ئەمڕۆ چوارشەممە، میدیا عیراقییەکان بڵاویان کردەوە، دادگای فیدڕاڵی عیراق سکاڵای تایبەت بە بڕیاری پێناسی نوێی گـومـرگـی رەتکـردەوە و رایگەیاندوە، ئەو بڕیارە لە بەرژەوەندی گشتیدا نییە.

محەممەد خەفاجی، ئەندامی ئەنجومەنی نوێنەران رایگەیاندوە، دادگای باڵای فیدراڵی کۆتا بڕیاریدا و  ئەو داوایەی رەتکردووەتەوە، کە لەسەر بڕیاری ژمارە 957 تایبەت بە زیادکردنی باجی گومرگی تۆمارکرابوو.

 محەممەد خەفاجی، کە لە پۆستێکی فەیسبوکدا زانیارییەکەی بڵاویکردوەتەوە و میدیا عیراقییەکانیش دایان ناوە، رایگەیاندوە؛ رەتکردنەوەی بڕیارەکە، بەهۆی نەبونی بەرژەوندی گشتییەوە بووە.

ئەمە لە کاتیكدایە وەزیری بازرگانی عیراقی رایگەیاند بوو، لەکاتی جێبەجێکردنی بڕیارەکەدا، دڵنیایی دەدەیەن هاووڵاتییان، کە حکومەت بە هیچ شێوەیەک رێگە بە بەرزبوونەوەی نرخەکان نادات و وەک هێزێکی هاوسەنگ لە بەرانبەر قۆرخکاریی بازاڕدا دەوەستێتەوە.

راگەیاندنی بڕیاری گومرگی نوێ، شەپۆلێکی ناڕەزایەتی دروستکرد، لە بەغدادی پایتەخت و چەند پارێزگایەکی تر،  ژمارەیەکی زۆر دوکاندار بە داخستنی دوکانەکانیان و هاتنە سەر شەقام دژی بڕیارەکە وەستانەوە.

ئەمڕۆ چوارشەممە، ئەنجومەنی نوێنەرانی عیراق، لەسەر پرسی دۆسییە گواستنەوەی زیندانەکانی داعش لە سوریاوە بۆ عیراق بە تایبەت کۆدەبێتەوە و رەوشی ئەمنی زیندانەکان تاوتوێ دەکرێت.

بەگوێرەی راگەیەندراوێکی فەرمانگەی راگەیاندنی  ئەنجومەنی نوێنەران، کۆبوونەوەکە سەحات 11ـی پیش نیوەڕۆ دەبێت،  بە ئامادەبوونی وەزیری داد، بریکاری وەزارەتی ناوخۆ بۆ کاروباری هەواڵگری و جێگری فەرماندەی ئۆپراسیۆنە هاوبەشەکا.

پرسی سەرەکی کۆبونەوەکە  گفتوگۆکردنەوە لەسەر رەوشی ئەو چەکدارانەی لە سوریاوە گواستراونەتەوە، لەگەڵ داڕشتنی پلانی تۆکمە بۆ پاراستنی ئەو زیندانانەی چەکدارەکانیان تێدا راگیراوە.

پێشتر، شانەی راگەیاندنی ئەمنیی بڵاویکردوەتەوە پڕۆسەی گواستنەوەی چەکداران بەردەوامە و تا ئێستا زیاتر لە چوار هەزار و 580 زیندانی داعش گواستراونەتەوە عیراق.

ئەمە لە کاتیكدایە، پێشتر سودانی  داوای لە وڵاتانی جیهان کرد بوو،  بەرپرسیارێتیی خۆیان هەڵبگرن لە وەرگرتنەوەی هاووڵاتییە تیرۆریستەکانیان لە زیندانەکان، جەختیکردبوەوە لە دوای هاتنی ئەو زینادنە داعشانە بۆ عێراق رەوشی عیراق هەستیارە و دەبێت وڵاتان پشتگیری بکەن.

