هەواڵەکان
ئاسیاسێڵ پابەندبوونی تەواوەتی خۆی بە هەموو پابەندبوونە یاسایی و داراییاکانی بەرامبەر بە حکومەتی عیراق دووپاتدەکاتەوە.
لەگەڵ کۆتاییهاتنی ساڵی 2025ـدا، ئاسیاسێڵ هەموو ئەو پابەندبوونە داراییانەی لە ئەستۆیدایە بەجێیهێناوە لە چوارچێوەی رێکارە بەرکار و پەسەندکراوەکان لەگەڵ لایەنە حکومییە پەیوەندیدارەکان، هەر وەکو ئەوەی لە هەموو ساڵە داراییەکاندا ئەنجامیداوە.
ئاسیاسێڵ روونی دەکاتەوە کە لە ئێستادا هیچ پابەندبوونێکی دارایی لە ئەستۆی کۆمپانیادا نیە بەرانبەر بە حکومەتی عیراقی، ئەمەش لە چوارچێوەی پابەندبوونی بەردەوامیدا بە شەفافیەت و دیسپیلینی دارایی و کارکردن بە گوێرەی رێکارە یاسایی و رێکخراوەییە کارپێکراوەکان.
ئەم پابەندبوونە هاوشان و هاوتەریبە لەگەڵ رۆڵی ئاسیاسێڵ وەک هاوبەشێکی نیشتمانی بەرپرسیار، کە بەشداری دەکات لە پشتیوانی کردنی ئابووریی نیشتمانی و بەهێزکردنی گەنجینەی دەوڵەت، بە جۆرێک مۆدێلێکی ئەرێنی کاری هاوبەشی تەندروست و درێژخایەن لە نێوان هەردوو کەرتی گشتی و تایبەتدا نیشانبدات.
ئاسیاسێڵ سوپاس و پێزانینی خۆی ئاڕاستەی کۆمیسیۆنی گەیاندن و راگەیاندن "CMC" دەکات بۆ هاوکاری پیشەییانەیی و ئەو رۆڵی رێکخراوەییەی کە دەیگێڕێت، بە جۆرێک کە بەشدارە لە بەهێزکردنی سەقامگیری و پاڵپشتیکردنی ژینگەیەکی کارکردنی لەباری بەردەوام بۆ کەرتی پەیوەندییەکان لە عیراق.
ئاسیاسێڵ پابەندبوونی خۆی بە رۆڵی خۆیەوە وەک هاوبەشێکی نیشتمانی بەرپرسیار دووپاتدەکاتەوە، لەگەڵ جێبەجێ کردنی هەموو پابەندییەکانی و بەردەوامیدانی بە وەبەرهێنان لە پەرەپێدانی کەرتی پەیوەندییەکان و پێشکەشکردنی باشترین خزمەتگوزاری بە هاووڵاتیان.
بەڕێوەبەرایەتی ئیدارەی خۆسەر بۆردومانی گەڕەکە کوردییەکانی حەلەب لەلایەن هێزەکانی سەر بە حکومەتی سوریا ئیدانە دەکات و رایدەگەیەنێت: ئەو هێرشانە پێشێلکارییەکی ئاشکرایە و هاووڵاتیانی مەدەنی بە ئامانج دەگرن.
ئیدارەی خۆبەڕێوەبەری لە باكور و رۆژهەڵاتی سوریا راگەیەنراوێکی لەبارەی بۆردومانکردنی گەڕەکە کوردییەکانی شاری حەلەب بڵاوکردەوە و رایگەیاند، ئیدانەی توندی ئە بۆردومانانە دەکەن کە خراوەتە سەر گەڕەکەکانی شێخ مەقسود و ئەشرەفییە لە شاری حەلەب.
ئاماژەی بەوەشکرد، ئەو هێرشانە پێشێلکاریی راستەوخۆیە و هاووڵاتیانی مەدەنی بە ئامانج دەگیرێت، کە بەهۆیەوە چەند هاووڵاتییەک شەهید و برینداربوون، ئەمەش پێشلکارییەکی روونی هەموو یاسا نێودەوڵەتی و مرۆییەکانە، کە راستەوخۆ کاریگەری لەسەر ئاسایش و مافی ژیانکردنی لەو ناوچانە هەیە.
