمپەوە پێشوازی لێکرا، مەبەستی سەردانەکەی شازادە بۆ کۆشکی سپی ئەنجامدانی چەند رێککەوتنێکی ئابوورییە و یەکێک لەو رێکەوتنانەش بەدەستهێنانی فڕۆکەی جەنگی F-35.

دۆناڵد ترەمپ لە بارەت کۆبونەوەکەی لەگەڵ شازادەی سعودییە رایگەیاند؛ دیدارێکی نایابی لەگەڵ شازادەی جێنشینی سعودیە ئەنجامداوە و پێشی وایە مافی سعودیە باشترین فڕۆکەی جەنگی هەبێت.

ناوبراو ئاماژەی بەوەشکردوە؛ لەگەڵ سعودییە دەگەنە رێککەوتن بۆ ئەوەی فڕۆکەی جەنگی F-35یان پێ بفرۆشن و هیواشی خواست، کە سعودیە تا ئێستا بە بەهای 600 ملیار دۆلار وەبەرهێنانی لە ئەمریکادا کردوە، زیاتر فراوانی بکات و  بیگەیەنێتەوە یەک ترلیۆن دۆلار.

ترەمپ جەختیکردەوە لەوەی سعودیە هاوپەیمانێکی راستەقینەیە و هەنگاو دەنێت بۆ بەهێزکردنی دەسەڵاتیان و پەیوەندیەکانیشیان لە باشترین ئاستدایە.

وەزارەتی نەوتی عیراق بڵاویکردوەتەوە، لە ئەنکەرە کۆبونەوە لە نێوان وەزارەتی نەوتی عیراق و وەزارەتی وزە و سامانە سروشتییەکانی تورکیا ئەنجامدرا و گفتوگۆ کرا لەبارەی گەیشتن بە رێککەوتنی نوێ بۆ گواستنەوەی نەوتی خاو لە رێگەی بۆرییەکانی تورکیاوە.

وەزارەتەکە لە راگەیەندراوێکدا ئاماژەی بەوەکردوە؛ کەشی کۆبونەوەکە ئەرێنی بووە و گفتوگۆی فراوان لەبارەی رەشنوسی پێشنیازکراوی رێککەوتنەکە و رێگاکانی پەرەپێدانی هاوکاری لە پرۆژە جیاوازەکانی کەرتی وزە لە نێوان هەردوو وڵاتدا کراوە.

وەک لە راگەیەندراوەکەدا هاتووە؛ لە کۆبوونەوەکەدا بەڕێوەبەری گشتی کۆمپانیای بەبازاڕکردنی نەوت(سۆمۆ) و بەڕێوەبەری گشتی کۆمپانیای نەوتی باکوور و بەڕێوەبەرانی گشتی بەشەکانی توێژینەوە و پلاندانان و بەدواداچوون و وردبینی ناوخۆیی و یاسایی و ئابووری لە بارەگای وەزارەت ئامادەبوون.

ئەوەشیانخستوەتەڕوو؛ لە کۆبونەوەکەدا گەیشتوونەتە لێکتێگەیشتنی گرنگ بۆ داڕشتنەوەی رێکەوتنێکی نوێ کە لە بەرژەوەندی هەردوولادا بێت، بە جۆرێک بەردەوامیی پرۆسەی گواستنەوە و گەیشتن بە بەرژەوەندییە ستراتیژییە هاوبەشەکان مسۆگەر بکات.

قوباد تاڵەبانی، جێگری سەرۆک وەزیران لە هەولێر بە جیا لەگەڵ هەر یەکە لە عیرفان سدیق، باڵیۆزی بەریتانیا و نيكۆلۆ فۆنتانا، باڵيۆزى ئيتاڵيا و محەمەد ئەلحەسان، نوێنه‌رى تايبه‌تى سكرتێرى گشتیی نەتەوەیەكگرتووەكان لە عیراق کۆبووەوە و تاوتوێی ئەنجامی هەڵبژاردنەکان و رەوشی عیراق کرا

لە هەر سێ کۆبوونەوەکەدا کە ئەمڕۆ سێ شەممە لە هەولێر بەڕێوەچوون، تاوتوێی رەوشی عیراق لە دوای بەڕێوەچوونی هەڵبژاردنەکانی ئەنجومەنی نوێنەرانی عیراق کرا.

