هەواڵەکان
بزووتنەوەی حەماس ئامادەکاری دەکات بۆ هەڵبژاردنی سەرۆکێکی نوێ بۆ مەکتەبی سیاسییەکەی لەم مانگەدا، ئەوەش دوای ئەوەی پۆستەکە بە بەتاڵی مایەوە لە دوای کوژرانی یەحیا سینوار لە ساڵی 2024. هەریەکە لە خەلیل حەیە و خالید مەشعەل بە بەهێزترین کاندید دادەنرێن بۆ وەرگرتنی ئەو پۆستە.
ئاژانسی رۆیتەرز لە زاری سەرچاوەکانی حەماسەوە بڵاویکردەوە، پرۆسەی هەڵبژاردنەکە دەستیپێکردووە و لە رێگەی دەنگدانی نهێنیی ئەنجومەنی شورای حەماسەوە دەبێت کە لە 50 ئەندام پێکهاتووە و نوێنەرایەتیی ئەندامانی بزوتنەوەکە دەکەن لە کەرتی غەززە، کەناری خۆرئاوا و دەرەوەی فەلەستین.
لە دوای کوژرانی یەحیا سینوار، ئەنجومەنێکی پێنج کەسی سەرپەرشتیی بزوتنەوەکە دەکات، بڕیاریشە لەم هەڵبژاردنەدا جگە لە سەرۆکی مەکتەبی سیاسی، جێگرێکیش بۆ شوێنی ساڵح عاروری هەڵبژێردرێت کە ساڵی 2024 لە هێرشێکی ئیسرائیلدا لە لوبنان کوژرا.
ئەم گۆڕانکارییانە لە کاتێکدایە حەماس رووبەڕووی قورسترین ئاڵەنگاری بووەتەوە لە مێژووی دامەزراندنییەوە؛ جەنگەکە دوو ساڵی خایاندووە و بەشێکی زۆری غەززە وێران بووە و بەپێی ئامارە تەندروستییەکان زیاتر لە 71 هەزار کەس کوژراون. هاوکات پلانەکەی ترەمپ بۆ ئاگربەست، داوای چەکدانانی حەماس و دروستکردنی ئیدارەیەکی تەکنۆکرات دەکات بۆ کەرتی غەززە لەژێر سەرپەرشتیی نێودەوڵەتیدا.
چاودێران پێیان وایە خالید مەشعەل نوێنەرایەتیی باڵە "پراگماتییەکە" دەکات و پەیوەندیی باشی لەگەڵ وڵاتانی عەرەبی هەیە، لە کاتێکدا خەلیل حەیە وەک دانوستانکارێکی سەرەکی، پەیوەندییەکانی بزوتنەوەکەی لەگەڵ ئێران پتەو کردووە. هەردوو کاندیدەکەش لە ئێستادا لە قەتەر نیشتەجێن.
شایانی باسە هەردوو کاندیدەکە پێشتر رووبەڕووی هەوڵی تیرۆرکردن بوونەتەوە؛ خەلیل حەیە لە ئەیلولی رابردوو لە هێرشێکی ئیسرائیلدا لە قەتەر کرایە ئامانج، خالید مەشعەلیش ساڵی 1997 لە ئوردن لەلایەن دەزگای هەواڵگریی ئیسرائیلەوە هەوڵی ژەهرخواردکردنی درا.
دەزگای ئاسایشی هەرێم رایگەیاند، لە ئۆپەراسیۆنێکی هاوبەشدا لەگەڵ هەواڵگریی عیراق، توانیویانە سەرکردەی باندێکی تاوانکاریی نێودەوڵەتی دەستگیر بکەن کە سەر بە تۆڕی "فۆکسترۆت"ـە و فەرمانی دەستگیرکردنی نێودەوڵەتی هەبووە.
