هەواڵەکان
رۆژنامەی 'تەلەگراف' رایگەیاند، سەرەڕای لێدوانەکانی ترەمپ سەبارەت بەوەی تواناکانی سوپای پاسداران بەتەواوی تێکشکێندراوە، هێرشە موشەکییەکانی ئێران دەریانخستووە هەڕەشەی موشەکیی ئەو وڵاتە بۆ سەر بنکەکانی ئەمریکا بەردەوامە.
راپۆرتێکی رۆژنامەی تەلەگراف'ـی بەریتانی ئاشکرای کردووە، سەرەڕای پێداگرییەکانی دۆناڵد ترەمپ بەوەی سوپای ئێران بەتەواوی تێکشکێندراوە و راگەیەندراوەکانی پیت هیگسێت، وەزیری جەنگی ئەمریکا کە جەختی کردەوە، "بەرنامەی موشەکیی تاران لەناوچووە"، هێرشە موشەکییەکانی ئەم دواییەی ئێران دەریانخستووە، هەڕەشەی موشەکیی ئەو وڵاتە بۆ سەر بنکەکانی ئەمریکا هێشتا بەردەوامە.
راشیگەیاند، هێرشی موشەکی ئێران بۆ سەر ئوردن و کوژرانی سێ سەربازی ئەمریکی، ئاماژەیەکی روونە بۆ ئەوەی دوای چەندین مانگ لە بۆردومانی بەردەوامی ئەمریکا و ئیسرائیل، ئیران هێشتا کۆگایەکی گەورەی موشەکی لەبەردەستدایە.
لێپرسراوێکی ئێران بە رۆژنامەکەی راگەیاندووە، ئەمریکییەکان خۆیان هۆکاری سەرەکین لەپشت باشترکردنی موشەکەکانیان، لە سەرەتای جەنگەوە ئەگەر شوێنی هەڵدانی موشەکێک بپێکرایە، 15 سەعاتی دەویست تا دووبارە چالاک بکرێتەوە، بەڵام ئێستا ئەو کاتە کەمبووەتەوە بۆ کەمتر لە 30 خولەک.
هاوکات سەردار شێکارچی، وتەبێژی هێزە چەکدارەکانی ئێران بە رۆژنامەی 'تەلەگراف'ـی راگەیاندووە، "بەرهەمهێنانی موشەک و درۆن لە ناو جەرگەی شەڕەکەدا نەک نه‌وەستاوە، بەڵکو راستەوخۆ لە هێڵی بەرهەمهێنانەوە دەبرێنە مەیدانی جەنگ".
لەلایەکی دیکەوە بەرپرسانی ئەمریکیش رایانگەیاندووە، تاران دەستیکردووە بە بەکارهێنانی موشەکی زۆر خێرا کە لە کۆتا ساتەکانی نزیکبوونەوە لە ئامانجەکان، سیستمی بەرگریی ئاسمانیی ناتوانێت بەرپەرچیان بداتەوە.
بەپێی راپۆرتێکی رۆژنامەی نیویۆرک پۆست، هێزە تایبەتەکانی ئەمریکا پلانێکی سەربازیی بەناونیشانی "ئاڵۆزترین ئۆپراسیۆنی مێژوو" تاوتوێ دەکەن، بە مەبەستی چوونە ناو بنکە ئەتۆمییەکان لە قوڵایی خاکی ئێران و دەستبەسەرداگرتنی کۆگاکانی یۆرانیۆمی پیتێنراو.
رۆژنامەی 'نیویۆرک پۆست' لە راپۆرتەکەدا ئاماژەی بەوەکردووە، ئۆپراسیۆنەکە بەشێوەی زەمینی دەبێت و پێویستی بە هەزاران سەرباز و هێزی تایبەت هەیە بۆ گەمارۆدانی بنکەکانی وەک فۆردۆ و ئیسفەهان.
ئاماژەی بەوەشكردووە، تیمە سەربازیی و ئەندازیارییەکانی ئەمریکا دەبێت رێڕەوە روخاوەکان بکەنەوە و مینە چێنراوەکانی سوپای پاسداران پوچەڵ بکەنەوە، رێڕەوێکی ئاسۆیی و ئاسمانیش بۆ رزگارکردن و گواستنەوەی کەرستەکان دابین بکەن.
