هەواڵەکان
بەرگری شارستانی سۆران، راگەیندراوێکی بڵاوکردوەتەوە و داوا لە هاووڵاتییان دەکات نەچنە ناوچە شاخاوییەکان، قەراخ روبار و ئەو دۆڵ و نشێوانەی کە ساڵانە مەترسی لافاو و کۆبونەوەی ئاویان لێ دەکرێت.
ئەمڕۆ شەممە، بەرێوەبەرایەتی بەرگری شارستانی ئیدارەی سۆران رایگەیاندوە؛ بەهۆی پێشبینەکانی کەشناسی لە هەرێمی کوردستان، دوا نیوەڕۆی ئەمڕۆ پێشبینی ئەگەری هاتنی شەپۆلێکی بەهێزی بارانبارین دەکرێت.
ئاماژەیان بەوەکردوە؛ بۆ ئەوەی هەمووان پارێزراوبن، داوا لە هاووڵاتییانی ئیدارەی سەربەخۆی سۆران دەکەن بۆ کاری پێویست نەبێت سەردانی ناوچە شاخاویەکان نەکەن، خۆیان بەدوور بگرن لە قەراغ روبارەکان و ئەو دۆل و نشێوانەی کە ساڵانە مەترسی لافاو و کۆبونەوەی ئاویان لێ دەکرێ.
لەبدرەنگانێکی شەوی رابردوەوە شەپۆلێک بارانبارین تەواوی هەرێمی کوردستانی گرتوەتەوە و بە گوێرەی پێشبینییەکانی کەشناسیش، بەردەوام دەبێت و لە دوا نیوەڕۆی ئەمرۆوە لە هەندێک ناوچە بارانی بەخوڕ دەبارێت و هەورەتریشقە رودەدات.
وەزارەتی بازرگانی عیراق رایگەیاندوە لەگەڵ چەند كۆمپانیایەكی ئەوروپی و نێودەوڵەتی لە گفتوگۆدان بۆ هەناردەكردنی بەرهەمی ناوخۆی عیراق بۆ بازاڕەکانی جیهان.
محەمەد حەنون وتەبێژی وەزارەتی بازرگانی عیراق رایگەیاند، ئامانجیانە بەرهەمی عیراق لە بازاڕەكانی جیهان و وڵاتانی عەرەبی رۆڵی هەبێت، بۆ ئەو مەبەستەش لەگەڵ چەند كۆمپانیایەكی ئەوروپی و نێودەوڵەتی لە گفتوگۆدان بۆئەوەی بەرهەمی عیراق رەوانەی بازاڕە جیهانییەكان بكرێت و بە ئاسانی هەناردە بكرێن.
ناوبرا ئاماژەی بەوەشکردوە؛ پاڵپشتی كەرتی تایبەت دەكەن بە ئامانجی فراوانكردنی بازرگانی دەرەكی و بۆ هەمان مەبەست سەكۆیەكی ئەلیكترۆنیش دادەنێن، بە مەبەستی كارئاسانیكردن بۆ هەناردە و هاوردەكردن و تائێستاش ناسنامەی 306 بەرهەمی كشتوكاڵیی و پیشەسازیی و خۆراك لەو سەكۆ ئەلیكترۆنییە تۆماركراوە.
کەشناسی رێژەی باران بارینی 24 سەعاتی رابردوی لە شار و ناوچەکانی هەرێم بڵاوکردەوە و بە گوێرەی داتاکان، لە سنوری نازەنین کە 36 ملیم و قەزای چەمچەماڵ زۆترین باران باریوە کە رێژەکەی 35 ملیمە و لە قەزای پێنجوێنیش کەمترین رێژەی بارانبارین تۆمارکراوە کە دوو ملیمە.
ئەمڕۆ شەممە، بەڕێوەبەرایەتی کەشناسی و بومەلەرزەزانی هەرێم رێژەی بارانبارینی 24 سەعاتی رابردوی بڵاوکردەوە و بە گوێرەی داتاکان لە سنوری نازەنین 36.3 ملیم و لە قەزای چەمچەماڵ 35 ملیم باریوە ، کەمترین رێژەی باران بارینیش لە قەزای پێنجوێنە کە تەنها دوو ملیم باریوە.