بەپێی راگەیەندراوێکی دەزگای ئاسایشی هەرێم، پاش کۆکردنەوەی زانیاریی ورد و بەدواداچوون لە ناوخۆ و دەرەوەی وڵات، بە بڕیاری دادوەری لێکۆڵینەوەی ئاسایش و بە هەماهەنگی لەگەڵ دەزگای هەواڵگریی نیشتمانیی عیراق، توانراوە ئەو سەرکردەیە دەستگیر بکرێت.
دەزگای ئاسایش روونیکردووەتەوە، ئەو تۆڕە کە بە "فۆکسترۆت" ناسراون، باندێکی مەترسیداری نێودەوڵەتین و تێوەگلاون لە ئەنجامدانی چەندین تاوان لە وڵاتانی جیهاندا، پلانیشیان هەبووە خاکی عیراق بۆ جێبەجێکردنی مەرامە تاوانکارییەکانیان بەکاربهێنن.
ئاماژە بەوەش کراوە، دەستگیرکردنی ئەو سەرکردەیە و ئەندامانی دیکەی باندەکە لە ئۆپەراسیۆنێکدا بووە کە لە یەک کاتدا لە چەند پارێزگایەکی جیاواز ئەنجامدراوە.
بەهۆی نالەباریی کەشوهەوا و دابەزینی پلەکانی گەرما و ئەگەری دروستبوونی شەختە، لە سنووری ئیدارەی سەربەخۆی سۆران و قەزاکانی پێنجوێن و دوکان، سبەینێ چوارشەممە کرایە پشووی رەسمی لە ناوەندەکانی خوێندن.
بەڕێوەبەرایەتیی گشتیی پەروەردەی سۆران لە راگەیەندراوێکدا ئاشکرایکرد، دوای وەرگرتنی راپۆرتی کەشناسی سەبارەت بە هاتنی شەپۆلێکی بەفر و باران و دابەزینی پلەکانی گەرما بۆ ژێر سفر، لەپێناو پاراستنی سەلامەتیی مامۆستایان و خوێندکاران، بڕیاردراوە سبەینێ چوارشەممە 14ی کانوونی دووەمی 2026، لە سەرجەم خوێندنگە حکومی و ناحکومییەکان و پەیمانگاکانی سنوورەکە بکرێتە پشوو.
لای خۆیەوە، عەدنان کاکەڕەش، قایمقامی قەزای پێنجوێن بە کوردسات نیوزی راگەیاند، بە لەبەرچاوگرتنی دۆخی کەشوهەوا و بۆ پاراستنی سەلامەتیی خوێندکاران، بڕیاریانداوە رۆژی چوارشەممە لە تەواوی ناوەندەکانی خوێندنی سنووری قەزای پێنجوێن پشووی رەسمی بێت.
هاوکات، لە قەزای دوکانیش بە هەمان هۆکار و بەهۆی شەپۆلی سەرما و بەفرەوە، بڕیاردرا سبەینێ لە سەرجەم ناوەندەکانی خوێندن پشوو بێت.
ئەمانەتی گشتیی ئەنجومەنی وەزیرانی عیراق، وردەکاریی قۆناغەکانی نۆژەنکردنەوەی پرۆژەی فڕۆکەخانەی نێودەوڵەتیی ناسریەی راگەیاند، کە بڕیارە هۆتێلێک و چەند باڵەخانەیەک لەخۆبگرێت و ساڵانە توانای پێشوازیکردنی لە 750 هەزار گەشتیار هەبێت.
حەیدەر مەجید، وتەبێژی گشتیی ئەنجومەنی وەزیران بە ئاژانسی هەواڵی عیراقی راگەیاندووە، رێژەی تەواوکردنی کارەکان لە پرۆژەی فڕۆکەخانەی نێودەوڵەتیی ناسریە گەیشتووەتە قۆناغێکی پێشکەوتوو، پرۆژەکە بە یەکێک لە پرۆژە ستراتیژییە گرنگەکان دادەنرێت کە دەبێتە هۆی بوژانەوەی کەرتی ئابووری و خزمەتگوزاری لە پارێزگای زیقار و بەهێزکردنی پێگەی پارێزگاکە لەسەر نەخشەی گواستنەوەی ئاسمانی.