شارەزایان ئاماژە بەوە دەکەن، هۆکاری بیرکردنەوە لە ئۆپراسیۆنی زەمینی، بنبەستبوونی گفتوگۆ دیپلۆماسییەکانە و هەروەها نەبوونی دڵنیایی لەوەی ئایا هێرشی ئاسمانی دەتوانێت بەتەواوەتی ئەو ناوەندە ئەتۆمییە قووڵانەی ژێر زەوی تێکبشکێنێت یان نا.
هۆشداریش دەدەن؛ ئۆپراسیۆنەکە تێچوویەکی سەربازیی زۆری دەوێت، چونکە پاراستنی ناوچەیەکی گەورەی شەڕ لەناو خاکی ئێراندا بۆ ماوەیەکی پێویست بە مەبەستی گواستنەوەی یۆرانیۆمی پیتێنراو، ئاستەنگێکی لۆجیستی کۆنتڕۆڵ نەکراوە.
محەمەد باقر زولقەدر، ئەمینداری ئەنجومەنی باڵای ئاسایشی نیشتمانیی ئێران، دەڵێت مەرجی کۆتاییهاتنی ئۆپراسیۆنە سەربازییەکانی وڵاتەکەی پەیوەستە بە خۆبەدەستەوەدانی تەواوەتیی ئەمریکا.
زولقەدر لە پەیامێكدا ئاماژەی بەوە كردوو: هەموو دوكەڵێك لە ناوچەكەوە بەرز بێتەوە، نیشانەی پێكان و ئامانجگرتنی راستەوخۆی بنكەیەكی سەربازی، ئاسایشی، یان دارایی ئەمریكییە.
رونیشیكردەوە: بۆردومانە ئاراستەكراو و بەردەوامەكان گوزارشت لە توڕەیی گەلی ئێران دەكەن بەرانبەر سیستمی هەژموونگەری.
جەختیشی كردەوە: هیچ وەستانێك لە ئۆپراسیۆنە سەربازییەكاندا نایەتە ئاراوە تا بڕیاری كۆتایی و هاتنەدی ئامانجەكان.
لە پێشهاتێکی نوێدا ڤۆلۆدیمێر زیلینسکی، سەرۆکی ئۆکراین رایگەیاند، توانیویانە لە دەریای خەزەردا ئەو کەشتییانەی روسیا بکەنە ئامانج، کە چەک و باری سەربازیان بۆ ئێران دەگواستەوە.
ڤۆلۆدیمیر زیلینسکی پەیامێکی لە تۆڕی کۆمەڵایەتی ئێکس بڵاوکردوەتەوە و تێیدا هاتووە، کەشتییە روسییەکانیان لە هێرشێکی دورمەودادا لە دەریای خەزەردا کردوەتە ئامانج.
سەرۆکی ئۆکراین، لە پەیامەکەدا وردەکاری نەخستوەتە روو، بەڵام باسی لەوەش کردوە جگە لەو کەشتیانەی روسیا هێزەکانیان کارگەیەکیشیان لە شاری کیرۆڤی روسیا کردوەتە ئامانج کە 1200 کیلۆمەتر لە سنوری نێوان هەردوو وڵاتەوە دوورە.
ناوبراو ئاماژەی بەوەکردوە، کارگەکە پێکهاتەکان بۆ بەرهەمهێنانی ئەو چەکانە دابین دەکات، کە روسیا دژی گەلەکەیان بەکاریدەهێنێت.
جیا لەوانەش پاڵاوگەیەکی نەوت لە شاری تیومێن و ناوەندێکی لۆجستی لە شاری یکاتێرینبۆرگ و کۆگایەکی سوتەمەنی لە شاری رۆستۆڤ ئۆن دۆنیش ئامانجی هێرشەکانیان بوون.