بە گوێرەی داتاکان کە لە سەعات نۆی دوێنێ بەیانی تا نۆی ئەمڕۆ تۆمارکراون، لە پارێزگاکانی هەولێر 9.3 ملیم و لە سلێمانی 11.9 و لە دهۆکیش حەوت ملیم و لە کەرکوکیش 9.8 بارانباریوە.
بەڕێوبەرایەتییەکە پێشبینیشی کردوە؛ ئەمڕۆ و سبەینێش بارانبارین بەردەوام دەبێت و ئەگەری بارینی بەفریش هەیە لە ناوچە شاخاوییەکان.
کەشناسی بڵاویکردوەتەوە بارانبارین بەردەوام دەبێت و لە دوا نیوەڕۆوە لە هەندێک ناوچە بارانی بەلیزمە و هەورە تریشقە دەبێت، لەگەڵ ئەگەری بارینی بەفرێکی کەم لە ناوچە شاخاوییەکان.
ئەمڕۆ شەممە، بەڕێوەبەرایەتی گشتی کەشناسی و بوومەلەرزەزانی هەرێم؛ کەشى پێشبینیکراوى 48 سەعاتی داهاتوو بڵاوکردوەتەوە و بە گوێرەی پێشبینییەکان، بارانبارین بەردەوام دەبێت و پلەکانی گەرماش کەمێک بەرز دەبنەوە، بەراورد بە تۆمارکراوەکانی دوێنێ.
لەبارەی کەشی سبەینێشەوە ئاماژەیان بەوەکردوە، ئاسمان هەوری باراناوی دەبێت لە زۆربەی ناوچەکان بارانبارینی لەسەرەخۆ و بۆ مامناوەند دەبێت و پلەکانی گەرما نزیک دەبێت لە تۆمارکراوەکانی ئەمڕۆ
بەرزترین پلەکانی گەرمای پێشبینیکراو لە ناوچەکانی هەرێم بەم شێوەیە دەبێت؛
هەولێر : 20 پلەی سیلیزی
سلێمانی : 19 پلەی سیلیزی
دهۆک : 18 پلەی سیلیزی
زاخۆ : 19 پلەی سیلیزی
کەرکوک : 21 پلەی سیلیزی
هەڵەبجە : 20 پلەی سیلیزی
سۆران : 17 پلەی سیلیزی
حاجی ئۆمەران : 4 پلەی سیلیزی
گەرمیان : 22 پلەی سیلیزی
بەڕەێوەبەرایەتی کۆنترۆڵی کارەبای سلێمانی بڵاویکردوەتەوە بەهۆی بارانبارین و دروستبوونی شۆرت لەسەر تۆڕەکانی دابەشکردنی کارەبا، ژمارەیەک فیدەری کارەبا لە ناو شارو دەرەوەی شار کێشەیا بۆ دروست بووە و بەهۆیەوە، ژمارەیەک گەڕەک و شوێن کارەباین نییە.
ئەمڕۆ شەممە، ئەندازیار غالب محمد بەڕێوەبەری کۆنترۆڵی کارەبای سلێمانی رایگەیاندوە، بەهۆی باران بارینەوە چەند فیدەرێکی لە دەرەوەی شار و ناو شار کێشەیان بۆدروست بووە و شۆرت تیێیاندا رویداوە.
ناوبراو ئاماژەی بەوەشکردوە، ژمارەیەک گەڕەک و خانو کارەبایان نییە و لە ئێستادا تیمی هۆبەکانی دابەشکردنی کارەبا سەرقاڵی چارەسەرکردنی کێشەکانن
کارەبای سلێمانی ئەوەشی خستوەتەڕوو؛ ساڵانە لەگەڵ یەکەم بارانبارین ئەم حاڵەتە دوبارە دەبێتەوە کێشە تەکنیکییە نادیارەکانی سەرتۆڕەکانی کارەبا دەردەکەوێت و بەزووچارەسەر دەکرێن.
