رۆژنامەیەكی توركی لە ڕاپۆرتێكدا ئاشكرای كردووە كە نزیكەی ٪٨٥ی قۆناغەكانی پڕۆسەی ئاشتی كۆتایی هاتووە.

رۆژنامەی حوڕیەتی توركی  بڵاویكردەوە، یاساكانی تایبەت بە پڕۆسەی چارەسەری پێش پشووی پەرلەمان پەسەند دەكرێن.

بەپێی ئەو زانیارییانەی لەلایەن سەرچاوە ئاگادارەكانەوە بەو رۆژنامە توركییە دراون چاوەڕوان دەكرێت دوای دەرچوونی بەیاننامەی رەسمی لە ئیمراڵییەوە، قۆناغی چەكدانانی پەكەكە خێرا ببێت دواتریش لەسەر بنەمای راپۆرتی دەزگا ئەمنی و هەواڵگرییەكانی توركیا ، یاسایەكی كاتی كە ماوەكەی نێوان ٦ بۆ ٨ مانگ دەبێت بۆ چارەسەركردنی دۆخی ئەندامانی پارتەكە دەربچێت.

ئەو رۆژنامەیە ئاشكراشیكردوە،  لە قۆناغی كۆتاییدا ، پەرلەمانی توركیا  یاساكانی پەیوەست بە قۆناغی نوێی دوای چەكدانان پەسند دەكات، ئەمەش وەك هەنگاوێكی یاسایی بۆ جێگیركردنی پڕۆسەی ئاشتی و گواستنەوەی ململانێكان بۆ سەر مێزی گفتوگۆی سیاسی.

جەی دی ڤانس، جێگری سەرۆکی ئەمریکا جەختی لەسەر بەدەستهێنانی پێشکەوتنی بنەڕەتی لە کۆمەڵێک دۆسیەی هەرێمایەتی و نێودەوڵەتیدا کردەوە لە میانی دانوستانە بەردەوامەکانی شاری "بێرگنشتۆک"دا، ئاماژەی بەوەش کرد کە ئیدارەی ئەمریکا کار بۆ دارشتنی بنەمایەکی پتەو دەکات بە مەبەستی گەیشتن بە ڕێککەوتنی کۆتایی و چارەسەری هەمیشەیی.

سەبارەت بە دۆسیەی ئەتۆمی، ڤانس پێشکەوتنی دانوستانەکانی راگەیاند و رونی کردەوە کە گفتوگۆ تەکنیکییەکان لە ماوەی هەفتەکەدا بەردەوام دەبن، و گفتوگۆکان لەگەڵ پشکێنەرانی ئاژانسی نێودەوڵەتیی وزەی ئەتۆمی لە ئەمڕۆوە لە "بێرگنشتۆک" دەستیان پێکردووە.

هەروەها ڕەزامەندیی لایەنی ئێرانی بۆ بانگهێشتکردنی پشکێنەرە نێودەوڵەتییەکان بۆ وڵاتەکەی بە "هەنگاوێکی زۆر گرنگ" وەسف کرد.

لە چوارچێوەی ئاسایشی وزە و دەریاوانیدا، جێگری سەرۆکی ئەمریکا دووپاتی کردەوە کە ئیدارەی وڵاتەکەی میکانیزمێکی داناوە بە ئامانجی کراوە هێشتنەوەی گەرووی هورمز، وێڕای میکانیزمێک بۆ رێگریگرتن لە پەرەسەندنی گرژییەکان و تەقەکردن.

 ڤانس ئەوەشی خستەڕوو کە کارەکان بەردەوامن بۆ داڕشتنی میکانیزمێکی پسپۆڕانە بە مەبەستی پاککردنەوەی گەرووەکە لە مین.

سەبارەت بە دۆسیەی لوبنانیش، ڤانس ئاشکرای کرد کە میکانیزمێک بۆ رێگریکردن لە پێکدادان و کەمکردنەوەی ئاڵۆزییەکان لە لوبنان داندراوە.

جەختیشی کردەوە کە ئیسرائیل مافی خۆپاراستنی هەیە، بەڵام بەپێی میکانیزمێک کە گەرەنتی ئەوە بکات بارودۆخەکە لە کۆنترۆڵ دەرنەچێت، هاوکات جەختی لەسەر هەوڵەکانی واشنتۆن کردەوە بۆ پاراستنی ئاسایشی ئیسرائیل و سەروەریی لوبنان لە یەک کاتدا، ڤانس داواشی لە لایەنی ئێرانی کرد کە پێویستە "حیزبوڵا کۆنترۆڵ بکات".