وەزارەتی کشتوکاڵی عیراق رایگەیاند، میکانیزمی پێدانی مۆڵەتی هاوردەکردن گۆڕانکاری بەسەردا هاتووە و لە رێگەی پلاتفۆرمی ئەلیکترۆنییەوە دەبێت، ئاماژەی بەوەشکردوە بە گوێرەی ساڵنامەی کشتوکاڵی 33 جۆر بەروبومی کشتوکاڵی قەدەغەیە.
ئەمڕۆ شەممە، وەزارەی کشتوکاڵی عیراق رایگەیاند پاراستنی بەروبومی ناوخۆیی بە رێگریکردن لە هاوردەکردنی بەروبومی رکابەری و پاڵپشتیکردنی جوتیاران بەدەست دێت، ئەمەش یارمەتیدەرە بۆ گەیشتن بە هاوسەنگی بازاڕ بەتایبەتی لەسەر ئاستی نرخ.
وەزارەتەکە ئاماژەی بەوەکردوە، گرنگترین شت بۆ جوتیاران ئەوەیە، کە داهاتێکی ئابووری بەدەستبهێنن کە زیانی دارایی نەبێت و بە گوێرەی ساڵنامەی کشتوکاڵیش، هاوردەکردنی 33 جۆر بەروبومی کشتوکاڵی قەدەغەیە، جگە لە 14 کەلوپەلی سنووردار بە هۆکاری ئەمنی و تەندروستی.
لە کۆتایی راگەیەندراوەکەشیدا، وەزارەتی کشتوکاڵ دەڵێت؛ بەشی هاوردەکردن لە بەشی پلاندانان و بەدواداچوون بەپێی رێکارە رێکخراوەکان بەردەوامە لە کارەکانی و رونیشیکردەوەمۆڵەتی هاوردەکردن دوای وەرگرتنی ڕەزامەندی دەسەڵاتی کەرتیی پەیوەندیدار، و لەڕێگەی سێ پلاتفۆرمی ئەلیکترۆنیەوە دەردەچێت.
بزووتنەوەی ئەنساروڵڵا (حوسییەکان)، دوو ئۆپراسیۆنی سەربازییان بۆ سەر دامەزراوەکانی کۆمپانیای "ئارامکۆ" لە شارەکانی جیزان و یەنبەع لە سعودیە ئەنجام داوە.
یەحیا سەریع، وتەبێژی سەربازیی بزووتنەوەکە رایگەیاند: ئۆپراسیۆنی یەکەم "ئامانجە هەستیارەکانی" لە جیزان پێکاوە، لەکاتێکدا ئۆپراسیۆنی دووەم دامەزراوەکانی یەنبەعی کردووەتە ئامانج، ئەوەش بە بەکارهێنانی مووشەکی بالیستی، کروز و فڕۆکەی بێفڕۆکەوان، هەروەها ئاماژەی بەوەش کرد کە هەردوو ئۆپراسیۆنەکە ئامانجەکانی خۆیان پێکاوە.
سەریع روونی کردەوە کە ئەم هێرشە وەک وەڵامدانەوەیەک بووە بۆ ئەو هەڵمەتە ئاسمانییانەی کە شار و بەندەری حودەیدە و دوورگەی کەمرانیان کردبووە ئامانج، هاوکات جەختی لە بەردەوامیی "گەمارۆی دەریایی" کردەوە و هۆشداریشی دا لە پەرەپێدانی زیاتری ئۆپراسیۆنەکانیان لە قۆناغی داهاتوودا.
سێهەمین فێستێڤاڵی مەولانە بە پاڵپشتی دەزگای میدیایی کوردسات دەستیپێکردووە و تا رۆژی 30ـی7ـی2026 بەردەوام دەبێت.
بەپێی ئامارەکان، تەنها رۆژی هەینی، 24ـی 7ـی 2026، ژمارەی سەردانیکەرانی فێستیڤاڵی مەولانا، 19 هەزار و 432 کەس بووە.
جێگەی ئاماژەیە، فێستیڤاڵەکە رۆژانە سەعات 6ـی ئێوارە تا 12ـی شەو بەردەوامە.