بەڕێوەبەرایەتی خۆسەر راشیگەیاند، ئەم رەفتارە نابەرپرسانە تەنها هێزە نیشتمانییەکانی سوریا پەرتەوازەتر دەکات، و بە روونی نیشانی دەدات کە حکومەتی سوریا جددی نییە لە هەوڵەکانی بۆ یەکخستنی گەلی سوریا و دروستکردنی دەوڵەتێکی دیموکراتی، کە تێیدا هەموو هاووڵاتیان لە ماف و ئەرکەکاندا یەکسان بن، بەبێ جیاوازی و دوورخستنەوە.
جەختیش دەکاتەوە، بەردەوامی گەمارۆ و پێشێلکارییەکان، لەگەڵ زیادەڕەوی و توندوتیژی نایاسایی و بێ پاساو، رێگری دەکات لە هەر هەوڵێکی راستەقینە بۆ چارەسەرکردنی ناکۆکی و کێشە هەڵپەسێردراوەکانی نێوان سورییەکان، هەروەها فاکتەرێکی سەرەکییە لە شکستهێنان بە گەیشتن بە چارەسەری سیاسی گشتگیر و بەردەوام بۆ قەیرانی سوریا، و رەوشی ناسەقامگیری و دووبەرەکی زیاتر دەکات.
ئیدارەی خۆبەڕێوەبەری لە باكور و رۆژهەڵاتی سوریا هۆشداری دەدات، لە بەردەوامبوونی ئەم جۆرە هێرشە زیادەڕۆییە ئەنجامی خراپی دەبێت و کاریگەریی لەسەر هەموو سوریا دەبێت، چونکە مەترسی فراوانکردنی بازنەی توندوتیژی و قوڵکردنەوەی درز لەنێوان پێکهاتەکانی کۆمەڵگەی سوریا لەخۆ دەگرێت.
ئیدارەی خۆبەڕێوەبەری لە باكور و رۆژهەڵاتی سوریا دەشڵێت؛ داوا دەکەین دەستبەجێی گەمارۆ و هێرش و پێشێلکارییەکان، و لێپرسینەوە لە بەرپرسانیان بکرێت، هەروەها لە رێگەی گفتوگۆ و لێکتێگەیشتنەوە کێشەکان چارەسەر بکرێت.
د. لەتیف رەشید سەرۆک کۆماری عیراق، ئەمڕۆ سێشەممە 6ـی 1ـی 2026 لەبەغداد، بە ئامادەبوونی شاناز ئیبراهیم ئەحمەد خانمی یەکەمی عیراق، پێشوازی لە عیرفان سدیق باڵیۆزی بەریتانیا لە عیراق و هێلینا ڤیکا لازانۆ، بەڕێوبەری جێبەجێکاری نووسینگەی کۆمنوێڵس و گەشەپێدان لە وەزارەتی دەرەوەی بەریتانیا کرد.
لە دیدارەکەدا پەیوەندییە دووقۆڵییەکانی نێوان هەردوو وڵات و چۆنیەتی پەرەپێدانیان لەبوارە جیاجیاکاندا تاوتوێکرا، هاوکات بیروڕایان له بارەی کۆمەڵێک پرسی بەرژەوەندی هاوبەش لە ناوچەکە و جیهان ئاڵوگۆڕ کرد، سەرۆک کۆمار جەختی لە گرنگی پتەوکردنی هاوبەشی نێوان عیراق و شانشینی یەکگرتوو بەشێوەیەک کردەوە کەخزمەت بەبەرژەوەندییەکانی هەردوو وڵاتی دۆست بکەن.
لەچوارچێوەی هەوڵەکانی پێکهێنانی حکومەت، سەرۆک کۆمار دووپاتی لە پێویستی بەردەوامبوون لەڕاوێژکردن کردەوە بۆ پێکهێنانی حکومەتێکی کاریگەر لەماوە دیاریکراوەکانی دەستووردا، کەلە قۆناغی داهاتوودا خواستەکانی هاووڵاتیان و سەقامگیری دەستەبەر بکات.
لەلای خۆیەوە باڵیۆزی بەریتانیا لە عیراق، پێزانینی شانشینی یەکگرتووی بۆ ئاستی هاوکاری دووقۆڵی ئێستا دەربڕی و ستایشی ئەو رۆڵەی کرد کەهێزە سیاسییەکان لەپشتیوانیکردنی سەقامگیری وپەرەپێدانی دیالۆگ ولێکتێگەیشتن دەیگێڕن.