سەبارەت بە پێکهاتەی پرۆژەکە، وتەبێژەکە روونیکردەوە کە فڕۆکەخانەکە باڵەخانەی تایبەت بە گەشتیاران لەخۆدەگرێت کە توانای وەرگرتنی 750 هەزار گەشتیاری هەیە لە ساڵێکدا و پلان هەیە لە داهاتوودا فراوانتر بکرێت، جگە لەوەش هۆڵێکی تایبەت بە گەورە بەرپرسان و تاوەری چاودێری بە نوێترین ئامێری دەریاوانی و هۆتێلێکی چوار نهۆمی و بەشی کارگۆ و خزمەتگوزارییە زەمینی و ئاسمانییەکانی تێدایە.
سەرۆک کۆماری عیراق و سەرۆک وەزیرانی پێشوو کۆبوونەوە و جەختیان لە گرنگیی یەکڕیزیی نیشتمانی کردەوە، بۆ ئەوەی حکومەتێک پێکبهێنرێت کە توانای رووبەڕووبوونەوەی ئاڵەنگارییەکانی هەبێت.
د. لەتیف رەشید، سەرۆک کۆماری عیراق ئەمڕۆ سێشەممە، لە بەغداد پێشوازی لە حەیدەر عەبادی، سەرۆک وەزیرانی پێشووی عیراق کرد. لە دیدارەکەدا گفتوگۆ لەبارەی دواین پێشهاتە ناوخۆیی و ناوچەییەکان کرا.
هەردوولا هاوڕابوون لەسەر پێویستیی پتەوکردنی لێکتێگەیشتنە نیشتمانییەکان بۆ چارەسەرکردنی "پابەندبوونە دەستوورییەکان" و خۆشکردنی زەمینە بۆ قۆناغی داهاتوو.
لە بەشێکی دیکەی کۆبوونەوەکەدا، لەتیف رەشید و حەیدەر عەبادی جەختیان کردەوە کە دەبێت حکومەتێک پێکبهێنرێت توانای رووبەڕووبوونەوەی ئاڵەنگارییەکانی ئێستای هەبێت و کار بۆ بەدیهێنانی داواکاری و خواستەکانی هاووڵاتیان بکات.
ئیدارەی دۆناڵد ترەمپ، بە رەسمی سێ لقی کۆمەڵەی ئیخوان موسلیمینی لە رۆژهەڵاتی ناوەڕاست خستە لیستی "رێکخراوە تیرۆریستییەکان"ـەوە و سزای بەسەر ئەوان و ئەندامەکانیشیاندا سەپاند.
وەزارەتی دەرەوە و گەنجینەی ئەمریکا رایانگەیاند، ئەو سزایانە لقەکانی رێکخراوەکە لە میسر، لوبنان و ئوردن دەگرێتەوە، بە پاساوی ئەوەی "مەترسین بۆ سەر ئەمریکا و بەرژەوەندییەکانی".
بەپێی بڕیارەکە، وەزارەتی دەرەوەی ئەمریکا لقی لوبنانی وەک "رێکخراوی تیرۆریستیی بیانی" ناساندووە، کە ئەمەش توندترین جۆری پۆلێنکردنە و هەرجۆرە هاوکارییەکی ماددی بۆ ئەو گروپە بە تاوان دادەنرێت. هاوکات وەزارەتی گەنجینە، هەردوو لقی ئوردن و میسری خستووەتە لیستی "رێکخراوە تیرۆریستییە جیهانییەکان"ـەوە (ئەوانەی بە تایبەت پۆلێنکراون)، ئەوەش بەهۆی پشتیوانیکردنیان بۆ بزوتنەوەی حەماس.