ڤانس لێدوانەکانی کۆتایی پێهێنا بە ئاماژەکردن بەوەی کە لە دۆسیەی لوبناندا، لە میانی دانوستانەکانی "بێرگنشتۆک"دا، پێشکەوتنێکی بەرچاو بەراورد بە 24 سەعاتی رابردوو بەدەست هاتووە، جەختیشی لەسەر بەردەوامیی گفتوگۆکان کردەوە سەرەڕای هەبوونی هەندێک گڵەیی، ئاماژەی بەوەش کرد کە لە ئێستادا ئیدارەی ئەمریکا سەرنجی لەسەر ئاهەنگگێڕانە بەبۆنەی ئەو پێشکەوتنانەی بەدەست هاتوون، لەگەڵ دانپێدانان بەوەی کە هێشتا کارێکی زۆر ماوە بکرێت بۆ گەیشتن بە ڕێککەوتنی کۆتایی و چارەسەری هەمیشەیی.

قوباد تاڵەبانی، جێگری سەرۆک وەزیران سەردانی بەڕێوەبەرایەتیی ژینگەی سلێمانی کرد و لەگەڵ بەڕێوەبەر و بەرپرسانی بەڕێوەبەرایەتییەکە کۆبووەوە.

لە سەرەتای کۆبوونەوەکەدا کە رۆژی دووشەمە (22/6/2026) بەڕێوەچوو، قوباد تاڵەبانی دەستخۆشی کرد لە بەڕێوەبەران و کارمەندانی بەڕێوەبەرایەتییەکە کە بە شێوەیەکی رێکوپێک کاروباری هاووڵاتییان جێبەجێ دەکەن و داوای لێکردن بۆ لەمەودواش هەوڵ بدەن ئاسانکاری زیاتر بکەن بۆ راییکردنی مامەڵە و کاروباری هاووڵاتییان.

لە تەوەری سەرەکی کۆبوونەوەکەدا باس لە کێشەی تانجەرۆ کرا، قوباد تاڵەبانی لەمبارەیەوە رایگەیاند: کێشەی تانجەڕۆ کارەساتێکی ژینگەییە نەک تەنها بۆ سلێمانی بەڵکو بۆ هەموو عیراق، چونکە لە رێگەی پیسبوونی ئاوی رووبارەکانەوە زیانی تەندروستی بۆ دانیشتووانی زۆرێک لە ناوچەکانی دیکەی عیراقیش هەیە، هەربۆیە پرسێکی نیشتمانییە و دەبێت حکومەتی عیراق بەشداربێت لە چارەسەرکردنی ئەم کێشەیەدا.

لەم چوارچێوەیەدا جێگری سەرۆک وەزیران ئاماژەی بەوەدا، لە ماوەیەکی نزیکدا بۆ چارەسەرکردنی ریشەیی ئەم کێشەیە لەگەڵ بەرپرسانی باڵای عیراق گفتوگۆ دەکات و هەوڵ دەدرێت بودجەی پێویستی بۆ دابین بکرێت.

لە بەشێکی دیکەی کۆبوونەوەکەدا گفتوگۆکرا لەبارەی چارەسەرە خێرا و بەپەلەکان. لەمبارەیەوە بڕیاردرا لەسەر پێکهێنانی لیژنەیەکی تایبەتمەند لە لایەنە پەیوەندیدارەکانی پارێزگای سلێمانی و لیژنەکەش راسپێردرا لە ماوەیەکی دیاریکراودا هەندێک لە چارەسەرە خێراکان بخەنە بواری جێبەجێکردنەوە.

وەزارەتی بازرگانیی عیراق، ئەمڕۆ دووشەممە، رایگەیاند کە خزمەتگوزاریی جیاکردنەوەی خێزانەکان لە لقی بەشەخۆراکی پارێزگاکانی (نەینەوا، کەرکووک، سلێمانی، هەولێر، هەڵەبجە، بەسڕە، زیقار، میسان، دیوانییە، موسەنا، سەڵاحەدین، ئەنبار، بەلەد، کەربەلای پیرۆز، و نەجەفی ئەشرەف) لە رێگەی بەرنامەی ئەلیکترۆنیی کارتی بەشەخۆراکەوە کارا کراوە.