جێگری سەرۆک وەزیران بەڕێوەچوونی سەرکەوتووانەی هەڵبژاردنەکانی بە دەستکەوتێکی گەورە بۆ خەڵکی عیراق وەسف کرد و هیوای خواست بەپێی ئەنجامەکانی ئەم هەڵبژاردنە حکومەتێک پێکبهێنرێت کە لە ئاست داواکارییەکانی هاوڵاتییانی عیراقدابێت و مافەکانی هەموو پێکهاتەکان تیایدا پارێزراوبێت.

قوباد تاڵەبانی جەختیشی کردەوە کە پێویستە ئەولەوییەتی هەر دوو حکومەتی داهاتووی عیراق و هەرێم چارەسەرکردنی بنەڕەتی کێشەکانی نێوان هەرێم و بەغدا بێت بەپێی دەستور و رایگەیاند چارەسەرکردنی کێشەکان دەرگا دەکاتەوە بەرەو عیراقێکی سەقامگیرتر و هەنگاونان بەرەو گەشەپێدانی ئابووری و باشترکردنی دۆخی خزمەتگوزارییەکان.

سەبارەت بە چۆنییەتی بەشداریکردنی لایەنە کوردستانییەکان لە حکومەتی داهاتووی عیراقدا، جێگری سەرۆکوەزیران بە پێویستی زانی لایەنە کوردستانییەکان لەڕێی گفتوگۆی بنیاتنەرانەوە لەسەر بەرنامە و پلانی هاوبەش رێکبکەون و بە یەکڕیزییەوە لەگەڵ لایەنە عیراقییەکان بکەونە دانووستانەوە بۆ ئەوەی باشتر بتوانن داکۆکی لە مافە دەستورییەکانی خەڵکی کوردستان بکەن.

پاسپۆرتی سلێمانی راگەیەندراوێکی بڵاوکردوەتەوە و دەڵێت؛ بۆ نۆرەگرتن و پێدانی پاسپۆرتی ئەلیکترۆنی، ئەگەر لە رێگەی ئەلیکترۆنییەوە(حجز الكتروني ) نۆرەبگرن ئەوا تەنها بڕی 91 هەزار دیناری تێدەچێت، ئەگەر وانەبێت دەبێت 100 هەزار دیناری زیادەی روسمات بدەن، جگە لە91 هەزار دیناری تێچوی پاسپۆرتەکە.

هەروەها ئاماژەی بەوەشکردوە؛ بۆ هاووڵاتییان واباشترە لە رێگەی ئەلیکترۆنییەوە نۆرەبگرن، بۆ ئەوەی تێچوی کەمتر بکەوێت لەسەریان و تەنها 91 هەزار دینار بدەن، نەک 191 هەزار دینار.

داوا لەو هاوڵاتیانەش دەکات کە لە رێگەی ئەلیکترۆنییەوە نۆرەیان گرتوە، بە گوێرەی کاتی دیاری کراوی خۆیان کە بە نامەی ئەلیکترۆنی بۆیان دیاریکراوە سەردانیان بکەن. 

پاسپۆرتی سلێمانی دەشڵێت؛ سەعات و رێکەوتی نۆرەکەیان لە رێگەی ئەلیکترۆنییەوە لە چ کات و رێکەوتێکدا بوو، ئەوا لەو کاتەدا سەردانیان بکەن ، بۆ ئەوەی لە کاتی خۆیدا مامەڵەکانیان بۆ رایی بکەن.

هەروەها هاووڵاتییانیش ئاگاداردەکاتەوە بۆ رایکردنی کارەکانیان، تەنها کار بە کارتی نیشتیمانی دەکرێت و پێناسی باری شارستانی و رەگەزنامەی عیراقی کاریان پێناکرێت، لەم لینکەشەوە  www.epp.iqهاووڵاتییان دەتوانن نۆرەی ئەلیکترۆنی بۆخۆیان دابنێن.

دەزگای بەرەنگاربوونەوەی تیرۆری عیراق، بڵاویکردوەتەوە دوو تیرۆرستی داعشـ.ـیـ.ـان لە سلێمانی بە هاوکاری و  هەوڵی وردی هەواڵگری و هەماهەنگیی ئاست بەرز لەگەڵ بەڕێوەبەرایەتی بەرەنگاربوونەوەی تیرۆری سلێمانی  دەستگیر کردوە.

ئاماژەیان بەوەشکردوە؛ ئۆپەراسیۆنی جیاوازیان بۆسەر مۆڵگەکانی داعـ.ــش، لە پارێزگای کەرکوک (وادی ئەلخاسە) و (وادی زاغیتون) لە هەمان پارێزگا و  لە چیای حەمرین لە پارێزگای دیالە دەستپێکردوە.

