هەواڵەکان
مەسعود پزیشکیانی سەرۆک کۆماری ئێران، رایگەیاند، ئەورپا ئێرانێکی لاواز و پارچەپارچەکراوی دەوێت،بەڵام ئەو وەک ئێرانییەک ئەوەی قبوڵ نییە، جەختیشیکردەوە دەبێت یارمەتی لە پسپۆڕان و زانایان وەرگرن، راستە کێشەکانیان کەم نین، بەڵام دەتوانن پێکەوە چارەسەریان بکەن.
ئەمڕۆ پێنجشەممە، لە دیدارێکیدا لەگەڵ چالاکوانانی سیاسی و کۆمەڵایەتی لە پارێزگای خوراسانی باشوور، سەرۆک کۆماری ئێران رایگەیاند، راستە کێشەکانیان زۆرن، بەڵام ئەگەر یەکگرتوو بن، بە وەرگرتنی یارمەتی لە پسپۆڕان و زانایانی وڵاتەکەیان دەتوانن چارەسەری بکەن.
پزیشکیان جەختیکردەوە، نابێت وا بیر بکەنەوە کێشەکانیان تەنها بە ئاشت بوونەوە لەگەڵ ئەوروپا و ئەمریکا چارەسەر دەبن و دەشڵێت: "ئەوان دەیانەوێت ئێمە واز لە پیتاندنی یۆرانیۆم بهێنین، موشەکمان نەبێت و بە هەموو ئەو شتانە رازی بین کە لە ناوچەکەدا بەسەرماندا دەسەپێندرێت".
پزیشکیان باسی لەوەشکردوە، رۆژئاوا ئێرانێکی لاواز و پارچەپارچەکراوی دەوێت، بەڵام ئەو وەک ئێرانییەک رازی نابێت بە ئێرانێکی لاواز و دابەشکراو و دەیەوێت؛ ئێران خاوەن هێز و سەربەرزی بێت، بۆ ئەوەش پێویستە هەوڵبدەن و کار بکەن بۆ گەیشتن بە ئێرانێکی بەهێز.
بەڕێوەبەرایەتی دەروازەی نێودەوڵەتی زێت رایگەیاند، سبەینێ هەینی هاتوچۆکردن و گەشتکردن لە سنوری دەروازەکەیان دەوەستێت، ئاماژەیان بەوەشکردوە، هۆکاری داخستنەکە کارکردنە لە رێگای دەروازەکە لە سنوریی تورکیادا.
ئەمڕۆ پێنجشەممە، بەڕێوەبەرایەتی دەروازەی نێودەوڵەتی زێت راگەیەندراوێکی بڵاوکردوەتەوە و تێیدا هاتووە؛ هاووڵاتییان و گەشتیارانی سنوورەکەیان ئاگادار دەکەنەوە، کەوا سبەینێ هەینی هاتوچۆکردن لە دەروازەکەدا دەوەستێت.
دەشڵێن؛ وەستانی هاتوچۆکردن کاتییە و رۆژی دووشەمە ئاسایی دەبێتەوە و دەروازەکە بەڕویی گەشتیاراندا دەکرێتەوە.
بە گوێرەی راگەیەندراوەکەیان، هۆکاری داخستنەکە کارکردنە لە رێگای دەروازەکەدا، لە روی دەروازەی دەرەجیکی دیووی تورکیاوە و جەختیان کردوەتەوە، وەک دەروازەی زێت ئەوان هیچ گرفتێکیان نییە.
سەرۆکی ئۆکراین رایگەیاند، کورتهێنانی دارایی کاریگەری تەواوی کردوەتە سەریان لە شەڕی روسیادا، ئاماژەی بەوەشکرد زۆر بەی سەرکردەکانی ئەوروپا پشتگیری ئەوە دەکەن قەرزێکیان پێبدرێت، لە پارە بلۆککراوەکانی روسیا.
ئەمڕۆ پێنجشەممە، ڤۆلۆدیمێر زیلینیسکی، سەرۆکی ئۆکراین هۆشداری دا لەوەی توشی قەیرانی دارایی دەبن و ئەوەش کاریگەری تەواو دەکاتە سەر تواناکانیان لەشەری روسیادا، بە تایبەت لە سەنگەرەکانی پێشەوە.
