ئەنجومەنی جێبەجێکاری پارتی یەکسانی و دیموکراسیی گەلان (دەم پارتی) راگەیەندراوێکی توندی لەبارەی هێرشەکانی سەر حەلەب بڵاوکردەوە و رایدەگەیەنێت، ئەوەی روودەدات "ئۆپەراسیۆنی پاکتاوکردنە" و پێشێلکردنی رێککەوتنەکانە.

لە راگەیەندراوەکەدا دەم پارتی ئاماژەی بەوەکردووە، لە شەوی رابردووەوە حکومەتی دیمەشق بە تانک، تۆپ و فڕۆکەی بێفڕۆکەوان هێرش دەکاتە سەر گەڕەکەکانی شێخ مەقسود، ئەشرەفییە و گەڕەکی بەنی زەید کە سریانی تێدا نیشتەجێن. بەپێی ئامارەکان 7 هاووڵاتی مەدەنی شەهیدبوون و 46ـی دیکەش بریندارن. لەم هێرشانەدا گروپەکانی "هەمزات، ئەمجات، سوڵتان موراد و نورەدین زەنگی" کە تورکیا پاڵپشتییان دەکات، بەشدارن.

دەم پارتی دەڵێت: "ئەم هێرشانەی حکومەتی دیمەشق هەڕەشەیەکی ئاشکرایە بۆ سەر یەکپارچەیی سوریا، لە کاتێکدا بەپێی رێککەوتنی 10ی ئازار و 1ـی نیسانی 2025، هێزەکانی سوریای دیموکرات (هەسەدە) چەکی قورسیان کشاندەوە و ئەمنییەتی گەڕەکەکانیان رادەستی ئاسایشی ناوخۆ کرد، بەڵام دیمەشق رێککەوتنەکە پێشێل دەکات و ژیانی 200 هەزار هاووڵاتی خستووەتە مەترسییەوە".

لە بەشێکی دیکەی راگەیەندراوەکەدا هاتووە: "ئەوەی لە حەلەب دژی کورد دەکرێت، قورسترە لەو کۆمەڵکوژییەی دژی دروزەکان لە سوەیدا پیلانی بۆ دانرابوو".

دەم پارتی داوا لەو وڵاتانە دەکات کە نێوەندگیری دەکەن لە نێوان خۆبەڕێوەبەریی باکور و رۆژهەڵات و حکومەتی دیمەشق، بەرپرسیارێتی "گەرەنتیکار" جێبەجێ بکەن و دەستبەجێ رێگری لەم هێرشانە بکەن کە مەترسی هەڵگیرسانەوەی شەڕ لە تەواوی سوریا دروست دەکات.

لە کۆتاییدا جەختیکردووەتەوە، تاکە رێگە بۆ کۆتاییهێنان بە ئاڵۆزییەکان، دیالۆگ و دروستکردنی ئیدارەیەکی هاوبەشە لەسەر بنەمای مافی یەکسان بۆ هەموو پێکهاتەکانی سوریا.

سیبان حەمۆ، ئەندامی فەرماندەیی گشتیی هێزەکانی سوریای دیموکرات (هەسەدە) پەیامێک ئاڕاستەی دانیشتووانی شێخ مەقسود و ئەشرەفییە دەکات و رایدەگەیەنێت، ئەو دوو گەڕەکە دەبنە قەڵای خۆڕاگری و شکست بە هەموو پیلانەکان دەهێنن.

لە پەیامێکدا سیبان حەمۆ ئاماژەی بەوەکردووە، ئەمڕۆ رۆژی کەرامەتە و هەردوو گەڕەکی شێخ مەقسود و ئەشرەفییە بوونەتە هێمای بەرخودان، کە ماوەی 15 ساڵە دانیشتووانەکەی رووبەڕووی هەموو جۆرە هێرش و گەمارۆیەک بوونەتەوە.