مارکۆ روبیۆ، وەزیری دەرەوەی ئەمریکا لەبارەی بڕیارەکەوە رایگەیاند، ئەم هەنگاوە سەرەتایەکە بۆ "هەوڵێکی بەردەوام بەمەبەستی وشککردنی سەرچاوەکانی توندوتیژی و ناسەقامگیری کە پەیوەستن بە لقەکانی ئیخوان موسلیمینەوە لە هەرشوێنێک بن".
روبیۆ جەختیکردەوە کە ئەمریکا "هەموو ئامرازە بەردەستەکان بەکاردەهێنێت بۆ رێگرییکردن لەو لقانە لە دەستگەیشتن بە سەرچاوەکان یان پشتیوانیکردنی تیرۆر".
دەرکردنی ئەم بڕیارانە لە چوارچێوەی جێبەجێکردنی فەرمانێکدایە کە ساڵی رابردوو ترەمپ ئیمزای کردبوو و تێیدا وەزارەتەکانی دەرەوە و گەنجینەی راسپاردبوو باشترین رێگەی یاسایی بدۆزنەوە بۆ سزادانی لقەکانی ئەو رێکخراوە، کە بەوتەی واشنتۆن تێوەگلاون لە چالاکییەک کە ئاسایشی ناوچەکە و جیهان دەخاتە مەترسییەوە.
لە فەرمانەکەدا ئاماژە بەوە کراوە، باڵێکی ئیخوان لە لوبنان دوای هێرشەکەی 7ی ئۆکتۆبەری 2023 موشەکی ئاڕاستەی ئیسرائیل کردووە، هاوکات سەرکردەکانی لقی ئوردنیش تۆمەتبارن بەوەی راستەوخۆ پشتیوانییان لە حەماس کردووە.
ئەم بڕیارە جارێکی دیکە مشتومڕێکی کۆنی هێناوەتەوە ئاراوە، چونکە ترەمپ لە خولی یەکەمی سەرۆکایەتییەکەیدا لە ساڵی 2019 تاوتوێی ئەوەی دەکرد تەواوی رێکخراوەکە بخاتە لیستی تیرۆرەوە، بەڵام ئێستا فشارە سیاسییەکان بۆ گرتنەبەری رێوشوێنی توندتر دژی ئەو گروپە زیاتر بوون.
بەرپرسی پەیوەندییەکانی دەرەوەی بەڕێوەبەرایەتیی خۆسەر رایگەیاند، حکومەتی کاتیی سوریا بەرپرسیارە لە جێبەجێ نەکردنی رێککەوتنەکان و لە هێرشەکانی سەر شێخ مەقسود و ئەشرەفیە، چەکدارانی داعش و گروپە تورکی و بیانییەکانی بەکارهێناوە.
ئیلهام ئەحمەد، بەرپرسی فەرمانگەی پەیوەندییەکانی دەرەوەی بەڕێوەبەرایەتیی خۆسەر لە کۆنگرەیەکی رۆژنامەوانیدا رایگەیاند، حکومەتی کاتیی سوریا (ئینتیقالی) بەرپرسی سەرەکییە لە جێبەجێ نەکردنی رێککەوتنی 10ی ئازار و رووداوەکانی ئەم دواییەی گەڕەکی شێخ مەقسود بە شەڕێکی میدیایی دژی گەڕەکە کوردییەکان دەستیپێکرد.
ئیلهام ئەحمەد ئاشکرایکرد، وەزارەتی بەرگریی سوریا بە رەسمی ئۆپەراسیۆنی سەربازی دژی شێخ مەقسود و ئەشرەفیە راگەیاند، لە کاتێکدا هێزەکانی سوریای دیموکرات (هەسەدە) بەپێی رێککەوتنی 1ی نیسان لەو گەڕەکانە کشابوونەوە، بەڵام حکومەت بانگەشەی بوونی هێزەکانی هەسەدەی دەکرد وەک پاساوێک بۆ ئەنجامدانی هێرشێکی توند بە بەکارهێنانی 80 تانک.