دەزگاکە دەشڵێت؛ ئۆپەراسیۆنەکان بونەتە هۆی  لەناوبردنی ژمارەیەک حەشارگە و کۆشکی پاشماوەی باندە تیرۆریسـ.ـتیـ.ـیەکانی داعـ.ــش و تەقاندنەوەی بۆمبی چێندراو و بڕێک کەرەستەی تەقەمەنیش.

شارەوانی سلێمانی داوا لەو خانەنشینانە دەکات کە لە تیروپشکی وەرگرتنی زەویدا ناویان هاتوەتەوە بۆ رایکردنی مامەڵەکانیان سەردانی بەڕێوەبەرایەتی خانەنشینی سلێمانی بکەن، نەک شارەوانی. 

شارەوانی سلێمانی رونکردنەوەیەکی تایبەت بە زەوی خانەنشینان بڵاوکردوەتەوە و تێیدا هاتووە؛ بەهۆی سەردانیكردنی زۆری خانەنشینانی بەڕێزو وە پرسیاركردنێكی زۆر لە سەرۆکایەتییان تایبەت بەو ناوانەی کە بەشێوەی تیروپشکی ئەلیکترۆنی كاری دابەشكردنی زەوییان بۆ ئەنجام درا لە لایەن سەرۆکایەتیی شارەوانیمان لە رێکەوتی 28ی ئابی 2025سەرجەم ناوەکان ئاراستەی خانەنشینی سلێمانی کراوە.

ئاماژەیان بەوەشکردوە؛ ناوەکان ئێستا  لە بینای بەڕێوەبەرایەتیی خانەنشینی سلێمانی بڵاوكراوەتەوە بەمەبەستی تەواوکردنی رێکاری ماوە لەلیژنەی پەیوەندیداری فەرمانگەی ناوبراو.

شارەوانی سلێمانی داوا لەو خانەنشینانە دەکات کە ناویان لە لیستەکەدایە سەردانی بەڕێوەبەرایەتیی خانەنشینی سلێمانی بكەن و ئەو بەرایی و زانیارییانەی داواكراوە لێیان رادەستی بەڕێوەبەرایەتیی خانەنشینانی سلێمانی بکرێت نەك سەرۆكایەتی شارەوانی سلێمانی.

سەرۆكی مەهەپە دەڵێت، هیچ دوودڵی ناكات بۆ سەردانی ئیمراڵی و ئەگەر كەسیش رازی نەبێت لەگەڵ سێ‌ هاوڕێی سەردانی ئۆجەلان دەكات.

دەوڵەت باخچەلی سەرۆكی گشتی پارتی نەتەوەپەرستی توركیا "مەهەپە" رایگەیاند، بابەتی چوون یان نەچوون بۆ ئیمراڵی دەبێت كۆتایی بێت، چونكە ئەگەر پەیوەندی راستەوخۆ لەگەڵ یەكێك لە لایەنە سەرەكییەكانی پرۆسەی ئاشتی مەحاڵ بێت، چۆن ئەنجامەكان بەدەست دەهێنرێن.

وتیشی، دوو دڵی ناكات لە چوون بۆ ئیمراڵی و سێ هاوڕێی لەگەڵ خۆی دەبات، یاخود بە تەنها دەڕوات و سەردانی ئیمراڵی دەكات و چاوپێكەوتنی روبەڕوو لەگەڵ ئۆجەلان ئەنجام دەدات.

باخچەلی راشیگەیاند، كەسانێك هەن هەوڵی تێكدانی پرۆسەكە دەدەن و پێویستە وریابن لەو بابەتەدا، تاكە داواكاریش ئەوەیە هەمووان بە بەرپرسیارێتییەوە مامەڵە بكەن. 

یەڵماز تونج وەزیری دادی توركیاش لەبارەی ئەو بابەتە رایگەیاند، بڕیاری سەردانی ئیمراڵی بە تەواوی پەیوەستە بە كۆمیسیۆنی پشتیوانی و برایەتی و چاوەڕێی بڕیاری كۆمیسیۆنن لەسەر ئەو بابەتە.