سەرۆکی ئۆکراین ئەوەشی ئاشکراکرد، زۆرینەی سەرکردەکانی یەکێتیی ئەوروپا پشتگیریی ئەوە دەکەن، کە قەرزێکیان پێبدرێت، کە سەرچاوەکەی پارە بلۆککراوەکانی روسیایە لە ئەوروپادا و هۆشداریشیدایە وڵاتانی ئەوروپا لە ئەگەری هاوکاری نەکردنی ئۆکراین، ئەوان رەنگە نەتوان بەردەوام بن.
زینلینسکی، پەیامێکیشی ئاراستەی وڵاتانی ئەوروپا کرد، دەڵێت ئەگەر هاوکاری نەکرێن، تەنها ئۆکراین زەرەر ناکات، بەڵکو ئەوروپاش باجەکەی دەدات و جەختیکردوەتەوە باجەکەش بە خوێن دەبێت.
سەرۆکی ئۆکراین ئەوەشی خستوەتەڕوو، لە ئێستادا لە قەیرانێکی گەورەی داراییدان و ئەگەر وڵاتەکەی ئەو پارەیەی پێویستیەتی دەستی نەکەوێت، ئەوا بە ناچاری بەرهەمهێنانی فڕۆکە بێفڕۆکەوانە کەمدەکەنەوە، کە لە شەڕی روسیادا یەکێکە لە چەکە بەهێزەکانی وڵاتەکەی و ئەمەش کاریگەری لەسەر سوپاکەیان دەبێت.
كاروان گەزنەیی وتەبێژی یەكێتی رایگەیاند ، یەكێتی دەستبەراری ئەو داواكارییانە نابێت كە لە دانوستانەكاندا داویەتیە پارتی .
كاروان گەزنەیی وتەبێژی یەكێتیی نیشتیمانیی كوردستان لە كۆنگرەیەكی رۆژامەوانیدا رایگەیاند ، گرنگە لەگەڵ پارتی تێڕوانینێكی هاوبەش هەبێت بۆ ئەوەی بتوانن خزمەتی راستەقینە پێشكەشی گەلی كوردستان بكەن. ،، وتیشی یەكێتیی بەهیچ شێوەیەك دەستبەرداری ئەو داواكاریانە نابێت كە لە دانوستانەكاندا پێشكەشی پارتی كردوە ، چونكە ئەو داواكاریانە بە دەستكەوتی هەڵبژاردن دادەنرێت بۆ یەكێتیی هەمیشەش یەكێتی جەخت لەوە دەكاتەوە كە كورد بە یەكگرتوویی و بە یەكڕیزی بچێتە بەغداد.
لەبارەی پۆستی سەرۆک کۆماری نوێی عیراقیشەوە وتەبێژی یەکێتی ئاماژەی بەوەکرد، کاندیدمان بۆ پۆستی سەرۆکک ۆماری عیراق دەبێت و هەر خۆشمان دیاری دەکەین.
ماڵپەڕی هاوکاری کوردانە بۆ تۆمارکردنی هاوکارییەکان بۆ زیانلێکەوتووانی لافاوەکەی چەمچەماڵ کاراکرا، سەرجەم داتاکانی بەخشەرەکان و هاووڵاتیان لە خۆدەگرێت.
ماڵپەڕی ' هاوکاری کوردانە - Hawkary Kurdana' ماڵپەڕێکی 24 سەعاتییە و سات بە ساتی هەر بڕە پارەیەک بۆ سەر هەژماری بانکیەکای 'کۆمسیۆنی دریاگوزاری و بوژانەوەی چەمچەماڵ؛ لەبانکی چەرموو هەروەها بانکی جیهان نوێ دەکرێتەوە.
عەتا محەمەد سەرۆکی کۆمسیۆنی فریاگوزاری و بوژانەوەی چەمچەماڵ رایگەیاند، ئەوان لە کۆمسیۆنەکە لە پێناو پەیڕەوکردنی ئەوپەڕی شەفافیەتدا سەرجەم داتا و زانیاریەکانمان دەخەنە بەردەست راگەیاندنەکان و دامەزراوە رەسمییەکان و خەڵکی کوردستان، تا هەمووان وەک چۆن بەشداربوون لە پشتیوانی زەرەرمەندانی لافاوەکە، بەهەمان شێوەش ببینن کە هاوکاریە داراییەکانیان چۆن تۆمار دەکرێت و چۆن خەرجیش دەکرێت بۆ خەڵکی چەمچەماڵ.