فێستیڤاڵی مەولانا، گەورەترین ڤێستیڤاڵە لەسەر ئاستی عیراق و هەرێمی كوردستان، پێشبینیش دەکرێت گەشتیار و هاووڵاتیان لەسەرتاسەری کوردستان و عیراقەوە بەردەوام بن لە سەردانیکردنی فێستیڤاڵەکە.
هه‌وڵه‌كان بۆ پێكهێنانی حكومه‌تی نوێی هه‌رێمی كور دستان به‌رده‌وامیی هه‌یه و ئه‌ندامێكی مه‌كته‌بی سیاسی یه‌كێتیی نیشتمانیی كوردستانیش ده‌ڵێت: حكومه‌تێكی بنكه فراوان به‌بێ یه‌كێتی و پارتی پێكنایه‌ت، هه‌روه‌ها له‌كۆبوونه‌وه‌ی مه‌كته‌بی سیاسیی یه‌كێتیدا داوای له سه‌رۆك بافڵ كرا به‌شداری كۆبوونه‌وه‌ی لوتكه‌ی لایه‌نه‌كان بكات.
سه‌عدی ئه‌حمه‌د پیره ئه‌ندامی مه‌كته‌بی سیاسی یه‌كێتیی نیشتمانیی كوردستان له‌كۆنفرانسێکی رۆژنامه‌وانیدا رایگه‌یاند: مه‌كته‌بی سیاسی یه‌كێتیی نیشتمانیی كوردستان له‌كۆتا كۆبوونه‌وه‌یدا داوای له سه‌رۆك بافڵ كرد، به‌شداری له‌كۆبوونه‌وه‌ی لوتكه‌دا بكات، كه ته‌نها به به‌شداری كه‌سی یه‌كه‌می لایه‌نه سیاسییه‌كان ئه‌نجامده‌درێت.
راشیگه‌یاند: پرسی دواكه‌وتنی ده‌ستبه‌كاربوونی په‌رله‌مان و پێكهێنانی حكومه‌تی هه‌رێم بووه به‌كارێكی نادروست بۆ میلله‌ته نیشتمانپه‌روه‌ره‌كه‌مان، هه‌ر بۆیه یه‌كێتی وه‌ك حزبێكی سه‌ره‌كی پێكهێنانی حكومه‌ت نابێت گوێ له‌بیانووی لایه‌نه‌كانی تر بگرێت، به‌ڵكو پێویسته به‌زووترین كات په‌رله‌مان چالاك بكرێت و هه‌رێمی كوردستان حكومه‌تێكی خۆی هه‌بێت.
سه‌عدی ئه‌حمه‌د پیره ئاماژه‌ی به‌وه‌شكرد، له‌سه‌رتاسه‌ری هه‌رێمێكی یه‌كگرتوودا حكومه‌تێكی بنكه فراوان به‌بێ یه‌كێتی و پارتی پێكنایه‌ت، هه‌ربۆیه پێویسته یه‌كێتی و پارتی هه‌م ده‌ست و په‌نجه به زۆر شت نه‌رم بكه‌ن، هه‌م جێگه‌ی لایه‌نه سیاسییه‌كانی تریش له‌حكومه‌ت بكه‌نه‌وه.
پەیامنێری كوردسات نیوز رایگەیاند، بەهۆی پێكدادانی دوو پاس لەسەر رێگای دیمەشق-دێرەزوور لە سوریا كە پاسێكیان هێزی ئەمنی سوریای تێدابووە، ژمارەیەكی زۆر گیانیان لەدەستداوە و برینداربوون.
نەجیب نەعسان بەڕێوەبەری فریاكەوتن لە وەزارەتی تەندروستی سوریاش رایگەیاندووە، بەهۆی روداوەكەوە تائێستا 35 كەس گیانیان لەدەستداوە و 30 كەسی تریش برینداربوون و هەندێكیشیان برینەكانیان سەختە و تەندروستییان نا جێگیرە.
فەرماندەی ناوەندی سوپای ئەمریكا رایگەیاند، كەشتییەكی نەوتهەڵگریان لە گەروی هورمز كردوەتە ئامانج كە ویستویەتی گەمارۆی سوپای ئەمریكا تێبپەڕێنێت.