سیبان حەمۆ دەڵێت: "بڕوامان بە هۆشیاریی نیشتمانیی دانیشتووانی ئەو دوو گەڕەکە هەیە کە شانبەشانی شەڕڤانان بۆ پاراستنی کەرامەت و ئاسایش دەوەستنەوە، ئەم یەکڕیزییەش وادەکات دەستدرێژیکاران باجی هێرشەکانیان بدەن".

ئەندامەکەی فەرماندەیی گشتیی هەسەدە جەختیکردووەتەوە، شێخ مەقسود و ئەشرەفییە وەک قەڵای خۆڕاگری دەمێننەوە و تێکناشکێن، بەرخودانیش تا پاراستنی خاک و کەرامەتی خەڵکەکەی بەردەوام دەبێت.

ناوەندی راگەیاندنی هێزەکانی سوریای دیموکرات (هەسەدە) نوێترین ئاماری قوربانییانی بڵاوکردەوە و رایدەگەیەنێت، بەهۆی بۆردومانی گروپەکانی سەر بە حکومەتی دیمەشق، ژمارەی قوربانییان لە گەڕەکەکانی شێخ مەقسود و ئەشرەفییە بۆ 7 شەهید و 52 بریندار بەرزبووەوە.

هەسەدە لە راگەیەندراوێکدا ئاماژەی بەوەکردووە، بۆردومان بە تانک و فڕۆکەی بێفڕۆکەوان بۆ سەر ئەو دوو گەڕەکە بەردەوامە و گەمارۆیەکی توندیان خراوەتە سەر، بەجۆرێک رێگە بە چوونەژوورەوەی خۆراک، دەرمان و پێداویستییە سەرەتاییەکان نادرێت، ئەمەش دۆخی مرۆیی دژوار کردووە و ژیانی هەزاران هاووڵاتی مەدەنی خستووەتە مەترسییەوە.

بەپێی راگەیەندراوەکەی هەسەدە، جوڵەپێکردنی هێز لە دەوروبەری گەڕەکەکان بەردەوامە و زیاتر لە 80 تانک و ئۆتۆمبێلی سەربازیی قورس جێگیرکراون، کە ئاماژەیەکی مەترسیدارە بۆ ئەگەری هێرشێکی بەرفراوان و فراوانبوونی بازنەی شەڕەکە لە سایەی بێدەنگیی کۆمەڵگەی نێودەوڵەتیدا.

ئیلهام ئەحمەد رایدەگەیەنێت، وەزارەتی بەرگریی حکومەتی کاتیی سوریا جەنگی دژی هەردوو گەڕەکی شێخ مەقسود و ئەشرەفییە راگەیاندووە و دەیەوێت "جینۆساید" بەرامبەر کورد ئەنجام بدات.

لە پەیامێکدا لە تۆڕی کۆمەڵایەتیی ئێکس، ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا ئاماژەی بەوەکردووە، ئەو دوو گەڕەکە پڕن لە دانیشتووان و زۆرینەیان خەڵکی عەفرینن کە بەزۆر کۆچیان پێکراوە و ماوەیەکیش لەلایەن هێزەکانی سەر بەو وەزارەتەوە گەمارۆی توندیان خرابووە سەر.

باسی لەوەشکردووە، سەرەڕای ئەوەی کورد پابەندبووە بە رێککەوتنی 1ی نیسانەوە و هەوڵی زۆریان داوە بۆ گفتوگۆ، بەڵام لایەنەکەی دیکە پابەند نەبووە و وەزارەتی بەرگریی حکومەتی کاتیی سوریا هەموو دەرگایەکی گفتوگۆی داخستووە.

ئیلهام ئەحمەد داوا لە بەرپرسانی حکومەتی کاتی دەکات بەرپرسیارێتی هەڵبگرن و رێگەی ژیری و گفتوگۆ هەڵبژێرن نەک شەڕ، چونکە "سورییەکان بەدەست جەنگەوە زۆر ناڵاندوویانە". هاوکات داوا لە گەنجانی سوریا دەکات جەنگ رەتبکەنەوە و دەنگی هەق بەرز بکەنەوە.

