ستیڤ ویتکۆف، نوێنەری سەرۆکی ئەمریکا وردەکارییەکانی کۆبوونەوەی میامی ئاشکرا کرد، کە رۆژی هەینی بەڕێوەچوو، تێیدا نوێنەرانی ئەمریکا، میسر، قەتەر و تورکیا بەشداربوون، بۆ پێداچوونەوە بە جێبەجێکردنی قۆناغی یەکەمی رێککەوتنی ئاگربەست لە غەززە و بەهێزکردنی ئامادەکارییەکان بۆ قۆناغی دووەم.

ئەمڕۆ شەممە، نێردەی تایبەتی دۆناڵد ترەمپ بۆ رۆژهەڵاتی ناوەراست رایگەیاند، قۆناغی یەکەمی رێککەوتنی غەززە پێشکەوتنی بەرچاوی بەدەستهێناوە، لەوانە فراوانکردنی یارمەتییە مرۆییەکان، گەڕاندنەوەی تەرمی بارمتەکان و کشانەوەی بەشێکی سەربازی ئیسرائیل، لەگەڵ کەمبوونەوەی ئاستی دوژمنایەتییەکان.

ویتکۆف لە پەیامێکیدا، کە لە تۆری کۆمەڵایەتی ئێکس بڵاویکردوەتەوە رایگەیاندوە، لە کۆبونەوەکەدا لە میانیی گفتوگۆکان سەبارەت بە قۆناغی دووەم، بەشداربووان جەختیان لە گرنگی بەهێزکردنی دەزگایەکی حوکمڕانی لە غەززە کردەوە، کە لە ژێر دەسەڵاتی یەکگرتووی فەلەستینیدا کاردەکات، هاوکات پشتیوانی خۆیان بۆ دامەزراندنی و کاراکردنی "ئەنجومەنی ئاشتی" لە ئایندەیەکی نزیکدا دەربڕیوە. 

کە ئەنجومەنەکە وەک دەزگایەکی ئینتقالی کاردەکات، کە سەرپەرشتی رێڕەوی مەدەنی و ئەمنی و ئاوەدانکردنەوە دەکات.

لە کۆتایی دا ویتکۆف ئەوەشی خستوەتەڕووو، لە کۆبونەوەکەیاندا جگە لەوەی پێداچوونەوە کرا بۆ هەنگاوەکانی داهاتوودا قۆناغ بە قۆناغ، جەختیان لەسەر گرنگی رێکخستن و هەماهەنگی و میکانیزمی چاودێری کاریگەر کردەوەتەوە، بە هاوکاری لەگەڵ دامەزراوە ناوخۆییەکانی غەززە و هاوبەشە نێودەوڵەتییەکان بۆ چونە قۆناغی دووەمی رێککەوتنی ئاشتی لە غەززە.

پارێزگاری سلێمانی رایگەیاند، سەرەڕای ئەوەی هەموو رێکارێکی پێویستیی کارگێڕیی و ئارامیی و ئاسایش و خزمەتگوزاریی پێویست گیراونەتەبەر، بەڵام  بەهۆی کارەساتی لافاوەکەی چەمچەماڵ و روداوەکانی سنووری گەرمیان، بۆ سەری ساڵ هیچ ئاهەنگ و بۆنەیەک ساز ناکەن.

ئەمڕۆ شەممە، هەڤاڵ ئەبوبەکر پارێزگاری سلێمانی، راگەیەندراوێکی بڵاوکردوەتەوە  و تێیدا وێرای پیرۆزبایی سەری ساڵ رایگەیاندوە، بەهۆی ئەو کارەسات و روداوە  ناخۆشانەی لە سنوری قەزای چەمچەماڵ و ئیدارەی سەربەخۆیی گەرمیان رویانداوە  سەری ساڵ بۆنە و ئاهەنگی رەسمیان نابێت.

پارێزگاری سلێمانی ئاماژەی بەوەشکردوە، تەواوی رێکارە کارگێری و ئیداری و ئارامیەکانیان گرتوەتەبەر، بەڵام  لە پێناوی پشتیوانیی و دەربڕینی هاوخەمیی بۆ هەمووان، بۆ روداوەکانی لافاوەکەی چەمچەماڵ و ئەم دوایەی گەرمیان، کە بەهۆیانەوە زیانێکی گیانی زۆری لێکەوتوەتەوە ئەو بڕیارەیان داوە.