وەزارەتی دارایی هەرێم ئاشکرای دەکات، لە سێ ساڵی رابردوودا حکومەتی عیراق کەمتر لە نیوەی شایستە داراییەکانی هەرێمی ناردووە و لە کۆی165ترلیۆن دیناری وەبەرهێنان، پشکی هەرێم "سفر" بووە.
وەزارەتی دارایی و ئابوریی حکومەتی هەرێمی کوردستان لە ئامارێکدا دۆخی دارایی سێ ساڵی رابردوو (2023-2025)ـی خستەڕوو، بەپێی داتاکان کۆی شایستە داراییەکانی هەرێم لەو ماوەیەدا 58.3 ترلیۆن دینار بووە، بەڵام ئەوەی بە کردەیی نێردراوە تەنها 24.3 ترلیۆن دینار بووە، کە دەکاتە تەنها %41ـی مافە داراییەکان و %3.9ـی کۆی بودجەی عیراق.
وەزارەتەکە دۆخەکەی بە "گەمارۆی وەبەرهێنان" ناوبرد و رایگەیاند: "سەرەڕای تەرخانکردنی 165 ترلیۆن دینار لەلایەن بەغدادەوە بۆ وەبەرهێنان، پشکی هەرێم سفر بووە، کە بووەتە هۆی پەکخستنی پڕۆژەکانی ژێرخان".
سەبارەت بە دۆسیەی نەوت، وەزارەتی دارایی ئاماژەی بەوە داوە، راگرتنی هەناردەی نەوت 25 ملیار دۆلار زیانی لە ئابووریی عیراق داوە، هاوکات دوای دەستپێکردنەوەی هەناردە لە کۆتایی 2025 و رادەستکردنی 19.5ملیۆن بەرمیل نەوت لەرێگەی سۆمۆوە، هێشتا گرفت بۆ موچە دروست دەکرێت.
بەپێی راگەیەندراوەکە، حکومەتی هەرێم پابەندبوونی خۆی سەلماندووە و لە ساڵی 2025 بڕی 919 ملیار دیناری داهاتی نانەوتیی رادەستی گەنجینەی فیدراڵی کردووە.
وەزارەتی نەوتی عیراق رایدەگەیەنێت، ئەو قەیرانی غازەی ئێستا هەیە "دەستکردە" و هیچ کێشەیەک لە بەرهەمهێناندا نییە، هاوکات بڕێکی زیاتر لە غازی شل رەوانەی وێستگەکان دەکەن.
ساحیب بەزون، وتەبێژی وەزارەتی نەوت ئاشکرای کرد، هیچ قەیرانێکی راستەقینە لە دابینکردنی غازدا بوونی نییە و ئەوەی رودەدات "شێواندنێکی بە ئەنقەستە" لەلایەن هەندێک لە گوازەرەوەکانەوە و رێکاری توندیان بەرامبەر دەگیرێتەبەر.
وتەبێژەکە جەختی کردەوە، غازی ماڵان لە هەموو وێستگەکان بە بڕێکی زۆر بەردەستە و وەزارەت ئامادەیە کاروانی زیاتر بۆ هەر ناوچەیەک بنێرێت کە پێویستی پێی بێت.
سەبارەت بە توانای بەرهەمهێنان، وەزارەتی نەوت ڕوونیکردەوە کە عێراق لە غازی شلدا گەیشتووەتە ئاستی "خۆژێنی" و بەم دواییانە زیاتر لە 20 هەزار تۆنی هەناردە کردووە و بڕێکی دیکەش ئامادەیە بۆ هەناردەکردن.
پەیامنێری کوردسات نیوز رایدەگەیەنێت، بڕیارە رۆژی پێنجشەممە کۆبوونەوەیەکی باڵا لەنێوان یەکێتیی نیشتمانیی کوردستان و پارتی دیموکراتی کوردستان لە شاری هەولێر بەڕێوەبچێت.
سەرچاوەیەکی ئاگادار لە یەکێتی بە کوردسات نیوزـی راگەیاند، کۆبوونەوەکە لە بارەگای مەکتەبی سیاسیی یەکێتی لە شاری هەولێر دەبێت.