باخچەلی: بابەتی چوون یان نەچوون بۆ ئیمراڵی دەبێت كۆتایی پێبهێنرێت
باخچەلی: ئەگەر پەیوەندی لەگەڵ لایەنی سەرەكی ئاشتی نەبێت بێت ناگەینە ئامانج
باخچەلی: دوو دڵی ناكەم لە چوون بۆ ئیمراڵی و چاوپێكەوتنی روبەڕوو لەگەڵ ئۆجەلان ئەنجام دەدەم
وەزیری دادی توركیا: بڕیاری سەردانی ئیمراڵی پەیوەستە بە كۆمیسیۆنی پشتیوانی و برایەتی

دەستەی كەشناسی عیراق رایگەیاند، سبەینێ نزیمترین پلەی گەرما لە سلێمانی تۆمار دەكرێت كە بۆ شەش پلە دادەبەزێت.

دەستەی كەشناسی عیراق لە راگەیەندراوێكدا بڵاویكردووەتەوە، بەپێی پێشبینییەكانیان رۆژی چوارشەممە لە زۆربەی ناوچەكانی عیراق پلەكانی گەرما نزیك دەبێت لە ئەمڕۆ و ئاسمان ساماڵ دەبێت و تەنها لە هەندێك ناوچە هەور دەبێت.

ئاماژەی بەوەشكردووە، سبەینێ بەرزترین پلەی گەرما لە بەسرە دەبێت كە دەگاتە 28 پلە و نزیمترین پلەی گەرماش لە سلێمانی تۆمار دەكرێت و بۆ شەش پلە دادەبەزێت، لە هەولێریش نزمترین پلەی گەرما حەوت پلە و لە دهۆكیش 8 پلە دەبێت.

 

بەپێی پێشبینییەکانی کەشناسی لە 48 سەعاتی داهاتوودا ئاسمان ساماڵ و پەڵە هەور دەبێت، پلەکانی گەرماش بەرز دەبنەوە.

بەڕێوەبەرایەتی گشتی کەشناسی هەرێم، پێشبینییەکانی بۆ ئەمڕۆ و سبەینێ بڵاوکردەوە و رایگەیاند، ئەمڕۆ ئاسمان ساماڵ و پەڵە هەور دەبێت بەشێک لە ناوچە شاخاوییەکان نیمچە هەور دەبێت، هاوکات پلەکانی گەرما به‌رز دەبنەوە بەراورد بە تۆمارەکانى دوێنێ.

ئاماژەی بەوەشکرد، سبەینێ پلەکانی گەرما (1-3) پلەى سیلیزى بەرز دەبێتەوە بەراورد بە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر : 20 پلەی سیلیزی

سلێمانی : 19 پلەی سیلیزی

دهۆک : 19 پلەی سیلیزی

زاخۆ : 20 پلەی سیلیزی

کەرکوک : 21 پلەی سیلیزی

هەڵەبجە : 19 پلەی سیلیزی

سۆران : 17 پلەی سیلیزی

حاجی ئۆمەران : 10 پلەی سیلیزی

گەرمیان : 24 پلەی سیلیزی

نیكۆلاس مادۆرۆ سەرۆكی ڤەنزوێلا ئامادەیی بۆ دانوستانی رووبەڕوو لەگەڵ دۆناڵد ترەمپ سەرۆكی ئەمریكا دەربری ، ئەوەش لەكاتێكدا ئەمریكا كەشتیگەلی جەنگیی لە ناوچەی كاریبی بڵاوكردوەتەوە .

مادۆرۆ لە وەڵامی قەشەیەكی ئەمریكیدا رایگەیاندووە ، لە ئەمریكا هەر كەس بیەوێت گفتوگۆی لەگەڵ ڤەنزوێلا هەبێت ، ئامادەین روبەرو بە بێ هیچ كێشەیەك گفتوگۆی  لەگەڵ بكەین . دەپاتیشیكردوەتەوە ، ئەوەی كە رێگەی پێنەدەن تەنها ئەوەیە كە مەسیحییەكان لە ڤەنزوێلا رووبەڕووی بۆردومان و كۆمەڵكوژی ببنەوە .

مادۆرۆ جارێكی تریش داوای دانوستانی كردووە و رایگەیاندووە ، بەڵێ بۆ ئاشتی و نا بۆ جەنگ و هەر كەس ئارەزووی دانوستان بكات ئامادەن دانوستانی لەگەڵ بكەن .

چوارچێوەی هەماهەنگی دوای کۆبوونەوەی خۆی رایگەیاند، نیازیان هەیە گەورەترین کوتلەی پەرلەمانی پێکبهێنن و بۆ ئەو مەبەستەش دوو لیژنەیان پێکهێناوە بۆ دیاریکردنی کاندیدی سەرۆک وەزیرانی داهاتووی عیراق.