لە بەیاننامەیەکی نووسینگەی راگەیاندنی وەزارەتەکەدا، لە سەر زاری بەڕێز تاڵیب حەسەن نیعنەع، بەڕێوەبەری گشتیی فەرمانگەی پلان دانان و بەدواداچوون هاتووە، کە: ئەم هەنگاوە لە چوارچێوەی هەوڵەکانی وەزارەتدا دێت بۆ پەرەپێدانی خزمەتگوزارییەکانی بەشەخۆراک و ئاسانکارییکردن لە رێکارەکان بۆ هاووڵاتییان، بە بەکارهێنانی سیستمە ئەلیکترۆنییە هاوچەرخەکان.

بەیاننامەکە ئاماژەی بەوەش کردووە، کە پێشتر ئەم خزمەتگوزارییە لە سەرجەم لقەکانی بەغدا و لقەکانی بەشەخۆراکی پارێزگاکانی (واست، دهۆک، بابل، و دیالە) کارا کرابوو، بەمەش لە ئێستادا خزمەتگوزارییەکە بۆ سەرجەم هاووڵاتییان لە تەواوی لقەکانی بەشەخۆراکی وڵاتدا بەردەستە.

کییەر ستارمەر سەرۆک وەزیرانی بەڕیتانیا لە کۆنفرانسێکی رۆژنامەوانیدا رایگەیاند، دەستلەکارکێشاوەنەوەی خۆی رادەستی پادشای وڵاتەکەی کردووە.

وتیشی، پێشتر پارتی کرێکارانی بەریتانیا لە رەوشێکی خراپدا بووە و لە سەردەمی ئەودا حیزبەکە بەرەوپێشچوونێکی بەرچاوی بەخۆیەوەبینیوە.

ئاماژەی بەوەشدا، ئابوریی بەریتانیا لە کابینەی پێش ئەودا ئابورییەکی داڕوخاو بووە، بەڵام خۆی کاری لەپێشینەی چاککردن و باشترکردنی ئەو ئابورییە داڕوخاوە بووە.

سیناتۆری دیاری كۆمارییەكان پلانێكی ئەمریكای ئاشكرا كرد و رایگەیاند، واشنتۆن ئامادەیە بە هێزی سەربازی دەست بەسەر گەروی هورمزدا بگرێت ئەگەر تاران ملكەچی مەرجەكانی رێككەوتنەكە نەبێت.

لیندسی گراهام، سیناتۆری كۆمارییەكان لە چاوپێكەوتنێكدا لەگەڵ ئاژانسی سی بی ئێسی ئەمریكی رایگەیاند، كە رۆژی هەینی رابردوو بۆ ماوەی چوار سەعات و نیو لەگەڵ دۆناڵد ترەمپ كۆبووەتەوە و تاوتوێی ئاییندەی دانوستانەكانیان لەگەڵ ئێران كردووە و ئاشكرای كرد، ترەمپ بڕیاری داوە كە ئەگەر رێككەوتنی ئێستا شكست بهێنێت، ئەوا ئەمریكا بە هێزی سەربازی گەروی هورمز كۆنتڕۆڵ دەكات.

ئاماژەی بەوەشكرد، واشنتۆن لەو بارودۆخەدا باج بەسەر هەموو ئەو كەشتییانەدا دەسەپێنێت كە بە گەرووەكەدا تێپەڕ دەبن تاوەكو تێچووی ئۆپراسیۆنە سەربازییەكە دابین بكات.

هۆشدارییەكی توندیشی ئاراستەی تاران كرد و وتی، ئەگەر ئێران بیەوێت كێبڕكێی ئەمریكا بكات لەسەر كۆنتڕۆڵكردنی گەروی هورمز، ئەوا وێران دەكرێن.

دوای 18 سەعات لە گفتوگۆ و دانوستان، وەفدی ئێران لە سویسراوە دەگەڕێنەوە تاران. 

ئاژانسی "ئێرنا"ی رەسمی ئێران بڵاویكردەوە، ئەو وەفدەی ئێران كە بۆ گفتوگۆ و دانوستان لە سویسرا بوون، بەیانی ئەمڕۆ ئەو باڵەخانەیەی سویسرایان بەجێهێشتووە كە گفتوگۆكانی تێدا ئەنجامدەدرا و دەگەڕێنەوە تاران.