سەرچاوەکە ئاشکرای کرد، تەوەری سەرەکیی گفتوگۆکانی نێوان وەفدی باڵای هەردوو حزب، تایبەت دەبێت بە پرسی پێکهێنانی کابینەی نوێی حکومەتی هەرێمی کوردستان و عیراق و یەکلاکردنەوەی پۆستی سەرۆک کۆماری عیراق.
وەفدێکی باڵای ئیسرائیل بە سەرۆکایەتی وەزیری دەرەوەی ئەو وڵاتە گەیشتە سۆمالیلاند، میدیا عیبرییەکانیش باس لە ئەگەری دروستکردنی بنکەی سەربازی دەکەن لەو ناوچەیەدا.
میدیاکانی ئیسرائیل بڵاویانکردەوە، ئەمڕۆ سێشەممە وەفدێکی ئیسرائیلی بە سەرۆکایەتی گیدعۆن ساعر، وەزیری دەرەوە گەیشتوونەتە سۆمالیلاند. ئەم سەردانەش تەنها چەند ڕۆژێک دوای ئەوە دێت کە بنیامین نەتانیاهۆ، سەرۆک وەزیرانی ئیسرائیل بە فەرمی دانی بە سەربەخۆیی سۆمالیلاند-دا نا، وەک یەکەم وڵاتی ئەندام لە نەتەوە یەکگرتووەکان کە ئەو هەنگاوەی نا، هەرچەندە بڕیارەکە ڕووبەڕووی ئیدانەکردنی نێودەوڵەتی بووەوە.
کەناڵی 14ـی ئیسرائیلی ئاشکرای کردووە، پێشبینی دەکرێت کۆبوونەوەکان لەسەر "هاوکاری ئەمنی و سیاسی" چڕ ببنەوە و راپۆرتەکان ئاماژە بە "ئەگەری دروستکردنی دامەزراوەی بەرگریی ئیسرائیلی" دەدەن لەو ناوچە ستراتیژییەدا.
کەناڵەکە ڕوونیشیکردووەتەوە، ئەگەری هەیە سۆمالیلاند ڕێگە بە ئیسرائیل بدات ناوچەی دیاریکراو لە خاکەکەی بۆ مەبەستی سەربازی بەکاربهێنێت، ئەوەش بەهۆی گرنگیی پێگە جوگرافییەکەیەوە.
لای خۆیەوە دانی دانۆن، باڵیۆزی ئیسرائیل لە نەتەوە یەکگرتووەکان جەختی کردەوە: "کەس ناتوانێت گرنگیی پێگە ستراتیژییەکەی سۆمالیلاند و گەرووە ئاوییەکانی ئەو ناوچەیە پشتگوێ بخات".
لە ماوەی 24 کاتژمێری رابردوودا گرژییەکان لە گەڕەکی شێخ مەقسودی حەلەب پەرەی سەندووە، بەهۆی بۆردومانی چەکدارەکانەوە هاووڵاتییەک کوژرا، لە وەڵامی هێزەکانی ئاسایشیشدا بۆ سەرچاوەی تەقەکان، چەکدارێکی حکومەتی سوریا کوژرا.
بەپێی راگەیەندراوی هێزەکانی ئاسایشی ناوخۆی حەلەب، لەماوەی شەو و رۆژی رابردوودا چەکدارەکانی سەر بە "وەزارەتی بەرگریی حکومەتی سوریا" چوار جار هێرشیان کردووەتە سەر گەڕەکی شێخ مەقسود، بەو هۆیەوە هاووڵاتییەک کوژراوە و دوو کەسی دیکەش بریندار بوون، وێڕای زیانێکی زۆری ماددی.
ئاسایشی حەلەب رونیکردووەتەوە، لە چوارچێوەی مافی رەوای بەرگری لە خۆیان، وەڵامی سەرچاوەی هێرشەکانیان داوەتەوە و دوو خاڵی چەکدارەکانی حکومەتی سوریایان کردووەتە ئامانج.
بەپێی زانیارییەکان، لە ئەنجامی وەڵامدانەوەکەی ئاسایشدا، چەکدارێکی سەر بە حکومەتی سوریا کوژراوە و سێ چەکداری دیکەش بریندار بوون.
هێزەکانی ئاسایشی ناوخۆ ئەو هێرشانە بە "پێشێلکارییەکی نوێی ئاگربەست" ناودەبات و جەخت دەکاتەوە کە وەڵامەکانیان لە چوارچێوەی یاسا و پاراستنی گیانی مەدەنییەکاندا دەبێت.