ئەنجومەنی وەزیرانی هەرێم  بە ئامادەبوونی مەسرور بارزانی، سەرۆک وەزیران و قوباد تاڵەبانی، جێگری سەرۆک وەزیران کۆبونەوەی ئاسایی خۆی ئەنجامدەدات، بەگوێرەی زانیارییەکان لە کۆبوونەوەکەدا سێ تەوەری سەرەکی گفتوگۆیان لەبارەوە دەکرێت.

ئەمڕۆ چوارشەممە، فەرمانگەی میدیا و زانیاری بڵاویکردوەتەوە، ئەنجومەنی وەزیران کۆدەبێتەوە و لە کۆبونەوەکەدا سێ تەوەر تاوتوێدەکرێن، تەوەری یەکەم بریتییە؛ لە بابەتی سەرژمێریی دانیشتووانی عیراق، کە لە رۆژانی 20 و 21ی تشرینی دووەمی ساڵی 2024 ئەنجام درا و بەگوێرەی راگەیاندراوی فەرمیی ئەنجامی سەرژمێرییەکە، رێژەی دانیشتووانی هەرێمی کوردستان (جگە لە ناوچە کوردستانییەکانی دەرەوەی هەرێم) بەرەسمی بە رێژەی 14.1% دەستنیشان کرا.

لە کۆبونەوەکەدا  ئەنجومەنی وەزیران، بەدواداچون  بۆ پابەندکردنی حکومەتی فیدراڵی بە ئەنجامی سەرژمێرییەکە بۆ مەبەستی دەستنیشانکردنی بەشەبودجەی هەرێمی کوردستان دەکرێت.

تەوەرى دووەمیش پەیوەستە بە پەسەندکردنی کۆنووسی هاوبەشی نێوان وەزارەتی کاروباری شەهیدان و ئەنفالکراوان و دەزگای زیندانییانی سیاسیی عیراق، کر لە رێکەوتی 27ی تشرینی دووەمی 2025 کە لەنێوان هەردوولا ئیمزاکراوە.

لە تەوەری سێیەمیشدا، ئەنجومەنی وەزیرانی هەرێم تاوتوێی بڕیاردان لەسەر پێشنیازی وەزارەتی بازرگانی و پیشەسازیی تایبەت بە پارەی بەشەخۆراکی مانگانەی هاووڵاتیان کە لەلایەن وەزارەتی بازرگانیی فیدراڵییەوە دابین دەکرێت، لە چوارچێوەی خەرجیی (النفقات الحاکمة) و چارەسەرکردنی پارەی کەڵەکەبووی پێشوو بۆ ساڵانی (2004-2022) گفتوگۆ دەکرێت.

ئیدارەی قەزای خورماڵ، بڵاویکردوەتەوە،  ئەمڕۆ چوارشەممە دەست بە دابەشکردنی بەشە نەوی عیراق دەکرێت، کە بڕەکەی 100 لیترە بۆ هەر خێزانێک و لە بەرانبەردا 31هەزار دینار وەردەگیرێت، سەرەتاش لە گوندەکان دابەش دەکرێت، دواتر سەنتەری قەزاکە.

بە گوێرەی بڵاوکراوەیەک، کە لەلایەن ئیدارەی قەزای خورماڵەوە بڵاوکراوەتەوە، لە ئەمڕۆوە دەست دەکرێت بە دابەشکردنی بەشە نەوتی سپی حکومەتی عیراق.

بڕی 100 لیتر بۆ هەر خێزانێک دیاری کراوە و سەرەتا لە گوندەکانەوە دەست پێ دەکات و دواتر لە ناو شاریش دابەشدەکرێت .

ئاماژەیان بەوەکردوە، هاووڵاتیانی سنوورەکە دەتوانن بە مەبەستی سوودمەندبوون لەم پرۆسەیە، کارتی پلاستیکی نەوت (کۆدی 282ی خورماڵ) و  31 هەزار دینار ئامادە بکەن.