راشیگەیاند، وەفدەكە بە سەرۆكایەتی محەمەد باقر قالیباف سەرۆكی ئەنجومەنی شورا بووە و عەباس عراقچی وەزیری دەرەوەی ئێرانی تێدا بووە و دوای 18 سەعات لە دانوستانی چڕ سویسرایان بەجێهێشتووە. 

ئاژانسەكە ئاماژەی بەوەشداوە، دانوستانە تەكنیكییەكان بە درێژایی هەفتە لە سویسرا بەردەوام دەبن.

 

ئیسماعیل بەقایی، وتەبێژی وەزارەتی دەرەوەی ئێران،  ئەمڕۆ دووشەممە، رایگەیاند کە میکانیزمێکی نوێ بە بەشداریی نێوەندگیرەکان بۆ سەرپەرشتیکردنی کۆتاییهێنان بە جەنگ لە لوبنان دامەزراوە.

بەقایی لە لێدوانێکدا وتی: میکانیزمێکی نوێ بە بەشداریی نێوەندگیرەکان بۆ چاودێریکردنی کۆتاییهێنان بە جەنگی لوبنان پێکهێنراوە، ئاماژەی بەوەش کرد کە: پێشکەوتنی باشمان بەدەستهێناوە لە پرسی دەرکردنی مۆڵەت بۆ فرۆشتنی نەوت و ئازادکردنی داراییە بلۆککراوەکان.

ناوبراو لە درێژەی قسەکانیدا وتی: لە سویسرا لەسەر هەنگاوی گرنگ بۆ دەستپێکردنی دانوستانەکانی گەیشتن بە رێککەوتنی کۆتایی رێککەوتووین، وتیشی: "پێویستە رێگە بە هەناردەکردنی نەوت و ئازادکردنی داراییە بلۆککراوەکانمان بدرێت بۆ ئەوەی بچینە ناو دانوستانەکانی رێککەوتنی کۆتاییەوە.

لەکۆتاییدا ئاماژەی بەوە کرد کە: کاری تیمەکانی دانوستان لەم قۆناغەدا کۆتایی هاتووە، بەڵام تیمە تەکنیکییەکان بەردەوام دەبن لە کارەکانیان.

لە پارێزگای هەولێر دەستبەسەر بڕی 30 ملیار دیناری بریكاری وەزارەتی نەوتی عیراقدا گیرا.

میدیاكانی عیراق بڵاویانكردەوە، لەناو باخێكدا لە پارێزگای هەولێر دەستبەسەر بری 30 ملیار دینارد گیراوە كە خاوەندارێتییەكەی بۆ عەدنان جومەیلی بریكاری وەزارەتی نەوتی عیراق دەگەڕێـتەوە .

 بەپێی ئەو تۆمارە ڤیدیۆیانەی كە میدیا و تۆڕە كۆمەڵایەتیەكانی عیراق بڵاویانكردوەتەوە، ئەو بڕە پارەیە لەناوچەند كارتۆنێكدا هەڵگیراوە و لە شوێنێكی نهێنیدا لەناو باخێك لەپارێزگای هەولێر شاردرابوەوە.

كەشناسی عیراق پێشبینی دەكات سبەینێ پلەكانی گەرما لە پێنج پارێزگای وڵاتەكە بگاتە 50 پلەی سیلیزی. 

دەستەی كەشناسی عیراق بڵاویكردەوە، سبەینێ كەشوهەوا لە زۆربەی ناوچەكانی وڵاتەكە هەتاو دەبێت و پلەكانی گەرما چەند پلەیەك لە رۆژانی رابردوو بەرزتر دەبن و لە نێوان 41 بۆ 50 پلەی سیلیزی دەبن، بەشێوەیەك پێشبینی دەكرێت لە پارێزگاكانی بابل و میسان و زیقار و موسەنا و بەسڕە پلەكانی گەرما 50 پلەی سیلیزی بن. 

بەپێی پێشبینییەكانی كەشناسی عیراق بۆ رۆژانی چوارشەممە تا هەینی، پلەكانی گەرما بە بەرزی دەمێننەوە و خێرایی با لە بەیانیاندا زیاد دەكات و لە هەندێك ناوچەش خۆڵبارین دەبێت.