دادگایەکی تورکیا بە پاساوی "سوکایەتیکردن بە سەرۆک کۆمار" لە وتارەکانیدا، سزای ساڵێک و پێنج مانگ و ١٥ رۆژ زیندانیی بەسەر سەڵاحەدین دەمیرتاش، هاوسەرۆکی پێشووی هەدەپەدا سەپاند.
دانیشتنی دادگاییەکە لە 14هەمین دادگای سزاکانی مێرسین بەڕێوەچوو، تێیدا بڕیار لەسەر دۆسیەی وتارەکانی دەمیرتاش درا کە لە نێوان ساڵانی 2015بۆ 2016 لە شارەکانی ئامەد و مێرسین پێشکەشی کردبوون.
لە دانیشتنەکەدا دەمیرتاش لە زیندانی ئەدرنەوە بەشداری پێ نەکرا و دادگا بە بیانووی "ئەمنی" رەتیکردەوە رێگەی پێ بدات ئامادەبێت، هەروەها داواکاریی پارێزەرەکانی بۆ وەرگرتنی کاتی زیاتر و گۆڕینی دادوەر بەهۆی "پێشێلکردنی مافی بەرگری"یەوە رەتکرایەوە.
دواجار دادگا بڕیاریدا بە سزادانی سەڵاحەدین دەمیرتاش بە زیندانی بۆ ماوەی 1 ساڵ و 5 مانگ و 15 رۆژ، ئەوەش بە تۆمەتی ئەوەی بە شێوەیەکی زنجیرەیی سوکایەتی بە ڕەجەب تەیب ئەردۆغان کردووە.
بەپێی پێشبینییەكانی كەشناسی عیراق، لە كۆتایی ئەم هەفتەیە بەفربارین لە ناوچە شاخاوییەكان دەستپێدەكاتەوە.
بەشی پێشبینی دەستەی كەشناسی عیراق بڵاویكردەوە، لە رۆژی پێنجشەممە و هەینی داهاتووەوە بارانبارین لە ناوچە جیاجیاكان بەبڕی جیاواز دەستپێدەكات و بەفر لە ناوچە بەرز و شاخاوییەكان دەبارێت و پلەكانی گەرما دادەبەزن و خێرای با چالاك دەبێتەوە.
لەبارەی كەشوهەوای رۆژی شەممەی داهاتووش، كەشناسی عیراق رایگەیاندووە، بارانبارین و بەفر بەردەوام دەبێت و لەگەڵیدا خۆڵبارین زیاد دەكات و لە هەندێك شوێنیش پلەكانی گەرما دەگەنە سفر.
بۆ سبەینێش، پلەكانی گەرما مامناوەند دەمێننەوە، لە سلێمانی 14 پلە و لە هەولێر و دهۆك 15 و لە كەركوكیش 16 پلە تۆمار دەكرێت و نزمترین پلەی گەرماش لەو شارانە لەنێوان سفر بۆ دوو پلە دەبێت.
بەڕێوەبەرایەتیی پۆلیسی پارێزگای هەڵەبجە دەستگیرکردنی سێ تۆمەتباری راگەیاند، کە دوان لەوانە سەرەتا بە تۆمەتی "دزی" دەستگیرکرابوون، بەڵام دواتر دەرکەوتووە بەکارهێنەری ماددەی هۆشبەرن و لەڕێگەی ئەوانیشەوە فرۆشیارێکی ماددەکە دەستگیرکراوە.
بەپێی راگەیەندراوی پۆلیس، سەرەتا لەلایەن بنکەی پۆلیسی خورماڵەوە دوو تۆمەتبار بە ناوەکانی (پ. ئـ. م - 28 ساڵ) و (م. ع. ئـ -26 ساڵ) بە تۆمەتی دزیکردن دەستگیرکران.
لە راگەیەندراوەکەدا هاتووە: "بە گومانی بەکارهێنانی ماددەی هۆشبەر، تۆمەتبارەکان رەوانەی پزیشکی دادوەریی هەڵەبجە کران و لە ئەنجامدا دەرکەوت هەردووکیان بەکارهێنەری ماددەی هۆشبەرن، بۆیە بە بڕیاری دادوەر پەڕاوی لێکۆڵینەوەیان بەپێی ماددەی ٣٠ـی هۆشبەر بۆ کرایەوە".