ئیدارەی قەزاکە داواش لە هاووڵاتییان دەکات، بۆ بەڕێوەچوونی پرۆسەکە بە شێوەیەکی شارستانی، بەرمیلەکانیان لە کۆڵانەکاندا دابنێن؛ لایەنە پەیوەندیدارەکانیش دڵنیایی دەدەن، کە لە ماوەیەکی کەمدا تەواوی هاوڵاتیانی سنوورەکە سوودمەند دەبن لە وەرگرتنی بەشە نەوتەکەیان.

بەهۆی تەقەكردن لە كەنەدا 10 كەس كوژران و زیاتر لە 20 كەسیش برینداربون سەرۆك وەزیرانی وڵاتەكەش دەڵێت روداوەكە مەرگەساتێكی گەورە بوە.

پۆلیسی كەنەدا ڕایگەیاند، رۆژی چوارشەممە لە یەكێك لە خوێندگەكانی تامبلەر ریج لە ناوچەی بریتش كۆلۆمبیا لە  رۆژئاوای كەنەدا كەسێك تەقەی كردوە و بەهۆیەوە شەش خوێندكار كوژران و 25 كەسیشی برینداربوە. و بەهۆیەوە دە كەس گیانیان لەدەست داوە كە تەقەكەرەكەشیان هەیە و لانیكەم ٢٥ كەسیش بریندار بون كە برینی دووانیان سەختە.

پۆلیس ئاماژەی بەوە كردوە كە تۆمەتباری تەقەكەردنەكە ژنێك بوە كە بە كوژراوی لە خوێندگەكەدا دۆزراوەتەوە و هاوكات تەرمی دوو كوژراوی تریش لە شوێنێكی نیشتەجێبونی ئەو ناوچەیەی تەقەی لێكراوە دۆزراونەتەوە.

مارك كارنی سەرۆك وەزیرانی كەنەدا، رایگەیاند ئەو روداوە زۆر ترسناك بوە و پرسە و سەرخۆشیی ئاراستەی ئەو كەسانە دەكات كە لە روداوی تەقەكردنەكەدا كوژراون ئەو روداوەكەی بە مەرگەسات و توندوتیژیی لەقەڵەم داوە.

بنیامین ناتانیاهۆ، گەیشتە واشنتۆن بۆ کۆبونەوە لەگەڵ دۆناڵد ترەمپ و بە گوێرەی زانیارییەکان سەرەتا لەگەڵ ستیڤ ویتکۆف و جارید کۆشنەر، نێردراوانی دۆناڵد ترەمپ کۆبوەتەوە و  تاوتوێ دوایین پێشهاتەکانی دانوستانە ناڕاستەوخۆکانی نێوان ئەمریکا و ئێرانیان کردوە.

​پێگەی ئاکسیۆس بڵاویکردوەتەوە، ویتکۆف و کۆشنەر پوختەیەکی وردیان لەبارەی خولی یەکەمی گفتوگۆکانیان لەگەڵ تاران پێشکەش بە ناتانیاهۆ و تیمی ئەمنییەکەی کردووە،  ئەم کۆبوونەوەیە تەنیا چەند سەعاتێک پێش دیداری چاوەڕوانکراوی نێوان ناتانیاهۆ و ترەمپ ئەنجامدراوە، کە بڕیارە  ئەمڕۆ چوارشەممە بەڕێوەبچێت .

یەحیێل لیتەر، باڵیۆزی ئیسرائیل لە واشنتۆن، کە بەشداری کۆبونەوەکەی کردوە، بە ئاکسیۆسی راگەیاندوە، کە کارەکان هەر لە یەکەم سەعاتی گەیشتنی ناتانیاهۆوە دەستیان پێکردووە.

 ئەم سەردانەی ناتانیاهۆ، حەوتەمین سەردانیەتی  بۆ واشنتۆن،  لە دوای گەڕانەوەی دۆناڵد ترەمپ بۆ کۆشکی سپی و بون بە سەرۆک بۆ جاری دووەم

ژووری ئۆپەراسیۆن بۆ بەڕێوەبردنی قەیران و کارەساتەکان ئاگادارییەکی بڵاوکردەوە و تێیدا هۆشداری دەداتە هاووڵاتییان کە لە درەنگانی ئەمشەوەوە شەپۆلێکی بارانبارین و هەورەتریشقە زۆربەی ناوچەکانی هەرێمی کوردستان دەگرێتەوە.