میدیایەکی ئەمریکی بڵاویکردوەتەوە، بەرپرسانی ئیسرائیل نیگەرانن، لەوەی ئێران بەرنامەی موشەکی بالیستیکی فراوانتر دەکات، دەیانەوێت لە کۆبونەوەی داهاتووی ناتانیاهۆ و ترەمپدا ئەو دۆسییەیە گفتوگۆ بکەن، کە دەبێتەهۆی دروستکردنی مەترسییەکی نوێ لە ناوچەکەدا و رەنگە ناتانیاهۆ پێشنیازی دووبارە هێرشکردنە سەر ئێران بخاتە بەردەم ترەمپ.

کەناڵی NBCـی ئەمریکی ئاشکرای کردوە، بەرپرسانی ئیسرائیل نیگەرانن لەوەی، ئێران بەرهەمهێنانی بەرنامەی موشەکی بالیستیکی فراوانتر دەکات، لە دوای ئەوەی  بەهۆی هێرشە سەربازییەکانی ئیسرائیلەوە لە سەرەتای ئەمساڵدا زیانیان پێگەیشت.

کەناڵە ئەمریکییەکە، ئەوەشی خستوەتەڕوو، بەهۆی هەوڵەکانی تاران بۆ خۆبەهێزکردنەوە لە روی سەربازییەوە بەرپرسانی ئیسرائیل  ئامادەکاری دەکەن بۆ ئەوەی دۆناڵد ترەمپ لەبارەی بژاردەکانی  دووبارە هێرشکردنە سەر تاران ئاگادار بکەنەوە.

بەرپرسانی ئیسرائیل نیگەرانن لەوەی ئێران لە هەوڵی چاکردنەوەی دامەزراوە ئەتۆمییەکانیدا، کە پیتاندنی یۆرانتۆمی تێدا ئەنجامدەدات و لەلایەن ئەمریکاوە کرانە ئامانج، هەروەها هەوڵەکانی ئێران بۆ دووبارە بنیاتنانەوەی ئەو دامەزراوانەی کە موشەکی بالیستیکی تێدا بەرهەمدەهێنن و چاککردنەوەی سیستەمی بەرگری ئاسمانی، کە زیانی پێگەیشتبوو.

ئەم کارانەی ئێران وایکردوە، ئیسرائیل ئەو هەنگاوانە بە مەترسیەکی نوێ بزانێت بۆسەر وڵاتەکەیە و بە گوێرەی ئەو سەرچاوانەی قسەیان بۆ کەناڵیNBC ئەمریکی کردوە، ئیسرائیل دەیەوێت دووبارە هێرش بکاتەوە سەر ئێران و بۆ ئو مەبەستەش ناتانیاهۆ ترەمپ ئاگاداردەکاتەوە.

بڕیارە لە کۆتایی ئەم مانگەدا دۆناڵد ترەمپ و بنیامین ناتانیاهۆ لە ویلایەتی فلۆریدا کۆببنەوە و سەرچاوەکان دەڵێن، چاوەڕوان دەکرێت ناتانیاهۆ ئەو دۆسیەیە بۆ ترەمپ بخاتەڕوو، کە فراوانکردنی بەرنامەی موشەکی بالیستی ئێران هەڕەشە دروست دەکات و رەنگە پێویسی بە کاردانەوەی خێرا بێت.

بارەگای مەکتەبی سیاسیی یەکێتیی نیشتمانیی کوردستان لە هەولێر سەبارەت بە دەنگۆی رفاندنی میران بەکر عەبدولرەحمان، پەیامێکی بڵاوکردووەتەوە و تێیداهاتووە، "لەژێر کاریگەری مادە کحولییەکاندابووە و سوکایەتی بە ئۆتۆمبێلێک کردووە".

مەکتەبی سیاسی یەکێتی لە هەولێر دەشڵێت: پاسەوانەکانی مەکتەبی سیاسی ئاگاداریان کردووە کە دووربکەوێتەوە، بەڵام میران بەکر محەمەد پەلاماریداون.

لە راگەیەنراوەکەی مەکتەبی سیاسیشدا هاتووە: دواتر میران بەکر داوای لێبوردنی لە پاسەوانەکان کردووە و بۆ هەموو قسەکانیشمان بەڵگەمان هەیە.