لە راگەیەندراوێکدا، چوارچێوەی هەماهەنگی جەختی لەوە کردەوە کە کار دەکەن بۆ یەکلاکردنەوەی شایستە هەڵبژاردنەکان لە وادەی دەستوریی خۆیدا و رایانگەیاند: "گەورەترین کوتلەی پەرلەمانی پێکدەهێنین و کاندیدی سەرۆکی حکومەت بۆ قۆناغی داهاتوو دیاری دەکەین."

بۆ جێبەجێکردنی ئەم ئامانجە، چوارچێوەی هەماهەنگی دوو لیژنەی پێکهێناوە کە ئەرکەکانیان بەم شێوەیەیە:

• لیژنەی یەکەم: تایبەت دەبێت بە گفتوگۆکردن لەسەر شایستە نیشتمانییەکان و پەرەپێدانی دیدگایەکی یەکگرتوو بۆ بەڕێوەبردنی دەوڵەت لە قۆناغی داهاتوودا.

• لیژنەی دووەم: ئەرکی چاوپێکەوتن دەبێت لەگەڵ کاندیدەکانی پۆستی سەرۆک وەزیران، بەپێی پێوەرە پیشەیی و نیشتمانییەکان.
  
  چوارچێوەی هەماهەنگی دووپاتیکردەوە کە دەبێت بەرنامەی حکومەتی داهاتوو لەگەڵ ئاڵنگارییە سیاسی، ئابوری و خزمەتگوزارییەکاندا بگونجێت و خواستی هاووڵاتیان بۆ چاکسازی، سەقامگیری و گەشەپێدان بەدیبهێنێت.
  
  هەروەها ئاماژەیان بەوەشکرد، "هاوکاریی هەمەلایەنەی نیشتمانی" کلیلی تێپەڕاندنی قۆناغی داهاتوو و چەسپاندنی سەقامگیریی سیاسییە لە وڵاتدا.

کۆمسیۆنی باڵای سەربەخۆی هەڵبژاردنەکان رایگەیاند، ئەو ئەنجامە کۆتاییانەی هەڵبژاردنی پەرلەمانی عیراق کە ئەمڕۆ راگەیەندران، لە سبەی سێشەممەوە شایەنی تانەلێدانن.

بەپێی راگەیەندراوێکی کۆمسیۆن، پرۆسەی وەرگرتنی تانە لە ئەنجامەکان بۆ ماوەی سێ رۆژ بەردەوام دەبێت.

 

کۆمسیۆنی باڵای سەربەخۆی هەڵبژاردنەکانی عیراق، لە کۆنگرەیەکی رۆژنامەوانیدا ئەنجامی کۆتایی هەڵبژاردنی خولی شەشەمی ئەنجومەنی نوێنەرانی عیراقی بۆ سەرجەم پارێزگاکان راگەیاند. بەپێی ئەنجامەکان، لەسەر ئاستی هەرێمی کوردستان، یەکێتیی نیشتمانیی کوردستان 18 کورسی بەدەستهێناوە.

ئەنجامی تەواوی پارێزگاکان:

پارێزگای بەغداد (71 کورسی)

• هاوپەیمانیی ئاوەدانکردنەوە و گەشەپێدان: 15 کورسی
• حیزبی تەقەدوم: 10 کورسی
• دەوڵەتی یاسا: 9 کورسی
• هاوپەیمانیی هێزەکانی دەوڵەت: 5 کورسی
• بزووتنەوەی سادیقوون: 5 کورسی
• هاوپەیمانیی عەزمی عێراقی: 5 کورسی
• رێکخراوی بەدر: 4 کورسی
• هاوپەیمانیی سیادەی نیشتمانی: 4 کورسی
• هاوپەیمانیی ئەساسی عێراقی: 4 کورسی
• بزووتنەوەی حقوق: 3 کورسی
• حەسمى نیشتمانى: 2 کورسی
• ئەبشر یا عێراق، خەدەمات، ئیشراق کانوون: هەر یەکەیان 1 کورسی
• کۆتاکان: ئیڤان فایەق (کریستیان) و بەسام جاسم (سابیئە)

پارێزگای سلێمانی (18 کورسی)

• یەکێتیی نیشتمانیی کوردستان: 8 کورسی
• رەوتی هەڵوێست: 3 کورسی
• نەوەی نوێ: 2 کورسی
• پارتی دیموکراتی کوردستان: 2 کورسی
• یەکگرتووی ئیسلامیی کوردستان: 2 کورسی
• کۆمەڵی دادگەریی کوردستان: 1 کورسی
  