بەرپرسەکەی بەڕێوەبەرایەتیی خۆسەر وتی: "لەو هێرشانەدا 48 کەس گیانیان لەدەستداوە و گروپە چەکدارەکان پێشێلکاریی گەورەیان ئەنجامداوە." جەختیشی کردەوە کە چەکدارانی رێکخراوی داعش، ئیگۆر، گروپە تورکییەکان و چەکداری بیانی لەو هێرشانەدا بەشداربوون.
سەبارەت بە هەڵوێستی نێودەوڵەتی، ئیلهام ئەحمەد روونیکردەوە کە یەکێک لە مەرجەکانی هەڵگرتنی سزاکانی ئەمریکا و رۆژئاوا لەسەر سوریا، پاراستنی کەمینەکان و دەرکردنی بیانییەکان بوو، بەڵام حکومەت پێچەوانەکەی کردووە و هێرشی کردووەتە سەر عەلەوی، دروز، مەسیحی و ئێستاش کوردەکان دەکاتە ئامانج، بۆیە پێویستە واشنتۆن هەڵوێستی خۆی بەرامبەر ئەو حکومەتە روون بکاتەوە کە کۆمەڵکوژی دژی گەلەکەی ئەنجام دەدات.
لە کۆتاییدا ئیلهام ئەحمەد رایگەیاند، ئەوان لەگەڵ گفتوگۆ و بەردەوامیی دانوستاندان، بەڵام دەبێت هێرشەکان رابگیرێن و پاراستنی خەڵک لە حەلەب و عەفرین مسۆگەر بکرێت، هەروەها برینەکانی شێخ مەقسود و عەفرین بە سەرپەرشتیی نەتەوە یەکگرتووەکان و لایەنە نێودەوڵەتییەکان چارەسەر بکرێن.
وەزارەتی پێشمەرگە رایگەیاند، پارەی هاوکاریی هێزەکانی هاوپەیمانان گەیشتووەتە سەر هەژماری وەزارەتەکە و رۆژی پێنجشەممە دەست بە دابەشکردنی دەکرێت.
بەڕێوەبەرایەتیی گشتیی بودجە و بەرنامەکان (ژمێریاریی سەربازی) لە وەزارەتی پێشمەرگە بڵاویکردەوە، ئەمڕۆ سێشەممە، هاوکاریی دارایی هاوپەیمانان بۆ مانگی 12ـی ساڵی رابردوو خراوەتە سەر هەژماری وەزارەتەکەیان.
ئاماژەی بەوەشکردووە، دوای ئەنجامدانی رێکارە دارایی و ژمێریارییەکان، رۆژی پێنجشەممە 15ـی کانوونی دووەمی 2026، دەست بە دابەشکردنی هاوکارییەکە دەکرێت.
بەپێی راگەیەندراوەکەی وەزارەت، لەم مانگەدا زیاتر لە 97%ی ئەفسەر و پلەدار و پێشمەرگە لە رێگەی پرۆژەی "هەژماری من"ـەوە هاوکاریی هاوپەیمانان وەردەگرن و ئەوانەی دیکەش لە رێگەی سیستمی بانکەوە وەریدەگرن.
كەجەكە دەڵێت، هێرشەكانی حەلەب بۆ لەناوبردنی ئیدارەی خۆبەڕێوەبەری باكور و رۆژهەڵاتی سوریا پێشێلكردنی ئاگربەست بووە.
هاوسەرۆكایەتی كۆنسەی بەڕێوەبەری كۆما جڤاكێن كوردستان "كەجەكە" راگەیەنراوێكی لەبارەی رەوشی سوریا بڵاوكردەوە و ئاماژەی بەوەكردووە، ئامانجی هێرشەكانی سەر حەلەب لەناوبردنی ئیدارەی خۆبەڕێوەبەری باكور و رۆژهەڵاتی سوریا و شكاندنی ئاگربەست بووە و ئەو هێرشانە بەشێكن لە زنجیرە هێرشێك دژی دەستكەوتەكانی كورد لە هەموو ئەو وڵاتانەی كورد تێیدا دەژین.