لەم لینکەوە دەتوانن ئاگاداری کۆکردنەوەی هاوکارییەکان و چۆنییەتی خەرجکردنی ببن...
بەپێی پێشبینییەکانی کەشناسی لە 48 سەعاتی داهاتوودا پلەکانی گەرما کەمێک بەرز دەبنەوە و خێرایی با لەسەرخۆ و مامناوەند دەبێت.
بەرێوبەرایەتی گشتی کەشناسی هەرێم بڵاوکردەووە، ئەمڕۆ ئاسمان بە گشتی لەنێوان ساماڵ و پەڵەهەور دەبێت لە هەندێک ناوچەش دەگۆڕێت بۆ نیمچەهەور.
ئاماژەی بەوەشکرد، خێرایی با لەسەرخۆ و مامناوەند دەبێت و 10-20 کم دەبێت لە سەعاتێکدا.
کەشناسی هەرێم راشیگەیاند، سبەینێ هەینی ئاسمان ساماڵ و پەڵە هەور دەبێت، هەروەها پلەکانی گەرما کەمێک بەرز دەبنەوە بە بەراورد بە تۆمارکراوەکانی دوێنێ .
بەرزترین پلەکانی گەرمای پێشبینیکراو بە پلەی سیلیزی
هەولێر : 16 پلەی سیلیزی
سلێمانی : 14 پلەی سیلیزی
دهۆک : 15 پلەی سیلیزی
زاخۆ : 17 پلەی سیلیزی
کەرکوک : 17 پلەی سیلیزی
هەڵەبجە : 15 پلەی سیلیزی
سۆران : 12 پلەی سیلیزی
گەرمیان : 18 پلەی سیلیزی
كۆنگرێسمانێكی ئەمریكا رایگەیاند، بە هاوكاری مارك ساڤایە جارێكی دیكە عیراق مەزن دەكەنەوە و ئازادی دەكەن.
جۆ ویڵسن ئەندامی كۆنگرێسی ئەمریكا كە سەر بە كۆمارییەكانە، لە ئێكسێكدا وێنەیەكی لەگەڵ مارك ساڤایا نێردەی تایبەتی ئەمەریكا بۆ عیراق، بڵاوكردۆتەوە و ئاشكرایكردوە، لە ئۆفیسەكەی خۆیدا كۆبوونەوەیەكی لەگەڵ مارك ساڤایا ئەنجامداوە بۆ تاوتوێكردنی رەوشی ئەو وڵاتە و ئاسۆی رۆڵی ئەمریكا لە قۆناغی داهاتوودا.
ویڵسن جەختی لەوەشكردەوە كە ساڤایا بە دروشمی "عیراق دووبارە مەزن دەكەینەوە و لە ئێران رزگاری دەكەین" دەستبەكارەكانی دەكەن وەك خۆی دەڵێت.
لای خۆشیەوە "مارك ساڤایا" لە پۆستێكدا نووسیویەتی كۆبوونەوەیەكی گەورەی لەگەڵ جۆ ویڵسن و تیمەكەی ئەنجامداوە، هەر وەك چۆن سەرۆكی ئەمریكا لە هەڵبژاردنەكاندا دەیوت ئەمریكا مەزن دەكەینەوە بە هەمانشێوە عیراق مەزن دەكەنەوە.
سەڕەڕای گەمارۆكانی ئەمریكا، ڤەنزوێلا جەخت لە بەردەوامی هەناردەكردنی نەوت دەكاتەوە و دەڵێت هەرەشەكانی ترەمپ ناتوانێت رایانبگرێت.
ئیڤان جیل،وەزیری دەرەوەی ڤەنزوێلا رایگەیاند ، كۆمپانیای نەوتی نیشتیمانی ، پێترۆلیۆس دی ڤەنزوێلا، بەردەوامە لە هەناردەكردنی نەوت وەك كاتی ئاسایی، جەختیشی لەوەش كردەوە ، تانكەرەكانی كۆمپانیاكە بە گەرەنتی ئاسایشی تەواوەوە دەڕۆن.