دیلان غەفور، کاندیدی دەرچوی یەکێتیی نیشتمانیی کوردستان بۆ ئەنجومەنی نوێنەرانی عیراق رایگەیاندوە، لەسەر داواکاری ئەو، سەرۆک وەزیرانی عیراق بڕیاریداوە بە پێدانی 100 لیتر نەوت بۆ دوو هەزار خێزانی زیانلێکەوتوانی چەمچەماڵ.

دیلان غەفور، لە راگەیەندراوێکدا کە لە واڵی خۆی لە فەیسبووک بڵاویکردوەتەوە، دەڵێت؛ وەک بەشێک لە ئەرکی سەرشانیان بۆ بەدەمەوەچوونی زیانلێکەوتوانی لافاوەکەی چەمچەماڵ، لە رۆژی روداوەکەوە لەگەڵ لایەنە پەیوەندیدارەکان لەسەرخەت بوون تا بتوانین خزمەتێک بەو خێزانانە بکەن، کە زیانیان بەرکەوتووە.

ناوبراو ئاماژەی بەوەشکردوە، بە خۆشحاڵییەوە هەوڵەکانیان بەئەنجام گەیشتوە و توانیویان رەزامەندی محەمەد شیاع سودانی، سەرۆک وەزیرانی عیراق وەربگرین بە پێدانی 100 لیتر نەوتی سپی بێبەرانبەر  بۆ دوو هەزار خێزانی سنوری قەزای چەمچەماڵ، کە بەهۆی لافاوەکەوە زیانیان بەرکەوتووە.

لەبارەی کاتی دابەشکردنی نەوتەکەشەوە، دیلان غەفور دەڵێت؛ لەگەڵ لایەنە پەیوەندیدارەکان لە پەیوەندیی بەردەوامدان تا بە زووترین کات  نەوتەکە بگەیەننە دەست ئیدارەی قەزاکە بە مەبەستی دابەشکردنی.

سەرۆکی ئۆکراین رایگەیاند، بە مەبەستی کۆتای هێنان بە شەڕ واشنتۆن پێشنازی نوێی کردوە بۆ ئەنجامدانی خولێکی تری گفتوگۆ لە نێوان وڵاتەکەی و روسیادا، سەرۆکی ئۆکراین راشیگەیانداوە ئەگەر ئاسایش گەرەنتی بکرێت، دەتوانن هەڵبژاردن  ئەنجام بدەن.

ئەمڕۆ شەممە، ڤۆلۆدیمیر زیلینسکی، سەرۆکی ئۆکراین رایگەیاند، ئەمریکا پێشنیازی کردووە لەسەر ئاستی راوێژکارانی ئاسایشی نیشتمانی دانوستان لەنێوان تیمەکانی ئۆکراین و روسیا لە میامی ئەنجام بدرێت، وتوشیەتی دڵنیا نییە، لە جددیەتی ئەو کۆبوونەوە پێشنیاز کراوە، بەڵام ئەگەر ببێتە هۆی ئاڵوگۆڕی دیلەکان یان رێگە خۆش بکات بۆ کۆبوونەوەی لوتکەی سەرکردەکان، ئەوا قبوڵ دەکەن.

ناوبراو ئاماژەی بەوەکردوە، بە گوێرە پێشنیازەکەی واشنتۆن، کۆبونەوەکە لە نێوان ئەمریکا و ئۆکراین و روسیا دەبێت و ئەو پێی وایە لۆژیکی دەبێت ئەگەر وڵاتە ئەوروپییەکانیش ئامادەیان هەبێت لە کۆبوەوەکەدا.

لەبارەی هەڵبژاردنیشەوە سەرۆکی ئۆکراین رایگەیاندوە، لەگەڵ لایەنی ئەمریکی باسیان لە پرسی دەستەبەرکردنی ئاسایشی هەڵبژاردنەکان کردوە، ئەوانیش دەزانن چۆن دەتوانن هاوکاریان بن و ئەگەر ئاسایش گەرەنتی بکرێت، دەتوانرێت هەڵبژاردن لە ئۆکراین ئەنجام بدرێت سەرەڕای ئەوەی لەگەڵ روسیادا لە جەنگدان.

سەرۆکی ئۆکراین ئەوەشی رونکردەوە، پوتن بڕیار نادات، کە چۆن هەڵبژاردن لە ئۆکراین بەڕێوەدەچێت، ئەگەر هەڵبژاردنیشیان ئەنجامدا ئەوا ئەو شوێنانە ناگرێتەوە، کە لە ئێستادا لەژێر دەسەڵاتی روسیادایە.

بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ محەمەد شیاع سودانی، سەرۆک وەزیرانی عیراق لە بەغداد کۆبووەوە.

لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق بەشداربوون، جەخت لە یەکخستنی هەوڵەکان بۆ پێکهێنانی حکومەتێکی بەهێز کرایەوە کە دیدگاکەی خزمەتکردنی خەڵک و بەهێزکردنی پایەکانی دەوڵەتداری بێت.

بافڵ جەلال تاڵەبانی داوای لە محەمەد شیاع سودانی کرد لە ناردنی موچە پەلە بکرێت و مافی موچەخۆرانی هەرێمی کوردستان بپارێزرێت. لای خۆیەوە، سەرۆک وەزیرانی عیراق پابەندبوونی بە رێککەوتنەکان دووپاتکردەوە و وتی، جەخت لە پاراستنی مافی موچەخۆرانی هەرێمی کوردستان دەکەینەوە.

تا ئێستا زیاتر لە 11 ملیار دینار خراوەتە سەر هەژماری بانکی کۆمسیۆنی فریاگوزاری و بوژاندنەوەی چەمچەماڵ، سەرۆکی کۆمسیۆنەکەش دەڵێت: لە رێگەی لیژنەیەکەوە هاوکارییەکان بەسەر زیانلێکەوتووان دابەشدەکرێت.

عەتا محەمەد سەرۆکی کۆمسیۆنی فریاگوزاری و بوژاندنەوەی چەمچەماڵ، لە کۆنفڕانسێکی رۆژنامەوانیدا رایگەیاند، لە عیراقدا هەر پرۆسەیەکی قەرەبووکردنەوە بەهۆی کارەساتی سروشتییەوە زیاتر لە ساڵێکی خایاندووە، بەڵام ئەوان لەلایەن کۆمسیۆنەکەیانەوە نەیان هێشتووە بگاتە 10 رۆژ قەرەبوکردنەوەکە دەستپیدەکات.

وتیشی، رۆژی دووشەمە دەست بە دابەشکردنی هاوکارییەکان دەکرێت و هاوکارییە مادییەکانیش لە رێگەی چەک بەسەر ئە ماڵانەدا دابەشدەکرێت کە زیانیان بەرکەوتووە، ئەمەش لەرێگەی لیژنەیەکەوە ئەنجامدەدرێت کە بە هاوبەشی لەگەڵ دەستەی دەستپاکی هەرێم پێکهێنراوە.

عەتا محەمەد ئەوەشی خستەڕوو، ئومێدەوارن هاوکارییەکان بەشی قەرەبووکردنەوەی هەموو زیانلیکەوتووان بکات، هەروەها چاوەڕوان دەکەن هاوکارییە مادییەکان زیاتر ببێت، وەک چۆن لە چەند رۆژی رابردوودا چەند لایەن و خێرخوازێک بەڵێنی ئەوەیان داوە کە هاوکاری مادی بخنەسەر هەژماری بانکی کۆمسیۆنەکە.

بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە رەیان کلدانی، ئەمینداری گشتیی بزووتنەوەی بابلیون کرد.

لە دیدارێکدا گفتوگۆ لەبارەی پێکهێنانی حکومەتی نوێی عیراق و رەخساندنی زەمینەی لەبار لەبەردەم لایەنە سیاسییەکان بۆ گەیشتن بە حکومەتێکی نیشتمانیی خزمەتگوزار کرا.

بافڵ جەلال تاڵەبانی پەرۆشانە جەختی لە سیاسەت و ستراتیژی یەکێتی کردەوە، بۆ گەیشتن بە حکومەتێکی بەهێز و کاریگەر کە خزمەتی خەڵک بکات بەبێ جیاوازی و ببێتە مایەی سەقامگیریی زیاتر.

وەزارەتی پێشمەرگە رونکردنەوەیەکی بڵاوکردەوە و تێیدا هاتووە، ئەو کارمەندەی وەزارەتەکەیان دوێنێ توشی روداوێکی نەخوازراو بوو، لیژنەیەکیان بۆ لێکۆڵینەوە لە روداوەکە پێکهێناوە.