بەپێی راگەیەندراوەکەی ژووری ئۆپەراسیۆنەکان، کە پشتبەستووە بە پێشبینییەکانی بەڕێوەبەرایەتیی گشتیی کەشناسی و بومەلەرزەزانی، ئەمشەو شەپۆلێکی نمە باران و بارانی مامناوەند دەست پێ دەکات. لە سەعاتەکانی درەنگانی شەودا، بارانەکە لە ناوچەکانی باکووری رۆژهەڵاتی پارێزگای دهۆک و باکووری پارێزگای هەولێر دەبێتە بارانی بەخوڕ و هەورەتریشقەی لەگەڵدا دەبێت.

ژووری ئۆپەراسیۆنەکان خشتەی بڕی بارانبارینی لە ناوچە جیاوازەکان بەم شێوەیە دیاری کردووە:

• هەولێر: 15 بۆ 20 ملم

• سلێمانی: 2 بۆ 4 ملم

• دهۆک: 10 بۆ 15 ملم

• هەڵەبجە: 2 بۆ 4 ملم

• سۆران: 25 بۆ 35 ملم

• راپەڕین: 25 بۆ 35 ملم

ژووری ئۆپەراسیۆنەکان داوا لە هاووڵاتییان دەکات لەپێناو پاراستنی سەلامەتییان، ئاگاداری ئەم گۆڕانکارییانەی کەشوهەوا بن، چونکە ئەگەری گۆڕانکاری لە پێشبینییەکاندا هەیە.

وەزارەتی دارایی و ئابوریی هەرێمی کوردستان خشتەی دابەشکردنی موچەی مانگی کانوونی دووەمی فەرمانبەران و موچەخۆرانی راگەیاند، کە لە ماوەی چوار رۆژدا تەواو دەبێت.

بەپێی راگەیەندراوێکی رەسمیی وەزارەت، رۆژی چوارشەممە، 11-2-2026، دەست بە دابەشکردنی موچەی مانگی یەکی فەرمانبەران و موچەخۆرانی هەرێمی کوردستان دەکرێت و رۆژی شەممە، 14-2-2026، کۆتایی بە دابەشکردنی موچە دێت.

وەزارەتی دارایی ئاماژەی بەوە کردووە، بەهۆی ئەوەی وەرگرتنی پارەی کاش لە لقی هەولێری بانکی ناوەندیی عیراق دەکەوێتە بەیانی لە کاتی دەوامی رەسمیدا و دواتر گواستنەوەی پارەکە بۆ هەموو بانکەکان لە پارێزگا و ئیدارە سەربەخۆکان کاتی دەوێت؛ داوا لە سەرجەم موچەخۆران دەکەن "لە دوای سەعات 1:00ی پاشنیوەڕۆوە" سەردانی بانکەکان بکەن بە مەبەستی وەرگرتنی موچەکانیان بەپێی خشتەی راگەیەندراو.

ئەم بڕیارەی وەزارەتی دارایی دوای ئەوە دێت کە ئەمڕۆ بڕی زیاتر لە 931 ملیار دینار وەک تەمویلی موچەی مانگی یەک لە لایەن حکومەتی فیدراڵەوە خرایە سەر هەژماری بانکیی وەزارەتەکە.

د. لەتیف رەشید، سەرۆک کۆماری عیراق لە بەغداد پێشوازیی لە سەید عەمار حەکیم، سەرۆکی رەوتی حیکمە کرد و لەمیانی کۆبوونەوەکەدا، جەختیان لە گرنگی بەهێزکردنی سەقامگیریی ناوخۆیی و یەکخستنی هەوڵە نیشتمانییەکان کردەوە.