 

ئەحمەد شەرع، سەرۆکی سوریا، رۆژی یەکشەممە، کۆمێنتارێکی لەسەر لێدوانەکانی دۆناڵد ترەمپ، سەرۆکی ئەمریکا دا سەبارەت بە سپاردنی دۆسیەی حیزبوڵا بە ناوبراو.

پێشتر لە هەمان رۆژدا، ترەمپ لە لێدوانێکی رۆژنامەوانیدا رایگەیاندبوو کە نزیکبووەتەوە لەوەی دۆسیەی حیزبوڵای لوبنانی رادەستی سوریا بکات و دەورێکی گەورەتر بە (ئەحمەد شەرع) ببەخشێت لە مامەڵەکردن لەگەڵ ئەو حیزبەدا.

شەرع لە چاوپێکەوتنێکی رۆژنامەوانیدا رایگەیاند: هەندێک لە لایەنە لوبنانییەکان هێشتا بە دیلی رابردوو ماونەتەوە و بە هەمان هاوکێشەکانی پێشوو بیر دەکەنەوە، سەرەڕای ئەوەی لوبنان رووبەڕووی شەڕێکی زۆر گەورە بووەتەوە، ئاماژەی بەوەش کرد کە قەیرانی لوبنان گەورەیە و لە چارەسەرە سیاسییەکاندا بنبەستێک هەیە، سوریاش دیدگایەکی جیاواز بۆ چارەسەر دەخاتە روو، بەڵام لە ئێستادا گرنگترین شت راگرتنی شەڕ و بۆردومانەکانە.

ناوبراو ئاماژەی بەوەش کرد، ئەو دیدگایەی سوریا بۆ چارەسەر کە لەگەڵ ویلایەتە یەکگرتووەکانی ئەمریکا تاوتوێ کراوە، لەسەر بنەمای راگرتنی شەڕ و چارەسەرکردنی شوێنەوارە نەرێنییەکانی لەسەر لوبنان و سوریا بنیات نراوە، لەگەڵ بونی چارەسەری ئابوری، سیاسی و کۆمەڵایەتی جیاواز، وتیشی: هەردوو گەلی سوریا و لوبنان بەدەست رژێمی پێشووەوە ناڵاندوویانە.

سەرۆکی سوریا زانیاری زیاتری خستەڕوو و ایگەیاند کە پێشنیارێکی جیاوازیش لەگەڵ سەرۆکی فەرەنسا بۆ راگرتنی شەڕ لە لوبنان خراوەتە روو، وتیشی کە لایەنی بەرامبەر بێزاری خۆی لەوەی ئێستا لە لوبنان روودەدات دەربڕیوە، بەڵام لێدوانەکانی بە هەڵە تێگەیشتنی بۆ کراوە.

شەرع هۆشداری دا کە شەڕی لوبنان کاریگەری گەورەی لەسەر سوریا دەبێت، ئاماژەی بەوەش کرد کە لوبنان بەدەست بێباکی ئەو وڵاتانەوە دەناڵێنێت کە پێشتر هاوپەیمانی بوون.

لە کۆتاییدا جەختی کردەوە کە دیدگای سوریا لەسەر بنەمای سەرلەنوێ پشتگیریکردنی دەوڵەتی لوبنان و بەهێزکردنی دامەزراوەکانی، و گەڕان بەدوای چارەسەرێکدایە کە هەمووان باوەڕیان پێی هەبێت، شەرع پێداگری لەوەش کرد کە: دەبێت حیزبوڵا شوێنێکی بۆ خۆی لە ناوخۆی لوبناندا بدۆزێتەوە و پێویستە بەرژەوەندییەکانی لوبنان لە سەرووی هەر بەرژەوەندییەکی دیکەوە بن.

بەهۆی تەقینەوەیەك لە ناوچەیەكی پیشەسازی لە قەتەر، 54 كەس برینداربوون و 18 كەسیش بێسەروشوێن بوون. 

وەزارەتی ناوخۆی قەتەر بڵاویكردەوە، تەقینەوەكە لە كارگەیەكی پیشەسازی روویداوە، كە دەكەوێتە ناوچەی رەئس لەفانی پیشەسازی و بەهۆیەوە 54 كەس برینداربوون و 18 كەسی تریش بێسەروشوێنن. 