راشیگەیاندووە، بە ئامانجگرتنی گەڕەكەكان دوای رێككەوتنی دیمەشق دەرخەری ئەو راستییەن، كە رەزامەندی ئەمریكا و هێزە نێودەوڵەتییەكان وەرگیراوە.
لە بەشێكی تری راگەیەنراوەكەدا هاتووە، ئەو هێرشانە بۆ سەر گەڕەكە كوردییەكان، هێرشكردنە بۆسەر تەڤگەری ئازادیی و هەوڵدانە بۆ پەكخستنی ئاگربەست كە بە وردی جێبەجێكراوە.
كەجەكە جەختیشیكردووەتەوە، بەرپرسیارێتی خۆیان لە پرۆسەی ئاشتی و كۆمەڵگەی دیموكراتیدا جێبەجێكردووە، داوا لە لێپرسراوانی ئاكەپە و مەهەپەش دەكات، هەنگاوی پێویست بنێن بۆ سەركەوتنی پرۆسەی ئاشتی و ئەو سیاسەتانە رابگرن كە پرۆسەكە لەناودەبەن.
حزبوڵای عیراق هەڕەشە دەكات و دەڵێت وەڵامی هەر هێرشێك دەداتەوە كە ئەمریكا بۆ سەر ئێران ئەنجامی بدات.
ئەبو حسێن حەمیداوی ئەمینداری گشتی حزبوڵای عیراقی لە راگەیەندراوێكدا بڵاویكردووەتەوە، لە ئێستادا ململانێیەكی نوێ لە نێوان هەردوو بەرەی رەوا و ناڕەوا هەیە و بەرەی رەوا پرەنسیپەكانی روونە و بەرەی ناڕەواش هەموو جیهان دەیناسێت و ئەو تاوانانە دەزانێت كە بەرامبەر گەلانی ئازاد ئەنجامی دەدات.
دەشڵێت، لە ئێستادا بەرەی ناڕەوا چەندین ئامادەكاری دەكات بۆئەوەی ئێران بكاتە ئامانج و بە ئەركی ئەخلاقیی خۆیانی دەزانن لە پشت گەلی ئێرانەوە بوەستن و بەرگری لێ بكەن، دوپاتیشیكردووەتەوە، وەڵامیان بۆ هەر هێرشێك دەبێت كە ئەمریكا دژی ئێران ئەنجامی بدات.
بەپێی پێشبینییەکانی کەشناسی لە 48 سەعاتی داهاتوودا بارانبارین بەردەوام دەبێت و پلەکانی گەرما نزم دەبنەوە.
بەڕێوەبەرایەتی گشتی کەشناسی هەرێم پێشبینییەکانی بۆ ئەمڕۆ و سبەینێ بڵاوکردەوە و رایگەیاند، ئەمڕۆ بە گشتی کەش هەور و بارانبارین دەبێت، لەگەڵ زیادبوونی خێرای با و دروستبوونی هەورە بروسکە و بەفربارین لەسەر ناوچە شاخاوییە بەرزەکان، ئاماژەی بەوەشکرد، بڕی دابارین زیاد دەبێت لە سنوری پارێزگای سلێمانی و دهۆک هەڵەبجە شێوازی دابارین هەندێ کات دەگۆڕێت بۆ بارانی مامناوەند و لێزمە باران.
ئەوەشی خستەڕوو، . دوبارە بە گشتی کاریگەری ئەم شەپۆلەی رووی لە ناوچەکەمان کردووە، لە دوای نیوەڕۆی ئەمڕۆ چالاکتر دەبێت سەرجەمی ناوچەکەمان بارانبارینی دەبێت .
کەشناسی هەرێم راشیگەیاند، کاریگەری شەپۆلی بارانبارین بەردەوامی دەبێت باران لە سەرجەم ناوچەکەمان دەبارێت بە بڕی جیاجیا و لەگەڵ هاتنی بارستە هەوایەکی سارد و نزم بوونەوەی زیاتری پلەکانی گەرما.