جێی باسە، لە درەنگانێکی شەوەوە باران بارین سنوری سلێمانی گرتوەتەوە و ئەمەش یەکەم بارانی وەرزی پاییزە و بە گوێرەی شارەزایانی کەشوهەوا زیاتر لە 10 ملیم باران باریوە
رۆژنامەی واشنتۆن پۆست رایگەیاندووە، لە کاتێکدا هێزەکانی ئەمریکا ئامادەکاری دەکەن بۆ وەرگرتنی فەرمانی ئەگەری هێرشکردنە سەر ڤەنزوێلا، وەزیری جەنگی ئەمریکا و سەرۆکی ئەرکانی هاوبەشی سوپای ئەمریکا، دوێنێ هەینی بۆ رۆژی دووەم لەگەڵ ترەمپ لە کۆشکی سپی کۆبوونەتەوە و تاوتوێی ئەگەری هەنگاوی سەربازی لە ڤەنزوێلایان کردوە.
رۆژنامەکە لە زاری بەرپرسێکی حکومەتی ئەمریکاوە بڵاویکردەوە، چەند بژاردەیەک خراوەتە بەردەم دۆناڵد ترەمپی سەرۆکی ئەمریکا و لە سەرچاوەیەکی دیکەشەوە زانیویەتی کە فڕۆکەوانە شەڕکەرەکانی جێگیر لە کەشتییەکی فڕۆکە هەڵگری ئەمریکی کە بۆ ناوچەکە جێگیرکراون، پشکنینی سیستەمی بەرگری ئاسمانی ڤەنزوێلا دەکەن.
سەرچاوەکان ئاماژەیان بەوەشکردووە، تا ئێستا دیار نییە ترەمپ بڕیاری هێرشکردنە سەر ڤەنزوێلای داوە یان نا، بەڵام چەند رۆژێکە گفتوگۆی ئاست بەرز سەبارەت بە هێرشکردنە سەر ڤەنزوێلا و چۆنیەتی ئەنجامدانی ئەو هێرشە بەردەوامە.
بەگوێرەی راپۆرتەکەی رۆژنامەی واشنتۆن پۆست، جێگری سەرۆکی ئەمریکا، جەی دی ڤانس، مارکۆ روبیوی وەزیری دەرەوە و ستیڤن میلەر، جێگری سەرۆکی ئەرکانی کۆشکی سپیش ئامادەی کۆبوونەوەکە بوون کە تایبەت بوە بە ئەگەری هێرشکردنە سەر وڵاتی ڤەنزوێلا.
ئەمریکا بە ناردنی گەورەترین و نوێترین کەشتیی فڕۆکە هەڵگری جیهان بە ناوی جیراڵد فۆرد بۆ ناوچەی کاریبی، پێی ناوەتە قۆناغێکی نوێی رووبەڕووبوونەوەی سەربازی لەگەڵ ڤەنزوێلا و پنتاگۆن جێگیرکردنی جیراڵد فۆردی بۆ ناوچەکە بە "ئۆپەراسیۆنێک دژی بازرگانیکردن بە ماددە هۆشبەرەکان و رێکخراوە تاوانکارییە نێودەوڵەتییەکان" وەسفکرد.
رۆژنامەکە هەروەها بە پشتبەستن بە سەرچاوەیەکی ئاگاداری دیکە ڕایگەیاندووە کە فڕۆکەوانە شەڕکەرەکانی جێگیر لە کەشتییەکی فڕۆکە هەڵگری ئەمریکی کە بۆ ناوچەکە جێگیرکراون، پشکنینی سیستەمی بەرگری ئاسمانی ڤەنزوێلا دەکەن.
دۆناڵد ترەمپ، سەرۆکی ویلایەتە یەکگرتووەکانی ئەمریکا رایگەیاند، بەنیازە هەفتەی داهاتوو رێکاری یاسایی بەرانبەر کەناڵی بی بی سی بەریتانی بگرێتەبەر و داوای قەرەبوو بکاتەوە و ئاماژەی بەوەشکردوە ئەو قەرەبوەیە داوای دەکات برەکەی "لە نێوان یەک بۆ پێنج ملیار دۆلار" دەبێت.