تۆم باراك، نێردەی ئەمریكا بۆ سوریا رایگەیاند، دانوستانەكانی نێوان لێپرسراوانی سوریا و ئیسرائیل پێشكەوتنی راستەقینەی بەخۆوە بینیوە . 

تۆم باراك لە چاوپێكەوتنێكدا لەگەڵ كەناڵی ئای 24 نیوزی ئیسرائیلی رایگەیاندووە ، پێشكەوتنێكی بەرچاو لە دانوستانەكانی نێوان دیمەشق و تەلئەبیب هەیە ، ئەوەش دوای زنجیرەیەك كۆبونەوەی نێوان وەفدی هەردوولا لە پاریس كە بە نێوەندگیری ئەمریكا بەرێوەچوو .

هەروەها رایگەیاندوە، لەكۆبونەوەكاندا هەردوولا گەیشتونەتە رێككەوتن بۆ دروستكردنی میكانیزمێكی هاوبەش بۆ گۆرینەوەی زانیاری هەواڵگری كە وەك سەكۆیەك بۆ چارەسەركردنی ناكۆكییەكانیش  بەكاردەهێنرێت  
 وتیشی: بەپێی ئەو میكانیزمە  نوێنەرانی ئیسرائیل و سوریا و ئەمریكا پێكەوە كاردەكەن.

ئاماژەی بۆ ئەوەشكردوە، هەردوولا بۆ جاری یەكەم لە مێژووی نوێدا    بەدەر لەپرسی سەربازی گفتوگۆیان لەبارەی چەند پرسێكی دیكە كردووە وەك بواری پزیشكی و كشتوكاڵ و وزە .

لەلایەكی تریشەوە، سەرچاوەیەكی سوریی بە كەناڵی ئای 24 نیوزی راگەیاندوە ، مەرجی سوریا بۆ كردنەوەی نوسینگەیەكی پەیوەندی ئیسرائیلی لە دیمەشق ئەوەیە ، كە نوسینگەكە تایبەتمەندی دیپلۆماسی نەبێت .

ئەوە لەكاتێكدایە ، شەوی رابردوو، ئیسرائیل و سوریا گەیشتنیان بە رێككەوتنێكی ئەمنی و ئابوری راگەیاند .

بەڕێوەبەرایەتیی گشتیی حەج و عومرەی هەرێمی کوردستان ئاگاداری کۆمپانیاکانی گواستنەوە دەکاتەوە، ئەوانەی ئارەزوی بەشداریکردنیان هەیە لە تەندەری گواستنەوەی کەلوپەلی حاجیان لە شاری مەککەی سعودیە بۆ پارێزگا و ئیدارە سەربەخۆکانی هەرێم، دەتوانن سەردانیان بکەن.

بەڕێوەبەرایەتییەکە رایگەیاندووە، کۆمپانیاکان دەتوانن لە ئەمڕۆ چوارشەممەوە (7ی کانونی دووەم) سەردانی بەشی یاسایی و گرێبەستەکان بکەن بۆ وەرگرتنی فۆرمی تەندەر.

ئاماژە بەوەشکراوە، دوا وادە بۆ گەڕاندنەوەی تەندەرەکان، سەعات 11:00ـی پێشنیوەڕۆی رۆژی یەکشەممە 18ی کانونی دووەمی 2026 دەبێت.

ئەمڕۆ چوارشەممە، دکتۆر لەتیف رەشید، سەرۆک کۆماری عیراق و خاتوو شاناز ئیبراهیم ئەحمەد، خانمی یەکەمی عیراق، بەسەردانێکی رەسمی و لەسەر بانگهێشتی نیکۆس کریستۆدۆلیدس، سەرۆکی قوبرس، بەرەو نیکۆسیای پایتەختی قوبرس بەڕێکەوتن.