ئاشکرایکرد، لە سەنتەری سلێمانی و دهۆک، ئیدارەی زاخۆ، ئیدارەی سۆران، راپەڕین و زۆربەی ناوچە شاخاوییەکان بەفربارینی دەبێت لە کاتەکانی بەیانی.
کەشناسی دەشڵێت، کاریگەری ئەم شەپۆلە تا ئێوارەی رۆژی چوارشەممە لەسەر ناوچەکەمان کۆتای دێت .
بەپێی ئامارێكی نەتەوە یەكگرتووەكان، لەسەرەتای دەستپێكردنی ئاڵۆزییەكان لە دوو گەڕەكی حەلەب، نزیكەی 119 هەزار كەس ئاوارەبوون.
ستیڤان دوجاریك وتەبێژی نەتەوە یەكگرتووەكان رایگەیاند، رێكخراوەكەیان لە نزیكەوە چاودێری رەوشی حەلەب دەكات و لەگەڵ هەموو لایەنە پەیوەندیدارەكان لە هەماهەنگیدایە.
وتیشی، كۆمیسیۆنی نەتەوە یەكگرتووەكان بۆ كاروباری پەنابەران، هاوكاری پێشكەشی ئاوارەكان دەكات و پەناگەی كاتی و بەتانی و جلوبەرگی زستانەیان بۆ دابین دەكەن.
بە وتەی دوجاریك، لەو كاتەوەی ئاڵۆزییەكان لە حەلەب دەستیپێكردووە تا رۆژی یەكشەممە، نزیكەی 119 هەزار كەس ئاوارە بوون.
دوجاریك ئاماژەی بەوەشكرد، نەتەوە یەكگرتووەكان ئاگاداری ئەو راپۆتانەیە كە لەبارەی كوژراو و بریندارەكان بڵاودەكرێتەوە و جەختدەكەنەوە لە گرنگی پاراستنی مەدەنییەكان و ژێرخانی ناوچەكە.
ترەمپ پێناسی گومرگی بەسەر ئەو وڵاتانەدا دەسەپێنێت کە مامەڵەی بازرگانی لەگەڵ ئێران ئەنجام دەدەن.
دۆناڵد ترەمپ سەرۆکی ئەمریکا رایگەیاند، پێناسی گومرگی بە رێژەی ٪25 بەسەر ئەو هەموو وڵاتانەدا دەسەپێنێت کە مامەڵەی بازرگانی لەگەڵ ئێران ئەنجام دەدەن.
ئاماژەی بەوەشکرد، هەر وڵاتێك بەردەوام بێت لە مامەڵەی بازرگانی لەگەڵ ئێران دەبێت پێناسی گومرگی بەرێژەی 25% بدات بە هەر مامەڵەیەك كە لەگەڵ ئەمریكا دەیكات.
هاوکات، کاڕۆلین لیڤێت وتەبێژی کۆشکی رایگەیاند، هێرشی ئاسمانی لەنێو بژاردەکانی سەرۆکی ئەمریکادایە، بەڵام هەمیشە هەڵبژاردەی دیپلۆماسی لە بژاردەی یەکەمی دۆناڵد ترەمپە.
لەلای خۆشیەوە، وەزیری دەرەوەی ئێران رایگەیاند، وڵاتەکەی ئامادەی جەنگ و گفتوگۆشن.
عەزیز نەسیرزادە، وەزیری بەرگریی ئێران هۆشداری توند دەداتە ئەو وڵاتانەی هەڕەشەی هێرشی سەربازی دەكەن و رایدەگەیەنێت، هەر وڵاتێك خاكەكەی بۆ هێرشكردنە سەر ئێران بەكاربهێنرێت، دەبێتە ئامانجی رەوای ئەوان.
وەزیری بەرگریی ئێران رایگەیاند، "سوپرایزیان" هەیە بۆ روبەڕوبونەوەی هەڕەشەكان و هێرشبەران بەو هۆیەوە توشی ئازار و مەینەتیی گەورە دەبن.