سەرۆکی ئەمریکا بە رۆژنامەنووسانی راگەیاند، کە تا ئێستا لەگەڵ کیەر ستارمەر سەرۆک وەزیرانی بەریتانیا سەبارەت بە بی بی سی قسەی نەکردووە، بەڵام ئەو داوای قەرەبوو لەو کەناڵە دەکات کە دەستکاری وتارەکەیان کردوە.
کەناڵی بی بی سی لەم دواییانەدا بەشێک لە وتارێکی ترەمپ لە ئەڵقەیەکی بەرنامەی پانۆرامادا دەستکاری کردووە و تێیدا نیشانی دەدات کە پشتگیری لە هێرشکردنە سەر کاپیتوڵی ئەمریکا دەکات.
دوای ئاشکرابوونی ئەوکارەیان بی بی سی داوای لێبوردنی کردووە، بەڵام داواکارییەکەی بۆ قەرەبووکردنەوەی رەتکردووەتەوە.
ئەمە لە کاتێکدایە پێشتر پارێزەرانی ترەمپ هەڕەشەی ئەوەیان کردبوو کە ئەگەر بی بی سی داوای لێبوردن لە ترەمپ نەکات و قەرەبوی مادیشی نەکاتەوە ، بە بڕی یەک ملیار دۆلار (٧٥٩ ملیۆن پاوەند) سکاڵایان لەسەر تۆمار دەکەن.
میدیاکانی سوریا بڵاویانکردەوە لە رێگەی درۆنەوە ناوچەی مێززە 86 لە دیمەشق کراوەتە ئامانج و زانیاریەی سەرەتاییەکان، پشتراستیان کردوەتەوە بەهۆی تەقینەوەکەوە ژمارەیەک کەس بریندار بوون .
ئەمڕۆ هەینی ئاژانسی هەواڵی عەرەبی سوریا (سانا) بڵاویکردوەتەوە چەند تەقینەوەیەک ناوچەی مێززەیان لە دیمەشق کردوەتە ئامانج و لێکۆڵینەوە لە روداوەکە دەستی پێکردوە.
بەگوێرەی زانیارییەکان تەقینەوەکە لە دەوروبەری مزگەوتەکێک رویداوە و پێدەچێت بەهۆی مووشەکەوە بووبێت کە لە فڕۆکەیەکی بێفڕۆکەوانەوە ئاراستەی کراون.
ناوچەی مێززە ، یەکێکە لە ناوچە هەستیارەەکانی دیمەشق و چەندین دامەزراوەی ئەمنی و سەربازیی تێدایە و رەنگە هەر ئەمەش هۆکاری کردنە ئامانجەکە بێت.
پنتاگۆن راگەیەندراوێکی بڵاوکردوەتەوە وتێیدا هاتووە؛ وەزارەتی دەرەوەی ئەمریکا رەزامەندی داوە لەسەر فرۆشتنی سیستەمی پەیوەندی سەربازی بە عیراق بە بەهای 100 ملیۆن دۆلار، ئەم هەنگاوە ئامانجی بەرزکردنەوەی تواناکانی هێزە عێراقییەکانە لە هەماهەنگی ئەمنی و پەیوەندییە مەیدانییەکان.
بەگوێرەی راگەیەندراوێکی دەزگای هاریکاری ئاسایشی بەرگریی پنتاگۆن، رێککەوتنەکە بریتییە لە فرۆشتنی سیستەمی سەربازی پەیوەندیکردن کە؛ رادیۆی پۆرتەبڵ، سیستەمی وێستگەی رادیۆیی و سیستەمی دووبارەکردنەوەی رادیۆ بۆ دابینکردنی پێداویستییەکان بۆ پەیوەندییەکانی هێزە عیراقییەکان لە ئۆپەراسیۆنە سەربازی و ئەمنییە جیاوازەکاندا.