فەرماندەی ناوەندی سوپای ئەمریكا (سێنتكۆم) لە راگەیەنراوێكدا بڵاویكردەوە، هێرشیان كردوەتەسەر كەشتییەكی نەوتهەڵگر لە گەروی هورمز كە هەوڵی ئەوەیداوە گەمارۆی سوپای ئەمریكا تێبپەڕێنێت.
ئاماژەی بەوەشكردووە، تیمی كەشتییەكە چەند جارێك ئاگاداركرانەوە، بەڵام گوێیان بە هۆشدارییەكە نەدا و هێرشیان كرایەسەر.
ڤلۆدیمیر زیلینسكی سەرۆكی ئۆكراین رایگەیاند، كەشتییەكی روسییان لە دەریای قەزوین كردوەتە ئامانج بەهۆی ئەوەی پێداویستی سەربازی بۆ ئێران دەگواستەوە.
وەزارەتی بەرگریی روسیا ئاشکرایکرد، لە ماوەی 24 سەعاتی رابردودا زیاتر لە هەزار درۆنی ئۆکراینیان خستووەتە خوارەوە و زنجیرەیەک هێرشیان کردووەتە سەر ناوەندە لۆجستییەکان و ژێرخانی وزە و بەندەرەکانی ئەو وڵاتە.
ئەمڕۆ شەممە، وەزارەتی بەرگریی روسیا لە راگەیەنراوی رۆژانەی خۆیدا ئاماری دواین رووبەڕووبوونەوە سەربازییەکانی لەگەڵ سوپای ئۆکرین بڵاوکردەوە.
بەپێی راگەیەنراوەکە، هێزەکانی بەرگریی ئاسمانیی روسیا لە ماوەی سەعاتی رابردوودا هەزار و 60 درۆن و موشەکی ئاڕاستەکراوی ئۆکراینیان خستووەتە خوارەوە، جیا لە تێکشکاندنی بەلەمێکی درۆنی لە ئاوەکانی دەریای رەشدا.
وەزارەتی بەرگریی روسیا ئاماژەی بەوەشکردووە، هێزەکانیان لە 152 ناوچەی جیاوازدا هێرشیان کردووەتە سەر سەنتەرە لۆجستییەکان، وۆرکشۆپەکانی دروستکردن و کۆگاکردنی درۆنی دوورمەودا، هەروەها ژێرخانەکانی سووتەمەنی، وزە، گواستنەوە و بەندەرەکانی سەر بە سوپای ئۆکراین و شوێنی کۆبوونەوەی سەربازان و چەکدارە بیانییەکان.
پێشتریش لە هەمان رۆژدا، بەرگریی ڕووسیا رایگەیاندبوو، هێزەکانیان چەندین ئامانجی پەیوەندیدار بە سوپای ئۆکراینیان لە سێ بەندەری باشوری ئۆکراین پێکاوە.
وەزیری دەرەوەی ئێران، عەباس عراقچی، ئەمڕۆ شەممە، جەختی کردەوە لەوەی بەندی پێنجەمی یاداشتی لێکتێگەیشتن لەبارەی گەروی هورمز روونە و دەقەکەی دەڵێت ئێران ئەو لایەنەیە کە میکانیزمی پەڕینەوە لە گەروەکە دیاری دەکات.
عراقچی وتی: کاتی خۆی کردنی رێڕەوێکی جیاواز لەلایەن ویلایەتە یەکگرتووەکانەوە لەگەڵ بەندەکانی یاداشتی لێکتێگەیشتنەکەدا ناگونجێت، هەروەها ئاماژەی بەوەش کرد: دەبوو واشنتۆن راوێژ لەگەڵ تاران بکات سەبارەت بە زیادکردن یان سڕینەوەی هەر رێڕەوێک لە هورمز تاوەکو لە چوارچێوەی بەندی پێنجەمدا بێت.