پۆلیسی هەڵەبجە ئاشکرای کرد، دوای لێکۆڵینەوە لەگەڵ دوو تۆمەتبارەکە، توانرا ئەو کەسەش دەستگیربکرێت کە ماددەکەی پێ فرۆشتوون، کە ناوی (ڕ. ن. ع) و تەمەنی 26 ساڵە و لە دەرەوەی سنووری پارێزگای هەڵەبجە بەپێی ماددەی 26ـی یاسای بەرەنگاربوونەوەی ماددە هۆشبەرەکان دەستگیرکراوە.
هەر سێ تۆمەتبارەکە دانیشتووی دەرەوەی سنووری پارێزگای هەڵەبجەن و بە بڕیاری دادوەر، پەڕاوەکەیان ڕەوانەی بەڕێوەبەرایەتیی ئاسایشی شارەزوور کراوە بە مەبەستی تەواوکردنی ڕێکارە یاساییەکان و لێکۆڵینەوەی زیاتر.
بەهۆی هێرشی درۆنێکی خۆکوژی حکومەتی سوریاوە لە شێخ مەقسود هاووڵاتییەک کوژرا.
بەپێی زانیارییەکانی موهەنەد ئیبراهیم پەیامنێری کوردسات نیوز لە رۆژئاوای کوردستان، درۆنێکی خۆکوژ کە سەر بە هێزەکانی حکومەتی سوریا بووە، گەڕەکی شێخ مەقسودی لە شاری حەلەب کردووەتە ئامانج و لە ئەنجامدا هاوڵاتییەکی مەدەنی گیانی لەدەستداوە.
سەرۆکی مەهەپە بە توندی هێرش دەکاتە سەر سیاسەتەکانی ئەمەریکا بەرامبەر ڤەنزوێلا و رایدەگەیەنێت، هێز و توانای عەقڵی دۆناڵد ترەمپ نەماوە و ئامانجی دەستگرتنە بەسەر سەرچاوەکانی وزەدا.
دەوڵەت باخچەلی، سەرۆکی پارتی بزووتنەوەی نەتەوەیی (مەهەپە) پشتگیری خۆی بۆ ڤەنزوێلا دەربڕی و لە کۆبوونەوەی فراکسیۆنی حزبەکەیدا لە پەرلەمانی تورکیا رایگەیاند: بە توندی ئیدانە و نەفرەت لەو هێرشە دەکەم کە کرایە سەر نیکۆلاس مادۆرۆ، سەرۆکی شەرعیی و هەڵبژێردراوی ڤەنزوێلا.
باخچەلی بە شێوەیەکی توند رەخنەی لە دۆناڵد ترەمپ گرت و وتی: "ساغڵەمی و توانای عەقڵی و ئەخلاقیی ترەمپ بەهەڵم بووە، وتەکانی سەرۆکی ئەمەریکا کە دەڵێت ئێمە ڤەنزوێلا بەڕێوەدەبەین، پەیامێکە بۆ دەستگرتن بەسەر سەرچاوەکانی وزە و رووە ڕاستەقینەکەی ئیمپریالیزم و داگیرکاریی نوێ دەردەخات". داواشی لە کۆنگرێسی ئەمەریکا کرد دەستوەردان بکات بۆ ڕاگرتنی بڕیارە نادەستوورییەکانی ترەمپ.
كەتائیبی حزبوڵای عیراق داوا لە سەركردە سەربازییەكان دەكات دووربكەونەوە لە ناكۆكییە سیاسییەكان و دەستوەردان نەكەن.
ئەبو حسێن حەمیداوی ئەمینداری گشتی كەتائیبی حزبوڵای عیراق لە راگەیەندراوێكدا بڵاویكردەوە، قۆناغی داهاتووی عیراق پێویستی بە حكومەتێكی دادپەروەرە كە خاوەنی بڕیاری خۆی بێت و هەژموونی بەسەر زەوی و ئاسماندا هەبێت.
ئاماژەی بەوەشكرد، بنیاتنانی هێزێكی ئەمنی و ئامادەكردنی بە پێداویستییە سەربازیی و بەرگرییەكان، پێویستییەكی سەرەكی قۆناغی داهاتووە و بەرەی مقاوەمەی ئیسلامیش ئامادەیە بۆ پێشكەشكردنی توانا و ئەزموونەكانی لە هەموو كاتێكدا.