سوپای ڤەنزوێلاش بە دووپاتكردنەوەی هەڵوێستی رەسمی یەكگرتووی خۆی، رایگەیاند، هەڕەشەكانی ترەمپ ناتوانێت رایانبگرێت.
لەلایەكی ترەوە، ئەمڕۆ لە دەستپێكی ئاڵوگۆڕی بازرگانی لە لەندەن، نرخی نەوت رووی لە بەرزبوونەوە كردووە، ئەمەش دوای هەفتەیەك لە دەستبەسەرداگرتنی كەشتییە نەوت هەڵگرەكانی ڤەنزوێلا دێت لەلایەن هێزەكانی ئەمریكاوە.
سەرۆکی ئەمریکا دەڵێت: ئیدارەکەی لە ماوەی رابردوودا سەرکەوتنی گەورەی بەدەستهێناوە و توانیویەتی ئاشتی بۆ رۆژهەڵاتی ناوەڕاست بگەڕێنێتەوە.
دۆناڵد ترەمپ سەرۆکی ئەمریکا لە وتارێکدا رایگەیاند، ئیدارەکەی لەو ماوەی 11 مانگی رابردوودا سەرکەوتنی گەورەی بەدەستهێناوە، هەروەها توانیویەتی کۆتایی بە جەنگ لە غەززە بهێنێت و مەترسیی ئەتۆمیی ئێران بنبڕ بکات، دەشڵێت، بۆ یەکەمجار لە دوای سێ هەزار ساڵەوە ئاشتیی بۆ رۆژهەڵاتی ناوەڕاست بەدەستهێناوە.
وتیشی، کۆتایی بە هەشت جەنگ هێناوە لە ماوەی دە مانگدا و بارمتە ئیسرائیلییەکانی لە غەززە گەڕاندووەتەوە بە زیندوو و مردووەکانیشەوە.
ترەمپ ئەوەشی خستەڕوو، هێزی سەربازی بۆ وڵاتەکەی گەڕاندووەتەوە و ئێستا ئەوان بە جیاوازییەکی زۆرەوە بەهێزترین سوپایان هەیە لە جیهاندا.
لە بارەی ناوخۆی وڵاتەكەشیەوە، ترەمپ ئاشکرایکرد، یاسای بێ وێنەیان دەركرد بۆ پاراستنی سنوورەكانیان كە بەهۆیەوە لە مانگی رابردوو هیچ كۆچبەرێكی نایاسایی نەچووەتە ناو ئەمریكاوە، وتیشی ،واشنتۆنی پایتەخت لە جاران سەلامەتترە.
ئەنجومەنی پیرانی ئەمریكا بودجەی بەرگریی وڵاتەکەی بە بڕی 901 ملیار دۆلار پەسەند کرد و رەوانەی بەردەم دۆناڵد ترەمپ، سەرۆکی وڵاتەکەی کرد بۆ ئیمزاکردن؛ لەناو یاساکەدا بڕگەیەک جێگیرکراوە کە کۆتایی بە "دەسەڵاتی بەکارهێنانی هێز" دژی عیراق دەهێنێت.
ئەمڕۆ چوارشەممە، ئەنجومەنی پیران بە زۆرینەی 77 دەنگی بەڵێ بەرامبەر 20 دەنگی نەخێر، بودجەی ساڵانەی بەرگری (NDAA)ـی پەسەند کرد. یەکێک لە گرنگترین بڕگەکانی یاساکە، هەڵوەشاندنەوەی فەرمیی "رێگەپێدانی بەکارهێنانی هێزی سەربازی (AUMF)"ـە، کە لە ساڵانی 1991 و 2002 بۆ جەنگی کەنداو و پرۆسەی ئازادیی عیراق بە حکومەتی ئەمریكا درابوو.
وەزارەتی دەرەوەی عیراق لە راگەیەندراوێکدا پێشوازی لە بڕیارەکە کرد و بە "هەنگاوێکی مێژوویی" وەسفی کرد، ئاماژەی بەوەشکردووە: "ئەم بڕیارە خاڵێکی وەرچەرخانە لە سروشتی پەیوەندیی یاسایی نێوان هەردوو وڵات و چاوەڕوانین سەرۆک ترەمپ یاساکە ئیمزا بکات".