لە کۆبوونەوەکەدا رەوشی وڵات و پەرەسەندنە سیاسی، ئەمنی و ئابورییەکان و پێشهاتەکانی هەرێمی و کاریگەرییەکانی لەسەر سەقامگیریی ناوچەکە تاوتوێکران، جەختیان لە گرنگی بەهێزکردنی سەقامگیریی ناوخۆیی و یەکخستنی هەوڵە نیشتمانییەکان کردەوە لەپێناو بەدیهێنانی ئاواتەکانی هاوولاتیان و پاراستنی سەروەری وڵات و بەرژەوەندییە باڵاکانی وڵات.

لە کۆبوونەوەکەدا باس لە شایستە دەستورییەکان و پێویستی پەلەکردنی پێکهێنانی حکومەت کرا بەمەبەستی مسۆگەرکردنی بەردەوامی کاری دامودەزگاکانی دەوڵەت و چالاککردنی رۆڵیان لە دابینکردنی خزمەتگوزاری و چارەسەرکردنی قەیرانەکان.

وەزارەتی دارایی و ئابوریی هەرێمی کوردستان رایگەیاند، بڕی 931 ملیار و 257 ملیۆن دینار وەک تەمویلی موچەی مانگی یەک خرایە سەر هەژماری بانکیی وەزارەت لە لقی هەولێری بانکی ناوەندیی عیراق.

بەپێی راگەیەندراوێکی وەزارەتی دارایی، پاشنیوەڕۆی ئەمڕۆ سێشەممە، 10ی شوباتی 2026، بڕی 931.257.000.000 دینار بۆ موچەی مانگی کانوونی دووەمی فەرمانبەران و موچەخۆران گەیشتوەتە هەرێم. بەڵام وەزارەتەکە ئاماژەی بەوە کردووە کە حکومەتی فیدراڵ بڕی 36 ملیار و 360 ملیۆن و 864 هەزار دیناری لە کۆی تەمویلی موچە نەناردووە.

وەزارەتی دارایی رایدەگەیەنێت: "ئەمە لە چوارچێوەی ئەو سیاسەت و بیانوانەدایە کە حکومەتی فیدراڵ مانگانە دژی هەرێمی کوردستان و بۆ پرسی موچە پەیڕەوی دەکات."

وەزارەتی دارایی روونیکردەوە، ئەو بڕە پارەیەی کە بەغداد نەناردووە، بریتییە لە شایستەی چەند مانگی رابردووی زیاتر لە 8 هەزار خانەنشینی سەربازی و شارستانی. ئەو خانەنشینانە ساڵی رابردوو خانەنشین کراون و لە مانگی یەکی ئەمساڵدا، دوای پەسەندکردنی دۆسیەکانیان، جارێکی دیکە گەڕاونەتەوە ناو لیستی موچە.

لە راگەیەندراوەکەدا هاتووە: "ئەو خانەنشینانە پێویست بوو چەند موچەیەکی مانگەکانی رابردوو پێکەوە وەربگرن، بەڵام بەغداد تەنیا موچەی مانگی یەکی ئەمساڵی بۆ ناردوون و شایستەکانی دیکەی بڕیوە."

وەزارەتی دارایی و ئابوریی هەرێم دووپاتی کردەوە کە تیمەکانیان لەسەر هێڵن و لەگەڵ وەزارەتی دارایی عیراق لە پەیوەندیی بەردەوامدان تاوەکو ئەو کێشەیە چارەسەر بکەن و ئەو شایستە داراییانە لە نزیکترین کاتدا بۆ خانەنشینان خەرج بکرێنەوە.

بەمەبەستی پیرۆزبایی بەدەستهێنانی پەسەندنامەی کۆمیسیۆنی باوەڕپێکراوی ئەمریکی نێودەوڵەتی AACI بۆ زنجیرە نەخۆشخانەکانی (هایکوالێتی-شاری پزیشکی ئەنوەرشێخە)، شاناز ئیبراهیم ئەحمەد خانمی یەکەمی عیراق، سەردانی شاری پزیشکی ئەنوەرشێخەی کرد لە سلێمانی.