لە راگەیەندراوەکەدا ئاماژە بەوە کراوە کە ئەم فرۆشتنە دەکەوێتە چوارچێوەی هاوکارییە ئەمنی و بەرگرییە بەردەوامەکانی نێوان ئەمریکا و عیراق و توانای سوپای عیراق بەرز دەکاتەوە بۆ ئەنجامدانی ئەرکەکانی بە شێوەیەکی کاریگەرتر لە بەرامبەر ئاستەنگە ئەمنییە جیاوازەکاندا.
سیستەمەکە دەتوانێت توانا گرنگەکانی فەرماندەیی و کۆنترۆڵکردنی عیراق باشتر دەکات، بەرگرییەکەی لە بەرانبەر هەڕەشەکانی ناوچەکە بەهێزتر دەکات و توانای عیراق بەهێز دەکات بۆ پاراستنی سنورەکانی و ژێرخانی وزە و دانیشتوانەکەی.
لە پەیوەندییەکی تەلەفونیدا، سەرۆک کۆماری ئێران، لەگەڵ سەرۆک وەزیرانی عیراق رایگەیاند: بەڕێوەچوونی شکۆدارانەی هەڵبژاردنی ئەنجومەنی نوێنەرانی عیراق نیشانەی گەورەیی و تێگەیشتنی هاووڵاتییانە و دەستکەوتێکی بەنرخ و سەرچاوەی بەرزی متمانەی گەلی عیراقە.
ئەمڕۆ هەینی، مەسعود پزیشکیان، سەرۆک کۆماری ئێران لە پەیوەندییەکی تەلەفونیدا لەگەڵ محەمد شیاع سودانی، سەرۆک وەزیرانی عیراق، پیرۆزبایی سەرکەوتنی هەڵبژاردنی ئەنجومەنی نوێنەرانی عیراقی کرد و بە دەستکەوتێکی بەنرخ و سەرچاوەی بەرزکردنەوەی متمانە و گەورەیی گەلی عیراقی وەسف کرد.
پزیشکیان هیواشیخواستوە، دوای هەڵبژاردنەکان و لە داهاتوودا پەیوەندی و هاریکاری نێوان ئێران و عیراق لە هەموو بوارەکاندا، بەشێوەیەکی رێکخراو و قووڵتر لە چاو رابردودا فراوانتر و باشتر ببێت.
لە بەرانبەردا سەرۆک وەزیرانی عیراق وێڕای بەرز نرخاندنی پەیوەندییە تەلەفۆنییەکە و پیرۆزبایی سەرۆک کۆماری ئێران سوپاسی کردوە و رایگەیاندوە؛ لەم هەڵبژاردنانەدا گەلی عیراق جارێکی دیکە پابەندبوونی خۆیان بەو ئەزموون و سیستەمی دیموکراسییەی بەدەستیان هێناوە نیشانداوە، ئومیدیشی کردوە، کە دەرئەنجامی ئەم هەڵبژاردنە کاریگەری بنیاتنەری هەبێت لەسەر بەردەوامیی رێبازی بنیاتنانەوە و پێشکەوتنی عیراق لە چاو ساڵانی رابردوودا.
تیلیگرام پاکتاوکردنی دەستپێکردوە و بەگوێرەی داتاکانی پلاتفۆڕمەکە تەنها لەیەک رۆژدا زیاتر لە 500 هەزار گروپ و کەناڵی بلۆککردوە، کە لە ماوەی حەوت مانگی رابردودا وێنەی نەبوە و بەرزترین رێژەی بلۆککردنە.
بەگوێرەی داتاکانی تیلیگرام، تەنها رۆژی پێنجشەممە 519 هەزار و 645 گروپ و کەناڵی بلۆککردوە، کە ژمارەیەکی زۆریان هۆکارەکەی پەیوەندیدار بووە بە تیرۆرەوە.