وەزارەتی پێشمەرگە لە راگەیەنراوێکدا ئاماژە بەوەدەکات، دوێنێ میران بەکر عەبدلرەحمان، کارمەندی وەزارەتی پێشمەرگە توشی روداوێکی نەخوازراو بوو، دەستبەجێ وەزارەت لیژنەیەکی لێکۆڵینەوەی لەسەر روداوەکە پێکهێانەوە بۆ بەدواداچون لەسەر ئەم دۆسیەیە.

ئەوەشی خستەروو، ئەو کارمەندە ماوەی دوو ساڵە سکرتێری رۆژنامەوانی وەزیری پێشمەرگە نەماوە و تەنها کارمەندی وەزارەتەکەیە.

یەشار گولەر، وەزیری بەرگریی تورکیا رایگەیاند، ئیسرائیل و یۆنان فشارێکی زۆر لە ئەمریکا دەکەن بۆ ئەوەی رێگری بکات لەوەی فڕۆکەی جەنگیی جۆری "ئێف-35" بەدەست ئەنکەرە بگات.

گولەر لە لێدوانێکدا بۆ رۆژنامەی "ستار"ـی تورکی وتی: "بەدڵنیاییەوە هیچ کێشەیەکمان نییە لە پرسی وەرگرتنی فڕۆکەی ئێف-16، بەڵام ئەولەویەتی ئێمە فڕۆکەی ئێف-35ـە، ئاگاداریشین کە ئیسرائیل و یۆنان هەوڵ دەدەن رێگری لە رادەستکردنی ئەو فڕۆکانە بە تورکیا بکەن".

وەزیری بەرگریی تورکیا ئاماژەی بەوەشکرد، لە ئێستادا تیمێکی تایبەتمەندیان هەیە کە بەردەوام کار دەکەن بۆ لابردنی ئەو سزایانەی بەپێی یاسای "کاتسا"ی ئەمریکی بەسەریاندا سەپێنراوە، ئەوەش بەهۆی کڕینی سیستمی بەرگریی ئاسمانیی "ئێس-400"ـی روسییەوە.

گولەر وتی: "باوەڕمان وایە تورکیا و ئەمریکا دەتوانن بگەنە چارەسەرێکی هاوبەش بۆ ئەو کێشانە".

هاوپەیمانیی ئیسرائیل و یۆنان مەترسی نییە:

سەبارەت بە نزیکبوونەوەی سەربازیی نێوان ئیسرائیل، یۆنان و قوبرس، وەزیری بەرگریی تورکیا جەختی کردەوە کە ئەو رێککەوتنانە مەترسی نین بۆ سەر ئەنکەرە و ئەوانیش رێککەوتنیان لەگەڵ زۆر وڵات هەیە، بەڵام هۆشداریدا لەوەی "بەپێی زانیارییەکان یۆنان دەیەوێت سیستمی بەرگریی ئاسمانیی ئیسرائیلی لەو دورگانە جێگیر بکات کە دۆخی ناسەربازییان هەیە، ئەوەش پێچەوانەی یاسایە".

قەیرانی سەربازی لە یۆنان:

یەشار گولەر باسی لەوەشکرد، یۆنان بەهۆی ئەوەی ویست لەسەر پەیوەندیکردن بە سوپا و هێزی دەریاییەکەیەوە زۆر کەمە، پلانی داناوە تا ساڵی 2030 دەست بە سەربازکردنی ژنان بکات بۆ پڕکردنەوەی ئەو بۆشاییە.

جێی ئاماژەیە، کێشەکانی تورکیا و ئەمریکا لەسەر فڕۆکەی ئێف-35 دەگەڕێتەوە بۆ ساڵی 2017، کاتێک ئەنکەرە گرێبەستی کڕینی سیستمی "ئێس-400"ی لەگەڵ روسیا ئیمزا کرد و ساڵی 2019 وەریگرت، ئەوەش نیگەرانیی واشنتۆنی لێکەوتەوە و داوای دەکرد تورکیا لەبری ئەوە سیستمی پاتریۆتی ئەمریکی بەکاربهێنێت.

حەمدی شەنگالی، جێگری سەرۆکی کۆمپانیای بەبازاڕکردنی نەوتی عیراق (سۆمۆ) رایگەیاند، رێککەوتنی نێوان هەرێم و بەغدا تایبەت بە دۆسیەی نەوت بێ کێشەیە و وەک خۆی جێبەجێ دەکرێت.