سەردانەکە بەمەبەستی بەشداریکردنە لە رێوڕەسمی کردنەوەی سەرۆکایەتیی قوبرس لە ئەنجومەنی یەکێتیی ئەوروپا، کە ژمارەیەک سەرۆکی دەوڵەتان، رێکخراوە نێودەوڵەتییەکان و دامەزراوەکانی یەکێتیی ئەوروپا تێیدا بەشدار دەبن.

دەستەی گشتی گومرگەكانی عیراق رایگەیاند، پێشبنی دەكەن داهاتی سەرجەم گومرگەكانی لە ئەمساڵدا بگاتە زیاتر لە 10 ترلیۆن دینار.

ئەحمەد جاسم عكێدی، بەرپرسی بەشی بەهادان لە دەستەی گشتی گومرگەكانی عیراق ئاماژەیان بۆ ئەوەكردووە، لە ساڵی رابردوودا داهاتی گومرگەكانی عیراق دوو ترلیۆن و 500 ملیار دیناری تێپەڕاندووە ئەوەش بۆ یەكەم جارە لە مێژووی عیراق داهاتی گومرگیەكان بگاتە ئەو رێژەیە.

ئاماژەی بەوەشكرد، پێشبینی دەكرێت ئەمساڵ لەگەڵ جێبەجێكردنی سیستمی ئاسیكودا و باجی گومرگی نوێ داهاتەكان لانیكەم چوار بۆ شەش هێندە زیادبكەن ، 10 ترلیۆن دینار تێپەڕێنێت، ئەوەش لەگەڵ زیادكردنی 16 هەزار و 400 كەلوپەلی گومرگی كە باجی نوێ دەیانگرێتەوە.

 

بانکی ناوەندیی عیراق یەکەم روونکردنەوەی لەدوای بەرزبوونەوەی نرخی دۆلار بڵاوکردەوە و رایدەگەیەنێت، بەرزبوونەوەی نرخ پەیوەندی بە جێبەجێکردنی باجی گومرکییەوە هەیە و نرخی رەسمی وەک خۆی ماوەتەوە.

لە راگەیەندراوێکدا بانکی ناوەندیی عیراق ئاماژەی بەوەکردووە، هیچ گۆڕانکارییەک لە نرخی رەسمی دۆلاردا روینەداوە و وەک خۆی جێگیرە کە 1320 دینارە بۆ هەر دۆلارێک.

سەبارەت بەو بەرزبوونەوەیەی لە بازاڕەکاندا هەیە، بانکەکە دەڵێت: "ئەو نرخە بەرزەی ئێستا مامەڵەی پێوە دەکرێت، پەیوەندی بە خواستی بازاڕی ناڕەسمییەوە هەیە لە دەرەوەی سیستمی ئەو بانکە رێگەپێدراوانەی کاری حەواڵەی دەرەکی دەکەن".

بانکی ناوەندی هۆکاری سەرەکی بەرزبوونەوەی دۆلار لە بازاڕی رەش (بازاڕی هاوتەریب) بۆ جێبەجێکردنی "باجی گومرکی پێشوەختە" دەگەڕێنێتەوە، کە وایکردووە خواست لەسەر دۆلار لە دەرەوەی سیستمی بانکی زیاد بکات.

بەپێی راگەیەندراوەکە، وەرگرتنی باجی گومرکی پێشوەختە بۆ مەبەستی حەواڵە، فشارێکی گەورەی لەسەر بازرگانان و داواکارانی دۆلاری نەقد دروستکردووە، ئەمەش هۆکاری سەرەکی بووە بۆ لاوازبوونی دینار لە بازاڕە ناوخۆییەکاندا.