ئامارەکانی تیلیگرام، ئاماژەبەوەشدەکەن، له سهرهتای ئەمساڵەوە نزیکەی 35 ملیۆن کەناڵ و گرووپ لە بەرنامەکەدا سڕاونەتەوە، کە زیاتر لە 200 هەزاریان راستەوخۆ پەیوەندیدار بوەوە بە بابەتی تیرۆرەوە.
پلاتفۆڕمەکە، ئەوەشیخستوەتەڕوو، له ساڵی 2015وە پرۆسهی چاودێریكردنیان دەستپیکردوە و له ساڵی 2024چاودێریکردنەکە لە رێگەی بەکارهێنانی زیرەکی دەستکردەوە بەرزکراوەتەوە.
تێلیگرام یەکێکە لە کەناڵەکانی پەیوەندیکردن و مێژوەکەی بۆ ساڵی 2013 دەگەڕێتەوە و لە ئێستادا یەکێکە لە باشترین بەرنامە بەکارهاتووەکان لە جیهاندا.
ترسی روبەڕوبونەوە لەگەڵ روسیا، ئەوروپای ناچار بە گەڕاندنەوە بۆ خزمەتی سەربازی کردوە؛ ئەڵمانیا رەشنووسێکی نوێی بۆ خزمەتکردنی سەربازی پەسەند کرد و گەنجانی رەگەز نێر لە تەمەنی 18 ساڵیەوە ئیجباردەکرێن فۆڕم پڕکەنەوە و لە ساڵی 2027وە دەبێت پشکنینی پزیشکی ئەنجام بدەن بۆ وەرگرتن لە خزمەتی سەربازی، بەڵام بۆ ژنان جۆرێکی دیکەیە و ئارەزومەندانەیە.
ئەگەری گەڕانەوە بۆ وەرگرتنی سەربازی زۆرە ملێش یەکێکە لە بژاردەکان و هەموو ئەمانەش دەگەڕیتەوە بۆ نیگەرانییەکان سەبارەت بە مەترسییە ئەگەرییەکانی هێرشی روسیا بۆسەر ئەوروپا.
گەنجانی ئەڵمانی تا رادەیەکی زۆر دژی ئەوەن و حکومەت دەڵێت؛ ئەو بنیاتنانی سەربازی پێویستە بۆ رێگریکردن لە ململانێ، ئەم هەنگاوەی ئەڵمانیا، ئامانج لێی بنیاتنانی بەهێزترین سوپای ئاسایی ئەوروپایە کە هێزی 255 بۆ 260 هەزار کەسی هەبێت.
ئەمەش لە کاتێکدایە پیشتر میدیاکانی ئەڵمانیا رایانگەیاندبوو؛ وەزارەتی بەرگری ئەڵمانیا پلانێک بە ناونیشانی"مۆدێرنکردنی خزمەتی سەربازی"، بە سەرۆکایەتی فریدریش مێرتز، راوێژکاری ئەڵمانیا تاوتوێ دەکات، کە بە پلەی یەکەم خۆی لە خزمەتکردنی ناچاری گەنجانی وڵاتەکەیدا دەبینێتەوە.
دەزگای هەواڵگری ئەڵمانیاش کاتی هێرشی مۆسکۆی بۆ سەر وڵاتانی ئەوروپا دیاریکردبوە، ئەوەی خستبوەڕوو، ساڵی 2029 روسیا هێرش دەکاتە سەر وڵاتانی ئەوروپا و دەبێت ئامادەکاری بکرێت بۆ ئەو هێرشە.
داهاتی ئەم هەفتەی سلێمانی و هەڵەبجە و ئیدارە سەربەخۆكان بڵاوكرایەوە، بەپێی ماڵپەڕی شەفافیەت بڕی داهاتەكە زیاتر لە دوو ملیار و 653 ملیۆن دینارە.
ماڵپەڕی شەفافیەت بۆ چاودێری و رێكخستنی داهات بڵاویكردەوە، بە پێی ماڵپەڕەكە داهاتی ئەم هەفتەی سلێمانی و هەڵەبجە و ئیدارەی سەربەخۆی راپەڕین و گەرمیان لە 8/11/2025 تا 14/11/2025، بڕی دوو ملیار دینار و 653 ملیۆن و 975 دینارە، كە 100%ی داهاتەكەش بەشێوەی نەختینەیە.