حەمدی شەنگالی لە لێدوانێکی تایبەتدا بۆ کوردسات نیوز ئاماژەی بەوەکرد، هیچ گرفتێک لەبەردەم جێبەجێکردنی رێککەوتنی نەوتی نێوان هەولێر و بەغدا نییە و پرۆسەکە بەپێی ئەوەی بۆی دانراوە بەڕێوەدەچێت.

سەبارەت بە ئاستی هەناردەکردنیش، جێگری سەرۆکی سۆمۆ روونیکردەوە کە هەناردەکردنی نەوت بەردەوامە و لە ئێستادا هەوڵەکان بەو ئاڕاستەیەن رێژەی هەناردەکردنەکە زیاد بکرێت.

رائید سەربەرز عومەر، وتەبێژی پۆلیسی گەرمیان بە کوردسات نیوزی راگەیاند، لەسەر روداوەکەی دوێنێ پێنج کەس دەستگیرکراون.

وتەبێژی پۆلیسی گەرمیان روونیکردەوە، لەو پێنج کەسە؛ سێ کەسیان لەلایەن هێزەکانەوە دەستگیرکراون و دوو کەسەکەی دیکەشیان خۆیان رادەست کردووە.

جێگەی ئاماژە پێدانە، دوێنێ بەڕێوەبەرایەتى پۆلیسى گەرمیان لەڕاگەیێنراوێکدا لەبارەى روداوەکەوە رایگەیاند، لەسەر کێشەى زەوى و زار دوو بنەماڵە بووەتە شەڕیان و چوار کەس لەلایەک کوژراون و یەکێکی دیکەیان برینداربووە و شەش کەسى دیکەش لە بنەماڵەى بەرامبەر برینداربوون.

د. لەتیف رەشید، سەرۆک کۆماری عیراق لە رێوڕەسمی یادکردنەوەی بیست و سێیەمین ساڵیادی شەهیدبوونی ئایەتوڵڵا سەید محەمەد باقر ئەلحەکیم و یادکردنەوەی رۆژی شەهیدانی عیراق رایگەیاند، وڵات قۆناغە سەختەکانی تێپەڕاندووە و لە ئێستادا ئەرکە لەسەر هەمووان پابەندی کاتە دەستورییەکان بن بۆ پێکهێنانی حکومەتێکی گشتگیر.

سەرۆک کۆمار لە پەیامێکدا رایگەیاند: "یادی ئازاربەخشی شەهیدبوونی ئایەتوڵڵا محەمەد باقر حەکیم دەکەینەوە، کە سیمبولێکی گەورەی ئاینی و نیشتمانی بوو لە خەباتکردن دژی دیکتاتۆرییەت". ئاماژەی بەوەشکرد، گواستنەوەی چیرۆکی پاڵەوانێتی و قوربانییەکانی شەهیدان و زانایان بۆ نەوەی داهاتوو، بەرپرسیارێتییەکی نیشتمانی و ئەخلاقییە.

سەبارەت بە دۆخی سیاسی و ئەمنی، سەرۆک کۆمار جەختی کردەوە کە عیراق دوای ساڵانێک لە توندوتیژی و تیرۆر و پێشتریش سەردەمی دیکتاتۆری، قۆناغە سەختەکانی تێپەڕاندووە و گەیشتووەتە دۆخی سەقامگیری و ئارامی، بۆیە پێویستە هەمووان کار بۆ پاراستنی ئەو دەستکەوتە بکەن.

لە بەشێکی دیکەی پەیامەکەیدا د.لەتیف رەشید وتی: "گەلەکەمان هەڵبژاردنێکی پەرلەمانیی سەرکەوتووی ئەنجامدا و پابەندبوونی خۆیان بە دیموکراسییەوە دووپاتکردەوە، ئێستاش لەبەردەم قۆناغێکی یەکلاکەرەوەداین بۆ پێکهێنانی دەسەڵاتی یاسادانان و جێبەجێکردن".

سەرۆک کۆمار داواشی کرد هەمووان پابەندی کاتە دەستورییەکان بن و هەوڵەکان یەکبخەن، تاوەکو حکومەتێک پێکبهێندرێت نوێنەرایەتی سەرجەم عیراقییەکان بکات، چونکە چەسپاندنی پرۆسەی دیموکراسی ئەرکێکی نیشتمانییە.