لە کۆتاییدا بانکی ناوەندی جەختیکردووەتەوە لەوەی بەردەوامن لە چاودێریکردنی بازاڕ و گرتنەبەری رێوشوێنی پێویست بۆ جێگیرکردنی نرخ و پاراستنی بەهای دراوی نیشتمانی.

دوای ئەوەی بەهۆی لافاوەکەی مانگی رابردوو، زیانێکی زۆر بەر کتێبخانەی گشتیی چەمچەماڵ و ئەرشیفەکەی کەوت، لەسەر راسپاردەی خاتو گەلاوێژ، هەزاران سەرچاوەی زانستی و کتێب پێشکەش بە کتێبخانەکە دەکرێتەوە.

بۆردی وێبسایتی "خاتوو گەلاوێژ" کە پێکهاتبوون لە د. ژینۆ عەبدوڵڵا و جومعە شوانی، سەردانی کتێبخانەی گشتیی چەمچەماڵ-یان کرد و لەلایەن هێرش عەبدولڕەحمان، بەڕێوەبەری کتێبخانەکەوە پێشوازییان لێکرا.

لە دیدارەکەدا بەڕێوەبەری کتێبخانەکە باسی لەو زیانە زۆرانە کرد کە بەهۆی لافاوەکەوە بەر بینای کتێبخانەکە و سەرچاوە بەنرخەکان و ئەرشیفی رۆژنامە و گۆڤارەکان کەوتووە.

لە بەرامبەردا، بۆردی وێبسایتی خاتوو گەلاوێژ ئامادەیی هەموو هاوکارییەکیان دەربڕی و رایانگەیاند، لەسەر راسپاردەی خاتو گەلاوێژ، بە هەزاران ناونیشانی جیاواز لە کتێب و سەرچاوە بە زمانەکانی کوردی و عەرەبی لە بوارەکانی زمان و زانستە مرۆڤایەتییەکان پێشکەش بە کتێبخانەکە دەکەن.

هاوکات لەسەر داواکاریی بەڕێوەبەرایەتی کتێبخانەکە، ژمارەیەکی زۆر لە نامەی ماستەر و تێزی دکتۆرا بۆ دەوڵەمەندکردنەوەی کتێبخانەکە دابین دەکەن.

کتێبخانەی گشتیی چەمچەماڵ ساڵی 1976 دامەزراوە، پێش روداوی لافاوەکە خاوەنی 27 هەزار کتێب و 36 هەزار رۆژنامە و گۆڤار بووە، هاوکات سەرپەرشتی کتێبخانەکانی (سەنگاو، ئاغجەلەر، لەیلان، بابەگوڕگوڕ، دوبز، قەرەهەنجیر، شۆڕش، تێکیە و گۆپتەپە) دەکات.

هاوپەیمانی عەرەبی بە سەرۆكایەتی سعودیە چەند هێرشێكی بۆسەر جوداخوازەكانی یەمەن ئەنجامدا و لە شەوی رابردووشەوە سەرۆكی ئەنجومەنی راگوزەری باشور بۆ شوێنێكی نادیار هەڵهاتووە.

هاوپەیمانی عەرەبی بە سەرۆكایەتی سعودیە رایگەیاند، زانیاریمان پێگەیشت لەبارەی جوداخوازان كە هێزی گەورە و تانك و چەكی جۆراوجۆریان جوڵاندووە، ئێمەش بۆ رێگریكردن لە فراوانتربوون و گواستنەوەی توندوتیژییەكان بەرەو ناوچەكانی تر، بەرەبەیانی ئەمڕۆ چەند هێرشێكی سنوردار و پێشوەختەمان لە باشوری یەمەن ئەنجامدا.

ئاماژەی بەوەشكردووە، عیدروس زوبەیدی سەرۆكی ئەنجومەنی راگوزەری باشور كە بڕیاربوو ئەمڕۆ بەشداری كۆنفرانسەكەی ریاز بكات تایبەت بە چارەسەری پرسی باشوری یەمەن، بەرەو شوێنێكی نادیار هەڵهاتووە.