وتیشی: ئێران دوای روودانی حاڵەتەکانی پێكدادان لە گەروی هورمز، لە کاتی دانوستانەکانی سویسڕادا بڕیاری دا هێڵێکی پەیوەندیی راستەوخۆ بکاتەوە بۆ لادانی لێکتێنەگەیشتن، ئاماژەی بەوەش دا: پێشهاتەکان دەریانخست کە بابەتەکە لە لێکتێنەگەیشتنێکی سادە تێپەڕیوە و لایەنی بەرانبەر سوور بووە لەسەر دروستکردنی رێڕەوی تر.
ئاماژەی بەوەشکرد: واشنتۆن هەوڵی دەدا باری دۆخەکە بەرەو گرژی ببات، تۆمەتباریشی کردن بە پێشێلکردنی رێککەوتنەکە و بوونە هۆی گەیشتن بە دۆخی ئێستا.
لە بەغداد 18یەمین كۆنفرانسی بەرەنگاربوونەوەی توندوتیژی دژی ژنان دەستیپێکرد، تێیدا سەرۆک کۆماری عیراق وتارێکی پێشکەشکرد و داوای کرد رێژەی نوێنەرایەتیکردنی ژنان لە پۆستە باڵاکانی وڵاتدا زیاد بکرێت.
نزار ئامێدی، سەرۆک کۆماری عیراق لە میانی کۆنفرانسەکەدا رایگەیاند، ژنان رۆڵی گرنگیان لە کۆمەڵگەدا بینیوە و ئەوان مافەکانی ژنان دەپارێزن.
وتیشی، ژن هاوبەشێكی تەواو دەبێت لە دروستكردنی ئێستا و داهاتوودا و رۆڵیان هەیە لە بەرەوپێشچوونی وڵات لەسەرجەم کایەکاندا.
سەبارەت بە پرسی بەرەنگاربوونەوەی گەندەڵی، سەرۆک کۆماری عیراق ئەوەشی خستەڕوو، ئەوان لە سەرۆكایەتی كۆمار پشتگیری لە پاراستنی سامانی وڵات دەکەن.
سەرۆک کۆمار جەختیکردەوە، "هیچ ئاسایش و سەقامگیرییەک لە ناوچەکەدا بەدی نایەت بەبێ ئاسایش و سەقامگیریی عیراق"، هاوكات ئاماژەی بەوەدا، بەهیزیی عیراق لە یەکگرتوویی و لەپێشخستنی بەرژەوەندییە نیشتمانییەکان لەسەرووی هەموو شتێکەوە.
کەشناسیی هەرێم پێشبینییەکانی بۆ کەشوهەوای ئەمڕۆ شەممە و سبەینێ یەکشەممە بڵاوکردەوە و ئاشکرایکرد، پلەکانی گەرما کەمێک نزم دەبنەوە.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ شەممە ئاسمان ساماڵ دەبێت و ئاراستەی با بەرەو باکوری خۆرهەڵات دەبێت، پلەکانی گەرماش بەراورد بە تۆمارکراوەکانی دوێنێ کەمێک دادەبەزن.
دەربارەی کەشوهەوای سبەی یەکشەممەش، کەشناسی ئاماژەی بەوەکردووە، ئاسمان بە ساماڵی دەمێنێتەوە و پلەکانی گەرمای سبەینێش نزیک دەبنەوە لە تۆمارکراوەکانی ئەمڕۆ.
لەلای خۆشیەوە دەستەی كەشناسیی عیراق رایگەیاند، بەهۆی هاتنی بارستە هەوایەكی فێنك لە باشوری ئەوروپاوە، پلەكانی گەرما ئەم هەفتەیە بە شێوەیەكی بەرچاو دادەبەزن و ناگەنە بە 50 پلەی سیلیزی.