نەسیرزادە هۆشداریدا بەو لایەنانەی بە بیانووی جۆراوجۆر هەڕەشەی هێرشی سەربازی دەكەن و وتی: "ئەگەر هەر هەڵەیەك بكەن و دەستدرێژی بكەنە سەر بەرژەوەندییەكانی وڵاتەكەمان، ئێمەش سەرجەم بەرژەوەندییەكانیان لە هەر شوێنێكی جیهان بێت دەكەینە ئامانج".
سەبارەت بە هاوكاریكردنی هێرشبەران، وەزیری بەرگریی ئێران وتی: "هەر وڵاتێك كارئاسانی بۆ هێرش كردنە سەر ئێران بكات، یان بنكەكانی بخاتە خزمەت هێرشبەران، دەبێتە ئامانجێكی رەوا بۆ ئێمە".
ئاماژەی بەوەشدا، دەبێت ئەو سیاسەتمەدارانەی "كورتبینن" و هەڕەشە لە ئێران دەكەن، گەورەیی گەلی ئێران ببینن و لەوە تێبگەن كە هێزی سەرەكیی وڵاتەكە لە گەلەكەیدایە.
بەڕێوەبەرایەتی گشتیی كەشناسی هەرێم بڵاویكردەوە، شەپۆلێكی نوێی بارنبارین بەڕێوەیە و پێشبینیش دەكرێت لە ناوچە شاخاوییەكان بەفربارین دەستپێبكاتەوە.
بەڕێوەبەرایەتی گشتیی كەشناسی و بومەلەرزەزانی هەرێمی كوردستان رایگەیاند، پێشبینی شەپۆلێكی نوێی بەفر و بارانبارین روو لە ناوچەكانی هەرێمی كوردستان بكاتەوە و تا ئێوارەی ئەمڕۆش بە نمەباران بەردەوامدەبێت.
كەشناسی ئەوەشی روونكردووەتەوە، پێشبینیش دەكرێت لە كاتەكانی ئێوارەی سێشەممەدا خێرایی بارانبارینەكە زیادبكات و ببێتە لێزمە باران و خێرایی باش، بۆ سەروی 30 كم لە سەعاتێكدا زیادبكات و بەفربارینیش لە ناوچە شاخەوییەكان دەستپێبكات.
سەرۆك كۆمار و سەرۆكی دەستەی حەشدی شەعبی كۆبونەوە و جەختیان لە گرنگیی چەسپاندنی سەقامگیریی سیاسی و ئەمنی كردەوە.
بەپێی راگەیەندراوی سەرۆكایەتی كۆمار، ئەمڕۆ دووشەممە، د. لەتیف رەشید، سەرۆك كۆمار پێشوازیكرد لە فالح فەیاز، سەرۆكی دەستەی حەشدی شەعبی.
لە دیدارەكەدا باس لە دواین پێشهاتەكان كرا و جەخت لە گرنگیی چەسپاندنی سەقامگیریی سیاسی و ئەمنی لە وڵات كرایەوە.
سەرۆك كۆمار جەختیكردەوە لە پێویستیی پاڵپشتیكردنی دامەزراوە نیشتمانییەكان و پەرەپێدانی هەماهەنگیی نێوانیان بۆ روبەڕوبونەوەی ئاستەنگەكانی ئێستا، بەجۆرێك كە ببێتە هۆی چەسپاندنی ئاسایش و بەدیهێنانی خواستی عیراقییەكان بۆ سەقامگیری و گەشەپێدان.
هەر لە دیدارەكەدا، سەرۆك كۆمار پابەندبوونی خۆی بە پاڵپشتیكردنی ئەو هەوڵانە دوپاتكردەوە كە ئامانجیان پتەوكردنی یەكڕیزیی نیشتمانییە. لەبەرامبەردا فالح فەیاز ستایشی هەڵوێست و پشتیوانیی سەرۆك كۆماری كرد بۆ دامەزراوە ئەمنییەكان.