هاوكات، ئەنجومەنی سەركردایەتی سەرۆكایەتی یەمەن، بە تۆمەتی ناپاكی مەزن ئەندامێتی زوبەیدی لە ئەنجومەنەكە هەڵوەشاندەوە و رەوانەی دادگای دەكات.

کۆشکی سپی رایگەیاند، دۆناڵد ترەمپ، سەرۆکی ئەمریکا تاوتوێی کۆمەڵێک بژاردە دەکات بۆ بەدەستهێنانی گرینلاند، لەنێویاندا بەکارهێنانی هێزی سەربازی وەک یەکێک لە ئەگەرەکان.

کۆشکی سپی بە بی بی سی راگەیاندووە، دەستگرتن بەسەر گرینلاند، کە هەرێمێکی نیمچە سەربەخۆی دانیمارکە و ئەندامی ناتۆیە، "لە پێشینەی ئاسایشی نەتەوەیی" ئەمریکایە.

ئەم لێدوانە دوای ئەوە دێت کە سەرکردەکانی ئەوروپا لە راگەیەندراوێکی هاوبەشدا پشتیوانی خۆیان بۆ دانیمارک دەربڕی، کە دژی خواستەکانی ترەمپ وەستاوەتەوە بۆ دەستگرتن بەسەر ئەو دورگەیەی جەمسەری باکوردا.

هەڕەشە لە ناتۆ: 

ترەمپ جەختیکردەوە کە ئەمریکا بەهۆی هۆکاری ئەمنی پێویستی بە گرینلاندە، ئەمەش وای لە مێتە فرێدرێکسن، سەرۆک وەزیرانی دانیمارک کرد هۆشداری بدات کە هەر هێرشێکی ئەمریکا مانای کۆتاییهاتنی پەیمانی ناتۆیە.

رۆژی سێشەممە کۆشکی سپی رایگەیاند: "سەرۆک و تیمەکەی تاوتوێی کۆمەڵێک بژاردە دەکەن بۆ گەیشتن بەم ئامانجە گرنگەی سیاسەتی دەرەوە، بێگومان بەکارهێنانی سوپای ئەمریکا هەمیشە وەک بژاردەیەک لەبەردەست فەرماندەی گشتیدایە".

ناتۆ گرووپێکی سەربازیی ئەتڵەسییە و هاوپەیمانەکان پابەندن بەوەی لە ئەگەری هێرشی دەرەکی، هاوکاری یەکتر بکەن.

هەڵوێستی ئەوروپا:

شەش وڵاتی هاوپەیمانی ئەوروپی پشتیوانی خۆیان بۆ دانیمارک دەربڕی و لە راگەیەندراوێکی هاوبەشدا کە سەرکردەکانی بەریتانیا، فەرەنسا، ئەڵمانیا، ئیتاڵیا، پۆڵەندا، ئیسپانیا و دانیمارک ئیمزایان کردووە، هاتووە: "گرینلاند موڵکی خەڵکەکەیەتی و تەنیا دانیمارک و گرینلاند دەتوانن بڕیار لەسەر پەیوەندییەکانیان بدەن".

سەرکردەکان جەختیان کردەوە کە پاراستنی ئاسایشی جەمسەری باکور دەبێت بە "کۆمەڵ" لەلایەن هاوپەیمانانی ناتۆوە بکرێت نەک تاکلایەنە، هەروەها داوای پاراستنی بنەماکانی پەیماننامەی نەتەوە یەکگرتووەکان دەکەن، بەتایبەت سەروەری و یەکپارچەیی خاک و دەستدرێژینەکردنە سەر سنورەکان.