  

پارێزگای هەولێر (16 کورسی)

• پارتی دیموکراتی کوردستان: 9 کورسی
• یەکێتیی نیشتمانیی کوردستان: 3 کورسی
• رەوتی هەڵوێست: 2 کورسی
• نەوەی نوێ: 1 کورسی
• کۆتای کریستیان: کلدۆ رەمزی
  
  

پارێزگای کەرکوک (12 کورسی)

• یەکێتیی نیشتمانیی کوردستان: 4 کورسی
• حیزبی تەقەدوم: 3 کورسی
• بەرەی تورکمانی عێراقی یەکگرتوو: 2 کورسی
• پارتی دیموکراتی کوردستان: 1 کورسی
• هاوپەیمانیی عەرەبی: 1 کورسی
• هاوپەیمانیی عەزم: 1 کورسی

پارێزگای دهۆک (11 کورسی)

• پارتی دیموکراتی کوردستان: 9 کورسی
• یەکگرتووی ئیسلامیی کوردستان: 2 کورسی

پارێزگای نەینەوا (34 کورسی)

• پارتی دیموکراتی کوردستان: 5 کورسی
• حیزبی تەقەدوم: 4 کورسی
• ئاوەدانکردنەوە و گەشەپێدان: 3 کورسی
• نەینەوا بۆ خەڵکەکەی: 3 کورسی
• هاوپەیمانیی عەزمی عێراق: 3 کورسی
• حەسمى نیشتمانى، بەدر، سیادە، یەکێتی خەڵکی نەینەوا: هەر یەکەیان 2 کورسی
• پرۆژەی عەرەبی، ناسنامە، دۆزی ئێزدی، مەشروعی عەرەبی: هەر یەکەیان 1 کورسی
  
  
  

پارێزگای بەسڕە (25 کورسی)

• هاوپەیمانیی تەسمیم: 6 کورسی
• بزووتنەوەی سادیقوون: 5 کورسی
• هاوپەیمانیی ئاوەدانکردنەوە و گەشەپێدان: 4 کورسی
• دەوڵەتی یاسا، هێزەکانی دەوڵەت، حقوق: هەر یەکەیان 2 کورسی
• رێکخراوی بەدر، ئەبشر یا عێراق، گردبوونەوەی فاو-زاخۆ، ئەساسی عێراقی: هەر یەکەیان 1 کورسی
  
  

پارێزگای دیالە (14 کورسی)

• رێکخراوی بەدر: 3 کورسی
• حیزبی تەقەدوم: 3 کورسی
• هاوپەیمانیی سیادە، سادیقوون، عەزم: هەر یەکەیان 2 کورسی
• هاوپەیمانیی دیالە ئەوەلەن، سابیتون: هەر یەکەیان 1 کورسی
  
  

پارێزگای ئەنبار (15 کورسی)

• حیزبی تەقەدوم: 5 کورسی
• ئەنبار هەویەتونا: 3 کورسی
• قیمەم: 3 کورسی
• هاوپەیمانیی عەزمی عێراق: 2 کورسی
• هاوپەیمانیی تەفوق، سیادە: هەر یەکەیان 1 کورسی
  
  

پارێزگای بابل (17 کورسی)

• ئاوەدانکردنەوە، سادیقوون، دەوڵەتی یاسا: هەر یەکەیان 3 کورسی
• ئیشراق کانوون، هێزەکانی دەوڵەت: هەر یەکەیان 2 کورسی
• خەدەمات، سۆمەریون، ئیدراک، بەدر: هەر یەکەیان 1 کورسی
  
  
  
  
  

پارێزگای زیقار (19 کورسی)

• ئاوەدانکردنەوە، دەوڵەتی یاسا، سادیقوون: هەر یەکەیان 3 کورسی
• هێزەکانی دەوڵەت، بەدر: هەر یەکەیان 2 کورسی
• سۆمەریون، خەدەمات، ئەبشر یا عێراق، ئیشراق کانوون، دەعمی دەوڵەت، حقوق: هەر یەکەیان 1 کورسی

پارێزگای سەلاحەدین (12 کورسی)

• تەقەدوم، ئاوەدانکردنەوە، عەزم، جەماهیری نیشتمانی: هەر یەکەیان 2 کورسی
• سەڵاحەدینی یەکگرتوو، شەراکەتونا، حەسم، تەفوق: هەر یەکەیان 1 کورسی