حەمیداوی داوای لە بەشێك لە سەركردە سەربازییەكانیش كرد، دوور بكەونەوە لە ناكۆكییە سیاسییەكان و دەستوەردان نەكەن، چونكە كاریگەری خراپ لەسەر دامەزراوە ئەمنی و دادوەرییەكانی عیراق دروست دەكات.
وتەبێژی بەرگریی شارستانی هەولێر رایدەگەیەنێت، سەرەڕای تێپەڕبوونی چوار کاتژمێر بەسەر ئاگرەکەدا، هێشتا بەتەواوی کۆنترۆڵ نەکراوە و کارگەکەش هیچ مەرجێکی سەلامەتی تێدا نەبووە.
موقەدەم شاخەوان رایگەیاند: 5:48 خولەکی سەرلەبەیانی ئەمڕۆ ئاگادارکراینەوە لە کەوتنەوەی ئاگرێک لە کارگەیەکی چپس لە سنووری کۆمەڵگەی پیرزین، دەستبەجێ 25 تیممان گەیشتوونەتە شوێنەکە و سەرقاڵی کۆنترۆڵکردنی ئاگرەکەن.
وتیشی: "زۆرینەی ئاگرەکە کوژێندراوەتەوە و تیمەکان سەرقاڵی پرۆسەی ساردکردنەوەن، بەڵام هێشتا ئاگرەکە بەتەواوی کۆنترۆڵ نەکراوە".
سەبارەت بە هۆکاری رووداوەکە و رێکارەکان، وتەبێژی بەرگریی شارستانی ئاشکرای کرد، ئەو کارگەیە هیچ مەرجێکی سەلامەتی تێدا نەبووە و شەش مانگ لەمەوبەر نووسراویان کردووە بۆ لێپێچینەوە لەگەڵ خاوەنەکەی تاوەکو پابەند بێت، بەڵام پابەند نەبووە و دەرەنجامەکەی ئەم رووداوەی لێکەوتەوە.
بەپێی زانیارییەکان، رووداوەکە زیانی گیانی نەبووە و بەهۆی جۆری ئەو کەرەستانەوە کە باڵەخانەکەی لێدروستکراوە و کەرەستەی "رۆن و کارتۆن"ـیشی تێدایە، ئاگرەکە بە خێرایی تەشەنەی سەندووە و زیانی ماددی زۆری لێکەوتووەتەوە.
دانوستانەكان لەبارەی دیاریكردنی كاندیدی سەرۆك وەزیرانی عیراق بەردەوامە و جەختیشدەكرێتەوە بابەتەكە نەگەیشتووەتە بنبەست.
مەحمود حەیانی ئەندامی چوارچێوەی هەماهەنگی شیعەكان رایگەیاند، گفتوگۆ و دانوستانەكان لەبارەی كاندیدی سەرۆك وەزیرانی عیراق بەبێ ئاستەنگ بەردەوامە و نەگەیشتووەتە بنبەستی سیاسی.
وتیشی، دانوستانەكانی ئێستا بۆئەوەیە كەسێك دیاری بكرێت توانای بەڕێوەبردنی قۆناغی داهاتووی هەبێت و روبەڕوی ئاڵنگارییە سیاسی و ئابوری و خزمەتگوزارییەكان ببێتەوە و هاوبەشی و هاوسەنگی نیشتمانی لەبەرچاو بگرێت.
جاسم عەلەوی ئەندامی ئیئتیلافی دەوڵەتی یاساش دەڵێت، لەپێناو بەرژەوەندی عیراق و پاراستنی سەقامگیری سیاسی، پشتیوانی ویلایەتی دووەمی محەمەد شیاع سودانی دەكەن.
وتیشی، ئەم قۆناغەی ئێستای عیراق پێویستی بە بەردەوامیدان بە حكومڕانییەكەی ئێستایە، چونكە سودانی كەسێكی سەركەوتوو و خاوەن ئەزموونە و لە بواری سەقامگیری ئەمنی و چەند پرسێكی خزمەتگوزاری و ئابوری بەرەوپێشچوونی بەدیهێناوە.
ئێوارەی دوێنێش، چوارچێوەی هەماهەنگی لە نوسینگەی حەیدەر عەبادی كۆبووەوە، بەڵام نەیتوانی كاندیدی سەرۆك وەزیرانی عیراق دیاری بكات.