شوێنی جوگرافی گرینلاند:

دەستەی روپێوی جیۆلۆجیی ئەمریکا رایگەیاند، ئەمڕۆ چوارشەممە بومەلەرزەیەک بە گوڕی 6.4 پلە لە کەناراوەکانی باشوری فلیپینی داوە، بەڵام هیچ هۆشدارییەک بۆ دروستبوونی تسۆنامی نییە و باسی زیانەکانیش نەکراوە.

ناوەندە ئەمریکییەکە سەرەتا گوڕی بومەلەرزەکەی بە 6.7 پلە دیاریکردبوو، کە لە قوڵایی 58.5 کیلۆمەتر و بە دوریی نزیکەی 27 کیلۆمەتر لە رۆژهەڵاتی شارۆچکەی سانتیاگۆ لە دورگەی میناداناو رویداوە.

ناش باراگاس، دکتۆر، لە هەرێمی دافاو بە ئاژانسی فرانس پرێسی وتووە، تا ئێستا هیچ راپۆرتێک نییە لەبارەی زیانی گیانی و ماددی. دەشڵێت "هەستمان بە لەرینەوە کرد، ئۆتۆمبێلەکان دەجوڵانەوە، بەڵام ماوەکەی کورت بوو و تەنیا 5 چرکەی خایاند."

پێشتریش لە مانگی تشرینی یەکەمی رابردوو، دوو بومەلەرزە بە گوڕی 7.4 و 6.7 پلە رۆژهەڵاتی میناداناوی هەژاند و بەهۆیەوە هەشت کەس گیانیان لەدەستدا. پێشتریش بومەلەرزەیەک بە گوڕی 6.9 پلە پارێزگای سیبۆی لە ناوەڕاستی فلیپین هەژاندبوو، کە بووە هۆی گیانلەدەستدانی 76 کەس و زیانگەیشتن بە 72 هەزار خانوو.

رودانی بومەلەرزە لە فلیپین نزیکەی رۆژانەیە، ئەوەش بەهۆی هەڵکەوتەی وڵاتەکە کە دەکەوێتە سەر "بازنەی ئاگرین" لە زەریای هێمن، کە ناوچەیەکی چالاکی بومەلەرزەیە و لە ژاپۆنەوە درێژدەبێتەوە بۆ باشوری رۆژهەڵاتی ئاسیا.

وەزارەتی کارەبای هەرێم رایدەگەیەنێت، بەهۆی کێشەیەکی تەکنیکی لە تۆڕی کارەبا، سەعات 12:00ـی ئەمشەو کارەبای بەشێک لە پارێزگاکانی هەولێر، دهۆک و سلێمانی بڕا.

لە راگەیەندراوێکدا وەزارەتی کارەبا ئاماژەی بەوەکردووە، ئێستا دۆخەکە لەژێر کۆنترۆڵدایە و تیمەکانیان سەرقاڵی چاککردنەوەن، لە ماوەی سەعاتێکدا گرفتەکە چارەسەر دەکەن و دۆخەکە ئاسایی دەبێتەوە.

 

گروپە چەکدارەکانی سەر بە حکومەتی سوریا بەردەوامن لە بۆردومانکردن و گەمارۆدانی گەڕەکە کوردنشینەکانی ئەشرەفییە و شێخ مەقسود لە حەلەب، هێزەکانی ئاسایشی ناخۆش دەڵێت: بەردەوام دەبن لە پاراستنی هاووڵاتیان و وەڵامدانەوەی ئەو گروپانە.

هێزەکانی ئاسایشی ناوخۆ لە حەلەب لە راگەیەنراوێکدا ئاماژەی بەوەکرد، لە چوارچێوەی مافی رەوای پاراستنی هاووڵاتیان و ماڵ و موڵکیاندا، بەردەوام دەبن لە وەڵامدانەوەی هێرشی گروپەکانی حکومەتی کاتیی سوریا.