لەو سەردانەیدا کە سارا لەتیف رەشید سەرۆکی رێکخراوی منداڵپارێزی کوردستان و وەفدێکی رێکخراوەکە هاوڕێیەتیان دەکرد، خانمی یەکەمی عیراق پیرۆزبایی بەدەستهێنانی ئەو پەسەندنامەیەی لە شێخ فاخیر شێخ تەیب بەڕێوەبەری جێبەجێکاری گروپی کۆمپانیاکانی قەیوان و ستافی پزیشکانی نەخۆشخانەکە کرد و بەدەستکەوتێکی گرنگی ناساند بۆ سلێمانی بەتایبەت کە وەک یەکەمین نەخۆشخانە لەسەر ئاستی هەرێمی کوردستان چۆتە رێزی نەخۆشخانە نێودەوڵەتیەکانەوە.

لەدیدارەکەدا بەڕێوەبەری جێبەجێکاری گروپی کۆمپانیاکانی قەیوان باسی لەو رۆڵە نیشتمانیی و مرۆییە کرد کە نەخۆشخانەکە دەیبینێت وەک ناوەند و هەنگاوێکی کرداری بۆ خزمەتی خەڵک و کۆمەڵگە، لەپێشکەشکردنی خزمەتگوزارییە تەندروستییەکان بەچارەخوازانی شارەکە و هەرێمی کوردستان و ئەوانەش کەلەشارەکانی ناوەڕاست و باشوری عیراقەوە رووی تێ دەکەن، لەگەڵ هێنانی ستافی پزیشکی و تەندروستی و دەرمان و چارەسەری کوالێتی بەرز تا هیچ هاوڵاتیەک ناچار نەبێ بۆ چارەسەر و نەشتەرگەری رووبکاتە وڵاتانی دەرەوە.

لەبەرانبەردا خاتوو شاناز ئیبراهیم ئەحمەد، سوپاسی دڵسۆزیی و ئەمەکداری و خەمخۆریی پزیشکانی شاری پزیشکی ئەنوەرشێخەی کرد لەبەجێگەیاندنی ئەرکەکانیان بەتایبەت کە پەیوەندیی راستەوخۆی بە ژیان و سەلامەتی و تەندروستی تاکەکانی کۆمەڵەوە هەیە.

لەبارەی ئەو ئاسانکاریی و هەوڵە هاوبەشە خێرخوازییەی نەخۆشخانەکانی (هایکوالێتی-شاری پزیشکی ئەنوەرشێخە) لەگەڵ رێکخراوی منداڵپارێزی کوردستان خستویانەتە گەڕ بۆ بەهاناوەچوون و ئەنجامدانی نەشتەرگەرییەکانی دڵی منداڵان، سارا لەتیف رەشید سوپاسی ستافی نەخۆشخانەکەی کرد و راشیگەیاند ئەم هەوڵە هاوبەشە دەکەینە توێژینەوەیەکی زانستی تا وەک بەڵگەی بەرزیی ئاستی خزمەتگوزارییە پێشکەشکراوەکان بە منداڵان تۆماربکرێت و لەکۆنفرانسەکانی ئایندەدا بخرێتەڕوو و نازناوی زیاتری جیهانی مسۆگەر بکات.

ئەمڕۆ مەکتەبی سیاسی یەکێتیی نیشتمانیی کوردستان بە سەرپەرشتی بافڵ جەلال تاڵەبانی لە سلێمانی کۆبووەوە و بە پێی زانیارییەکانی کوردسات نیوز، تاوتوێی پرسی پێکهێنانی حکومەتی هەرێم و یەکلاییکردنمەوەی پۆستی سەرۆک کۆمار کراوە.

هاوکات سبەینێ یەکێتیی نیشتمانیی کوردستان و پارتی دیموکراتی کوردستان لە هەولێر لەسەر ئاستی باڵا کۆدەبنەوە و گفتوگۆی پرسی پێکهێنانی کابینەی دەیەمی حکومەتی هەرێم و پڕکردنەوەی پۆستەکانی حکومەتی نوێی عیراق و ئاڵنگارییەکانی ناوچەکە دەکەن.