ئەوەش بە بەراوورد بە هەفتەی رابردوو داهات حەوت ملیار دینار بەرێژەی 74% كەمیكردووە.
تونجەر باکرهان، هاوسەرۆکی گشتیی دەم پارتی لە "دیداری هاوسەرۆکانی شارەوانییەکان و هاوسەرۆکانی ئەنجومەنی گشتیی پارێزگاکان" لە ناوەندی کۆنگرەی چاندا ئامەد رایگەیاند، "ئەگەر لە تورکیا باس لە پرۆسەیەک و دیموکراسییەک بکرێت، پێویستە هەنگاوی وا بنرێت کە قەییومەکان لەناو ببات و هاوسەرۆکی شارەوانییەکانمان بگەڕێنەوە سەر کارەکانیان."
لە وتاری کردنەوەی کۆبوونەوەکەدا، تونجەر باکرهان جەختیکردەوە کە دەبێت هەموو زیندانییە سیاسییەکان ئازاد بکرێن و ئاماژەی بە رەتکردنەوەی داوای ئازادکردنی مەرجداری سەلچوک مزراکلی، هاوسەرۆکی پێشووی شارەوانیی گەورەی ئامەد کرد.
باکرهان وتی: "پاساوەکەیان ئەوەیە کە 'لە رێکخستن دانەبڕاوە'. بەڵێ، ئەو ئەندامی رێکخستنە، ئەندامی یەکێتیی پزیشکانی تورکیا و ئەندامی پارتەکەمانە. هیچ ئەندامێتییەکی دیکەی نەبووە. ئەم بڕیارە تۆڵەسێنەرەوانە هیچ سوودێکی نییە و دەبێت وازی لێبهێنرێت. ئەم وڵاتە بە زیندانیکردنی ئیرادەی گەلەکەی هیچ شتێکی بەدەست نەهێناوە."
باکرهان ئاماژەی بەوەکرد، لە هەر پرۆسەیەکی نوێی ئاشتیدا، ئەرک و بەرپرسیارێتیی گەورە دەکەوێتە ئەستۆی شارەوانییەکان و وتی:
"پرۆسەی ئاشتی بە واتای شارەوانیی چالاک دێت. بە واتای فراوانبوونی بواری کاری ئێوە دێت. ئاشتی واتە لەبری هەڵبژێردراوان، فەرمانبەرانی دەوڵەت دانەنرێن. ئاشتی واتە بانکی پارێزگاکان بە شێوەیەکی یەکسان مامەڵە لەگەڵ هەموو شارەوانییەکاندا بکات، نەک پڕۆژەی هەندێکیان بلۆک بکات و یارمەتیی هەندێکی دیکە بدات."
وتیشی: "جێبەجێکارە سەرەکییەکانی پرۆسەکە، هاوڕێیانی هاوسەرۆکی شارەوانییەکانن. داواکاریی سەرەکیمان ئەوەیە کە چیتر بەڕێوەبەرە خۆجێیەکان دەستگیر نەکرێن. شارەوانییەکانمان دەبێت ببنە ناوەندی چارەسەرکردنی کێشەکانی خەڵک."
بانگەواز بۆ بانکی پارێزگاکان
هاوسەرۆکی دەم پارتی رەخنەی توندی لە بانکی پارێزگاکان (İller Bankası) گرت و رایگەیاند کە سیاسەتێکی جیاکارانە بەرامبەر شارەوانییەکانیان پەیڕەو دەکات.
"ئەم دەسەڵاتە هەوڵێکی تایبەت دەدات بۆ شکستپێهێنانی شارەوانییەکانمان. ئەو قەرزانەی قەییومەکان بەفیڕۆیان داوە، کاتێک ئێمە شارەوانییەکان وەردەگرینەوە، بیر دەسەڵاتیان دەکەوێتەوە و دەیانەوێت لە ئێمەی وەربگرن. بانکی پارێزگاکان نابێت بە عەقڵییەتێکی جیاکارانە بجوڵێتەوە."