هێزەکانی ئاسایشی ناوخۆ لە حەلەب رایگەیاند، ئەوان وەک هێزەکانی ئاسایشی ناوخۆی حەلەب ئاشکرایدەکەن، کە لە 24 سەعاتی رابردوودا، گروپە چەکدارەکانی سەر بە وەزارەتی بەرگریی سوریا چەندین جار شێخ مەقسودیان کردووەتە ئامانج، لە ئەنجامدا سێ هاووڵاتی شەهید بوون و 26 کەسی دیکەش بریندار بوون، هەروەها زیانێکی زۆر بە ماڵ و موڵکی هاووڵاتیان گەیشتووە.

ئاماژەی بەوەشکرد، لە چوارچێوەی مافی رەوای پاراستنی هاووڵاتیاندا، وەڵامێکی توندیان بۆ ئەم هێرشانە هەبووە و هێزەکانیان دوو خاڵی گروپە چەکدارەکانیان کردە ئامانج.

هێزەکانی ئاسایشی ناوخۆ ئەوەشی خستەڕوو، ئەم هێرشانە پێشێلکارییەکی نوێی ئاگربەستە و بەردەوامیی پێشێلکردنی رێککەوتنەکانی پێشووە، دەشڵێت؛ وەڵامدانەوەکانی ئەوان لە چوارچێوەی یاسا و مافی رەوای پاراستنی هاووڵاتیان و ماڵ و موڵکیاندا دەبێت، هەروەها داوا  لە هەموو لایەنەکان دەکەن رێز لە مافی هاووڵاتیان بگرن و ناوچە نیشتەجێبوونەکان نەکەنە ئامانج.

ساڵی رابردوو زیاتر لە 320 هەزار كەس سەردانی نەخۆشخانەی شاریان كردووە، تەندروستیی سلێمانیش دەڵێت: هەر لەو ساڵەدا زیاتر لە 14 هەزار نەشتەرگەری جۆراوجۆر ئەنجامدراوە.

بەرێوەبەرایەتی گشتی تەندروستیی سلێمانی ئاماری ساڵی رابردووی نەخۆشخانەی شاری بڵاوکردەوە و بەپێی ئامارەکە، 320 هەزار 137 کەس سەردانی نەخۆشخانەی شاریان کردووە، لەو ژمارەیەش 238 هەزار و773 نەخۆش سەردانی بەشی فریاکەوتن و 69 هەزار 632 نەخۆش سەردانی بەشی ئۆپ دی یان کردووە و چارەسەری پێویستیان بۆ کراوە.

ئاماژەی بەوەشکردووە، ساڵی رابردوو لە نەخۆشخانەی شار 68هەزار و666 نەخۆش داخڵکراون، لەو ژمارەیە 20 هەزار و 548 نەخۆش لە بەشی فریاکەوتن، 10 هەزار و 790 نەخۆش لە بەشی گورچیلەی دەستکرد، هەشت هەزار و 644 نەخۆش لەبەشی هەناوی و پێنج هەزار و 687 نەخۆش لە بەشی شکاوی بووە.

هاوکات هەر بەپێی ئامارەکە، 14 هەزار و 240 نەشتەرگەری جۆراوجۆر ئەنجام دراوە، 104 هەزار و 459 تیشک گیراوە، 41 هەزار و 615 سۆنەر، 871 هەزار و 590 شیکاری تاقیگەیی، 23 هەزار و 829 هێڵکاری دڵ، سێ هەزار و 646 ئیکۆ و حەوت هەزار و 855 چارەسەری سروشتی ئەنجام دراوە.

هاوكات ساڵی ڕابردوو لە نەخۆشخانەی شار 14,240 نەشتەرگەری جۆراوجۆر ئەنجام دراوە و 104,459 تیشك گیراوە ، هەروەها 41,615 سۆنەر و 871,590 شیكاری تاقیگەیی و 23،829 هێڵكاری دڵ و 3,646 ئیكۆ و 7,855 چارەسەری سروشتی ئەنجام دراوە.