هەروەها تیمەكانی گەڕان و بەدواداچوونی وڵاتەكە بەدوای ئەو كەسانەدا دەگەڕێن كە لە دوای تەقینەوەكەوە چارەنووسیان نادیارە. 

وەزارەتی ناوخۆی قەتەر هۆكاری تەقینەوەكە بۆ رووداوێكی تەكنیكی گەراندوەتەوە وئاشكرایكردووە لەكاتی كاركردنی كارگەكەدا هەڵەیەكی تەكنیكی روویداوە و ئەو رووداوەی لێكەوتووەتەوە، بەڵام هیچ دزەپێكردنێك رووینەداوە كە مەترسی لەسەر سەلامەتی كەسەكان دروست بكات.

 

عەباس عراقچی، وەزیری دەرەوەی ئێران، رۆژی دووشەممە، رایگەیاند کە دانوستانەکان لەگەڵ ویلایەتە یەکگرتووەکانی ئەمریکا، بە نێوەندگیریی پاکستان و قەتەر، "پێشکەوتنی گەورە"یان بەخۆوە بینیوە.

عراقچی لە پۆستێکدا لە تۆڕی کۆمەڵایەتیی ئیکس نووسیویەتی: نێوەندگیریی بەردەوام و بێوچانی پاکستان و قەتەر پێشکەوتنی گەورەی بۆ کۆتاییهێنان بە جەنگ لە لوبنان بەدەستهێناوە.

ناوبراو ئاماژەی بەوەش کردووە کە هەناردەکردنی نەوت و پێترۆکیمیاوی لێخۆشبوونی بۆ کراوە، گەمارۆکانیش هەڵگیراون، هاوکات بەشێک لە داراییە بلۆککراوەکانی ئێران ئازاد کراون، وێڕای دەستپێکردنی پلانێکی گەورە بۆ ئاوەدانکردنەوە و گەشەپێدانی ئێران.

پرۆسەی دانوستانە راستەوخۆکانی نێوان ئەمریکا و ئێران لە ناوچەی "بۆرگنشتاک" لە سویسرا رووبەڕووی بەربەست بووەوە؛ دوای تێپەڕبوونی تەنها 80 خولەک بەسەر دەستپێکردنیاندا، دانوستانەکان بە کاتی راگیران و وەفدی ئێرانی هۆڵی کۆبوونەوەکانی جێهێشت.

ئاژانسەکانی هەواڵ ئاشکرایان کردووە، کشانەوەی وەفدەکەی تاران وەک ناڕەزایەتییەک بووە بەرانبەر لێدوان و هەڕەشە نوێیەکانی دۆناڵد ترەمپ، کە تێیدا رایگەیاندبوو ئەگەر دانوستانەکان شکست بهێنن ئێران وێران دەکات و کۆنترۆڵی گەروی هورمز دەکەن، هاوکات داوای راگرتنی پشتگیرییەکانی تارانی کردبوو بۆ گروپەکانی سەر بەو وڵاتە لە لوبنان.

وەفدی ئێران ئەم هەڕەشەیەی ترەمپیان لەسەر گەروی هورمز وەک پێشێلکردنی یاداشتی لێکتێگەیشتنی نێوانیان ناوبردووە، بەڵام لە ئێستادا لایەنە ناوەندگیرەکان هاتوونەتە سەر هێڵ بۆ رێگریکردن لە هەرەسھێنانی تەواوەتی پرۆسەکە.

ئاژانسەکانی هەواڵ ئەوەشیان خستوەتەڕوو، سەرەڕای ئەم ئاڵۆزییانە، وەفدی دانوستانکاری ئێران چەند پێشھاتێکی گرنگیان ئاشکرا کردووە.... 

یەکەم، پرسی نەوت و سزاکان؛ وەفدی ئێرانی توانیویەتی رەشنووسێک تایبەت بە لێخۆشبوونی سزاکانی سەر کەرتی نەوتی ئێران ئامادە بکات، کە بڕیارە لە ماوەیەکی نزیکدا بڵاوبکرێتەوە.

دووەم،داراییە بلۆککراوەکان؛ بە پشتبەستن بە بەشداری وەفدی قەتەری، رێکاری جێبەجێکردن بۆ ئازادکردنی بەشێک لە پارە بلۆککراوەکانی ئێران گیراوەتەبەر.