پارێزگای واست (12 کورسی)

• واست ئەجمەل: 4 کورسی
• دەوڵەتی یاسا، ئاوەدانکردنەوە، سادیقوون: هەر یەکەیان 2 کورسی
• هێزەکانی دەوڵەت، کۆتای کوردی فەیلی: هەر یەکەیان 1 کورسی

پارێزگای نەجەف (12 کورسی)

• ئاوەدانکردنەوە، هێزەکانی دەوڵەت، دەوڵەتی یاسا، سادیقوون: هەر یەکەیان 2 کورسی
• خەدەمات، ئەبشر یا عێراق، ئەساسی عێراقی، ئیشراق کانوون: هەر یەکەیان 1 کورسی

پارێزگای کەربەلا (11 کورسی)

• ئاوەدانکردنەوە: 3 کورسی
• دەوڵەتی یاسا، ئیشراق کانوون: هەر یەکەیان 2 کورسی
• ئەساسی عێراقی، سادیقوون، هێزەکانی دەوڵەت، بەدر: هەر یەکەیان 1 کورسی

پارێزگای قادسیە (11 کورسی)

• ئاوەدانکردنەوە: 3 کورسی
• دەوڵەتی یاسا: 2 کورسی
• بەدر، سادیقوون، هێزەکانی دەوڵەت، خەدەمات، ئیشراق کانوون: هەر یەکەیان 1 کورسی

پارێزگای میسان (10 کورسی)

• ئاوەدانکردنەوە: 3 کورسی
• بەدر، دەوڵەتی یاسا، سادیقوون: هەر یەکەیان 2 کورسی
• هێزەکانی دەوڵەت: 1 کورسی

پارێزگای موسەننا (7 کورسی)

• ئاوەدانکردنەوە، دەوڵەتی یاسا: هەر یەکەیان 2 کورسی
• سادیقوون، هێزەکانی دەوڵەت، ئەساسی عێراقی: هەر یەکەیان 1 کورسی

 

کۆمسیۆنی باڵای سەربەخۆی هەڵبژاردنەکان، ئەنجامی کۆتایی هەڵبژاردنی ئەنجومەنی نوێنەرانی عیراقی بۆ پارێزگای سلێمانی راگەیاند، کە تێیدا یەکێتیی نیشتمانیی کوردستان توانیی بە شێوەیەکی بەرچاو پلەی یەکەم بەدەستبهێنێت.

یەکێتیی نیشتمانیی کوردستان براوەی یەکەمە: 

بەپێی ئەنجامە فەرمییەکان، لە کۆی 18 کورسیی پارێزگاکە، یەکێتیی نیشتمانیی کوردستان بە بەدەستهێنانی 241,143 دەنگ، 8 کورسیی مسۆگەر کردووە و بەمەش بووە گەورەترین هێزی سیاسی لە پارێزگاکە. ئەکرەم ساڵح، کاندیدی یەکێتی، بە بەدەستهێنانی 34,996 دەنگ، زۆرترین دەنگی لەسەر ئاستی لیستەکە بەدەستهێناوە.

دابەشبوونی کورسیی لایەنەکانی دیکە
لایەنەکانی دیکە بەم شێوەیە کورسییەکانیان بەدەستهێناوە:

• رەوتی نیشتمانی (تیار الموقف الوطنی): 3 کورسی بە 75,375 دەنگ.

• نەوەی نوێ: 2 کورسی بە 69,781 دەنگ.

• پارتی دیموکراتی کوردستان: 2 کورسی بە 68,834 دەنگ.

• یەکگرتووی ئیسلامیی کوردستان: 2 کورسی بە 65,312 دەنگ.

• کۆمەڵی دادگەریی کوردستان: 1 کورسی بە 34,563 دەنگ.