ئەنجومەنی پیرانی ئەمریکا بە زۆرینەی دەنگ پڕۆژەیاسای بودجەی بەرگریی پەسەند کرد، کە رێگە بە دۆناڵد ترەمپ دەدات سزاکانی "یاسای قەیسەر" لەسەر سوریا هەڵبوەشێنێتەوە، ئەمەش وەک هەنگاوێک بۆ بوژانەوەی ئابووری ئەو وڵاتە دوای ساڵێک لە رووخانی دەسەڵاتی بەشار ئەسەد.
لە دانیشتنەکەدا کە 77 ئەندام دەنگیان بە بەڵێ و 20 ئەندام دەنگیان بە نەخێر دا، پڕۆژەیاسای (NDAA) پەسەندکرا، کە تێیدا بڕگەیەک جێگیرکراوە بۆ کۆتاییهێنان بە کارکردن بە یاسای قەیسەر ساڵی 2019. ئێستا یاساکە رەوانەی نووسینگەی سەرۆک کراوە و ترەمپ 10 رۆژی لەبەردەمە بۆ ئیمزاکردنی.
لابردنی سزاکان دوای زنجیرەیەک گفتوگۆ و داواکاریی ئەحمەد شەرع، سەرۆکی نوێی سوریا دێت، کە مانگی رابردوو لە کۆشکی سپی لەگەڵ ترەمپ کۆبووەوە و جەختی کردەوە کە مانەوەی سزاکان رێگرە لەبەردەم پرۆسەی بوژانەوەی سوریا.
جێگەی سەرنجە، یاسای قەیسەر لە خولی یەکەمی سەرۆکایەتی ترەمپدا ئیمزا کرابوو بە مەبەستی سزادانی بەشار ئەسەد و هاوپەیمانەکانی (روسیا و ئێران)، بەڵام ئێستا ئیدارەی ترەمپ و کۆنگرێس گەیشتوونەتە ئەو بڕوایەی کە بۆ راکێشانی وەبەرهێنانی دەرەکی، پێویستە سزاکان بە یەکجاریی لاببرێن.
بەپێی یاسا نوێیەکە، هەڵوەشاندنەوەی سزاکان بەبێ مەرجی قورس دەبێت، بەڵام سەرۆکی ئەمریکا پابەند دەکرێت شەش مانگ جارێک راپۆرت بداتە کۆنگرێس سەبارەت بە بەرەوپێشچوونەکان لە دیمەشق، بەتایبەت لە پرسەکانی دەرکردنی شەڕڤانانی بیانی، پاراستنی مافی کەمینەکان و پەیوەندییەکان لەگەڵ ئیسرائیل.
بەڕێوەبەرایەتیی کەشناسی و بومەلەرزەزانی هەرێم هۆشداریدەدات لە هاتنی شەپۆلێکی سەرما و سۆڵە، کە دەبێتە هۆی دابەزینی بەرچاوی پلەکانی گەرما لە زۆربەی ناوچەکانی هەرێمی کوردستان.
بەپێی راگەیەندراوەکەی کەشناسی، بەهۆی کاریگەریی بەرزە پەستانی هەوای روسیا کە بارستە هەوایەکی وشک و ساردی لەگەڵدایە، پێشبینی دەکرێت نزمترین پلەی گەرما لە ئەمشەوەوە تاوەکو شەوی یەکشەممەی داهاتوو 21/12/2025 روو لە دابەزین بکات.
کەشناسی ئاماژەی بەوە کردووە، لە زۆربەی ناوچە شاخاوییەکان پلەکانی گەرما بۆ خوار سفری سیلیزی دادەبەزن. بەپێی خشتەی پێشبینییەکان، لە ناوچە شاخاوییە سنورییەکان پلەی گەرما دەگاتە 5 پلە خوار سفر و لە سەنتەری شاری سلێمانیش لە رۆژی یەکشەممەدا بۆ 3 پلە خوار سفر دادەبەزێت.
هەروەها لە ئیدارەی سەربەخۆی سۆران پلەی گەرما بۆ 1 پلە خوار سفر دادەبەزێت، لەکاتێکدا لە شارەکانی هەولێر، دهۆک و کەرکوک پلەکانی گەرما لە سەرووی سفرەوە دەمێننەوە، بەڵام هەست بە سەرما دەکرێت.
فەرماندەیی پۆلیسی پارێزگای کەرکوک رەتیدەکاتەوە لە کاتی گردبوونەوەیەکی هێمنانەدا لە ناوچەی "رەحیماوا"، هیچ هاووڵاتییەک دەستگیر کرابێت.