سێهەم، دۆسیەی لوبنان، وەفدەکەی تاران هێڵی سوری بۆ بەردەوامی گفتوگۆکان داناوە و رایگەیاندووە، ئەگەر شەڕ لە لوبنان کۆتایی پێنەیەت، ئەوا ئامادە نین لەسەر هیچ دۆسیەیەکی دیکە دانوستان بکەن.

ئەم راگرتنە کاتییە دوای ئەوە دێت کە میدیاکانی ئێران کۆتاییهاتنی گەڕی یەکەمی دانیشتنەکەیان راگەیاندبوو و وەفدەکە خەریکی ڕاوێژی ناوخۆیی بوون بۆ دەستپێکردنی گەڕی دووەم، بەڵام بەهۆی توندبوونی لێدوانەکانەوە پرۆسەکە بە کاتی پەکخرا.

لە کاتێکدا گەڕی یەکەمی دانوستانە راستەوخۆکانی نێوان تاران و واشنتۆن لە سویسرا دەستیپێکردووە، دۆناڵد ترەمپ هۆشدارییەکی توند دەداتە لێپرسراوانی ئێران و رایدەگەیەنێت، ئەگەر نەگەنە رێککەوتن وڵاتەکەیان وێران دەکات، لە بەرانبەریشدا محەمەد باقر قالیباف دەڵێت؛ هێزە چەکدارەکانیان لە ئامادەباشی تەواودان بۆ وەڵامدانەوە.

محەمەد باقر قالیباف، سەرۆکی پەرلەمانی ئێران وەڵامی لێدوانەکانی دۆناڵد ترەمپی دایەوە و رایگەیاند: "ئەوان بیر لەوە ناکەنەوە کە ئەگەر هەڕەشەکانیان پێشتر ئەنجامێکی هەبووایە، ئەمڕۆ نەدەگەیشتنە ئەم رەوشی بێئومێدییە.

دەشڵێت، هەڕەشەی ئەمریکییەکان هیچ بەهایەکیان نییە.

سەرۆکی پەرلەمانی ئێران هۆشداری توندی دایە لێپرسراوانی واشنتۆن و وتی: "باشترە وریای لێدوان و لێکدانەوەکانی خۆیان بن، چونکە هێزە چەکدارەکانمان لە تەواوی ئامادەباشیدان بۆ ئەوەی بە شێوازێکی تر وەڵامیان بدەنەوە".

قالیباف لە کۆتایی پەیامەکەیدا جەختی کردەوە، "ئەوان هەرچییەک دەڵێن با بیڵێن، لە کۆتاییدا ئەوە ئێمەین کە لە مەیدانەکەدا کردار ئەنجام دەدەین".

 وتەبێژی یەکێتیی نیشتمانیی کوردستان دەڵێت؛ یەكێتی نیگەرانە لە دواكەوتنی پێكهێنانی كابینەی نوێی حكومەت.

كاروان گەزنەیی وتەبێژی یەکێتیی نیشتمانیی کوردستان لە کۆنفڕانسێکی رۆژنامەوانیدا رایگەیاند، یەكێتی هیچ كات شەڕی لەسەر پۆست نەكردووە و هەوڵ دەدەن بنەماكانی سازان و هاوبەشی راستەقینە لە كابینەی نوێ بچەسپێنن.

وتیشی، داهاتوویەكی نزیكدا كۆبونەوەكان لەگەڵ هێز و لایەنەكانی هەرێم دەستپێدەكاتەوە و یەكێتی نیگەرانە لە دواكەوتنی پێكهێنانی كابینەی نوێی حكومەت،  خوازیاریشین لەسەر بنەمای هاوبەشی راستەقینە لەگەڵ پارتی حکومەت پێکبهێنین.

سەبارەت بە ئیمزاکردنی رێککەوتن لەگەڵ نەوەی نوێ کاروان گەزنەیی ئەوەی خستەڕوو، سەرەتای مانگی داهاتوو رێككەوتنی یەكێتی و نەوەی نوێ‌ ئیمزا دەكرێت.

وتەبێژی یەکێتی ئاشکراشیکرد، یەكێتیی نیشتمانیی کوردستان پێداگر دەبێت لەسەر راستكردنەوەی رێڕەوی حوكمڕانی و دەبێت حکومەتی هەرێمی کوردستان بەیەکچاو سەیری سەرجەم خەڵک بکات.