ناوی کاندیدە دەرچووەکان:
ناوی ئەو کاندیدانەی کە کورسیی پەرلەمانیان لە پارێزگای سلێمانی بەدەستهێناوە بریتیین لە:

• یەکێتیی نیشتمانیی کوردستان (8 کورسی):

  1. ئەکرەم ساڵح غەفور: 34,996 دەنگ

  2. ئاوات محەمەد غەفور مەعروف: 19,812 دەنگ

  3. رێکەوت حەمەڕەشید کەریم محەمەد: 19,354 دەنگ

  4. رامیار حەیدەر سەعید: 15,319 دەنگ

  5. ئاسۆس عەلی ئەحمەد عەبدوڵا: 10,063 دەنگ

  6. پۆڵا مەعروف علی مەجید: 8,906 دەنگ

  7. بڕیار رەشید شەریف: 8,842 دەنگ

  8. سروە محەمەد رەشید (مێ): 6,940 دەنگ

• رەوتی نیشتمانی (3 کورسی):

  1. غالب محەمەد عەلی: 52,328 دەنگ

  2. رێبوار کەریم مەحمود: 6,441 دەنگ

  3. بەرزی ئەزمڕ ساڵح حمید (مێ): 3,654 دەنگ

• نەوەی نوێ (2 کورسی):

  1. سروە عەبدولواحید قادر (مێ): 21,987 دەنگ

  2. مژدە مەحمود محەمەد (مێ): 14,206 دەنگ

• پارتی دیموکراتی کوردستان (2 کورسی):

  1. ئەشواق نەجمەدین : 8,214 دەنگ

  2. فاروق محەمەد سعید: 4,529 دەنگ

• یەکگرتووی ئیسلامیی کوردستان (2 کورسی):

  1. موسەنا ئەمین نادر: 36,689 دەنگ

  2. عومەر محەمەد کەریم: 15,631 دەنگ

• کۆمەڵی دادگەریی کوردستان (1 کورسی):

  1. ئەحمەد حەمە رەشید: 20,525 دەنگ

 

کۆمسیۆنی باڵای سەربەخۆی هەڵبژاردنەکان، ئەنجامی کۆتایی هەڵبژاردنی ئەنجومەنی نوێنەرانی عیراقی بۆ پارێزگای هەولێر راگەیاند، کە تێیدا یەکێتیی نیشتمانیی کوردستان سێ کورسی بەدەستهێناوە.

پارتی دیموکراتی کوردستان براوەی یەکەم
بەپێی ئەنجامە فەرمییەکان، لە کۆی 16 کورسیی پارێزگاکە، یەکێتیی بە بەدەستهێنانی97,411  دەنگ، 3 کورسی مسۆگەر کردووە و بەمەش بووە دووەمی پارێزگاکە.

دابەشبوونی کورسیی لایەنەکان:

• یەکێتیی نیشتمانیی کوردستان: 3 کورسی بە 97,411 دەنگ.
  
   پارتی دیموکراتی کوردستان بە بەدەستهێنانی 369,724 دەنگ، 9 کورسی
  

• رەوتی نیشتمانی (تیار الموقف الوطنی): 2 کورسی بە 63,298 دەنگ.

• نەوەی نوێ: 1 کورسی بە 38,921 دەنگ.

• کورسی کۆتای کریستیانەکان: 1 کورسی بۆ کلدۆ رمزی هرمز.

ناوی کاندیدە دەرچووەکان:

ناوی ئەو کاندیدانەی کە کورسیی پەرلەمانیان لە پارێزگای هەولێر بەدەستهێناوە بریتیین لە:

• پارتی دیموکراتی کوردستان:

  1. ڕێبوار هادی عەبدولڕەحمان: 31,608 دەنگ

  2. سەفین یاسین محەمەدئەمین: 21,892 دەنگ

  3. بایز ئیسماعیل ئەسعەد: 20,430 دەنگ

  4. عەلی خاڵس جەواد: 16,164 دەنگ

  5. دانە عەبدولغەفار عەزیز: 15,893 دەنگ

  6. سیبان عەزیز حەدو: 15,825 دەنگ

  7. جیمەن حسێن عەزیز (مێ): 15,264 دەنگ

  8. نافستە مام یحیی عوسمان (مێ): 10,497 دەنگ

  9. جیمەن بایز محەمەد (مێ): 9,250 دەنگ
     
     

• یەکێتیی نیشتمانیی کوردستان:

  1. هەرێم کەمال خورشید: 19,922 دەنگ

  2. ئومێد زوبێر عومەر: 17,711 دەنگ

  3. جوان حوسێن رەسوڵ: 2,933 دەنگ
     
     

• رەوتی نیشتمانی:

  1. عەلی حەمە ساڵح: 48,921 دەنگ

  2. هێوا ئەحمەد فەقێ: 2,964 دەنگ
     
     

• نەوەی نوێ:

  1. کاوە عەبدولقادر حوسێن: 19,164 دەنگ
     
     

• کۆتای کریستیانەکان:

  1. کلدۆ رمزی هرمز شابۆ: 18,517 دەنگ