بەرزترین پلەکانی گەرمای پێشبینیکراو بە پلەی سیلیزی
هەولێر: 41 پلەی سیلیزی
سلێمانی: 40 پلەی سیلیزی
دهۆک: 40 پلەی سیلیزی
هەڵەبجە: 41 پلەی سیلیزی
سۆران : 39 پلەی سیلیزی
زاخۆ: 41 پلەی سیلیزی
پیرمام: 38 پلەی سیلیزی
گەرمیان : 44 پلەی سیلیزی
حاج ئۆمەران :31 پلەی سیلیزی
تاران ئەمریکا بە تێکدانی ئاسایشی گەروی هورمز تۆمەتبار دەکات و وەزیری دەرەوەی ئێران رایدەگەیەنێت؛ واشنتۆن بەڵێنەکانی کۆتاییهێنان بە جەنگی پێشێل کردووە.
وەزارەتی دەرەوەی ئێران ئاشکرایکرد، عەباس عراقچی وەزیری دەرەوەی ئێران لەگەڵ هاوتا چینییەکەی گفتوگۆی کردووە دەربارەی لێکەوتەکانی "پێشێلکارییەکانی ئەمریکا بۆ بەندەکانی لێکتێگەیشتنی کۆتاییهێنان بە جەنگ" و واشنتۆنی بە بەرپرسیار زانی لە نەبوونی ئاسایش لە گەروی هورمز.
وەزارەتی دەرەوەی ئێران ئاماژەی بەوەشکرد، عراقچی لە کۆبوونەوەکەیدا لەگەڵ وەزیری دەرەوەی چین جەختی کردووەتەوە کە تێکچوونی ئاسایشی گەرووی هورمز دەرئەنجامی پابەندنهەبوونی ئەمریکایە بە بەڵێنەکانی، هاوکات سەرکۆنەی هێرشەکانی ئەمریکای کرد کە ژێرخانی ئابوری و خزمەتگوزارییەکانی ئێرانیان کردووەتە ئامانج.
لە بەشێکی تری کۆبوونەوەکانیدا و لە پەیوەندییەکی تردا لەگەڵ وەزیری دەرەوەی روسیا، عراقچی جەختی لەسەر ئیرادەی تاران کردەوە بۆ رێگریپێکردن لە ئەمریکا تا گەروی هورمز بۆ مەبەستی خۆی بەکارنەهێنێت.
ناتانیاهۆ سەردانی ئەمریکا دەکات و لە کۆشکی سپی لەگەڵ ترەمپ کۆدەبێتەوە.
دۆناڵد ترەمپ، سەرۆکی ئەمریکا رایگەیاند، لە چەند رۆژی داهاتوودا بنیامین ناتانیاهۆ، سەرۆک وەزیرانی ئیسرائیل سەردانی ئەمریکا دەکات.
لە میانی وتارێکیدا لە ئاهەنگی شانی دانیشتنی رۆژنامەنووسانی کۆشکی سپی، ترەمپ رەخنەی توندی لە چاک شومەر، رابەری دیموکراتەکان لە ئەنجومەنی پیران گرت و بە "فەلەستینی" وەسفی کرد، ترەمپ بە شێوەیەکی گاڵتەجاڕانە وتی: "بەیانی جلوبەرگێکی جوانی فەلەستینی بۆ شومەر دەنێرم، تا بتوانێت لە رۆژانی داهاتوودا بەو شێوازە پێشوازی لە بینینی ناتانیاهۆ بکات کاتێک سەردانی شارەکە دەکات."
لە لایەکی ترەوە، نوسینگەی سەرۆک وەزیرانی ئیسرائیل رایگەیاندبوو، ناتانیاهۆ رۆژی دووشەممە سەردانی واشنتۆن دەکات و رۆژی سێشەممە لەگەڵ ترەمپ کۆدەبێتەوە، هەروەها ئاماژەی بەوەدا کە ناتانیاهۆ بەشداری لە رێوڕەسمی بەخاکسپاردنی سیناتۆر لینزسی گراهام دەکات.
لەلایکەی دیکەوە، ماڵپەڕی ئەكسیۆس ئاشكرایكرد، بنیامین ناتانیاهۆ سەرۆك وەزیرانی ئیسرائیل لە سەرەتای هەفتەی داهاتوودا سەردانەكەی بۆ ئەمریكا دەستپێدەكات و لە كۆشكی سپی لەگەڵ دۆناڵد ترەمپ، سەرۆكی ئەمریكا كۆدەبێتەوە.