بە پێی زانیارییەکانی کوردسات نیوز؛ سبەینێ بافڵ جەلال تاڵەبانی سەرۆکی یەکێتی و مەسعود بارزانی سەرۆکی پارتی لە هەولێر کۆدەبنەوە.

سبەینێ‌ بافڵ جەلال تاڵەبانی و مەسعود بارزانی لە هەولێر كۆدەبنەوە و چەند بابەتێكی گرنگ تاوتوێ‌ دەكەن.

بەپێی زانیارییەكانی كوردسات نیوز، سبەینێ‌ بافڵ جەلال تاڵەبانی سەرۆكی یەكێتیی نیشتمانیی كوردستان و مەسعود بارزانی سەرۆكی پارتی دیموكراتی كوردستان لە هەولێر كۆدەبنەوە، بۆ تاوتوێكردنی رەوشی سیاسی هەرێم و عیراق و ناوچەكە و بابەتەكانی پەیوەست بە هەرێمی كوردستان.

هەر بەپێی زانیارییەكان، پرسی پێكهێنانی حكومەت و یەكلایەكردنەوەی پۆستەكان لە عیراق گفتوگۆیان لەسەر دەكرێت.

وەزارەتی دارایی عیراق موچەی مانگی یەکی رەوانەی هەرێم کرد و سبەینێ دەست بەدابەشکردنی موچە دەکرێت.

سەرچاوەیەك لە وەزارەتی دارایی هەرێم بە کوردسات نیوزی راگەیاند، پارەی موچەی مانگی یەک خرایە سەر هەژمارەی وەزارەت و سبەینێ‌ دەستبەدابەشكردنی موچە دەكرێت .

ئاماژەی بەوەشکرد، ئەمڕۆ  لیستی موچە رادەگەێنرێت و سبەینێ دەست بە دابەشکردنی دەکرێت.

دارایی هەرێم راشیگەیاند، لەماوەی سێ رۆژدا تەواوی فەرمانبەران و موچەخۆران موچەکانیان وەردەگرن.

هەر بەپێی زانیارییەکانی کوردسات نیوز، بڕی 931 ملیار و 257 ملیۆن دینار خرایە سەر هەژماری بانکیی هەرێمی کوردستان.

د.لەتیف رەشید، سەرۆک کۆماری عیراق، ئەمڕۆ لە کۆشکی بەغداد، پێشوازیکرد لە هەیبەت حەلبوسی، سەرۆکی پەرلەمان.

لەدیدارەکەدا پێشهاتەکانی رەوشی گشتی وڵات تاوتوێکرا و جەختیشیان لە پێویستی پێشخستنی بەرژەوەندییە باڵاکانی نیشتمان و یەکلاییکردنەوە و شایستە دەستورییەکان بۆ رووبەڕوبونەوەی ئاستەنگە هەنوکەییەکان کردەوە.

هەروەها لەدیدارەکەدا باس لەدۆسێی یاسادانان کرا، کەسەرۆک کۆمار پشتگیری سەرۆکایەتی کۆماری بۆ رۆڵی سەرەکی پەرلەمان لەدەرکردنی یاسا بنەڕەتیەکاندا دووپاتکردەوە، هاوکات جەختیشی لەخێراکردن لەکارکردن کردەوە بەجۆرێک کە لەگەڵ پێداویستییەکانی قۆناغی ئێستا و بەدیهێنانی خواستەکانی هاووڵاتیاندا بگونجێت.

لەلای خۆیەوە سەرۆکی پەرلەمان جەختی لەگرنگی بەهێزکردنی هاوکاری و هەماهەنگی نێوان  هەردو دەسەڵاتی یاسادانان و جێبەجێکردندا کردەوە، دوپاتیشی لەپابەندبوونی پەرلەمان بۆ جێبەجێکردنی ئەرکەکانی یاسادانان و چاودێریکردنی خۆی کردەوە بەشێوەیەک کەخزمەت بە بەرژەوەندی گشتی بکات و وەڵامی ئاڵنگارییەکانی قۆناغی ئێستایش بداتەوە.