پۆلیسی کەرکوک لە رونکردنەوەیەکدا رایگەیاندووە، ئەو دەنگۆیانەی باس لە دەستگیرکردنی بەشداربووانی گردبوونەوەکە دەکەن، دوورن لە راستییەوە.
لە بەشێکی دیکەی رونکردنەوەکەدا، پۆلیس داوا لە دەزگاکانی راگەیاندن دەکات بە پیشەیی کار بکەن و هۆشداریدەدات لەوەی مافی یاسایی خۆیان بەکاردەهێنن بۆ تۆمارکردنی سکاڵا لە دژی هەر کەناڵێک کە راستییەکان دەشێوێنێت.
بەڕێوەبەرایەتیی گشتیی تەندروستیی سلێمانی رایگەیاند، لە نەخۆشخانەی کۆئەندامی هەرس و جگەری فێرکاری، تیمێکی پزیشکی توانیویانە بە سەرکەوتوویی پولێکی دۆمینە لە گەدەی مێرمنداڵێک دەربهێنن.
تەندروستیی سلێمانی لە راگەیەندراوێکدا ئاشکرایکردووە، رووداوەکە ئەمڕۆ چوارشەممە 17ی کانونی یەکەمی 2025 روویداوە و تەنە نامۆکە "پولێکی دۆمینە" بووە کە لەلایەن مێرمنداڵەکەوە قوتدرابوو. پرۆسەکە لەلایەن تیمێکی پێشکەوتووی هەناوبینی و بێهۆشکارییەوە ئەنجامدراوە.
ئاماژە بەوەشکراوە، هەرچەندە بەگشتی دەرهێنانەوەی تەنی نامۆ لە گەدە کارێکی زۆر دژوار نییە، بەڵام بەهۆی قەبارە و شێوە و پێکهاتەی پولە دۆمینەکە، کارەکە ئاسان نەبووە و تیمەکە ناچاربوون چەندین ئامێری تایبەت بەکاربهێنن تا سەرکەوتوو بوون لە دەرهێنانەوەی.
بەڕێوەبەرایەتی هاتوچۆی سلێمانی ئاگاداری هاووڵاتییان دەکاتەوە، بە مەبەستی کارئاسانی، بڕیاردراوە بە لێخۆشبوون لە سزای دواکەوتن بۆ ئەو شۆفێر و خاوەن ئۆتۆمبێلانەی لە وادەی دیاریکراودا مامەڵەکانیان ئەنجام نەداوە.
بەپێی راگەیەندراوەکەی هاتوچۆی سلێمانی، ئەو هاووڵاتییانەی بە هەر هۆکارێک بێت نەیانتوانیوە لە ماوەی 60 رۆژدا ئۆتۆمبێلەکانیان تۆمار بکەن یان رێکارەکانی گواستنەوەی خاوەندارێتی ئەنجام بدەن، تا رێکەوتی 31/12/2025 لە سزای دواکەوتن دەبەخشرێن.
کونسوڵخانەی گشتیی ئەمریکا لە هەرێمی کوردستان، پیرۆزبایی لە هاندەرانی یانەی وەرزشی زاخۆ دەکات بەبۆنەی بەدەستهێنانی خەڵاتی "باشترین هاندەر"ـی رێکخراوی فیفا بۆ ساڵی 2025.
کونسوڵخانەکە لە پەیامەکەیدا ئاماژەی بەوەشکردووە، جامی جیهانیی ساڵی 2026 گەورەترین پاڵەوانێتی دەبێت لە مێژووی فیفادا، کە تێیدا 48 هەڵبژاردە بەشداری دەکەن.
باس لەوەش کراوە، لە جامەکەدا 11 شاری ئەمریکا میوانداریی 78 یاری دەکەن و یاری کۆتایی لە یاریگای "مێت لایف" لە نیویۆرک بەڕێوەدەچێت.
بەپێی راگەیەندراوەکە، ئەو رووداوە مێژووییە هاوکات دەبێت لەگەڵ 250ـەمین ساڵیادی سەربەخۆیی ئەمریکا و دەرفەتێک دەبێت بۆ نیشاندانی توانای میوانداریی ئەو وڵاتە.