باکرهان بە توندی رەخنەی لە نزیکایەتیی "سەرچاوەی بێسنوور بۆ دزی، بەڵام هیچ سەرچاوەیەک بۆ خزمەت" گرت و رایگەیاند، "کاتێک ئەم وڵاتە دیموکراتی بێت، داوا لەسەر ئەو کەسانە تۆمار دەکەین کە سەرچاوەی بێسنووریان بۆ دزی دابین کردووە."
کێشەی کورد چییە؟
لە کۆتایی قسەکانیدا، باکرهان پرسیاری "کێشەی کورد چییە؟"ی کرد و وتی: "کێشەی کورد بانکی پارێزگاکان و نزیکایەتییەکەیەتی. کێشەی کورد ئەو شارەوانیانەن کە پڕۆژەکانیان رادەگیرێن چونکە هی دەم پارتین. ئەم نزیکایەتیانە باوەڕی ئێمە بە پرۆسەکە لاواز دەکات و برینی وا دروست دەکات کە چارەسەر ناکرێن."
لەیادی 241 ساڵەی دامەزراندنی شاری سلێمانیدا، دکتۆر لەتیف رەشید، سەرۆک کۆماری عیراق، پەیامێکی پیرۆزبایی بڵاوکردەوە و رایگەیاند، سلێمانی بەدرێژایی مێژوو سیمبولی خەبات و تێکۆشان بووە و شایستەی ئەوەیە لە خێر و سامانی نیشتماندا بایەخی زیاتری پێبدرێت.
سەرۆک کۆمار لە پەیامەکەیدا ئاماژەی بەوەکردووە، "ئەمساڵ سلێمانی یادی 241 ساڵەی بونیادنانی دەکاتەوە، کە لەسەردەستی بابانەکان و لەلایەن ئیبراهیم پاشای بابان لە ساڵی 1784 دامەزرا و لە سەرەتای دروستبوونیەوە تا ئەمرۆ پێشەنگ بووە لە کاروانی پێشکەوتنی شارە گەورە و گرنگەکانی عیراق و تەنانەت ناوچەکەشدا."
راشیگەیاندووە، سلێمانی بووەتە نمونەیەک لە جوانییەکانی هەرێمی کوردستان و عیراق و بەدرێژایی مێژوو سیمبولی خەبات و تێکۆشان و خزمەت بە نیشتمان بووە.
لە بەشێکی دیکەی پەیامەکەیدا، سەرۆک کۆمار دەڵێت: "سلێمانی پێشەنگ بووە لە بەرەنگاربوونەوەی زوڵم و زۆرداریی رژێمە ستەمکارەکانی عیراق و هەمیشە دەیویست ئازاد و سەربەست بژی."
هەروەها ئاماژەی بەوەکردووە، لەپێناو بەدەستهێنانی مافی رەوای گەلی کورد و بەهێزکردنی دۆستایەتی لەگەڵ گەلی عەرەب و پێکهاتەکانی دیکە، سەرکردەکانی کورد وەک شێخ مەحمودی حەفید خەباتیان کردووە.
دکتۆر لەتیف رەشید جەختیکردووەتەوە، "ئەم شارە زیندووەی نیشتمان لە بونیادنانی عیراقێکی دیموکراتی ئازادی فیدراڵدا رۆڵێکی بەهێزی گێڕا، هەربۆیە شایستەی ئەوەیە لە خێر و خۆشی و سامانی نیشتماندا بایەخی زیاتری پێبدرێت و کاربکرێت بۆئەوەی جوانتر بێت."
لە کۆتاییدا رایگەیاندووە، "ئێمە لە سەرۆکایەتیی کۆمار هەمیشە هەوڵمانداوە بۆ خزمەتکردنی هەموو پارێزگا و شارەکانی نیشتمان، دەمانەوێت خزمەتگوزاری و گەشەپێدان و پێشکەوتنی شارەکانی وڵات لە باشترین ئاستدا بێت."